Chapter 148

śrīpuruṣottama uvāca |
śṛṇu nārāyāṇīśri tvaṃ hṛdutthavaikṛtāni tu |
śarīrotthāni cānyāni śakunasphuraṇāni ca || 1 ||
[Analyze grammar]

śarīre sphurite mūrghni pṛthvīlābho bhavedapi |
lalāṭe sthānavṛddhiḥ syānbhrūnasoḥ priyasaṃgamaḥ || 2 ||
[Analyze grammar]

netrasphurtau bhṛtyalābho dṛgupānte dhanāgamaḥ |
ūrdhve madhye cāpagamo dravyasyaiva prajāyate || 3 ||
[Analyze grammar]

dṛṅmūle sphurite lakṣmi jayaḥ śīghraṃ bhavediti |
adhaḥsphurtau striyā bhogaḥ śravaṇānte priyā śrutiḥ || 4 ||
[Analyze grammar]

nāsikāyāṃ prītisaukhyaṃ prajāptiradharoṣṭhaje |
kaṇṭhasphurtau bhogalabdhirbhogavṛddhistathāṃ'sayoḥ || 6 ||
[Analyze grammar]

bāhvoḥ sphurtau suhṛtsneho hastayostu dhanāgamaḥ |
pṛṣṭhasphutau na vijayo vakṣaḥsphurtau jayo bhavet || 6 ||
[Analyze grammar]

kukṣisphurtau prītilābhaḥ stane strīprasavo bhavet |
nābhisphurtau sthānahānirantrasphurtau dhanāgamaḥ || 7 ||
[Analyze grammar]

jānusandhau paraiḥ sandhirbalibhiśca samāgamaḥ |
jaṅghāsphurtau khaṇḍabhāgevināśaḥ syānna saṃśayaḥ || 8 ||
[Analyze grammar]

pādayoḥ sphuraṇe lakṣmi dhiṣṇyasthānamavāpnuyāt |
pādatalasphure cādhvapravāso lābhakṛd bhavet || 9 ||
[Analyze grammar]

vāme nāryā sadā lābhā dakṣe puṃsaḥ sphurādayaḥ |
alābhadā viparyastā bhaveyurnātra saṃśayaḥ || 10 ||
[Analyze grammar]

aniṣṭasphurtijanane havanaṃ tarpaṇaṃ tathā |
suvarṇena prakartavyaṃ dānaṃ ca bhojanādikam || 11 ||
[Analyze grammar]

śāntistatra vaiṣṇavī vā raudrī kāryā sukhāptaye |
atha hṛdutthavikṛtākārān nidrāmayān śṛṇu || 12 ||
[Analyze grammar]

aniṣṭān duṣṭaphaladān dṛṣṭvā śāntiṃ prakārayet |
nābhiṃ vinā'nyagātreṣu tṛṇavṛkṣāṃkurodbhavaḥ || 13 ||
[Analyze grammar]

cūrṇanaṃ mūrdhni kāṃsyānāṃ muṇḍanaṃ nagnatā tathā |
malināmbaradhāritvamabhyaṃgaḥ paṅkamardanam || 14 ||
[Analyze grammar]

paṃke ca magnatā coccaiḥ pāto dolādhirohaṇam |
arjanaṃ pakvalauhānāmaśvānāṃ māraṇaṃ tathā || 15 ||
[Analyze grammar]

raktapuṣpadrumāṇāṃ ca maṇḍalasyā'dhirohaṇam |
varāharkṣakharoṣṭrāṇāṃ tathā cārohaṇakriyā || 16 ||
[Analyze grammar]

bhakṣaṇaṃ pakvamāṃsānāṃ tailasya kṛsarasya ca |
nartanaṃ hasanaṃ cāpi vivāho gītamityapi || 17 ||
[Analyze grammar]

tantrīvādyavihīnānāṃ vādyānāmabhivādanam |
sroto'vagāhanaṃ cāpi snānaṃ gomayavāribhiḥ || 18 ||
[Analyze grammar]

paṃkena snānamevāpi dhūlītoyena vāpi ca |
mātuḥ praveśo jaṭhare citārohaṇamityapi || 19 ||
[Analyze grammar]

indradhvajābhipatanaṃ patanaṃ candrasūryayoḥ |
divyāntarikṣabhaumānāmutpātānāṃ ca darśanam || 20 ||
[Analyze grammar]

devadvijātibhūpālagurūṇāṃ krodhanaṃ tathā |
āliṅganaṃ kumārīṇāṃ puruṣāṇāṃ tu maithunam || 21 ||
[Analyze grammar]

hāniścāpi svagātrāṇāṃ virekavamanādikam |
dakṣiṇāśābhigamanaṃ vyādhinā'bhibhavo'pi ca || 22 ||
[Analyze grammar]

puṇyahāniḥ phalahāniḥ svapne gṛhasya mārjanam |
gṛhasya patanaṃ krīḍā piśācairvānaraiḥ saha || 23 ||
[Analyze grammar]

ṛkṣakravyādakunaraiḥ kustrībhī ramaṇaṃ tathā |
parādabhibhavaścāpi parācca duḥkhasaṃbhavaḥ || 24 ||
[Analyze grammar]

kāṣāyāmbaradhāritvaṃ kāṣāyistrīsamāgamaḥ |
snehapānaṃ snehamagnatā raktapuṣpalepanam || 25 ||
[Analyze grammar]

bhojanānāṃ bhraṣṭatā ca kāṣṭhānāṃ darśanaṃ tathā |
gantrīṇāṃ mārgabhraṃśaśca bahusaṃyāvabhojanam || 26 ||
[Analyze grammar]

veśyānāṃ darśanaṃ tāsāṃ stanyapānaṃ tathā khalu |
śataghnīnāṃ sphoṭanādi tathocchiṣṭādibhojanam || 27 ||
[Analyze grammar]

raṃgakāragṛhāṇāṃ ca darśanaṃ ghātakasya ca |
taḍāgānāṃ pravāheṣu patanaṃ sasyadāhanam || 28 ||
[Analyze grammar]

kalahaśca jalairnaukābharaṇaṃ cāndhadarśanam |
kālīkaṭyāṃ niṣadanaṃ hyupānat mastake sthitam || 29 ||
[Analyze grammar]

viruddhākṣaravinyāsā pravāse nijadarśanam |
citramūrtyadṛśyatā ca gaṇeśaśavamastakam || 30 ||
[Analyze grammar]

uṣṭrasya darśanaṃ bhojyabhakṣaṇe vighnatā tathā |
muṇḍanaṃ cābdhipatanaṃ liṃgād raktasravastathā || 31 ||
[Analyze grammar]

jīrṇāmbaradharatvaṃ ca gurorviprasya kruddhatā |
bhaṣamāṇaśvā'valokaḥ phaṇādhragrahaṇaṃ mṛtiḥ || 32 ||
[Analyze grammar]

candraśālāditaścāpi śilāsu patanaṃ tathā |
vanimārjārā'valokaḥ kṛṣṇapuṃkṛtalakṣyakam || 33 ||
[Analyze grammar]

niśānaṃ dhūṣkṛtīnāṃ ca mṛṣā''yudhasya sphoṭanam |
takrakṛsarāprāśaśca vastūnāṃ vigamo'pi ca || 34 ||
[Analyze grammar]

śatrūṇāṃ darśanaṃ cāpi viṣṭāyāṃ pādapātanam |
ṣaṭapadīyajantūnāṃ ca viṣṭhāyāṃ darśanaṃ tathā || 35 ||
[Analyze grammar]

yavanādyaiḥ kṛtaṃ karṇanāsikayośca kartanam |
nagnaṃ svadarśanaṃ tailāktaṃ raktastrīsuyojanam || 36 ||
[Analyze grammar]

mukuṭādeḥ paścabhāge vivartanaṃ prapātanam |
śikhāprapātanaṃ kalgeḥ prapātanaṃ datāmapi || 37 ||
[Analyze grammar]

liṃgasya patanaṃ cāpi patnīprajvalanaṃ tathā |
galapāśāvalokaśca tāḍane maraṇaṃ tathā || 38 ||
[Analyze grammar]

gostrīvadhādikaṃ svapne mahotpātādidarśanam |
pitṝṇāṃ darśanaṃ cāpi paradeśapalāyanam || 39 ||
[Analyze grammar]

sarvaiḥ kṛtastiraskāraḥ śavādhirohaṇaṃ tathā |
śatrubhiśca dhṛtaścāpi dravyasya tu bhuvastalāt || 40 ||
[Analyze grammar]

bhūtvā pipīlikā yānaṃ vṛścikā vā tathāvidham |
patnyāḥ palāyanaṃ cāpi sarvasvanāśasūcakam || 41 ||
[Analyze grammar]

kanyāvaidhavyabhāvaśca devālayavināśanam |
raktasrāvo raktarogaḥ kṣayarogasya darśanam || 42 ||
[Analyze grammar]

mṛtagarbhaprasavaśca garbhiṇīmaraṇaṃ tathā |
vimānapatanaṃ cāpi śakaṭībhaṃga ityapi || 43 ||
[Analyze grammar]

vyāghradhṛtiḥ siṃhakṛtaṃ māraṇaṃ svasya vai vane |
makarairdharṣaṇaṃ cāpi gahvare patanaṃ tathā || 44 ||
[Analyze grammar]

khāte rodhastathā naije bhavane rodhanaṃ tathā |
pādayorbandhanaṃ cāpi vidāyaṃ bahubhirjanaiḥ || 45 ||
[Analyze grammar]

cāṇḍālībhoga evāpi cāṇḍālabhoga ityapi |
bhūtānāṃ darśanaṃ svapne bhayadā'raṇyadarśanam || 46 ||
[Analyze grammar]

hiṃsrāṇāṃ darśanaṃ cāpi vahnimadhye praveśanam |
yānena svargagamanaṃ śmaśānagamanaṃ tathā || 47 ||
[Analyze grammar]

yāmyāvalokanaṃ cāpi kālapuruṣadarśanam |
pretasya darśanaṃ svapne pāśadharasya darśanam || 48 ||
[Analyze grammar]

rājadūtasyā'valoko garuḍasyāpi darśanam |
tulasībhakṣaṇaṃ cāpi gomayairbhūvilepanam || 49 ||
[Analyze grammar]

jhaṃjhāvātenohyamānatvaṃ ca yantreṇa karṣaṇam |
samāje karcanaṃ cāpi pādaiḥ pradalanaṃ tathā || 50 ||
[Analyze grammar]

vamanaṃ raktakamiśraṃ vamane kīṭadarśanam |
kṛṣṇasarpasya daṃśaśca bhojane kṛmidarśanam || 51 ||
[Analyze grammar]

adrīṇāṃ cālanaṃ cāpi bhavanānāṃ ca cālanam |
kanyānāṃ bālasūtiśca strīṇāṃ vikṛtasūtitā || 52 ||
[Analyze grammar]

narāṇāṃ śmaśruprapātaḥ strīṇāṃ śmaśruprarohaṇam |
narāṇāṃ strīveṣavattvaṃ strīṇāṃ puruṣaveṣitā || 53 ||
[Analyze grammar]

astanītvaṃ tathā strīṇāṃ narāṇāṃ stanayuktatā |
svapne ced dṛśyate tvetad deśahānirmahābhayam || 54 ||
[Analyze grammar]

rājā svapne hato dṛṣṭo rājyanāśo bhaveddhruvam |
vṛkṣāṇāṃ gamanaṃ cāpi vallīnāṃ gamanaṃ tathā || 55 ||
[Analyze grammar]

kanyānāṃ gamanaṃ cāpi videśaṃ prati dṛśyate |
lakṣmīhāniśca durbhikṣaṃ bhavedeva na saṃśayaḥ || 56 ||
[Analyze grammar]

saritāṃ gamanaṃ cāpyudvelatā'bdheḥ samantataḥ |
jalena pralayastatra khaṇḍasya ca kṣiterapi || 57 ||
[Analyze grammar]

pṛthivyā vā pralayaḥ syānnātra kāryā vicāraṇā |
devālayānāṃ gamanaṃ cādrīṇāṃ gamanaṃ tathā || 58 ||
[Analyze grammar]

śilāsainyavihāraśca deśanāśaphalo bhavet |
durge śabdāstu jāyante'jñātā bhayāvahā yadi || 59 ||
[Analyze grammar]

durganāśabhayaṃ tatra rājyanāśabhayaṃ bhavet |
kakṣāsu garjanā rātrāvākasmikī bhaved yadi || 60 ||
[Analyze grammar]

rogavyāptirmahāmārī prajānāśo'ti jāyate |
hasanti gṛhakoṇeṣu vānarāḥ ṛkṣakā yadi || 61 ||
[Analyze grammar]

gṛhaṃ śūnyaṃ bhavedeva māsānte nātra saṃśayaḥ |
muṇḍī raktāmbaraḥ svapne dṛśyate daṇḍadhṛg yadi || 62 ||
[Analyze grammar]

maraṇaṃ tatra jāyeta vināśaḥ sampadāmapi |
vanadevyo yatra śuṣkāḥ kṣīṇāśca vṛddhakanyakāḥ || 63 ||
[Analyze grammar]

sagarbhā śuṣkadehāśca dṛśyante svapnake yadi |
bhagnapādāśca khañjyaśca vṛkṇyaḥ śṛṃgakakudmikāḥ || 64 ||
[Analyze grammar]

anāvṛṣṭihatā lokā mriyante'tra na saṃśayaḥ |
gāvo yatra viśasyante mlecchaiḥ svapne'valokyate || 65 ||
[Analyze grammar]

tatra mlecchopadravāśca jāyante nātra saṃśayaḥ |
kravyādā yatra dṛśyante nagaropari yūthaśaḥ || 66 ||
[Analyze grammar]

nagarasya vināśaḥ syād rakṣā rudramakhairbhavet |
ujjvalā ujjalāḥ kanyā rudanti yānti yatsthalāt || 67 ||
[Analyze grammar]

tatra vidyāvināśaḥ syādudyogānāṃ vināśanam |
kalākauśalyanāśaśca dāridryaṃ raṃkatā''patet || 68 ||
[Analyze grammar]

vidhavānāṃ maṇḍalāni dṛśyante yatra cābhitaḥ |
kabandhānāṃ maṇḍalāni tatra nāśo hi saṃgarāt || 69 ||
[Analyze grammar]

anṛtau paśavo yatra skhalanti pāśavīṣu vai |
dharmabhaṃgo bhaved deśe mlecchācāravivardhanam || 70 ||
[Analyze grammar]

evamādīni cānyāni kuṣṭhādidarśanaṃ tathā |
duḥsvapnāni bhaveyuśca drāk teṣāṃ kathanaṃ varam || 71 ||
[Analyze grammar]

bhūyaḥ prasvāpanaṃ cāpi kalkasnānaṃ tilairapi |
homovahnau brāhmaṇānāṃ satāṃ pūjā surārcanam || 72 ||
[Analyze grammar]

stutiḥ śrīharikṛṣṇasya vāsudevasya pūjanam |
nāgendramokṣaśravaṇaṃ bālakṛṣṇasya pūjanam || 73 ||
[Analyze grammar]

rudrayāgo viṣṇuyāgaścotsavo harikīrtanam |
kārayet svagṛhe lakṣmī kathāṃ nārāyaṇāśritām || 74 ||
[Analyze grammar]

lakṣmīnārāyaṇasaṃhitāyāḥ pārāyaṇaṃ mahat |
bhaye mahati samprāpte kāraṇīyaṃ bhayāpaham || 75 ||
[Analyze grammar]

svapnaṃ tu prathame yāme samvatsare phalapradam |
ṣaḍbhirmāsairdvitīye tu tribhirmāsaistṛtīyake || 76 ||
[Analyze grammar]

caturthe māsamātreṇa prātardaśāhakṛtphalam |
svapnadvaye śubhāśubhe rātrau syātāṃ tadā phalam || 77 ||
[Analyze grammar]

paścād dṛṣṭasya jāyeta prāgdṛṣṭaṃ lopamīyate |
eteṣāmasatāṃ svapne darśane tannivāraṇam || 78 ||
[Analyze grammar]

grahayajñaṃ viṣṇuyajñaṃ rudrayajñaṃ satīmakham |
pitṛyajñaṃ bhojyayajñaṃ dānapuṇyaṃ samācaret || 79 ||
[Analyze grammar]

rājñā dharmaprasaktena prajānāṃ ca hitepsunā |
grahayajñāḥ prakartavyā lakṣahomasamanvitāḥ || 80 ||
[Analyze grammar]

nadīnāṃ saṃgame cāpi devānāmagratastathā |
taṭākasannidhau daivatīrthe bhūmiṃ parīkṣayet || 81 ||
[Analyze grammar]

khanet kuṇḍaṃ hastamātraṃ cāṣṭottarasahasrakam |
havanaṃ tatra kartavyaṃ śāntistena prajāyate || 82 ||
[Analyze grammar]

dviguṇaṃ lakṣahome ca koṭihome caturguṇam |
aṣṭau vai ṛtvijaḥ kāryā mūlakṣīraphalāśanāḥ || 83 ||
[Analyze grammar]

ratnāni dānayogyāni maṇḍape sannidhāpayet |
gāyatryā daśasāhasraṃ mānastokena ṣaḍguṇaḥ || 84 ||
[Analyze grammar]

triṃśad grahādimantraiśca catvāro viṣṇudaivataiḥ |
kuṣmāṇḍairjuhuyāt pañca kusumādyaistu ṣoḍaśa || 85 ||
[Analyze grammar]

hotavyā daśasāhasraṃ bādarairjātavedasi |
śriyo mantreṇa hotavyāḥ sahasrāṇi caturdaśa || 86 ||
[Analyze grammar]

śeṣāḥ pañcasahasrāṇi hotavyāstvindradaivataiḥ |
hutvā śatasahasraṃ tu puṣyasnānaṃ samācaret || 87 ||
[Analyze grammar]

kuṃbhaiḥ ṣoḍaśasaṃjñaiśca sahiraṇyaiḥ sumaṃgalaiḥ |
snāpayed yajamānaṃ tu tataḥ śāntirbhaved dhruvam || 88 ||
[Analyze grammar]

hastyaśvarathayānāni bhūmivastradhanāni ca |
anaḍudgośataṃ dadyāt ṛtvijāṃ cātra dakṣiṇām || 89 ||
[Analyze grammar]

māse pūrṇasamāptau tu lakṣahomaḥ prakīrtitaḥ |
koṭihomavidhānaṃ tu śṛṇu lakṣmi nadītaṭe || 90 ||
[Analyze grammar]

ṛtvijaḥ ṣoḍaśa tatra dīkṣā sāmvatsarī matā |
caitre vā kārtike homāraṃbhaṃ kṛtvā tu vatsaram || 91 ||
[Analyze grammar]

kārayet yajamānastu payobhakṣī phalāśanaḥ |
yavādivrīhayo māṣāstilāśca sarṣapāstathā || 92 ||
[Analyze grammar]

pālāśāḥ samidhaḥ śastā vasordhārā tathopari |
ādyamāse tu ṛtvigbhyo dadyādvai kṣīrabhojanam || 93 ||
[Analyze grammar]

dvitīye kṛsarāṃ dadyāddharmakāmārthasādhinīm |
tṛtīye māsi saṃyāvaṃ caturthe modakān śubhān || 94 ||
[Analyze grammar]

pañcame dadhibhaktaṃ ca ṣaṣṭhe tu saktubhojanam |
pūpāṃśca saptame dadyādaṣṭame ghṛtapūpakān || 95 ||
[Analyze grammar]

miṣṭaudanaṃ ca navame daśame yavamiṣṭakam |
ekādaśe māṣavaṭān dvādaśe ṣaḍrasān diśet || 96 ||
[Analyze grammar]

ahatavāsāḥ saṃvīto dinārdhaṃ juhuyācchuciḥ |
indrādyādisurāṇāṃ ca prīṇanaṃ sārvakāmikam || 97 ||
[Analyze grammar]

sarvadānāni devānāmagniṣṭomaṃ ca kārayet |
vidhinā kārayettatra pūrṇāhutiṃ śate śate || 98 ||
[Analyze grammar]

sahasre dviguṇā deyā yāvacchatasahasrakam |
puroḍāśo devatābhyo deyaḥ samarcayed dvijān || 99 ||
[Analyze grammar]

surān pitṝn tarpayecca piṇḍārpaṇairvidhānataḥ |
homānte dakṣiṇāṃ dadyāttulā śikyadvayānvitām || 100 ||
[Analyze grammar]

badhvā''tmānaṃ tolayecca patnīṃ ca tolayettathā |
suvarṇena rajatena śarkarābhiśca hīrakaiḥ || 101 ||
[Analyze grammar]

dadyād dānaṃ rājasūyaphalaṃ syād vighnanāśakam |
prīyatāṃ śrīharikṛṣṇaḥ sarvayajñeśvaraḥ prabhuḥ || 102 ||
[Analyze grammar]

ityuktyā praṇamed viprān bhojayellakṣamānavān |
sarvopaghātā naśyanti puṇyānyasya bhavanti ca || 103 ||
[Analyze grammar]

na śocejjanmamaraṇe kṛtākṛtavicāraṇe |
yathāśakti prakuryādvā grahādimakhamuttamam || 104 ||
[Analyze grammar]

sarvatīrthavidhānasya sarvayajñavidheḥ phalam |
evaṃ kṛtvā''pnuyāllakṣmi śravaṇātpaṭhanādapi || 105 ||
[Analyze grammar]

itiśrīlakṣmīnārāyaṇīyasaṃhitāyāṃ tṛtīye dvāparasantāne duḥsvapnādyupaghāta tacchāntyarthakagrahayajñādinirūpaṇanāmā aṣṭacatvāriṃśadadhikaśatatamo'dhyāyaḥ || 148 ||
[Analyze grammar]