Chapter 145

śrīnārāyaṇīśrīruvāca |
kīrtanaṃ te kathaṃ kāryaṃ vada me bhagavaṃstathā |
yayā prahvībhāvanayā bhavettava prasannatā || 1 ||
[Analyze grammar]

śrīpuruṣottama uvāca |
kīrtanaṃ me susvareṇa miṣṭagarbheṇa cā''caret |
savādyena tathā gatirītyā saṃgītakena ca || 2 ||
[Analyze grammar]

tālītālena ca nṛtyenāpi kiṃkiṇikādibhiḥ |
anekarāgarāgiṇyādibhirmāṃ kīrtayed rame || 3 ||
[Analyze grammar]

gāndharvaṃ te pravakṣyāmi yāthātathyena saṃśṛṇu |
saptasvarāstrayo grāmā mūrchanāstvekaviṃśatiḥ || 4 ||
[Analyze grammar]

tānāścaikonapañcāśadityetat svaramaṇḍalam |
ṣaḍjarṣabhau ca gāndhāro madhyamaḥ pañcamastathā || 5 ||
[Analyze grammar]

dhaivataśca niṣādaśca svarāste saptakīrtitāḥ |
sauvīrā madhyamā hariṇāśca grāmāstrayo hi te || 6 ||
[Analyze grammar]

mūrchanāste vadāmyatra divyā mūrchāvidhāyikāḥ |
hayamedhā hreṣiṇī vai prathamā parikīrtitā || 7 ||
[Analyze grammar]

agniṣṭomā tu cāgneyī dvitīyā parikīrtitā |
vājapeyā tṛtīyā tu śyenī sā parikīrtitā || 8 ||
[Analyze grammar]

rājasūyā rāṇikā sā caturthī parikīrtitā |
yavarātā vaṃśinī sā pañcamī parikīrtitā || 9 ||
[Analyze grammar]

jātaraupī suvarṇī sā ṣaṣṭhī mūrchā prakīrtitā |
gosavanā rāṃbhaṇī sā saptamī mūrchanā matā || 10 ||
[Analyze grammar]

jhaṃjhāvātī varṣiṇī sā'ṣṭamī vai mūrchanā matā |
brahmadānā garjinī sā navamī mūrchanā matā || 11 ||
[Analyze grammar]

prājāpatyā lālinī sā daśamī mūrchanā matā |
dāgayākṣī tu kṣautī saikadaśī mūrchanā matā || 12 ||
[Analyze grammar]

pānakrāntā bhaṣiṇī tu dvādaśī mūrchanā hi sā |
mṛgākrāntā citkarī sā trayodaśī hi mūrchanā || 13 ||
[Analyze grammar]

viṣṇukrāntā dhāriṇī sā caturdaśī hi mūrchanā |
santakokilikā conmādinī pañcadaśī tu sā || 14 ||
[Analyze grammar]

sūryakrāntā kālarohiṇikā ṣoḍaśī caiva sā |
sarvatobhadrikā modamādinī sāptadāśikī || 15 ||
[Analyze grammar]

pūrvabhadrā bālakaṇṭhī cāṣṭādaśī hi mūrchanā |
ālambuṣī hāṃsinī sā navadaśī hi mūrchanā || 16 ||
[Analyze grammar]

sāgarā vijayā kokilikī viśā manoharā |
nāradī mānavī ceti mūrchanāścaikaviṃśikī || 17 ||
[Analyze grammar]

anyāścāpi bhavantyeva gauṇyo vai mūrchanāḥ priye |
mānavyaścāpi pākṣiṇyaḥ pākṣavyaścāpyanekaśaḥ || 18 ||
[Analyze grammar]

sarvāstāḥ śāradā vetti sarasvatī ca bhāratī |
brāhmyo gāṇyaśca paryaścāpsaryo māyūrakīvidhāḥ || 19 ||
[Analyze grammar]

yākṣyaḥ kainnaryaśca hāṃsyo nāginyaścāpi vāḍavāḥ |
paitryo daivyastathā kṣautyastāḍinyo bhauṃkinīvidhāḥ || 20 ||
[Analyze grammar]

mainākyaḥ paikya evāpi śaukyaḥ kilāyikāstathā |
etā yathāyathaṃ buddhvā gāyikā gītimācaret || 1 ||
[Analyze grammar]

hrasvaṃ dīrghaṃ plutaṃ jñātvā svaraṃ gāne prayojayet |
atha tānān prayuñjīta pravāhe satataṃ muhuḥ || 22 ||
[Analyze grammar]

tānāḥ starā iti proktāḥ pravāhe kṣaṇayoginaḥ |
vibhidyante kṣaṇabhedāt sphoṭatānānuyāyinaḥ || 23 ||
[Analyze grammar]

brahmatānaḥ prathamastu garbhatāno dvitīyakaḥ |
vyajyaḥ sañcaraṇo'ṇuśca yogaścārohaṇastathā || 24 ||
[Analyze grammar]

tanuḥ puṣṭo viśālaśca vikāsaḥ stanapastathā |
kumāro vāmanaścāpi dvistaro vikṛtastathā || 25 ||
[Analyze grammar]

dṛḍho dugdhaḥ kalāpaścā''varttakaśca taraṃgakaḥ |
nimnaḥ samaścordhvakaśca tiryak tathaiva kātaraḥ || 26 ||
[Analyze grammar]

kalitaścāgritaścaiṣitaśca taptastu triṃśakaḥ |
śṛṃgī ca toraṇī staṃbhī muṣṇako līna ityapi || 27 ||
[Analyze grammar]

udbhavaścāṃkurakaśca granthikaḥ śākhikastathā |
bahumūlaśca hastaśca vartulaścocchrayastathā || 28 ||
[Analyze grammar]

śṛṃgo guruścāvaroho vegaḥ sthitirghaṭodaraḥ |
ete tānāstava proktā gauṇān tānāṃstathā śṛṇu || 29 ||
[Analyze grammar]

skandaḥ kākuḥ puṣkalaśca ropaḥ santārakastathā |
taraṇiḥ saṃgamaścāti vigamaḥ kṣepaṇo mṛdhaḥ || 30 ||
[Analyze grammar]

prokṣaṇo miśraṇaścāpi galikaḥ kartanastathā |
ullekhaśca rayaścāpi ṣoḍaśaḥ saprakīrtitaḥ || 31 ||
[Analyze grammar]

uccaraḥ śaśavinyāso lakṣadhārastu viṃśakaḥ |
sahāsavaḥ sahayāno nimnayānastathordhvagaḥ || 32 ||
[Analyze grammar]

garbhayānaḥ paryayaśca viparyayo'bhisañcaraḥ |
setubandho dhārabandhastriṃśo'yaṃ parikīrtitaḥ || 33 ||
[Analyze grammar]

agaḥ supto mūrchitaśca kampaḥ kūrdana itkṛtaḥ |
akṛtaḥ saṃhṛtaścāpi jīvanaśca videhakaḥ || 34 ||
[Analyze grammar]

uttārakastālavāso dvicatvāriṃśako mataḥ |
piṇḍakaḥ kīrṇako yukto bhaṃgī laharanāmakaḥ || 35 ||
[Analyze grammar]

samavāyo'nuvāyaścetyevaṃ tānā guṇātmakāḥ |
athā'nye tāratārādyāstāratamādayastathā || 36 ||
[Analyze grammar]

vidyante tānasantānā śaṃsarodanaharṣaṇā |
vibhinnabhāvukā lakṣmi tān jñātvā kīrtayettataḥ || 37 ||
[Analyze grammar]

sthānayatnān prakurvīta śvāsakramānuccāvacān |
hāvabhāvānugāṃścāpi dehaceṣṭāyutāṃstathā || 38 ||
[Analyze grammar]

aṃgaceṣṭāyutāṃścāpi pratyaṃgakarmayojitān |
āntarajñānasphurttyādiprayuktān kīrtayed rame || 39 ||
[Analyze grammar]

nāmānyetāni bhidyante kalpe kalpe caturyuge |
jānāmyetāni sarvāṇi tattvarūpā'bhidhānakaiḥ || 40 ||
[Analyze grammar]

purā śrīnārado yogī gītyarthaṃ māmupāgataḥ |
śrutaṃ sarvaṃ mayā tasya kintu nyūnāṃgakaṃ hi tat || 41 ||
[Analyze grammar]

mayā tadopadiṣṭaḥ sa śikṣaṇārthaṃ punaḥ punaḥ |
tava śiṣyo'bhavallakṣmi bhavatyā śikṣitaściram || 42 ||
[Analyze grammar]

sarvāṃgopāṃgasampūrṇaṃ cāgāyata puro mama |
bhavatyāḥ sannidhau lakṣmi brahmapriyāsabhāntare || 43 ||
[Analyze grammar]

koṭyarbudā'bjanārīṇāṃ garvaharo'bhavaddhi saḥ |
prasannena mayā nibhālitaḥ śrīnārado muniḥ || 44 ||
[Analyze grammar]

mama gāyakarūpaśca mayā naijīkṛtastataḥ |
vetsi tvaṃ sarvamevaitad yato nārāyaṇī hyasi || 45 ||
[Analyze grammar]

śāradā'pi tadā vāṇī śrutvā nāradagāyanam |
kṣaṇaṃ stabdhā'bhavattatra kā kathā cānyayoṣitām || 46 ||
[Analyze grammar]

dhūnayāmāsa bahudhā mastakaṃ rasavedinī |
sarasvatyaḥ samagrāścā'bhavan pramohitāḥ kṣaṇam || 47 ||
[Analyze grammar]

praśaṃsā'bhūdgurostatra lakṣmyāste bahudhā khalu |
nāradāya mayā tatrārpitaṃ satpāritoṣikam || 48 ||
[Analyze grammar]

cintāmaṇistathā hāraścakraṃ sudarśanaṃ mama |
śaktirmayā'rpitā divyā mamaiśvaryaviśeṣiṇī || 49 ||
[Analyze grammar]

tataḥ śrīnārado jātaścāvatāroṃ'śarūpakaḥ |
nārāyaṇo nārado vai kṛpayā nāvajāyata || 50 ||
[Analyze grammar]

sabhāyāṃ nāradaścāpi praśaśaṃsa kṛpāṃ tava |
yayā praśikṣitā vidyā tāṃ tvāṃ śaśaṃsa sarvathā || 51 ||
[Analyze grammar]

tata ārabhya patnyo me gītirītiḥ punaḥ punaḥ |
samabhyasan sakāśātte'psarasaścāpi padmaje || 52 ||
[Analyze grammar]

prāvartata tato vidyā saṃsāre bahudhā priye |
śaṃkaro vaiṣṇavo bhūtvā sakāśātte'vidat kalām || 53 ||
[Analyze grammar]

kīrtanasya tato nṛtyaṃ cakāra gītiśobhitam |
prasannena mayā tasmai dattaṃ yogavibhūṣaṇam || 54 ||
[Analyze grammar]

smara lakṣmi purā sarvaṃ bhavatyā yat pravidyate |
ityuktā ca prasasmāra sarvaṃ dadarśa cātmani || 55 ||
[Analyze grammar]

saṃgītaśālāṃ mahatīṃ sahasrayojanāyatām |
śrīpure caiśvare dhāmni bhinnakakṣāsahasrikām || 56 ||
[Analyze grammar]

dadarśa tatra cātmānaṃ sahasrarūpadhāriṇīm |
śikṣikāṃ śikṣaṇārūḍhām vādyasaṃgītakāriṇīm || 57 ||
[Analyze grammar]

śikṣyante tatra gopyaśca pārṣadānyaśca muktayaḥ |
brahmapriyāstatheśānyaśceśvarāṇyaśca kanyakāḥ || 58 ||
[Analyze grammar]

ālāpāṃstāḥ prakurvantyaḥ śikṣyante cāpsarogaṇāḥ |
devyaśca siddhayaścāpi yoginyaḥ śāradāgaṇāḥ || 59 ||
[Analyze grammar]

gāyatryaścāpi sāvitryo brāhmyaśca devakanyakāḥ |
gandharvyaścāpi yakṣāṇyaḥ kinnaryaśca parīgaṇāḥ || 60 ||
[Analyze grammar]

śiṣyante dhanadānārtho bhaktānyaḥ kaśyapātmajāḥ |
gandharvāstatra śikṣyante bahavaḥ pūrvasṛṣṭijāḥ || 61 ||
[Analyze grammar]

daityakumārikāścāpi dānavyo'suraputrikāḥ |
mānavyaścārṣya ākalpajīvinyaścāpi kanyakāḥ || 62 ||
[Analyze grammar]

śikṣyante gītaśālāyāṃ śikṣikāṃ ca nijāmapi |
nāgakanyāḥ samastāśca dadarśa śikṣaṇārthinīḥ || 63 ||
[Analyze grammar]

evaṃ vilokya sahasā divyavidyālayān svayam |
mahāścaryaṃ gatā tatra pūjitā sarvadaivataiḥ || 64 ||
[Analyze grammar]

sarvāsāṃ goravīsthāne sthitāṃ svāṃ kṛtakāriṇīm |
amanyatā'timānārhāṃ mahimānaṃ viveda ca || 65 ||
[Analyze grammar]

tatra patiṃ tu māṃ kṛṣṇaṃ gāyantaṃ gītikāmapi |
anādiśrīkṛṣṇanārāyaṇaṃ vīkṣya prabhuṃ nijam || 66 ||
[Analyze grammar]

utthāya pādayorlakṣmīḥ patitā vyājahāra ha |
namaste bhagavan kṛṣṇa svāṃ'ganānugrahānvita || 67 ||
[Analyze grammar]

kṛpāsindho hare kānta darśitaṃ me'tigauravam |
paśyāmi sarvamevaitat kṛpayā te janārdana || 68 ||
[Analyze grammar]

śrīpure'smi śikṣikā vai saṃgītagītikāriṇī |
yā yā nāryo narā loke gandharvā devayoṣitaḥ || 69 ||
[Analyze grammar]

śāradāśca sarasvatyaḥ śiṣyā me santi te khalu |
śikṣante koṭiśo mattaḥ sarvāḥ saṃgītamandire || 70 ||
[Analyze grammar]

matsvarūpāt prabhavanti svarā grāmāśca mūrchanāḥ |
brahmaṇyeva vilīyante yathā'haṃ hṛdaye sthitā || 71 ||
[Analyze grammar]

etat sarvaṃ mayi cāste gītīcchā vartate mama |
yadyājñā gāyanaṃ sarvāṃgopāṃgādisamanvitam || 72 ||
[Analyze grammar]

kartumicchāmi sarvābhiḥ sakhībhiḥ parameśvara |
ityuktaḥ śrīpatiścāhaṃ kamale'karaṇaṃ śubham || 73 ||
[Analyze grammar]

maṇḍapaṃ suviśālaṃ cāsanāni cāpyayojayam |
vāditrāṇi samāhṛtyā'sthāpayaṃ maṇḍape śubhe || 74 ||
[Analyze grammar]

lakṣmyādyāśca bhavatyo vai sarvā brahmapriyāḥ śubhāḥ |
āyayurmaṇḍape tatra yathāvatsthānamāsthitāḥ || 75 ||
[Analyze grammar]

cakruḥ saṃgītakaṃ lakṣmi prasanno'haṃ tato'bhavam |
varadānaṃ dadau cāpi bhūtale tu punaḥ punaḥ || 76 ||
[Analyze grammar]

kariṣyatha susaṃgītaṃ mama patnyo bhaviṣyatha |
itisatyena kamale cāśvapaṭṭasarovare || 77 ||
[Analyze grammar]

brahmapriyāḥ samastāśca haripriyāstathā striyāḥ |
kuṃkumavāpikākṣetre bhavatya santi matpriyāḥ || 78 ||
[Analyze grammar]

ityevaṃ jāyamānāyāṃ vārtāyāṃ divyadarśane |
tirobhavattadā sarvaṃ vyadṛśyatā'śvasārasam || 79 ||
[Analyze grammar]

kuṃkumavāpikākṣetraṃ mandiraṃ kānakaṃ nijam |
yathāsthitāṃ mandire tāṃ svāṃ sakhīḥ kāntamityapi || 80 ||
[Analyze grammar]

vilokya mumude lakṣmīrmahāścaryaparā'bhavat |
harṣapūrṇā samutthāya śrīkṛṣṇaṃ puruṣottamam || 81 ||
[Analyze grammar]

āśliṣya saṃgītikāṃ ca pracakāra mudānvitā |
virarāma tato lakṣmīrnārāyaṇo haristadā || 82 ||
[Analyze grammar]

jalaṃ pātuṃ samīyeṣa lakṣmīrjalaṃ dadau tataḥ |
māṇikyāśrīḥ sumiṣṭānnaṃ cakre sūpaudanaṃ tathā || 83 ||
[Analyze grammar]

bubhuje śrīhariḥ kṛṣṇo nārāyaṇī jalaṃ dadau |
padmāvatī dadau tāmbūlakaṃ prajñā ca naktakam || 84 ||
[Analyze grammar]

virarāma prabhuḥ kṛṣṇaḥ paryaṃke svarṇanirmite |
pādasaṃvāhanaṃ cakre lakṣmīḥ padmāvatī tathā || 85 ||
[Analyze grammar]

prajñā ca māṇikī dehasaṃvāhanaṃ pracakratuḥ |
anyā brahmapriyāścāpi svasvagṛhe hariṃ patim || 86 ||
[Analyze grammar]

tathaiva sevayāmāsurharirviśrāntimāpa ha |
tataḥ sarvā jagṛhuśca prasādabhojanāni vai || 87 ||
[Analyze grammar]

jalapānāni cakruśca madhyāhne modamuttamam |
prāpuḥ patikṛpāleśaṃ gṛhakāryāṇi cakrire || 88 ||
[Analyze grammar]

ityevaṃ śivarājñīśri pūrvavṛttaṃ mayā tu te |
kathitaṃ sarvamevā'tra gītavādyādiyogajam || 89 ||
[Analyze grammar]

paṭhanācchravaṇāccāsya smaraṇāt kīrtanādapi |
bhuktiṃ muktiṃ pralabheta sarvānandabhṛto bhavet || 90 ||
[Analyze grammar]

kīrtanaṃ ye kariṣyanti smṛtvā māṃ tvāṃ haripriyāḥ |
brahmapriyāstathā lakṣmi tariṣyanti na saṃśayaḥ || 91 ||
[Analyze grammar]

dehaṃ kṛtvā viyuktaṃ vai jñānena māyikaṃ tu yaḥ |
indriyāṇi pṛthakkṛtvā kṛtvā divyanavāni ca || 92 ||
[Analyze grammar]

āntarīṃ bhāvanāṃ divyāṃ kṛtvā dagdhvā ca vāsanām |
praṇavā'nvitasaṃgītaṃ mama divyacaritrakam || 93 ||
[Analyze grammar]

ātmanā brahmarūpeṇa yaḥ kariṣyati mānavaḥ |
devo daityo'thavā yakṣo rākṣaso'sura eva vā || 94 ||
[Analyze grammar]

sarpaḥ paśuḥ patatrī ca kinnaro guhyako'pi vā |
hutvā''tmānaṃ cidānande mayi yogaṃ vidhāya ca || 95 ||
[Analyze grammar]

nāmakīrtiṃ mama lakṣmi kariṣyanti tu ye'pare |
te sarve mama bhaktyaiva lapsyante paramaṃ padam || 96 ||
[Analyze grammar]

mama mūrteḥ smaraṇena kṛtaṃ kīrtanamalpakam |
divyaṃ prajāyate lakṣmi mokṣadaṃ pāpanāśakam || 97 ||
[Analyze grammar]

sarvātmanā mayā caikībhūya kuryāddhi kīrtanam |
saphalaṃ tad bhavedeva pūrṇānandapradāyakam || 98 ||
[Analyze grammar]

tīvravegavatāṃ tīvraphaladaṃ kīrtanaṃ mama |
nṛtyāmyahaṃ tadā lakṣmi yadā nṛtyanti gāyikāḥ || 99 ||
[Analyze grammar]

gāndharvaiḥ saha gāyāmi na māṃ paśyanti carmiṇaḥ |
pramodaṃ mama bhaktānāṃ vardhayāmyarjayāmi ca || 100 ||
[Analyze grammar]

snehaṃ pravardhya tānante nayāmi cā'kṣaraṃ padam |
prasahya te samāyānti na māṃ tyajanti kāmadam || 101 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne saṃkīrtane saṃgītikāsvaragrāmamūrchanoddeśo lakṣmyāḥ saṃgītaśālādivyadarśanaṃ cetyādinirūpaṇanāmā pañcacatvāriṃśa |
dadhikaśatatamo'dhyāyaḥ || 145 ||
[Analyze grammar]