Chapter 138

śrīpuruṣottama uvāca |
rasakalyāṇalalitāvrataṃ lakṣmi ca te śṛṇu |
dvādaśyāṃ maṇḍapaṃ kuryāt sarvatobhadramaṇḍalam || 1 ||
[Analyze grammar]

pūrayed bahudhānyaiśca kalaśān sthāpayecchubhān |
madhyame kalaśe sthāpyā sauvarṇī bhūṣaṇānvitā || 2 ||
[Analyze grammar]

rasakalyāṇalalitālakṣmīḥ rasapradāyinī |
māghamāse śuklapakṣe dvādaśyāṃ lalitāṃ śriyam || 3 ||
[Analyze grammar]

snāpayenmadhunā cekṣurasena ca ghṛtena ca |
dadhnā dugdhena ca tīrthajalaiḥ saṃsnāpayettataḥ || 4 ||
[Analyze grammar]

bhūṣāmbarāṇi dadyācca candanākṣatakuṃkumam |
śṛṃgāradravyamevāpi diśet puṣpādikāni ca || 5 ||
[Analyze grammar]

dhūpaṃ dīpaṃ ca naivedyaṃ nīrājanaṃ tathā'rpayet |
prārthayed dakṣiṇāṃ dadyāt puṣpāṃjaliṃ samarpayet || 6 ||
[Analyze grammar]

evaṃ sampūjya vidhivat sādhūn viprān prapūjayet |
pūjayed dvijadāmpatyaṃ dadyād dānaṃ dhanādikam || 7 ||
[Analyze grammar]

bhojayedannapānādyairmadhureṇa rasena ca |
suvarṇakamalaṃ vastrayugalaṃ kalaśaṃ diśet || 8 ||
[Analyze grammar]

kalaśaṃ śarkarāpūrṇaṃ rasapūrṇaṃ diśecca vā |
rasaṃ vidyād ghṛtaṃ kṣīraṃ dadhi madhu ca śarkarām || 9 ||
[Analyze grammar]

laḍḍukān bhojayeccāpi saṃyāvamatha pūrikāḥ |
ghārikāmapyapūpāṃśca piṣṭāpūpāṃśca maṇḍakān || 10 ||
[Analyze grammar]

kṣīraṃ śākaṃ pāyasānnaṃ dadhyannaṃ bhojayettathā |
kamale mādhavi lakṣmi mātaḥ rame samudraje || 11 ||
[Analyze grammar]

bhadre jaye kambhare śri mahālakṣmi sukhaṃ kuru |
padmini padmaje kṛṣṇe nārāyaṇi narāyaṇi || 12 ||
[Analyze grammar]

ādye śrīlalite kṛṣṇapriye brāhmi namo'stu te |
vāsudevi mahādevi hiraṇye dhanarūpiṇi || 13 ||
[Analyze grammar]

sarvarase sarvasukhe sarvakalyāṇadāyini |
sampadaṃ modamatyantaṃ dehi me tvadvratena vai || 14 ||
[Analyze grammar]

evamabhyarcya sauvarṇāṃ lakṣmīṃ rasapradāyinīm |
rasakalyāṇalalitāṃ dāne śrīgurave diśet || 15 ||
[Analyze grammar]

pañcaratnādisahitāmaṅguṣṭhamātranirmitām |
caturbhujāṃ cakraśaṃkhamālāpūjāsamanvitām || 16 ||
[Analyze grammar]

tathā gomithunaṃ dadyād viprāya tu mahātmane |
sālaṃkāraṃ savastraṃ ca sadohaṃ dugdhadaṃ śubham || 17 ||
[Analyze grammar]

anena vidhinā yastu rasakalyāṇinīśriyaḥ |
vrataṃ kuryāt sa pāpebhyastat kṣaṇādeva mucyate || 18 ||
[Analyze grammar]

navā'rbudasahasrāṇi samāḥ svarge mahīyate |
suvarṇaṃ kamalaṃ lakṣmīṃ māsi māsi dadannṛpaḥ || 19 ||
[Analyze grammar]

agniṣṭomasahasrasya phalaṃ svarge samaśnute |
nārī kanyā ca kurute vidhavā vā satī ca yā || 20 ||
[Analyze grammar]

agniṣṭomaphalaṃ prāpya saubhāgyārogyamāpnuyāt |
matidātāpi vai svarge modate devatāgṛhe || 21 ||
[Analyze grammar]

śṛṇu lakṣmi vrataṃ cānyat tavaiva daśamīdine |
āṣāḍhe śuklapakṣe vai cāturmāsyā'grage dine || 22 ||
[Analyze grammar]

prātareva samutthāya snātvā dhyāyeddhariṃ prabhum |
tataścārdrānandalakṣmīṃ sauvarṇīṃ pūjayed vratī || 23 ||
[Analyze grammar]

aṃguṣṭhamātrāṃ sadvastrāṃ bhūṣāśṛṃgāraśobhitām |
nārāyaṇīśriyaṃ darbhagandhodakaiḥ sucandanaiḥ || 24 ||
[Analyze grammar]

snāpayecchuklapuṣpaiśca kuṃkumākṣatabhojanaiḥ |
naivedyairbhojayeccāpi nīrājayet kṣamāpayet || 25 ||
[Analyze grammar]

anādiśrīkṛṣṇanārāyaṇena sahitāṃ śriyam |
prārthayedbhāvahṛdayaiḥ sveṣṭadaṃ sveṣṭadāṃ tadā || 26 ||
[Analyze grammar]

mahālakṣmyai namaḥ pādau mahāviṣṇo namo'stu te |
śokahantryai namo jaṅghe sukhadāya namo'stu te || 27 ||
[Analyze grammar]

kamalāyai namaścorū ānandāya namo hare |
īśvariṇyai namaḥ kaṭiṃ sampatpradāya te namaḥ || 28 ||
[Analyze grammar]

mādhavyai ca namo nābhau svarṇavarṇāya te namaḥ |
stanau poṣaṇakāriṇyai namo viśvaṃbharāya te || 29 ||
[Analyze grammar]

kaṇṭhe namaḥ sarasvatyai nīlakaṇṭhāya te namaḥ |
karau kamaladhāriṇyai nārāyaṇāya te namaḥ || 30 ||
[Analyze grammar]

bāhū namo rakṣayitryai sudarśanadharāya ca |
cāndryai candrānane naumi hariṃ vahnimukhāya ca || 31 ||
[Analyze grammar]

netre kṛpāpravarṣiṇyai karuṇānilayāya ca |
bhruvau namaḥ kṣemadāyai kuśalakāriṇe namaḥ || 32 ||
[Analyze grammar]

lalāṭe dhanarūpāyai svarṇavarṇāya te namaḥ |
mukuṭe sarvaratnāyai sakaustubhāya te namaḥ || 33 ||
[Analyze grammar]

sarvakāyau sarvavāsau sarvaiśvaryasamanvitau |
sarvakāmapradau vande ārdrāśryānandamādhavau || 34 ||
[Analyze grammar]

sampadā copakaraṇairdhanairdhānyai rasādibhiḥ |
bhūṣāmbarādibhiścāpi gṛhamārdraṃ prapūritam || 35 ||
[Analyze grammar]

kurutaṃ strīdāsadāsībhṛtyāpatyasuśobhitam |
divyasādhanaśobhaṃ ca dhenuvājigajānvitam || 36 ||
[Analyze grammar]

udyānavāṭīkṣetrāḍhyaṃ yaśomānapravardhitam |
yānavimānavāhāḍhyaṃ śiṣyapraśiṣyasatprajam || 37 ||
[Analyze grammar]

modapramodasaukhyāḍhyaṃ samutsāhotsavānvitam |
vādyagītimahāsatradānapānasamanvitam || 38 ||
[Analyze grammar]

dharmakarmā'dhvarayuktaṃ nityaṃ ca bahudakṣiṇam |
vighnaśūnyaṃ pañcayajñaparaṃ kurutaṃ madgṛham || 39 ||
[Analyze grammar]

snuṣābhiḥ parito ramyāṃ sādhusādhvīvirājitam |
parameśamahābhaktipravāhitaṃ nirantaram || 40 ||
[Analyze grammar]

ante divyarasāḍhye vāmakṣare vasatiṃ ca me |
evamabhyarthya ca puṣpāñjaliṃ datvā visarjayet || 41 ||
[Analyze grammar]

lakṣmīṃ nārāyaṇaṃ cārdrānandau śrīgurave diśet |
ratnahīrakadhānyāni dvijātibhyo diśettathā || 42 ||
[Analyze grammar]

bhojayed bālabālādyā diśecca dakṣiṇāḥ śubhāḥ |
śaṃkhacakre sakaṭake svastikāṃ'kuśacāmarān || 43 ||
[Analyze grammar]

dadyāt satpuruṣāyā'pi miṣṭānnāmbarakāṇi ca |
ghṛtapātrāṇi pātrāṇi sahiraṇyakāni sandiśet || 44 ||
[Analyze grammar]

śarkarāsaktupātrāṇi caturmāsaṃ diśettathā |
tilapātrāṇi pūrṇāni rasapātrāṇi yāni ca || 45 ||
[Analyze grammar]

gandhodakaṃ puṣpavāri candanaṃ kuṃkumodakam |
apakvaṃ dadhi dugdhaṃ ca gośṛṃgodakamityapi || 46 ||
[Analyze grammar]

tulasīṃ kamalaṃ dadyāccāturmāsye sadārcane |
dāne sarvaṃ pradadyācca vadeccāpi śriyāḥ puraḥ || 47 ||
[Analyze grammar]

lakṣmi me prīyatāṃ nityaṃ pāpanāśāya mādhavī |
saubhāgyāya prasannā'stu lalite me sukhāya ca || 48 ||
[Analyze grammar]

evamuktvā diśet sarvaṃ kārtike daśamīdine |
hiraṇyakamalaṃ datvā caikādaśyāṃ prage punaḥ || 49 ||
[Analyze grammar]

pūjayitvā vrataṃ pūrṇaṃ kuryād diśed dvijātaye |
satūlāvaraṇāṃ śayyāṃ lakṣmīrme prīyatāmiti || 50 ||
[Analyze grammar]

ārdrānanaramānārāyaṇavrataṃ tvidaṃ mahat |
tenehā'mutra ca sadānandamāpnoti sampadaḥ || 51 ||
[Analyze grammar]

bhuktvā svargān cirasthāṃśca paraṃ padamavāpnuyāt |
śroturvaktuśca saṃsmartuścāpyānando bhaved dhruvaḥ || 52 ||
[Analyze grammar]

gṛhe sve mahadānandaśatāni cānubhūya ca |
bhūyo lakṣmīpadaṃ yāti śrīpuraṃ dhāma caiśvaram || 53 ||
[Analyze grammar]

śṛṇu lakṣmi vrataṃ te'nyacchāradeyavratottamam |
bṛhaspatestu divase kartavyaṃ pūjanaṃ tava || 54 ||
[Analyze grammar]

maṇḍapaṃ subhagaṃ kṛtvā toraṇādisamanvitam |
sauvarṇakalaśairdhānyaiścāsanādibhirūrjitam || 55 ||
[Analyze grammar]

tanmadhye kārayed ramyaṃ gajāsanaṃ suvarṇajam |
tatra pīṭhe sthāpayecca śāradākhyāṃ ramāṃ satīm || 56 ||
[Analyze grammar]

dvibhujāṃ lalitālakṣmīṃ sarvābharaṇabhūṣitām |
vīṇākamalahastāṃ ca mukuṭādisuśobhanām || 57 ||
[Analyze grammar]

atha pārśve sthāpayecca gāyatrīṃ ca sarasvatīm |
vādyayuktāṃ divyarūpāṃ vedapustakadhāriṇīm || 58 ||
[Analyze grammar]

evaṃ devītrayaṃ tatra pūjayed gandhakuṃkumaiḥ |
akṣataiḥ śvetapuṣpādyairdhūpadīpā''divastubhiḥ || 59 ||
[Analyze grammar]

kṣīraṃ ca pāyasaṃ siddhānnaṃ miṣṭaṃ bhojayettathā |
miṣṭavāri sugandhāḍhyaṃ pāyayecchītalaṃ tathā || 60 ||
[Analyze grammar]

tāmbūlakaṃ pradadyācca nīrājanaṃ tataścaret |
prārthayecchāradālakṣmīṃ vāṇī me prīyatāmiti || 61 ||
[Analyze grammar]

kṛpayā te bhaviṣyāmi vidyāvārinidhiḥ paraḥ |
rasanāgre mama nityaṃ sarasvatī vasatvapi || 62 ||
[Analyze grammar]

iha loke sadānandamavāpnuyāṃ tathā kuru |
vedāḥ śāstrāṇi śastrāṇi gītanṛtyādikaṃ ca yat || 63 ||
[Analyze grammar]

na vihīnaṃ tvayā vāṇi tathā me santu siddhayaḥ |
vāṇī medhā dharā puṣṭirgaurī tuṣṭiḥ prabhā matiḥ || 64 ||
[Analyze grammar]

etābhiḥ pāhi cāṣṭābhistanūbhirmāṃ narāyaṇi |
evaṃ samprārthya dānāni dadyāt puṣpāñjaliṃ tathā || 65 ||
[Analyze grammar]

bhojayed bālabālāśca sādhusādhvīśca yoṣitaḥ |
dhanavastrāṇi dadyācca kamaṇḍaluṃ ca pustakam || 66 ||
[Analyze grammar]

vādyadānaṃ prakurvīta śṛṃgārābharaṇārpaṇam |
parihāraṃ prakurvīta gurave śriyamarpayet || 67 ||
[Analyze grammar]

maunavratena bhuñjīta sāyaṃ prātaśca ca vai vratī |
guruvāre pratimāsaṃ māsāstrayodaśa vratam || 68 ||
[Analyze grammar]

sandhyāyāṃ ca tathā maunaṃ rakṣan vratī samācaret |
nā'ntarā bhojanaṃ kuryāt samāpte ca vrate tataḥ || 69 ||
[Analyze grammar]

udyāpanaṃ paraṃ kuryānmahotsavasamanvitam |
vastrayugmaṃ striyai dadyād viprāyai bhojanānvitam || 70 ||
[Analyze grammar]

godānaṃ gṛhadānaṃ ca kuryād yathādhanaṃ vratī |
anena vidhinā kṛtvā pāyasādi prabhojanam || 71 ||
[Analyze grammar]

vidyāvān dhanavān miṣṭakaṇṭho vratī prajāyate |
śāradāyāḥ prasādena brahmaloke mahīyate || 72 ||
[Analyze grammar]

naro nārī kumārī vā kurute śāradāvratam |
brahmaloke vased brāhmī yāvatkalpāyutatrayam || 73 ||
[Analyze grammar]

vidyādānaṃ prakuryād yo vrataṃ kṛtvā dhanārpaṇaiḥ |
vidvān vidyāṃ pradadyācca śāradāvratavāṃśca yaḥ || 74 ||
[Analyze grammar]

vidyādharapure so'pi vaset kalpā'yutatrayam |
ante lakṣmīpuraṃ yāti brahmā'kṣaraṃ vrajettataḥ || 75 ||
[Analyze grammar]

athā'nyatte śubhaṃ lakṣmi kalyāṇīkamalāvratam |
aśeṣayajñaphaladamaśeṣāghavināśanam || 76 ||
[Analyze grammar]

aśeṣaduṣṭaśamanamaśeṣasurapūjitam |
pavitrāṇāṃ pavitraṃ ca maṃgalānāṃ sumaṃgalam || 77 ||
[Analyze grammar]

daivataṃ daivatānāṃ ca purāṇānāṃ purātanam |
māghaśuklaikādaśikāvrataṃ kalyāṇadaṃ śubham || 78 ||
[Analyze grammar]

ghṛtenā'bhyañjanaṃ kṛtvā daśamyāṃ ca tilairjalaiḥ |
snātvā prātarharikṛṣṇaṃ pūjayet sarvavastubhiḥ || 79 ||
[Analyze grammar]

namo'nādikṛṣṇanārāyaṇāya pādayornamaḥ |
sarvātmane namaḥ ke ca vaikuṇṭhāya namo mukhe || 80 ||
[Analyze grammar]

śrīvatsadhāriṇe vakṣaḥsthale namo muhurmuhuḥ |
śaṃkhacakragadāpadmavaradānapradhāriṇe || 81 ||
[Analyze grammar]

namo bāhuṣu sarveṣūdare dāmodarāya ca |
meḍhre namaḥ sukhadāya ūrvoḥ saubhāgyadāya ca || 82 ||
[Analyze grammar]

jānvornamo bhūtadhrāya jaṃghayormokṣadāya ca |
pādayoḥ pāpanāśāya śrīkṛṣṇāya namo namaḥ || 83 ||
[Analyze grammar]

namaḥ kalyāṇakāriṇyai kamalāyai namo namaḥ |
namaḥ śrīlalitālakṣmyai jayālakṣmyai namo namaḥ || 84 ||
[Analyze grammar]

namaḥ śrīmāṇikīlakṣmyai nārāyaṇīśriyai namaḥ |
namaḥ śrīsukhadālakṣmyai śivarājñīśriyai namaḥ || 85 ||
[Analyze grammar]

namaḥ śrīpārvatīlakṣmyai kāntāpramāśriyai namaḥ |
namaḥ śrīkambharālakṣmyai mahālakṣmīśriyai namaḥ || 86 ||
[Analyze grammar]

namaḥ śrīsantuṣṭilakṣmyai kārṣṇīśriyai namo namaḥ |
namaḥ śrīrādhikālakṣmyai ramālakṣmyai namo namaḥ || 87 ||
[Analyze grammar]

evaṃ natvā ca govindaṃ śriyaṃ natvā punaḥ punaḥ |
sarvopacārakaiścobhau kalyāṇadau prapūjayet || 88 ||
[Analyze grammar]

gandhairmālyairdhūpadīpairbhakṣyairnānāvidhairapi |
jalaistāmbūlakaiścārārtrikaiḥ puṣpārpaṇaistathā || 89 ||
[Analyze grammar]

prīyatāṃ mama gopālaḥ śrīpatiḥ puruṣottamaḥ |
prīyatāṃ mama kalyāṇīmahālakṣmīnarāyaṇī || 90 ||
[Analyze grammar]

evamuccārya śayane sthāpayet parameśvarī |
madhyāhne pūjayeccāpi bhojayecca niśāmukhe || 91 ||
[Analyze grammar]

sotsavaṃ pūjayeccāpi bhojayet pāyasādikam |
suptvā caikādaśīprātarutthāya snānamācaret || 92 ||
[Analyze grammar]

pūjayed vidhinā lakṣmīṃ kalyāṇīṃ maṇḍape śubhe |
sarvatobhadrake ramye maṇḍale viṣṇunā saha || 93 ||
[Analyze grammar]

pūjayitvā ca godāne śayyādānaṃ ghaṭārpaṇam |
lakṣmyarpaṇaṃ ratnabhūṣāmbarapātradhanārpaṇam || 94 ||
[Analyze grammar]

dhānyabhojanabhogyādyarpaṇaṃ kuryād vratī prage |
bhojayechrīmahālakṣmīṃ dugdhaṃ phalādikaṃ śubham || 95 ||
[Analyze grammar]

madhyāhne pūjayeccāpi bhojayet pāyasādikam |
sāyaṃ sampūjayeccāpi rātrau jāgaraṇaṃ caret || 96 ||
[Analyze grammar]

dvādaśyāṃ prātarevā'pi prapūjya vidhinā diśet |
gurave sādhave sādhvyai dānāni ca dvijātaye || 97 ||
[Analyze grammar]

bhojayet sumṛṣṭamiṣṭānnāni viprān satastathā |
bālakān bālikā nārīḥ sādhūn saṃbhojayettathā || 98 ||
[Analyze grammar]

dadyād dānāni bahūni parihāraṃ tataścaret |
lakṣmīnārāyaṇasaṃhitāyāḥ kathāmimāṃ vadet || 99 ||
[Analyze grammar]

paṭhanācchravaṇādasya smaraṇāccānumodanāt |
bhuktirmuktirbhaveccāpi kalyāṇāni bahūni ca || 100 ||
[Analyze grammar]

purājanmani cābhīrīkanyā kalyāṇinīvratam |
kṛtvā nārāyaṇaputrī ūrvaśī samajāyata || 101 ||
[Analyze grammar]

purā vaiśyakuṭumbotthā pulomakanyakā tvidam |
vrataṃ kṛtvā mahendrāṇī vyajāyata diveśvarī || 102 ||
[Analyze grammar]

purā kṛtvā vrataṃ caitat suraputro dvijastataḥ |
sūryo babhūva svargeśaḥ sahasraraśmivān prabhuḥ || 103 ||
[Analyze grammar]

tasmāt kalyāṇikālakṣmīvrataṃ sveṣṭottamapradam |
māghe dinatrayaṃ kāryaṃ sarvakalyāṇasampradam || 104 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne rasakalyāṇalalitāvratasya ārdrānandaramānārāyaṇavratasya śāradeyavratasya kalyāṇīkamalāvratasya ca nirūpaṇa |
nāmā aṣṭatriṃśadadhikaśatatamo'dhyāyaḥ || 138 ||
[Analyze grammar]