Chapter 125

śrīnārāyaṇīśrīruvāca |
sādhuvrataṃ śubhaṃ śreṣṭhaṃ dharmārthakāmamokṣadam |
śrutaṃ te kṛpayā kṛṣṇa śrotavyaṃ nāvaśiṣyate || 1 ||
[Analyze grammar]

tathāpi tu gṛhasthānāṃ dharmavartmānuvartinām |
lokaiṣaṇādisiddhyarthaṃ jijñāsā dānadharmiṇī || 2 ||
[Analyze grammar]

jāyate'to gṛhasthānāṃ hitārthaṃ parameśvara |
mahādānaṃ bhaved yacca sarvadānottamottamam || 3 ||
[Analyze grammar]

tādṛśaṃ vidyate yadvā tādṛśāni bhavanti cet |
mahyaṃ nivedaya kṛṣṇakānta lokahitāya vai || 4 ||
[Analyze grammar]

śrīpuruṣottama uvāca |
śṛṇu tvaṃ śivarājñīśri kathayāmi tathāvidham |
bahudhā vidyate tacca mahādānamanuttamam || 5 ||
[Analyze grammar]

sarvapāpakṣayakaraṃ sarvaduḥsvapnanāśanam |
puṇyaṃ pavitramāyuṣyaṃ sarvapāpaharaṃ śubham || 6 ||
[Analyze grammar]

yattat ṣoḍaśadhā proktaṃ satpātre pratipādanam |
nyāyopārjitasampatterdānaṃ dānaṃ taduttamam || 7 ||
[Analyze grammar]

ādyaṃ tatsarvadānānāṃ tulāpuruṣasaṃjñakam |
hiraṇyagarbhadānaṃ ca dvitīyaṃ parikīrtitam || 8 ||
[Analyze grammar]

brahmāṇḍadānaṃ tṛtīyaṃ mahādānamanuttamam |
kalpapādapadānaṃ ca caturthaṃ paramaṃ smṛtam || 9 ||
[Analyze grammar]

pañcamaṃ gosahasrādyarpaṇaṃ dānamanuttamam |
hiraṇyakāmadhenūnāmarpaṇaṃ ṣaṣṭhamuttamam || 10 ||
[Analyze grammar]

hiraṇyā'śvapradānaṃ ca dānaṃ śreṣṭhatamaṃ matam |
hiraṇyāśvarathadānaṃ śreṣṭhaṃ tadaṣṭamaṃ tathā || 11 ||
[Analyze grammar]

hemahastirathadānaṃ navamaṃ śreṣṭhamucyate |
pañcalāṅgalakaṃ dānaṃ daśamaṃ paramaṃ matam || 12 ||
[Analyze grammar]

dharādānaṃ śreṣṭhamekādaśaṃ mahattamaṃ matam |
viśvacakrapradānaṃ tu mahaddānamanuttamam || 13 ||
[Analyze grammar]

kalpalatāpradānaṃ ca trayodaśamanuttamam |
saptasāgaradānaṃ ca caturdaśamudāhṛtam || 14 ||
[Analyze grammar]

ratnadhenupradānaṃ ca pañcadaśaṃ hyanuttamam |
ṣoḍaśaṃ tu mahābhūtaghaṭadānaṃ paraṃ śubham || 15 ||
[Analyze grammar]

sarvāṇyetāni dānāni rakṣākarāṇi sarvathā |
svargadāni mokṣadāni bhavantīṣṭapradāni vai || 16 ||
[Analyze grammar]

tāni vighnasahasrebhyo mahādānāni sarvathā |
rakṣanti devarūpāṇi hyekaikamapi bhūtale || 17 ||
[Analyze grammar]

eṣāmanyatamaṃ kuryāt parameśaprasādataḥ |
mahādānamakhaṃ kuryāt sādhuviprādipūjitaḥ || 18 ||
[Analyze grammar]

atha lakṣmi samāsena vidhinā tāni te punaḥ |
kathayāmi yathā yatra yadvā deyāni tāni vai || 19 ||
[Analyze grammar]

tulāpuruṣadānaṃ tu dātavyaṃ viṣuve'yane |
dinakṣaye vyatīpāte puṇye vratadine śubhe || 20 ||
[Analyze grammar]

yugādyadivase rāhugrahe manvādyaheṣu ca |
saṃkrāntau vaidhṛtau pañcadaśyāṃ caturdaśīdine || 21 ||
[Analyze grammar]

aṣṭamyāṃ dvādaśikāyāmekādaśyāṃ ca parvaṇi |
yajñotsavavivāheṣu duḥsvapnā'dbhutadarśane || 22 ||
[Analyze grammar]

dravyabrāhmaṇadevānāṃ lābhe satāṃ samāgame |
tīrthe ca mandire goṣṭhe kūpā''rāmasaritsu ca || 23 ||
[Analyze grammar]

gṛhe nave taḍāge ca śraddhāpātre ca pāvane |
sādhau dīne'nāthabāle bālāyāṃ vidhavājane || 24 ||
[Analyze grammar]

nirāśraye mahābhakte tāpase cā'parigrahe |
daive samarthapuruṣe taijase ca narāyaṇe || 25 ||
[Analyze grammar]

nārāyaṇāṃśe vimale yogini pārṣade hareḥ |
sādhvyāṃ satyāṃ ca yoginyāṃ devyāṃ yoṣiti durbale || 26 ||
[Analyze grammar]

evamādyeṣu deyāni mahādānāni tāni ca |
snātvā śubhe kṣaṇe kṛtvā puṇyaṃ brāhmaṇavācanam || 27 ||
[Analyze grammar]

ṣoḍaśā'ratnimātraṃ vā daśa dvādaśa vā karān |
maṇḍapaṃ kārayettatra caturbhadrāsanaṃ śubham || 28 ||
[Analyze grammar]

kṛtvā vedīṃ saptahastāṃ madhye pañcakarāṃ tathā |
kṛtvā madhye toraṇaṃ ca sāradārumayaṃ śubham || 29 ||
[Analyze grammar]

kuryāt kuṇḍāni catvāri caturdikṣu śubhāni vai |
mekhalāyoniyuktāni pūrṇakuṃbhān nidhāpayet || 30 ||
[Analyze grammar]

āsanāni pavitrāṇi viṣṭarāṇi śubhāni ca |
yajñapātrāṇi sarvāṇi tāmrapātradvayaṃ tathā || 31 ||
[Analyze grammar]

tilā''jyadhūpapuṣpopahārāṇi śobhanāni ca |
nidhāpayet sannidhau vai tataḥ pūrvottare sthale || 32 ||
[Analyze grammar]

grahādidevapūjārthaṃ vedīṃ hastamitāṃ caret |
tatrā'rhaṇaṃ mama kārya puruṣasya parātmanaḥ || 32 ||
[Analyze grammar]

vāsudevādirūpāṇāṃ kṛṣṇādyānāṃ samarhaṇam |
brahmaviṣṇumaheśānāṃ phalamālyāmbarādibhiḥ || 34 ||
[Analyze grammar]

patākāḥ sadhvajā deyā maṇḍape kiṃkiṇīsvane |
toraṇāni prakāryāṇi dvāreṣu śobhanāni vai || 35 ||
[Analyze grammar]

catvāri kṣīravṛkṣāṇāṃ pratidvāraṃ ghaṭadvayam |
sraggandhā'kṣatadhūpārghā'mbararatnaphalānvitam || 36 ||
[Analyze grammar]

śāleṅgudīdevadāruśrīparṇibilvacandanaiḥ |
priyakāñcanakaiścāpi kṛtaṃ stambhadvayaṃ tathā || 37 ||
[Analyze grammar]

hastayugā'vakhāte tat kṣiptvā kṛtvā dṛḍhaṃ ca tat |
pañcahastocchritaṃ madhyabhūmirhastacatuṣṭayam || 38 ||
[Analyze grammar]

stambhopari dṛḍhaṃ tulā'valambanaṃ subhāradhṛk |
madhyabhārākhyakāṣṭhaṃ ca nyasya kṛtvā sthiraṃ ca tat || 39 ||
[Analyze grammar]

tanmadhye ca tulā dhāryā dīrghā hastacatuṣṭayam |
daśāṃgulāyate sthālyau svarṇapaṭṭasuśṛṃkhale || 40 ||
[Analyze grammar]

lohapāśayute cāpi ratnamālāvibhūṣite |
mālyalepanayukte ca candanādiprapūjite || 41 ||
[Analyze grammar]

dvayoḥ sthālyormadhyabhāge likhet kuṃkumapadmake |
tulāpātrikayostatra vikīret puṣpakāṇi ca || 42 ||
[Analyze grammar]

tulādaṇḍikamadhye ca phalamālambayecchubham |
athartvijo vedavidaḥ sādhavaḥ sādhubhūṣaṇāḥ || 43 ||
[Analyze grammar]

dvijendrā guravaḥ santaścācāryomantrasampradaḥ |
sitāmbaro mama bhaktastiṣṭhettulāntike sthale || 44 ||
[Analyze grammar]

pūrva ṛcāṃ vidāvāstāṃ dakṣe yajurvidau tathā |
paśce sāmavidāvuttare tvatharvavidau tadā || 45 ||
[Analyze grammar]

tataḥ sūktajapaḥ kāryo homaścāgnau ghṛtādibhiḥ |
gaṇeśagrahalokeśā vasvādityamarudgaṇāḥ || 46 ||
[Analyze grammar]

brahmaviṣṇumaheśāśca tarpaṇīyā havādibhiḥ |
parameśastathā kṛṣṇo nārāyaṇo narāyaṇaḥ || 47 ||
[Analyze grammar]

vāsudevo'vatārāśca mahāviṣṇurvirāḍ hariḥ |
tarpaṇīyā havanaiśca devyo lakṣmyaḥ samastikāḥ || 48 ||
[Analyze grammar]

homottaraṃ gurustūryanādairāvāhayet surān |
baliṃ puṣpaṃ ca dhūpaṃ ca kṛtvā manūn vadettathā || 49 ||
[Analyze grammar]

ehyehīndrovajradharo rakṣā'dhvaraṃ namo'stu te |
ehyehyagne havyavāha tiṣṭhā'dhvare namo'stu te || 50 ||
[Analyze grammar]

ehyehi dharmarāja tvaṃ pāhi makhaṃ namo'stu te |
ehyehi nirṛtadeva pāhi makhaṃ namo'stu te || 51 ||
[Analyze grammar]

ehyehi vāruṇadeva pāhi cāsmānnamo'stu te |
ehyehi prāṇanātha tvaṃ vāyo makhe namo'stu te || 52 ||
[Analyze grammar]

ehyehi tvaṃ kuberā'tra namo'stu dhanadhāriṇe |
ehyehi tvaṃ maheśāna gṛhāṇārho namo'stu te || 52 ||
[Analyze grammar]

ehyehi nāgarāja tvaṃ mamā'dhvaraṃ prapālaya |
ehyehi dhātarviśvātmannatra makhe namo'stu te || 54 ||
[Analyze grammar]

trailokye yāni bhūtāni sthāvarāṇi carāṇi ca |
brahmaviṣṇuśivaiḥ sārdhaṃ rakṣāṃ kurvantu tāni me || 55 ||
[Analyze grammar]

devadānavagandharvā yakṣarākṣasapannagāḥ |
ṛṣayo manavo gāvo devamātara ityapi || 56 ||
[Analyze grammar]

sarvā devyo ramā lakṣmyo brahmapriyā haripriyāḥ |
muktānyaśceśvareśāśca rakṣāṃ kurvantu me'dhvare || 57 ||
[Analyze grammar]

baliṃ miṣṭaṃ sunaivedyaṃ gṛhṇantu hi mayā'rpitam |
pūjāmārārtrikaṃ cāpi gṛhṇantvapi ca dakṣiṇāḥ || 58 ||
[Analyze grammar]

ityāvāhya surān pūjayitvā nīrājanottaram |
ṛtvigbhyo homabhūṣādi dadyādanyāni cāpi vai || 59 ||
[Analyze grammar]

kuṇḍalāni ca haimāni sūtrāṇi kaṭakāni ca |
aṅgulīyapavitrāṇi vāsāṃsi śayanāni ca || 60 ||
[Analyze grammar]

dviguṇaṃ gurave dadyād bhūṣaṇācchādanāni ca |
japeyuḥ śāntipāṭhāṃśca jāpakāḥ sarvatodiśam || 61 ||
[Analyze grammar]

kṛtvā'dhivāsanaṃ sarve kuryād brāhmaṇavācanam |
snātvā maṃgalasalilaiḥ kuryācca triḥpradakṣiṇam || 62 ||
[Analyze grammar]

dhṛtvā puṣpāñjaliṃ tulāṃ prārthayecchvetavastrakaḥ |
namaste dharmaśakte ca satyarūpe tapodhane || 62 ||
[Analyze grammar]

sākṣibhūte jaganmātaste namo'stu ramāsame |
dharmādharmaparīkṣārthaṃ kṛtā'si brahmaṇā purā || 64 ||
[Analyze grammar]

pramāṇaṃ sarvabhūtānāṃ dāne'si pāramārthike |
māṃ tolayantī saṃsārāduddharasva namo'stu te || 65 ||
[Analyze grammar]

yo'ntaryāmī pareśo'sti jīvātmā yaśca tattanuḥ |
tābhyāmadhiṣṭhitā tvaṃ vai tasyai devyai namo namaḥ || 66 ||
[Analyze grammar]

lūtā māyā prakṛtiryā tasyā jālaṃ prapañcakam |
tad vināśya pare loke prahiṇoti yatastulā || 67 ||
[Analyze grammar]

anādiśrīkṛṣṇanārāyaṇa tauleya te namaḥ |
tulāpuruṣarūpastvaṃ saṃsārāt tārayasva naḥ || 68 ||
[Analyze grammar]

evaṃ tulāṃ namaskṛtya pūjayitvā pradakṣiṇam |
kṛtvā''ruhyāt svayaṃ sthālyāṃ tulāyāṃ dānakṛjjanaḥ || 69 ||
[Analyze grammar]

nijaveṣayutaḥ samyak sarvābharaṇahetiyuk |
dharmadevaṃ tathā sūryaṃ śrīhariṃ cāvalokayet || 70 ||
[Analyze grammar]

sādhuṃ satīṃ devamūrtiṃ prapaśyettāvadeva saḥ |
karābhyāṃ baddhamuṣṭibhyāṃ namet kṛṣṇanarāyaṇam || 71 ||
[Analyze grammar]

kuṭumbinaḥ svarṇamayaṃ rūpyamayaṃ ca vetarat |
nijabhāraṃ dravyameva nyaseyuḥ śarkarādikam || 72 ||
[Analyze grammar]

tulyādabhyadhikaṃ yāvat kāṃcanaṃ rajataṃ dhanam |
śarkarāṃ vā nyaseyuśca sarvapāpāpanuttaye || 73 ||
[Analyze grammar]

puṣṭikāmaḥ prakurvīta bhūmisaṃsthāṃ dhṛtestulām |
tolayitvā kṣaṇaṃ tatra vandeta parameśvarīm || 74 ||
[Analyze grammar]

namaste te mahālakṣmi dhārmiki dharmasākṣiṇi |
sanātani sarvapāpanāśinī puṇyadāyinī || 75 ||
[Analyze grammar]

svarṇabhare kambhare tvaṃ rūpyabhare pramuktide |
rasāḍhye rasade devi mātarlakṣmi tule namaḥ || 76 ||
[Analyze grammar]

tvayā dhṛtaṃ jagat sarvaṃ sarvadānaphalaprade |
hareḥ priye mama śuddhiṃ prakāraya samarpitā || 77 ||
[Analyze grammar]

ityuktvā cā'vatīryā'tha gurave'rddhaṃ nivedayet |
ṛtvigbhyo vai paramardhaṃ dadyādudakapūrvakam || 78 ||
[Analyze grammar]

gurave grāmaratnāni ṛtvigbhyaścārpayettathā |
teṣāṃ tadājñayā svarṇādyanyebhyo'pi paraṃ diśet || 79 ||
[Analyze grammar]

dīnā'nāthanirādhārān satīsādhvīsuyoṣitaḥ |
bālāṃśca bālikāścāpi samarcya sādhusajjanān || 80 ||
[Analyze grammar]

brāhmaṇān bhikṣukān viprān brahmiṣṭhān pārṣadānprabhūn |
dānapātrāṇi tatra syurye ye tāṃstān tato'param || 81 ||
[Analyze grammar]

svarṇaṃ rūpyaṃ śarkarādi bhaktyā sampūjya cārpayet |
na ciraṃ dhārayed gehe dhanaṃ dānārthatolitam || 82 ||
[Analyze grammar]

prokṣitaṃ kalpitaṃ vāpi svarṇaṃ rūpyaṃ dhanaṃ ca vā |
tiṣṭhed bhayāvahaṃ yasmācchokavyādhikaraṃ bhavet || 83 ||
[Analyze grammar]

śīghraṃ parasvīkaraṇācchreyaḥ prāpnoti dānavān |
svagṛhe dānapūtaṃ yad devasvaṃ vipranāṇakam || 84 ||
[Analyze grammar]

sādhutvaṃ ca satītvaṃ ca vidhavāsvaṃ pracoritam |
dhanaṃ yattannijīyaṃ svaṃ nāśayitvaiva gacchati || 85 ||
[Analyze grammar]

upabhuktaṃ na saukhyāya rogāya sajjate hi tat |
kulahāniphalaṃ tasya nirvaṃśatvakaraṃ hi tat || 86 ||
[Analyze grammar]

tasmād devadhanaṃ sādhudhanaṃ vipradhanaṃ tathā |
dharmadhanaṃ na vai bhakṣyaṃ dīnanārīdhanaṃ ca vā || 87 ||
[Analyze grammar]

na vā sthāpyaṃ dhane naije sarvanāśaphalaṃ yataḥ |
śuktako'bhūt purā vipro devasādhuprapūjakaḥ || 88 ||
[Analyze grammar]

sādhubhiḥ saha devasya pratimādiprapūjane |
bhaktārpitaṃ dhanaṃ bhuṃkte ḍhabbukaṃ śarkarādikam || 89 ||
[Analyze grammar]

pakṣapātena nityaṃ sa bhuṃkte'datvodaraṃbharaḥ |
tena pāpena tasyā'bhūt puṇyakṣayaḥ samantataḥ || 90 ||
[Analyze grammar]

pratyuta pāpavān jāto dāridryaduḥkhaduḥkhitaḥ |
gṛhalakṣmīrvinaṣṭā ca patnī naṣṭā sutādayaḥ || 91 ||
[Analyze grammar]

kṣetraṃ ca vāṭikā naṣṭā ṛṇavān samajāyata |
kṣudhā''vṛto'tidīnaśca bhikṣukaḥ samajāyata || 92 ||
[Analyze grammar]

netrahīno dharmahīno bubhukṣitaḥ pade pade |
pāpavṛttiścā'bhavacca mṛtyumukhaṃ gato'bhavat || 93 ||
[Analyze grammar]

yāmyaduḥkhānyanubhūya śvapacatvaṃ tato gataḥ |
kālāntare punastiryagyonyādau samajāyata || 94 ||
[Analyze grammar]

evaṃ lakṣmi dhanaṃ sādhvyā devyā devasya yoginaḥ |
hānidaṃ na gṛhe rakṣyaṃ samūlā'pahṛtipradam || 95 ||
[Analyze grammar]

tulādānaṃ hi vidhinā nijabhāraṃ dhanādikam |
evaṃ dadyād yo manujo mahendrādipadaṃ labhet || 96 ||
[Analyze grammar]

lokapālādhināthaḥ syāt śāśvataṃ svargamṛcchati |
vimānenā'rkavarṇena kiṅkiṇījālamālinā || 97 ||
[Analyze grammar]

pūjyamāno devatābhirbhuktvā svargaṃ mahāciram |
satyalokaṃ mahālakṣmīlokaṃ śrīnagaraṃ vrajet || 98 ||
[Analyze grammar]

viṣṇupuraṃ harerlokaṃ golokaṃ sa vrajettathā |
bhaktimān yāti vaikuṇṭhaṃ cā'kṣaraṃ satpadaṃ labhet || 99 ||
[Analyze grammar]

dīyamānaṃ mahādānaṃ prapaśyati praśaṃsati |
nivedayati lokebhyaḥ kālāntare smaratyapi || 100 ||
[Analyze grammar]

śṛṇoti vā prapaṭhati bhaktibhāvayuto janaḥ |
nārī vā bhaktiyuktā sā rājā rājñī sakhā sakhī || 101 ||
[Analyze grammar]

vipro viprāṇikā cānyā dāsī dāso'paro'pi vā |
taddaśāṃ'śaṃ phalaṃ tatra labhate dānaśaṃsakaḥ || 102 ||
[Analyze grammar]

svarge dānaphalaṃ bhuktvā bhaktyā yāsyati matpadam |
tulādānaphalaṃ caivaṃ viśiṣyate samastataḥ || 103 ||
[Analyze grammar]

itiśrīlakṣmīnārāyaṇīyasaṃhitāyāṃ tṛtīye dvāparasantāne mahādānaṣoḍaśakeṣu tulāpuruṣadānavidhinirūpaṇanāmā pañcaviṃśatyadhikaśatatamo'dhyāyaḥ || 125 ||
[Analyze grammar]