Chapter 2

śrīnaranārāyaṇa uvāca |
śṛṇu badrīrame devi tava bhaktakathānakam |
yathā tvaṃ bradarībhāvaṃ prāptā bhaktivaśānugā || 1 ||
[Analyze grammar]

badaro nāma rājarṣirhimabhūmau purā'bhavat |
mahābhāgavato bhakto vaiṣṇavottama ūrdhvagaḥ || 2 ||
[Analyze grammar]

pṛthivyardhaṃ śaśāsā'sau divyasāmarthyasādhanaiḥ |
vimānānyabhavan yasya pāre lakṣaṃ sukhāni ca || 3 ||
[Analyze grammar]

sauvarṇāni kalpavṛkṣodyānopaśobhitāni hi |
divyakanyānivāsāni smṛddhānyuccāvacāni ca || 4 ||
[Analyze grammar]

ekaikaṃ sūryavadbhāti candravattejasāṃ cayaiḥ |
yatprabhābhirniśā pṛthvyāṃ līneva vartate tadā || 5 ||
[Analyze grammar]

bhrāntirnakṣatratārāṇāṃ jāyate'lpe vimānake |
candrajyotsnā tu militā tadā dugdhāyate'mbare || 6 ||
[Analyze grammar]

indradhanuḥprakāśāścotprasaranti ghaneṣvapi |
vimānānāṃ kiraṇānāṃ badarasya mahātmanaḥ || 7 ||
[Analyze grammar]

ekaṃ satyābhidhaṃ divyaṃ vimānaṃ satyasaṃcaram |
brahmasabhāyāṃ nṛpatistena yāti hi yogirāṭ || 8 ||
[Analyze grammar]

dvitīyaṃ cāryamasaṃjñaṃ pitalokādisañcaram |
tṛtīyaṃ tridivaṃ nāma caindrapadaṃ caturthakam || 9 ||
[Analyze grammar]

pañcamaṃ bhāskaraṃ nāma ṣaṣṭhaṃ kaumudakaṃ tathā |
saptamaṃ dhruvasaṃjñaṃ cā'ṣṭamaṃ kailāsanāmakam || 10 ||
[Analyze grammar]

dharmasaṃjñaṃ navamaṃ ca merusaṃjñaṃ tato'dhikam |
śvetavāhaṃ kṣīravāhaṃ talākhyānyaparāṇi ca || 11 ||
[Analyze grammar]

lokālokābhidhaṃ cāpi manojavāni tāni vai |
yathābhidhānaguṇakānyatidigantagāni ca || 12 ||
[Analyze grammar]

sarvabhogyarddhipūrṇāni yathā dhiṣṇyāni tāni ha |
teṣu sarveṣu ratnānāṃ suvarṇānāṃ ca mūrtayaḥ || 13 ||
[Analyze grammar]

anādiśrīkṛṣṇanārāyaṇasya pratimāḥ śubhāḥ |
śrīmāṇikyāmahālakṣmīyutā yugalavigrahāḥ || 14 ||
[Analyze grammar]

gajāsane sthāpitāḥ pūjitāḥ śrībadareṇa ha |
sarvaśṛṃgāraśobhāḍhyāḥ sarvagandharasārpitāḥ || 15 ||
[Analyze grammar]

devadūtāḥ pārṣadāśca bhūsurāḥ sādhavo'malāḥ |
vaimānikāḥ pravidyante teṣu bhāgavatottamāḥ || 16 ||
[Analyze grammar]

mahābhāgavatīsatyaḥ sādhvyaḥ śīlaparāyaṇāḥ |
candrānandāścandrakāntyānanāḥ svarṇaprabhānvitāḥ || 17 ||
[Analyze grammar]

mahābhaktānikāsteṣu vidyante badarasya ha |
kīrtanaṃ satataṃ teṣu jāyate badarīśvari || 18 ||
[Analyze grammar]

yatprasaṃgena devādyā yānti brahma sanātanam |
naitādṛśo'bhavad bhakto yena jagat prapūritam || 19 ||
[Analyze grammar]

harikīrtanabhaktyāḍhyamahāghoṣaiḥ samastakam |
sthale sthale'sya nṛpaterjayaghoṣaḥ pravartate || 20 ||
[Analyze grammar]

badarasya vimānāni yaddiśaṃ yanti taddiśi |
namanti devamunayo bhaktyā nṛtyanti tatstriyaḥ || 21 ||
[Analyze grammar]

pūjayanti vimāne śrīkṛṣṇanārāyaṇacchavim |
nīrājayanti muditā datvopadāḥ prayānti ca || 22 ||
[Analyze grammar]

badarasya mahārājye grāme kheṭe purādiṣu |
nagare pattane rājadhānyāṃ ghoṣe'pi sarvathā || 23 ||
[Analyze grammar]

sādhavo yatayaḥ sādhvyaḥ pūjyante'nnāmbarādibhiḥ |
viprā dakṣiṇayā cāpi nirāśrayāḥ śubhāśrayaiḥ || 24 ||
[Analyze grammar]

anāthādyā yathāpekṣairnāryaḥ sveṣṭasamarpaṇaiḥ |
grāme grāme brahmayajñā jāyante badarasya vai || 25 ||
[Analyze grammar]

annasatrāṇi bhūbhāge badarasya tu padmakam |
prapādānāni sarvatra cāsan kalpalatāstathā || 26 ||
[Analyze grammar]

yātrālavo latāmāpya bhuṃjate bhikṣayā phalam |
tṛptidaṃ ca rasaṃ miṣṭaṃ pibanti ca bhajanti mām || 27 ||
[Analyze grammar]

vaiṣṇavānāṃ maṇḍalāni hyāsan vai pratikharvaṭam |
prātarmadhyāhnake sāyaṃ kīrtayanti bhajanti mām || 28 ||
[Analyze grammar]

devakathākarā bhūmāvāgatya ca kathāṃ mama |
vācayitvā saṃhitāṃ ca bodhayanti bhajanti mām || 29 ||
[Analyze grammar]

utsavā uttamāḥ śreṣṭhā jāyante ca prajāsu vai |
ūrjā'sitāṣṭamīprabhṛtyahassu dvādaśīṣvapi || 30 ||
[Analyze grammar]

jayantīṣu samastāsu satsaṃgāḥ saṃbhavanti ca |
vratotsavānāṃ sammānaṃ pālanaṃ pūjanādikam || 31 ||
[Analyze grammar]

udyāpanaṃ cā''daraśca jāyante'sya prajāsvapi |
nityaṃ gavāṃ tu bahvīnāṃ dānaṃ nṛpasya jāyate || 32 ||
[Analyze grammar]

śeṣo navaḥ kutaḥ svarṇamayo yena tu bhūbhujā |
pratiṣṭhāpya ca taṃ śeṣaṃ nāgaṃ nītvā vimānake || 33 ||
[Analyze grammar]

yayau pātālake prāha pūrvaśeṣaṃ nivartaya |
mama śeṣo baliṣṭho'yaṃ dhārayiṣyati ke bhuvam || 34 ||
[Analyze grammar]

mūlaśeṣaḥ parīkṣārthaṃ mumocā'dho hi golakam |
sahasā svarṇanāgastaṃ bhūgolaṃ ke nyadhād drutam || 35 ||
[Analyze grammar]

mūlaśeṣasya mānaṃ vai nirmūlaṃ saṃvyajāyata |
garvo naṣṭo'tha neme taṃ badaraṃ svarṇaśeṣiṇam || 36 ||
[Analyze grammar]

prārthayāmāsa mānārthaṃ dhāraṇaṃ nijamastake |
anyathā bhūbhṛtā cā'vamānitasya yaśolayaḥ || 37 ||
[Analyze grammar]

apratiṣṭhā bhavelloke yayāce golakaṃ punaḥ |
dhartuṃ nijaphaṇāyāṃ vai tadā tu badaro dadau || 38 ||
[Analyze grammar]

pūrvaśeṣāya pṛthivīṃ svarṇaśeṣaṃ nijālayam |
ānināya tataḥ svarṇaśeṣo vijñānavān yatiḥ || 39 ||
[Analyze grammar]

patañjalirmahāyogī vidyādharo vyajāyata |
sarvayogakalābhiśca jagaduddhāramācarat || 40 ||
[Analyze grammar]

evaṃvidhasya bhaktasya badarasya gṛhe gṛhe |
kṛṣṇadhūnyo'bhavan badri bhaktiścāsīd gṛhe gṛhe || 41 ||
[Analyze grammar]

śrīmāṇikyā sevitasya kṛṣṇanārāyaṇasya vai |
mama mūlasvarūpasyā''śritaṃ sarvaṃ jagaddhyabhūt || 42 ||
[Analyze grammar]

śṛṇu badrīprabhe devi tadā rājyaṃ tu ṛddhimat |
svargottaraṃ bhūtalaṃ tu vīkṣyā'nyabhvardhapālakāḥ || 43 ||
[Analyze grammar]

paspardhurbadaraṃ bhaktaṃ rājānaṃ smṛddhilālasāḥ |
bahavo badaraṃ prāpyā'yudhyan parājayaṃ hyaguḥ || 44 ||
[Analyze grammar]

bhakto bhaktyā hi jīyeta nānyayuddhaiḥ kadācana |
yadgṛhe bhagavān sākṣād vasati durjayaḥ kutaḥ || 45 ||
[Analyze grammar]

rājñaḥ śarairhi bahavo hatā bhūpā virodhinaḥ |
sarve te nihatā vārdhau himavārdhisamāhvaye || 46 ||
[Analyze grammar]

kiṃpuruṣapradeśānāṃ dakṣiṇe madhyasaṃsthite |
dvisāhasrayojanātmavistṛte miṣṭavāriṇi || 47 ||
[Analyze grammar]

mānasākhyaḥ samudro'yaṃ miṣṭodo hyabhavattadā |
sadā śītalajaladhiḥ sarvaratnasamanvitaḥ || 48 ||
[Analyze grammar]

yatrāste sāmprataṃ badri himālayo'drirāḍiha |
śṛṇu badrīprabhe devi jetuṃ tu badaraṃ nṛpam || 49 ||
[Analyze grammar]

āyayau tvekadā vyomnā hemā'nalo'suro mahān |
aparaṃ yat pṛthivyardhaṃ tasmādarbudasainyavān || 50 ||
[Analyze grammar]

vyomamārgeṇa sahasā'yutairvimānakai saha |
khaṇḍe kiṃpuruṣe yuddhaṃ badareṇa samācarat || 51 ||
[Analyze grammar]

badarasya vimānāni sasainyāni tadāmbare |
abhipetuścāsurāṇāṃ sainyeṣu divyaśaktayaḥ || 52 ||
[Analyze grammar]

sahasraśo vimānāni naṣṭānyāsurakāṇi vai |
sainyāni miṣṭajaladhau bhūtvā yādāṃsi cāviśan || 53 ||
[Analyze grammar]

hemānalo'suravaryo yuyudhe badareṇa ha |
mithaḥ sainyāni yuyudhuḥ prāṇāntaniścayāni vai || 54 ||
[Analyze grammar]

divyāstravarṣaṇairdivyaśarairdivyaiśca hetibhiḥ |
vidyutpravāhaṇaiścāpi pāśairvāruṇajaistathā || 55 ||
[Analyze grammar]

vajraiśca vividhairdaṇḍaiḥ kālacakrairviśālakaiḥ |
mantraistantrairmahāyantrairmāyikairaindrajālikaiḥ || 56 ||
[Analyze grammar]

vāyvagnināgagavayairgarutmataiśca vṛścikaiḥ |
parvataiścāpi vṛkṣaiśca yuyudhire tu kṛtrimaiḥ || 57 ||
[Analyze grammar]

himaśailaiśca vividhairgrahagolairanuttamaiḥ |
gadābhiścāṇḍabhettrībhirjaghnuranyonyamudruṣaḥ || 58 ||
[Analyze grammar]

āsurāṇāṃ hi sainyāni mārayitvā muhurmuhuḥ |
miṣṭābdhau te praviśanti svasthāstatra bhavanti ca || 59 ||
[Analyze grammar]

punarbalaṃ nīrugṇatvaṃ prāpya cāyānti saṃgare |
badareṇa hatāste ca punarviśanti sāgare || 60 ||
[Analyze grammar]

athā'yaṃ badaro rājā bhaktarāḍ vīkṣya jīvitān |
samudrasthānāsurāṃśca cintayāmāsa cāntare || 61 ||
[Analyze grammar]

kathameṣāṃ samudre vai vināśaṃ pratipādaye |
punarnaiva yathā svasthā nirgaccheyurbahiryudhi || 62 ||
[Analyze grammar]

jalaṃ sarvaṃ tvabdhirūpaṃ himaśailātmakaṃ bhavet |
antaḥsthitā āsurāste syurmṛtāśca śilātmakāḥ || 63 ||
[Analyze grammar]

sañcintyaivaṃ badaro'yaṃ sasmāra candradevatām |
tūrṇaṃ copasthitā tatra devakāryasahāyinī || 64 ||
[Analyze grammar]

āsurāṇāṃ suraghnānāṃ vināśārthaṃ matiṃ dadhe |
āgatya sahasovāca badarāya mahātmane || 65 ||
[Analyze grammar]

vada rājan tava kāryaṃ surakāryaṃ tathā sukham |
tūrṇaṃ karomi sādhyaṃ te duḥsādhyamapi sarvathā || 66 ||
[Analyze grammar]

badaraḥ śaśinaḥ pūjāṃ svāgataṃ vandanaṃ stutim |
cakārā''sanavaryaṃ ca dadau neme punaḥ punaḥ || 67 ||
[Analyze grammar]

kṛpālo śāntikṛt svargasudhākara mahāprabho |
bhaktānugrahadhātastvaṃ jayase cāmṛtaprada || 68 ||
[Analyze grammar]

jīvanaṃ sarvalokānāṃ kalāsu tava tiṣṭhati |
mādhuryaṃ cauṣadhīnāṃ ca tava yogātpravartate || 69 ||
[Analyze grammar]

vṛddhiḥ puṣṭistava yogājjāyate dāharodhanam |
tvadādhārāścauṣadhayastadādhārāśca dehinaḥ || 70 ||
[Analyze grammar]

candra kaumudikānātha niśeśa priyasaṃgakṛt |
śaśin nakṣatranātha tvaṃ jayase vai tamonuda || 71 ||
[Analyze grammar]

mṛgāṃka dugdhavarṇa tva himāṃśo jayase sadā |
śītalābdhe sudhāmūrte bhaktakāryaṃ dadhātviha || 72 ||
[Analyze grammar]

asurā muhurāgatya samardayanti mānavān |
devān pitṝnmunīn bhaktān kleśayanti muhurmuhuḥ || 73 ||
[Analyze grammar]

madbāṇairarditāścaite praviṣṭā himasāgare |
te yathā syurmarditā vai himapāṣāṇaparvataiḥ || 74 ||
[Analyze grammar]

punarna te bahistvatrā''yayustathā vidhehi yat |
tvamoṣadhirhi lokānāṃ cāsurāṇāṃ nibarhaṇam || 75 ||
[Analyze grammar]

śītaṃ śastraṃ mato'syeva śīghraṃ tadoṣadhaṃ kuru |
ityevamarthito rātrināthaḥ śrībadarīprabhe || 76 ||
[Analyze grammar]

dadau kaṇṭhāt samuttārya candrakāntamaṇiṃ śubham |
badarāya svabhaktāya devakāryakarāya ca || 77 ||
[Analyze grammar]

prāha maṇiṃ nṛpa cātra śītābdhau sanniveśaya |
śītābdhiḥ sahasā śītaśilātmako mahān giriḥ || 78 ||
[Analyze grammar]

atraiva śītalabhūmirbhaviṣyati na saṃśayaḥ |
tvaṃ vimāne vasa rājannambare na tu bhūtale || 79 ||
[Analyze grammar]

śītenā'bhibhavaṃ naiva vrajethāstattathā kuru |
eṣo'haṃ saṃprayāmyeva śīghraṃ maṇiṃ jale kṣipa || 80 ||
[Analyze grammar]

evamuktastu badaro drutaṃ vimānamambare |
kṛtvā candramasaṃ natvā cikṣepa maṇimabdhiṣu || 81 ||
[Analyze grammar]

tāvajjalāni sarvāṇi śītāgnipīḍitāni vai |
piṇḍitānyabhavaṃstatra śītābdhau śītalopalāḥ || 82 ||
[Analyze grammar]

śītābdhiḥ śītabhūbhāvaṃ himabhūtalatāṃ gataḥ |
jalānyūrdhvaṃ coṣmaṇā cotkṣipyante paritastadā || 83 ||
[Analyze grammar]

śikharāṇi śvetahaimaśilātmakāni tāni ca |
sañjātānyeva sahasā cāmbaraṃ śītatāṃ gatam || 84 ||
[Analyze grammar]

himānāṃ karakāvarṣāḥ sahasā peturambarāt |
tābhiśca vardhamānāni śṛṃgāṇi pārvatāni vai || 85 ||
[Analyze grammar]

mahaḥsparśāni jātāni vardhamānāni tāni vai |
evaṃ sa parvato jāto yugasāhasrayojanaḥ || 86 ||
[Analyze grammar]

candrakāntena sampanno himavaddhimavarṣaṇaḥ |
himāṃśumaṇinā bhūmau himādrirbadarīprabhe || 87 ||
[Analyze grammar]

āsurā yuddhakartāro jalopalāsu tattale |
marditāśca niruddhāścopalābhāvaṃ gatā mṛtāḥ || 88 ||
[Analyze grammar]

upadravāḥ praśāntāśca mahataḥ parivartanāt |
atha lokāśca ṛṣayo munayo devatāstathā || 89 ||
[Analyze grammar]

śrutvā himālayaṃ bhūmiṃ vīkṣituṃ tvāyayurmudā |
rākṣasā asurā daityā dānavā mānavāḥ khagāḥ || 90 ||
[Analyze grammar]

pitaro lokapālāśca siddhāścāraṇanartakāḥ |
gāndharvāḥ kinnarāḥ sūtā māgadhā bandinastathā || 91 ||
[Analyze grammar]

vidyādharā apsarasaḥ sādhyaḥ śaṃkarayoginaḥ |
gaṇāśca gaṇadevyaśca mātaro vasavastathā || 92 ||
[Analyze grammar]

merusthāḥ paralokasthā divyadehāḥ samāyayuḥ |
mumudurbahudhā haimaṃ śītaṃ cāndraṃ vilokyate || 93 ||
[Analyze grammar]

vardhayāmāsuratyarthaṃ bhūpatiṃ badaraṃ tathā |
praśaśaṃsuśca te sarve dikpālā mānamādadhuḥ || 94 ||
[Analyze grammar]

brahmaviṣṇumaheśāśca prasannāstvabhavan bahu |
badarasyā'bhavad rājyaṃ sarvaṃ himālayātmakam || 95 ||
[Analyze grammar]

navaṃ tvaraṇyakaṃ tasya parito nā'bhavattadā |
devādyā vāsayogyaṃ taṃ merutulyaṃ tu bhūbhṛtam || 96 ||
[Analyze grammar]

vīkṣya spṛhāṃ pracakruścārthayāmāsurnṛpaṃ muhuḥ |
rājā vāsaṃ dadau devakoṭibhyastu himālaye || 97 ||
[Analyze grammar]

devajātayaḥ sarve ye te vāsān svakulocitān |
cakruḥ śṛṃgeṣu haimeṣu devālayo babhūva saḥ || 98 ||
[Analyze grammar]

svargaṃ vai cāparaṃ bhūmau himālayo babhūva ha |
kalpadrumāḥ kalpalatāstathā kalpatṛṇānyapi || 99 ||
[Analyze grammar]

himālaye'bhito devaiḥ ropitāni vanāni ca |
bhūsandhau paritaḥ śatayojanānāṃ tu vartule || 100 ||
[Analyze grammar]

divyauṣadhīnāṃ sarvāsāṃ vanāni ropitāni vai |
udyānāni vicitrāṇi phalapatrarasādibhiḥ || 101 ||
[Analyze grammar]

smṛddhāni svargalokād vai svasvalokāttathā'paraiḥ |
āhṛtyā''hṛtya parito nihitāni śubhāni ca || 102 ||
[Analyze grammar]

saptarṣayo nyavasaṃśca śaṃkaro'pyavasattataḥ |
brahmā viṣṇustathā devyo nyavasan cāpsarogaṇāḥ || 103 ||
[Analyze grammar]

gāndharvāścāraṇāḥ kiṃpumāṃsaśca kinnarāḥ surāḥ |
anye'pi bahavo devā nyavasan vai himālaye || 104 ||
[Analyze grammar]

evaṃ himagirirjāto bhūmau candragirirmahān |
bhūtalaṃ svargamiśraṃ ca jātaṃ divyāṃśaśobhitam || 105 ||
[Analyze grammar]

iti śrīlakṣmīnārāyaṇīyasaṃhitāyāṃ caturthe tiṣyasantāne |
mahābhāgavatasya badarākhyarājarṣerākhyāna hemānalāsurayuddhaṃ badarabhayena bhūmadhyaśītavārdhau tvasurāṇāṃ praveśanaṃ badarastutyā candrapradattacandrakāntamaṇeḥ śītavārdhau nikṣepeṇa śītopalātmaka |
mahāhimādrirūpaparivartanaṃ caturdaśalokavāsināṃ divyahimādrau nivāsākāṃkṣayā badarapradattavasatayaḥ svargīyauṣadhīnāṃ devādyairopitāni vanodyānāraṇyāni cetyādinirūpaṇanāmā dvitīyo'dhyāyaḥ || 2 ||
[Analyze grammar]