Chapter 193

puruṣottama uvāca |
śṛṇu nārāyaṇīśri tvaṃ brahmaghnasya pramokṣaṇam |
āsīd vāṭāsīnarākhye grāme rājīvabhūpatiḥ || 1 ||
[Analyze grammar]

rājñī tasyā'bhavat sādhvī nāmnā kundanadevikā |
putrī putravatī dharmaparāyaṇā tapasvinī || 2 ||
[Analyze grammar]

bhaktā me śrīhareścāpi vratadhyānaparāyaṇā |
asūryampaśyā cā'spṛśyā narāntaraiḥ kvacid rame || 3 ||
[Analyze grammar]

pativratyaparā devapūjāsnānāditatparā |
cāturmāsyavratakartrī haryutsavavidhāyinī || 4 ||
[Analyze grammar]

dānadharmaparā cāpi paropakāraśālinī |
sādhusatkārasevārthaṃ kṛtasarvasvamaṃgalā || 5 ||
[Analyze grammar]

dīnānāthagavāṃ sevāvidhātrī sūryapūjikā |
kanyakāmānakartrī ca mamārādhanatatparā || 6 ||
[Analyze grammar]

atithyabhyāgatādibhyo bhojanāmbaradāyinī |
tīrthakartrī svāminaśca pādapūjāparā sadā || 7 ||
[Analyze grammar]

evaṃ saṃskārasampannā nityamālāprajāpinī |
devadarśanaraktā ca nityaṃ kathāśravānvitā || 8 ||
[Analyze grammar]

kṣemaṃ ca kuśalaṃ cāpi vetti yā svaprajāsu vai |
ahiṃsādharmaniratā satyavrataparāyaṇā || 9 ||
[Analyze grammar]

yasyāḥ puṇyena rāṣṭraṃ vai śobhate modate bahu |
prajāścāsyā nirātaṃkā nirāmayāḥ susampadaḥ || 10 ||
[Analyze grammar]

atha lakṣmi suvarṇe vai sugandho na kṛto yathā |
tathā suvarṇabhāryāyāmapi svāmī tvadhogatiḥ || 11 ||
[Analyze grammar]

rājā'syāḥ svapatiḥ krūro na devān manute svacit |
dharmakarmādikaṃ vyarthaṃ jānātyevā'bhimānavān || 12 ||
[Analyze grammar]

na viprānna ca sādhūṃśca gaṇayatyeva dhārmikān |
avamānaṃ karotyeva pūjyānāṃ tvavivekavān || 13 ||
[Analyze grammar]

na snānaṃ naiva dānaṃ ca na pūjāṃ nāpi sadvratam |
na tīrthaṃ nāpi satkāraṃ satkarmāpi karoti saḥ || 14 ||
[Analyze grammar]

devadravyaṃ vipradhanaṃ sādhudhanaṃ ca dhārmikam |
nāṇakaṃ parakīyaṃ yallabhyate balato'pi vā || 15 ||
[Analyze grammar]

āharatyeva lubdhātmā naiva muñcati kasyacit |
stainyād balāt karālluñcāyāśca yuddhāt prapīḍanāt || 16 ||
[Analyze grammar]

kapaṭācchadmato labdhaṃ sarvaṃ nyāyyaṃ sa vetti vai |
anyāyaṃ nyāyamevā'yaṃ jānāti nṛpakarma tat || 17 ||
[Analyze grammar]

prajānāṃ yaddhanaṃ sarvaṃ kṣetraṃ bhūmirgṛhādikam |
vyāpārā āyabhāgāśca prajāśca me dhanaṃ hi tat || 18 ||
[Analyze grammar]

putrāḥ putryo dhenavaśca vṛṣabhā vājino gajāḥ |
yānavāhanapaśavaḥ sarvaṃ rājñaśca vetti saḥ || 19 ||
[Analyze grammar]

rājyaṃ rājño na cānyasya jaḍaṃ vā cetanātmakam |
pṛthvīpatiryato rājā pārthivāśca nṛpasya vai || 20 ||
[Analyze grammar]

pṛthvīṃ bhuṃkte yato rājā tato bhuṃkte hi pārthivān |
sarvāṃścāpi vikārāṃścetyevaṃ manute bhūpatiḥ || 21 ||
[Analyze grammar]

viśeṣatā'sya vipreṣu dveṣaścāsīttu janmataḥ |
viprā vṛthā nayantyeva laḍḍukān dakṣiṇāstathā || 22 ||
[Analyze grammar]

vṛthā bhikṣāṭanāśceti viprāḥ pratyakṣaluṇṭakāḥ |
matvaivaṃ brāhmaṇān dṛṣṭvā niṣkāsayati dūrataḥ || 23 ||
[Analyze grammar]

daṇḍayatyeva bahudhā bhikṣitaṃ cāharatyapi |
śṛṇu lakṣmyekadā viprāstīrthaṃkarāstu viṃśatiḥ || 24 ||
[Analyze grammar]

bahucarāprabhaktāste vāṭāsīnaramāyayuḥ |
mārge viśrāntilābhārthaṃ rājñyā te satkṛtāstadā || 25 ||
[Analyze grammar]

bhojanāmbarapānādyairdakṣiṇādānavāhanaiḥ |
rājñā jñātaṃ dhanaṃ teṣāmagre'pi cāsti vai tadā || 26 ||
[Analyze grammar]

rājñā dattaṃ ca vipulaṃ tīrthamiṣeṇa tatparam |
lobhena nṛpatiḥ śrutvā''hvayad viprān svasannidhau || 27 ||
[Analyze grammar]

luluṇṭa taddhanaṃ sarvaṃ viprāṇāṃ sa tato'pi ca |
kārāgāre ruṣā sarvān nyavāsayacca taddine || 28 ||
[Analyze grammar]

atha viprāstu saṃkruddhāḥ śāpaṃ dadustadolbaṇam |
rājyaṃ tava vinaṣṭaṃ syāt kuṭumbādivivarjitaḥ || 29 ||
[Analyze grammar]

āraṇyakaḥ kāpaṭī ca bhava kṣudro hi bhikṣukaḥ |
phalaṃ viṃśativarṣāṇi bhuktvā ca pāśavīṃ tanum || 30 ||
[Analyze grammar]

prāpya duḥkhāni sarvāṇi bhuṃkṣva nāstika nirdaya |
śāpo datto dine viprai rātrau vaṭodarādhipaḥ || 31 ||
[Analyze grammar]

sasainyastvāyayau yuddhenopāharat samastakam |
rājye nijaṃ deśapālaṃ niyojya nigaḍe sthitān || 32 ||
[Analyze grammar]

viprān vimocayitvā ca rājñyai prādāya jīvikām |
nṛpateśca kuṭumbaṃ ca saṃrakṣya tatra vai tataḥ || 33 ||
[Analyze grammar]

rājīvaṃ dhartumevā'pyanveṣayāmāsa yadyapi |
kintu svanagaraṃ tyaktvā guptamārgeṇa satvaram || 34 ||
[Analyze grammar]

niryayau rājīvabhūpo narmadāvanabhūsthalīm |
viprāṇāṃ śāpadoṣeṇa viṃśativatsarāṇi saḥ || 35 ||
[Analyze grammar]

araṇye pāśavaṃ duḥkhaṃ labdhavān kṣudratānvitam |
atha rājñī bhajate sma saputraputrikā tu mām || 36 ||
[Analyze grammar]

kundanadevītināmnā khyātā kṛṣṇaparāyaṇā |
araṇyastho'pi rājīvo duḥkhito hi svapāpataḥ || 37 ||
[Analyze grammar]

pāpaṃ bahutaraṃ cakre luṇṭanaṃ paśumāraṇam |
evaṃ vane pravasataścaiko viprastu narmadām || 38 ||
[Analyze grammar]

snātuṃ gacchan vane tatra milito'sya samīpagaḥ |
rājīvaścāpi vipraṃ taṃ papraccha vada me'dhunā || 39 ||
[Analyze grammar]

kva yāsi kiṃ tavā'gre'sti dehi sarvaṃ ca me'tra vai |
vipraḥ prāha mamā'gre'sti pātheyaṃ ca dhanaṃ manāk || 40 ||
[Analyze grammar]

yātrāmātropabhogārthaṃ na dāsye te vanecara |
evaṃ vivadatostatra tayoryuddhamajāyata || 41 ||
[Analyze grammar]

rājīvena hato vipro pāṣāṇairmardito hṛdi |
vipro'yaṃ narmadātīre pretastatra vyajāyata || 42 ||
[Analyze grammar]

rājānaṃ prāṇahantāraṃ vavalge brahmaghātinam |
rājā śāpena durbhāgyo'dhiko'tha rakṣasā'rditaḥ || 43 ||
[Analyze grammar]

vicittonmattajaḍavad babhrāmāraṇyabhūmiṣu |
athāpi kundanadevī brahmaśīlaparāyaṇā || 44 ||
[Analyze grammar]

nidrāyāmekadā'raṇye dadarśa taṃ tu duḥkhinam |
kṣudhātṛṣātisantaptaṃ rākṣasāviṣṭayunmadam || 45 ||
[Analyze grammar]

pāśavīṃ vṛttimāpannaṃ rākṣasīṃ rītimāsthitam |
mṛtaṃ paśuṃ ca vā patatriṇaṃ khādantamityapi || 46 ||
[Analyze grammar]

smarantaṃ coccarantaṃ ca kundanā kundaneti ca |
kṛṣṇavarṇaṃ romaśaṃ ca rūkṣajaṭādharaṃ tathā || 47 ||
[Analyze grammar]

anyamiva jñāyamānaṃ vivṛttākhilatattvakam |
śabaraṃ vā pāradhiṃ vā ghātakaṃ śvapacaṃ ca vā || 48 ||
[Analyze grammar]

tadvad vilokyamānaṃ vai bhayadaṃ darśanādapi |
atidurgandhiśarīraṃ malinaṃ jaraṭhaṃ yathā || 49 ||
[Analyze grammar]

kundanā kundanā ceti vyāharantaṃ muhurmuhuḥ |
etādṛśaṃ pāpamūrti vanecaraṃ pravīkṣya sā || 50 ||
[Analyze grammar]

kṣaṇaṃ vicāramakarot svapne ko'yaṃ bhavediti |
atha sā bhayamāpannā prāha kastvaṃ vanāntare || 51 ||
[Analyze grammar]

sa cāha rājīvanāmā kundanāpatirasmyaham |
pīḍitaḥ śāpapāpena rakṣasā'pi viśeṣataḥ || 52 ||
[Analyze grammar]

samuddharet kundanā māṃ tadā me sadgatirbhavet |
yāvacchṛṇoti nidrāyāṃ kundanā nṛpanoditam || 53 ||
[Analyze grammar]

tāvannidrā gatā rājñyāḥ prātaḥ sā prabubodha ha |
utthitā śokamāpannā patiduḥkhena duḥkhitā || 54 ||
[Analyze grammar]

hastāmalakavada dṛśyaṃ vīkṣamāṇā tvarānvitā |
snātvā pupūja sādhvī māṃ śrīpatiṃ kaṣṭahāriṇīm || 55 ||
[Analyze grammar]

śokātiśokavadanottaptātitaptamānasā |
uccāryāśrukṛtāvilanetrā tuṣṭāva māṃ satī || 56 ||
[Analyze grammar]

nātha tvaṃ pūrṇakāmo'si nā''ptavyaṃ ve hi śiṣyate |
tathāpyatra hi saṃsāre kathamāyāsi me vada || 57 ||
[Analyze grammar]

bhaktecchāpūraṇārthaṃ cenmama vāñchāṃ prapūraya |
yadi bhaktā'smi te śiṣyā dāsī veti ca manyase || 58 ||
[Analyze grammar]

mokṣaṇīyo'raṇyaduḥkhād rājīvo rakṣasā dhṛtaḥ |
yadi pāpaprabhogeṇa karmanāśo'sti sarvathā || 59 ||
[Analyze grammar]

dayālo te dayālutvaṃ vyarthaṃ vyarthastavā''gamaḥ |
vyarthā bhaktiśca te sarvā'rthārthino'rthā'prapūraṇāt || 60 ||
[Analyze grammar]

nārī tvarthārthinī hyasmi tathāpi tava dāsikā |
anādiśrīkṛṣṇanārāyaṇoddhāraṃ vidhāpaya || 61 ||
[Analyze grammar]

yadi pāpikṛte kṛṣṇa kṛpā te naiva jāyate |
mama puṇyaṃ dadāmyasmai tena tvaṃ taṃ samuddhara || 62 ||
[Analyze grammar]

yadi brahmapradaṇḍena dagdhe dayā na te'sti cet |
mayi kṛtvā dayāṃ kṛṣṇa matpatiṃ pātumarhasi || 63 ||
[Analyze grammar]

yadi bhūsurahantustu daṇḍaḥ pūrṇo vidhīyate |
tadā taddaṇḍamadhunā mayi yoktuṃ samarthaye || 64 ||
[Analyze grammar]

tasya tvardhāṃganā cāsmi cārdhaśubhāśubhārthinī |
mama bhakterjanyapuṇyaṃ tvardhaṃ tasya pratiṣṭhatu || 65 ||
[Analyze grammar]

tasya pāpaṃ cārdhakarma mamā'trāpi pratiṣṭhatu |
evaṃ nārāyaṇaviṣṇo nyāyena niyamena ca || 66 ||
[Analyze grammar]

api yogyavinimayenāpi taṃ pātumarhati |
āsurāṇāṃ svayaṃ hantā muktido'pi bhavasyataḥ || 67 ||
[Analyze grammar]

rājīvasyāpi bhagavan sukhakṛd bhava keśava |
bhaktāyā mama śāntyarthaṃ madarthitaṃ vibhāvaya || 68 ||
[Analyze grammar]

bhāmākṛte yathā pārijātodyamastvayohyate |
bhāmā'haṃ tava dāsyasmi matpārijātamarthaye || 69 ||
[Analyze grammar]

kalpe kalpe tvayā kṛṣṇa bhāmā tuṣṭā vidhīyate |
pārijātapradānena bhāmā tuṣṭā vidhehi mām || 70 ||
[Analyze grammar]

bhaktyā tvāṃ toṣayāmyatra tvaṃ dānena pratoṣaya |
sevayā strī naraścārthapradānena parasparam || 71 ||
[Analyze grammar]

prasādayataḥ sarvatra tathā tvaṃ kartumarhasi |
sanāthāyā api nātha hyanāthāṃ sthitimīkṣase |
kundanā kundanā ceti rājīvo'raṇyake vadan || 72 ||
[Analyze grammar]

uddhāraṃ tvarthayatyeva samuddhara kṛpāṃ kuru |
yāvannoddhārayase tvaṃ cā'naśane vasāmyaham || 73 ||
[Analyze grammar]

ityuktvā kundanādevī lakṣmi cānaśanaṃ vyadhāt |
ekāsanā nirjalā ca nirāhārā nirāśayā || 74 ||
[Analyze grammar]

jitanidrā jitāhārā maraṇe kṛtaniścayā |
netre pramīlya hṛdaye dhyānasthā sā babhūva ha || 75 ||
[Analyze grammar]

āvartayati mālāyāṃ māṃ jape tvanivartinī |
dhāraṇādhyānavṛttibhyāṃ māṃ babandha hṛdantare || 76 ||
[Analyze grammar]

na cacāla kṣaṇaṃ kvāpi mahāvegadṛḍhīkṛtā |
rājīvamokṣaṇaṃ kāṃkṣamāṇā matparamā'bhavat || 77 ||
[Analyze grammar]

ahaṃ tasyā mano jñātvā patimokṣārthameva tu |
āntarastho bahistūrṇamupāyayau surūpavān || 78 ||
[Analyze grammar]

śaṃkhacakragadāpadmadharo lakṣmīramānvitaḥ |
sarvā''bharaṇabhūṣāḍhyastathā pārṣadasevitaḥ || 79 ||
[Analyze grammar]

prasannavadanaḥ śānto varadānapratatparaḥ |
tejaḥparidhisaṃvyāptavigraho divyabhūṣaṇaḥ || 80 ||
[Analyze grammar]

evaṃvidhaṃ tu māmagre sthitaṃ sā kundanā''ntarāt |
mayā sambodhitā tūrṇaṃ samādherbahirāgatā || 81 ||
[Analyze grammar]

vīkṣya māṃ paramātmānaṃ samutthāya satī drutam |
papāta pādayorme drāk samāśliṣacca vakṣasi || 882 ||
[Analyze grammar]

mama sparśanamātreṇa divyadṛṣṭirvyajāyata |
vyalokayadvane naijaṃ patiṃ svapne vilokitam || 83 ||
[Analyze grammar]

śīghraṃ māṃ lambahastena vyadarśayatpatiṃ nijam |
duḥkhinaṃ rakṣasā vyāptaṃ mokṣayituṃ tadā''rthayat || 84 ||
[Analyze grammar]

ahaṃ tatraiva sahasā patyurmokṣārthameva ha |
garuḍe saṃsthito bhūtvā nītvā sākaṃ ca kundanām || 85 ||
[Analyze grammar]

yatrā''raṇye vartate sa rājīvastatra pakṣiṇā |
āgacchaṃ cāvatīryā'thā'mbarāt sākaṃ tayā rame || 86 ||
[Analyze grammar]

rājīvaṃ tu bhramantaṃ svakamaṇḍalujalena vai |
aprokṣayaṃ tatastatra rakṣo yo valgito'bhavat || 87 ||
[Analyze grammar]

jalaṃ pītvā'tha tūrṇaṃ vai divyadeho babhūva ha |
māṃ stutvā matpratāpena vimānena divaṃ yayau || 88 ||
[Analyze grammar]

rājīvo'pi tadā svasthamanā suṣṭhuprabhānavān |
bhūtvā jñātvā nijāṃ patnīṃ māṃ tathā parameśvaram || 89 ||
[Analyze grammar]

nanāma pādayorme vai praṇanāma ca daṇḍavat |
kundanādevikā tasmai sarvaṃ vṛttaṃ nyavedayat || 90 ||
[Analyze grammar]

tato mayā punarvārbhiḥ prokṣitaḥ pāvano'bhavat |
pāpānāṃ nāśanaṃ cakre'pāyayaṃ vāri matkaraiḥ || 91 ||
[Analyze grammar]

garuḍe taṃ samāropyā''nayaṃ vāṭāsanaṃ puram |
rājñyā mantro dāpitaśca rājā tyaktvā'bhimānakam || 92 ||
[Analyze grammar]

jagrāha mama mantraṃ ca kaṇṭhīṃ ca taulasīṃ tathā |
vaiṣṇavo bhagavadbhakto'bhavaccāstikabhāvanaḥ || 93 ||
[Analyze grammar]

putrāḥ putryastathā sarvāḥ prajāḥ prasannatāṃ gatāḥ |
atha kṣemaṃ tathā teṣāṃ kuśalaṃ samvidhāya ca || 94 ||
[Analyze grammar]

ante mamā'kṣare loke gamanārthaṃ vaco mama |
datvā tirobhavaṃ śīghraṃ vaṭodaranṛpaṃ prati || 95 ||
[Analyze grammar]

agacchaṃ brāhmaṇo bhūtvā bhikṣāmiṣeṇa tatra ha |
yācito'tha sa rājā vai bhāskaravikramābhidhaḥ || 96 ||
[Analyze grammar]

vada vipra pradāsye te yadicchāviṣayaṃ tava |
jagāda mahyaṃ ca tato'rthayaṃ rājīvarakṣaṇam || 97 ||
[Analyze grammar]

vāṭāsīnasya rājyaṃ pratyarpayituṃ punaḥ punaḥ |
rājeśvarastathodāro nṛpastathāstviti drutam || 98 ||
[Analyze grammar]

uktvā patraṃ prāhiṇocca pradhānaṃ prati tadvidham |
rājyaṃ pradāpayāmāsa rājīvāya dvijo'pyaham || 99 ||
[Analyze grammar]

punā rājñyai nṛpataye datvā me darśanaṃ tathā |
tirobhāvaṃ gataścāhaṃ tataḥ kālāntare rame || 100 ||
[Analyze grammar]

rājīvaṃ kundanādevīṃ tathā putrān suputrikāḥ |
vaiṣṇavaṃ tatkuṭumbaṃ ca dhāmā'kṣaraṃ samānayam || 101 ||
[Analyze grammar]

evaṃ mayā purā bhaktyā patnyāścārādhanena vai |
pāpo'pi brahmahāścāpi rājīvo rakṣito vanāt || 102 ||
[Analyze grammar]

rākṣasānmocitaścāpi rākṣaso'pi pramocitaḥ |
rājīvanṛpateḥ sarve kuṭumbaṃ mocitaṃ hyaghāt || 103 ||
[Analyze grammar]

kundanāyāḥ pratāpena vratenā'naśanena vai |
mamā''rādhanabhaktyā ca rājyaṃ svaṃ prāpitaṃ puna || 104 ||
[Analyze grammar]

evaṃ lakṣmi mama bhaktyā bhuktirmuktirbhavediha |
paṭhanācchravaṇāccā'sya bhuktiṃ muktiṃ labhettathā || 105 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne vāṭāsīnāranṛpaterbrahmaghnasya rākṣasābhibhūtasya hṛtarājyasya kundanadevīrājñyāḥ paramabhaktyā bhagavaddarśanaṃ duḥkhamokṣaṇaṃ cetyādinirūpaṇanāmā trinavatyadhikaśatatamo'dhyāyaḥ || 193 ||
[Analyze grammar]