Chapter 218

śrīpuruṣottama uvāca |
śṛṇu nārāyaṇīśri tvaṃ kathāmaṃgārahāriṇaḥ |
jharaṇābhūmivāsasya bhaktasya mauktikeśinaḥ || 1 ||
[Analyze grammar]

mauktikeśī mamabhakto pārthakulasakhātarāṭ |
kulasānāṃ khanīnāṃ vai khātodyotakaraḥ sadā || 2 ||
[Analyze grammar]

sahasraśo janāstatrāṃ'gārakarmakarāḥ khanau |
khanayanti kulasān vai pārthān kṛṣṇān divāniśam || 3 ||
[Analyze grammar]

prātarbhakto bhajitvā māṃ tato yāti khaniṃ prati |
kṣaṇaṃ me bhajanaṃ tatra vidhāpayati bhṛtyakaiḥ || 4 ||
[Analyze grammar]

hare kṛṣṇa hare kṛṣṇa bālakṛṣṇa hare hare |
anādiśrīkṛṣṇanārāyaṇa śrīśa hare hare || 5 ||
[Analyze grammar]

evaṃ kṛtvā kārayitvā bhajanaṃ khanigahvare |
praveśaṃ ca karmacāraiḥ samaṃ karoti satvaram || 6 ||
[Analyze grammar]

kṛṣṇaśilāṃ'gārabhedān nikhananti ca gahvare |
bhajante bhagavantaṃ māṃ śrīpatiṃ śrāntisatkṣaṇe || 7 ||
[Analyze grammar]

madhyāhne bhojanaṃ kṛtvā viśrāmyanti tu karmiṇaḥ |
tadā divyaṃ bodhayati mauktikeśī janān yathā || 8 ||
[Analyze grammar]

vinā kṛṣṇasya bhajanaṃ saṃsāro gahvaro mahān |
tīryate naiva kenāpi hyagādho vāsanāmayaḥ || 9 ||
[Analyze grammar]

janmamṛtyujarāvyādhistarā asaṃkhyakoṭayaḥ |
karmastarāstathā tatra bhinnavyāpāranodakāḥ || 10 ||
[Analyze grammar]

vinā bhaktiṃ harenaiva tadantaṃ labhate janaḥ |
asaṃgī sādhusaṃgī ca vairāgyāllabhate'ntakam || 11 ||
[Analyze grammar]

vartete hṛdaye dvau tau viruddho bhinnagocarau |
eko nayati māyāyāṃ dvitīyaḥ paramātmani || 12 ||
[Analyze grammar]

eko vadati bhuñjīya viṣayān māyikāniti |
dvitīyo vadati naiva bhuñjīya māyikāniti || 13 ||
[Analyze grammar]

tatraikaṃ mana evā'sti māyikaṃ māyikārthagam |
dvitīyo jīvanāmā''tmā niṣedhaṃ kurute sadā || 14 ||
[Analyze grammar]

vivicyaivaṃ vijānīyādātmanā parameśvaram |
santyajed viṣayānanyān mokṣarodhakarāniha || 15 ||
[Analyze grammar]

vāsanā manasā yuktā prerikā viṣayeṣvapi |
lokaviṣayaśabdotthā bhuṃkṣveti sā vadatyapi || 16 ||
[Analyze grammar]

satāṃ kathāprasaṃgotthā bhāvanātmanivāsinī |
mā bhuṃkṣveti niṣedhaṃ vai karoti māyikeṣu sā || 17 ||
[Analyze grammar]

niṣkāsanīyā lokoktirdhāryā sādhukathāsudhā |
pitā mātā suhṛdbandhuḥ svasā bhrātā ca mātulaḥ || 18 ||
[Analyze grammar]

putraḥ patnī mahiṣī gauraśvo vastraṃ gṛhaṃ dhanam |
mamedaṃ ca tavedaṃ cetyevaṃ laukikavāsanāḥ || 19 ||
[Analyze grammar]

ahantāmamatāhetubhūtāḥ kṣipanti gahvare |
bhramanti karmakāṇḍaiśca jāyante ca punaḥ punaḥ || 20 ||
[Analyze grammar]

satāṃ kalyāṇadātṝṇāṃ dhṛtvā vākyāni vai hṛdi |
neme pitā suhṛd bandhurmā bhrātā mātulaḥ svasā || 21 ||
[Analyze grammar]

putraḥ patnī mahiṣī gauraśvo vastraṃ gṛhaṃ dhanam |
nedaṃ mama tavedaṃ na kintu tatparamātmanaḥ || 22 ||
[Analyze grammar]

pitā mātā suhṛd bandhuḥ patiḥ kṛṣṇanarāyaṇaḥ |
ahaṃ tu śrīharerdāsaḥ śāśvatiko'smi cetanaḥ || 23 ||
[Analyze grammar]

mokṣado vai pitā mātā taddāso'haṃ subhaktimān |
na me bandho na me māyā na me'hantā na māmakam || 24 ||
[Analyze grammar]

nityaśuddho harerbhakto mukto'smi satsamāgamāt |
vāsanā khalu bandho'sti mokṣo'sti vāsanālayaḥ || 25 ||
[Analyze grammar]

saṃsāre duḥkhabahule sukhaṃ kṛṣṇapade'sti vai |
lokaśabdāḥ satāṃ śabdā yuddhyanti bodhakāriṇaḥ || 26 ||
[Analyze grammar]

tajje jñāne vivekākhye yuddhyato hṛdaye'niśam |
yeṣāṃ balaṃ mahat syādvai tasyaiva vijayo bhavet || 27 ||
[Analyze grammar]

yatra nārāyaṇaścāste yatra santaśca mokṣadāḥ |
tatraiva vijayaścāste māyābalaṃ tu niṣphalam || 28 ||
[Analyze grammar]

sādhūnāṃ hṛdaye kṛṣṇaḥ sādhūnāṃ vijayaḥ sadā |
upadeśasvarūpā vai santo yeṣāṃ hṛdi sthitāḥ || 29 ||
[Analyze grammar]

kathādvārā tathā kṛṣṇo yeṣāṃ hṛtsu sadā sthitaḥ |
teṣāṃ balaṃ ca vijayo jāyate mokṣalābhadaḥ || 30 ||
[Analyze grammar]

bāhyānāṃ tu satāṃ saṃgāt puṣyanti santa āntarāḥ |
bāhyānāmasatāṃ saṃgāt puṣyantyasanta āntarāḥ || 31 ||
[Analyze grammar]

puṣṭānāṃ vardhate śaktirapuṣṭānāṃ kṣayo bhavet |
ataḥ santaḥ poṣaṇīyā na tvasantaḥ kadācana || 32 ||
[Analyze grammar]

yathā yathā prasannāḥ syuḥ santo vṛttyaṃ tathā tathā |
satāṃ prasannatā puṣṭistathā kṛṣṇaprasannatā || 33 ||
[Analyze grammar]

evaṃ jāte vijayo vai jīvātmanaḥ prajāyate |
mokṣarājyaṃ labhate'pi kṛṣṇadāsyaṃ mahatsukham || 34 ||
[Analyze grammar]

kṛṣṇārthaṃ yatamānasya sādhusevārthamityapi |
yuddhyamānasya bhaktasya draṣṭā'sti bhagavān svarāṭ || 35 ||
[Analyze grammar]

yuddhe eva tu maraṇe draṣṭā prasīdati dhruvam |
yuddhe mṛtyurvijayo'sti svāmī tasmai prasīdati || 36 ||
[Analyze grammar]

svāmipriyehayā mṛtyuṃ gato'yaṃ ceti vetti saḥ |
parāṅmukho na vai jātastato jayaṃ samarhati || 37 ||
[Analyze grammar]

svāmī tasmai dadātyeva phalaṃ jayādhikaṃ hyapi |
tasmād balibhiryoddhavyaṃ jaye sanmukhavakṣasā || 38 ||
[Analyze grammar]

martavyaṃ svāmiprītyarthaṃ yuddhe sanmukhavakṣasā |
bhaktyā dharmeṇa martavyaṃ hṛdi sanmukhaśārṅgiṇā || 39 ||
[Analyze grammar]

satāṃ sevayā martavyaṃ dehe cānvitacakriṇā |
narākṛterharerbhaktyā gantavyaṃ gahvarāntake || 40 ||
[Analyze grammar]

kusaṃgaḥ sarvathā tyājyaḥ satsaṃgaḥ kārya eva ha |
satāṃ kathā śravaṇīyā dhāryaḥ kṛṣṇaḥ sadā hṛdi || 41 ||
[Analyze grammar]

sadyo niḥśreyasāyaiva gantavyaṃ śaraṇe hareḥ |
na vai śārīrasaukhyārthaṃ dhanaputrāptaye'pi na || 42 ||
[Analyze grammar]

na vā rājyādilobhena gantavyaṃ śaraṇe hareḥ |
niṣkāmabhāvayuktena gantavyaṃ śaraṇe hareḥ || 43 ||
[Analyze grammar]

sakāmabhāvanā mokṣarodhinī jāyate yataḥ |
icchāghāte śaraṇaṃ ca tyaktavyaṃ syādato na tat || 44 ||
[Analyze grammar]

sakāmaśaraṇaṃ grāhyaṃ grāhyaṃ tvakāmapūrvakam |
jāyate tu dhruvā muktiryena grāhyaṃ hi tattathā || 45 ||
[Analyze grammar]

sakāmāḥ kāmasiddhau tu bhajante bhāvato harim |
kāmā'siddhau tyajantyeva bhāvanāmapi sarvathā || 46 ||
[Analyze grammar]

satāṃ bodhaṃ tyajantyeva bhagavattvasya kā kathā |
nāstikatvaṃ nindanaṃ ca kurvanti pratyutāpi te || 47 ||
[Analyze grammar]

patantyeva nirayeṣu svārthā'narthaprayojitāḥ |
tato niṣkāmabhāvena praseveta prabhuṃ harim || 48 ||
[Analyze grammar]

sakāmānāṃ hi saṃkalpān kṛpayā pūrayatyapi |
bhaktānāṃ śaraṇasthānāṃ bhaktiśaraṇajaṃ phalam || 49 ||
[Analyze grammar]

dadātyevā'nantaguṇaṃ kṛtasāpekṣakaḥ prabhuḥ |
mahad duḥkhaṃ tu bhaktasya svalpaṃ karoti tadvaśaḥ || 50 ||
[Analyze grammar]

karmaṇāṃ khalu maryādā baddhāstenaiva śārṅgiṇā |
antarastho hariḥ prārabdhānusāraṃ phalaṃ sadā || 51 ||
[Analyze grammar]

samavṛttirdadātyeva kṛpayā tu viśeṣataḥ |
svatantraḥ sarvakartā'sti niyāmakaḥ pareśvaraḥ || 52 ||
[Analyze grammar]

atiduṣkarmiṇaścainaṃ bhaveyuryadi satprabhum |
kṛpayā śrīharisteṣāṃ karmāṇi subahūnyapi || 53 ||
[Analyze grammar]

dīrghakālena bhogyāni duṣṭāni duḥkhadānyapi |
karoti svalpakālena svalpabhogyāni tāni vai || 54 ||
[Analyze grammar]

śūlavyathāṃ kaṇṭakena nivārayati sarvathā |
atidāridryaduḥkhaṃ nivārayatyannavastradaḥ || 55 ||
[Analyze grammar]

bhaktā hareḥ kṛpāṃ tvenāṃ prajānanti na cāpare |
abhaktāstu harau doṣān kalpayantyaguṇānapi || 56 ||
[Analyze grammar]

anīśvaratvaṃ cākṣipya jahatyapi tadāśrayam |
nindanti nijatulyeṣu vadantyavācyajalpakān || 57 ||
[Analyze grammar]

mayā matvā prabhuṃ dravyavyayo vai sarvathā kṛtaḥ |
asya santaḥ pūjitāśca sarvasvārpaṇakāriṇā || 58 ||
[Analyze grammar]

tathāpyanena duḥkhaṃ me na hṛtaṃ kiñcidityapi |
upakāro na me jñātaścāgre me kiṃ kariṣyati || 59 ||
[Analyze grammar]

tasmāt tyakto mayā cā'yaṃ nārāyaṇapadārthavān |
evaṃ tyaktvā prayātyeva māyāyāṃ niraye tataḥ || 60 ||
[Analyze grammar]

tasmāt kṛṣṇasya bhaktirvai kartavyā tu nirīhayā |
śreyase tvātmano lakṣmi na kāmalabdhaye kvacit || 61 ||
[Analyze grammar]

sevā sakāmabhaktasya nāṅgīkaroti mādhavaḥ |
sevake kāmanāvattvaṃ dūṣaṇaṃ lālasātmakam || 62 ||
[Analyze grammar]

tṛṣṇecchā lālasā tvekā hyaparādhasya mūrtayaḥ |
na kartavyā harau kvāpi lālasā bhaktiśālinā || 63 ||
[Analyze grammar]

lālasāyā apūrṇatve drohaḥ syātparamātmanaḥ |
drohaścāstyaparādho vai mahānnārāyaṇasya ha || 64 ||
[Analyze grammar]

drohaṃ duḥkhaṃ ca nindāṃ ca doṣānuvarṇanaṃ tathā |
guṇānāṃ khaṇḍanaṃ mithyāropaṇaṃ kṣamate na saḥ || 65 ||
[Analyze grammar]

harervā haribhaktasyā'parādhaṃ svalpamityapi |
kṣamate na haristasmānna kāryaḥ sarvathā hi saḥ || 66 ||
[Analyze grammar]

anādiśrīkṛṣṇanārāyaṇasyā''kārakhaṇḍanam |
saguṇasya nirasanaṃ satāṃ ca khaṇḍanaṃ tathā || 67 ||
[Analyze grammar]

aparādho mahāneva mahānarakasampradaḥ |
na kartavyaḥ kvacit jñātvā''pyajñātvā saṃgaraṃgataḥ || 68 ||
[Analyze grammar]

parame divyaloke'yaṃ nije'kṣare pade prabhuḥ |
divyākṛtiḥ kṛṣṇanārāyaṇo'sti puruṣottamaḥ || 69 ||
[Analyze grammar]

divyā'saṃkhyabrahmamuktaiḥ sevito māṇikīpatiḥ |
kṛpayā sa prabhuścātra vartate mānavātmakaḥ || 70 ||
[Analyze grammar]

divyo'pi dṛśyate cātra mānavo bhautiko yayā |
na tvayaṃ bhautikaścāste kintu divyo yathā'kṣare || 71 ||
[Analyze grammar]

asmaccakṣurbhautikaṃ yat tadgrāhyo vartate svavat |
kṛpayaiva hariścaiva darśayatyeva nastviha || 72 ||
[Analyze grammar]

yathā bhaktastathā tena grāhyaḥ kṛpāvaśo'sti saḥ |
sa eva bhaktavargaistu boddhavyo divyavigrahaḥ || 73 ||
[Analyze grammar]

tasmātparaṃ na caivā'sti prāptavyaṃ jñeyamityapi |
yadīcchati svabhakto vai draṣṭuṃ dhāmāni sampadaḥ || 74 ||
[Analyze grammar]

tadā kṛpālurbhagavān darśayatyeva sarvathā |
yad divyaṃ cākṣaraṃ dhāma tattu sahaiva vartate || 75 ||
[Analyze grammar]

vaibhavā hariṇā sākamaiśvaryāṇyapi santi ca |
akṣareṇa nijadhāmnā parivāreṇa saṃyutaḥ || 76 ||
[Analyze grammar]

vartate bhūtale kṛṣṇo dṛśyate naracakṣuṣā |
naravaccākṣaraṃ dhāma bhūvacceṣṭāsamā guṇāḥ || 77 ||
[Analyze grammar]

muktā mānavatulyāśca kriyāśca prākṛtā yathā |
dhāmasthānāṃ ca bhūsthānāṃ manāg bhedo na vidyate || 78 ||
[Analyze grammar]

divyasamādhinetrāstu vicakṣate sudivyakān |
yatra kṛṣṇastatra dhāma tatra muktāśca śaktayaḥ || 79 ||
[Analyze grammar]

te sarve mānavairbhaktairarpitānnajalāmbaram |
dhanasampadgṛhādyaṃ ca gṛhṇanti mānavā iva || 80 ||
[Analyze grammar]

tathāpi nispṛhāste tu bhaktakalyāṇahetave |
gṛhṇanti tāni divyāni jāyante tatprasaṃgataḥ || 81 ||
[Analyze grammar]

dātāro divyarūpaṃ tallabhante tvakṣare pade |
kṛṣṇasyaivaṃ tathā tasya bhaktānāṃ ca satāṃ sadā || 82 ||
[Analyze grammar]

vedanīyaṃ hi māhātmyaṃ cetthaṃ divyapramuktidam |
kṛṣṇamāhātmyayuktasya vipado na bhavanti vai || 83 ||
[Analyze grammar]

kṛṣṇabhaktaśca raṃko'pi nā'vamānyaḥ kadācana |
raṃkā'vamanturnāśaḥ syāt tatsthakṛṣṇasya pīḍanāt || 84 ||
[Analyze grammar]

kṛṣṇakriyāḥ samagrāśca yathā divyāstathaiva ca |
bhaktānāmapi divyāstā mantavyā bhaktivedinā || 85 ||
[Analyze grammar]

harirbhaktamanaḥprītyai ramate bhaktamānavaiḥ |
kāmena ramate cāpi hāsyena ramate tathā || 86 ||
[Analyze grammar]

ceṣṭayā cāpi sadṛśyā ramate strījanaiḥ saha |
tathāpi tūrdhvaretastvaṃ koṭistrīṇāṃ smayāvaham || 87 ||
[Analyze grammar]

dharate śrīhariḥ koṭirūpadhṛk kāmagarvahāḥ |
narākṛtiḥ svabhaktārthaṃ karoti naravat kriyāḥ || 88 ||
[Analyze grammar]

kāmaṃ krodhaṃ bhayaṃ lobhaṃ mohaṃ śokaṃ ca matsaram |
darśayati kvacittadvai sarvaṃ maṃgalakṛnnṛṇām || 89 ||
[Analyze grammar]

śrutaṃ ca kathitaṃ dṛṣṭaṃ dhyātaṃ cāpyanumoditam |
caritaṃ śrīhareḥ sarvaṃ mānavānāṃ hi mokṣadam || 90 ||
[Analyze grammar]

narākāraḥ śrīkṛṣṇo vai nṛṇāṃ manāṃsi pūrayet |
nṛṇāṃ sājātyabhāvena sevādharmo harau bhavet || 91 ||
[Analyze grammar]

tena niḥśreyasaṃ vindet sevitācca prasāditāt |
raṃko'pi dāsyabhāvo'pi dāsyapi naguṇā'pi ca || 92 ||
[Analyze grammar]

dṛḍhakṛṣṇāśrayasyaiva pramodanaṃ sadā bhavet |
jātaṃ me paramaṃ śreyo mokṣyante mama saṃginaḥ || 93 ||
[Analyze grammar]

kṛtārtho'haṃ kṛtārthāste ye me vacanavartinaḥ |
santaḥ santi mamā''tmānaścātmadarśī sadā'smyaham || 94 ||
[Analyze grammar]

hariṃ sato'nyannaivā'sti draṣṭavyaṃ mama māyikam |
evaṃ mama nivāso'tra bhūtale'pi pare'kṣare || 95 ||
[Analyze grammar]

vidyate nātra sandehaścaivaṃ jñātvā bhajantu tam |
rakṣākṛd bhagavānatra paratrāpi tvaviṣyati || 96 ||
[Analyze grammar]

ityupādiśya saṃśrutvā yayuḥ khanau tu karmaṇe |
haristeṣāṃ parīkṣārthaṃ khanibhittau jalāgamam || 97 ||
[Analyze grammar]

mahāsaritsvarūpeṇa gartaṃ kṛtvā samānayat |
khātena bhittibhaṃgādvai mahāsaritpravāhavat || 98 ||
[Analyze grammar]

pravāhaḥ sahasā tatra gahvare samajāyata |
sarve jñānena tṛptāste mṛtyubhayavivarjitāḥ || 99 ||
[Analyze grammar]

anādiśrīkṛṣṇanārāyaṇaṃ māṃ sasmarū rame |
jalaṃ tu gahvare tatra sarovarasamaṃ hyabhūt || 100 ||
[Analyze grammar]

bhagnā nimagnā bhaktāste bhajanto māṃ ramāpatim |
ātmaniṣṭhā jñāninaśca dṛḍhāśrayāstu te hṛdi || 101 ||
[Analyze grammar]

dadhyurmāṃ tvantarātmānaṃ samādhāviva modinaḥ |
mauktikeśī mama bhakto māṃ prasasmāra bhūkhanau || 102 ||
[Analyze grammar]

bhūgarbhe śrīpatiṃ kṛṣṇaṃ jalamagno'tibhaktimān |
athā'haṃ duḥkhahīnānāṃ bhajatāṃ karmacāriṇām || 103 ||
[Analyze grammar]

prāvirāsaṃ khanau tatra jalamadhye jalārdanaḥ |
sudarśanena cakreṇā'śoṣayaṃ vāri sarvagam || 104 ||
[Analyze grammar]

kṣaṇenaiva palenaiva pravāhaṃ cā'pyarodhayam |
svasthāste mama bhaktā vai dṛṣṭvā cakraṃ sudarśanam || 105 ||
[Analyze grammar]

dṛṣṭvā māṃ te nimagnā vai kṣaṇaṃ sukhe tu śāśvate |
atha māṃ pūjayāmāsuḥ prārthayāmāsurakṣaram || 106 ||
[Analyze grammar]

dhāma mokṣārthamevāpi tathāstvityavadaṃ tu tān |
bhaktidārḍhyaṃ samādiśya tūrṇaṃ tirobhavaṃ tataḥ || 107 ||
[Analyze grammar]

oṃ namaḥ śrīkṛṣṇanārāyaṇāya svāmine svāhā |
evaṃ mantraṃ dadau tebhyo mauktikeśī khanīśvaraḥ || 108 ||
[Analyze grammar]

sarve te jāpamātreṇa divyajñānā prajajñire |
atha kālāntare mauktikeśinaṃ cānyamānavān || 109 ||
[Analyze grammar]

vimānenā'nayaṃ dhāmā'kṣaraṃ me paramaṃ padam |
evaṃ māyā kulasānāṃ khanikhātāḥ parīkṣitāḥ || 110 ||
[Analyze grammar]

rakṣitā mokṣitāścāpi lakṣmi kṛpānukarṣiṇā |
paṭhanācchravaṇādasya bhuktirmuktirbhavedapi || 111 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne mauktikeśināmno bhaktasya śilāṃgārakhanīśvarasya bhaktyā parīkṣaṇaṃ mokṣaṇaṃ cetyādinirūpaṇanāmā |
aṣṭādaśādhikadviśatatamo'dhyāyaḥ || 218 ||
[Analyze grammar]