Chapter 139

śrīnārāyaṇīśrīruvāca |
āgatānāṃ hi śokānāmapanodārthameva yat |
vrataṃ syāttatkathayā'tra dayayā me hare prabho || 1 ||
[Analyze grammar]

śrīpuruṣottama uvāca |
puṇye cāśvayuje māsi śukle dvādaśikāvratam |
śokanāśārthamevā'sti viśokadvādaśīvratam || 2 ||
[Analyze grammar]

daśamyāṃ laghubhug bhūtvā pṛthvīśayanamācaret |
brahmacārī bhaveccāpi prātarutthāya māṃ smaret || 3 ||
[Analyze grammar]

snātvā sampūjayenmāṃ caikādaśyāṃ vratamācaran |
nirāhāraḥ phalāhāraścaikabhojī ca vā bhavet || 4 ||
[Analyze grammar]

aśokalalitāṃ svarṇamayīṃ śrīkṛṣṇaśobhitām |
kārayitvā pūjayitvā bhojayitvā gajāsane || 5 ||
[Analyze grammar]

svāpayejjāgaraṃ kuryānmaṇḍape kadalīkṛte |
dvādaśyāṃ prātarutthāya snātvā saṃpūjayetpunaḥ || 6 ||
[Analyze grammar]

snānaṃ sarvauṣadhaiḥ kuryāt pañcagavyajalairapi |
pītāmbaradharo lakṣmīṃ pūjayecchrīśamutpalaiḥ || 7 ||
[Analyze grammar]

viśokāyai namaḥ pādau varadāyai tu jaṅghayoḥ |
jānvoḥ śriyai namaścāpi sakthnorabdhijayoṣite || 8 ||
[Analyze grammar]

gupte viśokakartryai ca kaṭyāṃ māyai namo namaḥ |
udare poṣayitryai ca namo bhāyai ca pārśvayoḥ || 9 ||
[Analyze grammar]

nābhau namaḥ sarvadhartryai hṛdaye'rdhāśriyai namaḥ |
kaṇṭhe vāṇyai namo vakṣaḥsthale kāntāśriyai namaḥ || 10 ||
[Analyze grammar]

bāhvornamo rakṣayitryai lalitāyai tu hastayoḥ |
cāndryai mukhe namaścāpi kamalāyai tu netrayoḥ || 11 ||
[Analyze grammar]

nāsāyāṃ surabhidevyai lalāṭe mohinīśriyai |
karṇayorvyāpikāyai te namo mūrdhni mahāśriyai || 12 ||
[Analyze grammar]

maṇḍale sthaṇḍile lakṣmīpratimāsannidhau harim |
svarṇamūrtiṃ pūjayecca śrīpatiṃ māṃ viśokinam || 13 ||
[Analyze grammar]

namo'nādikṛṣṇanārāyaṇāya pādayornamaḥ |
namaḥ kṛṣṇāya kāntāya jaṃghayoste namo namaḥ || 14 ||
[Analyze grammar]

namaḥ śrīvāsudevāya jānvoste ca namo namaḥ |
namo nārāyaṇāyeti sakthnoste bhagavannamaḥ || 15 ||
[Analyze grammar]

namaścānandarūpāya meḍhre te ca namo namaḥ |
namaḥ kaṭyāṃ naranārāyaṇāya te namo namaḥ || 16 ||
[Analyze grammar]

udare te namo viśvaṃbharāya bhagavannamaḥ |
pārśvayoḥ rāmakṛṣṇābhyāṃ namo namaḥ namo namaḥ || 17 ||
[Analyze grammar]

nābhau te padmanābhāya hṛdaye haṃsayogine |
kaṇṭhe te nīlakaṇṭhāya vakṣasi brahmaṇe namaḥ || 18 ||
[Analyze grammar]

bāhvoścakradharāyā'pi karayoḥ śaṃkhadhāriṇe |
mukhe rūpābhirūpāya netrayoḥ kamalākṣiṇe || 19 ||
[Analyze grammar]

nāsāyāṃ sarvagandhāya lalāṭe gururūpiṇe |
karṇayoḥ śrutikartre te namo mūrdhni śikhāvate || 20 ||
[Analyze grammar]

ityabhyarcyā'pi govindaṃ phalamālyānulepanaiḥ |
śūrpaṃ saṃsthāpya purato lakṣmīṃ māṃ tatra sannyaset || 21 ||
[Analyze grammar]

namo mokṣapramodānāṃ dātṛbhyāṃ sarvasampadām |
namaḥ śokaparihārakartṛbhyāṃ sarvadā namaḥ || 22 ||
[Analyze grammar]

viśokau duḥkhanāśāya viśokau varadau ca me |
viśokau mama sampattyai viśokau sarvasiddhaye || 23 ||
[Analyze grammar]

bhavatāṃ mama śokānāṃ sarveṣāṃ nāśakau prabhū |
śuklāmbaraiḥ samāveṣṭya śūrpaṃ sampūjayet phalaiḥ || 24 ||
[Analyze grammar]

vastrairnānāvidhaistadvat suvarṇakamalena ca |
pūjayitvā bhojayecca dugdhapākādikaṃ śubham || 25 ||
[Analyze grammar]

trikālaṃ pūjayeccāpi kamalairbhojayedapi |
rajanyāṃ ca vratī śītaṃ darbhodakaṃ pibecchuci || 26 ||
[Analyze grammar]

tatastu jāgaraṃ gītanṛtyavādyānvitaṃ caret |
prātaḥ prapūjayellakṣmīmaśokāṃ śrīpatiṃ tathā || 27 ||
[Analyze grammar]

dampatīṃ pūjayeccāpi viprāṇāṃ vidhinā tataḥ |
vastrabhūṣābhojyapātraśṛṃgāraśāṭikā diśet || 28 ||
[Analyze grammar]

dhanadānāni ratnānāṃ dhenūnāmarpaṇāni ca |
yathāśakti prakuryācca bhojayed bālabālikāḥ || 29 ||
[Analyze grammar]

sādhūn sādhvīrbhojayecca dadyādannāni sarvataḥ |
parihāraṃ prakuryācca dakṣiṇaḥ pradiśettathā || 30 ||
[Analyze grammar]

anena vidhinā kuryād viśokālalitāvratam |
viśokādvādaśīrūpaṃ śokā naśyanti tasya vai || 31 ||
[Analyze grammar]

dhenudānaṃ sopadhānaśayyādānaṃ dhanārpaṇam |
prakuryācca lalitāśrīlakṣmīṃ stuvīta bhāvataḥ || 32 ||
[Analyze grammar]

yathā na lakṣmīḥ sampacca māṃ parityajya gacchati |
tathā surūpatā''rogyamaśokaḥ santu me sadā || 33 ||
[Analyze grammar]

yathā bhaktirbhavedagryā śrīkṛṣṇavallabhe mama |
yathā kṛṣṇo bālakṛṣṇaḥ salakṣmīko mama gṛhe || 34 ||
[Analyze grammar]

sadā vasettathā śūrpalakṣmīdānaṃ karomi ca |
suvarṇakamalaṃ ramyaṃ karavīraṃ ca kuṃkumam || 35 ||
[Analyze grammar]

ketakīṃ sinduvāraṃ ca mallikāṃ kesaraṃ tathā |
kajjalaṃ cā'laktakaṃ ca candanaṃ ca kadambakam || 36 ||
[Analyze grammar]

rañjanaṃ gandhitailaṃ ca gandhasāraṃ dadāmi ca |
sarvaśṛṃgārapuṣpāṇi dadāmi saukhyahetave || 37 ||
[Analyze grammar]

paṭhanācchravaṇāccāpi smaraṇātkaraṇādapi |
bhuktirmuktirbhavedeva viśokalalitāvratāt || 38 ||
[Analyze grammar]

atha kṛṣṇalālanākhyaṃ vrataṃ vacmi ca te rame |
vibhūtayo bhavantyeva kṛṣṇalālanasadvratāt || 39 ||
[Analyze grammar]

kārtike caitrake vaiśākhake mārge ca phālgune |
āṣāḍhe śuklake dinatrayātmakaṃ vrataṃ tvidam || 40 ||
[Analyze grammar]

sulaghubhug daśamyāṃ tu rātrau śīlavratī bhavet |
kṛtvā sāyantanīṃ pūjāṃ gṛhṇīyānniyamaṃ vratī || 41 ||
[Analyze grammar]

ekādaśyāṃ nirāhāraṃ kariṣye'haṃ vrataṃ tviti |
namo nārāyaṇāyeti prātarutthāya cintayet || 42 ||
[Analyze grammar]

snātvaikādaśikāprātarmaṇḍape pūjayet prabhum |
anādiśrīkṛṣṇanārāyaṇaṃ māṃ puruṣottamam || 43 ||
[Analyze grammar]

śuklapuṣpākṣatavārikuṃkumacandanādibhiḥ |
namo vibhūtaye pādau namo'śokāya jānunī || 44 ||
[Analyze grammar]

namaḥ kṛṣṇayetyūrū ca viśvamūrte namaḥ kaṭim |
kandarpāya namo meḍhraṃ phalaṃ nārāyaṇāya ca || 45 ||
[Analyze grammar]

dāmodarāyetyudaraṃ vāsudevāya ca stanau |
mādhavāyetyuro viṣṇoḥ kaṇṭhamutkaṇṭhine namaḥ || 46 ||
[Analyze grammar]

śrīdharāya mukhaṃ keśān keśavāyeti mastakam |
pṛṣṭhaṃ śārṅgadharāyeti śravaṇau śrutivedine || 47 ||
[Analyze grammar]

haraye śaṃkhacakrāsigadājalajapāṇaye |
śiraḥ sarvātmane tasmai nama ityabhipūjanam || 48 ||
[Analyze grammar]

matsyamutpalasaṃyuktaṃ haimaṃ kṛtvā tu śaktitaḥ |
udakuṃbhe nyasettacca dāne prapūjya vai diśet || 49 ||
[Analyze grammar]

guḍapātraṃ tilairyuktaṃ sitavastrābhiveṣṭitam |
phalāni vividhānyeva dāne prapūjya cārpayet || 50 ||
[Analyze grammar]

ārārtrikaṃ prakuryācca vibhūtiśrīśrīkṛṣṇayoḥ |
naivedyāni vicitrāṇi prātarmadhye niśāmukhe || 51 ||
[Analyze grammar]

datvā prasvāpayeccāpi gītavāditrakotsavaiḥ |
jāgaraṇaṃ vratī kuryāt prātaḥ snātvā prapūjyet || 52 ||
[Analyze grammar]

dvādaśyāṃ prārthayeccāpi padmaṃ dadyād dvijāya tu |
udakuṃbhaṃ saratnaṃ ca gāṃ dadyād gurave tathā || 53 ||
[Analyze grammar]

yathā na mucyase kṛṣṇa sadā sarvavibhūtibhiḥ |
tathā māmuddharā'śeṣaduḥkhasaṃsārasāgarāt || 54 ||
[Analyze grammar]

śayyāṃ dadyād dhanaṃ dadyād grāmaṃ kṣetraṃ gṛhādikam |
guruṃ sampūjya vidhivad bhūṣāvastrāṇi cārpayet || 55 ||
[Analyze grammar]

adhanaḥ pūjayetpuṣpairbhojanānnaṃ diśed vratī |
anena vidhinā yastu kṛṣṇalālanasadvratam || 56 ||
[Analyze grammar]

vibhūtisampradaṃ kuryāttasyarddhayaḥ pade pade |
pāpāni tasya naśyanti pitṝṇāṃ tārayecchatam || 57 ||
[Analyze grammar]

janmanāṃ śatasāhasraṃ na śokaphalabhāg bhavet |
na tu vyādhirbhavettasya na dāridryaṃ na bandhanam || 58 ||
[Analyze grammar]

yāvad yugasahasrāṇāṃ śatamaṣṭottaraṃ bhavet |
tāvat svarge vaseccāpi bhūpatiḥ saḥ punarbhavet || 59 ||
[Analyze grammar]

vrataṃ kṛtvā harerdhāma prayātyeva na saṃśayaḥ |
sarvān kāmānaśnute ca kṛṣṇena hariṇā saha || 60 ||
[Analyze grammar]

śṛṇu lakṣmi kalpe rathantare'bhūllubdhako hyaghī |
paruṣākhyaḥ sa māṃsado durgandhaścātipāpavān || 61 ||
[Analyze grammar]

bhāryā'pyasyātiduṣṭā ca vyabhicāraparāyaṇā |
jīvahiṃsāparau tau tvekadā vane sarovarāt || 62 ||
[Analyze grammar]

padmānyādāya bahūni vikrayārthaṃ tu vaidiśam |
nagaraṃ yayatuścāpi vikrayo na vyajāyata || 63 ||
[Analyze grammar]

nirāśau tāvatā rātrau kṣudhitau śramitāvubhau |
prāsādasannidhau mārge suptau śuśruvatuḥ śanaiḥ || 64 ||
[Analyze grammar]

maṇḍape śrīhareḥ pūjāśabdān veśyākṛtān śubhān |
māghe rātrau śuklapakṣe caikādaśyāṃ varāṃganā || 656 ||
[Analyze grammar]

gaṇikā'naṃgavatīti jagau tadā sugītikāḥ |
pūjayitvā tadā rātrau dānaṃ dadau tu sā bahu || 66 ||
[Analyze grammar]

gurave sādhave vedaviprāya śayanādikam |
lavaṇācalamevāpi mūrtiṃ viṣṇostu kānakīm || 67 ||
[Analyze grammar]

dhanānyapi bahūni ca dhānyāni vividhāni ca |
alaṃkṛtya hṛṣīkeśaṃ sauvarṇāmbarapādapam || 68 ||
[Analyze grammar]

tāṃ tu dṛṣṭvā tatastābhyāmidaṃ hi pariniścitam |
imāni kamalānyatra pūjāyāṃ dadva eva ha || 69 ||
[Analyze grammar]

evaṃ bhaktyā dattavantau veśyāpi ca dhanaṃ śatam |
dātuṃ samārabhatā'pi tau tu jagrahaturna tat || 70 ||
[Analyze grammar]

dattamannaṃ bhojanārthaṃ tau tu jagrahaturna tat |
prasaṃgādupavāsasya māhātmyaṃ saṃviditya vai || 71 ||
[Analyze grammar]

jāgaraṇaṃ kṛtavantau prātardvādaśikā'bhavat |
prabhāte veśyā dattā śayyā salavaṇācalā || 72 ||
[Analyze grammar]

gṛhāṇi gurave bhaktyā viprebhyo dvādaśā'pi ca |
vastrālaṃkārasaṃyuktā gāvaśca vatsikāyutāḥ || 73 ||
[Analyze grammar]

bhojanaṃ ca suhṛnmitradīnāndhakṛpaṇaiḥ samam |
lubdhakena tathā nāryā dṛṣṭametatprapūjanam || 74 ||
[Analyze grammar]

śrīharerdvādaśikāyāṃ prasādaḥ śarkarātmakaḥ |
caraṇāmṛtasalilaṃ gṛhītaṃ ca tataḥ param || 75 ||
[Analyze grammar]

yayatuḥ svagṛhaṃ tau ca veśyāpi svagṛhaṃ gatā |
bhaktimantastrayaste vai kālena nidhanaṃ gatāḥ || 76 ||
[Analyze grammar]

puṣkaraprārpaṇāttatra keśavārpaṇasatphalāt |
vinaṣṭāśeṣapāpaśca puṇyavān lubdhakaḥ sa tu || 77 ||
[Analyze grammar]

puṣkaravāhano rājā'bhavat puṣkarakhaṇḍake |
rājño nāmnā mahākhaṇḍaḥ puṣkarākhyo'bhavat purā || 78 ||
[Analyze grammar]

bhaktyā tuṣṭena hariṇā kṛṣṇalālanasadvratāt |
vratasantuṣṭayā lakṣmyā vibhūtyā bhūbhṛte'rpitam || 79 ||
[Analyze grammar]

kamalaṃ kāñcanaṃ ramyaṃ kāmadaṃ kāmagaṃ param |
lokaiḥ samastairnagaravāsibhiḥ kamalena saḥ || 80 ||
[Analyze grammar]

vimānākhyena nākaṃ sadvīpāni vyacarannṛpaḥ |
saptamaḥ puṣkarasyā'sya dvīpaḥ puṣkaranāmakaḥ || 81 ||
[Analyze grammar]

puṣpavāhananāmā'pi puṣkarāsana ityapi |
khyātiṃ prāpa tathā rājñī nārīsahasrapūjitā || 82 ||
[Analyze grammar]

nāmnā lāvaṇyavatīti babhūva kamalāsamā |
putrāstasyāmayutaṃ sambabhūvuḥ puṣkarasya vai || 83 ||
[Analyze grammar]

yā ca veśyā sāpi jātā sapatnī bhūbhṛto vadhūḥ |
dehānte nṛpatiścāpi lavaṇyā ca priyā hyubhau || 84 ||
[Analyze grammar]

yayatuścākṣaraṃ dhāma mama lakṣmi paraṃ padam |
sapatnī yā tu veśyā'bhūt sā tyaktvā yoṣito vapuḥ || 85 ||
[Analyze grammar]

kāmadevasya vai patnī prītiḥ ratyāḥ sapatnikā |
lokeṣvānandajananī vyajāyata sureśvarī || 86 ||
[Analyze grammar]

kṛṣṇalālanasaṃjñaṃ ca vibhūtidvādaśīvratam |
puṣkarapuṣpasaṃjñaṃ vā vratametadudīritam || 87 ||
[Analyze grammar]

yathākathañcitkamale kamalairdvādaśī tithiḥ |
hariṃ prapūjya kartavyā deyaṃ dānaṃ ca dakṣiṇāḥ || 88 ||
[Analyze grammar]

na vittaśāṭhyaṃ kurvīta bhaktyā diśed yathādhanam |
suvarṇakamalaṃ yadvā deyaṃ padmaṃ jalodbhavam || 89 ||
[Analyze grammar]

deyaṃ vā sthalakamalaṃ kamaleśaḥ prasīdati |
dadāti sārvabhaumaṃ ca rājyaṃ svargaṃ divaṃ param || 90 ||
[Analyze grammar]

satyaṃ dadāti vā sauraṃ cāndraṃ brāhmaṃ padaṃ ca vā |
vairājaṃ vaiṣṇavaṃ vāpi padaṃ śrīpuramityapi || 91 ||
[Analyze grammar]

vaikuṇṭhaṃ vāpi golokaṃ cāvyākṛtaṃ tathā'mṛtam |
akṣaraṃ paramaṃ dhāma brahmadhāma dadātyapi || 92 ||
[Analyze grammar]

ahaṃ vibhūtinātho'smi dadāmi pūjakāya vai |
anantaguṇakaṃ lakṣmi vibhūtidvādaśīvrataiḥ || 93 ||
[Analyze grammar]

cakravartinṛpā lakṣmi ye ye bhavanti bhūtale |
jātāḥ pūrveṣu kalpeṣu vibhūtidvādaśīvrataiḥ || 94 ||
[Analyze grammar]

kamalaṃ kamalāsthānaṃ sauvarṇaṃ tu mayā saha |
kamalasya pradānena kamalāsahitastvaham || 95 ||
[Analyze grammar]

vasāmi dātari cāpi mamāṃ'śena cirāyuṣi |
cakracihnaṃ pradadāmi kare vai cakravartinaḥ || 96 ||
[Analyze grammar]

madhyāṃgulidvayoḥ śaṃkhau śeṣāṇāṃ cakrakāṣṭakam |
sākṣānnārāyaṇasyaivaṃ santi cakrāṇi padmaje || 97 ||
[Analyze grammar]

padmaṃ kare pade padmaṃ cakraṃ vā cakravartinaḥ |
evaṃ kare dhvajacihnaṃ dhvajadāturdadāmi vai || 98 ||
[Analyze grammar]

triśūlārpaṇakartuśca triśūlaṃ pradadāmi ca |
dhanuṣyadātuḥ saśaraṃ dhanuṣyaṃ pradadāmi ca || 99 ||
[Analyze grammar]

matsyadātuḥ kare matsyaṃ dadāmi sarvaśobhanam |
svastikasya pradātuśca svastikaṃ pradadāmi ca || 100 ||
[Analyze grammar]

suvarṇānāṃ dhvajādīnāṃ dātre dadāmi sarvathā |
sasāgarāṃ pṛthivīṃ vai cakravartitvamityapi || 101 ||
[Analyze grammar]

yasya dakṣakare syuśca dhvajaḥ śūlo dhanuḥ śaraḥ |
mīnaḥ svastika ete ṣaṭ so'haṃ nārāyaṇaḥ svayam || 102 ||
[Analyze grammar]

lakṣmi sādhusvarūpeṇa hṛdaye tvāṃ nidhāya ca |
vāmasakthni pāṇḍurābhāṃ dhṛtvā vasāmi bhūtale || 103 ||
[Analyze grammar]

adṛśyā tvaṃ janairlakṣmi matsevāyā virājase |
tadā sādhusvarūpe cā'dhunā tvaṃ pṛthageva yā || 104 ||
[Analyze grammar]

tvaṃ vibhūtisvarūpā'si vratairvibhūtidāyinī |
vāmahaste daṇḍadīrgharekhā me dharmabodhinī || 105 ||
[Analyze grammar]

pādayorubhayorurdhvarekhe me vyāpike dvayoḥ |
dhāmasṛṣṭyorantarātmabodhinyau te'pi tadvidhe || 106 ||
[Analyze grammar]

madbhaktasya kṛpayā me cihnametad bhavedapi |
paṭhanācchravaṇādasya vibhūtiphalamāpnuyāt || 107 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne viśokalalitādvādaśīvratasya vibhūtilalitākṛṣṇalālanavratasya ca nirūpaṇam puṣkaravāhanākhyasya cakravartino |
dṛṣṭāntaḥ cakravarticihnāni ceti nirūpaṇanāmā navatriṃśadadhikaśatatamo'dhyāyaḥ || 139 ||
[Analyze grammar]