Chapter 210

śrīpuruṣottama uvāca |
śṛṇu nārāyaṇīśri tvaṃ kathāṃ bhaktasya cā'parām |
puṣkaso nāmato yajñarādho virādhakheṭagaḥ || 1 ||
[Analyze grammar]

ānarteṣvabhavadbhaktaḥ samudrakhāḍikātaṭe |
naukānāṃ vastupūrṇānāmāgamo vigamastathā || 2 ||
[Analyze grammar]

yatra prajāyate nityaṃ tatra mārjanakarmaṇi |
niyuktaḥ sa mahānaukādhyakṣeṇa jīvikā'vitaḥ || 2 ||
[Analyze grammar]

naukānāṃ taṭabhūmīnāṃ kaccarāṇāṃ pramārjanam |
karoti nityamevā'yaṃ patnyā sākaṃ sthale sthale || 4 ||
[Analyze grammar]

naukādhīśāstathā cānye śreṣṭhinaḥ karmacāriṇaḥ |
śeṣānnabhojanaṃ cāsmai dadatyapi kṛpālavaḥ || 5 ||
[Analyze grammar]

śākaṃ patrādikaṃ cāpi roṭakaṃ ca payo'pi ca |
bharjitānnaṃ ca pakvānnaṃ vastrādikaṃ dadatyapi || 6 ||
[Analyze grammar]

evaṃ prāptena bhakto'yaṃ tathā sadvetanena ca |
nirvahatyeva nityaṃ vai svakāryakuśalaḥ sadā || 7 ||
[Analyze grammar]

yadyat saṃprāpyate tatra jalaprokṣaṇamuttamam |
kṛtvā dhṛtvā ca tulasīdalaṃ smṛtvā ca māṃ tadā || 8 ||
[Analyze grammar]

samarpya mahyaṃ manasā bhuṃkte pāti na cānyathā |
prātarnityaṃ pippalasya vṛkṣamūle hariṃ ca mām || 9 ||
[Analyze grammar]

pūjayatyeva saṃsmṛtvā jalānnaphalapatrakaiḥ |
madhyāhne'pi tathā sāyaṃ māṃ smṛtvā sa bhunakti ha || 10 ||
[Analyze grammar]

rātrau kṛtvā militvaiva kīrtanaṃ māṃ smaraṃstathā |
mālāmāvartayan bhakto nidrāti strī sutaḥ sutā || 11 ||
[Analyze grammar]

evaṃvidhasya bhaktasya nityaṃ vai vighasāśinaḥ |
datvā śune gave kākebhyaśca puṣkasajātaye || 12 ||
[Analyze grammar]

pipīlikābhyo datvā ca datvā'mbare surāya ca |
bhuṃkte'yaṃ vighasāśī vai datvā matsyebhya ityapi || 13 ||
[Analyze grammar]

paśyatyeva hariṃ sarvaprāṇiṣu puṣkaso'pi saḥ |
sarvavrahmātmavijñāno bhaktarājjñānavāṃstathā || 14 ||
[Analyze grammar]

puṣkasaṃ tu śarīraṃ vai sadā malasya bhājanam |
sarvadehāstathā santi malapātrāṇi sarvathā || 15 ||
[Analyze grammar]

yadi śuddhā na manasi samānāḥ puṣkasā yataḥ |
manaḥ śuddhaṃ yasya tasya puṣkasatvaṃ vilīyate || 16 ||
[Analyze grammar]

garbhe bālo na śuddho'sti cā'śuddhadvārasevanaḥ |
aśuddhāśca tathā janma janmottaramaśuddhimān || 17 ||
[Analyze grammar]

śaucahīnastathā nityamaśuddhaḥ kalmaṣānvitaḥ |
manomālinyayuktaśca kāmakrodhādikalmaṣaḥ || 18 ||
[Analyze grammar]

svārthakāpaṭyabhāvaśca vāsanāvāsito malī |
aśuddha eva dehāḍhyo mānerṣyāmatsarānvitaḥ || 19 ||
[Analyze grammar]

ahantāmamatāyuktaḥ pramādamohakarṣitaḥ |
aśuddha eva strīputraparivāranibandhanaḥ || 20 ||
[Analyze grammar]

avidyārāgasaṃsaktyabhiniveśādikalmaṣaḥ |
asmitādibhṛtaścāpi bhogavilāsapāpavān || 21 ||
[Analyze grammar]

rogavyādhijarāmṛtyumahākaṣṭānuyogavān |
deho'yaṃ puṣkasaḥ proktaścidātmā'haṃ na puṣkasaḥ || 22 ||
[Analyze grammar]

sarve dehāḥ puṣkasā vai nā''tmā puṣkasaḥ karhicit |
brahmātmā nirmalaḥ śāntaḥ śuddho bhaktaḥ samujjvalaḥ || 23 ||
[Analyze grammar]

parameśapratāpena saccidānandabodhavān |
mukto bandhanahīnaśca sadā'haṃ mokṣabhāgiha || 24 ||
[Analyze grammar]

evaṃ lakṣmi prajānāti puṣkaso'pi nijaṃ sadā |
muktavat vartate nityaṃ mama dhyānaparāyaṇaḥ || 25 ||
[Analyze grammar]

bhagavanniṣṭha evā'yaṃ tathā''tmaniṣṭha uttamaḥ |
na svārtho'sya na vai vyādhirmānaso'pi manāgapi || 26 ||
[Analyze grammar]

etādṛśasya bhaktasya vada lakṣmi kathaṃ na vai |
karomi rakṣaṇaṃ cittāhlādanaṃ ceṣṭapūraṇam || 27 ||
[Analyze grammar]

mama lakṣmi sadā tulyā jīvā devāstatheśvarāḥ |
sarve putrā mamaivā'tra māyāyāṃ santi dehinaḥ || 28 ||
[Analyze grammar]

vipro nṛpo dīnajanaḥ puṣkasaḥ strī napuṃsakaḥ |
paśuḥ pakṣī kīṭa ārto vṛkṣo vallī ca vai tṛṇam || 29 ||
[Analyze grammar]

sarvaṃ putrātmakaṃ me'sti yādaḥ pataṃga ityapi |
bhajante māṃ tu ye sevāmagnāsteṣāṃ viśeṣataḥ || 30 ||
[Analyze grammar]

pitā'smi rakṣako dhātā pātā netā paraṃ padam |
anyeṣāṃ tu kṛtasyaiva phaladaḥ sākṣirūpavān || 31 ||
[Analyze grammar]

athaikadā tu bhaktasya saṃkalpo'pi vyajāyata |
nārāyaṇaḥ kathaṃ sākṣād bhavennetrasya gocaraḥ || 32 ||
[Analyze grammar]

śrutaṃ tena tataḥ sādhormukhāt sādhau hariḥ svayam |
vartate satpuruṣasya sevayā gocaro bhavet || 33 ||
[Analyze grammar]

athā'yaṃ yajñarādho vai mārgayatyeva sevanam |
yatra sādhuḥ śrūyate ca tatsthale sa prayāti vai || 34 ||
[Analyze grammar]

camatkārapure śrutvā sādhuṃ nāgamatītaṭe |
yayau tīrthasya miṣavān sasnau nadyāṃ tu bhāvataḥ || 35 ||
[Analyze grammar]

nāganāthasya tīrthe vai sādhuṃ dadarśa tāpasam |
tryavasthāpāragaṃ divyaṃ brahmaniṣṭhaṃ haripriyam || 36 ||
[Analyze grammar]

nāmnā brahmāyanaṃ śāntaṃ maharṣiṃ tyāginaṃ munim |
āsane dhyānamagnaṃ ca brahmaṇi dhyāninaṃ tadā || 37 ||
[Analyze grammar]

gatvā puro nanāmā'sau daṇḍavat pracakāra ha |
ghaṭīmātraṃ purastasthau kṛtāñjaliśca niścalaḥ || 30 ||
[Analyze grammar]

ghaṭikāḥ'nte sādhuvaryo dhyānād bahirupāyayau |
dadarśa purato bhaktaṃ puṣkasaṃ yajñarādhakam || 39 ||
[Analyze grammar]

yajñarādhaḥ praṇamyaiva tasthau kṛtāñjalistathā |
sādhunā kuśalaṃ te'stu procya niṣadya bodhitaḥ || 40 ||
[Analyze grammar]

so'pi bhāvena bahunā niṣasāda puraḥ sataḥ |
papraccha guṇavṛddhyarthaṃ satsaṃgatyarthamityapi || 41 ||
[Analyze grammar]

parameśasya lābhārthaṃ sākṣādvai sādhanāni hi |
brahmāyano muniḥ śrutvā mumodātmaparātmavān || 42 ||
[Analyze grammar]

smṛtvā nārāyaṇaṃ māṃ ca jagādopādideśa tam |
śṛṇu bhakta satāṃ guṇān gṛhṇanti ye janāstviha || 43 ||
[Analyze grammar]

guṇavanto bhavantyete santo hi guṇasāgarāḥ |
satāṃ doṣān pragṛhṇanti duṣṭāste tu bhavanti vai || 44 ||
[Analyze grammar]

satāṃ samāgame nityaṃ guṇā āyānti bhāvinaḥ |
satāṃ guṇānāṃ grahaṇe māhātmyavedane'niśam || 45 ||
[Analyze grammar]

vardhante svaguṇā ramyāḥ siddhadaśāpradāḥ śubhāḥ |
naiva grāhyāḥ satāṃ dehadoṣāḥ kvācitkasaṃbhavāḥ || 46 ||
[Analyze grammar]

doṣāgrāhā bhavantyeva guṇino'pi tu doṣiṇaḥ |
acireṇa mahāpāpād guṇā naśyanti mūlataḥ || 47 ||
[Analyze grammar]

ataḥ satāṃ sadguṇā vai grāhyā na tvaguṇāḥ kvacit |
svalpadurguṇagrahaṇe vinaṣṭirmahatī bhavet || 48 ||
[Analyze grammar]

satāṃ samāgamenaiva vardhante guṇakoṭayaḥ |
bhāgavatāstathā dharmā vardhante satsamāgamāt || 49 ||
[Analyze grammar]

satāmekāntikānāṃ vai sevanād divyatā bhavet |
satāṃ saṃgatiḥ snehena jāyate dehināmiha || 50 ||
[Analyze grammar]

sādhavo mokṣadāḥ santi sarvapāpavināśakāḥ |
iṣṭadāḥ santi santaścetyavagatya satāṃ puraḥ || 51 ||
[Analyze grammar]

dāsavad vartate nityaṃ tasya satsaṃgatirbhavet |
aikāntikāḥ sarvadharmāḥ puṣyanti satsamāgamāt || 52 ||
[Analyze grammar]

vairāgyaṃ jāyate cātmaparātmanośca vedanam |
māhātmyajñānasahitā bhaktirharau bhavettataḥ || 53 ||
[Analyze grammar]

āśrayo'pi dṛḍhaḥ syācca kṛṣṇārthāḥ sakalakriyāḥ |
bāhyāntaḥkaraṇānāṃ ca vyāpārā bhagavanmayāḥ || 54 ||
[Analyze grammar]

bhavantyeva hi bhaktasya mokṣadvāramapāvṛtam |
jāyate dhāmadaṃ śreṣṭhaṃ mahāmārgagatipradam || 55 ||
[Analyze grammar]

strīdhanādau mahāsaṃgo dehino durjaro'sti yaḥ |
satsu tathaiva ca kṛto mokṣaṃ dadāti dehine || 56 ||
[Analyze grammar]

snehaḥ satsu sadā kāryaḥ strīputrādyadhikaḥ khalu |
snehena satsu lagnānāṃ muktirbhavati śāśvatī || 57 ||
[Analyze grammar]

satsevāyāṃ mahāśraddhā kāryā nāryā nareṇa ca |
sarvātmanā kṛtā sevā tārayatyeva māyinam || 58 ||
[Analyze grammar]

sarvārpaṇakṛtā sevā kṛtārthaṃ kurute janam |
santaḥ prasannā dadyurvai dhāmā'kṣaraṃ ca divyatām || 59 ||
[Analyze grammar]

deśaḥ kālaḥ śubhau sevyau saṃgaḥ sevyaḥ śubhastathā |
kriyā kāryā śubhā nityaṃ mantro dhāryaḥ śubhottamaḥ || 60 ||
[Analyze grammar]

dhyānaṃ kāryaṃ harernityaṃ santo dhāryā sadā hṛdi |
dīkṣā grāhyā bhāgavatī śaraṇaṃ ca hareḥ sadā || 61 ||
[Analyze grammar]

evaṃ vai vartamānasya sākṣānnārāyaṇo bhavet |
asaddeśādisaṃyoge naṣṭā bhraṣṭā matirbhavet || 62 ||
[Analyze grammar]

saddeśādisamāyoge śreṣṭhā śuddhā matirbhavet |
baliṣṭhapuṇyayogena saddeśādi labhejjanaḥ || 63 ||
[Analyze grammar]

satsaṃgo jāyate tasya divyatā jāyate tataḥ |
nirmalā yasya buddhirna deśādyā doṣiṇastathā || 64 ||
[Analyze grammar]

yasya bhavanti tasyā'tra pāpaṃ pūrvakṛtaṃ mahat |
upasthitaṃ hi mantavyaṃ yena pāpe pravartate || 65 ||
[Analyze grammar]

yadvā'tra mahatāṃ tena satāṃ drohaḥ kṛto'sti yat |
tatphalaṃ pāpabuddhirvai jātā pātakadāyinī || 66 ||
[Analyze grammar]

tāṃ vināśayituṃ sevāṃ kuryānniśchadmabhāvataḥ |
satāṃ prasannatāṃ cāpi prāpnuyāt sevanaṃ hareḥ || 67 ||
[Analyze grammar]

atha yaḥ pāpavānasti sa tu drohaṃ karoti hi |
vadatyeva ca nāstikyabhāvena nimnagaṃ vacaḥ || 68 ||
[Analyze grammar]

sādhūnāṃ kiṃ bhavedatra samāgamena vai bhuvi |
dhūrtā hi sādhavaḥ santi mā kurvantu samāgamam || 69 ||
[Analyze grammar]

evaṃ vadanti duṣṭā vai tyājyāste dūrataḥ sadā |
tasmāt saṃgaḥ satāṃ kāryaḥ satāṃ saṃgo hi bheṣajam || 70 ||
[Analyze grammar]

pāpisaṃgo na vai kāryaḥ pāpisaṃgo viṣaṃ param |
duḥkhī bhajate śrīnāthaṃ duḥkhahānyarthameva tu || 71 ||
[Analyze grammar]

arthārthī tvarthasiddhyarthaṃ hyaiśvaryārthī sa vai bhavet |
āpmaniṣṭho'pi bhajate kaivalyārthaṃ hariṃ sadā || 72 ||
[Analyze grammar]

jñānī tu bhagavanniṣṭhaḥ sevate parameśvaram |
ātmanivedī bhagavanniṣṭho hareḥ priyo bhavet || 73 ||
[Analyze grammar]

sākṣātkāro bhavettasya hariniṣṭhasya bhūtale |
asya māhātmyavijñānaṃ harerbhavati sarvathā || 74 ||
[Analyze grammar]

hareḥ sneho'sya bahudhā sarvathā vartate'niśam |
kṛṣṇetarāḥ samastā vāsanā naṣṭā hi tasya vai || 75 ||
[Analyze grammar]

ekāntikānāṃ sevābhirnaṣṭāḥ samastavāsanāḥ |
bhavantyeva tato jñānī bhūtvā satsaṃgamācaret || 76 ||
[Analyze grammar]

akṣarādhipateḥ kṛṣṇanārāyaṇasya vedanam |
māhātmyasahitaṃ kuryāt satāṃ prasaṃgataḥ sadā || 77 ||
[Analyze grammar]

mānaṃ nirmūlanīyaṃ ca satāṃ samāgamāt sadā |
mānino na pravardhante divyā guṇāḥ kadācana || 78 ||
[Analyze grammar]

mānī sevāṃ na kurute satāṃ vai nimnakoṭigām |
sadagre prāñjalirna syānna praśaṃsedgirā sataḥ || 79 ||
[Analyze grammar]

raṃkavadvartamānaṃ ca santaṃ na mānavānnamet |
māno doṣo mahānasti mānastambho hi nāśakṛt || 80 ||
[Analyze grammar]

bhaktijñānavirāgādyā vardhante naiva māninaḥ |
bhakto galitamānastu vardhamānamahāguṇaḥ || 81 ||
[Analyze grammar]

jāyate tasya hṛdaye sākṣānnārāyaṇo vaset |
satāṃ hareśca nityaṃ vai sevayā paricaryayā || 82 ||
[Analyze grammar]

māno vilīyate tīvravairāgyāḍhyasya vai drutam |
brahmātmabhāvanābhaktyā haristasmai prasīdati || 83 ||
[Analyze grammar]

prasannasya harermūrtiḥ prasannā'sya hi dṛśyate |
madhurā hṛdaye mūrtirbahiścāpi hi dṛśyate || 84 ||
[Analyze grammar]

nirmāno bhaktarāṭ śreṣṭho bhagavadbalavān mataḥ |
bhajate śrīhariṃ mānaṃ hitvā''tmabrahmaniṣṭhitaḥ || 85 ||
[Analyze grammar]

ātmaniṣṭhā ca bhagavanniṣṭhā pakvā'sti yasya vai |
māyikaḥ sakalo vyādhistasyā'traiva vilīyate || 86 ||
[Analyze grammar]

kathāyāḥ śravaṇenāpi satāṃ prasevayā tathā |
bhaktyā nārāyaṇasyāpi tathopāsanayā hareḥ || 87 ||
[Analyze grammar]

siddhadaśāmāpnuvanti sārvajñyaṃ ceśatāṃ tathā |
upāsanābalaṃ sveṣṭadevasya yasya yādṛśam || 88 ||
[Analyze grammar]

tādṛśaṃ jāyate tasya mahaddivyaṃ sukhaṃ param |
māyikaṃ duḥkhamatyantaṃ nāśameti na saṃśayaḥ || 89 ||
[Analyze grammar]

vrajāṃganāsamā prītiryeṣāṃ svāmini mādhave |
jāyate sīmavajyaiṃṣāṃ kartavyaṃ nā'vaśiṣyate || 90 ||
[Analyze grammar]

satāṃ prasevayā kṛṣṇamāhātmyadṛḍhatā bhavet |
upāsanāyāḥ siddhiśca dṛḍhā drāgabhito bhavet || 91 ||
[Analyze grammar]

akṣare parame dhāmni yo'sti golokadhāmani |
vaikuṇṭhe śrīpure cā'vyākṛte'mṛte ca dhāmani || 92 ||
[Analyze grammar]

brahmapatirharī rādhāpatiśca kamalāpatiḥ |
lalitāśrīpatiḥ ramāpatiḥ śrīpatirīśvaraḥ || 93 ||
[Analyze grammar]

antaryāmī vallabhaśca sa eva bhagavān svayam |
samādhau dṛśyate bhaktyā tato bahistu sevayā || 94 ||
[Analyze grammar]

milatyeva harirnārāyaṇo mānavavigrahaḥ |
prākṛtena janenāpi samo bhavati mānave || 95 ||
[Analyze grammar]

yattejasā'kṣaraṃ brahma muktā īśvarakoṭayaḥ |
sūryacandrādayastejasvino bhānti sa eva saḥ || 96 ||
[Analyze grammar]

dhṛtamānavarūpo vai pradīpena vilokyate |
sūryacandraprabhāyāṃ sa dṛśyo bhavati mānavaiḥ || 97 ||
[Analyze grammar]

dehānte'pi mahāpāpī yannāmasmaraṇād drutam |
śuddho bhavati niṣpāpo mokṣamārgāya kalpate || 98 ||
[Analyze grammar]

sa eva niśchadmabhaktabhaktyā bhavati gocaraḥ |
bhaja taṃ paramātmānaṃ śrīśaṃ kṛṣṇanarāyaṇam || 99 ||
[Analyze grammar]

oṃ namaḥ śrīkṛṣṇanārāyaṇāya svāmine svāhā |
japa mantraṃ tathā dhyāhi hṛdaye bālakṛṣṇakam || 100 ||
[Analyze grammar]

jalaṃ prāsādikaṃ nityaṃ piba khāda niveditam |
smara brahmapriyānāthaṃ prabhuṃ mokṣamavāpsyasi || 101 ||
[Analyze grammar]

ityuktaḥ kamale tena brahmāyanena puṣkasaḥ |
jñānaṃ labdhvā prapūjyainaṃ gṛhaṃ nijaṃ yayau tataḥ || 102 ||
[Analyze grammar]

yathoktarītyā bhajate dhyāyati sevate tathā |
satāṃ sevāṃ karotyeva paśyati smarati prabhum || 103 ||
[Analyze grammar]

yajñarādhastvekadā tu pippalasya samīpataḥ |
dadarśa sādhuṃ rūpāḍhyaṃ brahmāyanasamaṃ śubham || 104 ||
[Analyze grammar]

sahasā taṃ vīkṣya cakre daṇḍavat svāgatādikam |
kuśalaṃ cāpi papraccha sādhustaṃ snehamāvahan || 105 ||
[Analyze grammar]

bhaktaḥ prāha kuśalo'smi sādhulābhād viśeṣataḥ |
ājñāṃ kuru yathā sādho seve'haṃ sakuṭumbakaḥ || 106 ||
[Analyze grammar]

sādhuḥ prāha mayā cā'smātsthalād gantavyamasti hi |
aśvapaṭṭasarastīrthaṃ yatra kṛṣṇanarāyaṇaḥ || 107 ||
[Analyze grammar]

sahasārtho bhavān bhūtvā samāgacchatu vai mayā |
tathā'stviti puṣkasaḥ sa svīkṛtya niryayau saha || 108 ||
[Analyze grammar]

kuṭumbena samastena sahito'patyabālakaiḥ |
tāvattūrṇaṃ vimānaṃ cāgataṃ divyaṃ tadāmbarāt || 109 ||
[Analyze grammar]

ahaṃ lakṣmi svayaṃ cā''saṃ mokṣado'smai kṛpāvaśaḥ |
ādāya tān vimāne vai divyān kṛtvā hi pārṣadān || 110 ||
[Analyze grammar]

bhautikadehān tyājayitvā'haṃ ninye nijā'kṣaram |
śāśvataṃ te padaṃ prāptā bhaktā me divyamūrtayaḥ || 111 ||
[Analyze grammar]

ityevaṃ kṛtavāṃsteṣāṃ kalyāṇaṃ satsamāgamāt |
sarve jīvā bhajante māṃ ye te bhavanti tādṛśāḥ || 112 ||
[Analyze grammar]

paṭhanācchravaṇādasya smaraṇācchrāvaṇādapi |
bhuktirmuktirbhavatyeva divyagatiśca sampadaḥ || 113 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne yajñarādhanāmakapuṣkasasya sakuṭumbasya brahmāyanarṣisādhoḥ samāgamena śrīharibhaktyā mokṣaprāptirityādinirūpaṇanāmā daśādhikadviśatatamo'dhyāyaḥ || 210 ||
[Analyze grammar]