Chapter 133

śrīnārāyaṇīśrīruvāca |
kṛṣṇakānta mama kānta śrutaṃ dānamahatphalam |
puṇye dine pradātavyaṃ yaduktaṃ bhavatā prabho || 1 ||
[Analyze grammar]

puṇyāśca divasāḥ sarve jñātāstvayoditā mayā |
teṣu puṇyatamaṃ cāharjñātumicchāmi tadvada || 2 ||
[Analyze grammar]

śrīpuruṣottama uvāca |
anādiśrīkṛṣṇanārāyaṇasya yatra bhūtale |
prākaṭyaṃ me dine jātaṃ dinaṃ puṇyatamaṃ hi tat || 3 ||
[Analyze grammar]

ūrjakṛṣṇāṣṭamī saiṣā sarvottamā pradānake |
dāturjanmadinaṃ cāpi śreṣṭhaṃ dātuḥ kṛte matam || 4 ||
[Analyze grammar]

kalpanāmnā ca divasāḥ śreṣṭhatamā bhavantyapi |
brahmaṇo māsadivasāḥ śreṣṭhā bhavanti dānake || 5 ||
[Analyze grammar]

māsāhatriṃśannāmāni kathayāmi nibodha me |
yeṣāṃ tu kīrtanādeva vedapuṇyena yujyate || 6 ||
[Analyze grammar]

pratipat śvetakalpastu dvitīyo nīlalohitaḥ |
tṛtīyo vāmadevastu turyo rāthantarābhidhaḥ || 7 ||
[Analyze grammar]

pañcamo rauravākhyaśca ṣaṣṭho devadinābhidhaḥ |
saptamo bṛhadākhyaścā'ṣṭamaḥ kandarpanāmakaḥ || 8 ||
[Analyze grammar]

navamaḥ sadyanāmā ceśānastu daśamo mataḥ |
ekadaśastamonāmā sārasvato dvayaṃdaśa || 9 ||
[Analyze grammar]

trayodaśa udānākhyo gāruḍastu caturdaśaḥ |
pañcadaśastu kaumāryaḥ ṣoḍaśo nārasiṃhakaḥ || 10 ||
[Analyze grammar]

saptadaśaḥ samānākhyaścā''gneyo'ṣṭādaśātmakaḥ |
ekonaviṃśaḥ somākhyo viṃśatirmānavo mataḥ || 11 ||
[Analyze grammar]

tatpumānekaviṃśaśca divaso brahmaṇaḥ smṛtaḥ |
vaikuṇṭho dvāviṃśakaśca lakṣmīstriviṃśakastathā || 12 ||
[Analyze grammar]

caturviśastu sāvitrī pañcaviṃśastvaghorakaḥ |
vārāhaḥ ṣaḍviṃśakaśca vairājaḥ saptaviṃśakaḥ || 13 ||
[Analyze grammar]

aṣṭāviṃśastu gaurīti navaviṃśo maheśvaraḥ |
triṃśastu pitṛkalpo vai yā kuhūrbrahmaṇo matā || 14 ||
[Analyze grammar]

eteṣu yāni bhagavaddināni śrīdināni ca |
śivādināmatithayaḥ puṇyāstā dānakariṇaḥ || 15 ||
[Analyze grammar]

harerjanmadinānyeva hariṇījanmarāśayaḥ |
puṇyāḥ santi vratāhāśca dānayogyāḥ sadā rame || 16 ||
[Analyze grammar]

nahi kartuṃ samarthā vai sarve kṣudrahṛdo janāḥ |
kurvantyudāramanaso dānānyuktāni yāni ha || 17 ||
[Analyze grammar]

yadā yasya bhaved buddhirdānadharmaparāyaṇā |
tadā tasmin dine kāryaṃ dānaṃ dātrā tu satvaram || 18 ||
[Analyze grammar]

gatā śraddhā gataḥ kālo gata utsāha ityapi |
gataṃ pātraṃ gataṃ vastu punarnā''yāsyati kvacit || 19 ||
[Analyze grammar]

gatvarāḥ sampadaḥ sarvā gatvaraṃ jīvanaṃ tathā |
gatvarāścāpi saṃkalpāstān satkārye niyojayet || 20 ||
[Analyze grammar]

nārāyaṇaṃ hariṃ kṛṣṇaṃ māmakṣarapatiṃ prabhum |
avatārānīśvarāṃśca surānṛṣīn sutoṣayet || 21 ||
[Analyze grammar]

grahān santoṣayed dānairlakṣmi mama svarūpiṇaḥ |
sarvakāmāptaye nityaṃ grahaṃ śāntaṃ vidhāpayet || 22 ||
[Analyze grammar]

śrīkāmaḥ śāntikāmo vā grahayajñaṃ samācaret |
nijāyuḥpuṣṭikāmo vā vaṃśecchuḥ sukhabhāvanaḥ || 23 ||
[Analyze grammar]

puṇye'hni viprakathite kṛtvā brāhmaṇavācanam |
grahān grahādidevāṃśca saṃsthāpya homamācaret || 24 ||
[Analyze grammar]

grahayajño'yutahomo lakṣahomastathā mataḥ |
koṭihomastathā cāpi yathākāryabalānukṛt || 25 ||
[Analyze grammar]

ayutenā''hutīnāṃ tu navagrahamakho mataḥ |
gartasyottarapūrveṇa vitastidvayavistṛtām || 26 ||
[Analyze grammar]

vipradvayāvṛtāṃ vediṃ vitasyucchrayaśobhanām |
caturasrāmudaṅmukhāṃ kṛtvā'gninayanaṃ tataḥ || 27 ||
[Analyze grammar]

āvāhayet surāṃstasyāṃ sūryaṃ somaṃ ca maṃgalam |
budhaṃ guruṃ kaviṃ śanaiścaraṃ rāhuṃ ca ketukam || 28 ||
[Analyze grammar]

madhye sūryaṃ dakṣiṇe maṃgalaṃ guruṃ tathottare |
budhaṃ pūrvottare śukraṃ pūrve saṃsthāpayettathā || 29 ||
[Analyze grammar]

dakṣapūrve candramasaṃ śaniṃ tu paścime tathā |
rāhuṃ tu dakṣapaśce tu ketuṃ paścottare tathā || 30 ||
[Analyze grammar]

taṇḍuleṣu sthāpayedvā tathopadevatāḥ śubhāḥ |
sūryasyeśaṃ śaśinaśca pārvatīṃ copadevatām || 31 ||
[Analyze grammar]

skandaṃ bhaumasya ca hariṃ budhasyā'pyupadevatām |
brahmāṇaṃ ca gurorindraṃ śukrasyāpyupadevatām || 32 ||
[Analyze grammar]

yamaṃ śanestathā rāhoḥ kālaṃ tathopadevatām |
citraguptaṃ ca ketorvai sthāpayedupadevatām || 33 ||
[Analyze grammar]

atha pratyupadevāṃśca sthāpayettatra tatra ca |
kramādagniṃ jalaṃ pṛthvīṃ viṣṇumindraṃ śacīṃ tathā || 34 ||
[Analyze grammar]

prajāpatiṃ bhoginaśca brahmāṇaṃ sthāpayecca tān |
vināyakaṃ ca durgāṃ ca vāyumākāśamityapi || 35 ||
[Analyze grammar]

āvāhayed vyāhṛtibhistathaivāśvikumārakau |
dhyāyedraviṃ raktavarṇaṃ maṃgalaṃ raktamityapi || 36 ||
[Analyze grammar]

somaśukrau śvetavarṇau budhagurū tu piṃgalau |
śanirāhū kṛṣṇavarṇau dhūmraṃ ketuṃ smarettadā || 37 ||
[Analyze grammar]

grahavarṇāni deyāni puṣṇāṇi cāmbarāṇi ca |
surabhirdhūpa evā'tra vitānakaṃ tathopari || 38 ||
[Analyze grammar]

phalapuṣpādi pūjārhaṃ sarvaṃ dadyāt samarhaṇe |
guḍaudanaṃ tu sūryāya somāya ghṛtapāyasam || 39 ||
[Analyze grammar]

maṃgalāya tu saṃyāvaṃ budhāya kṣīrakullarīm |
dadhyodanaṃ tu gurave śukrāya tu guḍaudanam || 40 ||
[Analyze grammar]

śanaiścarāya kṛśarāṃ māṣāṃstu rāhave tathā |
citraudanaṃ tu ketubhyastataḥ samarcayet surān || 41 ||
[Analyze grammar]

prāguttareṇa kalaśaṃ dadhyakṣatasamanvitam |
cūtapallavasaṃyuktaṃ phalavastrayugānvitam || 42 ||
[Analyze grammar]

pañcaratnasamāyuktaṃ sthāpayed varuṇaṃ nyaset |
tīrthāni ca samudrāṃścāvāhayet tatra vai jale || 43 ||
[Analyze grammar]

gajāśvarathyāvalmīkacatvarahradagokulāt |
mṛdamānīya ca sarvauṣadhivārisamanvitām || 44 ||
[Analyze grammar]

snānārthaṃ vinyaset tatra yajamānasya bhūsuraḥ |
homaṃ samācaret sarpiryavavrīhitilādibhiḥ || 45 ||
[Analyze grammar]

arkaḥ pālāśakhadirāvapāmārgaśca pippalaḥ |
audumbaraḥ śamī durvā kuśāśca samidhaḥ kramāt || 46 ||
[Analyze grammar]

ekaikasyā'ṣṭakaśatamaṣṭāviṃśatimeva vā |
hotavyā madhusarpirbhyāṃ dadhnā ca samidhā tathā || 47 ||
[Analyze grammar]

tatkāṇḍān prādeśamātrānaśākhānapalāśinaḥ |
kalpayet samidhastatra juhuyād devamantrataḥ || 48 ||
[Analyze grammar]

pakvaṃ caruṃ ghṛtābhyaktāṃ samidhaṃ bhakṣyaprabhṛti |
daśāhutīḥ prahutvā juhuyād vyāhṛtibhistathā || 49 ||
[Analyze grammar]

mantritaṃ ca caruṃ tasmai tasmai devāya cā'rpayet |
pūrṇāhutiṃ tato dadyāt snāpayet yajamānakam || 50 ||
[Analyze grammar]

surāstvāmabhirakṣantu sarve ye cātra pūjitāḥ |
tathā'nye pūjanārhāśca tvāmavantu samantataḥ || 51 ||
[Analyze grammar]

iti snapitaḥ sastrīko yajamānastu dakṣiṇām |
dadad viprebhya evāpi gṛhebhyaścāpi tāṃ yathā || 52 ||
[Analyze grammar]

sūryāya kapilāṃ dhenuṃ śaṃkhaṃ candrāya cārpayet |
bhaumāya vṛṣabhaṃ raktaṃ budhāya kanakaṃ diśet || 53 ||
[Analyze grammar]

gurave pītavastraṃ ca śukrāya śvetavājinam |
kṛṣṇāṃ gāṃ śanaye dadyādāyasaṃ rāhave tathā || 54 ||
[Analyze grammar]

chāgaṃ dadyāt keśavāyā'thavā gāvastu yāvatām |
suvarṇaṃ vā pradadyācca gururyathā pratuṣyati || 55 ||
[Analyze grammar]

deye vastuni devasya mamārādhanapūrvakam |
dānaṃ śreṣṭhatamapuṇyapradaṃ prajāyate rame || 56 ||
[Analyze grammar]

mātastvaṃ pṛthvīrūpā dhenuḥ kṛṣṇasya vatsalā |
puṇyā pāpaharā me'stu nityāṃ śāntiṃ prayaccha me || 57 ||
[Analyze grammar]

śaṃkhastvaṃ puṇyapuñjānāṃ mūrtirmaṃgalarūpiṇī |
kṛṣṇahastasthito nityaṃ śāntiṃ prayaccha me'niśam || 58 ||
[Analyze grammar]

dharmadevo vṛṣaḥ kṛṣṇamūrtau pratiṣṭhate bhavān |
sarvānandapramodānāmadhiṣṭhānaṃ dadhātu mām || 59 ||
[Analyze grammar]

kanaka tvaṃ vahniputra hemabījaṃ vibhāvasoḥ |
anantapuṇyaphaladaṃ śāntimṛddhiṃ prayaccha me || 60 ||
[Analyze grammar]

pītāmbaraṃ sadā śreṣṭhaṃ divyaṃ śrīkṛṣṇavallabham |
śāntiṃ ca sampadaṃ dehi kuru māṃ kṛṣṇavallabham || 61 ||
[Analyze grammar]

hayagrīvo bhavān viṣṇuramṛtauṣadhivīryapaḥ |
dehi me cāmṛtaṃ śāntiṃ māṇikyāśvīpatiḥ prabhuḥ || 62 ||
[Analyze grammar]

kṛṣṇe go tvaṃ kṛṣṇapatnī kārṣṇī nārī vyajāyathāḥ |
kṛṣṇasya dhāriṇī cāste māṃ prapoṣaya nityadā || 63 ||
[Analyze grammar]

dhātūnāmāyasaṃ dāsaḥ sarvakiṃkarakāryakṛt |
sitāśarādideva tvaṃ nityāṃ śāntiṃ prayaccha me || 64 ||
[Analyze grammar]

chāga tvaṃ kālarūpo'si svapne dṛṣṭo bhayāvahaḥ |
vahnivāha sadā śāntiṃ me prayaccha prapūjitaḥ || 65 ||
[Analyze grammar]

gāvaḥ kṛṣṇasvarūpā vai sarveśvarasurāśrayāḥ |
sarvoddhārasamarthāśca śriyai me santu sarvathā || 66 ||
[Analyze grammar]

śayye kṛṣṇena saṃbhuktā pāvanī tvaṃ sutapradā |
sampatpradā'stu me nityamaśūnyā'stu mama striyā || 67 ||
[Analyze grammar]

sarvaratnāni devānāṃ vāsātmakāni vai yataḥ |
ratnavāsaṃ gṛhe me'tra prakurvantvarpitāni ha || 68 ||
[Analyze grammar]

bhūmidānaṃ paraṃ dānaṃ tathā suvarṇadānakam |
annarddhiṃ ca dhanarddhiṃ ca kurutaṃ me samarpite || 69 ||
[Analyze grammar]

ityabhyarthya ca samprārthya dāne dadyād viśeṣataḥ |
sarvān kāmānavāpnoti pretya svarge mahīyate || 70 ||
[Analyze grammar]

yastu pīḍākaro nityamalpavittasya vā grahaḥ |
taṃ tu yatnena sampūjya toṣayeccheṣasaṃyutam || 71 ||
[Analyze grammar]

varmavaccopaghātānāṃ śāntirbhavati pūjanāt |
sampūrṇāṃ dakṣiṇāṃ dadyād vittaśāṭhyaṃ vivarjayet || 72 ||
[Analyze grammar]

vivāhotsavayajñeṣu pratiṣṭhādikriyādiṣu |
nirvidhnārthaṃ praśāntyarthaṃ kuryādudvegaśāntidam || 73 ||
[Analyze grammar]

navagrahamakhaṃ bhakto'yutahomātmakaṃ śubham |
anādiśrīkṛṣṇanārāyaṇātmakamahādhvaram || 74 ||
[Analyze grammar]

prārthayed yajamāno'tra māṃ devānīśvarān satīḥ |
yajamānastīrthajalaiḥ snāpito vedavijjanaiḥ || 75 ||
[Analyze grammar]

snāpayitṛdvijā dadyurāśīrvādān surakṣakān |
anādikṛṣṇanārāyaṇo nārāyaṇīyutaḥ || 76 ||
[Analyze grammar]

muktamuktānikāyuktastvāṃ sadā rakṣatu dhruvam |
śrīkṛṣṇo rādhikāyukto nārāyaṇaḥ śriyā saha || 77 ||
[Analyze grammar]

vāsudevādayo vyūhā rakṣantu tvāṃ prapūjakam |
brahmaviṣṇumaheśāśca mahendrādyā digīśvarāḥ || 78 ||
[Analyze grammar]

dharmapatnyaḥ samagrāśca sūryādyāśca navagrahāḥ |
vasavo nidhayo rudrāḥ ṛṣayo munayo vṛṣāḥ || 79 ||
[Analyze grammar]

devadānavagandharvā yakṣarākṣasapannagāḥ |
devapatnyo drumā nāgā daityāścāpsarasā gaṇāḥ || 80 ||
[Analyze grammar]

bhūtapretapiśācādyā rudrā gaṇā gaṇeśvarāḥ |
yoginyaḥ śaktayaḥ sarvāḥ śastrā'stravāhanāni ca || 81 ||
[Analyze grammar]

ratnauṣadhāni vighnāśca kālaḥ kālasya vaṃśajāḥ |
sarve'pi kālāvayavāstīrthāni nikhilānyapi || 82 ||
[Analyze grammar]

ete tvāmabhiṣiñcantu rakṣantu vardhayantvapi |
evamāśīrvardhitaśca śuklāmbaradharo'rpayet || 83 ||
[Analyze grammar]

dakṣiṇā vividhāḥ sarvā viprebhyo gurave sate |
bhojayed bahudhā viprān sādhūn sādhvīśca yoṣitaḥ || 84 ||
[Analyze grammar]

bālāṃśca bālikāṃścāpi dīnāndhakṛpaṇāṃstathā |
bhikṣukān daivavṛttīṃśca miṣṭānnapāyasādibhiḥ || 85 ||
[Analyze grammar]

homānayutasaṃkhyākān kārayed viprapuṃgavaiḥ |
yadvā svayaṃ prakuryācca brahmaśīlavratānvitaḥ || 86 ||
[Analyze grammar]

tataḥ kuryāt parihāraṃ grahā'dhvarasya sarvathā |
grahaśāntirbhavettena pīḍā naśyet sukhī bhavet || 87 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne puṇyatamadinapradarśanaṃ grahaśāntipūjādipradarśanaṃ cetinirūpaṇanāmā trayastriṃśadadhikaśatatamo'dhyāyaḥ || 133 ||
[Analyze grammar]