Chapter 199

śrīpuruṣottama uvāca |
śṛṇu nārāyaṇīśri tvaṃ kāruṇyāt pravadāmi yat |
sarvairjanaiḥ sadā kāryaṃ sacchāstrāṇāṃ prasevanam || 1 ||
[Analyze grammar]

lakṣmīnārāyaṇasaṃhitāyāścāsyāḥ prasevanam |
nārībhiśca naraiścāpi kartavyaṃ sarvadehibhiḥ || 2 ||
[Analyze grammar]

mama bhaktiprakārāśca mokṣasya sādhanānyapi |
svargasya hetavaścāpi sṛṣṭīnāṃ vartanāni ca || 3 ||
[Analyze grammar]

uktānyatra samastāni bahūni kṛpayā mayā |
aikāntikā mama bhaktā uditā hi mayā śubhāḥ || 4 ||
[Analyze grammar]

dehātmabuddhayaścāpi brahmātmabuddhayastathā |
svārthaparāstathā coktāḥ parārthā divyadharmiṇaḥ || 5 ||
[Analyze grammar]

divyāstu dehatritayād bhinne cātmani niṣṭhitāḥ |
ātmanyatiprakāśe te sākṣānmāṃ samupāsate || 6 ||
[Analyze grammar]

īkṣante te cātiprakāśā''tmarūpaṃ sanātanam |
ātmarūpe bālakṛṣṇamīkṣante māṃ pareśvaram || 7 ||
[Analyze grammar]

atitejasvinaṃ sākṣād ramantaṃ cātmanā saha |
ta ete divyadṛgvantaścātra loke sthitā api || 8 ||
[Analyze grammar]

brahmapurasthitāḥ santi yūyaṃ brahmapriyā yathā |
brahmabhāvastu bhaktābhiḥ sādhanīyo'tisaukhyadaḥ || 9 ||
[Analyze grammar]

śrīpatau mayi yāsāṃ vā yeṣāṃ manuṣyabhāvanā |
teṣāṃ tāsāṃ vighnabhayaṃ viraho me bhavediti || 10 ||
[Analyze grammar]

aprāptirmama dhāmnaśca kvacit syānmadabhāvataḥ |
ato loke mama bhaktā naiva kurvanti vai mayi || 11 ||
[Analyze grammar]

manuṣyabhāvanāṃ kvāpi kurvanti divyabhāvanām |
yathā tu bhāvanā divyā mayi tathā nije'pi ca || 12 ||
[Analyze grammar]

kartavyā bhāvanā divyā na tu dehātmabhāvanā |
dehātmabhāvanā vighnapradā bhavati dehinām || 13 ||
[Analyze grammar]

brahmā mohaṃ gato vīkṣya pārvatīrūpameva ha |
skhalitaśca tato jātā bālakhilyā maharṣayaḥ || 14 ||
[Analyze grammar]

śaṃkaro mohinīṃ māṃ tu dṛṣṭvā mugdho'bhavattathā |
nārado dehabhāvena vivāhaṃ samiyeṣa ca || 15 ||
[Analyze grammar]

evamanye'pi bahavo mohaṃ muktā gatā api |
mohātmakaṃ mahadvighnaṃ jāyate dehabhāvinām || 16 ||
[Analyze grammar]

divyabhāvayutānāṃ tu cātmaniṣṭhānivāsinām |
śukavad brahmabhāvo vai jāyate sanakādivat || 17 ||
[Analyze grammar]

sarvā līlā mama divyā boddhavyā ratirāsajā |
muktidā sā bhavatyeva mayi snehena yoginī || 18 ||
[Analyze grammar]

sneho gāḍhānurāgaḥ śrīkṛṣṇanārāyaṇe mayi |
premātirekaḥ satataṃ nijātmani sthirastu yaḥ || 19 ||
[Analyze grammar]

snehenā''nena bhaktānāṃ māyāsneho vilīyate |
māyāsneha sthitiṃ kartuṃ dadātyeva na cāntare || 20 ||
[Analyze grammar]

dhyānaṃ snehena satataṃ kartavyaṃ mama nityadā |
dhyānavṛttiḥ sthirā syācca mahāsamādhikāraṇam || 21 ||
[Analyze grammar]

vṛttisthairye bhavedekāntikatā mayi keśave |
śāśvatānandasandohe mahāsukhaprade prabhau || 22 ||
[Analyze grammar]

sarvakriyāsu satataṃ mayi sthairyaṃ vidhāpayet |
evamabhyasane jāte cātmā niruddhyate mayi || 23 ||
[Analyze grammar]

sendriyā'ntaḥkaraṇaḥ saṃpralagno jāyate mayi |
evaṃ cittanirodhena sarvarodhe bhavenmayi || 24 ||
[Analyze grammar]

premā'tirekastatrā'sti kāraṇaṃ netarad rame |
bhaktānāṃ mānasaṃ snehāt sthiraṃ syānmayi tattathā || 25 ||
[Analyze grammar]

teṣāmātmasu sahasā vāso me ca bhaved rame |
premṇā vāsastu mūrterme sākṣādvat smārako bhavet || 26 ||
[Analyze grammar]

mahātmyajñānamevāpi premṇā nityaṃ pravardhate |
māhātmyajñānayukpremā brahmātmasthitimṛcchati || 27 ||
[Analyze grammar]

na sa māyāṃ prapaśyet saṃpaśyenmāṃ brahma śāśvatam |
akṣaraṃ divyarūpaṃ ca saccidānandasaṃbhṛtam || 28 ||
[Analyze grammar]

tatra nijātmarūpe vai cākṣare brahmaśāśvate |
sadaikarasacaitanyaprakāśe vyāpake'bhitaḥ || 29 ||
[Analyze grammar]

anādiśrīkṛṣṇanārāyaṇaṃ māṃ parameśvaram |
divyaṃ kāntaṃ samīkṣeta nānyamākāramīkṣate || 30 ||
[Analyze grammar]

eṣā brāhmī sthitirdivyā parāvidyāsthitistathā |
divyajñānasthitiścāpi jñānapralayasaṃjñikā || 31 ||
[Analyze grammar]

sākṣātkṛṣṇe pare deve śāśvatasthiratātmikā |
asyā nityaṃ samārambhaṃ yaḥ karoti tu dehabhāk || 32 ||
[Analyze grammar]

sa yāti paramāṃ śreṣṭhāṃ sthitiṃ lakṣmi yathā tava |
pratyakṣasya mahimā me yāvaj jñāto'sti yena vai || 33 ||
[Analyze grammar]

tasya tāvān prakāśo'pi hṛdaye kṛpayā bhavet |
cinmayaṃ taṃ prakāśaṃ ca vardhamānavekṣate || 34 ||
[Analyze grammar]

mahimānaṃ vardhamānaṃ yāvantaṃ vindate tathā |
tāvantaṃ praṇavaṃ cāpi tāvadrūpaṃ ca me tathā || 35 ||
[Analyze grammar]

vardhamānaṃ brahmarūpe vindate kṛpayā mama |
kramāt sarvatra sampūrṇaṃ prakāśaṃ paripaśyati || 36 ||
[Analyze grammar]

śṛṇoti mama nāmnāṃ vai nādānāṃ madhurān dhvanīn |
brahmanādeṣu magnasya magnasya svātmani dhruve || 37 ||
[Analyze grammar]

amāyikasya muktasya brahmībhūtatvameva tat |
mama māhātmyānubhavo yasyā''dhikyena yāvatā || 38 ||
[Analyze grammar]

tāvatā brahmabhāvasya parātmano mamekṣaṇam |
parāṃ kāṣṭhāṃ prapannasya mama māhātmyavedinaḥ || 39 ||
[Analyze grammar]

kālamāyāniyantṛtvādyaiśvaryaṃ samajāyate |
anādiśrīkṛṣṇanārāyaṇo'haṃ matsamo'pi saḥ || 40 ||
[Analyze grammar]

sarvāvatāradhartā'haṃ kālamāyāniyāmakaḥ |
guṇātīto nirvikāraḥ sarveśvareśvareśvaraḥ || 41 ||
[Analyze grammar]

śreyo'rthaṃ dehināmatra svecchayā bhāmi martyavat |
martyavacca kriyāḥ sarvāḥ karomi bhaktahetave || 42 ||
[Analyze grammar]

tatra vimūḍhamatayaścālpajñāścarmacakṣuṣaḥ |
nijadṛṣṭāntamāsādya doṣān prakalpayanti te || 43 ||
[Analyze grammar]

nirdoṣo'haṃ sadā lakṣmi cintāmaṇisamaḥ sadā |
kalpakeṣu kalpyadoṣāḥ praviśanti hi te'khilāḥ || 44 ||
[Analyze grammar]

manyante kāminaṃ māṃ ye kāminaste bhavanti vai |
krodhinaṃ māṃ kalpayanti krodhinaste bhavanti ca || 45 ||
[Analyze grammar]

manyante māṃ lampaṭaṃ ye bhavanti lampaṭāstu te |
māyāvinaṃ tu jānanti māyāvino bhavanti te || 46 ||
[Analyze grammar]

adivyaṃ māṃ vijānanti hyāsurāḥ kṣudrabuddhayaḥ |
divyaṃ cāpi manuṣyaṃ māṃ divyaṃ jānanti ye tu vai || 47 ||
[Analyze grammar]

te tu bhavanti divyāśca hyadivyā api devatāḥ |
api nrākṛtimīśaṃ māṃ nirdoṣaṃ māṃ vidanti ye || 48 ||
[Analyze grammar]

sadoṣā api jāyante nirdoṣāste balānmama |
vaśe yasya samastānīndriyāṇi cāntarāṇi ca || 49 ||
[Analyze grammar]

saṃkalpo'pi vaśe yasya pratyakṣakṛṣṇaniścayaḥ |
sa eva pūrṇo dhanyaśca kṛtārthaśca mataḥ sadā || 50 ||
[Analyze grammar]

yathā muktastathā so'pi yathā'kṣare tathā'tra saḥ |
yathā divyastathā cātra sarvaiśvaryānvito bhavet || 51 ||
[Analyze grammar]

manyeta sa nijaṃ bhāgyaṃ bhāgyena śrīhareḥ saha |
miśritaṃ na pṛthak lakṣmi dhanyaṃ manyeta vai nijam || 52 ||
[Analyze grammar]

kāmādidāvadagdhe'tra loke dhanyo'smi yanmama |
anādiśrīkṛṣṇanārāyaṇaḥ sākṣānmimela ha || 53 ||
[Analyze grammar]

santastasya tu militā mokṣadā doṣanāśakāḥ |
yatprasādena jeṣyāmi kāmādīnāntarānarīn || 54 ||
[Analyze grammar]

brahmarūpeṇa ca kṛṣṇopāsanāṃ mokṣadāyinīm |
kariṣyāmi bhāgyayogaiḥ kṛpayā śrīharestathā || 55 ||
[Analyze grammar]

etādṛśā mama bhaktā bhāgyavanto rame matāḥ |
prāptapūrṇaguṇāste vai cintāmaṇiprayogiṇaḥ || 56 ||
[Analyze grammar]

nahi teṣvastyapūrṇatvaṃ paripūrṇā mamāśrayāt |
pratyakṣo'haṃ yadeteṣāṃ milito rādhikāpatiḥ || 97 ||
[Analyze grammar]

pūrvajanmotthasukṛtaṃ tveteṣāṃ bahulaṃ yataḥ |
satsaṃgasya mahāyogo jāto'sya mokṣado yataḥ || 58 ||
[Analyze grammar]

prapannasya tu bhaktasyā'pūrṇatā ced bhaved yadi |
apaneyā''tmaniṣṭhā''ḍhyamāhātmyajñānatastu sā || 59 ||
[Analyze grammar]

ātmaniṣṭhā nirbalā cet samādhāvapi duḥkhadā |
śrūyante tu yadā nādā brahmāṇḍabhedakā iva || 60 ||
[Analyze grammar]

samādhau tu tadā cātmaniṣṭhāhīno bibheti ha |
ātmasatto nirbhayo vai brahmatādātmyameti ca || 61 ||
[Analyze grammar]

brahmāṇḍadāhakaṃ tejastatrekṣate samādhimān |
tadā bibhetyasāvātmaniṣṭhāhīno vinā''śrayam || 62 ||
[Analyze grammar]

harirvā tasya tanmārge sahāyaḥ premabhāvitaḥ |
ātmavidvā bhayaṃ naiti hareḥ sahāyavāṃśca vā || 63 ||
[Analyze grammar]

ātmavidaḥ pratruṭyanti sarvā viṣayavāsanāḥ |
nirodhaṃ tvekavṛttitvāccittaṃ kṛṣṇe'sya vindati || 64 ||
[Analyze grammar]

sarvendriyapravāhāṇāṃ kṛṣṇe mayi visarjanam |
kṛtvā stheyaṃ mama bhaktairvighnaṃ nā'sya prajāyate || 65 ||
[Analyze grammar]

ekabalaṃ caikavṛtti cittaṃ bhaktasya susthiram |
mayyeva tu yadā jātaṃ tadākraṣṭuṃ na śakyate || 66 ||
[Analyze grammar]

ramyaiścāpi padārthairvai yato nirvāsanaṃ hi tat |
niruddhaṃ mama mūrtau tanmadanyacintanojjhitam || 67 ||
[Analyze grammar]

evaṃ satāṃ mānasaṃ vai mayi ruddhaṃ prajāyate |
hitvā'nyat kṛṣṇapūrṇārthāḥ kurvate madupāsanam || 68 ||
[Analyze grammar]

evaṃ lakṣmi kṛpāsādhyo bhavāmi pūrṇakāmadaḥ |
mahābhāgavatāḥ santo bhajante navadhā hi mām || 69 ||
[Analyze grammar]

brahmaniṣṭhā ātmavido mama māhātmyavedinaḥ |
bhaktiniṣṭhaḥ sadā sevāniṣṭhasteṣāṃ pravardhate || 70 ||
[Analyze grammar]

tathā tādātmyaniṣṭhaśca sampadyate mayā saha |
sadbhistathāpi nodricyaṃ hyudreke dagdhabījatā || 71 ||
[Analyze grammar]

hareḥ kṛpā tādṛśācca nivartate hi niṣphalā |
tasmānmayyeva saṃsthāpyaṃ sarvaṃ cābhyudayādikam || 72 ||
[Analyze grammar]

buddhirmano'pyahaṃkāraścittaṃ cendriyavṛttayaḥ |
deho dehaguṇāścāpi sthāpanīyā mayīśvare || 73 ||
[Analyze grammar]

rasikatvaṃ harāveva bālakṛṣṇe mayi prabhau |
samarpaṇīyaṃ satataṃ śrīlakṣmīrādhikāpatau || 74 ||
[Analyze grammar]

gāyanasya rasaścāpi samarpaṇīya īśvare |
kīrtanaṃ hāvabhāvāścārpaṇīyā parame mayi || 75 ||
[Analyze grammar]

mayyarpaṇaṃ vinā bhāvo raso'nyatra bhaved yadi |
tatra syālagnatā tena bhraṃśaḥ syācchreyasāṃ pathaḥ || 76 ||
[Analyze grammar]

ekāntikasya bhaktasya rasikasya na saṃbhavet |
rasaḥ kvāpi madanyeṣu padārtheṣu jagatsu vai || 77 ||
[Analyze grammar]

mama līlāguṇabhāji śabde yasya raso mataḥ |
nā'nyatra sa eva me'sti śābdiko rasikaḥ priyaḥ || 78 ||
[Analyze grammar]

mamāṃgayogisaṃsparśe yad bhaktasya rato mataḥ |
nā'nyatra spārśane kvāpi sparśīyarasikaḥ sa me || 79 ||
[Analyze grammar]

mamaivekṣā māmakānāmīkṣā yasya rasānvitā |
nānyā yasyā'sti didṛkṣā rūpīyarasikaḥ sa me || 80 ||
[Analyze grammar]

madarpitānnatāmbūlaprabhṛtisvādasadrasaḥ |
yasyā'sti na tvitaratra rasīyarasikaḥ sa me || 81 ||
[Analyze grammar]

madarpitasugandhāderghrāṇane yasya sadrasaḥ |
nānyatra saurabhādau sa gandhīyarasiko mama || 82 ||
[Analyze grammar]

grahaṇaṃ mama divyānāṃ padārthānāṃ tu hastayoḥ |
gamanaṃ mandirāṇāṃ me pradakṣiṇaṃ ca pādayoḥ || 83 ||
[Analyze grammar]

kathanaṃ matkathādīnāṃ vāco yasya rasātmakam |
ānandādyaṃ mama yogānmadratau yasya sadrasaḥ || 84 ||
[Analyze grammar]

evamādyāni sarvāṇi madarthe rasabhāñji vai |
mano buddhistathā cittamahaṃkāro'pi mārutaḥ || 85 ||
[Analyze grammar]

sarve madrasabhāvā vai yasya bhaktasya santi hi |
pramodo yasya manmūrtau mūrteśca viṣayeṣvapi || 86 ||
[Analyze grammar]

bhāgavateṣu divyeṣu rasotkarṣo hi sarvathā |
ātyantikī ruciścāpi mayyeva yasya vartate || 87 ||
[Analyze grammar]

jāgrataḥ svapato vāpi mūrchitasyāpi sarvathā |
turyāsthitasya mayyeva yasya sarvo raso mataḥ || 88 ||
[Analyze grammar]

tasya bhaktasya divyasya satyā rasikatā matā |
evaṃvidhasya bhaktasya rasikasya sadā hṛdi || 89 ||
[Analyze grammar]

bhāse'nādikṛṣṇanārāyaṇo'haṃ divyamūrtimān |
paśyato mama mūrtiṃ ca hṛdaye drāgalaukikīm || 90 ||
[Analyze grammar]

prakāśate brahmatejo bhāse tasminnahaṃ prabhuḥ |
tasmād bhaktaiḥ pradhāryaṃ me rūpaṃ gāyanakīrtanaiḥ || 91 ||
[Analyze grammar]

mānasaṃ ca mama rūpe sātma śraddhāsamanvitam |
yatra kvāpi praveṣṭuṃ na śakyetā'nyena vastunā || 92 ||
[Analyze grammar]

yataḥ samartho bhagavān māyikāni samastataḥ |
dūrīkaroti vighnāni sarveśvareśvaro hi saḥ || 93 ||
[Analyze grammar]

vidhṛtā yena bhūgolāstārā vyomni tathā dhṛtāḥ |
sūryācandramasoryenodayāstamane vai kṛte || 94 ||
[Analyze grammar]

meghāśca nirmitā yena vārivāhā jalapradāḥ |
ṛtavo nirmitā yena vṛkṣavallīphalapradāḥ || 95 ||
[Analyze grammar]

abdhayo nijavelā na jahatyapi yadājñayā |
dhātubindoḥ prajāyante sākārā'patyamūrtayaḥ || 96 ||
[Analyze grammar]

jīvo yenecchayā cātmā hyagocaraḥ samarthitaḥ |
so'haṃ śrīmān kṛṣṇanārāyaṇo manuṣyavigrahaḥ || 97 ||
[Analyze grammar]

bahiśca hṛdaye svāmī dhāmni cāpi bhavāmi ha |
militaśceha bhaktānāṃ paraniḥśreyase prabhuḥ || 98 ||
[Analyze grammar]

etādṛśaṃ māṃ vijñāya māhātmyajñānagocaram |
mama bhaktena bhaktirme kāryā bhītivivarjitā || 99 ||
[Analyze grammar]

evaṃvidhasya vijñasya brahmasthitirbhavediha |
hṛdi tasya praveśaṃ na kurvanti māyikāni vai || 100 ||
[Analyze grammar]

divyā sthitirbhavatyeva sukhaduḥkhasamā'sya vai |
pūjane tāḍane hastyārohaṇe kharavāhane || 101 ||
[Analyze grammar]

śatrau mitre tathā svarṇe lauhe rūpe kurūpake |
avamāne ca māne ca samatā'sya hi vartate || 102 ||
[Analyze grammar]

etādṛśasya hṛdaye vāso me sarvadā'sti vai |
asya prapūjanaṃ devā īśvarā vidadhatyapi || 103 ||
[Analyze grammar]

saṃsāriṇāṃ samuddhartā bhavatyayaṃ bhavārṇavāt |
ādhāro jagatāṃ cāyaṃ sāmarthyavān bhavatyapi || 104 ||
[Analyze grammar]

asaṃkhyaguṇakalyāṇairyukto mokṣaṃ dadātyapi |
asya mūrtau mama mūrtirvasatyeva sadā rame || 105 ||
[Analyze grammar]

asyendriyeṣu sarvāṇīndriyāṇi me vasantyapi |
asyā'ntaḥkaraṇe sarvaṃ madantaḥkaraṇaṃ rame || 106 ||
[Analyze grammar]

ataḥ sa sarvalokānāṃ netrādīnāṃ prakāśane |
samartho vartate madvanmama tādātmyayogataḥ || 107 ||
[Analyze grammar]

tathāpi sādhutāsthityā sahate cāvamānakam |
kṣudrajīvakṛtaṃ cāpi kṣamādharmo hi sādhutā || 108 ||
[Analyze grammar]

sa eva tu mahānātmā kṣamā sāmarthyamuttamam |
etādṛśasya me sādhoḥ saṃgamād yāvadarpaṇāt || 109 ||
[Analyze grammar]

sarvāḥ siddhyanti vāñcchāśca svargaṃ mokṣaṃ labheta ca |
paṭhanācchravaṇādasya bhuktiṃ muktiṃ labhed rame || 110 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne śrīhariṇā svaikāntikabhaktānāṃ brahmaniṣṭhataiśvaryādīni kathitānītyādinirūpaṇanāmā navanavatyadhika |
śatatamo'dhyāyaḥ || 199 ||
[Analyze grammar]