Chapter 190

śrīpuruṣottama uvāca |
śṛṇu nārāyaṇīśri tvaṃ camatkāramayīṃ kathām |
mahāsaurāṣṭradeśīyā bhaktāḥ saṅghagatāḥ śatam || 1 ||
[Analyze grammar]

kuṃkumavāpikākṣetraṃ somanāthaṃ ca raivatam |
svarṇavatīṃ kṛṣṇabhūmiṃ gopanārthaṃ ca sundaram || 2 ||
[Analyze grammar]

evamādīni tīrthāni kartuṃ saurāṣṭramāyayuḥ |
mārge mahīṃ tathā vāpīṃ tīrtvā nāvā tataḥ param || 3 ||
[Analyze grammar]

sābhramatīṃ samuttīrya gopanāthaṃ samāyayuḥ |
tato guptaprayāgaṃ ca kṛtvā siṃhavanaṃ mahat || 4 ||
[Analyze grammar]

praviśya yāvadāyānti somanāthaṃ prati drutam |
siṃhāraṇye tadā prāptā luṇṭakāḥ śastradhāriṇaḥ || 5 ||
[Analyze grammar]

luṇṭakādhipatisteṣu nāmnā sāmāntavikramaḥ |
aśvavāraiśca sahitaḥ śastrādiyugbhaṭānvitaḥ || 6 ||
[Analyze grammar]

yantranādānakarodvai sannidhau nā'tidūragaḥ |
ākrośān bhayadāṃścāpi cakrustasyānugāminaḥ || 7 ||
[Analyze grammar]

luṇṭanārthaṃ drutaṃ saṃghasyā'bhito bandhanaṃ vyadhuḥ |
madhye cakrurbhayadānaiḥ saṃghasya śatamānavān || 8 ||
[Analyze grammar]

strīṇāṃ bhūṣā narāṇāṃ ca bhūṣādravyāṇi yāni ca |
uttārayitvā tvekatra kārayāmāsurulbaṇāḥ || 9 ||
[Analyze grammar]

śubhāmbarāṇi sarvāṇi jagṛhuḥ saṃghavartinām |
saṃghāgragaṇyavaṇijo babandhū rajjubhistadā || 10 ||
[Analyze grammar]

padmacandraṃ śaṃkhacandraṃ śṛṃkhalācandramityapi |
vanacandraṃ vālicandraṃ babandhuste hi luṇṭakāḥ || 11 ||
[Analyze grammar]

anyān daṇḍaistāḍanādi pracakrurbhayahetave |
bhītāste vaṇijaḥ sarve maunā babhūvurarditāḥ || 12 ||
[Analyze grammar]

daduḥ sarvasvametebhyo luṇṭakebhyo'titāḍitāḥ |
athaiteṣu mama bhakto vaiṣṇavo vanacandrakaḥ || 13 ||
[Analyze grammar]

tasya patnī sukhādevī mama bhaktā'bhavad rame |
ābālyāttau mama bhaktau bhajato māṃ nirantaram || 14 ||
[Analyze grammar]

sādhorme sāyanāyananāmno yogena vaiṣṇavau |
vartete tau bhaktiyuktau kṛṣṇanārāyaṇāśritau || 15 ||
[Analyze grammar]

āpatkāle tu tau bhaktau sasmaratustadā hi mām |
anye'pi bālagopālā ruruduḥ sasmaruḥ prabhum || 16 ||
[Analyze grammar]

luṇṭakebhyo harekṛṣṇa prarakṣaya hi tīrthinaḥ |
anāthānāṃ vane kṛṣṇanāthanārāyaṇo bhavān || 17 ||
[Analyze grammar]

trātā mocayitā duḥkhād rakṣayitā pitā bhavān |
mātā gururharikṛṣṇo bālakṛṣṇaḥ prarakṣatu || 18 ||
[Analyze grammar]

yato vayaṃ kṛtapāpā luṇṭyante'to vanāntare |
tathāpi nijabhaktānāṃ rakṣāṃ vidhehi mādhava || 19 ||
[Analyze grammar]

tava bhaktiṃ kariṣyāmo dānaṃ dāsyāma eva te |
sarvasvaṃ bhagavan viṣṇo rakṣa kṛṣṇanarāyaṇa || 20 ||
[Analyze grammar]

kuṃkumavāpikātīrthe'rpayiṣyāmo dhanādikam |
yadi luṇṭakaduṣṭebhyo rakṣāṃ nastvaṃ vidhāsyasi || 21 ||
[Analyze grammar]

vibhūṣaṇāni sarvāṇi śreṣṭhāmbarāṇi yāni ca |
rūpyakāḥ svarṇamudrāśca dāsyāmo'śvasarovare || 22 ||
[Analyze grammar]

vrataṃ kārtikamāsādya kariṣyāmo phalādibhiḥ |
nityaṃ śataṃ mālikāścā''vartayiṣyāma eva ca || 23 ||
[Analyze grammar]

satāṃ maṭheṣu vai māsaṃ māsaṃ sthitvā tu māghake |
māse sevāṃ kariṣyāmaḥ satāmājñānusāriṇīm || 24 ||
[Analyze grammar]

ityevaṃ vanacandrādyā ārttā luṇṭakadharṣitāḥ |
mānatā vividhāścakrurluṇṭhakebhyo vimuktaye || 25 ||
[Analyze grammar]

vanacandrasya bhāryā'pi sukhādevī tathā striyaḥ |
yā yāḥ saṃghagatāścāsan prārthayāmāsureva mām || 26 ||
[Analyze grammar]

he hare he vanavāsin vṛndāvanavihārakṛt |
gopīsaṃghāntaragupta kṛṣṇa rakṣa svadāsikāḥ || 27 ||
[Analyze grammar]

abalānāṃ sabalo'si bhaktānāṃ bhagavānasi |
dāsīnāṃ modakartā'si kṛṣṇa rakṣaya dāsikāḥ || 28 ||
[Analyze grammar]

vane gopīvihāro'si rādhāsakho'si nirjane |
śayane kamalānanda kṛṣṇa rakṣaya dāsikāḥ || 29 ||
[Analyze grammar]

pralaye muktasevyo'si sṛṣṭau bhaktimatīpatiḥ |
rāse sarvānurakto'si kṛṣṇa rakṣaya dāsikāḥ || 30 ||
[Analyze grammar]

vipattau cārttadīneśa śaraṇāgatarakṣaka |
arātikaṣṭahartastvaṃ kṛṣṇa rakṣaya dāsikāḥ || 31 ||
[Analyze grammar]

garbhe bhrūṇasya poṣṭā tvaṃ bālye nirmalahṛtsthitaḥ |
yauvane premapātraṃ tvaṃ kṛṣṇa rakṣaya dāsikāḥ || 32 ||
[Analyze grammar]

vārdhakye śiṣṭavarya tvaṃ yuddhe jayapradaḥ pumān |
nirāśraye tvaṃ cādhāraḥ kṛṣṇa rakṣaya dāsikāḥ || 33 ||
[Analyze grammar]

rohiṇāṇḍāsuraḥ pūrvamanādidyunarāyaṇaḥ |
bhūtvā niṣūditaḥ kṛṣṇa tvayā naḥ sa prarakṣatu || 34 ||
[Analyze grammar]

anādiśrīmerunārāyaṇastvaṃ cā'bhavaṃ purā |
nimnaṃ tu patamānasya meroḥ rakṣā tvayā kṛtā || 35 ||
[Analyze grammar]

sūryāgninā dahyamānabrahmāṇḍasya tvayā purā |
rakṣā śāntiḥ kṛtā'nādiviṣṇunārāyaṇātmanā || 36 ||
[Analyze grammar]

dhūmrāsuravināśaśca candrarakṣā tvayā purā |
vihitā śrīhare'nādidevanārāyaṇātmanā || 37 ||
[Analyze grammar]

tvayā'nādiyajñanārāyaṇa yajñāḥ pravartitāḥ |
rudraśāstā'nādibrahmanārāyaṇo hyabhūḥ purā || 38 ||
[Analyze grammar]

devadhiṣṇyaniyamāyā'nādyā''dityanarāyaṇaḥ |
bhavān purā''bhavat kṛṣṇa kṛṣṇa rakṣaya dāsikāḥ || 39 ||
[Analyze grammar]

nāgaśāstā'nādigarutmannārāyaṇarūpavān |
dhruvasthityai bhavānanādyārṣanārāyaṇo'bhavat || 40 ||
[Analyze grammar]

ṣurānandādidaityānāṃ parābhūtyarthameva ha |
tvamanādiprājñanārāyaṇo'bhavaḥ pareśvara || 41 ||
[Analyze grammar]

tvamanādivīranārāyaṇo'bhavo vṛṣāvanaḥ |
tvamanādibhadranārāyaṇo dagdhapramuktaye || 42 ||
[Analyze grammar]

tuṃgabhadrāsanāputrīpatirharinarāyaṇaḥ |
abhavastvaṃ purā kṛṣṇa kṛṣṇa rakṣaya dāsikāḥ || 43 ||
[Analyze grammar]

nāśārthaṃ kośastenākhyarakṣasastvaṃ purā'bhavaḥ |
anādiśrībījanārāyaṇo bījasya rakṣakaḥ || 44 ||
[Analyze grammar]

dharmavratasya putrāṇāṃ mokṣārthaṃ tvaṃ purā'bhavaḥ |
anādiśrīvaranārāyaṇo nā kṛṣṇa rakṣatu || 45 ||
[Analyze grammar]

sudarśanīmahāsādhvīśāpena strīmayaṃ jagat |
rakṣārthaṃ tvamanādistrīpuṃnārāyaṇatāmagāḥ || 46 ||
[Analyze grammar]

anādiśrījalanārāyaṇastvaṃ mākarāsuram |
hatvā lokānarakṣaḥ śrīkṛṣṇa rakṣaya dāsikāḥ || 47 ||
[Analyze grammar]

anādiśrīśīlanārāyaṇastvamabhavaḥ purā |
sādhudharmaprarakṣārthaṃ kṛṣṇa rakṣaya dāsikāḥ || 48 ||
[Analyze grammar]

anādiśrīvārdhinārāyaṇastvamabhavaḥ purā |
vyāghrānalādināśārthaṃ kṛṣṇa rakṣaya dāsikāḥ || 49 ||
[Analyze grammar]

tvamanādicaturmukhanārāyaṇo'bhavaḥ purā |
rādhanikāpuṇyarātaviprayoriṣṭado bhavān || 50 ||
[Analyze grammar]

abhavacchrīchrīpuruṣottamanārāyaṇaḥ purā |
tīrthapūtyarthamanāditīrthanārāyaṇo'bhavaḥ || 51 ||
[Analyze grammar]

bhaktyarthaṃ tvamanādiśrījīvanārāyaṇo'bhavaḥ |
yajñe tvaṃ śrīmadardhaśrīśvaranārāyaṇo'bhava || 52 ||
[Analyze grammar]

pitruddhartā'nādyardhaśrīpitṛnārāyaṇo'bhavaḥ |
bhaktyā mokṣopadeśārthaṃ plakṣanārāyaṇo'bhavaḥ || 53 ||
[Analyze grammar]

naramedhebhaktarakṣāmanādipuṃnarāyaṇaḥ |
bhūtvā'karostvaṃ deveśa kṛṣṇa rakṣaya dāsikāḥ || 54 ||
[Analyze grammar]

sūryavarccanṛpadvārā'nādiśyāmanarāyaṇaḥ |
abhavastvaṃ purā kṛṣṇa kṛṣṇa rakṣaya dāsikāḥ || 55 ||
[Analyze grammar]

anādiśrīrājanārāyaṇastvaṃ cā'bhavaḥ purā |
māyūrakā'surahantā kṛṣṇa rakṣaya dāsikāḥ || 56 ||
[Analyze grammar]

anādiśrībrahmacārinārāyaṇo'bhavaḥ purā |
naiṣṭhikatārakṣaṇārthaṃ kṛṣṇa rakṣaya dāsikāḥ || 57 ||
[Analyze grammar]

hallakāsuranāśārthaṃ śivojjīvārthamityapi |
anādiśrīśivanārāyaṇastvaṃ cā'bhavaḥ purā || 58 ||
[Analyze grammar]

anādiśrīsvarṇanārāyaṇastvaṃ cā'bhavaḥ purā |
kuberasyojjīvanārthaṃ kṛṣṇa rakṣaya dāsikāḥ || 59 ||
[Analyze grammar]

jvālāruṇā'calavahnirasadagdhaprajā'vanam |
anādiśrīsvāminārāyaṇastvaṃ cā'karoḥ purā || 60 ||
[Analyze grammar]

nirvāṇikā''rādhitayā lakṣmyā sākaṃ bhavān purā |
anādisā'vananārāyaṇo'bhavat sa rakṣatu || 61 ||
[Analyze grammar]

aṃśukramathanṛpaterbhaktyā tvamabhavaḥ purā |
anādiśrīsādhunārāyaṇaḥ kṛṣṇaḥ sa rakṣatu || 62 ||
[Analyze grammar]

śaptasya varṇiśālasya manorujjīvanāya vai |
anādiśrībhaktanārāyaṇo'bhavaḥ sa pātu naḥ || 63 ||
[Analyze grammar]

varmadharakṣmeśamokṣārthaṃ tvaṃ purā svayaṃ prabhuḥ |
anādiśrīmedhanārāyaṇo'bhavaḥ sa pātu naḥ || 64 ||
[Analyze grammar]

analādamahāsuravināśārthaṃ bhavān purā |
anādiśrīvahninārāyaṇo'bhavat sa pātu naḥ || 65 ||
[Analyze grammar]

ilodaravināśārthaṃ rasanārāyaṇo'bhavaḥ |
sa tvaṃ nārāyaṇakṛṣṇakṛṣṇa rakṣaya dāsikāḥ || 66 ||
[Analyze grammar]

anādiśrīcakranārāyaṇastvaṃ cā'bhavaḥ purā |
daityanāśakaraḥ kṛṣṇakṛṣṇa rakṣaya dāsikāḥ || 67 ||
[Analyze grammar]

kṛtadharmasthāpanāyā'nādisatyanarāyaṇaḥ |
adristhityarthamanādiśrīhiraṇyanarāyaṇaḥ || 68 ||
[Analyze grammar]

bhaktārthaṃ tvamanādiśrīnairañjaninarāyaṇaḥ |
anādiśrīpuṇyanārāyaṇaścā'pyabhavaḥ purā || 69 ||
[Analyze grammar]

puṇyavatīśāpanivartakaḥ kṛṣṇaḥ sa pātu naḥ |
anādiśrībṛhadbrahmanārāyaṇo'bhavad bhavān || 70 ||
[Analyze grammar]

apsarasāṃ manaḥpūrtyai kṛṣṇa rakṣaya dāsikāḥ |
anādiśrīgurunārāyaṇastvaṃ cā'bhavaḥ purā || 71 ||
[Analyze grammar]

brahmavidyāpradānārthaṃ kṛṣṇa rakṣaya dāsikāḥ |
bṛhaddharmabhūpayajñe sādhudīkṣāpradāyakaḥ || 72 ||
[Analyze grammar]

anādiśrīmadācāryanārāyaṇaḥ sa pātu naḥ |
anādiśrīmahāvidyunnārāyaṇo'bhavaḥ purā || 73 ||
[Analyze grammar]

vidyutstāvadaityahantā kṛṣṇa rakṣaya dāsikāḥ |
anādiśrīmadhunārāyaṇastvaṃ cā'bhavaḥ purā || 74 ||
[Analyze grammar]

madhubhakṣā'surahantā kṛṣṇa rakṣaya dāsikāḥ |
anādiśrīnāthanārāyaṇastvaṃ cā'bhavaḥ purā || 75 ||
[Analyze grammar]

tiṣye daityavināśārthaṃ kṛṣṇa rakṣaya dāsikāḥ |
anādiśrīvibhunārāyaṇastvaṃ cā'bhavaḥ purā || 76 ||
[Analyze grammar]

svarṇotsave vedhasaḥ sa kṛṣṇa rakṣaya dāsikāḥ |
anādiśrīmokṣanārāyaṇastvaṃ cā'bhavaḥ purā || 77 ||
[Analyze grammar]

anādiśrīkṛṣṇanārāyaṇastvaṃ kāntakeśava |
brahmapriyādisvāminno luṇṭakebhyaḥ prarakṣaya || 78 ||
[Analyze grammar]

bālakṛṣṇa hare kṛṣṇa vallabheśa kṛpāṃ kuru |
luṇṭakebhyo'vanaṃ śīghraṃ kuru te śaraṇaṃ gatāḥ || 79 ||
[Analyze grammar]

ityuktvā tāḥ striyaścāpi lakṣmi dhyānaṃ vyadhurhareḥ |
ahaṃ hariḥ svayaṃ tatrā''gatyā'dṛśyo'bhavaṃ kṣaṇam || 80 ||
[Analyze grammar]

śṛṇvānaḥ stutivākyāni mama prākcaritāni vai |
luṇṭakāśca saṃcinvanti tvekatra nāṇakādikam || 81 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne mahāsaurāṣṭrayīsaṃghasya luṇṭakajanapradharṣitasya stavanamitinirūpaṇanāmā navatyadhikaśatatamo'dhyāyaḥ || 190 ||
[Analyze grammar]