Chapter 120

śrīpuruṣottama uvāca |
śṛṇu lakṣmi mahālakṣmyā mantrāntaraṃ vadāmi te |
yadārādhanato bhūyāt sādhako bhuktimuktimān || 1 ||
[Analyze grammar]

oṃ mahālakṣmīmahāmāyāmahānārāyaṇyai kamalavāsinyai |
mahāviṣṇupriyāyai namaḥ oṃ śrīṃ hrīṃ klīṃ ṇīṃ mlīṃ |
ṣṇīṃ mahāmātre puruṣārthavarṣiṇyai svāhā || 2 ||
[Analyze grammar]

pañcāśadakṣaraṃ divyaṃ mahāmantraṃ japet sadā |
ṛṣirnārāyaṇaścā'haṃ mahālakṣmīrhi devatā || 3 ||
[Analyze grammar]

svarṇacampakarūpābhāṃ sarvabhūṣaṇabhūṣitām |
kṛpāhāsyaprasannāsyāṃ bhaktānugrahatatparām || 4 ||
[Analyze grammar]

sarvaiśvaryādisampūrṇāṃ sarvāmbaravirājitām |
koṭisūryendukāntāṃ ca ratnahārādi bibhratīm || 5 ||
[Analyze grammar]

kambharāśrīmahālakṣmīṃ śrīmadgopālarūpiṇīm |
mahāviṣṇumahāśaktiṃ dhyāyecchrīmātaraṃ ramām || 6 ||
[Analyze grammar]

japenmantrāyutaṃ mantralakṣaṃ vā'tha daśāṃśataḥ |
pāyasena havanaṃ ca kuryācchrīcandanārcanam || 7 ||
[Analyze grammar]

sthāpanaṃ pūjanaṃ kuryādārārtrikaṃ nivedanam |
jalaṃ tāmbūlakaṃ dadyāt kṣamāpanaṃ visarjanam || 8 ||
[Analyze grammar]

navaśaktīḥ pūjayecca mahālakṣmyāḥ svarūpiṇī |
vibhūtimunnatiṃ kāntiṃ sṛṣṭiṃ kīrti ca sannatim || 9 ||
[Analyze grammar]

vyuṣṭimutkṛṣṭimṛddhiṃ ca dakṣiṇe tu gajānanam |
vāme kusumadhanvānaṃ pūjayeccandanādibhiḥ || 10 ||
[Analyze grammar]

umāṃ śrīṃ bhāratīṃ durgāṃ dharaṇiṃ vedamātaram |
devīmuṣāṃ cāṣṭadikṣu gaṃgāṃ yamīṃ ca pūjayeta || 11 ||
[Analyze grammar]

pādapadmakṣālanāyā''nītā apaḥ prapūjayet |
śaṃkhapadmanidhī cā'rcet pārśvayordhṛtacāmarau || 12 ||
[Analyze grammar]

dhṛtātapatraṃ varuṇaṃ pūjayet paścime tathā |
rāśīnnavagrahāṃścāpi diggajānarcayettathā || 13 ||
[Analyze grammar]

lokapālāṃstadastrāṇi pūjayettvanale tathā |
dūrvābhirājyasiktābhirjuhuyādāyuṣe naraḥ || 14 ||
[Analyze grammar]

guḍūcīmājyasaṃsiktāṃ juhuyāt saptavāsarān |
aṣṭottarasahasraṃ yaḥ sa jīvet pūrṇameva ha || 15 ||
[Analyze grammar]

hutvā tilān ghṛtābhyaktān dīrghamāyuṣyamāpnuyāt |
śālibhirjuhvato nityamaṣṭottarasahasrakam || 16 ||
[Analyze grammar]

acirādeva mahatī lakṣmīḥ sañjāyate dhruvā |
nārīkelaghṛtādyairjuhuyāt kuberavad bhavet || 17 ||
[Analyze grammar]

guḍaghṛtābhyāṃ havanādannavān samprajāyate |
evaṃ yo bhajate lakṣmīṃ kaṃbharāṃ lalitāṃ śriyam || 18 ||
[Analyze grammar]

sampadastasya jānante mahālakṣmīḥ prasīdati |
dehānte vaiṣṇavaṃ dhāma labhate pārameśvaram || 19 ||
[Analyze grammar]

śrīpure divyaloke sā mātā lakṣmīḥ pareśvarī |
vividhān svāvatārān hi trailokyāṃ kurute sadā || 20 ||
[Analyze grammar]

mahālakṣmīrmahāmāyā mūlaprakṛtirīśvarī |
pārabrāhmī cā'kṣarī ca pareśī puruṣottamī || 21 ||
[Analyze grammar]

rādhālakṣmīśca gaṃgā ca virajā ca sarasvatī |
sāvitrī cātha gāyatrī kamalā padminī ramā || 22 ||
[Analyze grammar]

tulasī mādhavī padmā cetyevaṃ khyāyate hi sā |
viṣṇukāñcyā mahālakṣmīrlalitā vartate satī || 23 ||
[Analyze grammar]

śivakāñcyāṃ saiva devī kāmeśvarī śivapriyā |
vartate paramā pūjyā naikarūpā hi kaṃbharā || 24 ||
[Analyze grammar]

śrīnārāyaṇīśrīruvāca |
kāñcīpuryāḥ sukalyāṇī dvedhā yā vartate svayam |
mahālakṣmīḥ parā śaktistāṃ dvedhāṃ diśa me prabho || 25 ||
[Analyze grammar]

śrīpuruṣottama uvāca |
kāñcīkṣetre purā brahmā mālakṣmīdarśanāya ha |
ātmaikadhyānayuktaśca tapastepe'tiduḥsaham || 26 ||
[Analyze grammar]

purastasya prādurāsīnmahālakṣmīḥ karābjikā |
padmāsane rājamānā viṣṇunā mahatā saha || 27 ||
[Analyze grammar]

sarvaśṛṃgāraveṣāḍhyāṃ sarvābharaṇabhūṣitām |
ādilakṣmīṃ pravīkṣyaiva brahmaviṣṇvīśamātaram || 28 ||
[Analyze grammar]

kāmākṣīṃ tāṃ divyadevīmastauṣīd viśvasṛṭ svayam |
anādiśrīkṛṣṇanārāyaṇasya jananīṃ bhuvi || 29 ||
[Analyze grammar]

brahmovāca |
jaya lakṣmi mahālakṣmi jaganmātaḥ pareśvari |
jaya śrīnāthasahaje jaya śrīsarvamaṃgale || 30 ||
[Analyze grammar]

jayaśrīkaruṇārāśe jaya vaiṣṇavavandite |
jaya lokaprapūjye tvaṃ lokakartryai ca te namaḥ || 31 ||
[Analyze grammar]

ananyabhāvanābhaktairvedyāyai te namo namaḥ |
āmnāyamunisaṃghātairjñātoktā yā pareśvarī || 32 ||
[Analyze grammar]

parabrahmasvarūpāyai mātre te vai namo namaḥ |
hṛdayasthe namastubhyaṃ sāmrājyasampadīśvari |
vedā niḥśvasitaṃ te vai tasyai mātre namo namaḥ || 33 ||
[Analyze grammar]

sahasraśīrṣā devo'pi dhatte yadājñayā kṣitim |
sūryacandrāgnayo bhānti yadaṃśatejasā sadā || 34 ||
[Analyze grammar]

pañcaviṃśatirūpāyai mātre lakṣmyai namo namaḥ |
īśvarā api yasyāste prāpyaiśvaryāṇi ceśvarāḥ || 35 ||
[Analyze grammar]

sarvātmanāmantarasthāṃ paramānandarūpiṇīm |
śrīvidyāṃ śrīmahālakṣmīṃ tvāṃ namāmi punaḥ punaḥ || 36 ||
[Analyze grammar]

sarvajñānātmikā yūpātmikā svarṇātmikā'si ca |
tattvopadeśarūpā ca smṛddhyātmā śāntivarṣiṇī || 37 ||
[Analyze grammar]

deśakālapadārthātmā maṇimantrauṣadhātmikā |
dhātutaijasarūpā ca tasyai mātrai namo namaḥ || 38 ||
[Analyze grammar]

kalyāṇaguṇasampannā kambharābhūtiśālinī |
kuṃkumavāpikāmātā bālakṛṣṇaprasūḥ ramā || 39 ||
[Analyze grammar]

anādiśrīkṛṣṇanārāyaṇāṃkaśobhitā'vyayā |
vāraṃvāraṃ surāṣṭre tvaṃ samāyāsi namo'stu te || 40 ||
[Analyze grammar]

itistutā ca sā mātā santuṣṭā vīkṣya vedhasam |
vṛṇīṣveti tadā prāha brahmā'pi cārthayad varam || 41 ||
[Analyze grammar]

mātaste darśanādadya kṛtakṛtyo'smi sarvathā |
tathāpi lokarakṣārthaṃ kāmaye tat pradehi me || 42 ||
[Analyze grammar]

karmabhūmau janā mūḍhāḥ saṃsāravāsanāvṛtāḥ |
teṣāṃ mokṣārthamevātra bhūmau nivāsamācara || 43 ||
[Analyze grammar]

śrutvā''ha vedhasaṃ mātā tathā'stviti tadā rame |
brahmā'pi mandiraṃ śīghraṃ kārayāmāsa saubhagam || 44 ||
[Analyze grammar]

mahālakṣmyā samaṃ sthātuṃ sasmāra parameśvaram |
puṇḍarīkākṣamīśeśeśvareśvareśvareśvaram || 45 ||
[Analyze grammar]

so'pi sākṣāt samāyātaḥ prārthito brahmaṇā tathā |
nivāsārthaṃ saha lakṣmyā tathāstviti jagāda saḥ || 46 ||
[Analyze grammar]

evaṃ kāñcanatulyāyāṃ sthalyāṃ śubhe hi mandire |
mahāviṣṇuyutā mātā mahālakṣmīḥ sthitā'bhavat || 47 ||
[Analyze grammar]

atha brahmā punaḥ prāha mātaḥ pitaḥ sadā'tra vai |
vaiṣṇavādyo bhavadbhaktaḥ śaṃkaro'pi vasatviha || 48 ||
[Analyze grammar]

vaiṣṇavyā nijaśaktyā''ḍhyaśceti pūraya kāmanām |
tathā'stviti hariḥ prāha śivarūpo'bhavaddhariḥ || 49 ||
[Analyze grammar]

mahālakṣmīścā'bhavacca mahāgaurī mahojjvalā |
sarvaśṛṃgāraśobhāḍhyā mahālāvaṇyaśevadhiḥ || 50 ||
[Analyze grammar]

śivaṃ gaurīṃ tadā brahmā nārāyaṇaśca devatāḥ |
pupūjuḥ parayā bhaktyā sthāpayāmāsurīśvarī || 51 ||
[Analyze grammar]

manasā nirmitaṃ dhātrā madhye nagaramuttamam |
mandiraṃ ca tayorarthe śivakāṃcītisundaram || 52 ||
[Analyze grammar]

mahālakṣmyā vāyubhāge sthitavān śaṃkarastadā |
agnibhāge viṣṇureva brahmā'vyakto vyarājata || 53 ||
[Analyze grammar]

ādirlakṣmīrmahālakṣmīrmātā sā śrīpareśvarī |
kā nāma vāṇī mā nāma kamalā te hyubhe tataḥ || 54 ||
[Analyze grammar]

kāmā sā'kṣṇā tu vāmena paśyatyeva hariṃ prabhum |
śaṃkaraṃ dakṣiṇenā'kṣṇā paśyatyeva ca vedhasam || 55 ||
[Analyze grammar]

kāmākṣīti tataḥ sā'bhūt kathitā devapuṃgavaiḥ |
tadā gaṃgāyamunādyāḥ sarvatīrthādhidevatāḥ || 56 ||
[Analyze grammar]

tisraḥ koṭyo'rdhakoṭī ca sevārthaṃ samupāyayuḥ |
tadā''dāya karayostu cāmare śrīḥ sarasvatī || 57 ||
[Analyze grammar]

mahālakṣmīṃ vijayantyau sthite vai pārśvayoḥ sukhe |
ādiśrīnayanotpanne sarvaśṛṃgāraśobhite || 58 ||
[Analyze grammar]

evaṃ svamātaraṃ pṛṣṭhe sthitā santoṣiṇī sutā |
chatraṃ svarṇamayaṃ dhṛtvā rājate divyarūpiṇī || 59 ||
[Analyze grammar]

mahālakṣmyāścājñayā'tha sarasvatī svayaṃprabhā |
paśyatāṃ sarvadevānāṃ vidhāturdehamāviśat || 60 ||
[Analyze grammar]

indirāśrīrāviśacca viṣṇudehe tadājñayā |
evaṃ gaurī śaṃkarasya tadā varṣma samāviśat || 61 ||
[Analyze grammar]

santuṣṭā cāviśanmātṛdehaṃ brahmavratā sadā |
evaṃ tā devatāstatra kāñcyāṃ vasanti padmaje || 62 ||
[Analyze grammar]

brahmā tataḥ surānāha prativarṣamihālaye |
vivāhaḥ samprakartavyo mahāgaurīmaheśayoḥ || 63 ||
[Analyze grammar]

tathā kāryo vivāho vai mahālakṣmyāmahāprabhoḥ |
mahotsavaḥ prakartavyo rājopacārakairiha || 64 ||
[Analyze grammar]

vivāhotsavakartṝṇāṃ saubhāgyaṃ śāśvataṃ bhavet |
kāñcyāṃ kuṃkumavāpyāṃ vā mahotsavaphalaṃ samam || 65 ||
[Analyze grammar]

mayā kuṃkumavāpyākhye kṣetre sauvarṇamandire |
sthāpitā me prasūrmātā mahālakṣmīḥ pareśvarī || 66 ||
[Analyze grammar]

sahagopālakṛṣṇena mahānārāyaṇena vai |
tatpūjāṃ ye kariṣyanti te yāsyanti mahatphalam || 67 ||
[Analyze grammar]

naivedyaṃ ye dhariṣyanti te yāsyanti divaṃ sukham |
bhaktiṃ tayoḥ kariṣyanti te yāsyantyamṛtaṃ padam || 68 ||
[Analyze grammar]

śrīpuraṃ caiśvaraṃ dhāma mahāviṣṇormahātmanaḥ |
iyameva mahālakṣmīḥ śrīmatī parameśvarī || 69 ||
[Analyze grammar]

triyugalaṃ sasarjā'pi lakṣmīviṣṇumayaṃ tathā |
sāvitrīviśvasṛṅrūpaṃ śivāśivasvarūpakam || 70 ||
[Analyze grammar]

jayā ca vijayā vidyā sevante parameśvarīm |
sampatkarī mahādevī sevate śrīmatīṃ sadā || 71 ||
[Analyze grammar]

mantraṃ japetpūjayecca śrīcakraṃ sarvavastubhiḥ |
dhāritaṃ manasā siddhyet śrīcakrasya prapūjanāt || 72 ||
[Analyze grammar]

śrīcakraṃ vai mahālakṣmīmūrtirguptā na saṃśayaḥ |
bhakto bhūtvā'khilaṃ bhāramaihikāmuṣmikātmakam || 73 ||
[Analyze grammar]

śrīdevatāyāṃ nikṣipya bhaveccharaṇavartanaḥ |
anukūlo mahālakṣmyāḥ prātikūlyavivarjitaḥ || 74 ||
[Analyze grammar]

rakṣa māmiti viśvastaḥ sevāṃ tu vṛṇuyāt sadā |
dīnādhīno bhaveccāpi bhuktiṃ muktiṃ sa vindati || 75 ||
[Analyze grammar]

amānitvamadaṃbhitvamahiṃsā kṣāntirārjavam |
sadgurūpāsanaṃ śaucaṃ sthairyamātmavinigrahaḥ || 76 ||
[Analyze grammar]

indriyārtheṣu vairāgyamahaṃkāravivarjitaḥ |
janmamṛtyujarāvyādhiduḥkhadoṣānucintanam || 77 ||
[Analyze grammar]

asaktiranabhiṣvaṃgo māyikeṣu tu vastuṣu |
samatā tu sukhe duḥkhe bhaktiḥ śrīlaliteśvare || 78 ||
[Analyze grammar]

ekāntaśīlatā cānyasaṃsadrāgavihīnatā |
ādhyātmikaparatvaṃ ca parajñānābhimagnatā || 79 ||
[Analyze grammar]

evaṃ ca vartayan bhaktyā mahālakṣmyāḥ prapattimān |
vindate paramaṃ mokṣaṃ bhuktiṃ svargamanuttamam || 80 ||
[Analyze grammar]

śrīlakṣmīdarśane dīkṣāṃ vadāmi śṛṇu padmaje |
haste śrīnagaraṃ dhyātvā dhāma yatparamaṃ param || 81 ||
[Analyze grammar]

mahālakṣmyā mahāviṣṇorhiraṇmayaṃ suśobhanam |
mahālakṣmyā japanmantraṃ guruḥ śiṣyatanuṃ spṛśet || 82 ||
[Analyze grammar]

sparśadīkṣā sarvapāpanāśinīṃ puṇyadāyinīm |
datvā nimīlya nayane dhyātvā śrīparameśvarīm || 83 ||
[Analyze grammar]

guruḥ śiṣyaṃ prapaśyet sā dṛgdīkṣā pāvanī śubhā |
gurordṛṣṭyāḥ sparśanena bhāṣaṇena ca sevayā || 84 ||
[Analyze grammar]

pāpanāśo bhavejjñānaṃ divyadeho bhavedapi |
guroḥ prasādamāsādya śiṣyastadrūpavān bhavet || 85 ||
[Analyze grammar]

ciraṃ śuśrūṣatā tuṣṭo dadyādāśīrgururhi sā |
dīkṣā tu mānasī proktā sarvārpaṇā taduttamā || 86 ||
[Analyze grammar]

śuklapakṣe śubhe kāle snātvā sandhyāmupāsya ca |
guruṃ natvā pavitraṃ ca mandiraṃ prati saṃvrajet || 87 ||
[Analyze grammar]

ācamanaṃ tataḥ kṛtvā mahālakṣmīṃ prapūjayet |
āvāhanāsane pādyamarghyamācamanaṃ kriyāt || 88 ||
[Analyze grammar]

snānaṃ pañcāmṛtamayaṃ śuddhā'dbhirabhiṣecanam |
vastraṃ vibhūṣaṇaṃ gandhaṃ puṣpaṃ dhūpaṃ ca dīpakam |
naivedyaṃ salilaṃ tāmbūlakaṃ pradakṣiṇaṃ stutim || 89 ||
[Analyze grammar]

oṃ aiṃ hrīṃ śrīṃ aiṃ klīṃ sauḥ oṃ namo mahālakṣmyai kambharāyai kāmākṣyai lalitāyai śrīcakrāyai mahānārāyaṇyai mahāparameśvaryai pūrṇabrahmamahāviṣṇupatnyai śrīgopālakṛṣṇāṃganāyai sarvasampatprapūriṇyai cā'ṣṭottaradviśatamahāsāmarthyamayyai te namaḥ ka eṃ īla hrīṃ hasa kahala hrīṃ |
sakala hrīṃ aiṃ klīṃ sauḥ sauḥ klīṃ aiṃ śrīṃ svāhā || 90 ||
[Analyze grammar]

itipuṣpāṃjaliṃ dadyāttato gomayalepite |
bhūtale taṇḍulapīṭhe vārikuṃbhaṃ saratnakam || 91 ||
[Analyze grammar]

pañcapallavasaṃyuktaṃ nārikelaphalānvitam |
abhyarcya gandhapuṣpādyaistato mantraṃ japenmuhuḥ || 92 ||
[Analyze grammar]

aṣṭottaraśataṃ japtvā dīpaṃ pradarśya vai guruḥ |
śiṣyaṃ ca kārayitvaiva sāṣṭāṃgaṃ kusumāñjalim || 93 ||
[Analyze grammar]

prārthanāṃ kārayet tatra muhuḥ sarveṣṭalabdhaye |
paraṃdhāma paraṃbrahma mama tvaṃ sveṣṭadevatā || 94 ||
[Analyze grammar]

rakṣa māṃ sakuṭumbaṃ tvaṃ rakṣa mokṣārthameva mām |
guroścaraṇayornyasya mastakaṃ bhaktisaṃyutaḥ || 95 ||
[Analyze grammar]

hastau prakṣālya ca tato naivedyaṃ miṣṭamuttamam |
vividhānnaṃ phalaṃ dugdhasāraṃ lakṣmyai samādiśet || 96 ||
[Analyze grammar]

śiṣyakarṇe manuṃ datvā'bhiṣiñcet kuṃbhavāriṇā |
tataḥ śuddho mahālakṣmyāḥ saparyā sarvadā''caret || 97 ||
[Analyze grammar]

lakṣmīśeṣaṃ prabhuñjyācca dakṣiṇāṃ gurave'rpayet |
bhojayed vaiṣṇavān sādhūn sādhvīrbālāṃśca kanyakāḥ || 98 ||
[Analyze grammar]

śarīramarthaṃ prāṇaṃ ca tasmai śrīgurave diśet |
tadadhīnaścarennityaṃ tadvākyaṃ naiva laṃghayet || 99 ||
[Analyze grammar]

prasādabhojī śiṣyaḥ syāt paṃktipāvanapāvanaḥ |
yaḥ prasannaḥ kṣaṇārdhena mokṣalakṣmīṃ prayacchati || 100 ||
[Analyze grammar]

durlabhaṃ taṃ vijānīyād guruṃ saṃsāratārakam |
ādadīta tato jñānaṃ seveta satataṃ ca tam || 101 ||
[Analyze grammar]

gurubhaktirbhavecchiṣyastaddrohaḥ pātakaṃ param |
tatpādasevanaṃ muktitulyaṃ muktipradaṃ matam || 102 ||
[Analyze grammar]

guruśāsanavartitvācchiṣyasaṃjñā pratanyate |
japaṃ dhyānaṃ japaṃ dhyānaṃ kuryācchrāntatvahānaye || 103 ||
[Analyze grammar]

dhyānāt kīṭo bhramaraḥ syāttathā śiṣyo harirbhavet |
ātmaikyabhāvino brahmībhūtatā darśanaṃ phalam || 104 ||
[Analyze grammar]

ahaṃbhāve gate jñāte cātmani paramātmani |
yatra yatra mano yāti sarve te hi samādhayaḥ || 105 ||
[Analyze grammar]

sarvabrahmātmalabdhestu brahmarūpasya yoginaḥ |
na tasya kiñcidāptavyaṃ jñātavyaṃ cā'vaśiṣyate || 106 ||
[Analyze grammar]

pūjākoṭisamaṃ stotraṃ stotrakoṭisamo japaḥ |
japakoṭisamaṃ dhyānaṃ dhyānakoṭisamo layaḥ || 107 ||
[Analyze grammar]

deho devālayaḥ prokto jīvo'yaṃ sevakaḥ smṛtaḥ |
sevayā'ntargataṃ kṛṣṇaṃ toṣayet sarvadānakaiḥ || 108 ||
[Analyze grammar]

koṭidānavratayajñebhyo varaṃ gurusevanam |
nirgataṃ yadgurorvaktrāt tatsarvaṃ śāstramasya vai || 109 ||
[Analyze grammar]

niṣiddhamapi tatkuryād gurvājñāṃ naiva laṃghayet |
jātividyādhanāḍhyo'pi guruṃ daṇḍavadācaret || 110 ||
[Analyze grammar]

riktapāṇistu nopeyād rājānaṃ devatāṃ gurum |
phalapuṣpāmbarādīni yathāśakti samarpayet || 111 ||
[Analyze grammar]

sadbhaktarakṣaṇāyaiva divyadevo'pi mādhavaḥ |
kṛpānidhirgururbhūtvā saṃsārīva sa ceṣṭate || 112 ||
[Analyze grammar]

nāsti gurvadhikaṃ tattvaṃ nāsti jñānādhikaṃ sukham |
nāsti bhaktyadhikā pūjā nāsti mokṣādhikaṃ phalam || 113 ||
[Analyze grammar]

smaraṇātpūjanāccāpi śravaṇātpaṭhanādapi |
bhuktimuktipradaṃ divyaṃ phalaṃ cā'sya prajāyate || 114 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne mahālakṣmyā mantrāntaraṃ kāñcīpuryormahālakṣmyā dvedhārūpatā brahmaviṣṇumaheśānāṃ tatra nivāso dīkṣāvidhānaṃ cetyādinirūpaṇanāmā viṃśā'dhikaśatatamo'dhyāyaḥ || 120 ||
[Analyze grammar]