Chapter 198

śrīpuruṣottama uvāca |
śṛṇu nārāyaṇīśri tvaṃ nimbadevo dvijottamaḥ |
saurāṣṭre tvabhavad bhaktaḥ sadālayākhyakharvaṭe || 1 ||
[Analyze grammar]

nityaṃ māṃ bhajate bhaktyā dharmajñānavirāgavān |
paropakāranirataḥ sadā dānaparāyaṇaḥ || 2 ||
[Analyze grammar]

ahiṃsāṃ paramaṃ dharmaṃ satāṃ sevāṃ tataḥ param |
hareḥ sevāṃ tato'tyūrdhvāṃ manute cātmaviddhi saḥ || 3 ||
[Analyze grammar]

gavāṃ sevāṃ ca kurute viprasevāṃ yathocitām |
prajāsevāmatithīnāṃ sevāṃ karoti cādarāt || 4 ||
[Analyze grammar]

satyaḥ sādhvyaḥ sādhavaścā'bhyāgatā yātriṇastathā |
ye cā''yānti nijadvāre sevate tān subhāvanaḥ || 5 ||
[Analyze grammar]

annasatraṃ kṛtaṃ tena dīnā'ndhakṛpaṇārthakam |
paśusatraṃ kṛtaṃ tena paṅguvṛddhapaśūpakṛt || 6 ||
[Analyze grammar]

evaṃvidho nimbadevo bhajate māmaharniśam |
mandire mama gatvaiva dhyāyati puruṣottamam || 7 ||
[Analyze grammar]

mārjanaṃ dīpadānaṃ ca dhūpadānaṃ sumārpaṇam |
jalārpaṇaṃ ca naivedyārpaṇaṃ karoti me sadā || 8 ||
[Analyze grammar]

hare kṛṣṇa hare kṛṣṇa kṛṣṇanārāyaṇa prabho |
anādiśrīkṛṣṇanārāyaṇa viṣṇo hare vibho || 9 ||
[Analyze grammar]

evaṃ māṃ kīrtayan yāti mandiraṃ pratiyāti ca |
gṛhaṃ nijaṃ śrāvayaṃśca janān prapāvayan prajāḥ || 10 ||
[Analyze grammar]

atha grāme'bhavattatra vṛṣabho grāmapālitaḥ |
mahākāyo'tibalavān puṣṭaḥ śvetaḥ padāṅkitaḥ || 11 ||
[Analyze grammar]

mahākakughnī ca mahāśṛṃgī ca surūpaśobhitaḥ |
grāmopaśalye divase pippalīchāyite sthale || 12 ||
[Analyze grammar]

niṣīdati kvacid grāme rājapathe'pyaṭatyapi |
rātrau carati kṣetreṣu sasyāni vāṭikāsvapi || 13 ||
[Analyze grammar]

punaḥ prātaḥ samāgatya tiṣṭhati grāmabhūmiṣu |
etādṛśo'yaṃ vṛṣabho yadā yadā prapaśyati || 14 ||
[Analyze grammar]

nimbadevaṃ grāmamadhye mārge kṣetre ca catvare |
upaśalye vāṭikāyāṃ yatra kvāpi prapaśyati || 15 ||
[Analyze grammar]

tāvaddrutaṃ catuṣpādaiḥ raudrarūpo'bhidhāvati |
mārayituṃ nimbadevaṃ mardayituṃ vināśitum || 16 ||
[Analyze grammar]

pūrvavairaṃ smaran yadvanmarākrodhena dhāvati |
vairaniryāpanārthaṃ kiṃ vā'sya pūrvasya janmanaḥ || 17 ||
[Analyze grammar]

evaṃ jāte bahuvāre nimbadevo nijaṃ drutam |
rakṣatyeva ca kauśalyādāpaṇe vā gṛhe viśan || 18 ||
[Analyze grammar]

vedyāmāruhya ca vṛkṣaṃ samāruhyoccasaṃstare |
rakṣatyeva nijaṃ nityaṃ rathyāyāṃ yāti bhītavat || 19 ||
[Analyze grammar]

yatra tiṣṭhati vṛṣabhastāṃ rathyāṃ sa vihāya vai |
anyayā rathyayā yāti kāryārthaṃ tu bahirgṛhāt || 20 ||
[Analyze grammar]

rājamārge catvare vā kṣetre vāṭyāṃ ca gopure |
upaśalye bhūtalādau taddṛṣṭyagre na yāti vai || 21 ||
[Analyze grammar]

evaṃ bhītamanā nityaṃ nimbadevaḥ pravartate |
vṛṣabho'pi sadā nimbadevaṃ sammārgayatyapi || 22 ||
[Analyze grammar]

kadā milenmārayāmi tathāsannaddhavatsthitaḥ |
evaṃ kāle bahugate hyekadā devamandiram || 23 ||
[Analyze grammar]

darśanārthaṃ nimbadevaḥ prayāti yaṣṭivarjitaḥ |
niśāmukhe'tha bhāgyena daivayogāttu sannidhau || 24 ||
[Analyze grammar]

rathyāyāṃ militaścā'yaṃ vṛṣabhastaṃ nirāyudham |
ativegena dudrāva ruṣā sa vṛṣabho balī || 25 ||
[Analyze grammar]

mārayituṃ nimbadevaṃ kurvan gogarjanāṃ tadā |
paścāttu śakaṭaṃ cāyātyeva paścād dvitīyakam || 26 ||
[Analyze grammar]

mārge saṃkucite pārśvayoścāpi nāvakāśakaḥ |
vidyate dhāvituṃ kvāpi vṛṣabho'bhipradhāvati || 27 ||
[Analyze grammar]

eva cobhayataḥpāśe mārge mṛtyupradāyake |
drāgeva nimbadevastu hariṃ sasmāra māṃ tadā || 28 ||
[Analyze grammar]

dadarśa patitaṃ tatra grāvāṇaṃ sudṛḍhaṃ tathā |
karatolyaṃ satvaraṃ taṃ coddhṛtya vai kare balāt || 29 ||
[Analyze grammar]

sarvavegena hastena vṛṣabhasya tu mastake |
tāḍayāmāsa sahasā ghātayāmāsa sarvathā || 30 ||
[Analyze grammar]

bhedayāmāsa śiraso lalāṭaṃ vṛṣabhastadā |
tāḍanena drutaṃ mūrchāmavāpya bhramaṇadvayam || 31 ||
[Analyze grammar]

nipapāta kṣitau tatra mamāra ca kṣaṇāditi |
ātatāyivadhe doṣo nāsti cedaṃ tathā'bhavat || 32 ||
[Analyze grammar]

daṃṣṭriṇāṃ śṛṃgiṇāṃ kvāpi viśvāsaḥ śastriṇāṃ tathā |
vicittānāṃ na kartavyaścaurāṇāṃ kṣuttṛṣārthinām || 33 ||
[Analyze grammar]

rājñāṃ cāpi ca veśyānāṃ śatrūṇāṃ kariṇāṃ tathā |
nakhināṃ tāmasānāṃ ca kāryo viśvāsa eva na || 34 ||
[Analyze grammar]

agnīnāṃ ca jalānāṃ ca grahāṇāṃ svārthināṃ tathā |
kunārīṇāṃ kusādhūnāṃ kāryo viśvāsa eva na || 35 ||
[Analyze grammar]

jīrṇānāṃ cāpi yantrāṇāṃ vāhanānāṃ vinodinām |
hiṃsrāṇāṃ hāsyakartṝṇāṃ kāryo viśvāsa eva na || 36 ||
[Analyze grammar]

yūnāṃ ca rogiṇāṃ krodhāviṣṭānāṃ tyāgināmapi |
bhikṣukāṇāṃ ca mūrkhāṇāṃ kāryo viśvāsa eva na || 37 ||
[Analyze grammar]

apakvaśemuṣīṇāṃ cā'lasānāṃ dharmaghātinām |
nāstikānāṃ ratisthānāṃ kāryo viśvāsa eva na || 38 ||
[Analyze grammar]

aparicitavargāṇāṃ śaṭhānāṃ lobhināṃ tathā |
astrīkāṇāṃ kāmināṃ ca kāryo viśvāsa eva na || 39 ||
[Analyze grammar]

meghānāṃ cātapānāṃ ca rajasāṃ marutāṃ tathā |
tamasāṃ tāmasānāṃ ca kāryo viśvāsa eva na || 40 ||
[Analyze grammar]

mohavatāṃ madavatāṃ bahunamrasvabhāvinām |
antaḥpraveśaṃ dadhatāṃ kāryo viśvāsa eva na || 41 ||
[Analyze grammar]

yātriṇāṃ kṣaṇasārthānāṃ mahīmānādidehinām |
svatantrayoṣitāṃ cāpi kāryo viśvāsa eva na || 42 ||
[Analyze grammar]

sapatnīnāṃ ca duṣṭānāmanavadhānaśālinām |
anākṣāvartamāna nā kāryo viśvāsa eva na || 42 ||
[Analyze grammar]

śraddhāśūnyajanānāṃ ca naṭanartakayoginām |
dyūtasthānāṃ raṇasthānāṃ kāryo viśvāsa eva na || 44 ||
[Analyze grammar]

snehaśūnyahṛdayānāṃ vijātīyopakāriṇām |
nāpitānāṃ madyapānāṃ kāryo viśvāsa eva na || 45 ||
[Analyze grammar]

chidravīkṣāsvabhāvānāmirṣyukāṇāṃ pramādinām |
anabhyastanavīnānāṃ kāryo viśvāsa eva na || 46 ||
[Analyze grammar]

bahumiṣṭavacasāṃ ca nītimārgavirodhinām |
aśāstragāmināṃ cāpi kāryo viśvāsa eva na || 47 ||
[Analyze grammar]

amanaskāṅgīkartṝṇāṃ yaśaḥkīrtivināśinām |
vivādaśālīmanasāṃ kāryo viśvāsa eva na || 48 ||
[Analyze grammar]

luñcāvṛttiprajīvānāmanṛtā'nyāyavartinām |
satyarodhavatāṃ cāpi kāryo viśvāsa eva na || 49 ||
[Analyze grammar]

gahvarāṇāṃ vanānāṃ cāraṇyānāṃ sarasāṃ tathā |
śāntendriyādivṛttīnāṃ kāryo viśvāsa eva na || 50 ||
[Analyze grammar]

asthirāṇāṃ ca dīrghāṇāṃ vāmanānāṃ vilambinām |
kāṇānāṃ cāpi khañjānāṃ kāryo viśvāsa eva na || 51 ||
[Analyze grammar]

saṃkucitapraṇāḍīnāṃ tyaktakuṭumbināṃ tathā |
tyaktadeśaprajānāṃ ca kāryo viśvāsa eva na || 52 ||
[Analyze grammar]

gaṇikānāṃ ca bhāṇḍānāṃ śaraṇāgatayoṣitām |
rājasambandhinārīṇāṃ kāryo viśvāsa eva na || 53 ||
[Analyze grammar]

ativṛṣṭipradeśānāṃ śādvalānāṃ bhuvāṃ tathā |
parvatānāṃ kardamānāṃ kāryo viśvāsa eva na || 94 ||
[Analyze grammar]

ajñātavṛttavaidyānāṃ śmaśānānāṃ tarasvinām |
ajñātānāmoṣadhīnāṃ kāryo viśvāsa eva na || 95 ||
[Analyze grammar]

śatrudāpitabhojyānāṃ śatrudāpitagandhinām |
śatrupreṣitalokānāṃ kāryo viśvāsa eva na || 56 ||
[Analyze grammar]

śanupoṣyaśukānāṃ ca śanupālitapakṣiṇām |
śatrusambadhipatrāṇāṃ kāryo viśvāsa eva na || 57 ||
[Analyze grammar]

atikrodhitapatnīnāmatikrodhitasvāminām |
atibhuktajanānāṃ ca kāryo viśvāsa eva na || 568 ||
[Analyze grammar]

atijīrṇālayānāṃ ca tathā'tijīrṇadehinām |
atijīrṇauṣadhānāṃ ca kāryo viśvāsa eva na || 59 ||
[Analyze grammar]

mantratantraprasaktānāṃ rasāyanapravedinām |
āsurāṇāṃ rakṣasāṃ ca kāryo viśvāsa eva na || 60 ||
[Analyze grammar]

atra mānaṃ tatra mānaṃ ceti mānābhilāṣiṇām |
dvijihvānāṃ caikalānāṃ kāryo viśvāsa eva na || 61 ||
[Analyze grammar]

vidhurāṇāṃ vidhavānāṃ kūṭanīnāṃ ca yoṣitām |
virāgiṇīnāṃ bhūtīnāṃ kāryo viśvāsa eva na || 62 ||
[Analyze grammar]

digbhramāṇāṃ pretabhūtāviṣṭānāṃ vāyurogiṇām |
paracakragatānāṃ ca kāryo viśvāsa eva na || 63 ||
[Analyze grammar]

sarīsṛpāṇāṃ jalināṃ yādasāṃ vakragāminām |
bubhukṣitānāṃ lokānāṃ kāryo viśvāsa eva na || 64 ||
[Analyze grammar]

cārāṇāṃ vanavāsānāṃ pararāṣṭrapraveśinām |
asnigdhānāṃ cāśritānāṃ kāryo viśvāsa eva na || 65 ||
[Analyze grammar]

pratiṣṭhāpitadevānāṃ tāmasānāṃ tu sarvathā |
aparādhātmake kārye kāryo viśvāsa eva na || 66 ||
[Analyze grammar]

āpatkālābhibhūtānāṃ bāliśānāṃ vacassu ca |
svārthasādhakalokānāṃ kāryo viśvāsa eva na || 67 ||
[Analyze grammar]

anekagṛhabhṛtyānāṃ naikanṛpaiḥ suyoginām |
sīmni kṛtālayānāṃ ca kāryo viśvāsa eva na || 68 ||
[Analyze grammar]

rātricarāṇāṃ prasahya hāṭakāṇāṃ ca duḥkhinām |
avijñātacaritrāṇāṃ kāryo viśvāsa eva na || 69 ||
[Analyze grammar]

udvegināṃ virāgāṇāṃ vratināṃ haṭhadharmiṇām |
bāhyavṛttiparāṇāṃ ca kāryo viśvāsa eva na || 70 ||
[Analyze grammar]

śaivālitakṣitīnāṃ ca bhagnanāvāṃ manasvinām |
kṣaṇe ruṣṭapratuṣṭānāṃ kāryo viśvāsa eva na || 71 ||
[Analyze grammar]

dehendriyādisaktānāṃ daityānāṃ parayoṣitām |
samāje bahulokānāṃ kāryo viśvāsa eva na || 72 ||
[Analyze grammar]

utsave cerṣyukāṇāṃ copapatyuścopayoṣitām |
tathaiva copaputrāṇāṃ kāryo viśvāsa eva na || 73 ||
[Analyze grammar]

upamātṝṇāmandhānāṃ vaṇijāṃ ca kutarkiṇām |
mama bhaktivihīnānāṃ kāryo viśvāsa eva na || 74 ||
[Analyze grammar]

rogāṇāṃ ca kṣatānāṃ ca phullānāṃ kampināṃ tathā |
bahusvapnavatāṃ cāpi kāryo viśvāsa eva na || 75 ||
[Analyze grammar]

ajñātānāmaśrutānāmanabhyastādikarmiṇām |
anabhyastapācakānāṃ kāryo viśvāsa eva na || 76 ||
[Analyze grammar]

ardhābhyāsavatāṃ nirmūlānāmapāravarṣmaṇām |
ākāśālambanavatāṃ kāryo viśvāsa eva na || 77 ||
[Analyze grammar]

tatra tatra hi viśvasto duḥkhaṃ kṣatiṃ tathā''padam |
maraṇaṃ vā prayātyeva lakṣmi nāstyatra saṃśayaḥ || 78 ||
[Analyze grammar]

nimbadevastathā matvā jaghāna vṛṣabhaṃ tadā |
gohatyā sā'sya saṃlagnā nimbadevo vicittatām || 79 ||
[Analyze grammar]

upāgamad drutaṃ cāpi kṛṣṇatāṃ kuṣṭharogitām |
yathākathañcit sahasā svālayaṃ samupāyayau || 80 ||
[Analyze grammar]

viprānāhūya hatyāṃ tāṃ nyavedayaddvijā api |
ūcustaṃ viṣṇuyāgārthaṃ prāyaścittaṃ ca vatsaram || 81 ||
[Analyze grammar]

ekabhuktatvamevāpi sahasragopradānakam |
so'pi sarvaṃ pracakre ca yajñānte dakṣiṇāṃ dadau || 82 ||
[Analyze grammar]

tathāpi śyāmavarṇo'sya vicittatā na nirgatā |
atha khedaṃ jagāmāpi prasasmāra ca māṃ harim || 83 ||
[Analyze grammar]

bhaktaṃ jñātvā paraṃ nārāyaṇaścā'haṃ puro'bhavam |
pratyakṣo divyarūpaśca pasparśa taṃ svabāhunā || 84 ||
[Analyze grammar]

drāgeva bhaktaḥ śveto'bhūt sucittaḥ svastha eva ca |
tasmai datto mayā mantrastaṃ jagrāhā'tibhāvataḥ || 85 ||
[Analyze grammar]

bālakṛṣṇo hariḥ sākṣānmokṣado bhagavān mama |
so'pi mantramuvācaivaṃ sarvadā'tha tataḥ sa tu || 86 ||
[Analyze grammar]

prāpte kāle yayau muktiṃ bhakto me nimbadevakaḥ |
evaṃ hatyāghanāśo vai mayā'dhvare'sya vartitaḥ || 87 ||
[Analyze grammar]

nā'śubhaṃ mama bhaktānāṃ tiṣṭhatyeva hi madbalāt |
śṛṇu lakṣmi nimbadevasyā''sīd bhṛtyaḥ sa prāgbhave || 88 ||
[Analyze grammar]

vetanaṃ paripūrṇaṃ ca labdhvā'pi pūrṇakarma saḥ |
karoti naivā'lasaḥ sa pramādī krodhano'pi ca || 89 ||
[Analyze grammar]

jvareṇa sa mṛto bhṛtyo balīvardo babhūva ha |
jātismaro'yaṃ nityaṃ vai yāvat paśyati svāminam || 90 ||
[Analyze grammar]

nityaṃ kārye yojakaṃ svaṃ cādhikṣepiṇamityapi |
dṛṣṭvā dṛṣṭvā vairabhāvaṃ prakāśayati tatra ca || 91 ||
[Analyze grammar]

dhāvatyeva svāminaṃ svaṃ mārayituṃ krudhā ruṣā |
evaṃvidho hi vṛṣabhaḥ svāmihastena vai mṛtim || 92 ||
[Analyze grammar]

prāpya ṛṇaṃ pradātuṃ ca punastasya suto'bhavat |
śobhano jñānavāṃścāpi bahukāryakaro'pi ca || 93 ||
[Analyze grammar]

nimbadevastu vārdhakye sarvaṃ datvā sutāya ha |
bhajate māṃ prabhuṃ nityaṃ kuṭumbena yuto rame || 94 ||
[Analyze grammar]

suto'pi māṃ bhajate ca nāmnā gokulavardhanaḥ |
anne muktiṃ hyavāpāpi bhaktyā me sa suto'pi vai || 95 ||
[Analyze grammar]

evaṃ lakṣmi kṛtā doṣā naśyantyeva pratāpataḥ |
mama bhaktestathā dhyānāt kīrtanāccharaṇāgamāt || 96 ||
[Analyze grammar]

satāṃ sevāprasaṃgācca naśyantyaghāni sarvaśaḥ |
bhaktānāṃ yoṣitāṃ cāpi sādhvīnāṃ sevanādapi || 97 ||
[Analyze grammar]

āśīrvādād vinaśyanti sarvāṇyaghāni sarvaśaḥ |
sarvavighnāni naśyanti sarvāpannāśanaṃ tathā || 98 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne nimbadevākhyabhaktasya gohatyāpāpaṃ bhagavatā nivāritamityādinirūpaṇanāmā aṣṭanavatyadhikaśata |
tamo'dhyāyaḥ || 198 ||
[Analyze grammar]