Chapter 135

śrīpuruṣottama uvāca |
śṛṇu nārāyaṇīśri tvaṃ purā dakṣeṇa vanditā |
prākaṭyāni lalitāyā lakṣmyoścoktavatī svayam || 1 ||
[Analyze grammar]

dakṣaḥ papraccha mātaste prākaṭyānyatra bhūtale |
kāni kutra ca vartante vartsyante tāni me vada || 2 ||
[Analyze grammar]

yatpūjābalataścā'haṃ vighnān vināśaye sadā |
grahadoṣān karmadoṣān vināśaye tavā'rhaṇāt || 3 ||
[Analyze grammar]

tadā tvaṃ nijapūjāyāḥ phalaṃ coktavatī śubham |
lalitākhyamahālakṣmyāḥ pūjakasyā'śubhāni vai || 4 ||
[Analyze grammar]

vinaṃkṣyanti na sandeho mama pūjāprakāriṇaḥ |
yāni yāni svarūpāṇi yatra yatra bhavanti ca || 5 ||
[Analyze grammar]

tāni vakṣyāmi te dakṣaprajāpate niśāmaya |
ahaṃ tvakṣaradhāmasthā śrīdevī puruṣottamau || 6 ||
[Analyze grammar]

anādiśrīkṛṣṇanārāyaṇī śrīparameśvarī |
brahmamuktānikā brāhmī kārṣṇī nārāyaṇī ramā || 7 ||
[Analyze grammar]

vāsudevī ca vairājī hiraṇyā hariṇī prabhā |
mahālakṣmīḥ kaṃbharāśrīrlalitā kamalā calā || 8 ||
[Analyze grammar]

īśvarī vaiṣṇavī cāndrī hiraṇmayī ca devatā |
ārṣī siddhā yoginī ca sādhvī satī pativratā || 9 ||
[Analyze grammar]

prabhvī dhāmā jayā bhaumī maheśī bhūrnarāyaṇī |
pāśavatī ca māṇikyā mārūpā śrīharipriyā || 10 ||
[Analyze grammar]

duḥkhahā śivarājñīśrī kṛṣṇanārāyaṇī satī |
brahmapriyā brahmadhāmni mahālakṣmīśca śrīpure || 11 ||
[Analyze grammar]

lakṣmīḥ kuṃkumavāpyāṃ ca mahālakṣmīstu raivate |
vyāghreśvarī māhiṣe ca gokarṇe dhenukarṇikā || 12 ||
[Analyze grammar]

santuṣṭā cākṣare kṣetre camatkāre tu mādhavī |
vārāṇasyāṃ viśālākṣī naimiṣe liṅgadhāriṇī || 13 ||
[Analyze grammar]

prayāge lalitā cāsmi kāmākṣī gandhamādane |
mānase kumudā devī viśvakāyā cidambare || 14 ||
[Analyze grammar]

gomante gomatīnāmnī mandarādrau tu kāmagā |
madotkaṭā caitrarathe jayantī vārahāhvaye || 15 ||
[Analyze grammar]

gaurīnāmnī kānyakubje raṃbhā tu malayācale |
ekāmrake kīrtimatī viśvā viśveśvare'smi ca || 16 ||
[Analyze grammar]

puṣkare puruhūtā'smi kedāre mārgadā'smi ca |
himācale ca nandā'smi bilvake bilvapatrikā || 17 ||
[Analyze grammar]

sthāneśvare bhavānyasmi śrīśaile padminī sadā |
bhadrā bhadreśvare cāsmi jayā vārāhaparvate || 18 ||
[Analyze grammar]

kāmalā kamalābhūmau raudrī ca rudrakoṭike |
kālī kālaṃjare cā'smi markoṭe mukuṭeśvarī || 19 ||
[Analyze grammar]

mahāliṃge kapilā'smi śivalige jalapriyā |
śālagrāme mahādevī māyāpuryāṃ kumārikā || 20 ||
[Analyze grammar]

santāne kāñcikāpuryāṃ lalitā durgapattane |
utpalākṣī sahasrākṣe kalamākṣe mahotpalā || 21 ||
[Analyze grammar]

gaṃgāyāṃ maṃgalā durgā vimalā puruṣottame |
vipāśāyāmamoghākṣī pāṭalā puṇḍravardhane || 22 ||
[Analyze grammar]

nārāyaṇī supārśve'smi vikūṭe bhadrasundarī |
vipule vipulānāmnī kalyāṇī malayācale || 23 ||
[Analyze grammar]

koṭitīrthe koṭavī ca sugandhā mādhave vane |
kubjāmrake trisandhyā'smi gaṃgādvāre ratipriyā || 24 ||
[Analyze grammar]

śivakuṇḍe sunandā'smi nandinī devikātaṭe |
rukmavarṇā dvāravatyāṃ rādhā vṛndāvane'smi ca || 25 ||
[Analyze grammar]

madhurāyāṃ devakanyā pātāle parameśvarī |
citrakūṭe tu sītā'smi vindhye vindhyācalī tathā || 26 ||
[Analyze grammar]

sahyādrāvekavīrā'smi harmacandre tu candrikā |
ramaṇā rāmatīrthe'smi yamunāyāṃ mṛgāvatī || 27 ||
[Analyze grammar]

karavīre mahālakṣmīrumādevī vināyake |
aromā vaijanāthe'smi mahākāle maheśvarī || 28 ||
[Analyze grammar]

abhayā'smi coṣṇatīrthe amṛtā vindhyakandare |
māṇḍavye māṇḍavīnāmnī svāhā māheśvare pure || 29 ||
[Analyze grammar]

chāgale'smi pracaṇḍā'haṃ caṇḍikā makarandake |
someśvare varārohā prabhāse puṣkarāvatī || 30 ||
[Analyze grammar]

sarasvatyāṃ devamātā pārā pārātaṭe'smi ca |
mahālaye mahābhāgā payoṣṇyāṃ piṃgaleśvarī || 31 ||
[Analyze grammar]

siṃhāraṇye siṃhikā'smi kārtikeye yaśaskarī |
utpalāvartake lolā subhadrā śoṇasaṃgame || 32 ||
[Analyze grammar]

mātā lakṣmīḥ siddhapure aṅganā pulahāśrame |
jālandhare viśvamukhī tārā kiṣkindhaparvate || 33 ||
[Analyze grammar]

devadāruvane puṣṭirmedhā kāśmiramaṇḍale |
himādrau bhīmikādevī puṣṭirviśveśvare'smi ca || 34 ||
[Analyze grammar]

kapālamocane śuddhirmātā kāyāvarohaṇe |
śaṃkhoddhāre dharādevī dhṛtiḥ piṇḍārake'smi ca || 35 ||
[Analyze grammar]

māṇikyā''nartake nārāyaṇīśrīrasmi nāgare |
kālā'smi candrabhāgāyāmacchode śivakāriṇī || 36 ||
[Analyze grammar]

veṇāyāmamṛtānāmnī badaryāmurvaśī tathā |
oṣadhiścottarakurau kuśadvīpe kuśodakā || 37 ||
[Analyze grammar]

manmathā hemakūṭe tu mukuṭe satyavādinī |
aśvatthe vandanīyāsmi nidhiśca śravaṇālaye || 38 ||
[Analyze grammar]

gāyatrī brahmaṇā sākaṃ pārvatī śivasannidhau |
devaloke tathendrāṇī brahmāsye'smi sarasvatī || 39 ||
[Analyze grammar]

sūryabimbe prabhā dhairye pāśavatī tu vaiṣṇavī |
anādiśrīkṛṣṇanārāyaṇe'smi sukhadā ramā || 40 ||
[Analyze grammar]

arundhatī satī cāsmi tilottamā'psarogaṇe |
citte brahmakalā cāsmi kāntā kānteṣu sarvaśaḥ || 41 ||
[Analyze grammar]

bhaṃgā nīlagirāvasmi vijayā''sāmabhūtale |
kāmarūpe ca kāmākṣyā brahmadeśa irā'smi ca || 42 ||
[Analyze grammar]

khāsīneṣu brahmaputrī patatkāye tu pāvanī |
śyāmā śyāmapradeśe'smi prācīne menakāṃginī || 43 ||
[Analyze grammar]

uccīne yāgaśikṣāṃgī tryaṃguleṣu tu kāramī |
kārākāre kṛṣṇavarṇā elune khanirasmi ca || 44 ||
[Analyze grammar]

mūkī maṃgolake cāsmi khiṃgane mañcchikā'smi ca |
stenāvāse pāraśavī rāśiputrī tu rāśane || 45 ||
[Analyze grammar]

uralā coralādrau ca raktā cāraktabhūtale |
nārāyaṇī sudāne'smi cālpā cālpe ca parvate || 46 ||
[Analyze grammar]

iṅgitajñā ketumāle parī cāsmi balāyate |
hāritī piṃgadeśe ca amarī kiṃpumātmake || 47 ||
[Analyze grammar]

rākarī mānakaṃgau ca parīnārī tu dakṣake |
saṃhārā najare'drau ca kāmarūpā kamāraṇe || 48 ||
[Analyze grammar]

māsāmbā sāmbaśaile'smi kalihārā tu mitrape |
trihotre hotriṇī cāsmi jhambe māṃjhāmbikāsmi ca || 49 ||
[Analyze grammar]

navadeśe maṇikāntā uṣṭrālaye mahordhvikā |
kalagaralī śvānāyāṃ cāliśī kvāthaparvate || 50 ||
[Analyze grammar]

evamādisvarūpaiśca bhūtale saṃvasāmyaham |
dakṣa sarvatra matpūjāṃ kuru bhuktipramuktidām || 51 ||
[Analyze grammar]

ityāha śrīmahālakṣmīstadā dakṣaṃ prajāpatim |
ataste tu mahālakṣmyāḥ pūjanaṃ sarvaśāntikṛt || 52 ||
[Analyze grammar]

pūjāyāṃ sarvanāmāni dve śate tava yo japet |
sarvāśca siddhayastasyopatiṣṭhantu yatheṣṭadāḥ || 53 ||
[Analyze grammar]

grahāṇāṃ cāpi yakṣāṇāṃ rakṣasāṃ vairiṇāṃ tathā |
kaṣṭāni yāntu nāśaṃ vai tava śāntimakhādibhiḥ || 54 ||
[Analyze grammar]

maṇḍapaṃ sarvatobhadraṃ kamalākāramuttamam |
vartulaṃ kārayitvā yaḥ kuṇḍaṃ kamalavattathā || 55 ||
[Analyze grammar]

śatadvayena saṃsmṛtya nāmnāṃ tvāṃ parameśvarīm |
taṇḍuleṣu samāvāhya pūjayet kamalādibhiḥ || 56 ||
[Analyze grammar]

tasya pīḍā samastā vai nāśameṣyanti madvarāt |
homān kṛtvā'ṣṭasaṃkhyān vai pratyekanāmasaṃyutān || 57 ||
[Analyze grammar]

ghṛtapāyasamiṣṭānnaistato dadyānmahāhutim |
ghṛtadhārābhirevā'pi phalairvrīhyādibhistathā || 58 ||
[Analyze grammar]

nārikelaphalādyaiśca samidbhiḥ śarkarādibhiḥ |
yastasya mānaseṣṭaṃ yat tatsarvaṃ vai bhaviṣyati || 59 ||
[Analyze grammar]

rājyaṃ svargaśca mokṣaśca sarvaṃ tasya bhaviṣyati |
strīputrapatilābhādirdhanakīrtī bhaviṣyataḥ || 60 ||
[Analyze grammar]

suvidhānaṃ tatra vacmi lakṣmīyajñe yathāyatham |
śataṃ ca viṃśatiścāpi hastānāṃ parimaṇḍalam || 61 ||
[Analyze grammar]

maṇḍapārthaṃ tu gṛhṇīyād daśastaṃbhamayaṃ śubham |
maṇḍapaṃ racayettatra caturdvāraiḥ suśobhitam || 62 ||
[Analyze grammar]

toraṇaiḥ suvitānena vartulaśikhareṇa ca |
sauvarṇakalaśaiścāpi dhvajena śobhitena ca || 63 ||
[Analyze grammar]

raktavastradhvajenāpi śobhitaṃ kārayecchubham |
paritastava śastrāṇi toraṇeṣu likhettathā || 64 ||
[Analyze grammar]

aṣṭādaśa vibhinnāni pūrvato dakṣiṇakramāt |
khaḍgaṃ carma karavālaṃ daṇḍaṃ pāśaṃ paviṃ dhanuḥ || 65 ||
[Analyze grammar]

paraśuṃ ca śaraṃ cakraṃ gadāṃ śaṃkhaṃ mahāṃkuśam |
kamalaṃ mālikāṃ śaktiṃ kṣepaṇīṃ cābhayaṃ tathā || 66 ||
[Analyze grammar]

evametānyāyudhāni toraṇeṣu nidhāpayet |
pratistambhaṃ kalaśāṃśca dhvajānapi vidhāpayet || 67 ||
[Analyze grammar]

dvāraśākhāsvaṣṭadevīḥ sthāpayeccā'ṅgadevatāḥ |
pūrvaśākhādvaye śrīṃ ca māṇikyāṃ sthāpayettathā || 68 ||
[Analyze grammar]

dakṣiṇe ca ramāṃ pāśavatīṃ saṃsthāpayettathā |
paścime maṃgalāṃ caivā'mṛtāṃ saṃsthāpayettathā || 69 ||
[Analyze grammar]

uttare tu vijayāṃ ca jayāṃ saṃsthāpayettathā |
madhyastambheṣu caiśāne durgāṃ satīṃ ca vinyaset || 70 ||
[Analyze grammar]

agnistambhadvaye svāhāṃ svadhāṃ cāvāsayettathā |
nairṛte saṃhāriṇīṃ ca vaśinīṃ sthāpayettathā || 71 ||
[Analyze grammar]

vāyavye śāradāṃ vāṇīṃ sthāpayecchobhanāṃ śubhām |
sāvitrīṃ cāpi gāyatrīṃ sarasvatīṃ tathā yamīm || 72 ||
[Analyze grammar]

vaiṣṇavīṃ ca varāhīṃ caṇḍikāmaindrīṃ ca vāruṇīm |
bhuvaṃ saṃjñāṃ kaumudīṃ ca nandāṃ nārāyaṇīṃ ramām || 73 ||
[Analyze grammar]

santuṣṭāṃ ṣoḍaśaśaktiḥ sthāpayettu vitānake |
stambhāntaracarusthāneṣvatiśṛṃgāraśobhitāḥ || 74 ||
[Analyze grammar]

dvihastāḥ sarvabhūṣāḍhyāḥ pūjayettīrthavāribhiḥ |
kuṃkumā'kṣatatailādyaiḥ sugandhicandanādibhiḥ || 75 ||
[Analyze grammar]

kuṇḍaṃ tu vartule hastadaśakaṃ vai yathā bhavet |
tathā ṣoḍaśadalavat padmarūpaṃ vidhāpayet || 76 ||
[Analyze grammar]

sayoniṃ kārayettatra mekhalātrikamityapi |
lakṣahomān koṭihomān kārayediṣṭasiddhidān || 77 ||
[Analyze grammar]

dve śate tava rūpāṇi cāvāhayed prapūjayet |
mahālakṣmīṃ tava mūrtiṃ pronnatāṃ tu śubhānanām || 78 ||
[Analyze grammar]

ṣaṭpañcāśadaṅgulāṃ samukuṭāṃ hārarājitām |
svarṇasiṃhāsanasthāṃ vai kānakīṃ vā'nyadhātujām || 79 ||
[Analyze grammar]

kārayet tatsakhīnāṃ tu yathāyogyāṃ prakārayet |
pañcāmṛtaistīrthajalaiḥ saṃsnāpya parameśvarīm || 80 ||
[Analyze grammar]

gandhasugandhaśṛṃgārairvibhūṣābhiścidambaraiḥ |
kusumābharaṇairdehāvayavānāṃ suśobhanaiḥ || 81 ||
[Analyze grammar]

candanā'kṣatatulasīkastūrīgandhasārakaiḥ |
pūjayitvā vividhāni naivedyāni samarpayet || 82 ||
[Analyze grammar]

miṣṭānnāni samastāni pāyasānnāni yāni ca |
miṣṭarasān śākabhājā naivedye vai samarpayet || 83 ||
[Analyze grammar]

jalaṃ tāmbūlakaṃ dadyādārārtrikaṃ tataścaret |
pradakṣiṇaṃ tataḥ kṛtvā prārthayet praṇamettathā || 84 ||
[Analyze grammar]

janmahantri bhavahantri rogahantri pareśvari |
vāsudevi kṛṣṇadevi mahālakṣmi namo'stu te || 85 ||
[Analyze grammar]

pārabrāhmi sarvabhūtahṛdayasthe parātpare |
sarvadevīsvarūpe te rakṣayitri namo muhuḥ || 86 ||
[Analyze grammar]

tava bhaktasya me kaṣṭaṃ daivaṃ vā mānuṣaṃ tathā |
karmajaṃ kālajaṃ vāpi prārabdhajaṃ grahotthitam || 87 ||
[Analyze grammar]

svabhāvajaṃ mānasaṃ vā yadasti jāyate'thavā |
janiṣyate ca yatkaṣṭaṃ śāpād drohātpramādataḥ || 88 ||
[Analyze grammar]

ajñānāccāpi vai yacca duṣprārabdhaṃ ca me bhavet |
avaṃśatvaṃ cā'putratvaṃ niḥstrīkatvaṃ vimānatā || 89 ||
[Analyze grammar]

sarvaṃ rogabhayaṃ cāpi mama nāśaṃ prayātu tat |
saukhyaṃ tavaiva kṛpayā modo bhavatu cāniśam || 90 ||
[Analyze grammar]

śāśvataṃ śrīpuraṃ svargaṃ cāmṛtaṃ padamastu me |
ante'kṣaraṃ paraṃ dhāma mamā'stu paramaṃ padam || 91 ||
[Analyze grammar]

ityabhyarthya kusumānāmaṃjaliṃ vitarettataḥ |
aparādhān kṣantumevā''rādhayitvā mahāsatīm || 92 ||
[Analyze grammar]

visarjayet tathā dāsīścopadevīvisarjayet |
dadyācca devatāṃ lakṣmīṃ gurave brahmamūrtaye || 93 ||
[Analyze grammar]

mandire sthāpayedvāpi mahālakṣmīṃ sthire dṛḍhe |
anādiśrīkṛṣṇanārāyaṇena sahitāṃ ca vā || 94 ||
[Analyze grammar]

śrīmadgopālakṛṣṇena mahāviṣṇvātmanā yutām |
sthāpayet svarṇaśikharaiḥ śobhite devatālaye || 95 ||
[Analyze grammar]

suvarṇamudrādānāni rūpyakāṃścārpayettathā |
māṇikyahīrakaratnabhūṣāvastrāṇi cārpayet || 96 ||
[Analyze grammar]

miṣṭānnāni diśeścāpi nārīvastrāṇi cārpayet |
ramyaśṛṃgārabhūṣāścopakaraṇāni cārpayet || 97 ||
[Analyze grammar]

dhanadhānyāni sarvāṇi gṛhadānāni kārayet |
evaṃ kṛtvā parihāraṃ tato bhojanamācaret || 98 ||
[Analyze grammar]

bhojayet sādhuviprāṃśca dīnāndhakṛpaṇāṃstathā |
bālān prabālikāścāpi yoṣito'nāthanirdhanīḥ || 99 ||
[Analyze grammar]

sataḥ satīśca sādhvīśca bhojayetpūjayettathā |
nityaṃ lakṣmīṃ pūjayecca bhojayet vidhinā tathā || 100 ||
[Analyze grammar]

evaṃ karturna vai duḥkhaṃ santāpo vā bhavet kvacit |
bhuktiḥ sampanmahāmuktiḥ sāmrājyaṃ ca bhavet sadā || 101 ||
[Analyze grammar]

akhaṇḍānandabhoktṛtvaṃ devīvṛndādhikāntatā |
bhavet kṛṣṇasamānatvaṃ śrīpate kṛpayā śriyāḥ || 102 ||
[Analyze grammar]

ityevaṃ kathitaṃ lakṣmi tavā'rhaṇaṃ praśāntidam |
paṭhanācchravaṇāccāsya mahāsaukhyaṃ bhavet sadā || 103 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne dakṣaprajāpataye mahālakṣmyuktāni svīyāni śatadvayanāmarūpāṇi lakṣmīmakhe śāntipūjā mahālakṣmīpratimā |
tanmaṇḍalādi cetinirūpaṇanāmā pañcatriṃśadadhikaśatatamo'dhyāyaḥ || 135 ||
[Analyze grammar]