Chapter 230

śrīpuruṣottama uvāca |
śṛṇu nārāyaṇīśri tvaṃ matsyapattanavāsinaḥ |
matsyādasya dhīvarasya tathāpi bhaktikāriṇaḥ || 1 ||
[Analyze grammar]

kathāmuddhārakartrī vai sādhusamāgamodbhavām |
pāpināṃ pāvanīṃ māyāmohanāśakarīṃ tathā || 2 ||
[Analyze grammar]

dhīraparvā'bhidhaścāsīd dhīvaro matsyapattane |
śatanaukādhipaḥ kṛṣṇānadyabdhisaṃgame sadā || 3 ||
[Analyze grammar]

yasya nāvo bhṛtyayuktā matsyān gṛhṇanti jālikāḥ |
brāhmamuhūrtādārabhyā''sūryodayaṃ tu nityaśaḥ || 4 ||
[Analyze grammar]

nityaṃ vai lakṣamatsyānāṃ jālagrahaḥ prajāyate |
sūkṣmasthūlasudīrghāṇāṃ bhinnaguṇādivarṣmaṇām || 5 ||
[Analyze grammar]

teṣāṃ hiṃsātmakaṃ pāpaṃ jāyate dhīraparvaṇaḥ |
lakṣavarṣāyuṣyako'pi dhīraparvā'tihiṃsayā || 6 ||
[Analyze grammar]

āyuṣā hīyate nityaṃ śatāhapramitena vai |
varṣadvayāntare tasya sahasrāṇi tu saptatiḥ || 7 ||
[Analyze grammar]

varṣāṇi cāyuṣaḥ pāpaiśchinnāni matsyaśāpataḥ |
triṃśadvarṣottaraṃ tena matsyavyāpāra ādṛtaḥ || 8 ||
[Analyze grammar]

militvā lakṣavarṣāṇi dvātriṃśe vigatāni ha |
dvātriṃśe cāntime māse varṣāyāṃ meghavarṣaṇam || 9 ||
[Analyze grammar]

saptāhaṃ satataṃ jātaṃ kṛṣṇādeśeṣu sarvaśaḥ |
tuṃgabhadrāpradeśeṣu tathaiva meghavarṣaṇam || 10 ||
[Analyze grammar]

abhavat satataṃ lakṣmi mūśaladhārasadṛśam |
jalāni pūravegāni mamurna saritostadā || 11 ||
[Analyze grammar]

sarinmārgaṃ vihāyaiva bhūmārgān viṣayān vyadhuḥ |
bahavo mānavāstatrā'raṇyasthāḥ sādhavo'pi ca || 12 ||
[Analyze grammar]

paśavaḥ pakṣiṇaścāpi jalapūraiḥ pravāhitā |
mṛtāstu bahavasteṣu pūreṣu dūrakarṣitāḥ || 13 ||
[Analyze grammar]

nirādhārā mṛtāḥ sarve sā'dhārāḥ kāṣṭhalambanāḥ |
vṛkṣādyālambanāścānye jīvantaḥ pūramadhyagāḥ || 14 ||
[Analyze grammar]

āyayurmatsyapaṭṭasya kṛṣṇasāgarasaṃgame |
dehino jīvato vīkṣya mahājale'pi vai tadā || 15 ||
[Analyze grammar]

dhīraparvā nijabhṛtyān yantrinaukābhirakṣiṇaḥ |
sarvānājñāpayāmāsa śatanaukādhināyakān || 16 ||
[Analyze grammar]

mā matsyagrāhaṃ kurvantu yāvannadyā upadravaḥ |
jīvanmānavagrahaṇaṃ kurvantu pūramadhyataḥ || 17 ||
[Analyze grammar]

sarvathā prāṇadānaṃ vai prāṇamātraṃ tu jīvinām |
pravāhavāhitānāṃ vai kartavyaṃ pralaye'tra tu || 18 ||
[Analyze grammar]

bhojanaṃ cāpi śuṣkānnaṃ bharjitaṃ caṇakādikam |
dātavyaṃ kambalavastrādyaṃ śītaharaṇārthakam || 19 ||
[Analyze grammar]

evaṃ vai rakṣaṇaṃ tatra vihitaṃ dhīraparvaṇā |
dhanā'nnāmbaranaukādipradānairbhṛtyamānavaiḥ || 20 ||
[Analyze grammar]

narā nāryo bālakāśca vṛddhā vā kāṣṭhasaṃgatāḥ |
vaṃśastambamahāvṛkṣalagnāḥ śākhāvilambanāḥ || 21 ||
[Analyze grammar]

ghāsapeṭādisaṃsaktāścānye śavādikāśrayāḥ |
taradvastusamādhārāḥ sahasraśo hi mānavāḥ || 22 ||
[Analyze grammar]

yatayaḥ sādhavaḥ sādhvyo viraktā vaiṣṇavā api |
bhaktā nārāyaṇaparā jīvanto rakṣitāstadā || 23 ||
[Analyze grammar]

teṣāmāśīrvādalabdhamahāpuṇyātisāgaraḥ |
jīvadānamahāpuṇyodayaścāpi vyajāyata || 24 ||
[Analyze grammar]

puṇyaṃ pāpaṃ vinā bhogaṃ kṣapayituṃ na śakyate |
āyuḥkṣayānnasaptāhe yogo'yaṃ samajāyata || 25 ||
[Analyze grammar]

pāpairāyuḥ kṣīyate vai puṇyairāyurvivardhate |
pūrvasya pūrvabhogo vai paścimasya sa paścimaḥ || 26 ||
[Analyze grammar]

hiṃsāghātādikarmotthaṃ phalaṃ tu maraṇaṃ muhuḥ |
ghātenaiva bhaveddhātakinastasya yamālaye || 27 ||
[Analyze grammar]

tīvrasaṃvegitaṃ karma matsyamārodbhavaṃ bali |
pūrvaṃ bhogāya vai prāptaṃ kālapāśā'bhiyojitam || 28 ||
[Analyze grammar]

yāmyadūtaiśca saṃyuktaṃ koṭimatsyādighātajam |
saptāhānte dine varṣāvege tu nyūnatāṃ gate || 29 ||
[Analyze grammar]

naukāyāṃ yantrayuktāyāṃ niṣadya bhṛtyasevitaḥ |
patnīputrādisahito draṣṭuṃ velāṃ jale yayau || 30 ||
[Analyze grammar]

kṛṣṇāsāgarasaṃyogemahāpravāhavegite |
mahājale yayau yāvat krośadūraṃ tu sāgare || 31 ||
[Analyze grammar]

tāvannaukātale vṛkṣaśākhocchālanamadbhutam |
acintitaṃ samāyātaṃ vāribhramo mahocchrayaḥ || 30 ||
[Analyze grammar]

acintitaḥ samutpanno mahāvicyudayo'pi ca |
mitho mahājalabhittidvayatāḍanasaṃbhave || 33 ||
[Analyze grammar]

mahānaukā'grato bhāge khe tūtplutya suvegataḥ |
adhogatā'grato yāvattāvat pṛṣṭhe mahājalaiḥ || 34 ||
[Analyze grammar]

utkṣiptā khe vegataśca tāḍavat sā tato'bhavat |
naukāgraṃ jalabhittibhyāṃ nītaṃ cā'dho jalāntare || 35 ||
[Analyze grammar]

tāvatpārśvamahāvegijalairvyāvartitā hyavāṅ |
nimagnā kṣaṇamātreṇa tatra samudravāriṣu || 36 ||
[Analyze grammar]

talaṃ gatā bhuvaḥ sā tu nirāśrayā'sahāyinī |
dhīraparvādayaḥ sarve mṛtā vāriṣu mūrchitāḥ || 37 ||
[Analyze grammar]

yāmyadūtairyamalokaṃ nītāste pāpino drutam |
śavāstu bhakṣitā matsyairdhanāni bhṛtyamānavaiḥ || 38 ||
[Analyze grammar]

naukāstu nāvikairnītāḥ prāṇāstu yamapārṣadaiḥ |
puṇyapāpāni nītāni mṛtaistaistu kuṭumbibhiḥ || 29 ||
[Analyze grammar]

pātheyāni yathā tāni cātmabhiḥ saha saṃyayuḥ |
yathākālaṃ ca te dūtairnītā yamālayaṃ prati || 40 ||
[Analyze grammar]

citraguptena pāpāni śrāvitāni yamāntike |
dharmarājā tu tān sarvānadaṇḍayad yathākṛtam || 41 ||
[Analyze grammar]

kālasūtre nyakṣipacca bahukālaṃ tataḥ punaḥ |
galapāśākhyanarake nyakṣipanmatsyaghātinaḥ || 42 ||
[Analyze grammar]

tataḥ kṣārakardame ca nyakṣipaccirameva tān |
tato viśasane kuṇḍe nyakṣipattān saśastrake || 43 ||
[Analyze grammar]

tataścāsipatravane nyakṣipattāṃściraṃ tataḥ |
nyakṣipattān vahnikuṇḍe mahājvālāsamākule || 44 ||
[Analyze grammar]

tatastānnyakṣipajjantubahule kuṇḍake'tra ca |
vṛścikāḥ kṛkalāsādyā daṃśanti viṣapāyinaḥ || 45 ||
[Analyze grammar]

tato lālāmukhe tāṃśca nyakṣipad yamarājakaḥ |
tato matsyādikuṇḍe ca kṣārasāgaranāmake || 46 ||
[Analyze grammar]

nyakṣipattān jālanaukāyāmyabhaṭaiḥ prapīḍite |
matsyāste tvabhavaṃstatra mahāmatsyādibhojanāḥ || 47 ||
[Analyze grammar]

matsyairutkartitāścāpi bhakṣitāste punaḥ punaḥ |
ujjīvinaḥ punaścāpi bhūtvā kaṣṭāni yānti te || 588 ||
[Analyze grammar]

tato niṣkāsitāḥ sarve dīrghakālena kuṇḍataḥ |
sarvapāpātidaṇḍasya prānte dharmājñayā ca te || 49 ||
[Analyze grammar]

pretā abhavan śuṣke vai mahāraṇye tu duḥkhinaḥ |
sahasravatsarānte te bhuktvā tāḥ pretayātanāḥ || 50 ||
[Analyze grammar]

kṣārasamudrake jātā matsyāḥ kṛṣṇā'bdhisaṃgame |
dhīvarairjālayantraiśca dhṛtāste bhakṣitāstataḥ || 51 ||
[Analyze grammar]

evaṃ kṛtānāṃ pāpānāṃ bhogāntaṃ prāpnuvaṃśca te |
tataḥ puṇyastaraḥ prāpto manuṣyaprāṇadānajaḥ || 52 ||
[Analyze grammar]

sarve te matsyanagare vaiṣṇavānāṃ gṛhe'bhavan |
viprāṇāṃ kṣatriyāṇāṃ ca naupatīnāṃ subālakāḥ || 53 ||
[Analyze grammar]

naukābhirye tu vastūnāṃ vyāpāraṃ bahudeśinām |
kurvanti dhanadaṃ śreṣṭhamudyamaṃ na tu hiṃsanam || 54 ||
[Analyze grammar]

evaṃvidhānāṃ putrāste'bhavan bhaktiyutāḥ śubhāḥ |
dhanadhānyarddhimadgehe yatra tatra sukhānvitāḥ || 55 ||
[Analyze grammar]

viprabhaktāḥ sādhubhaktāḥ ahiṃsādharmatatparāḥ |
devapūjāparāścāpi dānino vighasāśinaḥ || 56 ||
[Analyze grammar]

gavāṃ sevāparāścāpi sādhusādhvīprapūjakāḥ |
devālayādisevāyāṃ śraddhālavo nayānvitāḥ || 57 ||
[Analyze grammar]

kāritaṃ mandiraṃ taiśca nārāyaṇasya tatra vai |
lakṣmyā sākaṃ haristatra vidhinā sthāpito dvijaiḥ || 58 ||
[Analyze grammar]

atha bhakto dvijo vipro nāmnā nirvāṇanāvikaḥ |
gārhasthyaṃ samparityajya tyāgāśramaṃ viveśa ha || 59 ||
[Analyze grammar]

sādhurbhūtvā'vasattatra mandire pūjakaḥ sadā |
nirvāṇāyananāmā'sau vaiṣṇavaḥ paramo yatiḥ || 60 ||
[Analyze grammar]

devasevāṃ bhaktasevāṃ satāṃ sevāṃ karoti ca |
vaiṣṇavānutsavān divyān karoti kārayatyapi || 61 ||
[Analyze grammar]

kathāṃ karoti sāyaṃ ca mānavāśca narāḥ striyaḥ |
śravaṇārthāḥ samāyānti nagaraṃ vaiṣṇavaṃ hyabhūt || 62 ||
[Analyze grammar]

ekadā'haṃ tasya bhaktyā samākṛṣṭo dayāvaśaḥ |
sādhūrbhūtvā vaiṣṇavāgryaḥ kathāṃ śrotuṃ yayau tadā || 63 ||
[Analyze grammar]

abhyāgataṃ ca māṃ vīkṣyopāveśya māṃ śubhāsane |
svāgatādi cakārāpi mama sādhuḥ sa śobhanaḥ || 64 ||
[Analyze grammar]

lakṣmīnārāyaṇasaṃhitāyāḥ kathottaraṃ tvaham |
upādideśa tatraiva sabhyebhyo dayayā hariḥ || 65 ||
[Analyze grammar]

kathāyāḥ śravaṇe kṛṣṇanārāyaṇaḥ prasīdati |
śrūyate yatkathā so'tra kṛṣṇaḥ sākṣāt prajāyate || 66 ||
[Analyze grammar]

kathāphalaṃ harau sneho māhātmyavedanena vai |
ātmaniṣṭhā ca bhagavanniṣṭhā mokṣaśca dhāmani || 67 ||
[Analyze grammar]

māyāmohavināśaśca hareḥ sevā'rjanaṃ sadā |
divyatā sarvadā śāśvatānandasaṃbhṛtā tathā || 68 ||
[Analyze grammar]

kathāphalaṃ tu tatproktaṃ śravyaivaṃ cādarāt kathā |
premibhaktasya ghaṭikā kṛṣṇaṃ vinā na gacchati || 69 ||
[Analyze grammar]

kṛṣṇekṣaṇaṃ vinā sthātuṃ śaknuyānna kathaṃcana |
jñānavān bhaktimāṃścāpi vairāgyavān sa vartate || 70 ||
[Analyze grammar]

dṛḍhā sthitirharau tasya jāyate cānapāyinī |
nāryā api śriyaḥ kānte prītiḥ syādanapāyinī || 71 ||
[Analyze grammar]

aikāntikī pūrṇabhaktā sadā mugdhā harau bhavet |
svakāryasādhane raktā kṛṣṇādeva tadarthikā || 72 ||
[Analyze grammar]

mano nānyatra yātyeva vasatyeva harau sadā |
svakāryaṃ kṛṣṇakāryaṃ ca bhaktyā sādhayati dhruvam || 73 ||
[Analyze grammar]

kṛṣṇakāntā kṛṣṇabhaktā sadā raktā harau bhavet |
svārthaṃ vihāya kṛṣṇasya kāryaṃ sarvaṃ prasādhayet || 74 ||
[Analyze grammar]

sarvasvārpaṇabhāvā syāt sadā'rpitā harau bhavet |
evaṃ nāryo bhavantyeva mugdhā raktāḥ samarpitāḥ || 75 ||
[Analyze grammar]

tredhā tāsāṃ patiḥ kṛṣṇaḥ samuddhartā mahārṇavāt |
tāsāṃ tu śreyase kṛṣṇo mānavo jāyate patiḥ || 76 ||
[Analyze grammar]

anugrahāya rājā vai ramaṇo mokṣado hariḥ |
sādhūnāṃ tu śreyase sa tāpaso jāyate ṛṣiḥ || 77 ||
[Analyze grammar]

rājarūpaṃ sādhurūpaṃ patirūpaṃ prabhuṃ tu yāḥ |
āśrayanti tu tā divyā bhavanti muktakoṭikāḥ || 7 ||
[Analyze grammar]

divyadṛṣṭyā harikṛṣṇaṃ vidanti parameśvaram |
anādiśrīkṛṣṇanārāyaṇaṃ māpativallabham || 79 ||
[Analyze grammar]

yathā miṣṭasamudrasya jalaṃ pibanti dehinaḥ |
yathādehaṃ yathāśakti tṛpyanti ca yathābalam || 80 ||
[Analyze grammar]

pipīlikādikamahāmatsyāntāḥ sarvadehinaḥ |
tathāpi te samudrasya pāraṃ na yānti vai kvacit || 81 ||
[Analyze grammar]

yathā'mbarasya maśakādayaśca garuḍādayaḥ |
yathāśakti sukhaṃ prāpyoḍḍayanaṃ racayanti hi || 82 ||
[Analyze grammar]

tathāpyantaṃ na yāntyeva vyomā'pāraṃ nigadyate |
tathā śrīkṛṣṇacandrasya pāraṃ yānti na ke'pyapi || 83 ||
[Analyze grammar]

yathā bhūmigato dehī candraṃ sthālaṃ prapaśyati |
sa evā'ntikatāṃ prāpto mahāntaṃ taṃ prapaśyati || 84 ||
[Analyze grammar]

candragato janaścandramapāraṃ samprapaśyati |
tathā bhaktaḥ samīpastho'pāraṃ kṛṣṇaṃ pravindati || 889 ||
[Analyze grammar]

upāsanābalaṃ svalpaṃ dīpavat kathyate hi tat |
tato'dhikaṃ balaṃ dāvavahnivajjāyate khalu || 86 ||
[Analyze grammar]

tato'dhikataraṃ tattu mahābhūtā'nalādivat |
tato'dhikatamaṃ tattu brahmadhāmasamaṃ matam || 87 ||
[Analyze grammar]

brahmatejobhirāpūrṇo bhakto vindati mādhavam |
apāraṃ cātidivyaṃ ca kṛṣṇaṃ kāntaṃ manoharam || 88 ||
[Analyze grammar]

brahmarūpo mahāmukto niṣevate parātparam |
anādiśrīkṛṣṇanārāyaṇasvāmiramāpatim || 89 ||
[Analyze grammar]

bhaktyabhyāsavaśā nārī prāpnoti māṇikīpatim |
satāṃ patiṃ muktapatiṃ brahmapatiṃ mahāprabhum || 90 ||
[Analyze grammar]

yathā snehaprakāśāderādhikyaṃ jāyate tathā |
kṛṣṇasukhaṃ mahaddivyamāpnoti muktatāṃ gataḥ || 91 ||
[Analyze grammar]

kṛṣṇātmā kṛṣṇamūrtiśca kṛṣṇānandapariplutaḥ |
muktottamo jāyate vā naro nārī samarpitaḥ || 92 ||
[Analyze grammar]

bhaktyabhyāsapratāpena kṛṣṇaikyaṃ cāpi jāyate |
lakṣmīvad rādhikāvacca māṇikīvat suśāśvatam || 93 ||
[Analyze grammar]

nityaṃ kṛṣṇo bhajanīyaḥ kṛṣṇanārāyaṇaprabho |
hare śrībālakṛṣṇaśrīpate'kṣarapate vibho || 94 ||
[Analyze grammar]

oṃ namaḥ śrīkṛṣṇanārāyaṇāya pataye svāhā |
mantraṃ japantu nityaṃ vai nārāyaṇasya sevakāḥ || 95 ||
[Analyze grammar]

ātmanivedinaḥ santu kṛṣṇārthasarvaniścayāḥ |
ityuktvā'haṃ kathānte vai caturbāhustadā'bhavam || 96 ||
[Analyze grammar]

śaṃkhacakragadāpadmamaṇikirīṭakuṇḍalaiḥ |
tejobhiḥ śobhito lakṣmi sarvairjayetiśabditaḥ || 97 ||
[Analyze grammar]

pūjito hṛdayaiścāpi bhaktyā candanavāribhiḥ |
vandito nijamokṣārthaṃ tathā'stvityavadaṃ ca tān || 98 ||
[Analyze grammar]

manāṃsyākṛṣya sahasā tirobhāvaṃ cidambare |
atha prāpte samaye tān anayaṃ dhāma me'kṣaram || 99 ||
[Analyze grammar]

kāṃścit svargaṃ tathā'nyāṃśca satyaṃ vairājakaṃ padam |
aparān śrīpuraṃ cānyānamṛtaṃ tvanayaṃ tathā || 100 ||
[Analyze grammar]

vaikuṇṭhaṃ cāpi golokamavyākṛtaṃ paraṃ padam |
prāpayāmāsa bhaktāṃstānnāvikān jīvarakṣakān || 101 ||
[Analyze grammar]

sādhurakṣakarān sādhvīrakṣakān bālarakṣakān |
jīvadānapradātṝṃśca bhaktān dvitīyajanmajān || 102 ||
[Analyze grammar]

evaṃ lakṣmi mahāpāpān kadācid bhagavatkṛte |
sādhvīsādhukṛte gavāṃ kṛte'pi puṇyakārakān || 103 ||
[Analyze grammar]

kālāntare'pi puṇyānāmudaye sādhuyoginaḥ |
kṛtvā nayāmi dhāmordhvamakṣaraṃ paramaṃ padam || 104 ||
[Analyze grammar]

paṭhanācchravaṇādasya smaraṇāccintanādapi |
bhuktirmuktirbhavatyeva yatheṣṭā ca gatirbhavet || 105 ||
[Analyze grammar]

pāpipāpāni naśyanti śrīhareḥ smaraṇādapi |
bhaktānāṃ ca yaśogānaiḥ śuddhyantyaghāni sarvaśaḥ || 106 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne pūrvajanmani dhīvarāṇāṃ matsyamārāṇāṃ dhīraparvādīnāṃ yāmyayātanottaraṃ pūrvālpapuṇyena naupatijanmāni tatra bhajanaṃ mokṣaṇaṃ cetyādinirūpaṇanāmā triṃśadadhikadviśatatamo'dhyāyaḥ || 230 ||
[Analyze grammar]