Chapter 137

śrīpuruṣottama uvāca |
śṛṇu nārāyaṇīśri tvaṃ ghaṭalakṣmīvrataṃ tava |
ghaṭalakṣmīvratinastu kramāt saptadivaṃ bhavet || 1 ||
[Analyze grammar]

bhūloko'yaṃ divaṃ proktaḥ sampatsukhapramodanaiḥ |
bhuvarloko'pi ca divaṃ siddhimatāṃ hi yoginām || 2 ||
[Analyze grammar]

svargādayo divaṃ santi satyāntāḥ sarva eva te |
devalokā hi saptaite yato divyagatipradāḥ || 3 ||
[Analyze grammar]

paryāyeṇa tu sarveṣāmādhipatyaṃ tava vratāt |
ghaṭalakṣmīvratādeva jāyate nātra saṃśayaḥ || 4 ||
[Analyze grammar]

iha loke śubhaṃ rūpamāyuḥ saubhāgyamuttamam |
lakṣmīśca vipulā sampajjāyate te vratādiha || 5 ||
[Analyze grammar]

śṛṇu cātra kathāṃ divyāmagastyasya mahātmanaḥ |
purā vahniḥ samājñapto mahendreṇa suradviṣām || 6 ||
[Analyze grammar]

vināśārthaṃ tato vahnirdadāha koṭidānavān |
nirdagdhebhyo'vaśiṣṭā ye dānavāstu sahasraśaḥ || 7 ||
[Analyze grammar]

palāyamānāstrastāśca samudraṃ viviśuḥ khalāḥ |
tārakaḥ kamalākṣaśca kāladaṃṣṭraḥ parāvasuḥ || 8 ||
[Analyze grammar]

virocanaśca te cā'bdhau sanniveśamakurvata |
aśaktāste ceti matvā vahninā samupekṣitāḥ || 9 ||
[Analyze grammar]

atha kālāntare daityā balamavāpya vai punaḥ |
sampīḍayanti te devān manuṣyān saha jaṃgamān || 10 ||
[Analyze grammar]

viprān sādhūn prasampīḍya praviśanti punarjalam |
evaṃ varṣasahasrāṇi vīrāḥ pañca ca sapta ca || 11 ||
[Analyze grammar]

jaladurgabalāllakṣmi pīḍayanti jagattrayam |
tataḥ punarmahendro'pi vahnaye samupādiśat || 12 ||
[Analyze grammar]

acirād daityanāśārthamabdhireṣa viśuṣyatu |
yasmādasmaddviṣāmeṣaḥ śaraṇaṃ varuṇālayaḥ || 13 ||
[Analyze grammar]

tasmād bhavān drutamasya kṣayaṃ vidhātu śoṣaṇāt |
agniḥ prāha tataḥ śukraṃ samudraśoṣaṇaṃ prati || 14 ||
[Analyze grammar]

adharma eva devendra sāgarasya praśoṣaṇam |
asya yojanamātre'pi jīvakoṭiśatāni vai || 15 ||
[Analyze grammar]

nivasanti hi jīvānāṃ mahān prasaṃkṣayo bhavet |
pāpaṃ cā'sīmakaṃ syānme tatkathaṃ prakaromyaham || 16 ||
[Analyze grammar]

evaṃ śrutvā mahendrastu prāha roṣād vacastadā |
na dharmā'dharmasaṃśleṣaṃ prāpnuvantyamarā divi || 17 ||
[Analyze grammar]

bhavān dāhakaro devaḥ pāpalepavivarjitaḥ |
tathāpi nā''jñāṃ vahase śaṣāmi mānuṣo bhava || 18 ||
[Analyze grammar]

athāha pavanaṃ cendrastvaṃ praśoṣaya sāgaram |
pavano'pi tathā prāha pāpakṛtyaṃ karomi na || 19 ||
[Analyze grammar]

tadendrastaṃ śaśāpāpi bhava tvaṃ mānuṣo'nila |
evaṃ śāpaṃ gatau tau ca vaśiṣṭhā'gastyanāmakau || 20 ||
[Analyze grammar]

vahnirjāto'gastyamunirvāyurvasiṣṭha eva ca |
kuṃbhād dvau sahajātau vai mitrāvaruṇavīryataḥ || 21 ||
[Analyze grammar]

urvaśī śrīnaranārāyaṇaputryapsarovarā |
mitreṇā''mantritā kāmād gacchantī cāmbare yadā || 22 ||
[Analyze grammar]

paścād dṛṣṭā varuṇena dhṛtā kāmārthamityapi |
kintu sā satyamārgasthā varuṇaṃ nābhyanandata || 23 ||
[Analyze grammar]

mitreṇā'haṃ vṛtā pūrvaṃ tasya bhāryā bhavāmi ha |
te bhāryā dharmato nāsmi hyadhunā varuṇa prabho || 24 ||
[Analyze grammar]

āha tāṃ varuṇaścittaṃ mayi nyasya pragamyatām |
sāpi mitraṃ gatā mitraḥ śuśrāva ca tayoditam || 25 ||
[Analyze grammar]

cittanyāsaṃ samākarṇya kruddhastatyāja tāṃ tadā |
veśyādharmaṃ śritavatī dvābhyāṃ tyaktā hi sā yayau || 26 ||
[Analyze grammar]

saṃkalpajaṃ dhātumugraṃ mitraśca varuṇo'pi ca |
urvaśīdarśanotthaṃ vai ghaṭamadhye sasarjatuḥ || 27 ||
[Analyze grammar]

etasminneva kāle tu niminā śrīvasiṣṭhakaḥ |
śapto videhabhāvatve videhaḥ san ghaṭe sthitaḥ || 28 ||
[Analyze grammar]

agastyo'pīndraśāpena ghaṭe tatra sthito'bhavat |
agniragastyo ghaṭata utpannastatra bālakaḥ || 29 ||
[Analyze grammar]

vāyurvaśiṣṭho ghaṭata utpannastatra bālakaḥ |
varuṇāṃ'śo'gastyakaśca mitrāṃśastu vasiṣṭhakaḥ || 30 ||
[Analyze grammar]

utpannau jātamātrau tau jātismarau pravedinau |
cakratuḥ śāpamuktyarthaṃ ghaṭalakṣmīvrataṃ hyubhau || 31 ||
[Analyze grammar]

maṇḍapaṃ kadalīstabhaiḥ kārayāmāsatuśca tau |
hāratoraṇamālābhirvastrapuṣpaphalādibhiḥ || 32 ||
[Analyze grammar]

mṛttikākalaśādyaiśca kuṇḍavedībhiranvitam |
homasāmagrikāyuktaṃ kāṣṭhāsanādirājitam || 33 ||
[Analyze grammar]

pūjopahārayuktaṃ ca svarṇakalaśarājitam |
mṛttikāyā ghaṭaṃ vāriyutaṃ svayonimuttamam || 34 ||
[Analyze grammar]

maṇḍape cānayāmāsatuśca dvau tau pupūjatuḥ |
mātaraṃ śrīmahālakṣmīmāhvayāmāsatuśca tau || 35 ||
[Analyze grammar]

sthāpayāmāsatustatra ghaṭe sauvarṇakāritām |
pañcāmṛtairjalaiścāpi snāpayāmāsatustataḥ || 36 ||
[Analyze grammar]

bhūṣayāmāsatuḥ śṛṃgārayāmāsaturīśvarīm |
veṣayāmāsatū raktāmbarādyairmātaraṃ hi tām || 37 ||
[Analyze grammar]

pūjayāmāsatuḥ puṣpākṣatakuṃkumakajjalaiḥ |
sarvavastubhirabhyarcyā''rārtrikaṃ cakratustathā || 38 ||
[Analyze grammar]

miṣṭānnaṃ pāyasānnaṃ ca bhojayāmāsaturmudā |
jalaṃ tāmbūlakaṃ cāpyarpayāmāsaturādarāt || 39 ||
[Analyze grammar]

suvarṇakalaśaṃ pārśve mālyavastravibhūṣitam |
pañcaratnasamāyuktaṃ ghṛtapātrasamanvitam || 40 ||
[Analyze grammar]

tilapatraphalayuktaṃ sthāpayāmāsatuśca tau |
aṅguṣṭhamātraṃ puruṣaṃ paramaṃ brahma śāśvatam || 41 ||
[Analyze grammar]

anādiśrīhariṃ māṃ sthāpayāmāsaturatra ca |
dhānyāni vastrabhūṣāśca pātraratnāni sarvathā || 42 ||
[Analyze grammar]

vinyasya pūjayāmāsatuśca gāṃ vatsikāyutām |
sarvābharaṇabhūṣāḍhyāṃ śṛṃgakhuraiḥ suvarṇajām || 43 ||
[Analyze grammar]

sakāṃsyadohapātrāḍhyāṃ ghaṇṭā''bharaṇabhūṣitām |
pūjayāmāsatuścāpi puṣpāñjaliṃ nyavāpatuḥ || 44 ||
[Analyze grammar]

tataḥ prasannā mātā śrīghaṭalakṣmīrmahāsatī |
pratyakṣā'bhūttayoragre varārthaṃ tau nyayojayat || 45 ||
[Analyze grammar]

vavrāte tau varaṃ śreṣṭhaṃ mātastava prasādataḥ |
janmano'smād bhavenmuktirmānuṣāttat tathā kuru || 46 ||
[Analyze grammar]

lakṣmīḥ prāha tadāgastyaṃ daityā vasanti vāridhau |
abdhipānottaraṃ muktirmānuṣātte bhaviṣyati || 47 ||
[Analyze grammar]

vasiṣṭho'yaṃ divyadehastvayā sākaṃ bhaviṣyati |
lakṣmīḥ prāha punaścāpi varārthaṃ ca tadā muniḥ || 48 ||
[Analyze grammar]

vasiṣṭhaḥ samprayayāce ghaṭalakṣmīvrataṃ śubham |
agastyodayadivase prātaḥ śuklatilādibhiḥ || 49 ||
[Analyze grammar]

tīrthajalaiḥ snānamāptaḥ śuklāmbaradharo gṛhī |
mṛdghaṭe vā svarṇaghaṭe lakṣmīṃ tvāṃ pūjayettu yaḥ || 50 ||
[Analyze grammar]

śrīhariṃ ca vasiṣṭhaṃ cā'gastiṃ ca pūjayettu yaḥ |
āsaptarātraṃ vāpi ca saptadaśasamāśca vā || 51 ||
[Analyze grammar]

pūjayedarghamapyatra dadyāttasya kramāt khalu |
bhūrloke ca bhuvarloke svarge mahari vai jane || 52 ||
[Analyze grammar]

tapoloke satyaloke vāso bhavecciraṃ khalu |
kalpaṃ kalpaṃ prabhuktvā sa bhogān yāyāttato'kṣaram || 53 ||
[Analyze grammar]

saptā'rghyakartā prāpnuyāt saptalokān samṛddhikān |
namo lakṣmyai mahālakṣmyai viṣṇupatnyai namo namaḥ || 54 ||
[Analyze grammar]

arghyaṃ gṛhāṇa sarveśi dehi saukhyāni sarvaśaḥ |
namo nārāyaṇāya śrīpataye haraye namaḥ || 55 ||
[Analyze grammar]

arghyaṃ gṛhāṇa bhagavan dehi saukhyāni sarvaśaḥ |
kāśapuṣpapratīkāśāvagnimārutasaṃbhavau || 56 ||
[Analyze grammar]

mitrāvaruṇayoḥ putrau kuṃbhayonī namo'stu vām |
evamarghyaṃ ca pūjāṃ ca puṣpāñjaliṃ samarpayet || 57 ||
[Analyze grammar]

tasya lokāḥ śāśvatāste lakṣmi bhavantu sarvadā |
yāvadāyuśca yaḥ kuryāttasya vāso'kṣare bhavet || 58 ||
[Analyze grammar]

ityarthitā vaśiṣṭhena kuṃbhalakṣmīḥ prasūstadā |
tathāstviti prāha tābhyāṃ śīghraṃ līnā'bhavat prasūḥ || 59 ||
[Analyze grammar]

munī kṛtvā parihāraṃ tepaturduścaraṃ tapaḥ |
tataḥ kālena daityānāṃ vīkṣyopadravamulbaṇam || 60 ||
[Analyze grammar]

agastyaḥ pītavānabdhiṃ daityā nāśaṃ yayustadā |
indrādidevavṛndena hatā naṣṭāḥ suradviṣaḥ || 61 ||
[Analyze grammar]

tato devāḥ prasannā vai brahmādyāścāyayurmunī |
yatra tapastepāte tau varārthaṃ preritau ca taiḥ || 62 ||
[Analyze grammar]

agastyaśca varaṃ vavre yadabhīṣṭaṃ tadā'bhavat |
yāvad brahmasahasrāṇāṃ pañcaviṃśatikoṭayaḥ || 63 ||
[Analyze grammar]

vaimānikau bhaviṣyāvo dvāvāvāṃ svargagāminau |
vasiṣṭhaḥ saptamadhye syādagastyo dakṣiṇāpathe || 64 ||
[Analyze grammar]

asmattārodaye kuryād yaḥ kaścit pūjanaṃ tu nau |
sa saptalokasamrāḍ vai paryāyeṇa bhavediti || 65 ||
[Analyze grammar]

devāḥ prāhustathā'stveva yayuste ca yathāgatam |
vasiṣṭhāgastyakau cāpi malayādrau gatau tadā || 66 ||
[Analyze grammar]

tataḥ kālāntare'gastyaṃ parśurāmaḥ pratāpavān |
samudrasya prapānārthaṃ sarṣigaṇo nyavedayat || 67 ||
[Analyze grammar]

gokarṇatīrthabhūmyarthaṃ tadā'gastyaḥ punaḥ papau |
evaṃ kṛtvā mahatkāryaṃ svargaṃ yayatustau munī || 68 ||
[Analyze grammar]

ityetat kathitaṃ lakṣmi ghaṭalakṣmīvrataṃ tava |
saptadinaṃ phalāhārātmakaṃ pūjātmakaṃ tava || 69 ||
[Analyze grammar]

agastyasyodaye kāryaṃ bhuktimuktiphalapradam |
evaṃ lakṣmi tava pūjāṃ bhādrapade'ṣṭamīdine || 70 ||
[Analyze grammar]

mārgaśīrṣe ca vaiśākhe ūrje vā śuklapakṣake |
maṇḍapodyānasaṃyuktāmudyāpanasamanvitām || 71 ||
[Analyze grammar]

kariṣyanti narā nāryo yāsyanti te parāṃ gatim |
pañcagavyena kṣīreṇa puṣpagandhodakena ca || 72 ||
[Analyze grammar]

madhunā snāpayettvāṃ sampūjayet phalapuṣpakaiḥ |
śṛṃgārayed veṣayecca vibhūṣayennīrājayet || 73 ||
[Analyze grammar]

bhojayecca tataḥ puṣpāñjaliṃ dadyāt sumūrtaye |
kṣamāṃ yāceta ca namet prārthayed gurave'rpayet || 74 ||
[Analyze grammar]

mahālakṣmyai namaḥ pādau tava gulphau namaḥ śriyai |
śokahantryai namo jaṅghe ramāyai jānunī namaḥ || 75 ||
[Analyze grammar]

ūrū maṃgalakāriṇyai vakṣaḥsthalyai namaḥ kaṭim |
padmāyai nama udaramuraḥ kāmaśriyai namaḥ || 76 ||
[Analyze grammar]

karau saubhāgyalakṣmyai te bāhūdaramukhaṃ śriyai |
kamalāyai namo nāsāṃ padminyai locane namaḥ || 77 ||
[Analyze grammar]

puṣṭyai lalāṭamalakān hiraṇyāyai śiro namaḥ |
hariṇyai sukhadālakṣmyai lalitāyai namo namaḥ || 78 ||
[Analyze grammar]

nārāyaṇyai vāsudevyai sampadāyai namo'stu te |
sarvamaṃgalamāṃgalyaṃ dehi me mātarīśvari || 79 ||
[Analyze grammar]

sarvamaṃgalamāṃgalyavratena tava padmaje |
mameṣṭaṃ sarvamevā'stu kṛpayā tava cābdhije || 80 ||
[Analyze grammar]

gītamaṃgalanirghoṣān kārayed yajamānakaḥ |
suvāsinyaḥ kanyakāśca kuryurgītāni tatra ca || 81 ||
[Analyze grammar]

pūjayeyū raktavastrai raktamālyānulepanaiḥ |
kusumairakṣatairvārbhirnamaskāraiḥ prabhojanaiḥ || 82 ||
[Analyze grammar]

sindūrakuṃkumatailasārakastūrikā'ñjanaiḥ |
evaṃ sampūjya tāṃ mūrtiṃ dadyācchrīgurave śubhām || 83 ||
[Analyze grammar]

guruṃ sampūjayeccāpi kamalaiścandanādibhiḥ |
parihāraṃ tataḥ kuryād bhojayed bālabālikāḥ || 84 ||
[Analyze grammar]

sarvamaṃgalamāṃgalyalakṣmīvratamidaṃ param |
yaḥ kuryāttasya māṃgalyaṃ bahudhā vai vased gṛhe || 85 ||
[Analyze grammar]

sarvapāpavināśaśca saubhāgyārogyavardhanam |
sarvāmodapramodeṣṭānandasaukhyapradaṃ vratam || 86 ||
[Analyze grammar]

athā'pyanyad vrataṃ lakṣmi vadāmi sāṃkhyayaugikam |
sāṃkhyayogakṛtadīkṣāyutāṃ tvāṃ tatra pūjayet || 87 ||
[Analyze grammar]

pūrṇimāyāṃ tathā caikādaśyāṃ śukle tu pakṣake |
sarvamāseṣu sauvarṇāṃ kṛtvā lakṣmīṃ śubhānanām || 88 ||
[Analyze grammar]

raktāmbarāṃ raktalepāṃ raktacandanacarcitām |
pāṭalāṃ tvāṃ rattavarṇāsane samyak prapūjayet || 89 ||
[Analyze grammar]

raktakuṃkumasalilaiḥ snāpayet tvāṃ vibhūṣayet |
raktapuṣpāmbarai raktahārai raktgphalādibhiḥ || 90 ||
[Analyze grammar]

raktapuṣpaiḥ pūjayecca raktāṃ nārāyaṇe mayi |
bhojayetpūjayeccāpi nīrājayennamettathā || 91 ||
[Analyze grammar]

prārthayed pūjikā tvāṃ ca sāṃkhyayogavratasthitā |
raktavastre mahālakṣmi rakte nārāyaṇe sthite || 92 ||
[Analyze grammar]

svāsthyaṃ tyāgaṃ mahāśāntiṃ hareryogaṃ pradehi me |
anyebhyaśca viraktā'haṃ raktā'haṃ śrīpatau prabhau || 93 ||
[Analyze grammar]

sāṃkhyayogamahālakṣmīvrataṃ te'tra karomyaham |
anena mama saubhāgyaṃ taveva bhavatāddharau || 94 ||
[Analyze grammar]

sarvavighnavināśo'stu sarvānandā bhavantu me |
sarve rasāḥ sarvaśreyaḥkalyāṇāni bhavantu me || 95 ||
[Analyze grammar]

ityabhyarthya diśellakṣmīṃ gurave kānakīṃ tathā |
ratnabhūṣāmbaradhānyapātrādīni samarpayet || 96 ||
[Analyze grammar]

evaṃ vrataṃ prakartryāstu harerdāsyaṃ prapadyate |
bhuktirmuktirbhaveddhastagatā nārāyaṇāśrayāt || 97 ||
[Analyze grammar]

sopavāsaṃ prakartavyaṃ sāṃkhyayaugavrataṃ tvidam |
sarvapāpaharaṃ divyadehapradaṃ haripriyam || 98 ||
[Analyze grammar]

haripriyā bhavet sādhvī vratakartrī videhinī |
camatkāramayī divyā'kṣaradhāmagatā bhavet || 99 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne ghaṭalakṣmīvratasyā'gastyakṛtasya sarvamaṃgalamāṃgalyalakṣmīvratasya sāṃkhyayogalakṣmīvratasya ca nirūpaṇanāmā saptatriṃśadadhikaśatatamo'dhyāyaḥ || 137 ||
[Analyze grammar]