Chapter 200

śrīpuruṣottama uvāca |
śṛṇu nārāyaṇīśri tvaṃ bhāṇḍabhaktasya vai kathām |
bhāṇḍīyanagare bhāṇḍo'bhavacchūdro hi bhaktarāṭ || 1 ||
[Analyze grammar]

gāyane vādane śakto nāmnā kālīndaraḥ purā |
kālīndaro'tikuśalaścābālyāda vādyarāgavān || 2 ||
[Analyze grammar]

vādyakalāṃ vijānāti gītigānānusāriṇīm |
bhāṇḍāśca bahavastasya śālāmāgatya dūrataḥ || 3 ||
[Analyze grammar]

abhyāsaṃ vidadhatyeva vādyānāṃ tatra vāsinaḥ |
nṛtyānāṃ gālatālānāṃ galatālātmakātmanām || 4 ||
[Analyze grammar]

kaṇṭhatālītālasakthikaratālātmakātmanām |
nartakyaścāpi bahvyaścāgatyā'bhyāsaṃ tathāvidham || 5 ||
[Analyze grammar]

kurvanti tasya śālāyāṃ vārāṃganāśca kanyakāḥ |
varṣe varṣe prakurvanti mahotsavaṃ ca te tataḥ || 6 ||
[Analyze grammar]

samāje tatra kurvanti śikṣaṇasya pradarśanam |
evaṃ tatrātikuśalā gāyakā nartakāstathā || 7 ||
[Analyze grammar]

vādakā hāsakāścāpi bahurūpā narāḥ striyaḥ |
prāpnuvanti yathāvidyaṃ pāritoṣikamuttamam || 8 ||
[Analyze grammar]

svarṇarūpyamayaṃ ratnamayaṃ bhūṣāmayaṃ ca vā |
veṣamayaṃ vādyarūpaṃ samājena samarpitam || 9 ||
[Analyze grammar]

evaṃ samvatsare lakṣmi jāyate sumahotsavaḥ |
prasiddhastena bhāṇḍaḥ saḥ kālīndaro vyajāyata || 10 ||
[Analyze grammar]

rājānaḥ sādhavaḥ satyaḥ śreṣṭhinaścādhikāriṇaḥ |
samutsave samāyānti pāritoṣikasampradāḥ || 11 ||
[Analyze grammar]

teṣāṃ karoti satkāraṃ yathāyogyaṃ yathādhanam |
bhāṇḍīranṛpatiścāpi nṛpādīnāṃ samarhaṇam || 12 ||
[Analyze grammar]

svāgataṃ cāpi yogyaḥ san karoti ca yathocitam |
evaṃvidhe samāje'yaṃ kālīndaro'tibhaktarāṭ || 13 ||
[Analyze grammar]

mama mūrtiṃ tu sauvarṇī siṃhāsane sabhāgate |
sarvaśṛṃgāraśobhāḍhye'vasthāpayati śobhanām || 14 ||
[Analyze grammar]

lakṣmīrādhāyutāṃ ramyāṃ kṛṣṇanārāyaṇābhidhām |
maṇḍape taijase śobhāyukte svargasabhāsame || 15 ||
[Analyze grammar]

gāyanādeḥ samārambhāt pūrvaṃ prapūjya māṃ tataḥ |
nṛpān prapūjya sādhūṃśca satīḥ prapūjya cāgragān || 16 ||
[Analyze grammar]

vṛddhān viprān śreṣṭhivaryānnatvā samājamādarāt |
gītiṃ ramyāṃ prārthanāḍhyāṃ karoti prāk tadā mama || 17 ||
[Analyze grammar]

jayati nārāyaṇaḥ sarvakāraṇahariḥ |
śrīpatiḥ sarvalakṣmīśvaro'yam |
jayati nārāyaṇo brahmapārāyaṇo |
rādhikākānta īśeśvaro'yam || 18 ||
[Analyze grammar]

jayati kamalāpatirbrahmalalanāpati |
 rmuktamuktānikākānta īśaḥ |
jayati dhāmeśvaraścāvatāreśvaraḥ |
kaṃbharābālako bālakṛṣṇaḥ || 19 ||
[Analyze grammar]

jayati gopālajo māṇikīnāyaka |
ścā'kṣarādhīśvaraśca prameśaḥ |
sarvalokāntaraścāntarātmā prabhu |
rjayati kṛṣṇo hariḥ pārvatīśaḥ || 20 ||
[Analyze grammar]

jayati gopīpatirjayati naiṣṭhika |
patirjayati sarveśarājādhirājaḥ |
jayati vai kṛṣṇanārāyaṇo mādhavaḥ |
svāmināṃ svāminātho vijayatu || 21 ||
[Analyze grammar]

bhaktarakṣākaro nijajaneṣṭadāyakaḥ |
śrīharirmāṃ samuddharatu kṛṣṇaḥ |
bhāṇḍajātiṃ tathā nartakīyoṣito |
gāyikā uddharatvīśvareśaḥ || 22 ||
[Analyze grammar]

bhaktajanabhāvanāṃ pūrayatvacyuto yaḥ |
prabhurdīnamitraṃ viśeṣāt |
stauti kālīndaraḥ kālamāyāparaṃ |
bhuktaye muktaye śāntaye tam || 23 ||
[Analyze grammar]

evaṃ gītiṃ nartakībhiḥ sahitasya janasya me |
kālīndarasya śrutvā'haṃ prasannaścā'bhavaṃ muhuḥ || 24 ||
[Analyze grammar]

lakṣmīrādhādisahitastebhyo dātuṃ svadarśanam |
kṛpāmakaravaṃ lakṣmi bhaktādhīno narāyaṇaḥ || 25 ||
[Analyze grammar]

tejaḥpuñjo mayā tatra pradarśito'tibhāsuraḥ |
sabhāyāṃ tu samāje vai maṇḍape mama mūrtijaḥ || 26 ||
[Analyze grammar]

tatra śanairmama rūpaṃ śaṃkhacakragadābjavat |
hārakeyūramukuṭakaṭakakaustubhādiyuk || 27 ||
[Analyze grammar]

divyaśṛṃgāraveṣāḍhyaṃ prasannavadanaṃ śubham |
rādhālakṣmīyutaṃ divyaiḥ pārṣadaiśca samanvitam || 28 ||
[Analyze grammar]

adarśayaṃ kṣaṇaṃ tatra mugdhāḥ sarvāḥ striyo narāḥ |
abhavaṃstejasā puñjaiḥ staṃbhanetrāśca vai kṣaṇam || 29 ||
[Analyze grammar]

tejo vilīya sahasā naranāṭyadharo'bhavam |
tairdṛṣṭo rūpavānasmi tāvattiro'bhavaṃ kṣaṇāt || 30 ||
[Analyze grammar]

bhaktabhaktyā manāgevaṃ mayā rūpaṃ pradarśitam |
sarvaḥ samājo rūpaṃ tad draṣṭumiyeṣa vai muhuḥ || 31 ||
[Analyze grammar]

kālīndaraṃ mahābhaktaṃ śiśriyuste tataḥ sadā |
vaiṣṇavāḥ sarva evaite babhūburmayi śraddhayā || 32 ||
[Analyze grammar]

sarve nityaṃ bhajante māṃ prātaḥ kurvanti kīrtanam |
kathāṃ madīyāṃ kurvanti pūjanaṃ mama vastubhiḥ || 33 ||
[Analyze grammar]

naivedyaṃ bhuñjate sarve mama prasādarūpi tat |
sāyaṃ saṃkīrtanaṃ sarve kurvanti militāstathā || 34 ||
[Analyze grammar]

bhāṇḍaśālā'bhavallakṣmi bhaktaśālā hi sā sadā |
ekabhaktasya yogena kṛpayā mama divyayā || 35 ||
[Analyze grammar]

nityaṃ sukīrtanaṃ tatra jāyate mama harṣakṛt |
sādhavaḥ sādhvikāstatra nityamāyānti yānti ca || 36 ||
[Analyze grammar]

kālīndaratathā cānye bhaktā mama prapūjanam |
nityaṃ kurvanti prātaśca madhye sāyaṃ suśobhanam || 37 ||
[Analyze grammar]

nityabhaktyā pāvanāste hyabhavan paṃktipāvanāḥ |
hyekadā bhāṇḍīrapuraṃ sādhustu kamalāyanaḥ || 38 ||
[Analyze grammar]

mama bhakto yayau tīrthayātrāṃ kurvan niśāmukhe |
kālīndaro mahān bhaktaḥ sādhūnāṃ sevako drutam || 39 ||
[Analyze grammar]

sādhave pradadau lakṣmi jalānnaṃ svāgataṃ vyadhāt |
madhuparkaṃ dadau vāsaṃ sevāṃ cakāra bhāvataḥ || 40 ||
[Analyze grammar]

sāyaṃkālottaraṃ tatra samājo darśako'bhavat |
tatra kālīndaro'pṛcchat sate niḥśreyasaṃ nijam || 41 ||
[Analyze grammar]

ātyantikaṃ sukalyāṇaṃ vada sādho kathaṃ bhavet |
kamalāyanasādhustaṃ sabhāyāṃ vaktumārabhat || 42 ||
[Analyze grammar]

anādiśrīkṛṣṇanārāyaṇaḥ sarvātivallabhaḥ |
hitāya dehināṃ cātra kṛpayā mānave kule || 43 ||
[Analyze grammar]

narākāraḥ svayaṃ bhūtvā viharatyeva bhūtale |
tadāśritāḥ sādhavaśca dayālavaścarantyapi || 44 ||
[Analyze grammar]

lokānāṃ hitakartāraścopadiśanti tadguṇān |
tadguṇān prasamākarṇya bhaktiṃ kurvanti mānavāḥ || 45 ||
[Analyze grammar]

bhaktyā śreyo bhavatyeva jāyate cākṣare gatiḥ |
ye janāḥ samagṛhṇanti guṇān sādhoḥ parātmanaḥ || 46 ||
[Analyze grammar]

sevāṃ kurvanti sādhūnāṃ tathā śrīparamātmanaḥ |
bhajante taṃ prabhuṃ sādhūn te taranti bhavārṇavam || 47 ||
[Analyze grammar]

ye tu doṣān pragṛhṇanti te patanti bhavāmbudhau |
vardhante vāsanāstasya doṣagrahaṇapāpataḥ || 48 ||
[Analyze grammar]

ye tu divyadṛśā sādhorharerguṇān gatipradān |
praśaṃsanti ca gṛhṇanti te yānti paramāṃ gatim || 49 ||
[Analyze grammar]

teṣāṃ hṛdaye nairmalyaṃ jāyate sādhusevinām |
śataviprasamaḥ sādhuḥ śatasādhusamo hariḥ || 50 ||
[Analyze grammar]

yathā yathā divārātrau sādhusaṃgaṃ karotyayam |
tathā tathā divyabhāvo harau sādhau ca vardhate || 51 ||
[Analyze grammar]

tathā tathā ca nairmalyaṃ satsaṃgaśca pravardhate |
pravardhate mahāpuṇyaṃ paraniḥśreyasāṃpradam || 52 ||
[Analyze grammar]

indriyāṇāṃ tu pāpāni naśyanti sādhusaṃgataḥ |
ataḥ sarvārpaṇaiḥ sevyāḥ sādhavaḥ sādhubhūṣaṇāḥ || 53 ||
[Analyze grammar]

sādhoḥ sevā hareḥ sevā tayā yāti paraṃ padam |
yatra sādhornivāso'sti tadgṛhaṃ mokṣadaṃ sadā || 54 ||
[Analyze grammar]

yatra kṛṣṇanivāso'sti mandiraṃ tat pramokṣadam |
sa deśo mokṣado yatra sādhurharirvirājate || 59 ||
[Analyze grammar]

sā khaṭvā pāvanī yatra sādhuḥ svapiti śāntimān |
yasmin dine hareḥ sādhordarśanaṃ sevanaṃ bhavet || 56 ||
[Analyze grammar]

divasaḥ sa śubhaḥ prokto mokṣo'ghavināśakaḥ |
sabhā samājaḥ śubhakṛd yatra sādhoḥ samāgamaḥ || 57 ||
[Analyze grammar]

bhaktānāṃ saṃgamaścāpi pāpaho mokṣadastathā |
vaiṣṇavānāṃ satāṃ saṃgaḥ satīnāṃ sevanaṃ tathā || 58 ||
[Analyze grammar]

mokṣadaṃ saṃbhavatyeva satsaṃgaḥ śevadhirnṝṇām |
dānaṃ puṇyaṃ bhojanādi dātavyaṃ sādhave sadā || 59 ||
[Analyze grammar]

śrīkṛṣṇāya pradātavyaṃ sarvasvaṃ mokṣakṛddhi tat |
evaṃvidhābhiḥ sevābhirmokṣaṃ sampādayet sudhīḥ || 60 ||
[Analyze grammar]

asaddeśamasatkālamasatsaṃgaṃ vivarjayet |
satsaṃgaṃ satkriyāṃ kuryāttena mokṣo bhavediha || 61 ||
[Analyze grammar]

asatsaṃgo bhavedbhakternāśakastaṃ parityajet |
mokṣasya rodhakaṃ cāpi duṣṭasaṃgaṃ vivarjiyet || 62 ||
[Analyze grammar]

pūrvasaṃskārayogena nairmalyaṃ hṛdi jāyate |
pūrvapuṇyodayenāpi nairmalyaṃ jāyate hṛdi || 63 ||
[Analyze grammar]

kṛpayā śrīhareścāpi nairmalyaṃ jāyate hṛdi |
sādhūnāṃ kṛpayā cāpi nairmalyaṃ jāyate hṛdi || 64 ||
[Analyze grammar]

sevākhyena pauruṣeṇa sādhūnāṃ śrīharestathā |
nairmalyaṃ jāyate śreṣṭhaṃ sarvasvārpaṇakarmaṇā || 65 ||
[Analyze grammar]

nirmalāntaḥkaraṇo yaḥ sajjate satsamāgame |
sādhusevāṃ hareḥ sevāṃ kṛtvā kṛpāṃ prasādanam || 66 ||
[Analyze grammar]

prasannatāṃ harerlabdhvā labdhvā sādhoḥ prasannatām |
varadānaṃ tato labdhvā hareḥ satāṃ mahātmanām || 67 ||
[Analyze grammar]

sadbuddhyā śrīhariṃ prāpya naranāṭyadharaṃ prabhum |
sādhūnmokṣapradān prāpya kṛtvā saṃgaṃ hareḥ satām || 68 ||
[Analyze grammar]

tebhyaḥ prāpya paraṃ jñānaṃ tadbhaktyā''pnoti divyatām |
kṛpayā divyayānena bhakto yāti paraṃ padam || 69 ||
[Analyze grammar]

sakalpānāṃ vāsanānāṃ māyānāṃ ca nivartanam |
mokṣābhigamanaṃ ceti hareḥ satāṃ prasaṃgataḥ || 70 ||
[Analyze grammar]

mano līnaṃ harau kṛṣṇe jāyate snehayoginām |
tathaikāntikabhaktānāṃ syānniṣkaitavasevayā || 71 ||
[Analyze grammar]

sevābhaktiparaḥ śreṣṭho na nivṛttiparāyaṇaḥ |
sevako'saṃkhyamokṣārthī nivṛttastvātmamokṣakṛt || 72 ||
[Analyze grammar]

dāsyena bhajamānasya bhaktiḥ kṛṣṇe'dhikā yataḥ |
bhaktyādhikyabalaḥ śreṣṭhaḥ samartho'saṃkhyamokṣaṇe || 73 ||
[Analyze grammar]

nivṛtto durbalo hīnaḥ kṛṣṇastadbhaktasevayā |
sevakaḥ sabalaḥ kṛṣṇājñāyāṃ dṛḍhasthitirmataḥ || 74 ||
[Analyze grammar]

tatra kaścid bhaved doṣo vākpāruṣyādiko'pi ca |
na grāhyo divya evā'sau taddoṣo guṇa eva saḥ || 75 ||
[Analyze grammar]

doṣadṛṣṭistu puruṣo dānavo vā'suro hi saḥ |
kṛṣṇe doṣagrāhakaḥ sa nṛnāṭyamanukurvati || 76 ||
[Analyze grammar]

kalyāṇado hariścātra karoti bhaktavāñcchitam |
nārīṇāṃ kāmanāpūro narāṇāmiṣṭado'pi ca || 77 ||
[Analyze grammar]

tata daityāḥ kalpayanti svadṛṣṭāntena karmajān |
taccaritreṣu divyeṣu śrutimātrā'ghahāriṣu || 78 ||
[Analyze grammar]

doṣān kāmakrodhalobhān tena te yāntyadhogatim |
naitāvatā hareḥ sādhorjagatkalyāṇakāriṇaḥ || 79 ||
[Analyze grammar]

doṣagandho'pi bhavati divyasya paramātmanaḥ |
doṣadarśī tvāsuraḥ syāttasmāddoṣaṃ na kalpayet || 80 ||
[Analyze grammar]

mahatsvapi tu bhakteṣu svalpeṣvapi ca sarvathā |
harau yathā tathā doṣaṃ svalpaṃ cāpi na kalpayet || 81 ||
[Analyze grammar]

kṛṣṇo divyaḥ kṛṣṇalīlā divyāḥ kalyāṇadāstu tāḥ |
santo divyā satāṃ līlā divyāstadvaddhi mokṣadāḥ || 82 ||
[Analyze grammar]

divyā śrībālakṛṣṇasya cājñā tatra ca vartate |
yaḥ sa divyo bhavedatra mahāneva mato hi saḥ || 83 ||
[Analyze grammar]

kṛṣṇanārāyaṇaścā'kṣareśaḥ śrīpuruṣottamaḥ |
sākṣātprāpto naranāṭyadharo'trā''jñāpravartakaḥ || 84 ||
[Analyze grammar]

itiniścitya bhaktāstu vartante tadvaco'nvitāḥ |
teṣāṃ prasevayā muktirbhavatyevā''jñayā yathā || 85 ||
[Analyze grammar]

bhaktā ājñāṃkitāḥ santi mokṣārthā mokṣagāminaḥ |
saṃsāriṇastvabhaktāste bhavanti viṣayaiṣiṇaḥ || 86 ||
[Analyze grammar]

bhaktānāṃ viṣayāḥ santi nārāyaṇaparāyaṇāḥ |
abhaktānāṃ tu viṣayāḥ kāmāsvādanatatparāḥ || 87 ||
[Analyze grammar]

grāmyaṃ gītaṃ rūpamiṣṭaṃ sparśo gandhaśca dehajaḥ |
abhakṣyabhakṣaṇaṃ ceti viṣayā viṣayaiṣiṇām || 88 ||
[Analyze grammar]

kṛṣṇagatiṃ kṛṣṇarūpaṃ kṛṣṇasparśo'tisaurabhaḥ |
kṛṣṇasya gandha evāpi jalānnaphalabhūṣaṇam || 89 ||
[Analyze grammar]

kṛṣṇaprasādi tulasīdalaṃ cāmbaramityapi |
vādyagāyanaśobhādi śṛṃgārahāsyagītikāḥ || 90 ||
[Analyze grammar]

ramaṇaṃ lāsanaṃ bhāvā bhaktānāṃ bhagavatkṛtāḥ |
grāmyāstiṣṭhanti bāhyeṣu bhaktāstiṣṭhanti keśave || 91 ||
[Analyze grammar]

grāmyā hātuṃ na vai śaktā yathā grāmyān prabhogakān |
bhaktā hātuṃ na vai śaktāstathā kṛṣṇaprabhogakān || 92 ||
[Analyze grammar]

samādhisthā api bhaktāḥ kurvanti śrīhareḥ kathām |
ākṛṣyante guṇe gāne kṛṣṇasyaiva na cetare || 93 ||
[Analyze grammar]

satvasthitau harerdhyānaṃ jāyate śāntikṛt sukham |
rājase tāmase bhāve kṛṣṇadhyānaṃ tu durvaham || 94 ||
[Analyze grammar]

dhyeyasphurtirbhavennaiva rājase tāmase hṛdi |
bahiḥ kṛṣṇastadā dṛśyo darśanīyo nṛnāṭyadhṛk || 95 ||
[Analyze grammar]

sādhavo darśanīyāśca tadānīṃ bahireva ha |
sevanīyā bahirbhāvai rājasaiḥ sukhasampadā || 96 ||
[Analyze grammar]

yadvā cātmasvarūpasya kāryaṃ sucintanaṃ tadā |
jñānena līyate bhāvastāmaso rājaso'pi ca || 97 ||
[Analyze grammar]

mano'pi kīśavannaisargikaṃ calaṃ niruddhyate |
anirodhe tu satataṃ kīrtanīyo harirbahiḥ || 98 ||
[Analyze grammar]

satālīvādanaṃ kuryāt kṛṣṇakīrtanamuttamam |
saṃkalpāstena naśyanti rājasāstāmasāstathā || 99 ||
[Analyze grammar]

satāṃ sevā prakartavyā grāhyā vārtā satāṃ mukhāt |
sādhayecchāntimamṛtapradāṃ saṃkīrtanena vai || 100 ||
[Analyze grammar]

āśrayo'tidṛḍhaḥ kṛṣṇe prasādasya pravartakaḥ |
āśrayeṇa guṇavegāḥ śāmyanti bhaktayoginaḥ || 101 ||
[Analyze grammar]

viśvāsena prakartavyaścāśrayaḥ paramātmanaḥ |
svārthena vā prakartavyaḥ snehena vā parātmanaḥ || 102 ||
[Analyze grammar]

jñānena vā prakartavyaścāśrayaḥ paramātmanaḥ |
trayaḥ pūrvā nirbalā vai sabalo jñānajā''śrayaḥ || 103 ||
[Analyze grammar]

satāṃ vākyeṣu viśvastā āśrayanti hariṃ janāḥ |
rājyaiśvaryā''rogyadhanādyāptyai tu svārthikā janāḥ || 104 ||
[Analyze grammar]

rūpasauhārdasambandhasnehena snehino janāḥ |
snigdhā bhūtvā''śrayantyeva sahante virahaṃ na te || 105 ||
[Analyze grammar]

satsaṃgabalato jñātvā māhātmyaṃ paramātmanaḥ |
āśrayanti hariṃ jñānivaryāste śāśvatāśrayāḥ || 106 ||
[Analyze grammar]

jñāninastu prajānanti hariṃ sarveśvareśvaram |
sarvaguṇā'guṇādhāraṃ divyamāyādhipaṃ tathā || 107 ||
[Analyze grammar]

doṣā'doṣāśrayaṃ nyāyā'nyāyāśrayaṃ prabhuṃ vibhum |
aṇuṃ mahāntaṃ dīrghaṃ ca kāmā'kāmāśrayaṃ tathā || 108 ||
[Analyze grammar]

aiśvaryā'naiśvaryayuktaṃ bhayā'bhayasamanvitam |
sadasatsarvakośaṃ ca yāvadāścaryasaṃbhṛtam || 109 ||
[Analyze grammar]

karmā'karmāśrayaṃ cāpi sarvāśrayaṃ yathāyatham |
asaṃbhavo harau nāsti yasya kasyāpi sarvathā || 110 ||
[Analyze grammar]

asuṣṭhoścāpi suṣṭhośca mahāśrayo harirhi saḥ |
sarvaṃ ghaṭate kṛṣṇe vai sarvaśarīraśāyini || 111 ||
[Analyze grammar]

anvite tatra sarvatra ghaṭate dehavat kriyā |
vyatireke'pi sarvaṃ vai ghaṭate māyayojjhitam || 112 ||
[Analyze grammar]

samāye māyayā tulyamamāye nijatulyakam |
ghaṭate ca tato nāsyāśraye vighnaṃ prajāyate || 113 ||
[Analyze grammar]

evaṃ samāśritaḥ kṛṣṇo jñānena cet pareśvaraḥ |
sarvakalānidhiḥ syāt sa sarvādhiśreyasāṃ pradaḥ || 114 ||
[Analyze grammar]

āśrayeṇa samastāni kṛtāni sādhanāni vai |
bhavantyeva na saṃdehastaṃ prasādhya pramokṣayet || 115 ||
[Analyze grammar]

kālīndara sadā jñātvā kurvāśrayaṃ muhurmuhuḥ |
śasyasyeva paraṃdhāma bhaja nārāyaṇaṃ harim || 116 ||
[Analyze grammar]

ityuktvā prayayau sādhuranyāṃ diśaṃ yathocitām |
kālīndarādyā bhejuśca lakṣmi māṃ tadvacaḥsthitāḥ || 117 ||
[Analyze grammar]

athā'haṃ nītavāṃstāṃścā'kṣaraṃ me paramaṃ padam |
dehānte me dṛḍhamāśrayaṃ gatān bhaktibhāginaḥ || 118 ||
[Analyze grammar]

paṭhanācchravaṇādasya smaraṇād vartanāttathā |
bhuktirmuktirbhavatyeva kṛpayā me rame sadā || 119 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne bhāṇḍīragrāmasthasya kālīndarabhāṇḍasya nartakyādisahitasya paramabhaktyā mokṣaṇaṃ kamalāyanamaharṣerupadeśaścetyādinirūpaṇanāmā dviśatatamo'dhyāyaḥ || 200 ||
[Analyze grammar]