Chapter 182

śrīpuruṣottama uvāca |
ākarṇaya kathāṃ nārāyaṇīśri tvaṃ tathā'parām |
āsīt karṇapure rājā pṛthvīdharābhidhaḥ purā || 1 ||
[Analyze grammar]

khaṇḍarājyaṃ pālayan sa prajāṃ rarakṣa dharmataḥ |
prātaryasyāṃ'gaṇe nityaṃ bhikṣukāstu śatādhikāḥ || 2 ||
[Analyze grammar]

tṛpyanti tvannalābhena hyanāthā bālabālikāḥ |
hyanāthā vidhavāścāpi bhuṃjate'syā'nnasatrake || 3 ||
[Analyze grammar]

viṣṇostu mandire gatvā rājā pṛthvīdharaḥ svayam |
nārāyaṇasya mūrtervai pūjanaṃ tulasīdalaiḥ || 4 ||
[Analyze grammar]

sahasraikamitairnityaṃ karoti viṣṇave namaḥ |
vadan dhyāyan smaran māṃ vai śrīpatiṃ puruṣottamam || 5 ||
[Analyze grammar]

dhūpaṃ dīpaṃ ca naivedyaṃ jalaṃ tāmbūlakaṃ tathā |
nīrājanaṃ stutiṃ pradakṣiṇāṃ kṛtvā ca daṇḍavat || 6 ||
[Analyze grammar]

śatarūpyakadānaṃ cāmbarāṇāṃ śatakaṃ tathā |
ekāṃ gāṃ ca dadātyeva dāne nityaṃ tataḥ param || 7 ||
[Analyze grammar]

puṣpāñjaliṃ śrīharaye datvā yāti nijālayam |
evaṃ māṃ bhajate nityaṃ manniveditabhojanaḥ || 8 ||
[Analyze grammar]

vartate sma sadā bhakto hiṃsāvyavāyavarjitaḥ |
yasya puṇyaṃ purājanmakṛtaṃ tasya tu bhaktatā || 9 ||
[Analyze grammar]

dharme matiśca bhavati satyapi rājyavaibhave |
evaṃ lakṣmi sadā pṛthvīdharaḥ kṛtvā śubhāhnikam || 10 ||
[Analyze grammar]

yāti nyāyālayaṃ tatra dadātyeva ca nirṇayam |
atha sāyaṃ nityameva kathāṃ śṛṇoti māmakīm || 11 ||
[Analyze grammar]

lakṣmīnārāyaṇasaṃhitāyāḥ satāṃ sabhāgataḥ |
santo'sya sādhavo dhīrāḥ chindanti saṃśayān bahūn || 12 ||
[Analyze grammar]

satāṃ pādajalānāṃ ca pānaṃ gṛhṇāti bhūpatiḥ |
kathānte kīrtanaṃ vādyasahitaṃ prakaroti saḥ || 13 ||
[Analyze grammar]

sahasraśo janā nāryo narāḥ kurvanti kīrtanam |
hare kṛṣṇa hare kṛṣṇa bālakṛṣṇa hare hare || 14 ||
[Analyze grammar]

hare viṣṇo hare jiṣṇo'nādikṛṣṇa hare hare |
evaṃvidhaṃ bhajanaṃ te satālādyaṃ pracakrire || 15 ||
[Analyze grammar]

atha santaḥ prayāntyeva maṭheṣu ca nṛpastataḥ |
sāyaṃ devārcanaṃ kṛtvā labdhvā sadbhojanaṃ tataḥ || 16 ||
[Analyze grammar]

dhyānamagno bhavatyeva mālāmāvartayanmama |
anādiśrīkṛṣṇanārāyaṇetyevaṃ japanmuhuḥ || 17 ||
[Analyze grammar]

svapityeveti rājā'pi sādhucaryāṃ prasevate |
asya rājñī madhuvindānāmnī bhaktā tu vaiṣṇavī || 18 ||
[Analyze grammar]

pātivratyānvitā yadvat sādhvī viprā satī yathā |
bhajate māṃ parātmānaṃ matvā saṃsāramulbaṇam || 19 ||
[Analyze grammar]

bandhanaṃ duḥkhadoṣāḍhyaṃ vāsanāvāsitaṃ kṣayam |
nityaṃ tu paramātmānaṃ muktiṃ cātmānameva sā || 20 ||
[Analyze grammar]

manute mokṣadātṝṃśca sato janān prasevate |
śāntaśīlā nṛpavatsā bhajate māṃ janārdanam || 21 ||
[Analyze grammar]

yathā rājā tathā lakṣmi prajā guṇavatī bhavet |
asya putrādayaścāpi bhejire māṃ śriyaḥ patim || 22 ||
[Analyze grammar]

prajāḥ sarvāḥ sarvavarṇā bhajante sma ca māṃ tathā |
dānaṃ kurvanti ca japaṃ kurvanti sma prasevanam || 23 ||
[Analyze grammar]

satāṃ ca sādhuvāsādau mārjanādi dadhatyapi |
evaṃ vai vartamānānāṃ vaiṣṇavānāṃ nirantaram || 24 ||
[Analyze grammar]

prasanno bhagavānnāste parjanyaścāpi varṣati |
sampadaḥ sampramodante yathā lakṣmyaḥ sacetanāḥ || 25 ||
[Analyze grammar]

dhenavaḥ kāmavarṣiṇyo vṛkṣāśca phaladāyinaḥ |
sasyāni kaṇadānyeva rasadā ca rasā'bhavat ||26 || || 5 ||
[Analyze grammar]

mama bhaktasya tasya śri ripavo nā'bhavaṃstathā |
ītayo nā'bhavaṃścāpi sukhāḍhyaḥ so'bhavannṛpaḥ || 27 ||
[Analyze grammar]

tasya putro'bhavat kāle janmāndhaḥ prathamaḥ sutaḥ |
janmotsavāḥ kṛtāstena yathākālaṃ sutaḥ sa tu || 28 ||
[Analyze grammar]

netre noddhāṭayatyeva janmāndho vidito'bhavat |
rājñā viṣṇoranuṣṭhānaṃ kṛtaṃ vai vaiṣṇave makhe || 29 ||
[Analyze grammar]

cakṣuṣoruddhāṭanārthaṃ sūryacandraprapūjanam |
ghṛtasya dīpadānaṃ cā'khaṇḍitaṃ devamandire || 30 ||
[Analyze grammar]

kṛtaṃ ca vatsaraṃ tasya gataṃ cāndhye tato nṛpaḥ |
āśāṃ vihāya sahasā tapasyeva mano'karot || 31 ||
[Analyze grammar]

rājasaudhaṃ vihāyaivodyāne vṛkṣaghaṭāntare |
chāyāyāṃ cāsanaṃ kṛtvā niṣasāda tapasyayam || 32 ||
[Analyze grammar]

mālāmāvartayatyeṣo raṭan kṛṣṇanarāyāṇam |
phalāhāro'bhavad rājā tvekabhukto hi nirjane || 33 ||
[Analyze grammar]

śālagrāmaṃ puro dhṛtvā bhajate māṃ smaratyapi |
valkalāmbara evāpi mṛgacarmāsanastathā || 34 ||
[Analyze grammar]

sarvabhogavihīnaśca putranetrasamīhanaḥ |
divārātrau bhajate māṃ tatrāśrame drumālaye || 35 ||
[Analyze grammar]

varṣā śaityamātapaṃ ca sahate bhajate ca mām |
pūjāṃ karoti bhāvena śālagrāmasya me nṛpaḥ || 36 ||
[Analyze grammar]

karoti triṣavaṇaṃ ca sūryaṃ namaskaroti ca |
pañcakeśī pitṛpūjī samvatsaraṃ vyavartata || 37 ||
[Analyze grammar]

evaṃ varṣottare rājā rātrau dhyātvā tu māṃ muhuḥ |
astaut kṛṣṇa tava nāma hariḥ duḥkhaharaṃ hi tat || 38 ||
[Analyze grammar]

kathaṃ bhaktasya me duḥkhaṃ naiva harasi mādhava |
kartumakartumanyathākartuṃ śakto'si sarvathā || 39 ||
[Analyze grammar]

puṇyaṃ yattattava kṛṣṇa prasannatā hyanugrahaḥ |
pāpaṃ yattattava kṛṣṇa prātikūlyaṃ hyudāsitā || 40 ||
[Analyze grammar]

yadi bhaktaṃ prati caivamaudāsīnyaṃ pradarśyase |
kā gatistarhi bhaktasya tyaktasya rakṣakena vai || 41 ||
[Analyze grammar]

rakṣāṃ kuru sutasyāpi cakṣurdānena mādhava |
pāpaṃ vidhūya tasyaiva sadṛṣṭiṃ taṃ vidhāpaya || 42 ||
[Analyze grammar]

ityuktvā daṇḍavaccakre śrutvāhaṃ prārthanāṃ drutam |
tapo vilokya putrasya netrārthaṃ tvāgato'bhavam || 43 ||
[Analyze grammar]

jaṭilo daṇḍavān sādhurbhasmākto mṛgacarmavān |
kamaṇḍaluṃ kare dhṛtvā'dṛśye vai vṛkṣamaṇḍale || 44 ||
[Analyze grammar]

hare nārāyaṇa viṣṇo vadan satsannidhau yayau |
jayo'stu yoginaḥ kṣitipatestāpasaveṣiṇaḥ || 45 ||
[Analyze grammar]

ityahaṃ śabdamuccārya kamaṇḍalujalaṃ śubham |
dadau tasmai sa rājā'pi vismayaṃ paramaṃ gataḥ || 46 ||
[Analyze grammar]

ākasmikaḥ sādhuveṣaścātithiḥ kuta āgataḥ |
bhavedvā me manaḥpūrtikaro divyo'yamacyutaḥ || 47 ||
[Analyze grammar]

atithiḥ pūjanīyo vai sādhustatra viśeṣataḥ |
vicāryetthaṃ samutthāya rājā papāta pādayoḥ || 48 ||
[Analyze grammar]

āsanaṃ pradadau cārghyaṃ madhuparkaṃ dadau tathā |
pūjanaṃ pracakārāpi puṣpagandhaphalādibhiḥ || 49 ||
[Analyze grammar]

namaskāraṃ vidhāyā'tha papracchāgamanaṃ prati |
dhanyo'haṃ kṛtakṛtyo'haṃ sādhujanasya darśanāt || 50 ||
[Analyze grammar]

tīrtharūpaṃ paraṃ vāri prāptaṃ yasya kamaṇḍaloḥ |
darśanaṃ pāvanaṃ labdhaṃ sarvendriyapavitrakṛt || 51 ||
[Analyze grammar]

sparśanaṃ pāpahāraṃ ca labdhaṃ sādhupadasya ha |
sevanaṃ ca prasādaṃ ca lapsye'dya bhāgyavaibhavāt || 52 ||
[Analyze grammar]

kṛpayā cāpi ca divyānugrahāt puṇyasañcayāt |
ityuktvā maunamāsthāya tasthāvagre kṛtāñjaliḥ || 53 ||
[Analyze grammar]

ahaṃ sādhusvarūpaścā'vadaṃ śreyoyuto bhava |
kuśalaṃ te bhūpa kiṃvā brūhi tapasi kāraṇam || 54 ||
[Analyze grammar]

rājovāca hi sādhūnāṃ kṛpayā kuśalaṃ mama |
putravān dhanavānasmi bhaktimānasmi sādhuṣu || 55 ||
[Analyze grammar]

tathāpyakuśalaṃ cāste putraḥ paśyati naiva me |
janmāndho vidyate sādho vad kiṃ kāraṇaṃ bhavet || 56 ||
[Analyze grammar]

tasya vai dṛṣṭimatvārthaṃ tapaḥ karomi mādhave |
ārādhanātmakaṃ nānyakāṃkṣā me vartate prabho || 57 ||
[Analyze grammar]

putro'cakṣurbhaved yasya rājyamandhaṃ tu tasya vai |
anandhasya gṛhe cā''ndhyaṃ vaṃśe cāndhyaṃ hi duḥkhadam || 58 ||
[Analyze grammar]

āndhyametat kathaṃ dūraṃ yāyājjānāsi darśaya |
kṛtakṛtyo bhavāmyevaṃ sādhoste'tra samāgamāt || 59 ||
[Analyze grammar]

sādhūnāṃ vacanaṃ divyaṃ satyārthaṃ siddhidaṃ sadā |
sādhūnāṃ hṛdayaṃ saumyaṃ sarvaduḥkhaharaṃ khalu || 60 ||
[Analyze grammar]

sādhūnāṃ darśanaṃ puṇyaṃ sevanaṃ mokṣadaṃ tathā |
sarvāśāpūrakaḥ sādhoranugrāhaḥ samarjitaḥ || 61 ||
[Analyze grammar]

ityuktvā virarāmā'sau lakṣmi cā'haṃ tadā'vadam |
śṛṇu rājaṃstava putraḥ pūrvajanmani tāpasaḥ || 62 ||
[Analyze grammar]

yathā'haṃ tāpasaveṣastathā sa tāpaso'bhavat |
nāmnā durvoḍhako vipro daridro rājyavā़ñchayā || 63 ||
[Analyze grammar]

akarot sa tapo revātaṭe tīrthe tu śuklake |
bahavo yatra cāyānti yānti tīrthārthimānavāḥ || 64 ||
[Analyze grammar]

narā nāryastatra tīrthe snānti prayānti pārśvataḥ |
durvoḍhakaḥ prapaśyan vai tapaḥsthale pratiṣṭhati || 65 ||
[Analyze grammar]

balavaccendriyaṃ lakṣmi mānasaṃ balavattathā |
viṣaye purato yāte cāgate cañcalaṃ bhavet || 66 ||
[Analyze grammar]

tannirodhastāpasena kartavyaḥ sarvadā rame |
indriyāṇāṃ manasaścā'niroghe niṣphalaṃ tapaḥ || 67 ||
[Analyze grammar]

pramāthi mānasaṃ kasmin kṣaṇe neṣyati duṣpatham |
niścayaścāpi viśvāso nāsti tanmanasaḥ sadā || 68 ||
[Analyze grammar]

ekadā tvaṃ svayaṃ rājā tīrthārthaṃ sakuṭumbakaḥ |
yathāpekṣitavastvāḍhyaḥ parimeyapuraḥsaraḥ || 69 ||
[Analyze grammar]

gato revāṃ prati śuklatīrthaṃ snātuṃ tu parvaṇi |
yatrā'yaṃ tāpasaḥ sādhurviprastapati tatsthale || 70 ||
[Analyze grammar]

manāg dūre cāmravaṇe tvaṃ nivāsaṃ tadā'karoḥ |
jñātvā tapasvinaṃ sādhuṃ jaṭilaṃ tvaṃ ca tatpuraḥ || 71 ||
[Analyze grammar]

sapatnīko namaskāramakaroḥ pūjanaṃ tathā |
phalādikaṃ cā''rpayaśca rājñī ca bhāvapūritā || 72 ||
[Analyze grammar]

sādhoścaraṇau prakṣālya jalaṃ papau tava priyā |
rūpayauvanasaundaryapuṣṭiśṛṃgāraśālinīm || 73 ||
[Analyze grammar]

vīkṣya tāṃ moha utpanno viprasyā'sya tapasvinaḥ |
sakāmaṃ cāpi pracchannaṃ cakṣurdvayaṃ prayojitam || 74 ||
[Analyze grammar]

tena vipreṇa śiṣyāyāṃ rājñyāṃ tadā tu tīrthake |
puṇyāyāṃ sevikāyāṃ ca tathaiva rājamātari || 75 ||
[Analyze grammar]

sakāmastapasi dṛbdho rājyārthaṃ lālasānvitaḥ |
ajitendriyacittaśca dṛṣṭipāpaṃ tadā vyadhāt || 76 ||
[Analyze grammar]

bhavanti khalu jātyandhā janmāndhā rāgiṇastu te |
parastriyāṃ tu ye mugdhā duṣṭacakṣuḥ prayuñjate || 77 ||
[Analyze grammar]

evametasya viprasya tāpasasya tadā khalu |
rūpasaundaryamugdhasya mohapāpaṃ tadā hyabhūt || 78 ||
[Analyze grammar]

tasmānmohā'nudbhavārthaṃ rūpavatyaḥ striyaḥ sadā |
dharmarakṣārthamevāpi darśayanti mukhaṃ nahi || 79 ||
[Analyze grammar]

lajjāvastraṃ prāvaraṇaṃ mukhopari prakāśane |
sadā rakṣanti sannāryaḥ pātivratyādiguptaye || 80 ||
[Analyze grammar]

darśanaṃ mohakṛttasmāddarśanaṃ na dadatyapi |
asūryampaśyāstiṣṭhanti prāvaraṇena cāvṛtāḥ || 81 ||
[Analyze grammar]

atha rājan tāpasaḥ sa kālena nidhanaṃ gataḥ |
tava putro hyayaṃ jāto yasyāṃ mugdhastadgarbhajaḥ || 82 ||
[Analyze grammar]

tapaḥphalaṃ rājyametallabdhaṃ tena mahātmanā |
duṣṭacakṣurdṛṣṭiphalaṃ janmākhyaṃ labdhameva ca || 83 ||
[Analyze grammar]

tapasā te prabhaktasya pūjādibhiḥ pratoṣitaḥ |
samāyāto'smi bhagavān śālagrāme tu yaḥ sthitaḥ || 84 ||
[Analyze grammar]

so'haṃ nārāyaṇakṛṣṇo bhavāmi te hyabhīṣṭadaḥ |
brūhi rājan dadāmyatra yatte manasi rocate || 85 ||
[Analyze grammar]

bhaktārthaṃ tvāgato'smyatra yadicchasi dadāmi te |
ityuktaḥ sa tu rājarṣiḥ pṛthvīdharābhidhastadā || 86 ||
[Analyze grammar]

yayāce sutadṛṣṭiṃ ca bhaktiṃ me pādayostathā |
ante dhāmā'kṣaraṃ cāpi vaṃśaṃ ca bhaktameva ha || 87 ||
[Analyze grammar]

śrutvā'haṃ pradadau tasmai tathā'stvevaṃ bhaviṣyati |
jalaṃ kamaṇḍalordatvā tirobhāvaṃ tataḥ sthalāt || 88 ||
[Analyze grammar]

rājā prasannacittastu tapaḥ pūrṇaṃ vidhāya ca |
yayau savalkalo naijaṃ grāmasthaṃ bhavanaṃ prati || 89 ||
[Analyze grammar]

prajābhiḥ pūjitaścāpi lakṣito varapātrakaḥ |
prāptamanorathaścāpi jayaśabdaiḥ pravardhitaḥ || 90 ||
[Analyze grammar]

yayau svabhavanaṃ tāvad vādyāni cottamāni vai |
avādyanta samantāttu rājñī prasannatāṃ hyagāt || 91 ||
[Analyze grammar]

rājā sutaṃ prati gatvā mayā dattaṃ jalaṃ drutam |
putranetre dadau netraṃ jalasparśāt sadṛṣṭikam || 92 ||
[Analyze grammar]

dakṣaṃ hyabhūt tato vāmaṃ jalasparśāt sadṛṣṭikam |
jātaṃ mahotsavaścāsīttapaḥphalaṃ samarjitam || 93 ||
[Analyze grammar]

atha putro yuvā jāto jātismaro hi sarvadā |
duṣṭacakṣuḥphalaṃ naijaṃ smaratyeva sadā tataḥ || 94 ||
[Analyze grammar]

mahābhāgavataḥ so'pi jāto dharmasamanvitaḥ |
nāmnā citradhvajo rājā sādhubhaktaḥ pratāpavān || 95 ||
[Analyze grammar]

bhajate māṃ sadā lakṣmi rājyaṃ pitrā samarpitam |
sañcālayati nītyā vai prajāstoṣayatyeva saḥ || 96 ||
[Analyze grammar]

pitā'sya nidhanaṃ yāto vimānena tadā'pyaham |
svadhāmā'kṣaramevainaṃ prāpayāmāsa vaiṣṇavam || 97 ||
[Analyze grammar]

evaṃ mayā svabhaktasya tapasā hyedhitasya ca |
icchāpūrtiḥ kṛtā putracakṣurdānena viṣṇunā || 98 ||
[Analyze grammar]

bhaktānāṃ sarvathā lakṣmi cāndhyaṃ bāhyaṃ ca vā''ntaram |
nāśayāmi prasanno'haṃ bhaktivaśyo bhavan bhuvi || 99 ||
[Analyze grammar]

ātmaprakāśaṃ divyaṃ ca dadāmi jñānaśevadhim |
yena māyātamastīrtvā prayānti paramaṃ padam || 100 ||
[Analyze grammar]

paṭhanācchravaṇāccāsya smaraṇād bhajanānmama |
bhuktimuktirbhaveccāpi sampat saukhyaṃ pramokṣaṇam || 101 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne pṛthvīdharābhidhanṛpaterjanmāndhaputrasya prāgjanmavṛttāntaṃ bhagavatā kṛtasadṛṣṭikatvaṃ cetyādinirūpaṇanāmā dvyaśītyadhikaśatatamo'dhyāyaḥ || 182 ||
[Analyze grammar]