Chapter 212

śrīpuruṣottama uvāca |
śṛṇu nārāyaṇīśri tvaṃ lohakārasya vai kathām |
me pāvanasya bhaktasya nāmnā nālīkarasya vai || 1 ||
[Analyze grammar]

nālīkaro mama bhakto'vasad vakranadā''hvaye |
nagare lohakāro vai kuṭumbena samanvitaḥ || 2 ||
[Analyze grammar]

loṣṭhānāṃ śṛṃkhalā dīrghāḥ svalpāśca kīlakāṃstathā |
paṭṭāṃśca kuṇḍalāṃścāpi paṭṭikā loṣṭapatrikāḥ || 3 ||
[Analyze grammar]

loṣṭapātrāṇi bahūni lohopakaraṇānyapi |
anasā ca grahāṇāṃ ca sādhanāni karotyapi || 4 ||
[Analyze grammar]

bhastrāyāścālane śvāse praśvāse śrīnarāyaṇam |
lohaghnonnayane tasya pātane lohapīṭane || 5 ||
[Analyze grammar]

lohasandhānakāryādau smarate māṃ narāyaṇam |
bhastrāṃ matvā ramādevīṃ vahniṃ matvā narāyaṇam || 6 ||
[Analyze grammar]

mālāṃ matvā cāladaṇḍaṃ bhajate māṃ hariṃ sadā |
lohakūṭṭīṃ pāpapuñjakūṭṭīṃ māyāṃ vicintya ca || 7 ||
[Analyze grammar]

loṣṭāni māyikānyeva matvā hanti vimuktaye |
lohaghātotthaśabdāṃśca praṇavān manute sa ca || 8 ||
[Analyze grammar]

evaṃ nālīkaro bhakto brahmadṛṣṭyā''tmabodhavān |
vartate bhaktiyuktaśca mūrtiṃ me pūjayatyapi || 9 ||
[Analyze grammar]

prātaḥ snātvā gṛhe mūrtiṃ natvā dhūpaṃ karoti ca |
dīpaṃ kṛtvā puṣpamālāṃ candanaṃ me'rpayatyapi || 10 ||
[Analyze grammar]

sugandhasāraṃ datvā me naivedyaṃ dugdhaśarkarām |
polikāśca samarpyaiva jalaṃ tāmbūlakaṃ tathā || 11 ||
[Analyze grammar]

samarpya me kṣamāṃ yācitvā'tha bhuṃkte pibatyapi |
evameva tato lohaśālāyāmapi mādhavam || 12 ||
[Analyze grammar]

smṛtvā gatvā namaskṛtya dhūpaṃ kṛtvā ca dīpakam |
puṣpamālāṃ śarkarāṃ ca tathā'nyat phalamuttamam || 13 ||
[Analyze grammar]

yathākālaṃ samarpyaiva tataḥ kāryaṃ karoti ca |
lohakāryāṇi me bhaktyā karoti śuddhamānasaḥ || 14 ||
[Analyze grammar]

evaṃvidhasya bhaktasyaikadā'bhavat sucintanam |
rātrau nityaṃ prakartavyaṃ bhajanaṃ bahubhiḥ saha || 15 ||
[Analyze grammar]

saṅghena bhajanaṃ kāryaṃ bahūnāṃ mokṣasādhanam |
evaṃ śubhena manasā svagrāmajanabāndhavān || 16 ||
[Analyze grammar]

jagāda maṇḍalaṃ bhaktervidhātuṃ ca tadāpi te |
praharṣeṇā'sthāpayaṃśca bhaktamaṇḍalamuttamam || 17 ||
[Analyze grammar]

narā nāryo niśāraṃbhe militvā ghaṭikādvayam |
nityamārebhire kṛṣṇanāmasaṃkīrtanaṃ śubham || 18 ||
[Analyze grammar]

sarve janā nagarasthāḥ śrutvā vīkṣya śubhakriyām |
sahakāraṃ dadustatra yuyujurbhaktamaṇḍale || 19 ||
[Analyze grammar]

sahasraśo janā bhaktiṃ kurvantyutsāhasaṃbhṛtāḥ |
utsavān śrīhareḥ sarvān vādyanṛtyādibhistathā || 20 ||
[Analyze grammar]

śṛṃgārapūjanādyaiśca jāgarādyaiḥ samutsukāḥ |
kurvanti ca yathākālaṃ lakṣmi svaśreyase yatāḥ || 21 ||
[Analyze grammar]

teṣāṃ bhaktiṃ vilokyā'haṃ bhaktipravartakasya me |
bhaktasya lohakārasya prasanno'haṃ tadā'bhavam || 22 ||
[Analyze grammar]

ekadā bhaktivṛddhyarthaṃ tejo mayā'tibhāsvaram |
niryanmatpratimābhālād darśitaṃ tebhya ujjvalam || 23 ||
[Analyze grammar]

śāmitaṃ ca mayā tūrṇaṃ tena te bhaktigauravāḥ |
viśeṣato mama bhaktimakurvan bhāvagarbhitām || 24 ||
[Analyze grammar]

jñātāraścā'bhavan mūrtau tiṣṭhato mama śārṅgiṇaḥ |
mandiraṃ kṛtavantaste lakṣmīnārāyaṇasya ha || 25 ||
[Analyze grammar]

tatra pūjāpravāhādi cakrire ca yathādhanam |
ahaṃ mūrtau nivasāmi tvayā sākaṃ samudraje || 26 ||
[Analyze grammar]

apaharāmi sarveṣāṃ duḥkhāni vipado'nvaham |
mānatāste prakurvanti rogaduḥkhavināśinīḥ || 27 ||
[Analyze grammar]

ādhyātmikā''dhidaivādhibhautikādhivināśinīḥ |
sarvāḥ pīḍā nāśayāmi svasthāste ca bhavanti vai || 28 ||
[Analyze grammar]

bhajante māṃ cātibhāvaiścamatkārādikīrtanaiḥ |
athaikadā satītvaṃ ca jātā tāpasīveṣiṇī || 29 ||
[Analyze grammar]

ahaṃ ca tāpaso yogī bhūtvā'gamaṃ niśāmukhe |
bhaktamaṇḍalamālakṣya mandirasyā'ntike sthale || 30 ||
[Analyze grammar]

yathā dīnajano raṅkaḥ kaścid bhikṣuka udgataḥ |
tvaṃ tathā dīnacittā ca bhikṣukī vratavarjitā || 31 ||
[Analyze grammar]

dharmasnānārhaṇaśūnyā malinā prākṛtī yathā |
ahaṃ tathaiva malino darśakānāṃ tu cittahāḥ || 32 ||
[Analyze grammar]

ekaṃ tu bālakaṃ svalpaṃ malamūtrādisaṃbhṛtam |
garuḍaṃ bālarūpaṃ taṃ kṛtvā kukṣau puro'bhavam || 33 ||
[Analyze grammar]

evaṃ trikaṃ ca te vīkṣya yācamānaṃ ca dīnavat |
mandirāgre samāyātaṃ dayāparāstato'bhavan || 34 ||
[Analyze grammar]

āhūya vedikāyāṃ te nyaṣādayan sukhena ca |
ayacchan bhojanaṃ lakṣmīnārāyaṇaprasādajam || 35 ||
[Analyze grammar]

apatyāya payaścāpi daduste bhāvanānvitāḥ |
kṛtvā ca bhojanaṃ pānaṃ vayaṃ lakṣmi sukhasthitāḥ || 36 ||
[Analyze grammar]

vitardikāyāmabhavan te cakrurnāmakīrtanam |
catvare rāsamārebhustālavādyasunartanaiḥ || 37 ||
[Analyze grammar]

narā nāryo'saṃkhyajanā bhaktiṃ cakrurhi bhāvukāḥ |
kṛtvā te kīrtanaṃ yāvat kṣaṇaṃ viśrāntimādadhuḥ || 38 ||
[Analyze grammar]

tadotthāya tvayā sākamahaṃ tatra hi catvare |
karatālairmañjiraiśca sanṛtyaṃ kīrtanaṃ vyadhām || 39 ||
[Analyze grammar]

āścaryaṃ paramaṃ prāptā dṛṣṭvā māṃ tvāṃ ca te tadā |
prasannāste ca papracchuḥ śāntaṃ māṃ śreyase muhuḥ || 40 ||
[Analyze grammar]

sādho kalyāṇadaṃ kiñcid vadā'tra naḥ kṛpāṃ kuru |
śrutvā'haṃ ca tadā lakṣmi jñānaṃ tebhyo dadau mama || 41 ||
[Analyze grammar]

premṇo hetuṃ bhagavati māhātmyaṃ nijagāda vai |
māhātmyajñānavatpremṇi viśvāso'pi ca kāraṇam || 42 ||
[Analyze grammar]

māyāpuruṣakālānāṃ svabhāvaguṇakarmaṇām |
jaḍacetanatattvānāṃ niyantāraṃ hariṃ śrayet || 43 ||
[Analyze grammar]

sarvasvatantrakartāraṃ sarvāvatārakāraṇam |
sarvaśaktipradātāraṃ nārāyaṇaṃ hariṃ śrayet || 44 ||
[Analyze grammar]

premṇāśrayet parātmānaṃ māhātmyajñānavān janaḥ |
prītyā saṃsevya taṃ nāthaṃ paradhāma samarjayet || 45 ||
[Analyze grammar]

kuryād vai vāsanānāśaṃ sarvathā tu vivekavān |
laukikeṣu viṣayeṣu ruciricchā'sti me tu yā || 46 ||
[Analyze grammar]

kiyatīti vivicyaiva hyapaneyā tu sā tataḥ |
kiyatī vā harau cāste ruciricchā tu pāvanī || 47 ||
[Analyze grammar]

māyāyāṃ ca harau tulyā nyūnā vā cādhikā'pi vā |
vivicyeti harau vardhanīyā prayatnataḥ sadā || 48 ||
[Analyze grammar]

hasanīyā ca māyāyāṃ nirmūlā yāvatī bhavet |
kṣayiṣṇutvaṃ duḥkhadatvaṃ bandhakṛttvaṃ tu māyike || 49 ||
[Analyze grammar]

padārthajāte bhavatītyevaṃ jñātvā vivarjayet |
ruciṃ tyajenmāyikeṣu muktānāmapi bandhanīm || 50 ||
[Analyze grammar]

arucervāsanānāśo jāyate drutameva ha |
satsaṃgāt kṛṣṇasambandhāt kṛṣṇakīrtanagāyanāt || 51 ||
[Analyze grammar]

kṛṣṇe rucirbhavatyeva sākṣād yogād viśeṣataḥ |
evamabhyāsayogena kṛṣṇe prītirvivardhate || 52 ||
[Analyze grammar]

māyike malatulye ca bhogye ramye tathetare |
rucernāśo bhavettūrṇaṃ bhagavadrasavedinaḥ || 53 ||
[Analyze grammar]

brahmamayaṃ bhāsate'sya divyaṃ nārāyaṇātmakam |
bhagavanniṣṭhabhaktasya brahmabhāvaḥ paro vṛṣaḥ || 54 ||
[Analyze grammar]

sthitiḥ sā paramā mahābhāgavatī pramodinī |
māyābhimānarahitā bhagavadbhāvaśobhitā || 55 ||
[Analyze grammar]

vāsanāyāḥ praṇāśārthaṃ prītyarthaṃ ca harestathā |
sādhayedātmaniṣṭhāṃ ca vairāgyaṃ śreṣṭhamityapi || 56 ||
[Analyze grammar]

kṛṣṇamāhātmyātiśayavijñānaṃ svasamarpaṇam |
sādhayed bhagavanniṣṭhāṃ satāṃ samāgamaṃ caret || 57 ||
[Analyze grammar]

nirvāsanātmaniṣṭhānāṃ satāṃ sevāṃ prasādhayet |
prasannatāṃ satāṃ labdhvā jayenmāyāṃ paraṃ vrajet || 58 ||
[Analyze grammar]

atidhairyaṃ labhejjñānādāśrayātparamātmanaḥ |
satāṃ satsaṃgasāhāyyāddhairyaṃ dṛḍhaṃ harau bhavet || 59 ||
[Analyze grammar]

ātmaniṣṭhāyujā bhaktyā dhairyasthairthaṃ tathā bhavet |
dhīrasya muktabhāvasya vighnā naiva bhavanti ca || 60 ||
[Analyze grammar]

bhaktyantarāyarūpāśca siddhayo nopayāntyapi |
pakvabhaktaparīkṣārthaṃ samāyānti hi siddhayaḥ || 61 ||
[Analyze grammar]

śrīharerājñayā tāstu lobhayanti muhuḥ śritam |
tathāpi tā na paśyecca jitvā yāti paraṃ padam || 62 ||
[Analyze grammar]

evaṃvidhasya bhaktasya kṛṣṇo vaśe svayaṃ bhavet |
māyāyā vāsanāśūnyo yaśca kṛṣṇārpitā'khilaḥ || 63 ||
[Analyze grammar]

kṛṣṇārthakṛtasarvasvastasya prīto hariḥ sadā |
kṛṣṇe'tipremavadbhaktahṛdayācchrīhariḥ kvacit || 64 ||
[Analyze grammar]

premarajjvā naddhavarmā gantuṃ śakto na jāyate |
tasyaiva bhagavān pātā svāmī kāntaśca mokṣakṛt || 65 ||
[Analyze grammar]

māyāduḥkhaharaścāste hṛdaye sarvathā saha |
etādṛśasya bhaktasya guṇā divyā bhavanti hi || 66 ||
[Analyze grammar]

satyaśaucādayo ye ca sarve kṛṣṇasamāśrayāt |
kṛṣṇasya divyavijñānājjāyante bhaktimatyapi || 67 ||
[Analyze grammar]

kālakarmasvabhāvānāṃ māyāyāḥ puruṣasya ca |
īśvarāṇāṃ niyantā śrībālakṛṣṇo'sti mādhavaḥ || 68 ||
[Analyze grammar]

kartā poṣṭā ca saṃhartā sṛṣṭīnāṃ śrīpatiḥ prabhuḥ |
asti gopālabālaḥ sa sarveṣāṃ hṛdayeṣu saḥ || 69 ||
[Analyze grammar]

nirlepo vartate svāmī rādhāramāpradhīpatiḥ |
evaṃ jñātvā harau kṛṣṇe sambandhaṃ prāptavān dṛḍham || 70 ||
[Analyze grammar]

yastasya śrīhareḥ sambandhino divyaguṇā api |
āvirbhavanti bhakte vai sarvaiśvaryāṇi sarvathā || 71 ||
[Analyze grammar]

cakṣurdīpaprasaṃgena prabhāguṇaṃ pravindati |
yathā tathā hareryogād bhakte guṇā viśanti ca || 72 ||
[Analyze grammar]

svatantro jāyate kṛṣṇatulyaḥ kṛṣṇaprasādataḥ |
sarvaṃ kartuṃ siddhimāṃśca nityasiddho'pi jāyate || 73 ||
[Analyze grammar]

yathendra āyayau nārāyaṇaṃ naraṃ tapaḥkṣatim |
kartumapsarasāṃ vrātairnirastaścorvaśījaneḥ || 74 ||
[Analyze grammar]

evaṃ siddhyā siddhimanto nirasyante susiddhinā |
bhaktena mūlamāyā'pi nirasyate harerbalāt || 75 ||
[Analyze grammar]

devā bhaktā bhavantyeva bhagavadguṇayoginaḥ |
āsurā na prajāyante bhagavadguṇinaḥ kvacit || 76 ||
[Analyze grammar]

mahatāṃ tu satāṃ kṛpāpārāvāre praviśya ca |
pāpino bhagavadbhaktyā kvacid guṇā viśanti hi || 77 ||
[Analyze grammar]

prasannāḥ sevayā santo nāśayanti hi durguṇān |
āsuratvaṃ nāśayanti kurvanti daivabhāvukam || 78 ||
[Analyze grammar]

yastu raṅkajanān garvādavajānāti bhaktakān |
so'pi tatpāpapuñjena daivo'pyāsuratāṃ vrajet || 79 ||
[Analyze grammar]

śapto bhaved brahmadagdho guṇāstatra viśanti na |
dīnā'vamānaṃ tasmānna kartavyaṃ kvacideva ha || 80 ||
[Analyze grammar]

dīnāgre dīnavat stheyaṃ tena kṛṣṇaḥ pratuṣyati |
garvavatsu kṛpāṃ naiva karoti bhagavān kvacit || 81 ||
[Analyze grammar]

guṇāsteṣu śubhā naiva jāyante drohiṣu kvacit |
mṛdorbhaktasya dīnasya droheṇa puṇyasaṃkṣayaḥ || 82 ||
[Analyze grammar]

jāyate nā'tra sandeho nāvamānyā hi durbalāḥ |
bāhyato malināścāpi hṛdaye śuddhabhāvanāḥ || 83 ||
[Analyze grammar]

bhaktā bhagavato mānyā mokṣadāḥ sādhavo hi te |
teṣāṃ hṛdaye bhagavānantaryāmī virājate || 84 ||
[Analyze grammar]

sahaiva vartate dīnanātho hyanātharakṣakaḥ |
bhaktānāmavamānena ruṣṭo bhavati mādhavaḥ || 85 ||
[Analyze grammar]

avamānayitustūrṇaṃ vināśaṃ kurute svayam |
kārayatyāśu cānyena raṅkabhaktavaśaṃvadaḥ || 86 ||
[Analyze grammar]

nālīkara vayaṃ dīnā malinā makṣikāvṛtāḥ |
sabhayāścātra bhojyārthaṃ hyāyātā dīnamānasāḥ || 87 ||
[Analyze grammar]

tiraskāro bhavadbhirna kṛtaḥ satkāra ādṛtaḥ |
ataḥ prasannahṛdayā bhavāmo'tra sukhānvitāḥ || 88 ||
[Analyze grammar]

yūyaṃ bhaktā bhagavataḥ satyā nirmānisevakāḥ |
varadānaṃ cārthayantu rocate yadi mānase || 89 ||
[Analyze grammar]

ityuktvā'haṃ yadā lakṣmi mūrtiṃ natvā ca māmakīm |
gantumiyeṣa dūraṃ ca tāvad bālo malaṃ vyadhāt || 90 ||
[Analyze grammar]

nālīkaro jalaṃ ninye dadau vai tasya yoṣite |
tatstrī nāmnā kundanikā baliṃ labdhvā karāttava || 91 ||
[Analyze grammar]

malaprakṣālanaṃ cakre bhāvena bālakasya te |
tāvanme'pi viśeṣeṇā'bhavat prasannatā hyati || 92 ||
[Analyze grammar]

bhaktebhyaḥ pradadau naijaṃ darśanaṃ divyamadbhutam |
śaṃkhacakragadāpadmadharaṃ śrīśyāmasundaram || 93 ||
[Analyze grammar]

tava rūpaṃ sundaraṃ ca lakṣmi vyadarśayaṃstathā |
bālakasya svarūpaṃ ca gāruḍaṃ samadarśayam || 94 ||
[Analyze grammar]

atha bhaktāḥ kṛtakṛtyā vyajāyanta hṛdantare |
nanṛturdarśanaṃ kṛtvā pūjayāmāsurutsukāḥ || 95 ||
[Analyze grammar]

vavruste varadānaṃ ca mokṣārthaṃ netarattadā |
tathā'stviti varaṃ datvā tirobhāvaṃ kṣaṇāntare || 96 ||
[Analyze grammar]

lakṣmīnārāyaṇamūrtau viveśā'haṃ tvayā saha |
garuḍaḥ pakṣimūrtau ca viveśa sahasā tadā || 97 ||
[Analyze grammar]

evaṃ svaṃ darśanaṃ datvā sukhaṃ tebhyo'dadāṃ param |
atha kāle gate nālīkarasya lohakarmabhiḥ || 98 ||
[Analyze grammar]

vakṣasi śvāsarogo'bhūt sarvathā śvāsasañcaraḥ |
damākhyena hi rogeṇa pīḍito bhaktarāṇnijam || 99 ||
[Analyze grammar]

kāryaṃ kartumaśakto māṃ prārthayāmāsa mūrtigam |
drāgāvirbhūya hastena mayā dugdhaṃ prapāyitam || 100 ||
[Analyze grammar]

hastena tasya hṛdayaṃ spṛṣṭvā rogo vināśitaḥ |
atha tūrṇaṃ tirobhūtvā mūrtau sadā'vasaṃ rame || 101 ||
[Analyze grammar]

āyuṣyasya kṣaye nālīkaraṃ tathā striyam |
kundanikāṃ vimānenā'nayaṃ dhāmā'kṣaraṃ param || 102 ||
[Analyze grammar]

evamanyānapi bhaktānanayaṃ dhāma cākṣaram |
ye bhajanti ca māṃ bhaktyā guṇān gṛhṇanti me tathā || 103 ||
[Analyze grammar]

satāṃ sevāṃ prakurvanti premabhāvena sarvathā |
satāṃ prasannatā prāpya te prayāsyanti matpadam || 104 ||
[Analyze grammar]

paṭhanācchravaṇāccāpi smaraṇāt sevanādapi |
bhuktirmuktirbhavatyeva yatheṣṭā paramā gatiḥ || 105 ||
[Analyze grammar]

itiśrīlakṣmīnārāyaṇīyasaṃhitāyāṃ tṛtīye dvāparasantāne nālīkarasya lohakārasya bhaktyā śrīlakṣmīnārāyaṇagaruḍadattadarśanaṃ tanmokṣaṇaṃ cetyādinirūpaṇanāmā |
dvādaśādhikadviśatatamo'dhyāyaḥ || 212 ||
[Analyze grammar]