Chapter 160

śrīpuruṣottama uvāca |
athā''yayau himādrirvai pūjārthaṃ paramātmanaḥ |
sauvarṇaṃ bahudhā dhṛtvā sthāleṣu svarṇakāgniṣu || 1 ||
[Analyze grammar]

rājateṣu ca pātreṣu vidrumānuttamān maṇīn |
māṇikyākhyān maṇīṃścāpi padmarāgamaṇīṃstathā || 2 ||
[Analyze grammar]

vajramaṇīnmārakatānnīlamaṇīnmahojjvalām |
vaidūryākhyamaṇīṃścāpi bhṛtvā sthāleṣu cāyayau || 3 ||
[Analyze grammar]

jātarūpapraṇaddhāṃśca vajramaṇīṃstathā parān |
śuktisaṃkhyānmārakatānindranīlānmahojjvalān || 4 ||
[Analyze grammar]

karkoṭakān sūryakāntāṃścandrakāntān syamantakān |
sphaṭikān gomedakāṃśca dhūlīmarakatāṃstathā || 5 ||
[Analyze grammar]

rājamaṇīn brahmamaṇīn muktāphalāni cānayat |
apūjayaddhariṃ nārāyaṇaṃ kṛṣṇaṃ pareśvaram || 6 ||
[Analyze grammar]

maṇīnāṃ mālikāhārān ratnānāṃ mālikā dadau |
hīrakāṇāṃ dadau hārān mauktikānāṃ dadau tathā || 7 ||
[Analyze grammar]

candanā'kṣatapuṣpādyairārārtrikādibhirharim |
apūjayaddhimaśailo menā satīrapūjayat || 8 ||
[Analyze grammar]

evaṃ pūjottaraṃ cādrirninye menālayaṃ śubham |
krośādhikaparimāṇaṃ sarovareṇa rājitam || 9 ||
[Analyze grammar]

samantāt sarasastasya sopānāni subhānti vai |
sauvarṇaiḥ rājatairvṛkṣairdrumairyutāni cābhitaḥ || 10 ||
[Analyze grammar]

nānāmāṇikyakusumaiḥ suprabhābharaṇojjvalaiḥ |
patrairmarakatairnīlavaidūryacchadakaistathā || 11 ||
[Analyze grammar]

tatra sarasi padmāni padmarāgacchadāni vai |
vajrakesarajālāni sugandhīni vibhānti vai || 12 ||
[Analyze grammar]

mārakatāni patrāṇi nīlavaidūryakarṇikāḥ |
śobhante vallikādehe mahāścaryakarāṇi vai || 13 ||
[Analyze grammar]

sarovarasya yā bhūmirdivyā naisargakomalā |
nānāratnairupacitā jalajānāṃ samāśrayā || 14 ||
[Analyze grammar]

kapardikānāṃ śuktīnāṃ śaṃkhānāṃ samupāśrayā |
makarāṇāṃ ca matsyānāṃ caṇḍānāṃ kacchapaiḥ saha || 15 ||
[Analyze grammar]

mārakatairasaṃkhyaiśca śobhitā vajrakoṭibhiḥ |
padmarāgendranīlaiśca mahānīlaiśca śobhitā || 16 ||
[Analyze grammar]

puṣparāgaiḥ koṭibhiśca karkoṭakairanantakaiḥ |
rājāvartaistutthakhaṇḍai rucirākṣaiśca koṭibhiḥ || 17 ||
[Analyze grammar]

sūryendukāntakoṭyādyainīṃlairvarṇāntimaistathā |
jyotīrasaiḥ sphaṭikaiśca syamantakairvalakṣakaiḥ || 18 ||
[Analyze grammar]

gomedapittakaiścāpi dhūlīmarakataistathā |
prarājamaṇibhiścāpi vaidūryagandhibhiryutā || 19 ||
[Analyze grammar]

muktāphalaistathā brahmamaṇibhirmauktikairyutā |
etādṛśī kṣitiḥ saumyā sarasaḥ parito'bhavat || 20 ||
[Analyze grammar]

sukhoṣṇaṃ ca sarastoyaṃ snānācchaityavināśakam |
tasyodakaṃ bahu svādu laghuśītaṃ sugandhikam || 21 ||
[Analyze grammar]

na kṣiṇoti yathā kaṇṭhaṃ kukṣiṃ nā''pūrayatyapi |
tṛptiṃ vidhatte paramāṃ śarīre ca mahat sukham || 22 ||
[Analyze grammar]

jalamadhye'bhavachreṣṭhaḥ prāsādo rukmabhittijaḥ |
sarvaratnamayaścandrakāntikāntitabhūstaraḥ || 23 ||
[Analyze grammar]

ramyavaidūryasopāno vidrumā'malasārakaḥ |
indranīlamahāstambho marakatotthavedikaḥ || 24 ||
[Analyze grammar]

vajrāṃśujālaiḥ sphurito ramyo dṛṣṭimanoharaḥ |
prāsāde tādṛśe menakayā pūjārthamacyutaḥ || 25 ||
[Analyze grammar]

nityaṃ saṃrakṣitaścāste bhaktecchādhīnamādhavaḥ |
bhogibhogāvalisuptaḥ sarvālaṃkārabhūṣitaḥ || 26 ||
[Analyze grammar]

jānvā tu kuñcitastvekaḥ pādaḥ śrīsvāminastathā |
phaṇīndrasanniviṣṭo'ṅghridvitīyaśca parātmanaḥ || 27 ||
[Analyze grammar]

lakṣmyutsaṃgagato'ṅghriśca śeṣabhogapraśāyinaḥ |
phaṇīndrabhogasannyastabāhuḥ keyūrabhūṣaṇaḥ || 28 ||
[Analyze grammar]

aṅgulipṛṣṭhavinyastasvaśīrṣadhraikahastakaḥ |
jānusthamaṇibandhā''kuñcitalambyanyahastakaḥ || 29 ||
[Analyze grammar]

kiñcidākuñcitanābhideśahastatṛtīyakaḥ |
āttagucchaghrāṇadeśasthitacaturthahastakaḥ || 30 ||
[Analyze grammar]

lakṣmyā saṃvāhyamānāṃ'ghriḥ padmapatranibhaiḥ karaiḥ |
santānamālāmukuṭo hārakeyūrabhūṣitaḥ || 31 ||
[Analyze grammar]

bhūṣitaśca vibhūṣābhiraṅgadairaṃgulīyakaiḥ |
phaṇīndraphaṇavinyastacāruratnaśirojjvalaḥ || 32 ||
[Analyze grammar]

ajñātavastucaritaḥ pratiṣṭhito himādriṇā |
menānupūjyaḥ satataṃ santānakusumārcitaḥ || 33 ||
[Analyze grammar]

divyagandhānuliptāṃgo divyadhūpena dhūpitaḥ |
surasaiḥ suphalairhṛdyaiścāmṛtaiḥ pāyasādibhiḥ || 34 ||
[Analyze grammar]

bhojito menakādevyā suptaścotpalaśīrṣakaḥ |
śobhitottamapārśvaśca sarvābhirdṛṣṭa eva saḥ || 35 ||
[Analyze grammar]

anādiśrīkṛṣṇanārāyaṇena vīkṣito hariḥ |
mūrtimayo'pi bhagavān divyaścotthāya sannidhau || 36 ||
[Analyze grammar]

natvā hṛdaye cāśliṣya vavande puruṣottamam |
anādiśrīhariḥ kṛṣṇanārāyaṇo jagadguruḥ || 37 ||
[Analyze grammar]

avatāragururvyūhaguruścāṃśaguruḥ svayam |
nārāyaṇānāṃ sarveṣāṃ gururmadgṛhamāgataḥ || 38 ||
[Analyze grammar]

dhanyo'smi kṛtakṛtyo'smītyuktvā pupūja kāraṇam |
pūjāṃ kṛtvā'bhavattatrā'dṛśyo mūrtau bhujaṅgamaḥ || 39 ||
[Analyze grammar]

parameśastato'pyagre himādrerbhavanaṃ yayau |
sarvaratnamayaṃ divyaprabhāyuktaṃ samṛddhikam || 40 ||
[Analyze grammar]

sarvopaskarasaṃyuktaṃ sarvabhojyasamanvitam |
sarvapeyayutaṃ divyaṃ komalāsanaśobhitam || 41 ||
[Analyze grammar]

sarvasugandhasaṃvyāptaṃkalpalatābhiśobhitam |
sarvakāmapradaṃ dāsadāsīkoṭisamanvitam || 42 ||
[Analyze grammar]

svarṇahīrakaratnānāṃ siṃhāsanena rājitam |
tasminnyaṣādayatkṛṣṇanārāyaṇaṃ hi menakā || 43 ||
[Analyze grammar]

pupūja parayā prītyā''rārtrikaṃ pracakāra ca |
haristatrā'mṛtabhojyaṃ gṛhītvā copadādikam || 44 ||
[Analyze grammar]

pāvayitvā''layaṃ cā'drestvājñayā'gre'mbare yayau |
vimānena drutaṃ prāpa kedāraṃ śikharaṃ śubham || 45 ||
[Analyze grammar]

kedāreśo mahādevaḥ śrīpateḥ purato'bhavat |
pupūja paramātmānaṃ brahmapriyādisaṃyutam || 46 ||
[Analyze grammar]

bahuratnādibhiścāpi phalapuṣpādibhistathā |
labdhvā pūjāṃ hariścāgre yayau kailāsaparvatam || 47 ||
[Analyze grammar]

tripurārisevitaṃ ca kalpadrumasamanvitam |
śaṃkaraḥ sarvagaṇayuk satīyug vīkṣya mādhavam || 48 ||
[Analyze grammar]

samīpe cā''jagāmā'pi pupūja parameśvaram |
kubero guhyakaiḥ sākaṃ pupūja śrīpatiṃ harim || 49 ||
[Analyze grammar]

sarvaratnaiḥ phalapuṣpaiḥ prāpya pūjāṃ haristataḥ |
saugandhikaṃ giriṃ vīkṣya suvelaṃ parvataṃ tathā || 50 ||
[Analyze grammar]

candraprabhaṃ giriṃ cāpi divyamacchodakaṃ saraḥ |
caitrarathaṃ vanaṃ vīkṣya sarvauṣadhiṃ giriṃ tathā || 51 ||
[Analyze grammar]

divyāraṇyaṃ viśokākhyaṃ vīkṣya kakudminaṃ girim |
vaidyutaṃ ca giriṃ vīkṣya vaibhrājaṃ ca vanaṃ tataḥ || 52 ||
[Analyze grammar]

aruṇaṃ parvataṃ vīkṣya śailodaṃ ca sarastataḥ |
gauraṃ tu parvataṃ vīkṣya saraḥ kāñcanavālukam || 53 ||
[Analyze grammar]

rājataṃ bhrājamānaṃ vai himādriṃ bhūmimaṇḍalam |
ūrdhvaṃ cābbhrasamudraṃ vai vīkṣamāṇāḥ puro yayuḥ || 54 ||
[Analyze grammar]

parvatānāṃ śreṇikāśca dṛṣṭvā śrīmānasaṃ saraḥ |
vyalokayan vimānasthā kṛṣṇapatnyaḥ suharṣitāḥ || 55 ||
[Analyze grammar]

kṛṣṇena sākaṃ tattīre cāvateruḥ samantataḥ |
srasnustāḥ svāminā sākaṃ cakruśca jalakhelanam || 56 ||
[Analyze grammar]

snapayanti snāpayanti samāśliṣyanti mādhavam |
harṣayanti modayanti snānti modanta ityapi || 57 ||
[Analyze grammar]

ānandayanti kāntaṃ śrīhariṇā hṛdi saṃdhṛtāḥ |
ānanditāḥ kāntamayyo rañjayanti priyaṃ striyaḥ || 58 ||
[Analyze grammar]

patiṃ vividhaceṣṭābhī rañjayanti tadaṅganāḥ |
kamalāni samādāya kānte tā yojayanti vai || 59 ||
[Analyze grammar]

kāścidātāḍayan kāntamudakaiḥ karatāḍitaiḥ |
tāḍyamānāśca kāntena prītimatyo'bhavaṃstadā || 60 ||
[Analyze grammar]

adṛśyanta tadā lakṣmyaḥ śvāsanṛtyatpayodharāḥ |
kāntāmbutāḍanocchīrṇakeśapāśanibandhanāḥ || 61 ||
[Analyze grammar]

snātāḥ śītāpadeśena kāścitkāntaṃ samāśliṣat |
evaṃ kāntaṃ rāmayitvā ramayitvā tataḥ striyaḥ || 62 ||
[Analyze grammar]

niryayurmaṇḍayanti sma gātrāṇi taṭamāsthitāḥ |
śṛṃgārayanti gātrāṇi bhūṣayanti vibhūṣaṇaiḥ || 63 ||
[Analyze grammar]

sajjā bhūtvā vimānasthā babhūvuḥ pativāñcchayā |
vimānena tataḥ sarvā dhavalaṃ girimāyayuḥ || 64 ||
[Analyze grammar]

tataśca vanaśobhāḍhyaṃ hanumatparvataṃ yayuḥ |
hanūmatā pūjitaśca śrīpatiḥ puruṣottamaḥ || 65 ||
[Analyze grammar]

lakṣmyā sampūjitaścāpi hanūmān tapasaḥ sthitau |
sahāyakṛt parvate'pi purā rakṣākaraḥ kapiḥ || 66 ||
[Analyze grammar]

tato vimānamārgeṇa yayurgagāṃ tu kāñcanīm |
jalāni tatra pītvaiva śiveśvarapurīṃ yayuḥ || 67 ||
[Analyze grammar]

vārāṇasīṃ mahāśreṣṭhāṃ pāvanīṃ varaṇānvitām |
gaṃgāṃ suśobhanāṃ prāpya dṛṣṭvā viśveśvaraṃ śivam |
viśveśvaragṛhe sarvā rātriṃ ninyuḥ sukhānvitām || 68 ||
[Analyze grammar]

śaṃkareṇa tu kṛṣṇasya sammānaṃ bahudhā kṛtam |
bhojanācchādanādyaiśca pānaiḥ saṃvāhanādibhiḥ || 69 ||
[Analyze grammar]

śayanaiḥ sukhabhogādyaiḥ prasāditaḥ pareśvara |
vaikuṇḍasadṛśe harmye rātriṃ nināya mādhavaḥ || 70 ||
[Analyze grammar]

pūjāṃ prāpya bhojanādi kṛtvā vidāyamālabhat |
vimānena drutaṃ vindhyācalaṃ vīkṣya tataḥ param || 71 ||
[Analyze grammar]

saptapuṭaṃ parvataṃ ca bhṛgukacchaṃ śriyāḥ puram |
gopanāthaṃ tato vīkṣya nijāṃ lomaśabhūmikām || 72 ||
[Analyze grammar]

nagarīmāyayuḥ sarvā viśrāntimāpuruttamām |
atha sāyaṃ sthitāḥ svāmināthasya purataḥ striyaḥ || 73 ||
[Analyze grammar]

bhojanādi vidhāyaiva papracchuḥ parameśvaram |
ratnānīmāni sarvāṇi hīrakādīni keśava || 74 ||
[Analyze grammar]

kadā kasmāt prajātāni himālayā'rpitāni vai |
bhautikāni hi sarvāṇi na tu divyāni santi vai || 75 ||
[Analyze grammar]

kaustubhāderleśamātradivyataiteṣu nāsti yat |
maṇiratnakathāṃ śrotumicchāmahe vayaṃ prabho || 76 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne himādrikṛtapūjāṃ pragṛhya kedārakailāsamānasarohanūmatparvatakāśīvindhyasaptapuṭabhṛgukacchagopanāthādīn vīkṣya hareḥ lomaśavāpikāgamanaṃ brahmapriyāṇāṃ bhautikahīrakādyutpattijijñāsā cetyādinirūpaṇanāmā ṣaṣṭyadhikaśatatamo'dhyāyaḥ || 160 ||
[Analyze grammar]