Chapter 146

śrīpuruṣottama uvāca |
śṛṇu nārāyaṇīśri tvaṃ bhaktasya gāyakasya me |
japato me'bhidhānāni divyatā cā'tra jāyate || 1 ||
[Analyze grammar]

yatra me gāyanaṃ lakṣmi bhajanaṃ mama kīrtanam |
mahotpātā na vai tatra jāyante'pi kadācana || 2 ||
[Analyze grammar]

mama bhaktivihīnānāṃ mahotpātā bhavanti vai |
teṣāṃ śāntiḥ prakartavyā'nyathā naśyanti mānavāḥ || 3 ||
[Analyze grammar]

śrīnārāyaṇīśrīruvāca |
mahotpāteṣu jāteṣu kā śāntisteṣu vidyate |
sarvadehihitārthaṃ me brūhi śāntiṃ tathāvidhām || 4 ||
[Analyze grammar]

śrīpuruṣottama uvāca |
śṛṇu lakṣmi mahotpātā divyā'ntarikṣabhūmijāḥ |
jāyante yatra ye teṣāṃ śāntiṃ vadāmi tattvataḥ || 5 ||
[Analyze grammar]

saumyā śāntistu divyeṣu hyantarikṣeṣu cā'bhayā |
vaiṣṇavī śāntiriṣṭā ca bhaumotpāteṣu padmaje || 6 ||
[Analyze grammar]

vijigīṣuḥ paraṃ śatruṃ bhūtikāmaśca yo bhavet |
parairabhicāritaśca śatrunāśecchukaśca yaḥ || 7 ||
[Analyze grammar]

mahadbhayavināśārthamabhayāṃ śāntimācaret |
sādhubhiścāpi vipraiśca kārayecchāntimuttamām || 8 ||
[Analyze grammar]

rājayakṣmābhibhūtastu kṣatakṣīṇo'tirogavān |
yajñakāmo dharmakāmaḥ saumyāṃ śāntiṃ prakārayet || 9 ||
[Analyze grammar]

bhūkampe'nnavināśe ca durbhikṣe cātivarṣaṇe |
śalabhādibhayotpanne caurapramattaje bhaye || 10 ||
[Analyze grammar]

śāntiṃ tu vaiṣṇavīṃ tatra viṣṇubhaktaḥ prakārayet |
paśūnāṃ māraṇe prāpte narāṇāmapi māraṇe || 11 ||
[Analyze grammar]

dehināṃ dāruṇe mṛtyau raudrīṃ śāntiṃ vidhāpayet |
yajñaṃ ca havanaṃ cāpi cared rudrādipūjanam || 12 ||
[Analyze grammar]

vedanāśe śāstranāśe nāstikeṣu janeṣu ca |
apūjyapūjane jāte brāhmīṃ śāntiṃ samācaret || 13 ||
[Analyze grammar]

parameṣṭhiprapūjādi kārayed vedavedibhiḥ |
bhaviṣyatyabhiṣeke ca paracakrabhaye'pi ca || 14 ||
[Analyze grammar]

svarāṣṭrabhede'rivadhe raudrīṃ śāntiṃ prakārayet |
tryahātirikte pavane jhaṃjhāvāte'tidāruṇe || 15 ||
[Analyze grammar]

sarvavigarhite bhakṣye vātaje vikṛte bhaye |
vyādhau vā vātaje jāte vāyavīṃ śāntimācaret || 16 ||
[Analyze grammar]

anāvṛṣṭibhaye jāte cātivṛṣṭibhaye'pi ca |
vikṛtivarṣaṇe jāte vikṛte ca jalāśaye || 17 ||
[Analyze grammar]

jalotpanne bhaye tatra vāruṇīṃ śāntimācaret |
abhiśāpabhaye jāte mantraśāpabhaye'pi ca || 18 ||
[Analyze grammar]

mithyāśāpabhaye prāpte bhārgavīṃ śāntimācaret |
jāte prasavavaikṛtye garbharoge ca prasrave || 19 ||
[Analyze grammar]

śuṣke ca prasave kuryācchāntiṃ prājāpatīṃ rame |
upaskārāṇāṃ vaikṛtye bhavanānāṃ tathā rame || 20 ||
[Analyze grammar]

śakaṭānāṃ vāhanānāṃ tvāṣṭrīṃ śāntiṃ samācaret |
bālānāṃ bālikānāṃ ca vikṛtau ca bhaye'pi ca || 21 ||
[Analyze grammar]

vināśe cājīvane ca kaumārīṃ śāntimācaret |
dāvabhaye vahnibhaye tvāgneyo śāntimācaret || 22 ||
[Analyze grammar]

ājñābhaṃge tu sañjāte jāte bhṛtyādisaṃkṣaye |
aśvādīnāṃ vikāre tu rogātmake hyupasthite || 23 ||
[Analyze grammar]

gītikādau vikāre ca kaṇṭhādipatane'pi ca |
galaroge vraṇādau ca gāndharvīṃ śāntimācaret || 24 ||
[Analyze grammar]

gajānāṃ tu vikāre'pi śāntimāṅgīrasīṃ caret |
piśācādibhaye jāte bhūtapretādivalgane || 25 ||
[Analyze grammar]

ḍākinyādikṛte kaṣṭe nairṛtīṃ śāntimācaret |
apamṛtyubhaye prāpte duḥsvapne cā'valokite || 26 ||
[Analyze grammar]

nārake vā tādṛśe vā prāpte duḥkhe yamādibhiḥ |
asadgatau yāmyavāse yāmyāṃ śāntiṃ vidhāpayet || 27 ||
[Analyze grammar]

dhananāśe dravyanāśe bhūṣāratnādināśane |
sampadāṃ ca vināśe tu kauberīṃ śāntimācaret || 28 ||
[Analyze grammar]

vṛkṣāṇāṃ cāpi sasyānāṃ kandānāṃ phalināṃ tathā |
vallīnāṃ ca kaṇānāṃ ca mūlānāṃ phalavaikṛtau || 29 ||
[Analyze grammar]

arthānāṃ bhūtiyogānāṃ nāśe śāntiṃ tu pārthivīm |
kārayed vedavidbhistāṃ śāntikarmā'bhivedibhiḥ || 30 ||
[Analyze grammar]

prathame dinayāme ca rātrau vā samupadrave |
haste svātau ca citrāyāmāditye cāśvine tathā || 31 ||
[Analyze grammar]

aryamṇi cāpi jāte vā tathā'nyopadraveṣu ca |
adbhuteṣvapi jāteṣu vāyavīṃ śāntimācaret || 32 ||
[Analyze grammar]

dvitīye dinayāme tu rātrau vā samupadrave |
puṣyāgre ca viśākhāsu pitryāsu bharaṇīṣu ca || 33 ||
[Analyze grammar]

utpāteṣu tathā bhāgye tvāgneyīṃ śāntimācaret |
tṛtīye dinayāme ca rātrau ca samupadrave || 34 ||
[Analyze grammar]

rohiṇyāṃ vaiṣṇave brāhme vāsave vaiśvadaivate |
jyeṣṭhāyāṃ ca tathā maitrye hyupadraveṣu sarvathā || 35 ||
[Analyze grammar]

aindrīṃ śāntiṃ kārayecca viprairmantrapravedibhiḥ |
caturthe dinamāne tu rātrau vā samupadrave || 36 ||
[Analyze grammar]

sārpe pauṣṇe tathā''rdrāyāmahirbudhnye ca dāruṇe |
mūle varuṇadaivatye vārūṇīṃ śāntimācaret || 37 ||
[Analyze grammar]

mitramaṇḍalavelāsu jāyamāne hyupadrave |
adbhuteṣu vicitreṣu śāntidvayaṃ prakārayet || 38 ||
[Analyze grammar]

śāntirvarma bhavatyeva rakṣatyupadravāditaḥ |
śāntiḥ patnī hi dharmasya dakṣasya duhitā matā || 39 ||
[Analyze grammar]

dharmayuktā mayā cāpi yuktā balena yojitā |
mama śaktisvarūpā ca madbalenā'bhiveśitā || 40 ||
[Analyze grammar]

tattaddevabalaiḥ puṣṭā haratyadyānyupadravān |
upaghātāḥ palāyante śāntināmakakarmabhiḥ || 41 ||
[Analyze grammar]

janāpacārānniyatamaparajyanti devatāḥ |
devanāmaparāgācca hyupasargaḥ pravartate || 42 ||
[Analyze grammar]

divyāntarikṣabhaumākhyastacchāntistatra śāntidā |
graharkṣavaikṛto divyaścopasargaḥ prakīrtitaḥ || 43 ||
[Analyze grammar]

ulkāpāto diśāṃ dāhaḥ pariveṣastathaiva ca |
gandharvanagaraṃ cāpi vṛṣṭistu vikṛtā tathā || 44 ||
[Analyze grammar]

raktavṛṣṭirviṣatāpaścāntarikṣopasargakāḥ |
carasthirabhavau bhaumo bhūkampaścāpi bhūmijaḥ || 45 ||
[Analyze grammar]

jalāśayānāṃ vaikṛtyaṃ bhaumaḥ so'pyupasargakaḥ |
bhaume tvalpaphalaṃ jñeyaṃ cireṇa sa vipacyate || 46 ||
[Analyze grammar]

abhrajo madhyaphalado madhyakālaphalapradaḥ |
adbhute tu samutpanne yadi vṛṣṭiḥ śivā bhavet || 47 ||
[Analyze grammar]

saptāhābhyantare jñeyamadbhutaṃ niṣphalaṃ bhavet |
adbhutānāṃ nivṛttistu vināśāntyā na jāyate || 48 ||
[Analyze grammar]

tribhirvaṣairadbhutaṃ syāt sumahadbhayakāraṇam |
rājñaḥ śarīre loke vā puradvāre purohite || 49 ||
[Analyze grammar]

pākamāyāti putreṣu tathā kośe ca vāhane |
ṛtusvabhāvājjāyante hyadbhutā upasargakāḥ || 50 ||
[Analyze grammar]

śāntikarmopaśamitāḥ śubhāvahā bhavanti te |
kālamāsaprabhede tu śubhāste śāntimantarā || 51 ||
[Analyze grammar]

vajrāśanimahīkampā'sasthanirghātanisvanāḥ |
pariveṣarajodhūmaraktā'rkā'stamayodayāḥ || 52 ||
[Analyze grammar]

drumodbhedakarasneho bahuśaḥ saphaladrumaḥ |
gopakṣimadhuvṛddhiśca śubhāḥ phālgunacaitrayoḥ || 53 ||
[Analyze grammar]

ṛkṣolkāpātakaluṣaṃ kapilā'rkendumaṇḍalam |
kṛṣṇaṃ śvetaṃ ca pītaṃ ca dhūsaraṃ dhvānnalohitam || 54 ||
[Analyze grammar]

raktaṃ puṣpāruṇaṃ sāndhyaṃ namaḥ kṣubdhārṇavopamam |
saritāṃ cāmbusaṃśoṣaścaite grīṣme śubhāvahāḥ || 55 ||
[Analyze grammar]

śakrāyudhapariveṣo vidyudulkādhirohaṇam |
kampodvartanavaikṛtyaṃ hasanaṃ dāruṇaṃ kṣiteḥ || 56 ||
[Analyze grammar]

nadyodapāne sarasāṃ vidhūnataraṇaplavāḥ |
śṛṅgiṇāṃ ca varāhāṇāṃ varṣāsu śubhadā hi te || 57 ||
[Analyze grammar]

śītānilatuṣārāśca nardanaṃ mṛgapakṣiṇām |
rakṣobhūtapiśācānāṃ darśanaṃ vāgamānuṣī || 58 ||
[Analyze grammar]

diśo dhūmāndhakārāśca sanabhovanaparvatāḥ |
uccaiḥ sūryodayā'stau ca hemante cecchubhāvahāḥ || 59 ||
[Analyze grammar]

divyastrīrūpagandharvavimānādbhutadarśanam |
grahanakṣatratārāṇāṃ darśanaṃ vāgamānuṣī || 60 ||
[Analyze grammar]

gītavāditranirghoṣo vanaparvatasānuṣu |
sasyavṛddhī rasotpattiḥ śaratsu cecchubhāvahāḥ || 61 ||
[Analyze grammar]

himapātā'nilotpātavirūpādbhutadarśanam |
kṛṣṇāñjanābhamākāśaṃ tārolkāpātapiñjaram || 62 ||
[Analyze grammar]

citragarbhodbhavaḥ strīṣu go'jāśvamṛgapakṣiṣu |
patrā'ṅkuralatānāṃ ca vikārāḥ śiśire śubhāḥ || 63 ||
[Analyze grammar]

devatārcāḥ pranṛtyanti vepante prajvalanti ca |
vamantyagniṃ tathā dhūmaṃ snehaṃ raktaṃ tathā vasām || 64 ||
[Analyze grammar]

āramanti rudantyetāḥ prasvidyanti hasantyapi |
uttiṣṭhanti niṣīdanti pradhāvanti dhamanti ca || 65 ||
[Analyze grammar]

vikṣipanti bhuñjate vā kośapraharaṇadhvajān |
avāṅmukhā vai bhavanti sthānāt sthānaṃ bhramanti ca || 66 ||
[Analyze grammar]

evamādyā hi dṛśyante vikārāḥ sahasotthitāḥ |
liṅgāyatanavapreṣu tatra vāsaṃ na rocayet || 67 ||
[Analyze grammar]

rājñī vā vyasanaṃ tatra sa ca deśo vinaśyati |
devayātrāsu cotpātān dṛṣṭvā deśabhayaṃ vadet || 68 ||
[Analyze grammar]

pitāmahasya harmyeṣu tatra vāsāṃ na rocayet |
paśūnāṃ rudrajaṃ duḥkhaṃ nṛpāṇāṃ lokapālajam || 69 ||
[Analyze grammar]

senāpatīnāṃ vai skandaviśākhādisamudbhavam |
lokānāṃ viṣṇuvasvīndraviśvakarmasamudbhavam || 70 ||
[Analyze grammar]

vināyakodbhavaṃ duḥkhaṃ nāyakānāṃ ca śāsinām |
devapreṣyānṛpapreṣyādevastrīṇāṃ nṛpastriyāḥ || 71 ||
[Analyze grammar]

vāsudevodbhavaṃ grahodbhavaṃ duḥkhaṃ na cānyathā |
devatāgataduḥkheṣu śrutivettā purohitaḥ || 72 ||
[Analyze grammar]

devatārcāṃ snāpayeccācchādayecca vibhūṣayet |
pūjayed gandhamālyānnamadhuparkādisampadā || 73 ||
[Analyze grammar]

upatiṣṭhecca vidhivajjuhuyāt saptarātrakam |
agnau tato nityameva bhojayed brāhmaṇān sataḥ || 74 ||
[Analyze grammar]

sādhūn sādhvīrmiṣṭabhojyamiṣṭapānaiḥ sadakṣiṇam |
prāpte'ṣṭame dine dhenubhūratnadānamācaret || 75 ||
[Analyze grammar]

kāṃcanāni pradadyācca grahaśāntiṃ samāpayet |
śāntipāṭhān kārayitvā pāpaṃ samupaśāmayet || 76 ||
[Analyze grammar]

evaṃ kṛte tu te vighnāḥ śāntiṃ yānti na saṃśayaḥ |
athā'nagnirdīpyate ced rāṣṭre yasya nirindhanaḥ || 77 ||
[Analyze grammar]

na dīpyate cendhanavān tadrāṣṭraṃ pīḍyate nṛpaiḥ |
prajvaledapsu māṃsaṃ vā tathā''rdraṃ vāpi kiñcana || 78 ||
[Analyze grammar]

prākārastoraṇaṃ dvāraṃ nṛpaveśma surālayam |
etāni yatra dīpyante tatra rājño bhayaṃ bhavet || 79 ||
[Analyze grammar]

vidyutā vā pradahyante tadāpi nṛpaterbhayam |
svāmino vā bhayaṃ tatra yatrāgniścā'sthale bhavet || 80 ||
[Analyze grammar]

anaiśāni tamāṃsi syurvinā pāṃsurajāṃsi ca |
dhūmaścā'nagnijo yatra tatra vidyānmahābhayam || 81 ||
[Analyze grammar]

taḍit tvanamre gagane bhayaṃ syād ṛkṣavarjite |
divā satāre gagane bhayaṃ tathaiva jāyate || 82 ||
[Analyze grammar]

grahanakṣatravaikṛtye tāraviṣamadarśane |
puravāhanayāneṣu catuṣpānmṛgapakṣiṣu || 83 ||
[Analyze grammar]

āyudheṣu ca dīpteṣu dhūmāyatsu tathaiva ca |
nirgamastu ca kośāttu saṃgrāmastumulo bhavet || 84 ||
[Analyze grammar]

vinā'gniṃ visphuliṃgāśca dṛśyante yatra kutracit |
svabhāvāccāpi pūryante dhanūṃṣi vikṛtāni ca || 85 ||
[Analyze grammar]

vikāraścāyudhānāṃ syāt tatra saṃgrāmamādiśet |
trirātropoṣitastatra juhuyādvai purohitaḥ || 86 ||
[Analyze grammar]

samidbhiḥ kṣīravṛkṣāṇāṃ sarṣapaiśca ghṛtena ca |
agnimantrairhavanena śāntisteṣāṃ prajāyate || 87 ||
[Analyze grammar]

sādhūn satīrbrāhmaṇāṃśca bālāṃśca bālikāḥ striyaḥ |
bhojayet pūjayed devān mahotsavaṃ prakārayet || 88 ||
[Analyze grammar]

suvarṇaṃṃ dhanaratnāni dadyād gā bhuvamambaram |
agnijopadravāṇāṃ śastrāṇāṃ śāntistadā bhavet || 89 ||
[Analyze grammar]

pureṣu yeṣu dṛśyante pāde pāde pragāminaḥ |
rudanto vā hasanto vā sravanto vā rasān bahūn || 90 ||
[Analyze grammar]

arogāśca vinā vātaṃ śākhāṃ muñcanti vai drumāḥ |
phalaṃ mūlaṃ tathā kālaṃ darśayanti trihāyanā || 91 ||
[Analyze grammar]

evaṃ vai svaṃ darśayanti phalaṃ puṣpaṃ tathā''ntare |
kṣīraṃ snehaṃ tathā raktaṃ madhu toyaṃ sravanti ca || 92 ||
[Analyze grammar]

śuṣyantyarogāḥ sahasā śuṣkā rohanti vā punaḥ |
uttiṣṭhantīha patitāḥ patanti ca tathotthitāḥ || 93 ||
[Analyze grammar]

evaṃ tatra phalaṃ lakṣmi śṛṇu bhinnaṃ vadāmi te |
rodane vyādhirāyāti hasane deśaviplavaḥ || 94 ||
[Analyze grammar]

śākhāprapatane syādvai saṃgrāmo yodhṛnāśakaḥ |
bālānāṃ maraṇaṃ kuryād bālavallī prapuṣpitā || 95 ||
[Analyze grammar]

svarāṣṭrabhedaṃ kurute phalapuṣpamathā''ntare |
kṣayaḥ syād gokṣīre cāpi snehe durbhikṣamāpatet || 96 ||
[Analyze grammar]

vāhanāpacayo madye rakte saṃgrāma āpatet |
madhusrāve bhaved vyādhirjalasrāve na varṣati || 97 ||
[Analyze grammar]

arogaśoṣitā vṛkṣā durbhikṣaṃ sūcayanti vai |
śuṣkeṣu samprarohastu vīryamannaṃ hinasti ca || 98 ||
[Analyze grammar]

utthāne patitānāṃ ca bhayaṃ bhedakaraṃ bhavet |
sthānāt sthānaṃ tu gamane deśabhaṃgastadā bhavet || 99 ||
[Analyze grammar]

jvalatsvapi tu vṛkṣeṣu rudatsyapi dhanakṣayam |
etat pūjitavṛkṣeṣu sarvaṃ rājño vipadyate || 100 ||
[Analyze grammar]

puṣpe phale vā vikṛte rājñau mṛtyuṃ drumo diśet |
evaṃ vṛkṣeṣu jāteṣu śīghramācchādya taddrumān || 101 ||
[Analyze grammar]

gandhamālyādibhiḥ sarvān bhūṣayetpūjayettathā |
vṛkṣopari mahacchatraṃ kuryāt pāpopaśāntaye || 102 ||
[Analyze grammar]

śivaṃ viṣṇuṃ śriyaṃ śivāmabhyarcayed drumeṣu vai |
paśuṃ cānnaṃ tvarpayecca rudraśāntiṃ prakārayet || 103 ||
[Analyze grammar]

rudrebhya iti vṛkṣeṣu hutvā rudro japettataḥ |
pāyasā''jyamadhvāḍhyaiḥ prapūjya bhūdānamācaret || 104 ||
[Analyze grammar]

gītaṃ nṛtyaṃ prakuryācca rudraśāntistato bhavet |
evaṃ lakṣmi prajārājabhayaṃ sarvaṃ vyapohati || 105 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne daivā'ntarikṣabhaumotpātānāṃ śāntikarmācārādikathananāmā ṣaṭcatvāriṃśadadhikaśatatamo'dhyāyaḥ || 146 ||
[Analyze grammar]