Chapter 224

śrīpuruṣottama uvāca |
śṛṇu nārāyaṇīśri tvamuṣṭrapālo marudbhuvi |
nāmnā'bhavad dīrgharaṃbho grāme citrordhvasaṃjñake || 1 ||
[Analyze grammar]

uṣṭrā yasyā'bhavan pāreśataṃ śamīprabhojanāḥ |
uchrāyabhūnivāsaśca kramelakorṇavikrayī || 2 ||
[Analyze grammar]

uṣṭravikrayakartā ca dhānyavyāpārakṛttathā |
ekadeśādanyadeśe dhānyaprāpaṇakārakaḥ || 3 ||
[Analyze grammar]

prāyaśo vai vane vāsaṃ kurvannuṣṭrābhirakṣakaḥ |
vane rātrau nivasati daśoṣṭrapālakaiḥ saha || 4 ||
[Analyze grammar]

śamīvane'titarale carantyuṣṭrāḥ samantataḥ |
dīrgharaṃbhādayaḥ kṛtvā vahniṃ tadabhitastadā || 5 ||
[Analyze grammar]

niṣadya kambalairyuktā gṛṇanti rāmakīrtanam |
devānāṃ ca kathāgītiṃ kurvanti militāstathā || 6 ||
[Analyze grammar]

pibantyuṣṭrāpayaścāpi nivedya prabhave hṛdi |
khādanti roṭakān kṛtvā śamīśimbyāranālakaiḥ || 7 ||
[Analyze grammar]

nirgacchanti vanyamārge yadi kecitpravāsinaḥ |
tebhyo dadati satkṛtya dugdhaṃ ca roṭakādikam || 8 ||
[Analyze grammar]

paropakāraḥ kartavyaścānnakambaladānakaiḥ |
matvaivaṃ te cārpayanti kambalānapi cottamān || 9 ||
[Analyze grammar]

sādhavo vā tīrthayātrālavo milanti tatpathi |
tebhyo'rpayantyannavāri kurvanti svāgatādikam || 10 ||
[Analyze grammar]

rāmabuddhyaiva satataṃ puṇyasatkarmavāñcchayā |
yatheṣṭaṃ bhaktibhāvena sevante sādhumaṇḍalam || 11 ||
[Analyze grammar]

athaikadā'rbudayātrākaraṇāya tripuṣkaram |
prāgacchanmaṇḍalaṃ sādhusādhvīnāṃ pathi cāgatam || 12 ||
[Analyze grammar]

kīrtayad vādyaghoṣaiśca rāmakṛṣṇajanārdana |
narasiṃha hara viṣṇo kṛṣṇanārāyaṇā'cyuta || 13 ||
[Analyze grammar]

dṛṣṭvā tāṃstu dīrgharaṃbho gatvā pratipraṇamya ca |
dugdhaṃ ca roṭakān tebhyo dadau madhyāhnake jalam || 14 ||
[Analyze grammar]

sāyaṃ te sādhavastatra viśrāntiṃ prāpurutsukāḥ |
rātrau sarve tūṣṭrapālā asevanta sato janān || 15 ||
[Analyze grammar]

nāmasaṃkīrtanaṃ kathāṃ rāmasya śuśruvustathā |
atha sādhuvaraṃ rāmāyaṇākhyaṃ vaiṣṇavottamam || 16 ||
[Analyze grammar]

papraccha svātmakalyāṇaṃ kathaṃ syāditi cānataḥ |
rāmāyaṇaḥ pratyuvāca tadā kalyāṇasādhanam || 17 ||
[Analyze grammar]

sādhūnāṃ sevanaṃ cāpi rāmanāmnāṃ sukīrtanam |
bhaktiṃ viṣṇornavadhāṃ ca kalyāṇasādhanāni hi || 18 ||
[Analyze grammar]

rāmasya vandanaṃ nityamarcanaṃ bahuvastubhiḥ |
mānasairupacāraiścāpyarcanaṃ hṛdaye'nvaham || 19 ||
[Analyze grammar]

kalyāṇasādhanaṃ ceti dhyānaṃ rāmasya cintanam |
premṇā pulakitagātro gadgadā'kṣaravāk tathā || 20 ||
[Analyze grammar]

tatsvarūpaikacintaśca bhavedbhakto'rcane hareḥ |
bāhyapūjākaro yadvā cāntarārhaṇakārakaḥ || 21 ||
[Analyze grammar]

viśiṣyate'yaṃ bhaktau vai sarvebhyo bhaktasammataḥ |
aikāgryarahitaḥ sneharahitastu na śasyate || 22 ||
[Analyze grammar]

pūjane sevane yasya śraddhā bhavati bhūyasī |
kathāyāṃ kīrtane yasya śraddhādarau viśeṣataḥ || 23 ||
[Analyze grammar]

māhātmyaṃ yasya cotkṛṣṭaṃ bhakte yasya sumitratā |
yasya rāmārcanādau vai bhūrikālo yathā kṣaṇaḥ || 24 ||
[Analyze grammar]

navadhā'pi hareḥ sevā yasya nūtnā'nuvāsaram |
na gauṇī yasya jīrṇā na kvacit kvāpi bhavediyam || 25 ||
[Analyze grammar]

śraddhābhaktiryasya nityaṃ nūtanā nūtanojjvalā |
sa mukto'tra ca muktā sā naro nārī hi bhūtale || 26 ||
[Analyze grammar]

dūrasthā api bhaktā īdṛśāḥ kṛṣṇāntikasthitāḥ |
yadi naitādṛśāḥ pārśvasthitāste dūravanmatāḥ || 27 ||
[Analyze grammar]

tasmāt prītyudayasiddhyai yatitavyaṃ nirantaram |
śravaṇe manane nididhyāsane divyadarśane || 28 ||
[Analyze grammar]

kṛṣṇe tādātmyamāpannāt sādhormukhāddhareḥ kathā |
śrotavyā śrīhareḥ smṛtyā sahitā'rthasya dhāriṇī || 29 ||
[Analyze grammar]

śrutārthasya tu mananaṃ punaḥ punarvicāraṇam |
sapremamūrtisahitaṃ kartavyaṃ vāsanāpaham || 30 ||
[Analyze grammar]

tataḥ saṃskārajaṃ śuddhaṃ smaraṇaṃ nididhyāsanam |
kartavyaṃ śraddhayā prītyā prasannastasya mādhavaḥ || 31 ||
[Analyze grammar]

bhavettena hareḥ sphūrtiḥ sahajā nityamāntare |
sākṣātkāro bhavet sphūrtau divyamūrterhareḥ sadā || 32 ||
[Analyze grammar]

evaṃ prītirharau kāryā tayā prītirharerbhavet |
parasparaprītimatostādātmyaṃ jāyate tataḥ || 33 ||
[Analyze grammar]

brahmacaryamātmaniṣṭhā vairāgyaṃ śravaṇādayaḥ |
kṛṣṇāśrayaśca sākṣātkārahetavasta īritāḥ || 34 ||
[Analyze grammar]

mananaṃ ca nididhyāso bhakteṣṭasiddhidāyakau |
kevalaṃ śravaṇaṃ naiva sākṣātkāraphalapradam || 35 ||
[Analyze grammar]

vāsanā nahi naśyanti nididhyāsanamantarā |
hṛdgranthayo vinaśyanti kṛṣṇā'khaṇḍavicintanāt || 36 ||
[Analyze grammar]

nididhyāsanayuktasya pratyakṣadraṣṭureva ha |
pūrṇakāmatā''nandāśca vartante netarasya tu || 37 ||
[Analyze grammar]

bāhyaṃ kṛṣṇasya draṣṭurvai mantuśca hṛdaye tathā |
smartuḥ rūpaṃ ca satataṃ drutaṃ sphurati keśavaḥ || 38 ||
[Analyze grammar]

anevaṃvartamānasyā'nevaṃyatnakṛto'pi ca |
naiva sphurati viśvātmā divyātmā bhagavān hṛdi || 39 ||
[Analyze grammar]

tasmāt kṛṣṇasya hṛdye sākṣātkārasya sādhanam |
śravaṇaṃ mananaṃ nididhyāsanaṃ prītirucyate || 40 ||
[Analyze grammar]

prītyā satatasandhātryā sphurati kāntavaddhariḥ |
tasmācchrutasya dṛṣṭasya harestu mananaṃ tathā || 41 ||
[Analyze grammar]

smaraṇaṃ premasahitaṃ śraddhānvitaṃ samācaret |
tasyopari hareḥ prītirjāyate dhāmayojikā || 42 ||
[Analyze grammar]

dehe jīvasya tādātmyaṃ yāvadvai vartate ca tat |
kṛṣṇe snehe mahāvighnaṃ bodhyaṃ saṃsārajanmakṛt || 43 ||
[Analyze grammar]

tasmād dehādayamātmā bhinna ityavabodhanam |
guroḥ sataśca śāstrācca prāptavyaṃ ca vivekinā || 44 ||
[Analyze grammar]

bhramo nāśayitavyaśca tādātmyasya jaḍātmanoḥ |
svarūpāṇi jaḍasyāpi cetanasyāpi sarvathā || 45 ||
[Analyze grammar]

dharmāścāpi praboddhavyā yairvailakṣaṇyametayoḥ |
sphurettena tu tādātmyabhrāntirnaśyet samūlikā || 46 ||
[Analyze grammar]

jaḍo duḥkhamayo rugṇo naśvaro vikṛtaḥ kṣayī |
lālāmūtramalavyāpto janmamṛtyujarānvitaḥ || 47 ||
[Analyze grammar]

khaṇḍanaddho bahvavastho māyiko bhautikaścayī |
piṇḍo hrāsī naikarūpo deho'yaṃ vartate sadā || 48 ||
[Analyze grammar]

indriyāṇi samagrāṇi sūkṣmadehaguṇāni vai |
duḥkhadoṣodvegacintākarāṇi tādṛśāni ca || 49 ||
[Analyze grammar]

etādṛśo nā'hamasmi cidrūpaḥ sukhavānaham |
arogī śāśvato nirvikāraḥ kṣayavivarjitaḥ || 50 ||
[Analyze grammar]

saccidānandarūpo'smi janmamṛtyujarā'tigaḥ |
akhaṇḍaḥ sthira eko'haṃ divyo māyāvivarjitaḥ || 51 ||
[Analyze grammar]

abhautikaścayaśūnyaḥ prakāśī hāsavarjitaḥ |
ekarūpo nirmalaścā'saṃgī draṣṭā'maro'smi ca || 52 ||
[Analyze grammar]

śaktayo mama divyāścendriyaśaktipraprerikāḥ |
etādṛśo bhavāmyeva cetano mokṣadharmavān || 53 ||
[Analyze grammar]

ityātmā'nātmanoḥ samyag vivekaṃ samacintayet |
satāṃ mukhācchāstrato vā jñātvā taṃ pariśīlayet || 54 ||
[Analyze grammar]

pakve jñāne dehadharmasāṃkaryaṃ nātmadharmasu |
ātmaniṣṭho bhavettena bhagavanniṣṭha ityapi || 55 ||
[Analyze grammar]

brahmarūpo bhavedeva muktarūpo'tra mānavaḥ |
na tasya vāsanā tiṣṭhenna bhramo nāpi yātanāḥ || 56 ||
[Analyze grammar]

ātmā'nātmaviveko'yaṃ yasya nāsti dṛḍhīkṛtaḥ |
sa dehadharmairduḥkhādyaiḥ pīḍyate bhramanoditaḥ || 57 ||
[Analyze grammar]

yāvadabhyāsaśaithilyaṃ tāvaddehātmadhīvaśaḥ |
paśuvat pāśavīṃ vṛttiṃ caratvahaṃmamātmikām || 58 ||
[Analyze grammar]

dehendriyādyaikyarūpāṃ kāmasaṃkalpamohinīm |
strīpuṃvittarasāsaktiduḥkhatṛṣṇā'ghasaṃbhṛtām || 59 ||
[Analyze grammar]

miṣṭabhokṣye garavat sā duḥkhadā cātmamodane |
tayā vṛttyā nirayān sa prayātyeva tu māyikān || 60 ||
[Analyze grammar]

nirayeṣu gatirnaiva yathā syāt prayateta tat |
ātmaniṣṭhāṃ sādhayīta hareḥ satāṃ prasevayā || 61 ||
[Analyze grammar]

premṇā māhātmyavittyā ca dehaniṣṭhāṃ parityajet |
śraddhayā sampraseveta sādhūn bhaktyā janārdanam || 62 ||
[Analyze grammar]

ājñāyāṃ cāti tiṣṭhecca hareḥ sādhornirantaram |
śāstradharmān pālayecca māhātmyajñānamarjayet || 63 ||
[Analyze grammar]

evaṃ nirvāsanatvaṃ syāt kṛṣṇe snehāttu tad drutam |
māhātmyajñānasahitā bhaktiḥ kṛṣṇe vivardhate || 64 ||
[Analyze grammar]

māhātmyajñānahīnasya naśyanti bhaktidā guṇāḥ |
māhātmyajñānayuktasya guṇāḥ kalyāṇakāriṇaḥ || 65 ||
[Analyze grammar]

sarve tvāgatya vartante hṛdaye tu yathā satām |
guṇānāmāgame sarvā naśyanti vāsanā drutam || 66 ||
[Analyze grammar]

bhajamānasya bhaktasya vāsanāśeṣasaṃbhave |
mṛtyuścejjāyate tasya janma devādiṣūjjvalam || 67 ||
[Analyze grammar]

sampadbhogakaraṃ syādvai bhaktānāṃ ca gṛhe tataḥ |
vāsanānāśamāsādya tato muktirbhavet dhruvā || 68 ||
[Analyze grammar]

savāsanasya bhaktasya yāmyagatirna vidyate |
bhaktiphalaṃ devaloka īśaloko'thavā mataḥ || 69 ||
[Analyze grammar]

mahācakravartirājā bhakto bhūtvā'kṣaraṃ vrajet |
apārakaruṇaḥ kṛṣṇo bhaktasya paramā gatiḥ || 70 ||
[Analyze grammar]

sa taṃ nirvāsanaṃ kṛtvā svabhaktaṃ parirakṣati |
kṛṣṇadhāmnaḥ sakāśāttu māyikā vaibhavā api || 71 ||
[Analyze grammar]

bhaktānāṃ nirayā eva bhāsante cātmavedinām |
bhuktvā tyaktvā tataste tān prayānti cākṣaraṃ padam || 72 ||
[Analyze grammar]

rāmanāma japan kṛṣṇaṃ spṛśan paśyan narāyaṇam |
divyaśca nirmalo brahmarūpo bhūtvā paraṃ padam || 73 ||
[Analyze grammar]

prayāti yogināṃ sthānaṃ muktānāṃ padamuttamam |
satāṃ maṇḍalamadhyastho'śnute'kṣare mahāsukham || 74 ||
[Analyze grammar]

bhaktā yadvā'pyabhaktā vā sākṣāddharestu darśanam |
sparśanaṃ sevanaṃ kuryuste divyāḥ saṃbhavanti vai || 75 ||
[Analyze grammar]

abhaktāścet samanaskāḥ sevante prītisaṃbhṛtāḥ |
tadā te vāsanāṃ tyaktvā prayānti paramaṃ padam || 76 ||
[Analyze grammar]

api bhaktā nirmanaskāḥ sevante śrīpatiṃ prabhum |
tadā te'pi śanairjanmāntare yāsyanti tatpadam || 77 ||
[Analyze grammar]

tīvrasaṃvegabhaktānāmāsannatama īśvaraḥ |
mandasaṃvegabhaktānāṃ dūratamo janārdanaḥ || 78 ||
[Analyze grammar]

nirmanaskaṃ harernāmakīrtanaṃ darśanaṃ spṛśiḥ |
sevanādyaṃ tu naiva syāt sampūrṇaphaladaṃ kvacit || 79 ||
[Analyze grammar]

nirmanaskaṃ tu yaddhyānaṃ sphūrtihīnaṃ tu tadbhavet |
yatra nārāyaṇamūrtirnaiva bhāseta karhicit || 80 ||
[Analyze grammar]

tasmād bhaktā ubhayathā bāhye vā cāntare'rhaṇe |
sapremaikāgryavṛttyādyaiḥ śīlayeyurmahāprabhum || 81 ||
[Analyze grammar]

te śrīkṛṣṇapratāpena dehānte sadya eva ha |
yayuḥ śrīkāntagolokaṃ muktāḥ syurdivyavigrahāḥ || 82 ||
[Analyze grammar]

anye tu puṇyamāsādya bhaktyādīnāṃ punarjanum |
samāsādya samāpyaiva puṇyaṃ yāsyanti tatpadam || 83 ||
[Analyze grammar]

gopīnāmiva sarvasvārpaṇairyeṣāṃ tu sevanam |
sparśamīkṣā kīrtanaṃ ca vyavasthātrivapuḥkṛtam || 84 ||
[Analyze grammar]

te prayānti drutaṃ kṛṣṇātmakaṃ divyaṃ pramokṣaṇam |
smṛtiṃ vinā kṛtaṃ sarvaṃ niṣphalaṃ mokṣadaṃ na tat || 85 ||
[Analyze grammar]

uṣṭrapālā bhavanto vai kurvantu tat tathāvidham |
premṇā prītyā manasā ca sarvārpaṇena vai hṛdā || 86 ||
[Analyze grammar]

sevanaṃ kīrtanaṃ cāpi sparśanaṃ śrīhareḥ satām |
tīvrasnehāḍhyabhaktānāmāśu muktirbhaviṣyati || 87 ||
[Analyze grammar]

vanināṃ kīrtanaṃ sevā bhaktiśca muktisādhanam |
viprāṇāṃ karmaṣaṭkaṃ ca bhaktirnavadhā muktaye || 88 ||
[Analyze grammar]

satāṃ snānaṃ dhyānamiṣṭaṃ pūjā prasevanaṃ tathā |
vairāgyaṃ cātmaniṣṭhā ca kṛṣṇaniṣṭhā ca muktaye || 89 ||
[Analyze grammar]

nārīṇāṃ kāntabhāvena sevanaṃ snehapūritam |
sarvārpaṇaṃ cānuvṛttirdāsītvaṃ muktaye harau || 90 ||
[Analyze grammar]

oṃ namaḥ śrīkṛṣṇanārāyaṇāya svāmine svāhā |
japantu paramaṃ mantraṃ bālakṛṣṇaṃ raṭantvapi || 91 ||
[Analyze grammar]

pūjanaṃ mānasaṃ dhyātvā kurvantu paramātmanaḥ |
smarantu taccaritrāṇi tato muktiṃ vrajantvapi || 92 ||
[Analyze grammar]

ityuktvā sādhavaḥ sarve rāmāyaṇādayo rame |
viremuḥ pūjitāścāpi bhojitāḥ prayayustataḥ || 93 ||
[Analyze grammar]

dīrgharaṃbhādayaḥ sarve bhejuḥ sādhūktarītitaḥ |
anādiśrīkṛṣṇanārāyaṇaśrīvallabhaṃprabhum || 94 ||
[Analyze grammar]

harekṛṣṇa harerāma hareviṣṇo hareprabho |
bālakṛṣṇa hare sītāpate rādhāpate vibho || 95 ||
[Analyze grammar]

evaṃ te bhajanaṃ cakruruṣṭrapālā vane gṛhe |
sambhūya satataṃ snehabhaktyā lakṣmi prabhormama || 96 ||
[Analyze grammar]

atha kālāntare yāte dīrgharambhādikānaham |
muktiṃ netumāyayau ca divyarūpaścaturbhujaḥ || 97 ||
[Analyze grammar]

vaikuṇṭhādhipatiḥ rāmaḥ sītayā saha śobhanaḥ |
vimānena tu divyenā'nayaṃ taṃ cetarānapi || 98 ||
[Analyze grammar]

uṣṭradānāni sādhubhyo dattāni yāni tānyapi |
divyarūpadharānuṣṭrānādāya samupāyayau || 99 ||
[Analyze grammar]

sarvabhūṣādharān ramyān svarṇavarṇān vihaṃgamān |
kikiṇīghurghuraśabdān nītvā'haṃ samupāyayau || 100 ||
[Analyze grammar]

ye ye bhaktā uṣṭrapālāstāṃstān divyān vidhāya ca |
ārohayitvā coṣṭreṣu divyadhāmā'nayaṃ mama || 101 ||
[Analyze grammar]

evaṃ muktā uṣṭrapālāḥ rāmāyanaprasaṃgataḥ |
mayā sarve kṛtā divyā lakṣmi bhaktyā kṛpālunā || 102 ||
[Analyze grammar]

paṭhanācchravaṇādasya smaraṇāccintanādapi |
bhuktirmuktirbhaveccāpi tatheṣṭarddhiśca sampadaḥ || 103 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne rāmāyanākhyasādhuyogena dīrgharavādīnāmuṣṭrapālānāṃ mokṣaṇamityādinirūpaṇanāmā caturviṃśatyadhikadvi |
śatatamo'dhyāyaḥ || 224 ||
[Analyze grammar]