Chapter 105

śrīnārāyaṇīśrīruvāca |
dharmāṇāṃ karmaṇāṃ cāpi mūlaṃ me vada mādhava |
yadāśrayāt prapuṣṭiṃ saṃprayāti mānavo vṛṣe || 1 ||
[Analyze grammar]

śrīpuruṣottama uvāca |
śṛṇu śrīśivarājñīśri dharmamūlaṃ sanātanam |
nārāyaṇe yathā lakṣmīḥ śrīkṛṣṇe rādhikā yathā || 2 ||
[Analyze grammar]

anādiśrīkṛṣṇanārāyaṇe tvaṃ mayi rājase |
viṣṇau lakṣmīryathā cāste gopāle kambharā yathā || 3 ||
[Analyze grammar]

sāvitryaje hare durgā siddhirvināyake yathā |
tathā vivāhitā patnī dharmamūlaṃ hi dehinām || 4 ||
[Analyze grammar]

pitṛdevā'tithīnāṃ ca svajanasya gṛhasya ca |
vaṃśasya vaṃśaśākhānāṃ mūlaṃ patnī vivāhitā || 5 ||
[Analyze grammar]

alaṃkṛtyodakapūrvāṃ kanyāṃ dadyācchubhe vare |
varārohāṃ yuvatīṃ cā'naṅgavāsaśarīriṇīm || 6 ||
[Analyze grammar]

abhipretā ca yā yasya kanyā'bhipreta eva yaḥ |
tayormudā vivāho vai kartavyo hitakṛddhi saḥ || 7 ||
[Analyze grammar]

brāhmaṇānāṃ satāṃ cāpi sāttvikānāṃ vidhirhyayam |
dhanena bahudhā krītvā prasahya haraṇaṃ ca vā || 8 ||
[Analyze grammar]

na kartavyaṃ kvacillagnaṃ kenacit sukhamicchatī |
niḥśvāsābhihataṃ sarvaṃ dahyatyeva hi yoṣitaḥ || 9 ||
[Analyze grammar]

jātastrīvyañjanāṃ bhāryāmudvahecchreya icchatā |
udbhinnayauvanāṃ puṣṭāmudvahetpuṣṭayauvanaḥ || 10 ||
[Analyze grammar]

rājasvalyaṃ vinā naiva kṣatāṃ kuryānnijāṃganām |
athavā cet kāmukī sā snehaspṛśyā nisargajā || 11 ||
[Analyze grammar]

svayaṃ patiṃ pragacchecced ramaṇe naiva dūṣaṇam |
patnīcchāmantarā nopayacchet nārīcalo bhavan || 12 ||
[Analyze grammar]

kāmukaḥ svairavṛttaśca dharmaṃ hanti gṛhāśrayam |
prasahyā'dharma evāste snehakāryo vṛṣo mataḥ || 13 ||
[Analyze grammar]

śṛṇu lakṣmi mahārāṣṭre kṣatriyo jāṃghalāmakhaḥ |
āsīt vavre sa kanyāṃ dvādaśavarṣāṃ surūpiṇīm || 14 ||
[Analyze grammar]

ajātayauvanabhāvāṃ dharmahṛdayayoginīm |
sadvivekayutāṃ rājasvalyottaraṃ patiṃ prati || 15 ||
[Analyze grammar]

kāmadharmaṃ cehamānāṃ nānyathā sā satīvratā |
dharmaṃ kṛtvā puraścāste patisevāparā sadā || 16 ||
[Analyze grammar]

kāmukaśca patistāṃ vai prasahya kāmatṛptaye |
spraṣṭumiyeṣa sā prāha kānta dharmaḥ prabādhate || 17 ||
[Analyze grammar]

nā'haṃ yogyā bhavāmyatra vinā dharmamṛtuṃ pate |
sparśasevāṃ karomyatra kāmasevāṃ pravarjaya || 18 ||
[Analyze grammar]

ityukto'pi patidharmamanāvekṣya hi kāmukaḥ |
prasahya patnīṃ jagrāha satī niḥśvāsamācarat || 19 ||
[Analyze grammar]

niśvāsānmūrtimānagniḥ prādurbabhūva tatkṣaṇam |
ajvālayat patiṃ saudhaṃ smṛddhiṃ copaskarāṇi ca || 20 ||
[Analyze grammar]

satī śuśoca bahudhā patyau naṣṭe pativratā |
sasmāra dharmaṃ dharmo'pi tadā sākṣāccaturbhujaḥ || 21 ||
[Analyze grammar]

āyayau mā śucaśceti prāha bālāmaninditām |
dharmarakṣākṛte bāle prasanno'smi vṛṣo'smyaham || 22 ||
[Analyze grammar]

varaṃ varaya bhadraṃ te mā dharmāccala bhāmini |
dharmo rakṣati rakṣito nāśito nāśayatyapi || 23 ||
[Analyze grammar]

tena nāśitavānasmi tato nāśo'sya cā'bhavat |
tvayā vai rakṣitastena tvaṃ cā'bādhā prajīvasi || 24 ||
[Analyze grammar]

vahnistvāṃ na dadāhā'tra gṛhe bāle balānmama |
varaṃ vṛṇu yatheṣṭaṃ vai dadāmyadya hi mā ciram || 25 ||
[Analyze grammar]

śrutvā bālā kundadharmānāmnī tadā varaṃ patim |
vavre kuṭumbakaṃ patyuścāpi sañjīvitaṃ gṛham || 26 ||
[Analyze grammar]

sarvopaskarasaṃyuktaṃ dharmajñānayutaṃ patim |
dharmadevastathā'stvāha drutaṃ sañjīvitaḥ patiḥ || 27 ||
[Analyze grammar]

kuṭumbasahitaḥ sarvagṛhopakaraṇānvitaḥ |
dharmajñānayutaścāpi mumude cātibhāvavān || 28 ||
[Analyze grammar]

praśaśaṃsa paraṃ dharmaṃ patnyāḥ ṛtujayacchanam |
dharmo yayau tataḥ pūjāṃ labdhvā'tho jāṃgalāmakhaḥ || 29 ||
[Analyze grammar]

patnīdharmaṃ sadā sampālayāmāsa yathoditam |
satī satyavatī prāpa dagdhamapi nijaṃ patim || 30 ||
[Analyze grammar]

ityevaṃ cāsti maryādā patnīcchānirmitā sadā |
tāṃ rakṣan jāyate puṇyaṃ cānyathā pātakaṃ matam || 31 ||
[Analyze grammar]

śṛṇu lakṣmi tathā cānyad yuvatīkanyakāvṛṣam |
trīṇi varṣāṇyudīkṣeta kanyā ṛtumatī satī || 32 ||
[Analyze grammar]

caturthe tvatha samprāpte svayaṃ bhartāramarjayet |
prajā na hīyate tasyā ratiścāpi na hīyate || 33 ||
[Analyze grammar]

ato'nyathā vartamānā bhavedvācyā janasya sā |
tasmād rajasvalādharmaṃ vivāhayenna rakṣayet || 34 ||
[Analyze grammar]

asapiṇḍā nijamāturasagotrā ca yā pituḥ |
ityetāmanugaccheta mānavo niyamo hyayam || 35 ||
[Analyze grammar]

pāṇergrahaṇapūrvaṃ tu yācante vai janā muhuḥ |
varaḥ śreṣṭho miled dadyāttasmai vihāya cā'param || 36 ||
[Analyze grammar]

nā'niṣṭāya pradadyādvai na hīnāya na rogiṇe |
nā'raye na bibhatsāya na dadyāt krūrakarmaṇe || 37 ||
[Analyze grammar]

nā'dhārmikāya dadyādvai hiṃsakāya tathā na ca |
na hyeva bhāryā kretavyā na vikrayyā kathaṃcana || 38 ||
[Analyze grammar]

yatreṣṭaṃ tatra deyā syānniḥśulkā saṃvibhūṣitā |
mṛte patyau pradātavyā yatreṣṭaṃ yoṣitaḥ khalu || 39 ||
[Analyze grammar]

vivāhitena cet tyaktā dātavyā tvaparāya sā |
bhāryayā ca parityakto bhāryāmanyāṃ samudvahet || 40 ||
[Analyze grammar]

mṛtāyāmapi bhāryāyāṃ bhāryāmanyāṃ samudvahet |
devaraṃ praviśedvāpi devaro vā viśet striyam || 41 ||
[Analyze grammar]

dvayoścedānukūlyaṃ syādeṣa dharmaḥ sanātanaḥ |
apitṛjāṃ cā'mātṛjāṃ vindet mānavīṃ satīm || 42 ||
[Analyze grammar]

agniṃ devaṃ pitaraṃ vā gāṃ parikramya sarvathā |
vṛddhānāṃ sannidhau yadvā mālāṃ samarpya vai mithaḥ || 43 ||
[Analyze grammar]

hastayormelanaṃ vāpi kṛtvā natvā parasparam |
maṇḍape mandire vāpi vivāhayet guroḥ puraḥ || 44 ||
[Analyze grammar]

avirodhena lokānāṃ kuṭumbināṃ nṛpasya ca |
prajānāṃ cā'virodhena dvayorgraho vivāhanam || 45 ||
[Analyze grammar]

prakāśaṃ yaddvayoraikyaṃ cā'virodhena śobhanam |
hṛdayayoḥ sākṣitā'tra dharmaḥ so'pi purātanaḥ || 46 ||
[Analyze grammar]

aprakāśe garbhavattā ninditā pitṛvarjitā |
dāsīnāmiva vaṃśo na gaṇanāṃ yāti dhārmikīm || 47 ||
[Analyze grammar]

niyogādapi jāyante putrāste pitṛlokitāḥ |
brahmakṣatrā vaṃśakarā dharmaḥ so'pi purātanaḥ || 48 ||
[Analyze grammar]

sādhūnāṃ punarācāro garīyān dharmalakṣaṇaḥ |
pitrā''jñaptā svaya vṛttā bhartrā yogamupāgatā || 49 ||
[Analyze grammar]

sādhvācāreṇa sā jātā vivāhitā hi sā matā |
bhāryāpatyorhi sambandhaścāmṛtyuściraśobhanaḥ || 50 ||
[Analyze grammar]

ratisādhāraṇo naiṣastasmāddharmaḥ sanātanaḥ |
satimātrārthasambandhaḥ strīpuṃsornahi dhārmikaḥ || 51 ||
[Analyze grammar]

dāyabhāge'pi putro vai gaṇyate vaṃśabhāgavān |
putro na syāttadā putrī dāyabhāgādhikāriṇī || 52 ||
[Analyze grammar]

putraḥ putrī samau bodhyau dāyabhāge'tikāriṇau |
bahavo'pi sutā yasya putryo'pi ca tathāvidhāḥ || 53 ||
[Analyze grammar]

tasyāpi dāyabhāge syuḥ putrāḥ putryo'dhikāriṇaḥ |
samabhāgāḥ pradātavyā eṣa dharmaḥ sanātanaḥ || 54 ||
[Analyze grammar]

vivāhya dāyabhāgaṃ cā'dattvā sampreṣayanti ye |
kanyābhāgaprabhoktāraḥ patanti narake hi te || 55 ||
[Analyze grammar]

jīvitārthāya vikrīya kumāraṃ vā kumārikām |
bhuṃjate taddhanaṃ te tu bhuṃjate piśitaṃ tayoḥ || 56 ||
[Analyze grammar]

anyo'pyatha na vikreyo manuṣyaḥ kiṃ punaḥ prajāḥ |
vaśyāṃ kumārīṃ balato vikrīṇīyānna kaścana || 57 ||
[Analyze grammar]

dharmabuddhyā cārpayedvai jāmātre yautakānvitām |
mātuśca yautakaṃ yat syāt kumārībhāga eva saḥ || 58 ||
[Analyze grammar]

dauhitra eva tadrikthamaputrasya piturharet |
putradauhitrayoreva viśeṣo nāsti dharmataḥ || 59 ||
[Analyze grammar]

pitṛbhirbhrātṛbhiścāpi śvaśurairatha devaraiḥ |
pūjyā bhūṣayitavyā ca bahukalyāṇamipsubhiḥ || 60 ||
[Analyze grammar]

pūjyā lālayitavyāśca striyo nityaṃ gṛhasthitāḥ |
ramaṇyo yatra tuṣyanti vasanti tatra sampadaḥ || 61 ||
[Analyze grammar]

siddhayaḥ prativarṣanti sarvān kāmān dadatyapi |
yatra nāryo'vamanyante sarvāstatrā'phalāḥ kriyāḥ || 62 ||
[Analyze grammar]

naiva bhānti na vardhante vaṃśāḥ śriyā vivarjitāḥ |
strīhetukaḥ sadā śreṣṭho dharmo dyusatyalokadaḥ || 63 ||
[Analyze grammar]

utpādanamapatyasya jātasya paripālanam |
prītyartho lokayātrāyā yāpanaṃ strījane sthitam || 64 ||
[Analyze grammar]

nāsti yajñastādṛśo vai na śrāddhaṃ nopavāsanam |
dharmo yugalasauhārdasamo dyumokṣado'paraḥ || 65 ||
[Analyze grammar]

pitā rakṣati kaumāre bhartā rakṣati yauvane |
putrāśca sthavire pānti strīrakṣaivaṃ purātanī || 66 ||
[Analyze grammar]

śriya etāḥ striyo nāma satkāryā bhūmimicchatā |
pālitā'nugṛhitā ca strī śrīreva prakāśate || 67 ||
[Analyze grammar]

atha lakṣmi striyai deyo dāyabhāgo'pi sammataḥ |
putraputrīsamobhāgastaddhanaṃ yoṣitaḥ sadā || 68 ||
[Analyze grammar]

bhartrā tacca dhanaṃ dattaṃ yatheṣṭaṃ bhoktumarhati |
strīṇāṃ tatpatidāyādyaṃ hyupabhogaphalaṃ matam || 69 ||
[Analyze grammar]

ekasya bahubhāryatve brāhmaṇī sarvathottamā |
snānaṃ prasādhanaṃ bharturdantadhāvanamañjanam || 70 ||
[Analyze grammar]

havyaṃ kavyaṃ devapūjāṃ bhojanaṃ brāhmaṇī caret |
annaṃ pānaṃ ca mālyaṃ ca vāsāṃsyābharaṇāni ca || 71 ||
[Analyze grammar]

brāhmaṇyetāni dadyāt svabhartre sā hi garīyasī |
athavā cānukūlyaṃ tu yathā bhaveddhi yoṣitām || 72 ||
[Analyze grammar]

akleśena pramodena snehena cānuvṛttitaḥ |
tathā seveta viprā vā kṣatriyā vā'parāpi vā || 73 ||
[Analyze grammar]

patyurājñāṃ samagṛhya nānyathā tu kathaṃcana |
garbhaśuddhiśca vijñeyā guṇarūpanisargakaiḥ || 74 ||
[Analyze grammar]

apatyaṃ pratibimbaṃ vai piturmātuśca vā bhavet |
tatsvabhāvamapatyaṃ tadvijñeyaṃ śuddhavaṃśajam || 75 ||
[Analyze grammar]

tatra yatra pṛthagbhāvo garbhā'śuddhirhi sā matā |
niṣeke saṃkarībhāve vairupyaṃ bālake bhavet || 76 ||
[Analyze grammar]

sānnidhye'niṣṭavastūnāṃ sāṃkaryaṃ jāyate hṛdi |
bīje saṃkramate tacca garbhe tadbhāva udbhavet || 77 ||
[Analyze grammar]

garbhadānaṃ tato'dṛśye rahasye vidhnavarjite |
śāntaśabde śāntaloke śāntapaśvādibhāṣaṇe || 78 ||
[Analyze grammar]

suśāntasarvatattveṣu vidhātavyaṃ na cānyathā |
śuddhavaṃśaprasūtiḥ sā bhavedatra na saṃśayaḥ || 79 ||
[Analyze grammar]

anyaśabdasparśarūparasasvabhāvadūṣaṇam |
prakramate bījadāne pratimādarśanādapi || 80 ||
[Analyze grammar]

tasmāt patimukhaṃ dṛśyaṃ nānyad dṛśyaṃ tadā matam |
prasannahṛdayābhyāṃ ca bhāvyaṃ na tu krudhā ruṣā || 81 ||
[Analyze grammar]

na ca mālinyabhāvena bhāvyaṃ sugandhisaṃbhṛtā |
prasannamanasā bhāvyaṃ bhāvyaṃ sattvaguṇena ca || 82 ||
[Analyze grammar]

ekāgramanasā bhāvyaṃ dātrā dhātryā ca sarvathā |
sa vaṃśaḥ śuddha eva syāt smartavyaṃ netarat tadā || 83 ||
[Analyze grammar]

nārāyaṇo hariḥ kṛṣṇaḥ parameśaḥ parātparaḥ |
smartavyo dampatībhyāṃ vai bījadāne na cā'paraḥ || 84 ||
[Analyze grammar]

yatsmṛtistadguṇā bhāvāḥ prakramante prakṛtayaḥ |
tasmācchreṣṭhaḥ patirdevo devadevo janārdanaḥ || 85 ||
[Analyze grammar]

śṛṇu lakṣmi kathayāmi kathāṃ purātanīṃ śubhām |
pulastyo vedhasaḥ putro dadau dānaṃ yadā''rtavam || 86 ||
[Analyze grammar]

tadā prītiḥ pulastyasya bhāryā sasmāra rākṣasam |
nirṛtaṃ rāvaṇastena rakṣodharmā vyajāyata || 87 ||
[Analyze grammar]

yadā''rtave prasasmāra viṣṇuṃ nārāyaṇaṃ harim |
tadbhāvabhāvito jāto bhaktaḥ putro vibhīṣaṇaḥ || 88 ||
[Analyze grammar]

pārvatīśaṃkarau pūrve sasmaraturbalānvitam |
senāpatiṃ sutaṃ daityanāśakaṃ vijayapradam || 89 ||
[Analyze grammar]

skandastenā'bhavad vighnanāśārthaṃ gaṇapo'bhavat |
vairājastriguṇān smṛtvotpādayāmāsa vai trikam || 90 ||
[Analyze grammar]

brahmaviṣṇumaheśākhyaṃ yathā smṛtistathā janiḥ |
carau phale prasāde ca bīje cāśīrvacasyapi || 91 ||
[Analyze grammar]

yādṛk smaraṇaṃ rohedvai tādṛśī jāyate prajā |
yadbhāvanā bhaved bhaktiḥ phalaṃ tadbhāvabhāvitam || 92 ||
[Analyze grammar]

kalpavṛkṣe harermūrtau gurau patyau striyāṃ sati |
auṣadhe mantre tapasi yathā bhāvastathā phalam || 93 ||
[Analyze grammar]

vidyāyāmudyame yuddhe kṛṣau bhṛtyakriyāvidhau |
bhautikābhyudaye vege yādṛgyatnastathā phalam || 94 ||
[Analyze grammar]

nṛpe sādhau harau pitroḥ śreṣṭhini svāmini krame |
deve pitari santuṣṭe yathā kṛpā tathā phalam || 95 ||
[Analyze grammar]

śatrau niyāmake sarpe vipre śastriṇi tāpase |
kalahe rodhane nāśe yathā roṣastathā phalam || 96 ||
[Analyze grammar]

bhaktau yoge prārthanāyāṃ sevāyāṃ daivakarmasu |
śāstre bhogye dīrghakārye yathā śāntistathā phalam || 97 ||
[Analyze grammar]

dharme lagne mṛdhe dāne vacane vighnasāraṇe |
caurye mokṣe deśakāle yathā śaighryaṃ tathā phalam || 98 ||
[Analyze grammar]

kāvye nyāye copadeśe cājñāyāṃ cāntime kṣaṇe |
saṃhāre cāpadi prāraṃbhe yathādhīstayā phalam || 99 ||
[Analyze grammar]

kṣetre svarge striyāṃ śiṣye putre kārye hyupārjane |
mantre śāstre racanāyāṃ yathā bījaṃ tathā phalam || 100 ||
[Analyze grammar]

kīrtau ratau vṛṣe vaṃśe sukhe śrame ca bhojane |
kośe'tithau gṛhe svarge yathā bhāryā tathā phalam || 101 ||
[Analyze grammar]

tasmāllakṣmi sadā bhāryā pātivratyaparāyaṇā |
viśeṣato hi dharmāṇāṃ mūlaṃ bhavati sarvathā || 102 ||
[Analyze grammar]

puruṣārthā hi catvāraścopāyāḥ sādhanāni ca |
yātrāḥ sarvāḥ pravartante siddhyanti nijayoṣitā || 103 ||
[Analyze grammar]

kṣetraṃ vai sarvadharmāṇāṃ vāṭikā putrasampadām |
kalpalatā sukhānāṃ ca bhāryā bhavati mūlikā || 104 ||
[Analyze grammar]

mandurā sā mano'śvānāmāśrayā prāṇapakṣiṇām |
nauḥ sā saṃsāriṇāṃ patnī yānaṃ sā svargiṇāṃ tathā || 105 ||
[Analyze grammar]

yajñe vaṃśe sukhe duḥkhe puṇye mahotsave save |
gṛhe kārye dhane khyātāvardhāṃganā nijātmikā || 106 ||
[Analyze grammar]

paṭhanācchravaṇāllakṣmi tathā dharmasamāśrayāt |
bhuktirmuktirbhaveccāpi nāryā narasya sarvathā || 107 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne sarvadharmakarmaṇāṃ mūlaṃ vivāhitā patnīti jāṃghalāmakhasya kṣatriyasya kundadharmapatnyāḥ saradharme camatkāraḥ kanyādānayogyatā varayogyatā dāyabhāgayogyatā bījaśuddhirityādinirūpaṇanāmā pañcādhikaśatatamo'dhyāyaḥ || 105 ||
[Analyze grammar]