Chapter 176

śrīpuruṣottama uvāca |
śrutiphalā punaḥ śrutvā papraccha svāminaṃ punaḥ |
kṛtārthā'smi tathā'pyeṣa gahano jñānamārgaṇaḥ || 1 ||
[Analyze grammar]

nedamalpātmanā śakyaṃ vedituṃ vartituṃ ca vā |
bahu cālpaṃ ca saṃkṣiptaṃ muktidharmaṃ vadā'tra me || 2 ||
[Analyze grammar]

evaṃ lakṣmi sadvidyāyanarṣiḥ śrutvā priyāvacaḥ |
sarvāsāṃ yoṣitāṃ cāpi hitakṛtprāha vai sphuṭam || 3 ||
[Analyze grammar]

araṇiḥ strībuddhirūpā guruḥ patiḥ paro'raṇiḥ |
tapaḥśrate'bhimathnīto jñānāgnirjāyate tataḥ || 4 ||
[Analyze grammar]

buddhirnārī naraścātmā dampatīti nigadyate |
tayorāntaravāsaśca paramātmā paro guruḥ || 5 ||
[Analyze grammar]

sarvakriyābhirātmātmā toṣaṇīyo janārdanaḥ |
nārīdehasthitābhyāṃ nṛsthābhyāṃ tābhyāṃ tu vā sadā || 6 ||
[Analyze grammar]

eṣā saṃkṣepato vidyā brahmavidyā mayoditā |
sā tvaṃ bhavasi nityaiva muktā buddhyā pravardhitā || 7 ||
[Analyze grammar]

ahaṃ bhavāmi muktaśca buddhyā saṃvardhitaḥ sadā |
patiścātmā priyā buddhistābhyāṃ brahmā'bhigamyate || 8 ||
[Analyze grammar]

śrutiphalā bhaved buddhiḥ sadvidyāyanaścetanaḥ |
tayorātmā parabrahma lakṣmyahaṃ puruṣottamaḥ || 9 ||
[Analyze grammar]

māmupāśritya vijñānaṃ muktaṃ divyaṃ prajāyate |
sadvidyāyanakaścātmā mahāmuktaḥ prajāyate || 10 ||
[Analyze grammar]

śṛṇu lakṣmi kathayāmi guruśiṣyakathāṃ śubhām |
muktistotāyanākhyasya guroḥ śikṣāṃ sutaṃ prati || 11 ||
[Analyze grammar]

siddhiveśāyanaḥ śiṣyaḥ papraccha svaguruṃ priye |
kiṃsvicchreyaḥ paraṃ proktaṃ paraḥ kaścā'paraśca kaḥ || 12 ||
[Analyze grammar]

kutaścā'haṃ kutastvaṃ ca kiṃ satyaṃ paramaṃ sukham |
kuto jātāni bhūtāni kena jīvanti jantavaḥ || 13 ||
[Analyze grammar]

kiṃ satyaṃ ca tapaḥ kiṃ ca ke guṇāḥ sadbhirīritāḥ |
ke panthānaḥ śivāḥ syuśca kiṃ sukhaṃ śāśvataṃ matam || 14 ||
[Analyze grammar]

etat sarvaṃ brūhi vidvan yena muktiḥ prajāyate |
saṃsārabhīravo lokā mokṣakāmā bhavanti ca || 15 ||
[Analyze grammar]

guravastārakāḥ santi mokṣadā vai dayālavaḥ |
śaraṇāgatasaṃrakṣākartāraḥ pāvanā yataḥ || 16 ||
[Analyze grammar]

muktisrotāyanaḥ śrutvā siddhiveśāyanasya tat |
mumukṣānvitakośāya śiṣyāyopādideśa ha || 17 ||
[Analyze grammar]

śṛṇu siddhiveśa sarvaṃ kathayāmi yathātatham |
parameśopāsanā vai paraṃ śreyo mataṃ mama || 18 ||
[Analyze grammar]

paraḥ sa eva bhagavān sarvakāraṇakāraṇam |
parabrahma paramātmā'nādikṛṣṇanarāyaṇaḥ || 19 ||
[Analyze grammar]

anādiśrīkṛṣṇanārāyaṇaḥ śrīkṛṣṇamādhavaḥ |
māyā'kṣarādiśāstā cā'vatārakāraṇaṃ prabhuḥ || 20 ||
[Analyze grammar]

sādhusvabhāvāḥ sannyāsāḥ svarūpāṇi harestathā |
sādhavaścāvatārāśceśvarā vyūhāśca te'parāḥ || 21 ||
[Analyze grammar]

aparaṃ cākṣaraṃ brahma muktāścāpyaparā hi te |
aparāścāpi sarve ye mumukṣavastato'pi ca || 22 ||
[Analyze grammar]

ātmānaścāparāḥ sarve bubhukṣavaḥ satṛṣṇakāḥ |
ātmatattvaṃ paraṃ proktamanātma tvaparaṃ sadā || 23 ||
[Analyze grammar]

ahaṃ jāto hyahaṃkāro mahattattvāt trimāyikaḥ |
tvaṃbhāvo'pi tato jāto bhedadṛṣṭyā hyanātmani || 24 ||
[Analyze grammar]

ahaṃ tvaṃ ceti nirdeśo māyiko na tu cātmanaḥ |
jāyamānaṃ mahattattvamahaṃkāramavāsṛjat || 25 ||
[Analyze grammar]

ahaṃkārādbhedabhāvo bhrāntirūpo'sti sarvathā |
tattyāge'hantvamamatātyāge nijātmanaḥ sukham || 26 ||
[Analyze grammar]

paramātmanā'rpitaṃ bhuṃkte cātmā tatparamaṃ sukham |
trikālā'bādhyamevaitacchrīhareryogato hi tat || 27 ||
[Analyze grammar]

satyaṃ sukhaṃ hi tatproktaṃ bhagavadyogajaṃ sadā |
na nāśyaṃ nāpi hāryaṃ ca na kṣayyaṃ na viśīryate || 28 ||
[Analyze grammar]

etādṛśaṃ mahānandasandohātmakameva tat |
tallabdhvā'nyannirmanaskaṃ nīrasaṃ jāyate'tra vai || 29 ||
[Analyze grammar]

taddātā bhagavān sākṣācchrīhariḥ parameśvaraḥ |
anādiśrīkṛṣṇanārāyaṇaḥ śrīpatiracyutaḥ || 30 ||
[Analyze grammar]

tato'vatārā jāyante hīśvarā api vai tataḥ |
īśvaryaścāpi tasmādvai māyā tataḥ prajāyate || 31 ||
[Analyze grammar]

ṛṣayaśca tathā devā mānavāḥ sthāvarādayaḥ |
khanayaṃścāpi sarvā vai sarvabhūtāni dehinaḥ || 32 ||
[Analyze grammar]

jāyante śrīhareste vai jīvanti tatpraveśitāḥ |
āpūrakeṇa tattvena māyayā sanniveśitāḥ || 33 ||
[Analyze grammar]

parāpmanā''ntaravyāptā jīvanti tu cirāciram |
jīvanaṃ karmasaṃghātaḥ puṇyaṃ pāpaṃ nijā'rjitam || 34 ||
[Analyze grammar]

yāvadbhavanti karmotthā'dṛṣṭāni tāvadeva te |
jīvanti cā'tha tannāśe mriyante dehinaḥ sadā || 35 ||
[Analyze grammar]

satyaṃ brahma tu paramaṃ satyā muktiḥ sadā matā |
satya ātmā cidānandaḥ satyā śrīranapāyinī || 26 ||
[Analyze grammar]

satyaḥ dharmaḥ satāṃ nityo mokṣado yo nigadyate |
tapaḥ śreṣṭhaṃ hi sādhutvaṃ sannyāsastapa uttamam || 37 ||
[Analyze grammar]

sāmarthye sati sahanaṃ paramaṃ tapa ucyate |
jñānaṃ vidyā tapaḥ proktaṃ mokṣadaṃ tat sadā bhavet || 38 ||
[Analyze grammar]

yo vetti brahmasaṃvāsaṃ vivāsaṃ prakṛtestathā |
tathā cidacitorbhedaṃ sa yāti paramāṃ gatim || 39 ||
[Analyze grammar]

yo na kāmayate kiñcinna kiñcidabhimanyate |
iha loke sthitaścaiva brahmabhūyāya kalpate || 40 ||
[Analyze grammar]

cidānandasya parame kṛṣṇanārāyaṇe mayi |
kṛtvā samarpaṇaṃ tiṣṭhenmucyate nātra saṃśayaḥ || 41 ||
[Analyze grammar]

purā brahmarṣibhirbrahmā pṛṣṭo naiḥśreyase pare |
kathaṃ karma kriyāt sādhu kathaṃ mucyeta kilbiṣāt || 42 ||
[Analyze grammar]

ke panthāna śivā naśca kau mārgau dakṣiṇottarau |
śrutvā jagāda tān brahmā gurusevāṃ sadā kriyāt || 43 ||
[Analyze grammar]

guravo mokṣadātāraḥ santaḥ sādhujanāḥ śubhāḥ |
pāpaprakṣālakāḥ sarve puṇyaśevadhidāyinaḥ || 44 ||
[Analyze grammar]

hite cā'preritā ye syuste santo guravo'malāḥ |
tairdattā ye copadeśā grāhyāste te guṇā matāḥ || 45 ||
[Analyze grammar]

sattve cittve tathā''nande puṣṭiṃ yaiścetano vrajet |
te guṇā divyarūpā vai tadanye durguṇā iti || 46 ||
[Analyze grammar]

guṇaiḥ sampreritaścātmā kriyāt karma sukhāvaham |
paralokapradaṃ yadvā paradhāmapradaṃ śubham || 47 ||
[Analyze grammar]

paradhāmaprada karma sādhu sādhuttamaṃ matam |
paralokapradaṃ karma sādhu sādhutaraṃ matam || 48 ||
[Analyze grammar]

iha dharmayutaṃ karma satkarma sādhu kathyate |
brahma satyaṃ tapaḥ satyaṃ satyaṃ ca gurusevanam || 49 ||
[Analyze grammar]

satyaṃ sādhu nijaṃ karma tena mucyeta kilbiṣāt |
tīrthasevā satāṃ sevā pitṛsevā hi pāvanī || 50 ||
[Analyze grammar]

ātmajñānaṃ harerjñānaṃ bhaktiḥ kilbiṣanāśinī |
mātṛsevā ca gosevā satīsevā hi pāvanī || 51 ||
[Analyze grammar]

devabhaktirgurorbhaktiḥ samādhiḥ kilbiṣāpahā |
brahmacaryaṃ ca sannyāsaḥ sarvakilbiṣanāśakau || 52 ||
[Analyze grammar]

gārhasthyaṃ svargadaṃ cāpi mayyarpitaṃ tu mokṣadam |
vānaprasthaṃ virāgāṇāṃ māyāvṛttivināśakam || 53 ||
[Analyze grammar]

śraddhālakṣaṇamityevaṃ dharmaṃ jñātvā caranti tam |
dānaṃ sevā dakṣiṇā ca satyaṃ puṇyaṃ ca sādhutā || 54 ||
[Analyze grammar]

paropakārastīrthāni devayānā bhavanti te |
jñānaṃ virāgaścaiśvaryaṃ dhyānaṃ samādhirarpaṇam || 55 ||
[Analyze grammar]

mantrajapo'tisantoṣaḥ siddhayānā bhavanti te |
upāsanā parā bhaktiḥ prītiścārādhanā tathā || 56 ||
[Analyze grammar]

prapattiḥ śaraṇe pāto muktiyānā bhavanti te |
śivāḥ sarve te panthāno hariḥ śivatamaḥ sadā || 57 ||
[Analyze grammar]

tatsukhaṃ śāśvataṃ divyaṃ gatvā dhīraḥ samaśnute |
nārāyaṇamayo bhūtvā sarvāmṛddhiṃ samaśnute || 58 ||
[Analyze grammar]

uktāste tu panthānaḥ proktāścā'nyāṃstathā'parān |
dakṣiṇān garbhadātṝṃśca kathayāmi sucakriṇaḥ || 59 ||
[Analyze grammar]

mānavaṃ puṇyamādāya devo bhavati vai ciram |
śeṣamādāya cāyāti mānave dakṣiṇe pathi || 60 ||
[Analyze grammar]

pāpamādāya yāmyaṃ vai rājyaṃ yāti nivṛttaye |
śeṣamādāya tiryakṣu tato vā mānave kvacit || 61 ||
[Analyze grammar]

evaṃ vai dakṣiṇe mārge caturaśītilakṣake |
āvartate cakravacca dakṣiṇo mārga eva saḥ || 62 ||
[Analyze grammar]

tatra tattvāni tiṣṭhanti dakṣiṇe dehamārgake |
avyaktaṃ mūlamāyā vai triguṇātmā pratiṣṭhati || 63 ||
[Analyze grammar]

sāmyāvasthaṃ pūrvabhāgaṃ viṣamāvasthamuttaram |
dhruvaṃ cā''pūrakaṃ tattvaṃ sthiraṃ prasavadharmi ca || 64 ||
[Analyze grammar]

guṇebhyo viṣamebhyastu mahattattvaṃ prajāyate |
dehe buddhisvarūpaṃ tat strīrūpaṃ vai cidātmanaḥ || 65 ||
[Analyze grammar]

tato'haṃkāranāmā vai putrastryavasthavartanaḥ |
triguṇo jāyate sarvadeheṣvapi pravartate || 66 ||
[Analyze grammar]

tasmāt prajāyate sūkṣmabhūtānīndriyakāṇi ca |
mano'pi jāyate tasmād vyoma prāṇastato'pi ca || 67 ||
[Analyze grammar]

tato tejo jalaṃ tasmāt tataḥ pṛthvī prajāyate |
tāni sarvāṇi dehe'tra bhavanti dakṣiṇāpathe || 68 ||
[Analyze grammar]

udghāṭitanavadvāraṃ naddhadvāradvayaṃ tathā |
ekadvārā'dhikaṃ yadvā nyūnadvārādikaṃ ca vā || 69 ||
[Analyze grammar]

ṣāṭkauśikaṃ pañcarūkṣaṃ susūkṣmaikonaviṃśatim |
sacetanaṃ cāṣṭadharmaṃ bahudharmaṃ sadharmakam || 70 ||
[Analyze grammar]

asamānadharmavacca kalmaṣaṃ malinaṃ sadā |
trīṇi srotāṃsi dharmāṇi cāpyānte punastvidam || 71 ||
[Analyze grammar]

śuklakṛṣṇā'śuklakṛṣṇātmakāni saṃskṛtāni ca |
saṃskāraistāni nityaṃ vai navodbhavāni santi hi || 72 ||
[Analyze grammar]

sattvaṃ dīpo bhavatyeva rajo gatiṃ dadāti hi |
tamo nirodhaṃ kurute hyevaṃ sakriyameva tat || 73 ||
[Analyze grammar]

sattvaguṇe vartamāne prītirānanda utsavaḥ |
sukhaṃ prakāśa udayaścaudāryaṃ nirbhayatvakam || 74 ||
[Analyze grammar]

śraddhā kṣamā dhṛtiḥ satyaṃ santoṣaṃ ārjavaṃ tathā |
dayā samatā cā'hiṃsā śuddhirdākṣyaṃ sukarmatā || 75 ||
[Analyze grammar]

vrataṃ sevā paricaryā hyakāmo hrīstitikṣaṇam |
viśvāsaścopakāraśca tyāgastuṣṭiḥ pramodanam || 76 ||
[Analyze grammar]

sādhuvṛttitvamanaghaṃ śāntaṃ karma śubhekṣaṇam |
upekṣā brahmacaryaṃ ca mamā'haṃkāravarjitā || 77 ||
[Analyze grammar]

dānaṃ makho'dhyayanaṃ cetyete guṇāstu sāttvikāḥ |
ebhirguṇairdhīrabhāvā jāyante sādhuvṛttayaḥ || 78 ||
[Analyze grammar]

viśokā dharmabahulāḥ svargaṃ yānti surāśca te |
bhūtveśitvaṃ vaśitvaṃ ca laghutvaṃ labhate divi || 79 ||
[Analyze grammar]

ūrdhvasrotasa ityete devāḥ śreṣṭhā matā hi te |
yadyadicchanti tatsarvaṃ bhajante vibhajanti ca || 80 ||
[Analyze grammar]

atha rājasabhāvān vai kathayāmi samāsataḥ |
pravartanaṃ vyavahāraścotsāho vega udyamaḥ || 81 ||
[Analyze grammar]

santāpo rūpamāyāso duḥkhamātapa ūrdhvatā |
aiśvaryaṃ melanaṃ hetuvādo ratirbalaṃ madaḥ || 82 ||
[Analyze grammar]

śauryaṃ roṣaśca kalahaḥ piśunaṃ pālanaṃ raṇaḥ |
īrṣyepsā bandhanaṃ ghāto vikrayaśca nikṛntanam || 83 ||
[Analyze grammar]

paracchidrāvamarṣaśca cintā ca matsaro mṛṣā |
nindā stutiḥ praśaṃsā ca vikalpo dharṣaṇaṃ tapaḥ || 84 ||
[Analyze grammar]

śuśrūṣā ca paricaryā bhṛtyatā ca parigrahaḥ |
pramādaḥ parivādaśca nayo vyūho namaskriyā || 85 ||
[Analyze grammar]

āśīrvādāḥ paurttakarma svāhāsvadhāvaṣaṭ'kriyāḥ |
vidyā ca maṃgalaṃ sneho mamedamitilālasā || 86 ||
[Analyze grammar]

mānaṃ māyā jugupsā ca jāgaraḥ stainyamityapi |
daṃbho darpo'tha rāgo'pi bhaktirmodaśca kāmanā || 87 ||
[Analyze grammar]

dyūtaṃ nṛtyaṃ ca gītaṃ cepyevamādyāstu rājasāḥ |
dharmo'rthaḥ sampadaśceti rājasyo vai bhavanti hi || 88 ||
[Analyze grammar]

tairguṇaiḥ sahitā yānti dharmādyaiśvaryayojitāḥ |
atraiva mānave loke modante mānavāstu te || 89 ||
[Analyze grammar]

paralokaṃ samīhante tarpayantyapi juhvati |
dadati pratigṛhṇanti jāyante ca punaḥ punaḥ || 90 ||
[Analyze grammar]

atha te tāmasān vacmi guṇān tamaḥsamutthitān |
moho bhayaṃ ca lobhaśca svapnaḥ stambhaḥ pradūṣaṇam || 91 ||
[Analyze grammar]

atyāgaścāpyathā'jñānaṃ ḍoḷanaṃ smṛtivibhramaḥ |
nāstikyaṃ bhedavṛttiścā'ndhatvaṃ jāḍyaṃ ca sannatā || 92 ||
[Analyze grammar]

mṛṣāmānaṃ vairabhāvo vikṛtirmūḍhabhāvanā |
pāpaṃ paravaśitvaṃ cālasyaṃ dhūmranibhājñatā || 93 ||
[Analyze grammar]

nāśo nirodhanaṃ bhaṃgo layaśceti tu tāmasāḥ |
sarvakārye niyamyante pravṛttayo hi tāmasaiḥ || 94 ||
[Analyze grammar]

parivādakathā manyuratyāgaścābhimānitā |
akṣamā matsaraśceti tāmasāste bhavanti vai || 95 ||
[Analyze grammar]

vṛthārambhā vṛthādānaṃ vṛthābhakṣaṇamityapi |
aśraddhā khaṇḍanaṃ ceti tāmasāste bhavanti vai || 96 ||
[Analyze grammar]

manuṣyā bhinnamaryādā daityāśca rākṣasāstathā |
avāṅnirayamāpannāstiryaṅnirayagāminaḥ || 97 ||
[Analyze grammar]

dānavāścāsurāḥ pretā bhūtāḥ piśācakādayaḥ |
krūrāśca hiṃsakā māṃsabhakṣaṇāḥ saṃbhavantyapi || 98 ||
[Analyze grammar]

sthāvareṣu jaṃgameṣu paśuṣvapi bhavanti te |
vāhaneṣu kharoṣṭreṣu kravyādeṣu bhavanti te || 99 ||
[Analyze grammar]

daṃdaśūkāḥ kṛmayaśca kīṭā vihaṃgamāstathā |
aṇḍajā jantavaścāpi bahupadāścatuṣpadāḥ || 100 ||
[Analyze grammar]

unmattā badhirā mūkāḥ pāparogāvṛttāśca ye |
arvāksrotasa ityete magnāstamasi tāmasāḥ || 101 ||
[Analyze grammar]

evamete guṇavṛttā bhavanti dehinaḥ khalu |
satāṃ yogena loke'smin yathākathaṃcideva ha || 102 ||
[Analyze grammar]

puṇyavatāṃ prasaṃgena samāyāntyūrdhvamāśrayāt |
caṇḍālādyāḥ pāpapūrṇā ghātakā hiṃsakāśca vā || 103 ||
[Analyze grammar]

jāyante te'pi ca punardharmayogena śobhanām |
yonimāsādya paryāyādūrdhvamāyānti vai kvacit || 104 ||
[Analyze grammar]

viprarṣayaḥ surāḥ santo munayaḥ sukhimānavāḥ |
tatau yānti divaṃ dharmaḥ sattveneśvaravāsitām || 105 ||
[Analyze grammar]

bhaktyā samarpaṇenāpi sevayā kṛpayā'thavā |
mokṣapadaṃ prayāntyeva cireṇa śaraṇāgatāḥ || 106 ||
[Analyze grammar]

ityevaṃ kathitaṃ sarvaṃ lakṣmi dehādiyojanam |
siddhiveśāyanāyaiva muktisrotāyanena vai || 107 ||
[Analyze grammar]

labdhvā vimalavijñānaṃ śāntimavāpa cottamām |
śiṣyo divyatamāṃ dṛṣṭiṃ cāvāpa pārameśvarīm || 108 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne saṃkṣiptamuktidharmāṇāṃ dehadharmāṇāṃ māyikādīnāṃ ca nirūpaṇanāmā ṣaṭsaptatyadhikaśatatamo'dhyāyaḥ || 176 ||
[Analyze grammar]