Chapter 181

śrīpuruṣottama uvāca |
śṛṇu nārāyaṇīśri tvaṃ virālasya kathāṃ śubhām |
virālanāmako bhakto māñjuṣṭhagrāmavāsakṛt || 1 ||
[Analyze grammar]

abhūt kuṭumbasahito dhanāḍhyo vaiśya eva saḥ |
annānāṃ cāmbarāṇāṃ ca pātrāṇāṃ vikrayādikṛt || 2 ||
[Analyze grammar]

lakṣā'dhidravyavān dharmī sādhusevāparāyaṇaḥ |
yena nirmāpitā ramyā dharmaśālā'tiśobhanā || 3 ||
[Analyze grammar]

yatrā'tithayaścāgatya viśrāntiṃ yānti sādhavaḥ |
pravāsino yatayaśca sādhvyo yātrālavastathā || 4 ||
[Analyze grammar]

yenā'nnasatraṃ śreṣṭhaṃ ca tatra nirmāpitaṃ śubham |
yatra miṣṭaṃ rasayuktamannaṃ dugdhaṃ tathaudanam || 5 ||
[Analyze grammar]

pūrikāḥ sūpaśākādi labhante bhikṣavaḥ sadā |
bhuñjate śataśo nityaṃ dadātyāśīrvacāṃsi ca || 6 ||
[Analyze grammar]

nityaṃ virālavaiśyo'pi svahastena tu dakṣiṇām |
dānaṃ dadāti bālebhyo'nāthebhyaḥ strībhya ityapi || 7 ||
[Analyze grammar]

kṛṣṇanārāyaṇa viṣṇo kīrtanaṃ kārayatyapi |
pūjanaṃ me karotyevaṃ kārayatyapi pratyaham || 8 ||
[Analyze grammar]

putrāstasyā'bhavan pañca putryaḥ sapta striyāvubhe |
sarve te māṃ pūjayanti śrīpatiṃ puruṣottamam || 9 ||
[Analyze grammar]

sāyaṃ militvā me'gre te kīrtanaṃ vidadhatyapi |
kathāṃ kurvanti ca ramyāṃ śṛṇvanti ca parasparam || 10 ||
[Analyze grammar]

evaṃ vai puṇyayuktasya virālasya susampadaḥ |
anatiprāptavṛddhatve rājayakṣmā daro'bhavat || 11 ||
[Analyze grammar]

nityaṃ vivardhamānena rogeṇa śuṣkatāṃ gataḥ |
oṣadhāni bahūnyeva kṛtāni mānatāstathā || 12 ||
[Analyze grammar]

kṛtā bahvyaḥ sādhavaśca tadarthama sevitā hyati |
rogo nāśaṃ na ca yāti śreṣṭhī cintāparo'bhavat || 13 ||
[Analyze grammar]

kuṭumbaṃ cintayā grastaṃ pitā pūjyo mariṣyati |
kiṃ kartavyaṃ kva gantavyaṃ rakṣārthama tu pituḥ khalu || 14 ||
[Analyze grammar]

evaṃ vicintayatāṃ tu kuṃkumavāpikā śubhā |
tīrthaṃ rogaharaṃ cāste sākṣād yatra śriyaḥ patiḥ || 15 ||
[Analyze grammar]

ityevaṃ mānasaṃ jātaṃ tataste janakena vai |
sahitāḥ prayayustīrthamaśvapaṭṭasarovaram || 16 ||
[Analyze grammar]

kīrtayanto mama nāma smaranto māṃ prabhuṃ tathā |
anādiśrīkṛṣṇanārāyaṇaṃ rogaharaṃ harim || 17 ||
[Analyze grammar]

aśvapaṭṭasarastīraṃ samāgatya ca te tataḥ |
niṣedurvaṭavṛkṣādho māṃ smaranto jalaṃ papuḥ || 18 ||
[Analyze grammar]

akṣayyaghāṭamāsādya sasnuḥ sarve prabhāviṇaḥ |
dānāni svarṇarūpyāṇi cā'mbarāṇi dadustadā || 19 ||
[Analyze grammar]

pātrāṇyannāni miṣṭāni kambalāni dadustathā |
anādiśrīkṛṣṇanārāyaṇo naḥ prīyatāmiti || 20 ||
[Analyze grammar]

athā'haṃ bhaktimālokya viprarūpadharo hariḥ |
aśvapaṭṭasarastīraṃ jagāma tasya sannidhau || 21 ||
[Analyze grammar]

kṣayī virālanāmā sa matvā tīrthamṛtiṃ tadā |
sasmāra māṃ svahṛdaye nārāyaṇaḥ prarakṣatu || 22 ||
[Analyze grammar]

mayā gatvā sannidhau vai pṛṣṭo virālakastadā |
kutaḥ kasmāt kathaṃ cātra samāyāto'si bho dhanin || 23 ||
[Analyze grammar]

kathaṃ rogaḥ kiyatkālād vartate tava tīrthakṛt |
virālako'tikaṣṭena mṛtyuṃ smṛtvā ruroda ha || 24 ||
[Analyze grammar]

śuśoca bahudhā tatra papraccha māṃ tu bhūsuram |
namaste vipra vṛddho'si yadi jānāsi daivatam || 25 ||
[Analyze grammar]

vada me bahupuṇyasya kathaṃ rogo vyajāyata |
nā'tra janmani bhūdeva pātakaṃ vai kṛtaṃ mayā || 26 ||
[Analyze grammar]

puṇyadānāni bahudhā kṛtāni vividhāni vai |
ābālyāt sādhusevyasmi śrīhareḥ pūjako'smi ca || 27 ||
[Analyze grammar]

kuṭumbaṃ me bhaktiyutaṃ parameśe sadā'sti vai |
vratāni bhaktiyuktāni karomi sakuṭumbakaḥ || 28 ||
[Analyze grammar]

tathāpi kṣayarogo me kathaṃ prāptaḥ pradarśaya |
śrutvā''haṃ viprarūpastu virālasya samastakam || 29 ||
[Analyze grammar]

vṛttāntaṃ pūrvajanmīyaṃ samuvāca hi padmaje |
śṛṇu śreṣṭhin supuṇyo'si sarvathā cātra janmani || 30 ||
[Analyze grammar]

purā kṛtaṃ tu yatkarma kenāpi na viyujyate |
pūrvajanmani viprastvaṃ nāmnā gaṃgeśvaro'bhavaḥ || 31 ||
[Analyze grammar]

sābhramatītaṭe puṇye viṣṇostu mandire'bhavaḥ |
pūjakastatra vai pārśve sasyakṣetrāṇi vāṭikāḥ || 32 ||
[Analyze grammar]

āsan vaiśyasya ramyāśca vaiśyastu mṛtimāptavān |
tatpatnī mandire dāsī bhūtvā sevāṃ tato'karot || 33 ||
[Analyze grammar]

gāśca vṛṣāśca sā tatra mandire pradadau satī |
kṣetrāṇi vāṭikāścāpi mandire pradadau tathā || 34 ||
[Analyze grammar]

aśaktā sā kṛṣiṃ kartuṃ bhūtvā bhṛtyā tu mandire |
avasaddevaśaraṇe tvadādhārā nirāśrayā || 35 ||
[Analyze grammar]

govṛṣāṇāṃ tṛṇādyaiḥ sā sevanaṃ dohanādikam |
karotyeva tathā vāryāharaṇaṃ mārjanādikam || 36 ||
[Analyze grammar]

gaṃgeśvarasya te sevāṃ karotyājñāsuvartinī |
dhānyaśākaphalādīni jāyante yāni bhūmiṣu || 37 ||
[Analyze grammar]

tānyāhṛtya ca prathamaṃ dadāti bhūsurāya te |
tvaṃ prapācya sumiṣṭānnaṃ naivedyaṃ viṣṇave sadā || 38 ||
[Analyze grammar]

datvā tasyai prasādaṃ ca tato jagrahithā'danam |
puṣpahārādikaṃ bhṛtyā kṛtvā'rpayati viṣṇave || 39 ||
[Analyze grammar]

evaṃ sā sevate nityaṃ tvāṃ tathā viṣṇumīśvaram |
niśchadmā bhaktiyuktā ca sarvārpaṇā vṛṣānvitā || 40 ||
[Analyze grammar]

atha tvaṃ rasanālubdho miṣṭānnaṃ prakaroṣi yat |
nivedya viṣṇave śreṣṭhaṃ pracchannaṃ mandirāntare || 41 ||
[Analyze grammar]

bhuktvā tṛptiṃ samāsādya tato dadāsi yoṣite |
bhṛtyāyai tadapi rūkṣamannaṃ godhūmapolikāḥ || 42 ||
[Analyze grammar]

evaṃ tvaṃ kṛtavānnityaṃ pakṣapātaṃ tu dātari |
dātre deyaṃ tu prathamaṃ tat tvayā na kṛtaṃ tadā || 43 ||
[Analyze grammar]

paṃktibhedaḥ kṛtastatra tatpāpaṃ te purā'bhavat |
ekadā vṛṣṭibāhulye sābhramatyā mahājalam || 44 ||
[Analyze grammar]

kṣetraṃ ca vaṭikāṃ cāpi mandiraṃ vyāpya cāgatam |
udvelaṃ tu mahāvegaṃ vyavardhata druta hi tat || 45 ||
[Analyze grammar]

gāvaśca vṛṣabhā bhṛtyā mandirasyocchraye sthale |
jagatyāṃ susthale sarve'dhyarohan subhayārditāḥ || 46 ||
[Analyze grammar]

bhṛtyā sā karṣukī bhītā tvāṃ vavalge jalāgate |
āśliṣṭā tvāṃ jīvanārthaṃ prāṇarakṣaṇalālasā || 47 ||
[Analyze grammar]

tvaṃ tathā sā karṣukī vai ratnamālā ca ghenavaḥ |
vṛṣāśceti jīvanārthaṃ sasmarurmāṃ tu mūrtigām || 48 ||
[Analyze grammar]

vyacintayaṃ tadā cā'haṃ rakṣārthaṃ bhaktayoginām |
kintu śreṣṭhin cāntakāle samāgate'pi dehinaḥ || 49 ||
[Analyze grammar]

mano malinaṃ prabalaṃ durnirgrāhyaṃ savāsanam |
nāryā dehasya saṃsparśe vikṛtiṃ vindati drutam || 50 ||
[Analyze grammar]

tatte manastadā tatra vikṛtiṃ prajagāma ha |
vāripūre samāśleṣe kāmanādharṣito bhavān || 51 ||
[Analyze grammar]

mayā jñātvā parityakto bhṛtyā'pi varjitā tadā |
rakṣārthamāgatenāpi rakṣā te tatra na kṛtā || 52 ||
[Analyze grammar]

dharmanāśaṃ vilokyā'haṃ rakṣāṃ na kṛtavān dvija |
pūravegena karṣukyā saha tvaṃ vāhito'bhavaḥ || 53 ||
[Analyze grammar]

gāvaśca vṛṣabhāścāpi pūre tatra pravāhitāḥ |
mṛtāḥ sarve puṇyayuktā manākpāpasamanvitāḥ || 54 ||
[Analyze grammar]

gaṃgeśvaro bhavān vipraḥ paṃktibhedakarastadā |
idānīṃ tvaṃ hareḥ sevāpuṇyavān dhanavānkila || 55 ||
[Analyze grammar]

kṣetradeyaṃ karṣukī ca bhṛtyā te gṛhiṇī kila |
dvitīyā tava patnīyaṃ brāhmaṇī yā tava mṛteḥ || 56 ||
[Analyze grammar]

anantaraṃ mṛtā śokāt seyaṃ śreṣṭhin virājate |
pañca putrā vṛṣāste vai ye mṛtāḥ pūravāriṣu || 57 ||
[Analyze grammar]

sapta putrya imāḥ śreṣṭhin gāvau mṛtāśca vāriṣu |
mama pūjāphalenaiṣā sampat smṛddhirhi vartate || 58 ||
[Analyze grammar]

rogo'yaṃ paṃktibhedena svārthamiṣṭānnabhojinaḥ |
tavā'dya vartate śreṣṭhin niśchadmeyaṃ tu modate || 59 ||
[Analyze grammar]

karṣukī kṣetravāṭyādidānapuṇyaṃ samaśnute |
brāhmaṇī dharmapuṇyaṃ tu pātivratyaṃ samaśnute || 60 ||
[Analyze grammar]

devadhanaṃ paśavaśca mānuṣyaṃ bhuñjate sukham |
pūjakastvaṃ dhanadhānyaratnastrīvaṃśasaṃyutaḥ || 61 ||
[Analyze grammar]

paṃktibhedasya pāpasya kṣayarogaṃ phalaṃ gataḥ |
ahaṃ te ca kuṭumbasya bhaktiyogena vai punaḥ || 62 ||
[Analyze grammar]

tīrthāgatasya mokṣārthaṃ samāyāto'smi mādhavaḥ |
vada virālaka tvaṃ me mokṣaṃ vā tu nīrugṇatām || 33 ||
[Analyze grammar]

kimicchasīti dāsye'tra viprarūpadharo hariḥ |
pāpaṃ pracchannabhojyasya kṣayaṃ neṣyāmi sarvathā || 64 ||
[Analyze grammar]

nirāmayo bhava śreṣṭhin mokṣago vā bhavā'tra vai |
śrutvaivaṃ sahasā hṛṣṭaḥ praṇamya puruṣottamam || 65 ||
[Analyze grammar]

māṃ papraccha sa loke'trā''yuṣyaṃ me vartate na vā |
so'hamāha na te cāyuvidyate'taḥ paraṃ manāk || 66 ||
[Analyze grammar]

kintu bhakto'si madvāse cāgato'syapi tairthikaḥ |
roganāśecchayā tasmāt kṛpayā te dadāmi tat || 67 ||
[Analyze grammar]

āyurvā mokṣaṇaṃ vāpi hyubhayaṃ cāpi vāñcchasi |
janmamṛtyujarāvyādhīn harāmi śaraṇārthinaḥ || 68 ||
[Analyze grammar]

ityuktaḥ śreṣṭhivaryo'sau viprarūpāya me tadā |
dattvā''sanaṃ tathā'rghyaṃ ca pādyaṃ jalaṃ phalāni ca || 69 ||
[Analyze grammar]

kastūrīṃ kuṃkumaṃ cāpi karpūraṃ kesarāṃstathā |
candanaṃ gandhasārāṃśca ratnahārāṃstathottamān || 70 ||
[Analyze grammar]

puṣpahārān kambalāni mukuṭaṃ kaṭake tathā |
kuṇḍale cormikāścāpi śṛṃkhalāḥ svarṇanirmitāḥ || 71 ||
[Analyze grammar]

sugandhasārān chatraṃ ca cāmare svarṇapāduke |
upadā vividhāścāpi putrān putrīḥ striyāvubhe || 72 ||
[Analyze grammar]

sarvaṃ śreṣṭhī tadā lakṣmi cārpayāmāsa me dhanam |
pūjayāmāsa vidhinā tavā'smīti jagāda ha || 73 ||
[Analyze grammar]

trāhi pāhi dayāsindho yatheṣṭaṃ kuru te'smi vai |
ityevamuktavān virālakastadā'hamacyutaḥ || 74 ||
[Analyze grammar]

prāha taṃ sarvathā śreṣṭhin nīrogī bhava satvaram |
varṣamātraṃ bhūtale tvaṃ tiṣṭha tataśca mokṣaṇam || 75 ||
[Analyze grammar]

yāsyasyeva na sandehastīrthaṃ kṛtvā gṛhaṃ vraja |
anādiśrīkṛṣṇanārāyaṇaḥ svāmī patirmama || 76 ||
[Analyze grammar]

mantramenaṃ japa nityaṃ kṛṣṇaṃ bhajasva vallabham |
smara māṃ nityadā śreṣṭhin pañcatīrthī vidhehi ca || 77 ||
[Analyze grammar]

nityaṃ satāṃ ca sādhūnāṃ sādhvīnāṃ sevanaṃ kuru |
devayajñaṃ pitṛyajñaṃ bhūtayajñaṃ tathā kuru || 78 ||
[Analyze grammar]

dānaṃ ca havanaṃ cāpi naivedyaṃ me'rhaṇaṃ kuru |
asāre cātra saṃsāre sāraṃ sevā hareḥ sadā || 79 ||
[Analyze grammar]

satāṃ sevā paraṃ sāraṃ satāṃ saṃgo hi bheṣajam |
mama sevā mokṣadā vai vāsanākṣayiṇī satām || 80 ||
[Analyze grammar]

satāṃ sevābalenā'tra vāsanā layameti ha |
anantajanmapāpānāṃ nāśopāyaḥ sadarhaṇam || 81 ||
[Analyze grammar]

prārabdhānāṃ daridrāṇāṃ nāśakṛcca sadarhaṇam |
vighnānāṃ rogajālānāṃ nāśakṛcca sadarhaṇam || 82 ||
[Analyze grammar]

santaścintāmaṇitulyāḥ prayacchanti sucintitam |
santaḥ kalpaprataravo dadatyarthitamuttamam || 83 ||
[Analyze grammar]

santo vai kalpavallyaścā'mṛtaṃ phalaṃ dadatyapi |
sādhavaḥ kāmagāvaste duhanti śāśvataṃ sukham || 84 ||
[Analyze grammar]

santaḥ siddhipradāścāpi sampadāṃ ca pradā hi te |
āśīrvādaiḥ svalpabhāgyaṃ bahubhāgyaṃ dadhatyapi || 85 ||
[Analyze grammar]

divyatāṃ mama yogena prāpayantyakṣaraṃ padam |
yāmyadūtān vārayanti santaste hṛdayaṃ mama || 86 ||
[Analyze grammar]

prajvālayanti pāpāni puṇyāni vardhayantyapi |
saubhāgyāni cārpayanti haranti cāpado hi te || 87 ||
[Analyze grammar]

teṣāṃ sevā sadā śreṣṭhin kuru prasādadāyinīm |
pañcayajñān sadā saumyān vidhehyapi ca bhāvataḥ || 88 ||
[Analyze grammar]

gosevāṃ dharmasevāṃ ca kuru svargapradāyinīm |
ātmajñāne kathāsevāṃ sadā prāpnuhi gaṅgaka || 89 ||
[Analyze grammar]

mamā''rādhanamevāpi sadā vidhehi bhāvavān |
ante te darśanaṃ datvā neṣye dhāmā'kṣaraṃ mama || 90 ||
[Analyze grammar]

brahmahatyāsurāpānavyavāyāścauryamityapi |
bhrūṇahatyetipāpānāṃ yāmye niṣkṛtirityapi || 91 ||
[Analyze grammar]

sādhusevā kṛtā yena prāptā prasannatā tathā |
āśīrvaco yena labdhaṃ sarvārpaṇena satsu yat || 92 ||
[Analyze grammar]

teṣāṃ teṣāṃ tu pāpānāṃ dagdhatā jāyate drutam |
niṣkṛtiḥ sarvathā sādhoḥ sevātulyā na cā'parā || 93 ||
[Analyze grammar]

yāmyaloko nā'sya lakṣmi sevāmagnasya vai satām |
api kīṭapataṃgādyāḥ śvapacā ghātakā api || 94 ||
[Analyze grammar]

gaṇikā hārakāścāpi satsevābhiḥ samuddhṛtāḥ |
paśavaḥ pakṣiṇaścāpi vṛkṣāśca vallikā drumāḥ || 95 ||
[Analyze grammar]

sādhuyogena kamale paraṃ śreyaḥ prabhejire |
kṛṣṇabhaktermahāmārgaḥ sādhuṣveva pravartate || 96 ||
[Analyze grammar]

sādhubhyaḥ sarvalokeṣu pravartate tataḥ param |
lokāstaranti saṃsāraṃ pāraṃ prayānti tasya ca || 97 ||
[Analyze grammar]

mama lokaṃ prayāntyeva satāṃ sevāparāyaṇāḥ |
bhuktvā svargānyanantāni tathaiśvarapadānyapi || 98 ||
[Analyze grammar]

modante cāpi vaikuṇṭhe goloke'kṣaradhāmani |
evaṃ mayopadiṣṭaḥ sa virālako'hi bhaktarāṭ || 99 ||
[Analyze grammar]

madājñayā yayau naijaṃ gṛhaṃ santoṣavān dhanī |
bheje māṃ sarvathā tatra varṣānte mṛtyumāptavān || 100 ||
[Analyze grammar]

sādhusevāṃ parāṃ kṛtvā yayau dhāmā'kṣaraṃ mama |
evaṃ lakṣmi vrajeddhāma śrotā vaktā'sya bhāvavān || 101 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne virālanāmakasya vaiśyasya prāgjanmakathā kuṃkumavāpikākṣetre śrīhareḥ prāptiḥ tasya rājayakṣmanāśaḥ muktiścetyādinirūpaṇanāmā ekā'śītyadhikaśatatamo'dhyāyaḥ || 181 ||
[Analyze grammar]