Chapter 131

śrīpuruṣottama uvāca |
śṛṇu śrīśivarājñīśri mahādānamanuttamam |
mahākalpalatākhyaṃ ca dānaṃ suvarṇavallikam || 1 ||
[Analyze grammar]

puṇyāṃ tithiṃ samāsādya kārayenmaṇḍapaṃ śubham |
vediṃ kuṇḍaṃ kārayecca sthāpayeddhavanārthakam || 2 ||
[Analyze grammar]

vastughrātaṃ brāhmaṇaiśca kārayet svastivācanam |
dānavastūnyupādāya maṇḍape tatra sannyaset || 3 ||
[Analyze grammar]

ṛtvija sarvasaṃbhārabhūṣaṇācchādanādikam |
āsaneṣu ca devānāṃ nārāyaṇasya me śriyaḥ || 4 ||
[Analyze grammar]

devīnāṃ ca tathā kuryādāvāhanaṃ prapūjayet |
maṇḍape tatra sauvarṇīrdaśa kalpākhyavallikāḥ || 5 ||
[Analyze grammar]

daśottarasuvarṇotthāḥ sthāpayet phalapuṣpitāḥ |
ratnāṃśukādisaṃyuktā bhūṣitāḥ śobhitāstathā || 6 ||
[Analyze grammar]

vidyādharībhiḥ saṃyuktāḥ suparṇaiḥ śobhitāstathā |
prativalli prakuryācca dikpālāṣṭakayoṣitaḥ || 7 ||
[Analyze grammar]

śarkarāparvate vallī sarvāścābhyadhirohayet |
aindrīṃ hastisthitāṃ śaktimāgneyīṃ meṣasaṃsthitām || 8 ||
[Analyze grammar]

yāmyāṃ mahiṣīniṣṭhāṃ ca nairṛtiṃ gardabhīsthitām |
vāruṇīṃ makarasthāṃ ca vāyavīṃ hariṇīsthitām || 9 ||
[Analyze grammar]

kauberīṃ svarṇayānasthāmīśānīṃ vṛṣabhasthitām |
tathā ṣoḍaśadhānyāni sthāpayet tatra maṇḍape || 10 ||
[Analyze grammar]

lakṣmīṃ śivāṃ ca sāvitrīṃ māṇikyāṃ duḥkhahātmām |
kambharāśrīmahālakṣmīṃ santuṣṭā bhaginīṃ hareḥ || 11 ||
[Analyze grammar]

rasān gandhān miṣṭarasāna ghṛtakuṃbhān nyasettathā |
āsahasramitasvarṇaiḥ kṛtvā nyaseddhi maṇḍape || 12 ||
[Analyze grammar]

aṣṭadhenūścā'ṣṭakuṃbhān ratnasalilapūritān |
vastrataṇḍulapatrādyaiḥ śobhitān sthāpayedapi || 13 ||
[Analyze grammar]

pūjayettān vidhānena vallikāḥ pūjayettathā |
vedaghoṣaiḥ pūjayitvā kṛtvā pradakṣiṇatrayam || 14 ||
[Analyze grammar]

prārthayettā vallikāśca kṛṣṇanārāyaṇā'nvitāḥ |
vināśinībhyaḥ pāpānāṃ pālinībhyaḥ svasañjuṣām || 15 ||
[Analyze grammar]

namo'stu phaladābhyaśca kalpābhyo vai namo namaḥ |
sarvasampatpradābhyaśca sarvarddhibhyo namo namaḥ || 16 ||
[Analyze grammar]

mahālakṣmīsvarūpābhyaḥ sarvātmikābhyo vai namaḥ |
svargāmṛtaṃ śrīpuraṃ ca vairājaṃ ca gavāyanam || 17 ||
[Analyze grammar]

vaikuṇṭhaṃ cākṣaraṃ dhāma vitarantu ca naḥ sadā |
bhavatyo dānarūpāśca dattā rakṣantu naḥ sadā || 18 ||
[Analyze grammar]

iti prārthya punaḥ kṛtvā pradakṣiṇaṃ samarpayet |
gurave sādhave cārdhamardhāścānyebhya eva tu || 19 ||
[Analyze grammar]

ratnahīrakarūpyāṇi gā vastrāṇi ca yāni ca |
taddhi dadyād bhikṣukebhyo'nāthahīnebhya ityapi || 20 ||
[Analyze grammar]

havanaṃ vidhivat kuryād bhojayet sādhubhūsurān |
bālośca bālikāścāpi bhojayeccārpayeddhanam || 21 ||
[Analyze grammar]

parihāraṃ tataḥ kuryād visṛjetpraṇamet priye |
evaṃ kalpalatādānaṃ kuryāttasya phalaṃ bahu || 22 ||
[Analyze grammar]

sāmrājyaṃ jāyate pitruddhāro bhavatyapi |
kṣitiḥ sasyādisampūrṇā sadā tasyopatiṣṭhate || 23 ||
[Analyze grammar]

siddhayaścāṇimādyāśca latādāturbhavanti hi |
svarge kalpalatāstāścā'psaraso'sya bhavanti ca || 24 ||
[Analyze grammar]

evaṃ lakṣmi mahādānaṃ saṃkalpapūrakaṃ hi te |
kathitaṃ sarvalokeṣu mahārājyapradaṃ śubham || 25 ||
[Analyze grammar]

tathā kalpapriyādānaṃ kartavyaṃ śṛṇu tadvidhim |
svarṇabhārasahasraistu kartavyā puttalī śubhā || 26 ||
[Analyze grammar]

vastrālaṃkārasaṃyuktā sarvaśṛṃgāraśobhitā |
rūpavatī yuvatī ca putraputryādiśobhitā || 27 ||
[Analyze grammar]

gomahiṣīgajavājiyuktā śayyādiśobhitā |
dhanadhānyādiyuktā ca rasabhojyaphalānvitā || 28 ||
[Analyze grammar]

maṇḍape nyasya tāṃ patnīrūpāṃ tatra mahāramām |
āvāhayed vedikā'gre pūjayet sarvavastubhiḥ || 29 ||
[Analyze grammar]

ārārtrikaṃ prakuryācca sunaivedyaṃ jalaṃ diśet |
yādṛśī ceṣyate patnī yathāsāmagrikānvitā || 30 ||
[Analyze grammar]

tādṛśī sā tu kartavyā śṛṃgāradravyaśobhitā |
dāsadāsīsakhīyuktā gṛhasaubhāgyaśobhitā || 31 ||
[Analyze grammar]

tāṃ prapūjya ca havanaṃ kuryād vahnau śatottaram |
dadyāt sā svakare dhṛtvā kṛtvā'nalaṃ pradakṣiṇam || 32 ||
[Analyze grammar]

gurave cāpi viprāya sādhave haraye'thavā |
kumārāya sate vāpi prārthayecca tataḥ param || 33 ||
[Analyze grammar]

eṣā dattā mayā patnīrūpā dāne dvijātaye |
sarvagārhasthyopakaraṇādiyuktā vibhūṣitā || 34 ||
[Analyze grammar]

nārāyaṇī mahālakṣmīstvameva parameśvarī |
dānaphalaṃ ca dāmpatyaṃ mama dehi sadā rame || 35 ||
[Analyze grammar]

svarge satye ca vairāje vaikuṇṭhe patnikā mama |
saṃyuktā sahagā syācca tathā dehi phalaṃ mama || 36 ||
[Analyze grammar]

evamābhāṣya viprasya gurorhaste nyaset priyām |
bhuktidā muktidā sā syāt svarṇaputtalikā priyā || 37 ||
[Analyze grammar]

janmāntarasahasreṣu dāmpatyaṃ syādakhaṇḍitam |
sarvasmṛddhipradaṃ lakṣmi śāśvatānandadāyakam || 38 ||
[Analyze grammar]

sarvabhogapradaṃ putrapautravaṃśavivardhanam |
kalpapatnīmahādānamidaṃ proktaṃ mayā tava || 39 ||
[Analyze grammar]

yathāsaṃkhyā yoṣitaśceṣyante divi kṣitau ca vā |
tathāsaṃkhyāḥ pradātavyāḥ puttalyaḥ patnikā nijāḥ || 40 ||
[Analyze grammar]

maṇḍape tā nidhāyaiva vahneḥ samīpataḥ khalu |
vivāhavidhinā sarvā vivāhayed dvijaiḥ purā || 41 ||
[Analyze grammar]

varamālābhisannaddhā hastakṛtaparigrahāḥ |
sarvābharaṇaśobhāśca sarvālaṃkārasaṃbhṛtāḥ || 42 ||
[Analyze grammar]

nijapatnīkṛtāḥ sarvāstato dāne'rpayed budhaḥ |
evaṃ dattā hi vidhinā ceha paratra tāḥ striyaḥ || 43 ||
[Analyze grammar]

bhavantyeva na sandeho mahādānamidaṃ param |
svarṇastrīdānamevaitat svastrīpratinidhiprakham || 44 ||
[Analyze grammar]

nārī dāne na vai deyā deyā sauvarṇaputtalī |
nārīdānaṃ mahādānaṃ tadevoktaṃ hi vedhasā || 45 ||
[Analyze grammar]

evaṃ lakṣmi suvarṇasya patiṃ dāne'pi cārpayet |
sarvālaṃkārasaṃyuktaṃ sarvasmṛddhisuśobhitam || 46 ||
[Analyze grammar]

svarṇakāntamahādānaṃ patisaubhāgyadaṃ hi tat |
vidhiṃ te kathayāmyatra yatkṛtena kadāpi vai || 47 ||
[Analyze grammar]

vaidhavyaṃ jāyate naiva patisaubhāgyameti sā |
suvarṇaputtalaṃ kṛtvā maṇḍape tatra pūjayet || 48 ||
[Analyze grammar]

āvāhayettatra nārāyaṇaṃ śrīpatimīśvaram |
sthāpayenmaṇḍape cāpi vivāhavidhinā tataḥ || 49 ||
[Analyze grammar]

taṃ strī pariṇayenmatvā patiṃ naijaṃ tu kānakam |
varamālāyutā hastagrāhottaraṃ patiprakham || 50 ||
[Analyze grammar]

pradakṣiṇakṛtasvātmapatiṃ dāne'rpayettataḥ |
anyānyapi samastāni vastūnyapi tadā'rpayet || 51 ||
[Analyze grammar]

yādṛśaḥ svapatiśceṣṭo janmajanmāntare'pi ca |
tādṛśaḥ sarvasampanno dātavyo viprayoṣite || 52 ||
[Analyze grammar]

etaddānaṃ mahādānaṃ patidānaṃ prakīrtitam |
sarvasaubhāgyadaṃ nityagārhasthyasampradaṃ śubham || 53 ||
[Analyze grammar]

svargamokṣapradaṃ cāpi śāśvatānandasampradam |
putradānaṃ bhrātṛdānaṃ svarṇaputtalikodbhavam || 54 ||
[Analyze grammar]

evameva vidhātavyaṃ cāvāhya māṃ pareśvaram |
vidhivad dīyamānaṃ tat putrarūpaṃ phalatyapi || 55 ||
[Analyze grammar]

bhrātṛrūpaṃ phalatyeva yad dattaṃ tatprajāyate |
harermūrteḥ pradānena harirmilati mādhavaḥ || 56 ||
[Analyze grammar]

kāntadānapradānena kṛṣṇaḥ kānto bhavatyapi |
evametāni dānāni deyāni vidhinā tataḥ || 57 ||
[Analyze grammar]

dāsīdāsapradānena dāsīdāsā milanti ca |
nā'dattaṃ prāpyate kiñcit tasmād deyaṃ hi bhūtale || 58 ||
[Analyze grammar]

atra vāpi paratrāpi dattamatropatiṣṭhate |
sukhadaḥ sukhavān syācca duḥkhado duḥkhavān bhavet || 59 ||
[Analyze grammar]

puṇyadānaṃ pradātavyaṃ jalaṃ muktvā kuṭumbine |
rogiṇe ca daridrāya paralokavidāyine || 60 ||
[Analyze grammar]

maraṇonmukhajīvāya puṇyaṃ deyaṃ vratādijam |
evamanyāni puṇyāni yāni tapomayāni tu || 61 ||
[Analyze grammar]

makhātmakāni puṇyāni mahotsavodbhavānyapi |
pārāyaṇādipuṇyāni japapuṇyāni yāni ca || 62 ||
[Analyze grammar]

dānapuṇyāni sarvāṇi satraprapodbhavāni ca |
devapūjotthapuṇyāni gurusevodbhavāni ca || 63 ||
[Analyze grammar]

dāne deyāni vidhinā patisevodbhavāni ca |
pātivratyādidharmāśca deyā dāne sukhapradāḥ || 64 ||
[Analyze grammar]

patnīvratādidharmāśca sādhudharmāḥ sukhāvahāḥ |
paropakāradharmāśca deyā dāne vidhānataḥ || 65 ||
[Analyze grammar]

vidyāpuṇyaṃ khātapuṇyaṃ ceṣṭāpūrtādipuṇyakam |
oṣadhādyupakārotthaṃ dāne puṇyaṃ sukhapradam || 66 ||
[Analyze grammar]

śaraṇyapuṇyaṃ satyotthaṃ tathā dayodbhava śubham |
ahiṃsotthaṃ mahāpuṇyaṃ dāne deyaṃ viśeṣataḥ || 67 ||
[Analyze grammar]

kaṇṭhadānodbhavaṃ puṇyaṃ kaṭidānodbhavaṃ tathā |
hārdadānodbhavaṃ puṇyaṃ dāne deyaṃ viśeṣataḥ || 68 ||
[Analyze grammar]

śaraṇāgatarakṣotthaṃ nirāśritāśrayodbhavam |
jīvadānamahāpuṇyaṃ deyaṃ dāne viśeṣataḥ || 69 ||
[Analyze grammar]

sarvadānamahādānaṃ brahmadānaṃ parātparam |
jñānadānaṃ harerdānaṃ mokṣadānaṃ tato'dhikam || 70 ||
[Analyze grammar]

abhayasya pradānaṃ vai sarvadānottamottamam |
pradeyaṃ sarvatobhāvairyasmātparaṃ na vidyate || 71 ||
[Analyze grammar]

candrasūryapradānaṃ vai netrayostejasā pradam |
vijñānasya pradānaṃ vai hṛdayasya prabhāpradam || 72 ||
[Analyze grammar]

muktidānaṃ cātmanastu śāśvatānandadāyakam |
abhītidānamevaitad deyaṃ muktimabhīpsatā || 73 ||
[Analyze grammar]

dehadānaṃ prakartavyaṃ śubhadehādilabdhaye |
gehadānaṃ prakartavyaṃ bhavanādisulabdhaye || 74 ||
[Analyze grammar]

ghṛtadānaṃ prakartavyaṃ dehapuṣṭisulabdhaye |
bījadānaṃ prakartavyaṃ dharmavaśādivṛddhaye || 75 ||
[Analyze grammar]

jaladānaṃ prakartavyaṃ pitṝṇāṃ svasya tṛptaye |
gurudānaṃ vidhātavyaṃ gurormūrtiṃ tu kānakīm || 76 ||
[Analyze grammar]

vidhāpya vidhinā'bhyarcya śṛṃgārasahitāṃ ca tām |
gurumāvāhya samprārthya svātmatāraṇahetave || 77 ||
[Analyze grammar]

pradadyāttāṃ dhārmikāya sādhave pūjakāya ca |
yasyāḥ pūjāṃ nityameva kartuṃ yaḥ śakta eva ha || 78 ||
[Analyze grammar]

tasmai deyā gurormūrtiḥ pūjāphalaṃ hi labhyate |
apūjyāyāḥ pratyavāyabhāgitā syāt pradātari || 79 ||
[Analyze grammar]

devānāṃ mūrtayaścāpi svarṇarājatasaṃbhavāḥ |
maṇiratnādijanyā vā tarucitrādinirmitāḥ || 80 ||
[Analyze grammar]

pradātavyā vidhinaiva pratiṣṭhāpūrvikā hi tāḥ |
sarvābharaṇaśobhāḍhyāḥ sarvaveṣopasaṃyutāḥ || 81 ||
[Analyze grammar]

sarvaśṛṃgārasahitāḥ saumyā rūpābhirūpikāḥ |
pradātavyāḥ pātrayutā gandhārhaṇopavastubhiḥ || 82 ||
[Analyze grammar]

sahitā hārahārālībhūṣotsavārhahetibhiḥ |
gaṇeśasya hanūmato viṣṇoḥ śaṃbhoḥ ravestathā || 83 ||
[Analyze grammar]

vāstośca lokapālānāṃ gaṇānāṃ svāmināṃ tathā |
pārṣadānāṃ satāṃ deyāḥ pratimāḥ śobhanāḥ śubhāḥ || 84 ||
[Analyze grammar]

sarvābharaṇayuktāśca sarvaśṛṃgāraśobhanāḥ |
yogyaveṣābhisampannā yogyāyudhasamanvitāḥ || 85 ||
[Analyze grammar]

yogyavāhanayuktāśca yogyabhṛtyasamanvitāḥ |
nijaśaktiyutāścāpi dāne deyāḥ sukhapradāḥ || 86 ||
[Analyze grammar]

mahānārāyaṇī brāhmī mahālakṣmīḥ ramā'mṛtā |
kamalā śrīḥ prabhā deyā kānakī māṇikī tathā || 87 ||
[Analyze grammar]

sauvarṇā kaṃbharālakṣmīrlalitāśrīḥ śubhānanā |
gajānanā mahālakṣmīrdeyā śobhābhiśobhitā || 88 ||
[Analyze grammar]

gaṃgā durgā pāśavatī satī kanyākumārikā |
santuṣā jānakī deyā ramā jayā ca padminī || 89 ||
[Analyze grammar]

sāvitrī vijayā deyā duḥkhahā vedamātṛkā |
saṃjñā svāhā vahniyuktā caṇḍī deyā vibhūṣitā || 90 ||
[Analyze grammar]

kātyāyanī mahākālī deyā tadveśaśobhitā |
gaurī deyā ca tulasī vṛndā vivāhaśobhitā || 91 ||
[Analyze grammar]

evamādyāḥ surāṇyaśca tatheśānyaśca mātaraḥ |
yoginyaścāpi muktānyo deyā dāne janārdane || 92 ||
[Analyze grammar]

pūjārthaṃ sādhave deyā bhaktāya ca dvijātaye |
mahotsāhena deyāstā mūrtayaḥ supratiṣṭhitāḥ || 93 ||
[Analyze grammar]

veṣālaṃkāranaivedyapātrāmbarādiśobhitāḥ |
tāsāṃ nivāsayogyāni deyāni mandirāṇyapi || 94 ||
[Analyze grammar]

udyānāśca mahāsmṛddhāḥ phalamālyamadhubhṛtāḥ |
vāṭikā sasyayuktāśca kṣetrāṇi cekṣuvanti hi || 95 ||
[Analyze grammar]

śākapatrādiyuktāni deyāni vividhāni ca |
araṇyāni pradeyāni kūpā vāpyaḥ sarāṃsi ca || 96 ||
[Analyze grammar]

upabhogyāni sarvāṇi gandharasā'danāni ca |
dhānyāni dhanakośāśca deyā dāsāśca dāsikāḥ || 97 ||
[Analyze grammar]

yad dīyate labhyate tannā'dattaṃ labhyate kvacit |
tasmād deyāḥ pratimāśca kṛtvāpi dāradāsikāḥ || 98 ||
[Analyze grammar]

evaṃ datvā labhetāpi paraṃ saukhyaṃ gṛhāśrame |
iha loke sukhī bhūtvā sāmrājyaṃ vindate punaḥ || 99 ||
[Analyze grammar]

svarge satye ca vairājye vaikuṇṭhe śrīpure'kṣare |
goloke jāyate dhāmeśvaranārāyaṇaprabhaḥ || 100 ||
[Analyze grammar]

sarvavilāsasampannaḥ sarvabhogābhibhogavān |
sarvānandamahānandapluto bhavati śāśvataḥ || 101 ||
[Analyze grammar]

paṭhanācchravaṇādasya smaraṇāccānumodanāt |
dāne praperaṇāccāpi tulyapuṇyāśrayo bhavet || 102 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne mahākalpalatāsuvarṇavallīdānasya kalpapriyādānasya svarṇakāntadānasya puṇyadānasyā'bhayādidānānāṃ gurudevadevī |
mahādānānāṃ mandirakṣetravāṭyalaṃkārādimahādānānāṃ ca vidhinirūpaṇanāmaikatriṃśadadhikaśatatamo'dhyāyaḥ || 131 ||
[Analyze grammar]