Chapter 223

śrīpuruṣottama uvāca |
śṛṇu nārāyaṇīśri tvamajapālakathāṃ tathā |
candrprabhāyāḥ sarito nikaṭe nandipattane || 1 ||
[Analyze grammar]

udyamaśrīsamākhyo'bhūd bharavāṭo hyajādhanaḥ |
pañcaśatāni santyasyā'jānāṃ śataṃ gavāṃ tathā || 2 ||
[Analyze grammar]

uraṇānāṃ pañcaśataṃ gardabhānāṃ śataṃ tathā |
śunāṃ tu daśakaṃ cāpi mahiṣīṇāṃ tu viṃśakam || 3 ||
[Analyze grammar]

cārāṇāṃ bhṛtyakāryāṇāṃ daśakaṃ tasya vidyate |
patnīṣaṭkaṃ putraputrīsaptatiścāsya vidyate || 4 ||
[Analyze grammar]

sīmni nadītaṭe'raṇye śādvale ghāsasampadi |
nibīḍauṣadhisaṃśobhe puṣkalatṛṇabhūtale || 5 ||
[Analyze grammar]

vasati nandipurato nātidūre suvṛttike |
yatrā'nyabharavāṭānāṃ vasatiḥ paśurakṣiṇī || 6 ||
[Analyze grammar]

ghoṣātmikā vidyate vai vanyabhakṣyādikāriṇī |
udyamaśrīrmahānāste yaśasā ca tathā''yuṣā || 7 ||
[Analyze grammar]

paśudhanena ca kuṭumbenā'tithiprasevayā |
yasya vāse samāyānti vanino bahavo muhuḥ || 8 ||
[Analyze grammar]

svāgataṃ so'pi sarveṣāṃ karoti payaādibhiḥ |
sādhavo yatayaḥ siddhāḥ samāyānti ca yoginaḥ || 9 ||
[Analyze grammar]

sādhvyaścāpi samāyānti sevābhāvigṛhe muhuḥ |
satkārayati sarvān saḥ prasannayati bhojanaiḥ || 10 ||
[Analyze grammar]

dānamānaiḥ susanmānaiḥ pādasaṃvāhanādibhiḥ |
striyaḥ putrāśca putraśca bharavāṭyo'pi nityadā || 11 ||
[Analyze grammar]

sevante sādhupuruṣān sādhvīśca bahubhāvataḥ |
sarvasvārpaṇabhāvena sādhūnmatvā prabhuṃ harim || 12 ||
[Analyze grammar]

sādhuṣvāste hariḥ sākṣāt sādhvīṣvāste ramā svayam |
abhyāgateṣu devāścāsate pūjyā yato hi te || 13 ||
[Analyze grammar]

evaṃ sevāṃ kurvatastu bhajamānasya māṃ prabhum |
gṛhe tasyā''yayuḥ sādhvyo viṃśatiḥ sāṃkhyayogagāḥ || 14 ||
[Analyze grammar]

yatinyastāśca vaiṣṇavyo vṛddhā bhaktiparāyaṇāḥ |
tāsāṃ dugdhādibhiścāpi vanyabhojanasampradaiḥ || 15 ||
[Analyze grammar]

sanmānaṃ svāgataṃ cakre vāsaṃ kāṇḍagṛhe dadau |
uṣustāḥ śrīkṛṣṇanārāyaṇabhaktānikāḥ striyaḥ || 16 ||
[Analyze grammar]

divyā divyaguṇopetāḥ snātvā nadyāmapūjayan |
harikṛṣṇaṃ prāṇapatiṃ śrīmatkṛṣṇanarāyaṇam || 17 ||
[Analyze grammar]

tatastā bhojanaṃ cakrurnivedya paramātmane |
viśrāntiṃ ca samālabhya sāyaṃ saṃkīrtanaṃ vyadhuḥ || 18 ||
[Analyze grammar]

ārārtrikaṃ caritrāṇāṃ kathāṃ cakruśca vārtikāḥ |
vallavyo bālakāḥ kanyāḥ kathāṃ śrotuṃ sahasraśaḥ || 19 ||
[Analyze grammar]

āyayuḥ parito jñātvā sādhvīmaṇḍalamuttamam |
mātarastā harermūrtau vimagnavṛttayaḥ sadā || 20 ||
[Analyze grammar]

bhajante ca raṭantyenaṃ śrīkṛṣṇaṃ vallabhaṃ prabhum |
tāsu gurupadaṃ prāptā satīśvarītināmikā || 21 ||
[Analyze grammar]

sādhvī kathāṃ hareścakre śuśruvurgopikāstriyaḥ |
vallavāśca tathā sarve śraddhayā bhaktibhāvayā || 22 ||
[Analyze grammar]

lakṣmīnārāyaṇasaṃhitāyāḥ kathāṃ sumokṣadām |
pāpaprajvālikāṃ satīśvarī jagāda śobhanām || 23 ||
[Analyze grammar]

manaḥ kṛṣṇe dhṛtaṃ yena jitaṃ tena jagat khalu |
jitaṃ bhavenmanastadvai yad dhṛtaṃ paramātmani || 24 ||
[Analyze grammar]

indriyāṇi viṣayeṣu prayānti manasā saha |
ajitaṃ tu manastadvai viṣayaṃ prati yadgatam || 25 ||
[Analyze grammar]

parāvṛttya manovṛttimindriyavṛttikā harau |
dhārayettanmanaścendriyāṇi jitāni tattadā || 26 ||
[Analyze grammar]

rāganāśe virāgaḥ syāttena mano jitaṃ bhavet |
harau prītyā ca nā'nyatra gacchenmano jitaṃ bhavet || 27 ||
[Analyze grammar]

brahmasthityā vinaśyedvai rāgaśca kāmanādayaḥ |
bhogabuddhirvinaśyecca manastena jitaṃ bhavet || 28 ||
[Analyze grammar]

śrīhareḥ śrīpaterdivyasukhe yasya tu magnatā |
māhātmyajñānayuktasya tasya mano jitaṃ bhavet || 29 ||
[Analyze grammar]

dehabhāvavināśena cidbhāvo yasya vartate |
manastasya jaḍaṃ nirutsāhaṃ jitaṃ bhavedapi || 30 ||
[Analyze grammar]

nityatṛptirhareḥ kāntānmāyikāttu nivartanam |
tasya tṛptaṃ sthiraṃ cittaṃ mano jitaṃ sadā matam || 31 ||
[Analyze grammar]

dehābhimānanāśena cātmaniṣṭhābalena ca |
rāgavāsanātyāgena mano jitaṃ sadā bhavet || 32 ||
[Analyze grammar]

nārīrūpaṃ manaḥ proktaṃ jīvātmā nararūpadhṛk |
mano bhogaṃ jahātyeva mano jitaṃ bhavet svataḥ || 33 ||
[Analyze grammar]

ātmā'haṃ cetano nārī paramātmā naro mama |
patirbhoktā sukhadātā nānyo me bhogakṛtparaḥ || 34 ||
[Analyze grammar]

sākṣātkṛṣṇo bālakṛṣṇo hariḥ śrīkāntavallabhaḥ |
pātā dhātā vidhātā saḥ priyaḥ prāṇapatiḥ patiḥ || 35 ||
[Analyze grammar]

svāmī dhāmī ca niṣkāmī sarvānandapariplutaḥ |
mamā''nandapradaḥ kāntaścetyayaṃ puruṣottamaḥ || 36 ||
[Analyze grammar]

īśvarāṇāmavatārāvatāriṇīnāṃ śāsakaḥ |
golokādhipatiḥ so'yaṃ vallavīsvāmitāṃ gataḥ || 37 ||
[Analyze grammar]

vaikuṇṭhādhipatiḥ so'yaṃ pārṣadāṇīpatiḥ prabhuḥ |
muktānikāpatiḥ kṛṣṇo'kṣaradhāmavirājitaḥ || 38 ||
[Analyze grammar]

śrīpure'vyākṛte'mṛte śrīlakṣmīkamalāpatiḥ |
lalitāmāṇikīnāthaḥ prabhāpadmāvatīpatiḥ || 39 ||
[Analyze grammar]

brahmapriyāpatiścāyaṃ haripriyāpatiḥ sa ca |
viśālābadarīnāthaḥ śvetadvīparamāpatiḥ || 40 ||
[Analyze grammar]

kṣirodaśāradāsvāmī sītāpatiḥ satīpatiḥ |
sarvasādhvīpatiḥ kṛṣṇaḥ kumbhakārīpatiḥ sa hi || 41 ||
[Analyze grammar]

sarvamuktapatiḥ sādhupatiḥ sarvasakhīpatiḥ |
sarvadāsīpatiḥ prāṇamātrapatiḥ paraḥ pumān || 42 ||
[Analyze grammar]

evaṃ jñātvā hariṃ kāntaṃ bhajet sarvasukhāśrayam |
tasya mano bhavellagnaṃ kṛṣṇe tadvai jitaṃ matam || 43 ||
[Analyze grammar]

sa cāyaṃ bhagavānāste hṛdaye me madātmani |
sañcidānandarūpaśca sādhusādhvīṣu rājate || 44 ||
[Analyze grammar]

śrīmadgopālabālaśca rājate'kṣarakṣetrake |
sarvasukhanidhiḥ sākṣād vāsudevaḥ sa eva saḥ || 45 ||
[Analyze grammar]

mānavānāṃ ca devānāṃ pitṝṇāṃ siddhayoginām |
īśvarāṇāmavatārakoṭīnāṃ susukhāni vai || 46 ||
[Analyze grammar]

muktānāṃ brahmadhāmnāṃ ca yāni yāni sukhāni vai |
tāni sarvāṇi kṛṣṇasya śrīkambharātmajasya tu || 47 ||
[Analyze grammar]

romṇa ekasya tu prānte vartante cedṛśaḥ prabhuḥ |
sarvasukhanidhiḥ svāmī kṛṣṇo yo milito'sti naḥ || 48 ||
[Analyze grammar]

tasya dhāmnaḥ sukhasyā'gre dhāmnāṃ sukhāni yāni vai |
sarveṣāṃ lokapālānāṃ vyūhānāmīśadhāminām || 49 ||
[Analyze grammar]

grahāṇāṃ marutāṃ viśvedevānāmaśvinorapi |
sādhyānāṃ ca vadhūnāṃ ca rudrāṇāṃ dyusadāmapi || 50 ||
[Analyze grammar]

sūryāṇāṃ vrahmaviṣṇūnāṃ tathā'nyeṣāṃ paraukasām |
sthānāni nirayāṇyeva dhāmnaścāsya parātmanaḥ || 51 ||
[Analyze grammar]

tamimaṃ śrīpatiṃ kāntaṃ hitvā tu nirayābhidhān |
kathamanyān sukhasaṃjñān bhaje'haṃ parameśvarī || 52 ||
[Analyze grammar]

evaṃ vijñāya māhātmyaṃ divyabhāvayutā satī |
tyajenmohaṃ nirayāṇāṃ jitaṃ tasyā manaḥ sadā || 53 ||
[Analyze grammar]

vāsanā vilayaṃ yānti māyikyaḥ satataṃ tadā |
etādṛśyā dehavāñcchā bhogavāñcchā ca māyikī || 54 ||
[Analyze grammar]

na jāyate sadā dagdhā jātā nirmūlikā hi sā |
etādṛśaṃ mahimānaṃ yā na vetti harestviha || 55 ||
[Analyze grammar]

tasyā nare bhaved vṛttiḥ prākṛte'pi sakāmanā |
putre mitre kalatrādau patyau sneho'pi bandhanam || 56 ||
[Analyze grammar]

manaso vartate tasyāḥ svārthavartanayoṣitaḥ |
sā tyajet paramātmānaṃ kuṭumbasnehakarṣitā || 57 ||
[Analyze grammar]

rogādipīḍayā vā ca viṣayā'prāptitastyajet |
keśave tu manastasyā viṣayārthaṃ caret sadā || 58 ||
[Analyze grammar]

alābhe viṣayāṇāṃ tu pāmarā sā bhavettataḥ |
patatyeva harerbhaktermokṣamārgaṃ na vindati || 59 ||
[Analyze grammar]

tasmāt sneho harau kāryaḥ svārthaśūnyo nisargajaḥ |
na vai rūpānna vai kāmānna lobhānnaiva lābhajaḥ || 60 ||
[Analyze grammar]

na svārthādvā prakartavyaḥ snehaḥ kintu nisargajaḥ |
divyaguṇacamatkāramāhātmyajñānasaṃbhavaḥ || 61 ||
[Analyze grammar]

kartavyo vai sadā sneho yasya nāśo na karhicit |
guṇā divyā harau santi satyaśaucasukhādayaḥ || 62 ||
[Analyze grammar]

apāraṃ cāpi vātsalyaṃ mādhuryaṃ ca suśīlatā |
sauhārdaṃ ca kṛpā sneho dayā śāntiḥ kṣamā ratiḥ || 63 ||
[Analyze grammar]

prītirhitakaratvaṃ ca sahanaṃ divyatā dhṛtiḥ |
audāryaṃ śāśvatānanditvaṃ ca śaraṇarakṣitā || 64 ||
[Analyze grammar]

ete guṇāḥ samāyānti bhakteṣvapi prasevanāt |
sadvārtāśravaṇenāpi guṇāḥ prāvirbhavanti hi || 65 ||
[Analyze grammar]

evaṃguṇiṣu bhakteṣu snehaḥ kṛṣṇasya jāyate |
vapuṣā manasā vāṇyā dāsyaṃ kāryaṃ harestataḥ || 66 ||
[Analyze grammar]

hareḥ rucyanusāreṇa vartitavyaṃ tu varṣmaṇā |
tapa ādi prakartavyaṃ hareḥ rucyanusārataḥ || 67 ||
[Analyze grammar]

hareḥ satāṃ yogināṃ ca sādhvīnāṃ śraddhayā sadā |
śuśrūṣaṇaṃ prakartavyaṃ kṛṣṇe sneho dṛḍho bhavet || 68 ||
[Analyze grammar]

vacaḥ kaṭu na vaktavyaṃ satyaṃ vācyaṃ hitaṃ tathā |
mahadbhirna vivādo'pi kartavyo na jayo'pi ca || 69 ||
[Analyze grammar]

nirmānaṃ komalaṃ vācyaṃ pramāṇaṃ namratānvitam |
utkṛṣṭā vāk pravaktavyā mānyaṃ cājñāvaco hareḥ || 70 ||
[Analyze grammar]

ādarāt kaṭhinaṃ cāpi grāhyaṃ vaco hareḥ sadā |
kriyānarhamasaṃbhāvyaṃ grāhyameva vaco hareḥ || 71 ||
[Analyze grammar]

evaṃ bhaveddhareḥ snehaḥ satāṃ snehastathā bhavet |
darśane śravaṇe dhyāne pūjane sevane hareḥ || 72 ||
[Analyze grammar]

sannidhau śrīharermūrtāvaikāgryaṃ ceṣṭasiddhikṛt |
muhurnavaṃ navaṃ yadvaddarśanaṃ cāpyalaukikam || 73 ||
[Analyze grammar]

sthiraṃ ciraṃ prakuryācca nānyat paśyettadā khalu |
etādṛśaṃ darśanaṃ vai hareḥ snehasya kāraṇam || 74 ||
[Analyze grammar]

bahirvā cāntare vedṛg darśanaṃ snehakāraṇam |
caladṛṣṭijane prītirjāyate naiva śārṅgiṇaḥ || 75 ||
[Analyze grammar]

satāṃ cāpi bhavennaiva prītiścānyavilokini |
nare nāryāṃ paśau citre kapāṭe caladṛṣṭike || 76 ||
[Analyze grammar]

bahudhāreṇa manasā dṛṣṭiḥ kriyate cañcalā |
tayā dṛṣṭyā'nyatra ganturna tatprītiḥ prajāyate || 77 ||
[Analyze grammar]

yathā kāmī janaḥ paśyet kāmukīṃ tvekacetasā |
premaikatānabhāvena tathā paśyet prabhuṃ patim || 78 ||
[Analyze grammar]

antarā tvāgataṃ kiñcinnānusandheyamaṇvapi |
ādyakṣaṇe yathā patyurvadhūṭyā darśanaṃ navam || 79 ||
[Analyze grammar]

dṛḍharūpadhṛtiprāptikaraṃ sphuraṇadāyakam |
tathā nityanavaṃ tadvai darśanaṃ snehakāraṇam || 80 ||
[Analyze grammar]

kathāyāḥ śravaṇe tvevamaikāgryaṃ kāryameva yat |
sphureccaritraśravaṇād bhagavān bhūtabhāvanaḥ || 81 ||
[Analyze grammar]

sarvendriyeṣu cakṣurvā karṇo vā mana ityapi |
cañcalāni viśeṣeṇa niyantavyāni tāni vai || 82 ||
[Analyze grammar]

kāmendriyaṃ tathā tebhyo'dhikaṃ vai cañcalaṃ yataḥ |
mano niyamya kāmo'pi niyantavyo manoyutaḥ || 83 ||
[Analyze grammar]

anyathā śrīharerdhyāne pūjane grāmyamūrtayaḥ |
viṣayāḥ kleśadāścāpi sphureyurvighnakāriṇaḥ || 84 ||
[Analyze grammar]

prabalaṃ cenmano liṅgaṃ cakṣuḥ karṇaḥ prayāti vai |
viṣayeṣu tu grāmyeṣu tadā kāryaṃ vicāraṇam || 85 ||
[Analyze grammar]

hariṃ tyaktvā'nyaviṣaye gamane lābha eva na |
viṣayā duḥkhadāḥ sarve māyābandhakarā yataḥ || 86 ||
[Analyze grammar]

ānandamūrtiḥ śrīkṛṣṇanārāyaṇaśrīvallabhaḥ |
tatra stheyaṃ śāśvatasyā''nandasya parilabdhaye || 87 ||
[Analyze grammar]

siddhadaśā divyadaśā modapramodaśevadhiḥ |
sarvaṃ kṛṣṇādbhavatyeva tasmāllabha sukhaṃ mahat || 88 ||
[Analyze grammar]

anyatra yatamānasya kiñcit sukhaṃ bhavedapi |
sarvaṃ duḥkhabahulaṃ tannirayasya pradaṃ tathā || 89 ||
[Analyze grammar]

tasmācchṛṇu kathāṃ paśya kṛṣṇaṃ cintaya sarvathā |
ānandaṃ yāhi tasmādvai kṛṣṇāt kāntānna cetarāt || 90 ||
[Analyze grammar]

evaṃ kṛṣṇe kṛtasnehād vāñchitāṃ siddhimāpnuyāt |
vibhūtiṃ sampado rūpaṃ śrīrādhāmāṇikīprabhum || 91 ||
[Analyze grammar]

viṣṇunārāyaṇatulyaṃ sarvamāpnoti tadrateḥ |
sadehe sarvamāpyeta mṛtau vā dhāmni sarvathā || 92 ||
[Analyze grammar]

tasmāddharau sadā stheyaṃ cakṣuṣā manasā girā |
karṇena hṛdayenāpi kāmena yāvadātmanā || 93 ||
[Analyze grammar]

evaṃ nityamanuvṛttyā kṛṣṇe prītimataḥ khalu |
prītimatyā yoṣito vā syāt kṛṣṇaprītipātratā || 94 ||
[Analyze grammar]

kṛṣṇavat saṃsthitirdivyā lakṣmīvadvā bhavettataḥ |
na nyūnaṃ syāddharestasya tasyāḥ śriyorna nimnatā || 95 ||
[Analyze grammar]

evaṃ lakṣmi mahāsādhvī satīśvarī tu vallavīḥ |
vallavān bhagavatsnigdhānupādideśa muktaye || 96 ||
[Analyze grammar]

vallavyo vallavāścāpi bharavāṭāstathā'pare |
udyamaśrīprabhṛtayo jagṛhurbhaktimuttamām || 97 ||
[Analyze grammar]

oṃ namaḥ śrīkṛṣṇanārāyaṇāya pataye svāhā |
itimantraṃ satīśvaryā jagṛhurnāma cottamam || 98 ||
[Analyze grammar]

bālakṛṣṇa hare kānta rādhāpate ramāpate |
mokṣakṛt vallabha sarvakāmaprada pumuttama || 99 ||
[Analyze grammar]

itināmāni jagṛhuḥ kīrtanaṃ cakrurādarāt |
sādhvyastu bhajanaṃ kṛtvā prātarbhuktvā'nyakheṭakam || 100 ||
[Analyze grammar]

prayayurbharavāṭāśca bharavāṭyastathā muhuḥ |
bhajanaṃ pūjanaṃ cakrurbālakṛṣṇasya sarvadā || 101 ||
[Analyze grammar]

tāsāṃ bhaktyā hi bhagavān rādhayā ramayā saha |
prādurbabhūva sahasā māṇikyā ca śriyā saha || 102 ||
[Analyze grammar]

caturbhujasvarūpaṃ taṃ dṛṣṭvā mahotsave gṛhe |
mandire vratadivase dvādaśyāṃ prātareva ha || 103 ||
[Analyze grammar]

āścaryaṃ paramaṃ prāpuḥ sahasraśo janāstadā |
datvā svadarśanaṃ cāpi prasādaṃ pāyasaṃ śubham || 104 ||
[Analyze grammar]

mokṣārthaṃ varadānaṃ ca datvā tiro'bhavat prabhuḥ |
so'haṃ lakṣmi tataḥ kāle prāpte udyamaśrījanam || 105 ||
[Analyze grammar]

bharavāṭān bhaktavaryān gopīśca premasaṃplutāḥ |
ninye'haṃ mama dhāmaiva golokaṃ nityamuttamam || 106 ||
[Analyze grammar]

evaṃ sādhvīprasaṃgena bharavāṭyaśca vallavāḥ |
tāritā māyikāllokāt snehabhaktyā kṛpālunā || 107 ||
[Analyze grammar]

evaṃ nāryo narā ye māṃ bhajiṣyanti samarpitāḥ |
sarve yāsyanti paramaṃ matpadaṃ kāntasevanam || 108 ||
[Analyze grammar]

paṭhanācchravaṇādasya smaraṇāccaraṇādapi |
bhuktirmuktirmahāsaukhyaṃ bhavenmayā samarpitam || 109 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne udyamaśrīprabhṛtigopālakānāṃ satīśvarīsādhvīsevayā bhaktirmokṣaṇaṃ cetyādinirūpaṇanāmā trayo |
viṃśatyadhikadviśatatamo'dhyāyaḥ || 223 ||
[Analyze grammar]