Chapter 6

śrībadrīśvaryuvāca |
anādiśrīkṛṣṇanārāyaṇanārāyaṇaprabho |
naranārāyaṇaviṣṇo badrīnāthasutāpasa || 1 ||
[Analyze grammar]

suśīlākhyo bhūsuro vai kadā kutrā'bhavatpurā |
pitṛtṛptirbadareṇa kṛtā yena divampradā || 2 ||
[Analyze grammar]

śrīnaranārāyaṇa uvāca |
śṛṇu badrīrame devi suśīlasya kathānakam |
vihārākhye śubhe deśe pulahāśramasannidhau || 3 ||
[Analyze grammar]

gaṇḍakyāḥ subhage tīre mauktikāhārapattane |
suśīlo'bhūdvipravaryaḥ kuṭumbibahulaḥ khalu || 4 ||
[Analyze grammar]

pitā tasyā'bhavannāmnā śrīśīlaḥ karmaṭhaḥ sadā |
vidvān lobhābhibhūtaśca vyayabhītiparāyaṇaḥ || 5 ||
[Analyze grammar]

kuṭumbārthe vyayahīno labdhadravyādisañcayaḥ |
utsavādivihīnaśca vratotsāhādivarjitaḥ || 6 ||
[Analyze grammar]

mahīmānādisammāne kadarya iva nirvyayaḥ |
veṣe yāne bhojane'pi rūkṣa iva vanecaraḥ || 7 ||
[Analyze grammar]

devapūjādikāryeṣu bhikṣopalabdhanirvahaḥ |
ātithyādivihīnaśca śuṣkayajñaparāyaṇaḥ || 8 ||
[Analyze grammar]

apatyānāṃ dugdhapāne piṣṭamaṇḍapradāyakaḥ |
śākādiśūnyamadhyāhnabhojano ghṛtavarjitam || 9 ||
[Analyze grammar]

kṛśarānnaṃ bhunaktyeva bhojayatyapi yoṣitam |
putrādīn śākamātraṃ ca bhojayatyapi tadvidham || 10 ||
[Analyze grammar]

dānādivarjito vipraḥ śrīśīlaḥ karmaṭhaḥ pitā |
nadītīre svayaṃ gatvā snātvā nītvā phalādikam || 11 ||
[Analyze grammar]

samidhaśca svayaṃ samāhṛtyāgnau prajuhoti vai |
tatrāpi bindumātraṃ vai ghṛtaṃ dadāti nā'dhikam || 12 ||
[Analyze grammar]

kaupīnaṃ cā'ñcalaṃ dhatte nādhikaṃ vastramityapi |
yajñapaṭṭena vai skandhe nirvahatyeva bhūsuraḥ || 13 ||
[Analyze grammar]

gṛhastho'pi lobhavaśāttāpaso hi muniryathā |
tathā'yaṃ vartate gehe paryuṣitena vai kvacit || 14 ||
[Analyze grammar]

bhājīṃ labdhvā'thavā kandān mūlāni vā dalāni vā |
vane'raṇye'pyaṭavyāṃ vā''nayatyayaṃ bhunakti tat || 15 ||
[Analyze grammar]

evaṃvidhasya viprasya putrā daśā'bhavan śanaiḥ |
putryaḥ saptā'bhavaṃścāpi brāhmaṇadharmaśobhitāḥ || 16 ||
[Analyze grammar]

jyeṣṭhaḥ suśīlanāmā'sya suto vedādividyayā |
khyātimāpa samasteṣu pārśvagrāmeṣu karmaṭhaḥ || 17 ||
[Analyze grammar]

udāro dānaśīlaśca dharmotsavaparāyaṇaḥ |
bhojane chādane bhogye kuṭumbaparipoṣakaḥ || 18 ||
[Analyze grammar]

rājamānādipātraṃ ca prajāsammānasatkṛtaḥ |
yajñakāryādiniṣṇāto vaiṣṇavo bhaktarāḍ yathā || 19 ||
[Analyze grammar]

satāṃ sevāvratavāṃśca sādhvīsevāparāyaṇaḥ |
ātithyadharmo gosevāgrāmasevāparāyaṇaḥ || 20 ||
[Analyze grammar]

pāṭhako bālakānāṃ ca kathākāraśca sarvadā |
evaṃvidhaṃ nijaṃ putraṃ lomadharmavivarjitam || 21 ||
[Analyze grammar]

vyayaśīlaṃ pitā vīkṣya gṛhāddūraṃ cakāra tam |
tenā'yaṃ svaṃ gṛhaṃ tyaktvā yayau tu pattanāntaram || 22 ||
[Analyze grammar]

dārābhāgyā'bhidhaṃ rājyaṃ tadrājñā tu kṛtādaraḥ |
uvāsa svasthacitto'yaṃ prajārājādimānitaḥ || 23 ||
[Analyze grammar]

dārābhāgyeśvaro rājā nāmnā dāreśvarābhidhaḥ |
saudhaṃ vāsāya viduṣe suśīlāyā'rpaṇaṃ dadau || 24 ||
[Analyze grammar]

bhūmiṃ kṣetraṃ vāṭikāṃ ca mahodyānaṃ ca vāhanam |
annaṃ nirvāhamātraṃ ca dadau dāne'rkaparvaṇi || 25 ||
[Analyze grammar]

vipro'yaṃ prāpya sanmānaṃ prasannaḥ śubhasampadā |
śāntacitto hariṃ bheje śrīpatiṃ nijavallabham || 26 ||
[Analyze grammar]

jīvikāṃ nijayātrāyā yogyāṃ labdhvā tutoṣa ha |
upādhiṃ sarvathopārjyagocaraṃ sa vihāya vai || 27 ||
[Analyze grammar]

lakṣmīnārāyaṇasaṃhitāyāḥ kathāṃ tu pratyaham |
nagare vācayāmāsa prajāsaṃghasabhāsthale || 28 ||
[Analyze grammar]

nṛpo dāreśvaraścāpi pratyahaṃ tūpatiṣṭhati |
ākhyānāni vividhāni bhaktabhaktiparāṇi hi || 29 ||
[Analyze grammar]

anādiśrīkṛṣṇanārāyaṇākhyānāni yānyapi |
śrutvā śrutvā modate vai vaiṣṇavāsyodgatāni ca || 30 ||
[Analyze grammar]

kathānte kārayatyeva savādyotsavakīrtanam |
hare kṛṣṇa bālakṛṣṇa śrīpate puruṣottama || 31 ||
[Analyze grammar]

anādiśrīkṛṣṇaṇanārāyaṇa śrībadarīśvara |
evaṃ kṛtvā kīrtanaṃ ca naivedyaṃ vinivedya ca || 32 ||
[Analyze grammar]

prasādaṃ saṃvibhajyā'tha gṛhaṃ yānti sabhājanāḥ |
vipraḥ sāyaṃ harerbhaktiṃ prātarbhaktiṃ karoti ca || 33 ||
[Analyze grammar]

madhyāhnabhaktiṃ kṛtvā'tha bhojanaṃ sa karoti vai |
sāyaṃ prātarjanāstasya samāgamārthamutsukāḥ || 34 ||
[Analyze grammar]

āyānti śreyase nityaṃ mumukṣavaḥ sumānasāḥ |
tebhyo mantraṃ vipravaryo dadāti mokṣadāyakam || 35 ||
[Analyze grammar]

oṃ namaḥ śrīkṛṣṇanārāyaṇāya svāmine svāhā |
bahavo vaiṣṇavāścaivaṃ sampannāstatra pattane || 36 ||
[Analyze grammar]

narāṇāṃ yoṣitāṃ cāpi bhaktisaṃghā sudhārmikāḥ |
abhavan bhaktikarmāṇo bhajanti śrīprabhāpatim || 37 ||
[Analyze grammar]

pattane tu yathā tadvad grāmeṣu cetareṣvapi |
bhaktasaṃghā abhavaṃśca kṛṣṇanārāyaṇāśritāḥ || 38 ||
[Analyze grammar]

atha bhaktottamaṃ śreṣṭhaṃ vipraṃ bhāgavataṃ śubham |
yogyaṃ matvā'smai svaputrīṃ rājā kundanikāṃ dadau || 39 ||
[Analyze grammar]

suśīlo'yaṃ bhāgyavāṃśca labdhvā kundanikāṃ satīm |
patnīṃ nṛpasutāṃ divyāṃ mumude kṛpayā hareḥ || 40 ||
[Analyze grammar]

sāpi lakṣmīsamā dharmavatī bhaktimatī satī |
bheje'nādikṛṣṇanārāyaṇāryaṃ vallabhaṃ prabhum || 41 ||
[Analyze grammar]

udārā hi maharddhisaṃbhṛtā dāneśvarī priyā |
kṛṣṇapriyā sadā kṛṣṇabhaktiparā vyajāyata || 42 ||
[Analyze grammar]

jāmātā rājabhavane śobhate bhāgyavardhitaḥ |
kīrtiścā'syā'bhavad vyāptā'bhitaḥ śuśrāva tāṃ pitā || 43 ||
[Analyze grammar]

pitrā prahitāḥ putrāśca putryaścāpi sahodaram |
jyeṣṭhaṃ draṣṭuṃ cāyayuśca mahotsāhasamanvitāḥ || 44 ||
[Analyze grammar]

mātā'pi gālavīdevī putraṃ draṣṭumupāyayau |
pitā tasthau gṛhe tvekastyāgadoṣātilajjitaḥ || 45 ||
[Analyze grammar]

dhanalobhaparaścāpi gṛhe dhanasya rakṣakaḥ |
daivayogena viprasya śrīśīlasyā'bhavajjvaraḥ || 46 ||
[Analyze grammar]

āyuḥkṣayena maraṇaṃ prāpto gṛhe'tinirjane |
jñātijanaiḥ śanairjñāte maraṇe tatkriyā kṛtā || 47 ||
[Analyze grammar]

pāpinaśca kadaryasya lubdhasya badarīśvari |
mṛtiḥ śūnyā jāyate vai bahuṣvapi kuṭumbiṣu || 48 ||
[Analyze grammar]

lobhadoṣeṇa vipro'sau vāsanādripravāsitaḥ |
pretatāṃ labdhavāṃstatra gṛhe bhūtaśarīradhṛk || 49 ||
[Analyze grammar]

gṛhapṛdhvīgate dravye kṛtavāso hi tiṣṭhati |
nānyaḥ praveśaṃ labhate praviṣṭaṃ pīḍayatyayam || 50 ||
[Analyze grammar]

khyāto'bhavat sa bhūto'sau pretaceṣṭāparāyaṇaḥ |
adattadāno labhate naivā'nnaṃ bhojanaṃ jalam || 51 ||
[Analyze grammar]

kṣudhāyuktaḥ kvacid rauti rātryardhottarameva saḥ |
kvaciddhasati sasphoṭaṃ garjayannambaraṃ bahu || 52 ||
[Analyze grammar]

kvacid viprātmako bhūtvā grāmamadhye'rdharātrike |
samaye ca tadūrdhve ca viharatyatiduḥkhitaḥ || 53 ||
[Analyze grammar]

śrīśīlasya gatistvevaṃ jātā badrīprabheśvari |
dārabhāmye'pi putrāśca putryaśca patnikā tathā || 54 ||
[Analyze grammar]

rājasammānamāsādya sukhaṃ labdhvā mahattaram |
tatraiva jyeṣṭhabhrātuścā''jñayā nyūṣurnirantaram || 55 ||
[Analyze grammar]

devakanyāsamā rūpe yuvatyo viprakanyakāḥ |
rājakuṭumbe bhāgyena vivāhitāstato'bhavan || 56 ||
[Analyze grammar]

mātā'bhavat susukhinī sutā rājñyo'bhavannapi |
putrāścāpi khyātimanto nṛpakuṭumbayoginaḥ || 57 ||
[Analyze grammar]

nṛpakuṭumbikanyānāṃ patayaste tato'bhavan |
bhaktiḥ kṛtā hi phalati satāṃ sevā phalatyapi || 28 ||
[Analyze grammar]

dānaṃ puṇyaṃ copakāraścāśīrvādāḥ phalantyapi |
jyeṣṭhabhrātuḥ puṇyayogaiḥ sarve rājakuṭumbavat || 99 ||
[Analyze grammar]

jātaṃ yāne bhojane ca dāreṣu ṛddhivaibhave |
yatra lakṣmīḥ prasannā'sti yatra nārāyaṇo'pi ca || 60 ||
[Analyze grammar]

yatra devāḥ pratuṣṭāśca tatra nyūnaṃ na vidyate |
kṛtaṃ kālena phalati nā'kṛtaṃ tvāpyate kvacit || 61 ||
[Analyze grammar]

badrīprabhe suśīlo'yaṃ prajeśvara ivā'bhavat |
mama bhaktyā kathayā ca kīrtanairdānapūjanaiḥ || 62 ||
[Analyze grammar]

athaikadā pitā preto nijapatnyāmupāyayau |
āveśaṃ bahulaṃ prāpya ruroda bahudhā tataḥ || 63 ||
[Analyze grammar]

bhajanena kṛtaḥ sarvaiḥ sphuṭākṣaraśca ko bhavān |
jagādā'haṃ pitā nāmnā śrīśīlo'smi mṛto'smi ca || 64 ||
[Analyze grammar]

atha śokaṃ gatāḥ sarve ruruduścāpi laukikam |
kriyāṃ cakrustato rājña ājñāmāsādya te janāḥ || 65 ||
[Analyze grammar]

yayau laukikakāryārthaṃ śrāddhārthaṃ tanmṛtisthalam |
pattanaṃ mauktikahāraṃ cakruḥ śrāddhādi karma ca || 66 ||
[Analyze grammar]

uddhārārthaṃ pitustatra bahudānāni te daduḥ |
putrāścakrurhi bahudhoddhārapuṇyāni tatra ha || 67 ||
[Analyze grammar]

gaṇḍakyā cā'sthivinyāsaṃ cakruste vārṣikaṃ vidhim |
yaddhanaṃ tvarjitaṃ pitrā nihitaṃ bhūtale'pi ca || 68 ||
[Analyze grammar]

sarvaṃ dāneṣu putrāste daduḥ kadaryadūṣitam |
tathāpi pretaviprasya sadgatirna vyajāyata || 69 ||
[Analyze grammar]

kṛte yajñe'pi badrīśi na muktirvāsanāvataḥ |
kiṃ punardānakarmādi mokṣadaṃ vāsanāvataḥ || 70 ||
[Analyze grammar]

na mokṣaṃ samavāpā'sau punaḥ patnyāmupāyayau |
sakampaṃ ca mahākrośaṃ kṛtvovāca nijātmajān || 71 ||
[Analyze grammar]

na me muktiḥ prajātā vai vāsanā bādhate hi mām |
bhojanasya suveṣāderlobhasya ca dhanasya ca || 72 ||
[Analyze grammar]

vāsanāparihārārthaṃ yāntu badarikāśramam |
naranārāyaṇāvāsaṃ maharṣigaṇasevitam || 73 ||
[Analyze grammar]

śrāddhaṃ madarthaṃ tatraiva kurvantu badarītale |
divyaṃ ca badaraṃ mahyaṃ bhojanārthaṃ dadatvapi || 74 ||
[Analyze grammar]

nārāyaṇārpitaṃ vāri phalaṃ ca badaraṃ mahat |
tathā ca valkalaṃ vastraṃ kambalaṃ vā yathocitam || 75 ||
[Analyze grammar]

badarīphalakṛddhāraṃ badarīrasamityapi |
śrāddhe mahyaṃ dadatveva tṛptirme śāśvatī tathā || 76 ||
[Analyze grammar]

bhaviṣyati kṣudhānāśastṛṣānāśo bhaviṣyati |
vāsanā badrīśanārāyaṇāgre me vinaṃkṣyati || 77 ||
[Analyze grammar]

patnyāmāviśya badarīnāthaṃ tvāyāmi vai saha |
kurvantu mama kāryāṇi divye badarikā''śrame || 78 ||
[Analyze grammar]

ekasyapi badarasya dānena tarpaṇaṃ mama |
mokṣadaṃ śāśvatatṛptipradaṃ syānme na saṃśayaḥ || 79 ||
[Analyze grammar]

anyathā me na vai mokṣaḥ koṭidānairapīha vai |
kadaryāṇāṃ na vai mokṣastīrthāyute kṛte'pi hi || 80 ||
[Analyze grammar]

atha te prayayuḥ sarve padbhyāṃ badarikāśramam |
saṃsnustatrā''digaṃgāyā nemurnaraṃ narāyaṇam || 81 ||
[Analyze grammar]

badrīprabhāṃ praṇemuśca sādhvarṣīnārcayaṃstathā |
sarvatīrthāni kṛtvaiva śrāddhaṃ cakruḥ samāhitāḥ || 82 ||
[Analyze grammar]

jyeṣṭhaputro dadau piṇḍān badarākhyaṃ phalaṃ tathā |
gāṃgeyaṃ salilaṃ nārāyaṇapādaprasādajam || 83 ||
[Analyze grammar]

dadau suvarṇadānaṃ ca viprāya valkalaṃ tathā |
godānaṃ ca tathā dānottamāni bhūmidānakam || 84 ||
[Analyze grammar]

gorasādipradānāni miṣṭānnāni ghṛtāni ca |
ambarāṇi vicitrāṇi dadurnṛpocitāni hi || 85 ||
[Analyze grammar]

jagrāha śrīśīlavipraḥ sākṣādāgatya vai kare |
badaraṃ ca jalaṃ ramyaṃ valkalaṃ śarkarāṃ tathā || 86 ||
[Analyze grammar]

anyat sarvaṃ viśiṣṭaṃ ca prāpya tṛptiṃ jagāma saḥ |
patnyāṃ praviśya tatraiva prāha tṛpto'smi sarvathā || 87 ||
[Analyze grammar]

idānīṃ śāśvatā lokā madarthaṃ samupasthitāḥ |
pretatā me gatā tvatra hyeṣa yāmi paraṃ padam || 88 ||
[Analyze grammar]

vāsanā me tadā naṣṭā māyā naṣṭā durantagā |
pāpāni mama naṣṭāni puṇyaṃ jātaṃ ca muktikṛt || 89 ||
[Analyze grammar]

vimānaṃ ca madarthaṃ vai samāgataṃ sutaijasam |
naranārāyaṇakṛṣṇapāṣadaiḥ śobhanaṃ param || 90 ||
[Analyze grammar]

sarve bhavantu sukhinaḥ putrāḥ putryaśca me priyā |
ekena badareṇā'haṃ śāśvatīṃ tṛptimāptavān || 91 ||
[Analyze grammar]

eṣa yāmi svasti vo'stu tārito'haṃ vrajāmi vai |
ityuktvā divyasadane tvadhiruhya vimānake || 92 ||
[Analyze grammar]

pārṣadairviṣṇubhaktaiśca sanmānito hi paśyatām |
sarveṣāṃ nijaputrāṇāṃ putrīṇāṃ yoṣitastathā || 93 ||
[Analyze grammar]

maharṣīṇāṃ paśyatāṃ ca vimānenā'kṣaraṃ yayau |
mahāścaryaṃ gatāḥ sarve naranārāyaṇāśrame || 94 ||
[Analyze grammar]

pitṛmuktiṃ vidhāyaiva nyavartanta sutādayaḥ |
pūjayitvā badarīśīṃ badrīnāthaṃ narāyaṇam || 95 ||
[Analyze grammar]

naraṃ sampūjya badaraṃ sabījaṃ prāpya te tataḥ |
avatīrya himādrestu nijālayaṃ yayurdrutam || 96 ||
[Analyze grammar]

mauktikāhāramāsādya datvā dānaṃ gṛhasya ca |
sarveṣāmupakaraṇādīnāṃ dānaṃ pradāya ca || 97 ||
[Analyze grammar]

āyayuste sukhasthānaṃ dārābhāgyākhyapattanam |
śvaśuraṃ nṛpatiṃ dāreśvaraṃ tathā prajājanān || 98 ||
[Analyze grammar]

bhaktān bhaktānikāścāpi prāhurvṛttāntameva te |
āścaryaṃ paramaṃ prāptā badarīśapratāpajam || 99 ||
[Analyze grammar]

evaṃ badaradānasya māhātmyaṃ mokṣadaṃ param |
kathitaṃ te badrike vai sarvāpadvinivārakam || 100 ||
[Analyze grammar]

tataḥ śrutvā janasaṃghā dārābhāgyābhidho nṛpaḥ |
prajāśca saṃghaśo bhūtvā kuṭumbasahitā yayuḥ || 101 ||
[Analyze grammar]

badaryāḥ khalu yātrārthaṃ naranārāyaṇāśramam |
sarvasāmagrikāyuktā bhaktilagnaikamānasāḥ || 102 ||
[Analyze grammar]

bhajantaḥ śrībadrikeśaṃ dhyāyanto badarīśvarīm |
prāpurhimālaye badrīprabhe badarikāśramam || 103 ||
[Analyze grammar]

iti śrīlakṣmīnārāyaṇīyasaṃhitāyāṃ caturthe tiṣyasantāne śrīśīlasya putrāṇāṃ dārābhāgyapattane rājasammānaṃ śrīśīlasya maraṇaṃ pretatā taduddhārāya badrikāśrame śrāddhe badarādidānaṃ pretamokṣaṇaṃ cetyādinirūpaṇanāmā ṣaṣṭho'dhyāyaḥ || 6 ||
[Analyze grammar]