Chapter 201

śrīpuruṣottama uvāca |
śṛṇu nārāyaṇīśri tvaṃ bhaktasya nartakasya vai |
nāmnā rāyaṇadevasya kathāṃ bhaktividhāyinīm || 1 ||
[Analyze grammar]

ākhoṭake mahāgrāme bhakto rāyaṇadevakaḥ |
nyavasat sakuṭumbo vai bhajate sma ca māṃ sadā || 2 ||
[Analyze grammar]

pūrvajanmakṛtaṃ puṇyaṃ sarvatraivopatiṣṭhate |
prāgjanmani mayūro'bhūd grāmagopurasannidhau || 3 ||
[Analyze grammar]

upaśalyatarau nityanivāsaścarate'bhitaḥ |
sādhavo ye samāyānti tairthikā yātrikāśca vai || 4 ||
[Analyze grammar]

vihāriṇaḥ pṛthivyāṃ ye te vāṭe grāmamāpya ca |
taruṣaṇḍe'vatiṣṭhantyāsate dinadvayaṃ ca vā || 5 ||
[Analyze grammar]

bhajanaṃ tatra kurvanti pācayanti ca bhuñjate |
niveditaṃ haraye te jalaṃ pibanti sarvathā || 6 ||
[Analyze grammar]

ucchiṣṭāni ca pātrāṇi patrāṇi ca jalānnakam |
kṣipanti taruṣaṇḍeṣu sthitapakṣyarthamityapi || 7 ||
[Analyze grammar]

ucchiṣṭānnāni pānīyaṃ paśavaḥ pakṣiṇastathā |
kīṭādyā bhakṣayantyāpaḥ pibanti ca viyanti ca || 8 ||
[Analyze grammar]

hareḥ prasādā'nnavāri mayūro'tti pibatyapi |
sādhoḥ prāsādikaṃ cāpi samyak pibati cātti ca || 9 ||
[Analyze grammar]

evaṃ prasādamāptasya tasya supuṇyamūrjitam |
pāpaṃ tu pralayaṃ prāptaṃ mṛtaḥ kālena so'bhavat || 10 ||
[Analyze grammar]

hārītakākhyaśūdrasya patnyāṃ kastūrikāstriyām |
garbhe viveśa puṇyena pakṣī mānavajanmavān || 11 ||
[Analyze grammar]

garbhe vāsottaraṃ tatrā'ṣṭame māsi subhaktimān |
bodhāyano maharṣiśca sādhudharmā samāyayau || 12 ||
[Analyze grammar]

vipro bhikṣākṛte'gācca hārītakagṛhaṃ tadā |
hārītakaḥ prārthayacca jñātvā daivajñabhūsuram || 13 ||
[Analyze grammar]

gṛhṇa bhikṣāṃ pāyasānnaṃ ghṛtaṃ ca śarkarāstathā |
sthiro bhavā'tra divase saṃśayānme nirākuru || 14 ||
[Analyze grammar]

ityuktvā pradadau bhikṣāṃ miṣṭamannaṃ ghṛtaṃ payaḥ |
piṣṭaṃ phalāni madhūni cāsanaṃ jalamuttamam || 19 ||
[Analyze grammar]

bodhāyanaḥ pācayitvā nivedya paramātmane |
bubhuje'tha prasādaṃ ca śeṣaṃ sarvaṃ dadau tadā || 16 ||
[Analyze grammar]

hārītakakuṭumbāya bubhuje'pi kuṭumbakam |
sāyaṃ svāsthye sthiravṛttau papraccha taṃ mahāmunim || 17 ||
[Analyze grammar]

patnyā garbhe bālako vā bālā vā kiṃ bhavediti |
kathaṃguṇaṃ madapatyaṃ bhaviṣyatīti me vad || 18 ||
[Analyze grammar]

cirāyurvāpi vai svalpāyuśca bhakto bhavenna vā |
kathaṃ nārāyaṇe deve bhaktiḥ śraddhā bhavedapi || 19 ||
[Analyze grammar]

kathaṃ mokṣo divyatā ca kathaṃ nārāyaṇāśrayaḥ |
kathaṃ sādhoḥ prasaṃgaśca sevā dharmāvalambanam || 20 ||
[Analyze grammar]

kathaṃ muktiḥ kathaṃ tyāgaḥ kathaṃ saṃsāranāśanam |
kathaṃ caiśvaratā syācca muktatā gṛhamedhinaḥ || 21 ||
[Analyze grammar]

ityetāni samastānyamṛtāni me prapāyaya |
ityuktaḥ sādhuvaryastu bodhāyano hi bhaktarāṭ || 22 ||
[Analyze grammar]

pratyuvāca kuṭumbasya sannidhau yatra garbhiṇī |
vartate sā śṛṇotyeva kathāṃ paramapāvanīm || 23 ||
[Analyze grammar]

śṛṇu hārītaka tvaṃ vai patnī te ca śṛṇotvapi |
kuṭumbaṃ te śṛṇotvatra hitaṃ vacmi hitottamam || 24 ||
[Analyze grammar]

bālakaste hi bhavitā putraścoddhārakṛcchubhaḥ |
sādhubhakto harerbhaktaḥ pūrvasaṃskāravāniha || 25 ||
[Analyze grammar]

mayūravat samastāni nṛtyāni prakariṣyati |
sādhuprasādabhoktā ca cirāyurbhaktimān sadā || 26 ||
[Analyze grammar]

muktiṃ tava kuṭumbasya bhaktyā sa vai kariṣyati |
lakṣmīpradaste satataṃ bhāgyaśālī bhaviṣyati || 27 ||
[Analyze grammar]

nārāyaṇapradaścāpi vaiṣṇavaḥ sa bhaviṣyati |
parātparatare kṛṣṇe mahānandanidhau prabhau || 28 ||
[Analyze grammar]

lagnavṛttirhi bhavitā cā''bālyāttava bālakaḥ |
prāgjanmā'sya mayūrasya tato nṛtyakalāvidām || 29 ||
[Analyze grammar]

mūrdhanyo'yaṃ tava putro bhaviṣyati prabhaktarāṭ |
tasya nṛtye ca ye nṛtyavido janāstathā'pare || 30 ||
[Analyze grammar]

nartakyaścāpi sarvāśca miliṣyanti kalāvidaḥ |
sarve tvatputrasaṃgena bhaviṣyantyapi vaiṣṇavāḥ || 31 ||
[Analyze grammar]

mokṣamārge śrayiṣyanti yāsyanti paramaṃ padam |
api jīvā māyikā vai māyāsṛṣṭe jagatyapi || 2 ||
[Analyze grammar]

vartante bahavo nityaṃ nṛtyagītivilāsinaḥ |
pūrvaṃ nārāyaṇenedaṃ sṛṣṭaṃ jagad yadā tadā || 33 ||
[Analyze grammar]

jagatpravāhasiddhyarthaṃ snehapāśo'pi nirmitaḥ |
snehabaddhamidaṃ sarvaṃ kalayā bhramate jagat || 34 ||
[Analyze grammar]

narāṇāṃ yoṣitāṃ prītiḥ sāhajikī tayā bhavet |
snehasya kalayā putre patyau vitte gṛhe striyām || 35 ||
[Analyze grammar]

vāṭyāṃ kṣetre paśau lābhe kuṭumbe jāyate hi sā |
prasvāṃ pitari māyaiva nihitā viśvavarddhinī || 36 ||
[Analyze grammar]

tādṛśyā māyayā baddhā jīvāḥ kalāvido'pi ye |
tava putraṃ miliṣyanti te bhaviṣyanti vaiṣṇavāḥ || 37 ||
[Analyze grammar]

tava putrasya yogena bhaktiṃ mokṣapradāyinīm |
kariṣyanti hareryogaṃ pralapsyanti ca nartane || 38 ||
[Analyze grammar]

māyāparo yo bhagavān janānāṃ śreyase bhuvi |
āvirbhūya sadā cāste taṃ te bālo bhajiṣyati || 39 ||
[Analyze grammar]

pūrvapuṇyayutā lokā bhajiṣyanti hariṃ tadā |
taruṣaṇḍe ca ye pakṣipaśavaśca tarumṛgāḥ || 40 ||
[Analyze grammar]

mṛtā ye te'bhitaścātra sādhuprasādabhojinaḥ |
mānuṣyaṃ prāpya vartante pāvanāḥ puṇyayoginaḥ || 41 ||
[Analyze grammar]

sarve te vai nartakāśca gāyakā vādakā api |
grāme'tra paragrāme vā jātāste vaiṣṇavottamāḥ || 42 ||
[Analyze grammar]

prākśrīkṛṣṇatadīyekṣāprasādādiprabhoginaḥ |
saṃskāriṇaḥ prajātāste grāme'tra bālakāḥ śubhāḥ || 43 ||
[Analyze grammar]

teṣāṃ satāṃ prasaṃgena harervārtāśraveṇa ca |
kṛṣṇabhaktirvartate ca vartiṣyate dṛḍhā'dhikā || 44 ||
[Analyze grammar]

te ca sarve militvaiva kariṣyanti satāṃ hareḥ |
sevāṃ bhaktiṃ bhṛtyatāṃ ca paricaryāṃ pramokṣadām || 45 ||
[Analyze grammar]

śraddhāvanto bhaviṣyanti sarve te kṛpayā satām |
atiprītiṃ gamiṣyanti sādhau ca parameśvare || 46 ||
[Analyze grammar]

samarthāśca bhaviṣyanti svīyasnigdhān parānapi |
bhavapāśānmocayituṃ prītiṃ kārayituṃ harau || 47 ||
[Analyze grammar]

tena saṅkṣyanti vai tucchasukhe susādhuyoginaḥ |
dṛḍhāḥ sarve satāṃ saṃge hareḥ saṃge'tiniṣṭhitāḥ || 48 ||
[Analyze grammar]

māyānāśakarāḥ sarve bhaviṣyanti virāgiṇaḥ |
bhaktyantarāyakṛtsarvaṃ tyakṣyanti brahmaniṣṭhitāḥ || 49 ||
[Analyze grammar]

cireṇa māṃ prasādyaiva phalamāpsyanti śāśvatam |
akṣaraṃ brahma paramaṃ divyaṃ divyasvarūpiṇaḥ || 50 ||
[Analyze grammar]

satāṃ prasaṃgato bhaktirvardhate paramātmani |
satāṃ prasaṃgato jñānaṃ jāyate paramātmanaḥ || 51 ||
[Analyze grammar]

harermāhātmyavijñānaiḥ śraddhā nityaṃ pravardhate |
vivekena harau nityaṃ divyatā bhāsate na vā || 52 ||
[Analyze grammar]

satsu prakāśate cāpi divyatā bhagavannibhā |
vivekena bhavet kṛṣṇanārāyaṇe dṛḍhāśrayaḥ || 53 ||
[Analyze grammar]

tasyāśrayeṇāśrayiṇāmāśrayo jāyate satām |
sadācāraratasyaiva satsevāṃ kurvato bhavet || 54 ||
[Analyze grammar]

mahābhāgavatadharmālambanaṃ sevanādi ca |
sevayā satataṃ pravartate kṛpā satāṃ hareḥ || 55 ||
[Analyze grammar]

kṛpayā muktatā tyāgaḥ saṃsāravilayastathā |
nārāyaṇena tādātmyaṃ jāyate dhyānato hareḥ || 56 ||
[Analyze grammar]

aikāgryaṃ ca nirodhaśca samādhirjāyate harau |
sarvānandamahānandabhogo'sya jāyate'niśam || 17 ||
[Analyze grammar]

tasmāt santo bhojanīyāḥ sevanīyā jalānnakaiḥ |
kāryā ca dāsavat sevā dāsīvad bhṛtyavattathā || 58 ||
[Analyze grammar]

patnīvat putravaccāpi sevā kāryā satāṃ sadā |
pitṛvanmātṛvaccāpi mānanīyāśca rājavat || 56 ||
[Analyze grammar]

svāmivat pativad bhrātṛvacca rakṣakavattathā |
sevanīyāḥ sadā santo hariprasaṃgayoginaḥ || 60 ||
[Analyze grammar]

prasādanīyāḥ tato'tra vandanīyā muhurmuhuḥ |
kṣamāpanīyāḥ satataṃ toṣaṇīyāstu devavat || 61 ||
[Analyze grammar]

pūjanīyā hi santo'tra rakṣaṇīyāstu putravat |
satāṃ prasannatāṃ prāpya bhuktirmuktirbhavediha || 62 ||
[Analyze grammar]

satāmājñāṃ samālambya vartanīyaṃ hi satpathe |
sarvato'pi samākṛṣyendriyā'ntaḥkaraṇāni ca || 63 ||
[Analyze grammar]

nidhātavyāni kṛṣṇe vai vrajeyuḥ kupathaṃ na yat |
kupathaṃ ced vrajeyuśca samākṛṣya drutaṃ tadā || 64 ||
[Analyze grammar]

haṭhāt kṛṣṇe prayojyāni sukhade parameśvare |
yādṛṅmānaṃ nyūnabhāvaṃ māhātmyaṃ śrīharerbhavet || 65 ||
[Analyze grammar]

tādṛgbalaṃ tu viṣaye yātyantaḥkaraṇaṃ bahiḥ |
nyūnatāparihārārthaṃ kāryaḥ saṃgaḥ satāṃ sadā || 66 ||
[Analyze grammar]

kṛṣṇe eva ruciḥ sādhyā heyaḥ saṃgastu cāparaḥ |
kupathe vrajato bhītiḥ kṛṣṇapathe tu nirbhayam || 67 ||
[Analyze grammar]

kṛṣṇaprāptau dehināṃ tu prāptavyaṃ nā'vaśiṣyate |
kṛṣṇānandaparaḥ kaścidānando nāvaśiṣyate || 68 ||
[Analyze grammar]

taṃ hariṃ ced vihāyā'tra tucchasaukhyasya labdhaye |
yatante cettadā bodhyā te janāstu bubhukṣavaḥ || 69 ||
[Analyze grammar]

saṃsāriṇasta evoktā nirayārthaṃ prajanminaḥ |
lumpanti bhagavadvāṇīṃ satāmājñāṃ vahanti na || 70 ||
[Analyze grammar]

te prāpnuvanti satataṃ kleśaṃ tucchārthadhāvinaḥ |
yadyapi syurbuddhimanto bahuśrutāḥ pratarkiṇaḥ || 71 ||
[Analyze grammar]

atha yaḥ svalpadhīścāpi sevate śrīhariṃ sataḥ |
śreyo'dhvānaṃ śrayate'tra vartate satpumarthake || 92 ||
[Analyze grammar]

sadguṇān gṛhṇate nityaṃ sādhūnāṃ bhaktiyoginām |
bhāgavataṃ mahādhvānaṃ divyaṃ samadhitiṣṭhati || 73 ||
[Analyze grammar]

sa eva buddhimān proktaḥ svarthamokṣaparāyaṇaḥ |
sa eva sādhurevokto mokṣārthakṛtaniścayaḥ || 74 ||
[Analyze grammar]

bahubuddhistu nirayaṃ gamiṣyati prabhogavān |
tucchārthadhāvanaparaḥ sādhumārgavinindakaḥ || 75 ||
[Analyze grammar]

hareḥ satāṃ guṇānāṃ sa dūṣako nāstikaḥ khalaḥ |
dhiyā dūṣitayā prāpnotyeva pāpaṃ yamālayam || 76 ||
[Analyze grammar]

kṣīraṃ śarkarayā yuktaṃ viṣāktaṃ ced vināśakṛt |
tathā dhīrdūṣitā śreyovighātinī mahatyapi || 77 ||
[Analyze grammar]

tayā yuktaḥ patatyeva drogdhā janmāntare bhavet |
sadgatirna bhavettasya tatsaṃgino'pi naiva ca || 78 ||
[Analyze grammar]

na cāyaṃ bhāṣaṇayogyaḥ pātayatyeva bhāṣaṇāt |
avaguṇān darśayitvā mālinyaṃ nidadhātyataḥ || 79 ||
[Analyze grammar]

alpamatirbhāvayuktaḥ sevakaḥ saṃgamocitaḥ |
gṛhṇannāśīrvacāṃsyeva śreyomārge sthito hi saḥ || 80 ||
[Analyze grammar]

mānaṃ kapaṭaṃ krodhaṃ ca tatherṣyāṃ prajahāti yaḥ |
sādhūnāṃ dāsabhāvena sevako vartate tu yaḥ || 81 ||
[Analyze grammar]

divyabhāvaṃ vidan satsu satāṃ kriyāsu sarvathā |
sa evaṃ sādhuratroktaḥ sarvathā sevanocitaḥ || 82 ||
[Analyze grammar]

sa eko'nugrahapātraṃ satā hareśca sarvathā |
āśritānāṃ samuddhārakartā hyapi pratāpavān || 83 ||
[Analyze grammar]

sa eva mokṣadaḥ syādvai yathā santo hariryathā |
anyastvāsurabuddhirvai bhūtaḥ preto bhavediha || 84 ||
[Analyze grammar]

rākṣaso drohakartā vā bhaved daityo hi pāpakṛt |
naiva muktirbhavettasya drohiṇo vai hareḥ satām || 85 ||
[Analyze grammar]

vairabhāvena kṛṣṇe sa yujyate ca cireṇa vā |
anugraheṇa kṛṣṇasya kvacijjahāti daityatām || 86 ||
[Analyze grammar]

tataḥ kālāntare kṛṣṇakṛpayā vaiti sadgatim |
tasmāttucche padārthe tu prītiḥ kāryā na sarvathā || 87 ||
[Analyze grammar]

harau satsu sadā kāryā prītiḥ sevā'nuvṛttitā |
yasya sarvaṃ jagat svarṇaṃ loṣṭhaṃ samaṃ divaṃ ca bhūḥ || 88 ||
[Analyze grammar]

sarvaṃ brahmamayaṃ yasya taṃ praseveta dāsavat |
dāsīvat sampraseveta sādhvī nārāyaṇī bhavet || 89 ||
[Analyze grammar]

ityevamupadiśyā'tha lakṣmi bodhāyano muniḥ |
yayau deśāntaraṃ prāpya pūjāṃ kālena vai tataḥ || 90 ||
[Analyze grammar]

kastūrikā sutaṃ divyaṃ suṣuve bhaktayoginam |
bodhāyanoktaṃ vijñānaṃ garbhe yaḥ śrutavān param || 91 ||
[Analyze grammar]

sarvajñānena sahito jajñe putraḥ pratāpavān |
bhaktiṃ cakre hi bālyāt sa nartanaṃ gāyanaṃ tathā || 92 ||
[Analyze grammar]

kathāṃ cakre vivekāḍhyāṃ pūjāṃ karoti nityadā |
bhajanaṃ kīrtanaṃ cakre sarvāṃ kṛṣṇamayīṃ kriyām || 93 ||
[Analyze grammar]

atha bodhāyano draṣṭuṃ samāyātaḥ punastvimam |
bhaktaṃ vilokya śiṣyaṃ taṃ nāmnā rāyaṇadevakam || 94 ||
[Analyze grammar]

mumude dīkṣayāmāsa śataśiṣyairyutaṃ ca tam |
śataśiṣyābhirevā'pi sahitaṃ rāyaṇaṃ muniḥ || 95 ||
[Analyze grammar]

oṃ namaḥ śrīkṛṣṇanārāyaṇāya svāmine svāhā |
dīkṣāṃ bhāgavatīṃ mantraṃ datvā muniryayau vanam || 96 ||
[Analyze grammar]

sarve rāyaṇadevādyā nartakāḥ sādhavastathā |
gāyakāścāpi sādhvyaśca bhejurmāṃ nṛtyakīrtanaiḥ || 97 ||
[Analyze grammar]

sahasraśo janāścaiṣāṃ śiṣyāśca puruṣāḥ striyaḥ |
sañjātā vaiṣṇavā lakṣmi mama bhaktiparāyaṇāḥ || 98 ||
[Analyze grammar]

samāje tvekadā tebhyo darśanaṃ paramaṃ dadau |
ahaṃ sākaṃ śriyā lakṣmyā nārāyaṇaścaturbhujaḥ || 99 ||
[Analyze grammar]

taiśca sampūjitaścāhaṃ pāyayāmāsa pajjalam |
tebhyo muktiṃ divyagatiṃ dadau brahmamayīṃ parām || 100 ||
[Analyze grammar]

tacchiṣyāśca praśiṣyāśca vartante bhūtale'pare |
te bhajante'nādikṛṣṇanārāyaṇaṃ prabhuṃ ca mām || 101 ||
[Analyze grammar]

evaṃ mayā sāghuyogānnartakaścoddhṛto rame |
uddhṛtāścāpi nartakyo mokṣamārgaṃ praṇoditāḥ || 102 ||
[Analyze grammar]

evaṃ mama balaṃ bhakteḥ sādhoḥ sevābalaṃ tathā |
paṭhanācchravaṇādasya bhuktirmuktirbhavediha || 103 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne rāyaṇadevasya nartakasya bodhāyanopadeśena garbhasthasya vijñānaṃ bhaktiśca haridarśanaṃ mokṣaścetyādinirūpaṇanāmā ekādhikadviśatatamo'dhyāyaḥ || 201 ||
[Analyze grammar]