Chapter 141

śrīnārāyaṇīśrīruvāca |
akṣarādhipate'nādikṛṣṇanārāyaṇeśa me |
golokādhipate kṛṣṇa vaikuṇṭheśa narāyaṇa || 1 ||
[Analyze grammar]

bhūmannavyākṛtanātha vāsudevā'mṛteśvara |
śrīpate śrīpuravāsin vratāni yāni tāni vai || 2 ||
[Analyze grammar]

kartuṃ naiva hi śakto yastasya muktiḥ kathaṃ bhavet |
striyā bālasya vṛddhasya rugṇasya paśupakṣiṇām || 3 ||
[Analyze grammar]

śrīpuruṣottama uvāca |
mama nāmasmaraṇena tasya muktirbhaved rame |
anādiśrīkṛṣṇanārāyaṇa śrīkṛṣṇasatpate || 4 ||
[Analyze grammar]

śrīkṛṣṇa śrīpate śrīmannārāyaṇa narāyaṇa |
govinda mādhava viṣṇo svāminnareśvarā'cyuta || 5 ||
[Analyze grammar]

harikṛṣṇa nīlakaṇṭha mahālakṣmīsukhāvaha |
bālakṛṣṇa dayāsindho śrīmadgopālanandana || 6 ||
[Analyze grammar]

kaṃbharāśrīnandana tvamaśvapaṭṭasaro'dhipa |
kuṃkumavāpikātīrthakṛtāvāsa hṛdi sthita || 7 ||
[Analyze grammar]

rāma śrīpuṇḍarīkākṣa brahmapriyāpate vibho |
haripriyādhinātha tvaṃ rakṣa mokṣaya bandhanāt || 8 ||
[Analyze grammar]

ityevaṃ mama nāmnāṃ vai kīrtanaṃ mokṣadaṃ bhavet |
athāpi mama vāsasya kṣetrasyā'kṣarasaṃjñinaḥ || 9 ||
[Analyze grammar]

aśvapaṭṭasarasaśca kuṃkumavāpikābhuvaḥ |
tīrthasyā'sya ca māhātmyaṃ śṛṇuyācca gṛṇīta ca || 10 ||
[Analyze grammar]

lakṣmīnārāyaṇasaṃhitāyāḥ śṛṇvīta vai kathāḥ |
ślokānāṃ lakṣamekaṃ ca tadūrdhvaṃ pañcaviṃśatiḥ || 11 ||
[Analyze grammar]

sahasrāṇīti śṛṇuyāt sapādalakṣasaṃhitām |
dharmārthakāmamokṣecchāpūrikāṃ bhuktimuktidām || 12 ||
[Analyze grammar]

anādiśrīkṛṣṇanārāyaṇo'haṃ saṃhitātmakaḥ |
dvitīyenā''gamenaiva rūpeṇā'smi sthito bhuvi || 13 ||
[Analyze grammar]

jīvalokeṣu sarvatreśvaralokeṣu vai tathā |
akṣare'pi saṃhitātmā sthito'smi śabdamūrtikaḥ || 14 ||
[Analyze grammar]

adhyāyaṃ vā prakaraṇaṃ santānaṃ ślokameva vā |
yaḥ paṭhiṣyati bhūtātmā muktātmā sa bhaviṣyati || 15 ||
[Analyze grammar]

śroṣyati sthiracittātmā brahmātmā sa bhaviṣyati |
vācakaṃ ye namasyanti me bhaviṣyanti pāvanāḥ || 16 ||
[Analyze grammar]

pūjāṃ cā'sya kariṣyanti te yāsyanti divaṃ param |
lomaśasyāśramaḥtīrthaṃ gatvā vatsyanti ye'niśam || 17 ||
[Analyze grammar]

teṣāṃ bhuktistathā muktiḥ kṛpayā me karaṃ gatā |
arkavarṇavimānena prayāsyanti parā'kṣaram || 18 ||
[Analyze grammar]

praśaṃsāṃ ye kariṣyanti te yāsyanti śriyāḥ puram |
nāryastīrthaṃ kariṣyanti yāsyanti lalitāpuram || 19 ||
[Analyze grammar]

nārāyaṇyā śriyā sākaṃ modiṣyante'kṣare hi tāḥ |
śivarājyā tathā lakṣmyā sākaṃ sthāsyanti dhāmani || 20 ||
[Analyze grammar]

kṛṣṇaṃ kāntaṃ ca māṃ labdhvā modiṣyante nirantaram |
ahaṃ tīrthaṃ paraṃ lakṣmi tvaṃ tīrthaṃ mama sadṛśam || 21 ||
[Analyze grammar]

āvayorvāsabhūmiśca tīrthaṃ cākṣarasadṛśam |
saurāṣṭre ānartadeśe cāśvapaṭṭasaro'bhitaḥ || 22 ||
[Analyze grammar]

bhadrāvatyā dakṣiṇe ca śatruṃjayāyāḥ paścime |
raivatādreḥ pūrvabhāge vyāghryāraṇyottarakṣitau || 23 ||
[Analyze grammar]

śatakrośapravistāravartulakṣetrameva me |
mokṣadaṃ pāpahaṃ lakṣmi puruṣārthasamastadam || 24 ||
[Analyze grammar]

aśvapaṭṭasaraḥsnātā divaṃ mokṣaṃ prayānti vai |
maṇḍalaṃ kuṃkumavāpīkṣetrātmakaṃ harirhyaham || 25 ||
[Analyze grammar]

rakṣāmi sarvathā devairmuktairīśānakoṭibhiḥ |
kuṃkumavāpikābadrīṃ rakṣāmyahaṃ priyāṃ mama || 26 ||
[Analyze grammar]

tāṃ smaran pāpadāhe vai śakto bhavati mānavaḥ |
darśanāt tadbadaryāstu nāmasaṃkīrtanādapi || 27 ||
[Analyze grammar]

mṛttikālaṃbhanāttasyā naraḥ pāpātpramucyate |
yojanānāṃ sahasreṣu badaryāḥ smaraṇānnaraḥ || 28 ||
[Analyze grammar]

nārī vā bālabhāvo vā labhate paramāṃ gatim |
badarīpatrapuṣpāṇāṃ sparśād bhadrāṇi vindate || 29 ||
[Analyze grammar]

avagāhya ca pītvā tu punātyāsaptamaṃ kulam |
manasā cintayan badrīṃ kāmānāpnoti puṣkalān || 30 ||
[Analyze grammar]

kuṃkumavāpikāṃ gatvā badrīśrīsamaśobhitām |
brahmacārī vasenmāsaṃ pitṝn devāṃśca tarpayet || 31 ||
[Analyze grammar]

īpsitāṃllabhate kāmān yatra yatra sa jāyate |
devadānavagandharvā ṛṣayaḥ siddhacāraṇāḥ || 32 ||
[Analyze grammar]

badrīṃ dṛṣṭvā jalaṃ pītvā prayātā dhāma me'kṣaram |
ārtānāṃ ca daridrāṇāṃ niścitavyavasāyinām || 33 ||
[Analyze grammar]

kuṃkumavāpikābadrītulyaṃ cānyanna mokṣadam |
vyādhito yadi vā dīno vṛddho badrīniṣevaṇāt || 34 ||
[Analyze grammar]

badaryāḥ sannidhau yadvā prāṇāṃstyajettu daivataḥ |
dīptakāñcanavarṇābhaivimānaiḥ sūryasannibhaiḥ || 35 ||
[Analyze grammar]

kṛṣṇadhāmāni yātyeva modate śāśvatīḥ samāḥ |
īpsitān labhate sarvān kāmān bhogyādisaṃbhṛtān || 36 ||
[Analyze grammar]

sarvaratnamayairdivyairnānādhvajasamāyutaiḥ |
vimānaiścāṃganākīrṇairmodate śāśvate pade || 37 ||
[Analyze grammar]

sarvakāmaphalā vṛkṣā mahī yatra hiraṇmayī |
sarvarasāśca kṣitayastatra loke mahīyate || 38 ||
[Analyze grammar]

badarīṃ smaramāṇo'pi tathā kuṃkumavāpikām |
prāṇaṃ tyaktvā brahmalokaṃ prayātyeva parātparam || 39 ||
[Analyze grammar]

karmaṇā manasā vācā dharmasatyāvalambanaḥ |
kuṃkumavāpikākṣetre yastu gāṃ samprayacchati || 40 ||
[Analyze grammar]

suvarṇamaṇimuktāśca dhanaṃ dhānyaṃ tathā'mbaram |
svakārye pitṛkārye ca devā'rhaṇe'pi vā'rpayet || 41 ||
[Analyze grammar]

anantaguṇitaṃ tasya sampadyate'kṣare sthale |
gavāṃ śatasahasrebhyo dadyādekāṃ payasvinīm || 42 ||
[Analyze grammar]

putrān dāsāṃstathā bhṛtyān gaurdattā'traiva tārayet |
kuṃkumavāpikākṣetre yastu kanyāṃ prayacchati || 43 ||
[Analyze grammar]

vivāhavidhinā tasya dhāmni puṇyamanantakam |
śrīkṛṣṇasya maṇiścāyaṃ saurāṣṭro nityavigrahaḥ || 44 ||
[Analyze grammar]

pralaye'pi na nāśo'sya mama vāsena padmaje |
aśvapaṭṭasarasyeva rājasūyāśvamedhayoḥ || 45 ||
[Analyze grammar]

snātvā phalaṃ labhyate vai śāśvataṃ cā'punarbhavam |
daśatīrthasahasrāṇi ṣaṣṭikoṭyastathā rame || 46 ||
[Analyze grammar]

vasanti tāni sarvāṇi mama vāsātmake'tra tu |
svarṇanārīpradātā'tra svargago jāyate tataḥ || 47 ||
[Analyze grammar]

urvaśīsadṛśīnāṃ tu kanyānāṃ labhate śatam |
madhye nārīsahasrāṇāṃ bahūnāṃ sa patirbhavet || 48 ||
[Analyze grammar]

aśvapaṭṭasaro yatra siddhakṣetraṃ hi tanmama |
tatrā'valuṇṭhya pāpātmā jāyate paṃktipāvanaḥ || 49 ||
[Analyze grammar]

pavitrāṇāṃ pavitraṃ ca maṃgalānāṃ sumaṃgalam |
mokṣadānāṃ mokṣadaṃ ca kuṃkumavāpikāsthalam || 50 ||
[Analyze grammar]

sarasaścottare bhāge pātālādakṣayā''pagā |
śvetadvīpamahāgaṃgā lakṣmīnārāyaṇeritā || 51 ||
[Analyze grammar]

vahatyantarjale śvetā bhuktimuktipradāyinī |
viṣṇupadī svayaṃ svargādadṛśyā'tra nimīlati || 52 ||
[Analyze grammar]

brahmahradaśca me pādānnityaṃ taṭāgago'sti ca |
sudhāsarid divaḥ sthānād vāriṣvasya pravartate || 53 ||
[Analyze grammar]

amarāstena sarve vai vartante'śvasaraḥkṣitau |
anāśakaphalaṃ cātra labhate tīrthakṛjjanaḥ || 54 ||
[Analyze grammar]

māsamekaṃ tu yaḥ snāyādaśvapaṭṭasarojale |
mucyate sarvapāpebhyaḥ sa gacchetparamaṃ padam || 55 ||
[Analyze grammar]

ajñānena tu yasyeha tīrthayātrādikaṃ bhavet |
sarvakāmasamṛddhe sa svargaloke mahīyate || 56 ||
[Analyze grammar]

hyekadā lomaśo devo yayau prayāgabhūtalam |
prayāgastatra nāsīdvai bharadvājo'bhavanmuniḥ || 57 ||
[Analyze grammar]

bharadvājāya cā'pṛcchallomaśastīrtharājakaḥ |
kva yāto'dya mune tasya darśanaṃ me na jāyata || 58 ||
[Analyze grammar]

bharadvājastadā prāha kuṃbhayogena mānavaiḥ |
mahāpāpātipāpāni snātvā'rpitāni yāni tu || 59 ||
[Analyze grammar]

tāni kṣālayituṃ yātaḥ prayāgo'śvasarovaram |
yatra kuṃkumavāpīti tīrthaṃ lakṣmīḥ svayaṃ sthitā || 60 ||
[Analyze grammar]

anādiśrīkṛṣṇanārāyaṇo yatra vasatyapi |
tatra gataḥ prayāgo'sti paśya cāyāsyati drutam || 61 ||
[Analyze grammar]

lomaśastatra vāṭaṃ ca dṛṣṭvā muhūrtamāvasat |
prayāgastāvadāyāto vidhūyā'ghāni sarvathā || 62 ||
[Analyze grammar]

lomaśastaṃ prapūjyaiva yayau badarikāvanam |
tatra nā''sīddhi badarī divyā nārāyaṇāśrayā || 63 ||
[Analyze grammar]

nā''lokitā lomaśena tadā tanuṛṣiḥ svayam |
pṛṣṭhaḥ kva badarīyātrā kadā cāpyāgamiṣyati || 64 ||
[Analyze grammar]

tanuḥ prāha gatā cāste saurāṣṭre'śvasarovaram |
kuṃkumavāpikākṣetre śrīpatiṃ puruṣottamam || 65 ||
[Analyze grammar]

prāṇapatiṃ sevayituṃ bālakṛṣṇaṃ priyaṃ prabhum |
kanyārūpā vartate sā brahmapriyāsu śobhanā || 66 ||
[Analyze grammar]

vadhūrbhūtvā harerdāsī lakṣmyā saha virājate |
tāpasī sā kvacittatra kuṃkumavāpikātaṭe || 67 ||
[Analyze grammar]

badarīvṛkṣarūpeṇa vartate muktakoṭikā |
dīrghikāyā uparyaiva vimānaṃ vai vitanvatī || 68 ||
[Analyze grammar]

uttare bhūtale cāste yacchākhā dīrghikopari |
vartante chatrarūpā vai śrīkṛṣṇapreritā sadā || 69 ||
[Analyze grammar]

viśālākṣī hareḥ patnī yā sā tatra virājate |
badarī sā svayaṃ yā'tra sā tatra rājate mune || 70 ||
[Analyze grammar]

rūpāntareṇa cātrāpi vartate bhagavatkṛte |
harernivāsavelāyāṃ chāyāpradā'tra jāyate || 71 ||
[Analyze grammar]

seyaṃ madhyāhnavelāyāmatrāgamiṣyati drutam |
evaṃ tanormaharṣervai jñātvā śrīlomaśo muniḥ || 72 ||
[Analyze grammar]

tasthāvāmadhyadivasaṃ kanyā sā badarī satī |
tūrṇaṃ vyomapathenāpyāyātā badarikā''bhavat || 73 ||
[Analyze grammar]

lomaśastāṃ prapūjyaiva tadadhaḥ śrīnarāyaṇam |
prapūjyaiva yayau bālakṛṣṇasarovaraṃ mahat || 74 ||
[Analyze grammar]

mānasaṃ ca saraḥ snātvā vyomnā saurāṣṭramāyayau |
niścitaṃ ca tataḥ kṛtvovāsa nityaṃ mamālaye || 75 ||
[Analyze grammar]

aśvapaṭṭasarobhūmau māhātmyaṃ pravidan kṣiteḥ |
badarī sā mahālakṣmīrnārāyaṇena vai mayā || 76 ||
[Analyze grammar]

nityaṃ sthātuṃ samājñaptā vartate dīrghikātaṭe |
kālāntare dṛśyarūpā'pyadṛśyā'pi bhaviṣyati || 77 ||
[Analyze grammar]

bhaktānāṃ samavāye tu punardṛśyā bhaviṣyati |
brahmapriyāstathā'nyāśca badarīrūpadhārikāḥ || 78 ||
[Analyze grammar]

dīrghikāsahasakhyastu bhūtvā tajjalavṛttayaḥ |
dṛśyāstatra bhaviṣyanti riktā bhūmirna jāyate || 79 ||
[Analyze grammar]

haripriyāstathā devyo vartante cātra vallikāḥ |
anārakalikānāmnī dāḍimīrūpadhāriṇī || 80 ||
[Analyze grammar]

uttejinī mama patnī ciñcārūpeṇa vartate |
snehilī subhagā ceti hīṅgudīdvayamasti ca || 81 ||
[Analyze grammar]

jāmbuvatī mama patnī jāmbikā tatra vartate |
rāviṇī gāyikā tatra rāvaṇikā'pi vartate || 82 ||
[Analyze grammar]

evamanyā mama kāntāḥ sakhyastāsāṃ tathā'parāḥ |
dugdhikānāmavallī ca kanyakā tatra vartate || 83 ||
[Analyze grammar]

puṣpikā hyudyānarūpā bahvyaḥ santi drumālikāḥ |
sevante māṃ sadā muktānikā divyasuvigrahāḥ || 84 ||
[Analyze grammar]

kvacittā vṛkṣavallyaśca kvacit kāntāḥ suvigrahāḥ |
kvacid dṛśyā bhavantyevā'dṛśyāḥ kvacid bhavantyapi || 85 ||
[Analyze grammar]

kvacinme śayane santi kvacinme vai gajāsane |
kvacinme vyomayāne tā viharanti mayā saha || 86 ||
[Analyze grammar]

kvacit pārśve rāsabhūmau kvacinme maṇḍape'pi ca |
kvacinme hṛdaye līnā bhavantyānandabhakṣikāḥ || 87 ||
[Analyze grammar]

ekarasyaṃ kvacitprāptā modante mattadātmikāḥ |
bhojane krīḍane pāne pṛthag bhavanti sevane || 88 ||
[Analyze grammar]

lakṣmi yathā vartase tvaṃ hṛdi pārśve ca sannidhau |
tathā tā mama vartante tvādṛśāḥ kamalāḥ śubhāḥ || 89 ||
[Analyze grammar]

tāsāṃ yatra nivāso'sti sā bhūmiścā'kṣaraṃ mama |
sarvatīrthottamaṃ lakṣmi tīrthamūrdhanyamuttamam || 90 ||
[Analyze grammar]

kuṃkumavāpikātīrthaṃ kalpe kalpe surāṣṭrake |
madicchayā bhavatyeva brahmāṇḍādau mayā kṛtam || 91 ||
[Analyze grammar]

surāṣṭraṃ tava rājyaṃ ca svatantraṃ dvīpakalpake |
kṛṣṇabhūmiḥ kṛṣṇatulyā kārṣṇī sā matsvarūpiṇī || 92 ||
[Analyze grammar]

mokṣadvāravatī bhūmiryuge yuge'pi pāvanī |
subhadrā bhadrikānāmnī nadī yatrā'sti matkṛtā || 93 ||
[Analyze grammar]

yajjalasya smaraṇācca sparśanāt kaṇabhakṣaṇāt |
pāpanāśo bhavatyeva svargaṃ tathā'kṣaraṃ vrajet || 94 ||
[Analyze grammar]

mamā'rdhasya narasyāpi mama viyogini kṣaṇe |
yadaiśvaryāṇi līyante luṭyante strīvibhūtayaḥ || 95 ||
[Analyze grammar]

dasyubhiśca tadā bhadrā subhadrā sariduttamā |
narapatnī mahattīrthasvarūpā vartate jale || 96 ||
[Analyze grammar]

snātṝṇāṃ bhadradā nityaṃ sarvabhadraprakāriṇī |
kāryarūpā nadī cāste mūrtiḥ śrīpuruṣottame || 97 ||
[Analyze grammar]

divyarūpā badaryāṃ ca santuṣṭā ca svasā mama |
muktānikā mama dhāmni pañcarūpā pravartate || 98 ||
[Analyze grammar]

sāgarāḥ sāgaratulyasarāṃsi saritastathā |
puṇyāḥ kuṃkumavāpyāṃ me vartante brahmarūpikāḥ || 99 ||
[Analyze grammar]

sarve vedāśca yajñāśca mūrtimanto'kṣare'tra vai |
maharṣayaḥ pitaraśca siddhāśca sādhavo'malāḥ || 100 ||
[Analyze grammar]

satyaḥ sādhvyaścakradharyaścakradharāśca pārṣadāḥ |
māmanādimupāsante śrīkṛṣṇaṃ puruṣottamam || 101 ||
[Analyze grammar]

siddhikṣetraṃ mahaccaitaddhāmakṣetraṃ parātparam |
idaṃ dhanyamidaṃ svargyamidaṃ satyamidaṃ sukham || 102 ||
[Analyze grammar]

idaṃ puṇyamidaṃ dharmyaṃ pāvanaṃ kārṣṇyamuttamam |
śrutvāpyetattīrthatīrthaṃ nākapṛṣṭhe sumodate || 103 ||
[Analyze grammar]

jātismaratvaṃ labhate sarvasmaratvamityapi |
traikālikaṃ pravetti yat sārvajñyaṃ cāpi vindati || 104 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne kuṃkumavāpikātīrthasmaraṇadarśanādibhirapi pāpināṃ mokṣaṇamiti nirūpaṇanāmaikacatvāriṃśadadhikaśatatamo'dhyāyaḥ || 141 ||
[Analyze grammar]