Chapter 104

śrīnārāyaṇīśrīruvāca |
gārhasthyaṃ dharmasāraṃ me prabrūhi parameśvara |
smṛddhimāpnoti kiṃ kṛtvā gṛhasthaḥ sutadāravān || 1 ||
[Analyze grammar]

kimavaśyaṃ prakartavyaṃ kiṃ kṛtvā ca kṛtaṃ bhavet |
yenā'nyat sarvakartavyasamāveśaḥ prajāyate || 2 ||
[Analyze grammar]

śrīpuruṣottama uvāca |
sādhavaḥ pitaro devā guravaśca maharṣayaḥ |
sādhvyo bhaktā arcanīyā ijyā nityaṃ yathādhanam || 3 ||
[Analyze grammar]

annapuṣpapraṇāmādyaistoṣaṇīyā hi sādhavaḥ |
sevayā cānuvṛttyā ca prasādanīyāḥ sādhavaḥ || 4 ||
[Analyze grammar]

jalārpaṇena cānnena payomūlaphalairdalaiḥ |
toṣaṇīyā hi pitaraḥ siddhānnaiḥ sadrasādibhiḥ || 5 ||
[Analyze grammar]

devārpaṇaṃ kārayecca kuryād devaprapūjanam |
makhaṃ kuryānnityamapi devān santoṣayet sadā || 6 ||
[Analyze grammar]

gurūṇāṃ sevanaṃ kuryādājñāṃ vaheta nityadā |
gurvarpaṇaṃ vidadhyācca mātre pitre samarpayet || 7 ||
[Analyze grammar]

vṛddhebhyaścā'rpayediṣṭaṃ praseveta mudā mude |
ṛṣibhyaśca dvijebhyaśca namaskuryāttathā'rpayet || 8 ||
[Analyze grammar]

sāmā'dhyāyaṃ paṭheccāpi vidyādānaṃ ca kārayet |
sādhvībhyaśca satībhyaśca dadyādannaṃ jalādikam || 9 ||
[Analyze grammar]

āśrayaṃ cāmbaraṃ dadyāt santoṣayennirāśrayām |
bhaktān sampūjayennityaṃ satsaṃgaṃ ca samācaret || 10 ||
[Analyze grammar]

mokṣamārgaṃ sādhayecca dharmaṃ sañcinuyāt sadā |
gṛhāgatā dehino vai yathā syuḥ sukhinastathā || 11 ||
[Analyze grammar]

pravartetā''śrayaṃ datvā copakṛtvā pratoṣayet |
harirnārāyaṇaścā'yaṃ hyabhyāgato gṛhāgataḥ || 12 ||
[Analyze grammar]

tatra nārāyaṇaścāste tuṣyatvayaṃ janārdanaḥ |
evaṃ svāgatamādadhyāt sarvaṃ brahmārpaṇaṃ bhavet || 13 ||
[Analyze grammar]

bhikṣukebhyaḥ pradadyācca gobhyo dadyāttathā gṛhī |
śvabhyo dadyāt tathā pārāvātebhyaścāpi cārpayet || 14 ||
[Analyze grammar]

yādobhyo'pi pradadyāccā'nāthebhyo'pi samarpayet |
niśācarebhyo bhūtebhyo baliṃ naktaṃ samarpayet || 15 ||
[Analyze grammar]

nāgasarpādijīvebhyo dadyāt kīṭebhya ityapi |
piṣṭaṃ kaṇān randhitaṃ ca ghāsaṃ patraṃ yathāyatham || 16 ||
[Analyze grammar]

ācāryasya pituḥ sādhoḥ sakhyurāptasya cātitheḥ |
idamasti gṛhe mahyamiti nityaṃ nivedayet || 17 ||
[Analyze grammar]

gṛhasthaḥ kamalākāntaśiṣṭāśī vai sadā bhavet |
patyuḥ sthāne sthitā patnī gṛhiṇī gṛharakṣiṇī || 18 ||
[Analyze grammar]

dharmarakṣākarī nityaṃ sarvadharmān nibhāvayet |
sadā tvaṃ kuru kalyāṇi dānaṃ mānaṃ prasevayet || 19 ||
[Analyze grammar]

āśīrvādādilābhena nārī nārāyaṇī bhavet |
naro nārāyaṇaḥ syād bhūloko golokatāṃ vrajet || 20 ||
[Analyze grammar]

etad gṛhāmṛtaṃ proktaṃ yat kṛtvā ṛddhimān bhavet |
dharmasāramimaṃ śrutvā yaḥ kuryāt sa divaṃ labhet || 21 ||
[Analyze grammar]

śṛṇu saṃkṣepataścā'nyaddhṛdayasthaṃ vibhāvaya |
ahaṃ patisvarūpo'smi nārāyaṇaḥ sadā gṛhe || 22 ||
[Analyze grammar]

tvaṃ śrīrnārīsvarūpā'si patnī gṛhigṛhe sadā |
pārṣadā me sutakanyāsvarūpāḥ santi vai gṛhe || 23 ||
[Analyze grammar]

mahīmānā atithayaḥ sādhavo'bhyāgatāśca me |
ityevaṃ divyadṛṣṭyā vai kuṭumbaṃ vartate gṛhe || 24 ||
[Analyze grammar]

kṛṣṇārpaṇasvarūpeṇa sevate sma parasparam |
bhaktyārpaṇaṃ sarvamasya kartavyaṃ nā'vaśiṣyate || 25 ||
[Analyze grammar]

ta eva viṣayāstāni khāni bhogāsta eva ca |
kalpitā mayi kṛṣṇe syurmokṣadā nirguṇāḥ priye || 26 ||
[Analyze grammar]

dharmasāraḥ kathito'yaṃ gṛhāmṛtaphalaḥ śubhaḥ |
ṛddhidaḥ puṇyado bandhavarjito mokṣadaḥ sukhaḥ || 27 ||
[Analyze grammar]

sahasrajanmapuṇyasya jñāyate tattvamīdṛśam |
apātrasya viṣayiṇaḥ kalmaṣiṇastu durgraham || 28 ||
[Analyze grammar]

dehendriyamanobuddhicetanaiḥ sarvathā priye |
tarpaṇīyāḥ sādhavaśca tṛpto bhavāmi tatsthitaḥ || 29 ||
[Analyze grammar]

gṛhavāṭīkṣetravājigajagomahiṣīdhanaiḥ |
toṣaṇīyāḥ sādhavaśca jalāmbarānnasevanaiḥ || 30 ||
[Analyze grammar]

yajasva vividhairyajñairbahvannaiḥ svarṇadakṣiṇaiḥ |
sādhūn sevaya sādhvīśca pitṝn devāṃśca tarpaya || 31 ||
[Analyze grammar]

brahmapriyā rañjayasva vṛddhāṃśca parisevaya |
āśritān śubhasatkārairarcayasva yathārhataḥ || 35 ||
[Analyze grammar]

śṛṇu lakṣmyabhavat pūrvaṃ naraśāyo hi taskaraḥ |
patnīputrasametaśca sadā stainyopajīvanaḥ || 33 ||
[Analyze grammar]

siṃhāraṇye vasannityaṃ vasatau yāti vai niśi |
prasahya dhanisaudhādīn bhittvā nītvā dhanāni ca || 34 ||
[Analyze grammar]

annādīni cāmbarāṇi nītvā yāti vane punaḥ |
evaṃ satataṃ cauryeṇa nirvahatyatha tadvane || 35 ||
[Analyze grammar]

sādhuḥ śrīcakrabhāsākhyo vaiṣṇavo viharan pathi |
mimela taṃ naraśāyaṃ cauraṃ sarovarāntike || 36 ||
[Analyze grammar]

cauro vijñāya taṃ sādhuṃ nirdoṣaṃ nirbhayaṃ śubham |
gatvā'ntikaṃ nanāmā'tha niṣasāda puraḥ kṣaṇam || 37 ||
[Analyze grammar]

sādhuḥ pītvā jalaṃ tasmai dadau vāri prasādajam |
cauro'pi mānayan bhāgyaṃ tūrṇaṃ papau jalāmṛtam || 38 ||
[Analyze grammar]

pānamātreṇa hṛdayaṃ vyāvartata śubhāśrayam |
pūtaṃ ca mānasaṃ varṣma vivekaḥ samapadyata || 39 ||
[Analyze grammar]

papraccha taṃ pāvanaṃ vai matvā śāntaṃ sukhapradam |
pāpanāśaḥ kathaṃ syādvai sādho darśaya satpatham || 40 ||
[Analyze grammar]

śrutvā śrīcakrabhāsastaṃ prāha cauryaṃ hi laukikam |
vihāya kuru cauryaṃ tvaṃ guṇānāṃ ca satāṃ hareḥ || 41 ||
[Analyze grammar]

sevāṃ sādhorharernityaṃ samācara sadāśayaḥ |
śrutvā papraccha sādhuṃ taṃ naraśāyaḥ punaḥ punaḥ || 42 ||
[Analyze grammar]

kayā rītyā mayā sevā kartavyā vada me mune |
sādhuḥ prāha vane vanyaiḥ prasevaya samarpitaiḥ || 43 ||
[Analyze grammar]

phalamūlakṛtāhāro bhava cauryaṃ parityaja |
harermūrtiṃ cārcayā'tra bhajanaṃ satataṃ kuru || 44 ||
[Analyze grammar]

sarvapāpāni naśyeyuścaivaṃ prasevanāddhareḥ |
evamuktaḥ sa vai stenaḥ sādhumāha saro'ntike || 45 ||
[Analyze grammar]

vidyate mama vāso'tra sādho cāgaccha madgṛham |
sevayiṣye bhavantaṃ ca hariṃ tvayā pradarśitam || 46 ||
[Analyze grammar]

nāśameṣyanti pāpāni syuḥ strīputrāśca pāvanāḥ |
śrutvaivaṃ śrīcakrabhāso japannārāyaṇaṃ harim || 47 ||
[Analyze grammar]

savalkalo jaṭāyukto mālāṃ kare dadhanmudā |
vṛddho yayau ttenakuṭīṃ tatstrīputrādisaṃyutām || 48 ||
[Analyze grammar]

dattāsane niṣasāda bhajan kṛṣṇanarāyaṇam |
stenastrīputraputryādyā matvā vṛddhaṃ piturgurum || 49 ||
[Analyze grammar]

jalapātraṃ satphalāni pakvā''mrāṇi ca tatkṣaṇam |
nyadhuḥ sādhoḥ samīpe ca bhuṃkṣveti jagadustataḥ || 50 ||
[Analyze grammar]

pādasaṃvāhanaṃ cakruścānanditā mudā muhuḥ |
sādhuḥ phalāni bubhuje papau vāri ca śītalam || 51 ||
[Analyze grammar]

bhuṃjan dadāti madhye ca madhye tebhyaḥ punaḥ punaḥ |
strīputrādyāśca dattāni matvā prasādamuttamam || 52 ||
[Analyze grammar]

bhakṣayanti sumiṣṭāni steno'pi bubhuje tataḥ |
sādhurnārāyaṇaṃ māṃ ca smṛtvā nivedya viṣṇave || 53 ||
[Analyze grammar]

bhuṃkte dadāti caitebhyaste bhuktvā cāghavarjitāḥ |
tūrṇaṃ jātāḥ pāvanāśca sevayā sparśanena ca || 54 ||
[Analyze grammar]

hṛdayāni parāvartitāni teṣāṃ sato'ntike |
procuḥ sarve bhagavannaḥ kalyāṇaṃ vai yathā bhavet || 55 ||
[Analyze grammar]

tathā kuru vane tvatra vasan kuṭyāṃ ca no gṛhe |
sādhustathā'stviti prāha covāsa śāntimāṃściram || 56 ||
[Analyze grammar]

śikṣayāmāsa bhajanaṃ nityaṃ nārāyaṇasya me |
rātrau militvā bhajanaṃ kīrtayanti svarā'nvitāḥ || 57 ||
[Analyze grammar]

harekṛṣṇa harekṛṣṇa kṛṣṇanārāyaṇa prabho |
anādiśrīkṛṣṇanārāyaṇa lakṣmīpate vibho || 58 ||
[Analyze grammar]

ityevaṃ kīrtayitvā māṃ svapanti nityameva te |
prātarutthāya bhajanaṃ sādhunā saha te tathā || 59 ||
[Analyze grammar]

kṛtvā yānti saraḥ snānti namaskurvanti bhāskaram |
sādhuṃ natvā mālikāṃ ca pañca japtvā vanaṃ prati || 60 ||
[Analyze grammar]

yānti phalāni cāhartuṃ samāyānti kuṭīṃ nijām |
madhyāhne phalakandādi bharjayitvā tu vahninā || 61 ||
[Analyze grammar]

pradatvā gurave tasmai nivedya haraye tu me |
bhojayitvā bhuṃjate te kurvanti bhajanaṃ tataḥ || 62 ||
[Analyze grammar]

sāyaṃ kurvanti bhajanaṃ sevante ca kathāmṛtam |
putrāḥ sādhuṃ prasevante strī sevate divāniśam || 63 ||
[Analyze grammar]

steno'pi sevate'bhīkṣṇaṃ sādhuṃ nārāyaṇātmakam |
strīputrādyaiḥ kṛtaṃ yadyat karma stainyātmakaṃ purā || 64 ||
[Analyze grammar]

sarvaṃ niveditaṃ tasmai dhanaṃ ca yatsamāhṛtam |
sādhuḥ sarvaṃ samagṛhya yayau gokarṇatīrthake || 65 ||
[Analyze grammar]

cikṣepa jalamadhye śrīkṛṣṇārpaṇaṃ vadanniti |
tāvaddravyaṃ samastaṃ tacchrīlakṣmīrūpakanyakā || 66 ||
[Analyze grammar]

bhūtvā sādhuṃ prāha sādhvī tvayā kṛṣṇāya cārpitā |
pāvanī khalu jātā'smi mālinyaṃ vigataṃ mama || 67 ||
[Analyze grammar]

atha caurāṃstathā pūrvadhanino'pi ca pāvanān |
kṛtvā nayāmi kṛṣṇasya caraṇau kṛtyameva me || 68 ||
[Analyze grammar]

ityuktvā''dāya sādhuṃ taṃ yayau lakṣmīśca tadvanam |
yatra te stenakarmāṇaścā'bhavan te'pi vismitāḥ || 69 ||
[Analyze grammar]

papracchuḥ kanyakāṃ dṛṣṭvā sādhuṃ sādhurjagāda tān |
lakṣmīḥ sākṣāt samāyātā netuṃ nārāyaṇagṛham || 70 ||
[Analyze grammar]

sajjā bhavantu tūrṇaṃ vai yāntu nārāyaṇālayam |
śrutvā modaṃ gatāḥ sajjā bhūtvā natvā guruṃ ca tam || 71 ||
[Analyze grammar]

āgate divyaśobhāḍhye vimāne te samāruhan |
yayuḥ sādhorājñayā te pārṣadaiḥ saha sevinaḥ || 72 ||
[Analyze grammar]

vaikuṇṭhaṃ bhagavaddhāma lakṣmi sādhoḥ samāgamāt |
atha kanyā śrīsvarūpā sādhunā saha cāgragā || 73 ||
[Analyze grammar]

yayau taddhanināṃ saudhān dṛṣṭvā ca dhanino'pi te |
sasaṃbhramāḥ svāgatādyairapūjayan sureśvarīm || 74 ||
[Analyze grammar]

sādhuṃ prāpūjayansarve jñātvā vṛttāntamāditaḥ |
caurahastagatā lakṣmīḥ sādhuhastena cārpitā || 75 ||
[Analyze grammar]

śrīkṛṣṇe divyatāṃ prāptā prāptā kalyāṇahetave |
vijñāya te'pi sādhoścā''jñayā sajjāstato'bhavan || 76 ||
[Analyze grammar]

mokṣārthaṃ tāvadevā'pi vimānaṃ bhāsvaraṃ mahat |
samāyātaṃ tvambarādvai pārṣadādisamanvitam || 77 ||
[Analyze grammar]

lakṣmīḥ sarvān dhanapāṃśca samādāya vimānake |
sthitvā nītvā yayau natvā sādhuṃ śrīcakrabhāsuram || 78 ||
[Analyze grammar]

golokaṃ dhāma kṛṣṇasya patyurhareḥ parātparam |
evaṃ lakṣmi tvayā pūrvaṃ stenaśreṣṭhikuṭumbinām || 79 ||
[Analyze grammar]

sādhoryogena kalyāṇaṃ kṛtaṃ yojitayā harau |
sādhuḥ śrīcakrabhāsaśca yayau lomaśabhūmikām || 80 ||
[Analyze grammar]

tīrthārthaṃ ca samādhau vai niṣasāda yugād yugam |
dadarśa mokṣamārgaṃ sa yathā yānti janāstvitaḥ || 81 ||
[Analyze grammar]

bhittvā svargaṃ maharlokaṃ janaṃ tapaśca satyakam |
jalopari ca vaikuṇṭhaṃ yānti tatra hare puraḥ || 82 ||
[Analyze grammar]

viśrāntiṃ labhate saukhyaṃ svāgatādyaiḥ sumānanam |
haryājñayā tato yānti paravaikuṇṭhamuttamam || 83 ||
[Analyze grammar]

golokaṃ vā'kṣaraṃ dhāma paraṃdhāma prayānti ca |
divyadehā divyadharmā vidvāṃso ghanamūrtayaḥ || 84 ||
[Analyze grammar]

praṇavākhyaṃ kiraṇāḍhyaṃ vimānaṃ sampraviśya te |
brahmalokaṃ pravartante brahmakāyā hyanimnagāḥ || 85 ||
[Analyze grammar]

ānandaṃ brahmaṇaḥ prāpya cā'mṛtatvāya te gatāḥ |
brahmaloke'kṣaraṃ brahma sarveṣāṃ vai purohitam || 86 ||
[Analyze grammar]

mukteśvaraṃ puraskṛtyā''nandāmṛtaṃ prabhuṃjate |
ādhipatyaṃ vinā tulyā bhavanti paramātmanā || 87 ||
[Analyze grammar]

rūpaprabhāvavijayaiśvaryasāmarthyasadṛśāḥ |
evaṃvidhaṃ tvamṛtākhyaṃ brahmasatraṃ sanātanam || 88 ||
[Analyze grammar]

apunarmārakaṃ sthānaṃ cāmṛtatvāya te gatāḥ |
brahmaṇyabhyāsino yuktāḥ parāṃ kāṣṭhāmupāsate || 89 ||
[Analyze grammar]

vītarāgā jitaprāṇā nirmohāḥ satyavādinaḥ |
śāntāḥ prāṇihitātmāno dayāvanto jitendriyāḥ || 90 ||
[Analyze grammar]

niḥsaṃgā śucayo bhaktā brahmasāyujyagāsmṛtāḥ |
akāmayuktairye vīrāstapobhirdagdhakilbiṣāḥ || 91 ||
[Analyze grammar]

teṣāmabhraṃśino lokā aprameyasukhāḥ śubhāḥ |
etad brahmapadaṃ divyaṃ paraṃ me vyomni bhāsvaram || 92 ||
[Analyze grammar]

etad gatvā na śocanti hyamarā brahmaṇā saha |
yasmādeṣāṃ paraṃ vīryaṃ paramāyuḥ paraṃ tapaḥ || 93 ||
[Analyze grammar]

parā śaktiḥ paro dharmaḥ parā vidyā parā dhṛtiḥ |
paraṃ brahma paraṃ jñānaṃ paramaiśvaryamityapi || 94 ||
[Analyze grammar]

tasmāt parataraṃ bhūtaṃ brahmaṇo yanna vidyate |
pare sthito hyeṣa paraḥ sarvārtheṣu tataḥ param || 95 ||
[Analyze grammar]

parabrahma paro bhūtvā prapaśyati na cānyathā |
evaṃ jñānapratiṣṭhatvāt sarvaṃ brahmā'nupaśyati || 96 ||
[Analyze grammar]

ākṣarakṣetramuktānāmākṣare dhāmni saṃsthitiḥ |
śāśvatī vidyate lakṣmi śāśvatānandadohinī || 97 ||
[Analyze grammar]

satāṃ samāgamo nityaṃ brahmalokapradāyakaḥ |
sarvapāpaharo lakṣmi lakṣmyāḥ śuddhikarastathā || 98 ||
[Analyze grammar]

ātmaśuddhikaraścāpi mokṣaśuddhikarastathā |
jñānaśuddhikaraścopāsanāśuddhikarastathā || 99 ||
[Analyze grammar]

nirvāṇaśuddhidaścāpi śubhaḥ sārvajñyaśodhakaḥ |
ātmaniveditāsaṃśodhakaḥ sevāpraśodhakaḥ || 100 ||
[Analyze grammar]

doṣasaṃśodhakaścāpi māyāsaṃśodhakastathā |
vivekaśodhakaścāpi bandhanānāṃ ca śodhakaḥ || 101 ||
[Analyze grammar]

etadamṛtasatraṃ vai brahmasatramadhītya ha |
jāyate brahmadharmā'tra paratrāpi na saṃśayaḥ || 102 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne gārhasthyadharmasāre naraśāyataskarasya śrīcakrabhāsasādhuyogena divyalakṣmīdvārā muktiḥ pūrvadhanināmapi muktirbrahmasatravijñānaṃ cetyādinirūpaṇanāmā caturadhikaśatatamo'dhyāyaḥ || 104 ||
[Analyze grammar]