Chapter 79

śrīnārāyaṇīśrīruvāca |
sādhvī pativratā kṛṣṇa gārhasthye vartate yadi |
ṛddhimāpnoti kiṃ kṛtvā vada me kānta saukhyakṛt || 1 ||
[Analyze grammar]

śrīpuruṣottama uvāca |
sādhvyā gārhasthyamāśritya śrīkṛṣṇapuruṣottamaḥ |
ārādhanīyaḥ satataṃ sa vai ṛddhiṃ dadāti ha || 2 ||
[Analyze grammar]

ṛṣayaḥ pitaro devā manuṣyāḥ sādhavo dvijāḥ |
vṛddhāścā'tithayaḥ sādhvyaḥ pūjanīyā viśeṣataḥ || 3 ||
[Analyze grammar]

pūjāyajñena devāṃśca sadātithyena mānavān |
ṛṣīn pitṛn śrāddhapiṇḍaiścāgnau hutvā samarcayet || 4 ||
[Analyze grammar]

payomūlaphalaiḥ śrāddhaṃ kuryācca bhojayet sataḥ |
dvijebhyo'pyarcayed dravyaṃ bhojanaṃ cāmbarādikam || 5 ||
[Analyze grammar]

atithīn bhojayet sādhvī sādhvīḥ satīśca bhojayet |
ṛtvijaṃ snātakaṃ sādhuṃ guruṃ śvaśuramityapi || 6 ||
[Analyze grammar]

svāminaṃ ca patiṃ miṣṭairmadhuparkaiḥ samarcayet |
śvabhyaśca śvapacebhyaśca vayobhyaścā''vaped bhuvi || 7 ||
[Analyze grammar]

dadyānnārāyaṇāyeha svāhetivacanānvitā |
gobhyo dadyād ghāsapūlān bālebhyaḥ śarkarādikam || 8 ||
[Analyze grammar]

jalaṃ dadyācca vṛkṣebhyo matsyebhyaścaṇakādikān |
kaṇān pakṣigaṇebhyaśca prasādaṃ pārśvavartine || 9 ||
[Analyze grammar]

dadyādevaṃ yathāśakti kathāśravaṇamācaret |
mālāvartanamevā'pi kuryācca devadarśanam || 10 ||
[Analyze grammar]

jaladānaṃ prakuryācca snānadhyānārcanādikam |
nāmasaṃkīrtanaṃ kuryād bhajanaṃ smaraṇaṃ tathā || 11 ||
[Analyze grammar]

dehaśuddhiṃ dharmaśuddhiṃ manaḥśuddhiṃ samācaret |
satāṃ sevāṃ satīsevāṃ kuryācchaktyā yathāyatham || 12 ||
[Analyze grammar]

sumanodhūpadīpānāṃ dānaṃ dadyād yathāvidhi |
somāṃśā oṣadhayaśca sadā'mṛtasamanvitāḥ || 13 ||
[Analyze grammar]

viṣaṃ tāpodbhavaṃ cograṃ haranti puṣpajātayaḥ |
amṛtaṃ manasaḥ prītiṃ sadyastṛptiṃ dadatyapi || 14 ||
[Analyze grammar]

viṣaṃ haranti puṣpāṇi sugandhena hi dehinām |
hlādayanti mano lakṣmīṃ kurvanti sumanāṃsi vai || 15 ||
[Analyze grammar]

puṣpaistuṣyanti devādyāstuṣṭāḥ puṣṭiṃ dadatyapi |
iṣṭagandhāni devānāṃ puṣpāṇīti vibhāvaya || 16 ||
[Analyze grammar]

akaṃṭakānāṃ śvetāni deveṣṭāni sumāni vai |
jalīyapadmamālyāni yakṣagandharvabhoginām || 17 ||
[Analyze grammar]

kaṭukaṇṭakaraktāni puṣpāṇyabhicarārthinām |
tīkṣṇavīryāṇi bhūtānāṃ kṛṣṇāni kaṇṭakāni ca || 8 ||
[Analyze grammar]

manonayananandāni mānuṣāṇāṃ priyāṇi vai |
aśuddhabhūmipuṣpāṇi varjyāni sarvathā priye || 19 ||
[Analyze grammar]

gandhena devāstuṣyanti darśanād yakṣarākṣasāḥ |
nāgāḥ samupabhogena tribhireva tu mānuṣāḥ || 20 ||
[Analyze grammar]

sadyo devān prīṇayanti gandhāḥ pauṣpāśca cāndanāḥ |
prītāśca bhāvayantyetān martyān siddhīśca sampadaḥ || 21 ||
[Analyze grammar]

dhūpo niryāsarūpo vai gugguluḥ pravaro mataḥ |
devāstuṣyanti dhūpena gārhasthye sampadāṃ pradāḥ || 22 ||
[Analyze grammar]

aguruḥ śreṣṭha evāpi yakṣarākṣasabhoginām |
daityānāṃ kṛtrimā dhūpāḥ sallakīyāśca tadvidhāḥ || 23 ||
[Analyze grammar]

haridrāyā dhūpadānairbhūtāstṛptāḥ prayānti ca |
sarjarasādidhūpāśca mānaveṣṭā bhavanti vai || 24 ||
[Analyze grammar]

dīpadānaṃ sadā tejovardhanaṃ jāyate priyam |
andhaṃ tamaśca tāmisraṃ dakṣiṇāyanameva ca || 21 ||
[Analyze grammar]

parābhāvyottaramārgaṃ dīpo dadāti cārṣitaḥ |
dīpastūrdhvagaterdātā tamonāśasya bhaiṣajam || 26 ||
[Analyze grammar]

dīpadānena vai devāḥ prabhāvantaḥ prakāśakāḥ |
tejasvinaḥ svargaloke jātā dīpaṃ tato'rpayet || 27 ||
[Analyze grammar]

ālokadānāccakṣuṣmān buddhiprakāśavān bhavet |
dīpahartā bhavedandhastamogatiḥ prabhākṣayaḥ || 28 ||
[Analyze grammar]

haviṣā cauṣadhīnāṃ ca rasairniryāsakaistathā |
pūrṇacandrapratīkāśā dīpadāḥ saṃbhavanti vai || 29 ||
[Analyze grammar]

yāvadakṣinimeṣāṇi jvalanti tāvatīḥ samāḥ |
dṛṣṭimān rūpavān śaktimān pradīpaprado bhavet || 30 ||
[Analyze grammar]

tasmād dīpāḥ pradātavyāḥ sādhvyā gārhasthyalagnayā |
tapaścāpi prakartavyamuttarāyuṣi sarvathā || 31 ||
[Analyze grammar]

yena vai tapasā brahmā'kṣaradhāmagatirbhavet |
śṛṇu lakṣmi kathayāmi sādhvīdharmamanuttamam || 32 ||
[Analyze grammar]

yat kṛtvā mokṣamāgacchet pūrvakalpakathānakam |
pūrvakalpe'bhavattvādyo manurnāmnā hariprathaḥ || 33 ||
[Analyze grammar]

tasya brahmaprathā patnī sādhvīdīkṣānvitā'bhavat |
kaṇḍāyanamaharṣervai putrī brahmaparāyaṇā || 34 ||
[Analyze grammar]

kaṇḍāyanagṛhe sā ca mānasī saṃvyajāyata |
jñānapūrṇā tapaḥpūrṇā manovikāravarjitā || 35 ||
[Analyze grammar]

yuvatī vanavāsā ca sādhvīdīkṣāṃ piturgṛhe |
jagrāha brahmacaryasthā yatinī sā'bhavad gṛhe || 36 ||
[Analyze grammar]

akṣatadehā cā'spṛṣṭā nareṇa kenaciddhi sā |
vane vai vaiṣṇave sādhvī candrojjvalā nadītaṭe || 37 ||
[Analyze grammar]

snātuṃ pitrā samaṃ yātā snātā''rdravastradhāriṇī |
puṣṭā yuvatī śīlasthā tyāgadharmā'nvitā'pi sā || 38 ||
[Analyze grammar]

dṛṣṭā vyomnā hi manunā hariprathena gacchatā |
brāhmī brahmatapobhābhirvyāptā manoharā śubhā || 39 ||
[Analyze grammar]

devī divyā yathāyogyā gṛhaśobhākarī satī |
tejasā vyāptadehā ca sūryakāntyatikāntikā || 40 ||
[Analyze grammar]

sarvaśrīsaṃbhṛtā savaiśvaryalakṣmīnivāsinī |
sarvanārāyaṇīstrīṣu mūrddhanyā rūpabhādibhiḥ || 41 ||
[Analyze grammar]

vilokyaiva vicāryaiva nadītīre drutaṃ nṛpaḥ |
avātarad vimānādvai tamṛṣiṃ prāṇamanmudā || 42 ||
[Analyze grammar]

pitṛvat pūjayāmāsa dadau paricayaṃ nijam |
śrutvā kāṇḍāyanarṣiśca jaharṣā''dya manuṃ tadā || 43 ||
[Analyze grammar]

rājānaṃ vaidhasaṃ putraṃ dṛṣṭvā pratipupūja tam |
kanyā'pi tūrṇamāgatya manoḥ satkāramācarat || 44 ||
[Analyze grammar]

mithaśca kuśalaṃ pṛṣṭvā praśaśaṃsurhi darśanam |
manuśca brāhmaṇaṃ natvā maunaṃ kṣaṇaṃ sthiro'bhavat || 45 ||
[Analyze grammar]

ṛṣiścovāca tūrṇaṃ vai mano kiṃ karavāṇi te |
manuḥ prāha hṛdaye me vāñcchā yā vartate guro || 46 ||
[Analyze grammar]

yadi śakto bhavasyatra tāṃ pūrayitumarhasi |
ṛṣirdhyānena nitarāṃ vijñāya mānasaṃ manoḥ || 47 ||
[Analyze grammar]

putrī papraccha sādhvīṃ tāṃ tyāginīṃ dānahetave |
vada putri manustu tvāṃ samīhate karomi kim || 48 ||
[Analyze grammar]

putrī prāha same dharmo pitrādeśo yathā bhavet |
śīlaṃ me rocate śaśvat sādhvīdharmaṃ yato gatā || 49 ||
[Analyze grammar]

tathāpi pitṛvaśagā kanyā pitṛvacaścaret |
pitṛvacanamāsādya patyadhīnā hi kanyakāḥ || 50 ||
[Analyze grammar]

satyaḥ sādhvyo bhavantyeva vadhvastāśca pativratāḥ |
yatheṣṭaṃ cara cātrā'rthe prasannā'smi nideśane || 51 ||
[Analyze grammar]

kāṇḍāyanaḥ prasanno'bhūd dadau manave putrikām |
mānyo'bhavat trilokeṣu manoḥ sambandhayogataḥ || 52 ||
[Analyze grammar]

brahmaprathāṃ vivāhyaiva ninye manurnijālayam |
brahmaprathāyai trailokye dadau rājyanirīkṣaṇam || 53 ||
[Analyze grammar]

manuvanmanupatnī sā rājyaṃ cakāra cottamam |
gṛhasaṃskāravaśagā sadā'sevata vai sataḥ || 54 ||
[Analyze grammar]

sādhvīrasevatā'pyeṣā jagrāhā''śīrvacāṃsi ca |
manoḥ kāle cakāraiṣā yajñān sarvavidhān satī || 55 ||
[Analyze grammar]

dānavratāni śreṣṭhāni puṇyāni vividhāni ca |
sarvasatkārakarmāṇi śobhanāni cakāra sā || 56 ||
[Analyze grammar]

sādhusādhvīsevanaṃ sā maharṣisevanaṃ tathā |
tyāginītāpasīsevāṃ tapasvisevanaṃ vyadhāt || 57 ||
[Analyze grammar]

manoścādhikārapūrṇe samaye manunā saha |
yayau sādhvī vimānena dhāmā'kṣaraṃ harermama || 58 ||
[Analyze grammar]

tatra pṛṣṭā mayā sādhvī satkṛtā muktakoṭibhiḥ |
kena puṇyenā'kṣaraṃ tvaṃ cā''yātā vada sundari || 59 ||
[Analyze grammar]

sā ca prāha mahābhaktā sātvatī sādhusevikā |
bhagavan kānta kānteśa pūjayāmi nanāmi ca || 60 ||
[Analyze grammar]

sarvajño'si hare kṛṣṇa tathāpyājñākarī tvaham |
yathāniyuktā kāntena svāminā paramātmanā || 61 ||
[Analyze grammar]

bhavatā hi tathā sarvaṃ nivedayāmi me śṛṇu |
śatasahasrasauvarṇamudrādānaṃ dvijātaye || 62 ||
[Analyze grammar]

adadāṃ ratnadānāni rūpyakārbudakārpaṇam |
brāhmaṃ vrataṃ cā'karavaṃ nehā'gāṃ tatphalādaham || 63 ||
[Analyze grammar]

yajñān pañcadaśarātrān daśaikarātrānadhvarān |
jyotiṣṭomaśataṃ cakre'pīha nā'gāṃ hi tatphalāt || 64 ||
[Analyze grammar]

gaṃgātaṭe śatavarṣaṃ tapastaptvā sudāruṇam |
adadāmaśvalakṣaṃ ca nā'hamāgāṃ hi tatphalam || 65 ||
[Analyze grammar]

daśā'yutāśvān viṃśatyayutagāśca payasvinīḥ |
nārīpuramadāṃ dāne nā'hamāgāṃ hi tatphalāt || 66 ||
[Analyze grammar]

svarṇacandrānvitakanyāsahasramadadāṃ tathā |
sarvabhūṣābhūṣitastrīṣaṣṭisahasrakāṇyapi || 67 ||
[Analyze grammar]

daśārbudānyadadāṃ gāḥ savatsā gosaveṣu ca |
svarṇakāṃsyādiyuktāśca nā'hamāgāṃ hi tatphalāt || 68 ||
[Analyze grammar]

āptoryāmeṣu niyataṃ godaśakaṃ dvijāyate |
prā'dāṃ lakṣaṃ daśaguṇaṃ gavāṃ nā'gāṃ hi tatphalāt || 69 ||
[Analyze grammar]

daśā'yutāśvānadadāṃ bāhlijātān manoramān |
hemamālāpallahāḍhyān nā'hamāgāṃ hi tatphalāt || 70 ||
[Analyze grammar]

aṣṭādaśakoṭihemamudrā prādāṃ tathā'nvaham |
ekaikasmin kratau cāpi nāhamāgāṃ hi tatphalāt || 71 ||
[Analyze grammar]

vājināṃ śyāmakarṇānāṃ haritānāṃ pareśvara |
prā'dāṃ hemasrajāṃ kṛṣṇā koṭīrdaśa ca pañca ca || 72 ||
[Analyze grammar]

padmino'nyān sahasrāṇi prāṃśūn mahāśarīriṇaḥ |
dīrghadantān svarṇabhūṣān prā'dāṃ daśa ca pañca ca || 73 ||
[Analyze grammar]

kāñcanāṃgarathān svalaṃkṛtān daśāyutāni ca |
vājiyuktān svarṇabhūṣābhūṣitānadadāṃ makhe || 74 ||
[Analyze grammar]

dakṣiṇāṃ'vayavāṃścāpi vedoditān tathā parān |
vājapeyeṣu daśasu prā'dāṃ cāṃgasamanvitām || 75 ||
[Analyze grammar]

niṣkakaṇṭhān mahādāsān dāsīśca dakṣiṇāstathā |
rājasūyadaśake vai prā'dāṃ nā'gāṃ hi tatphalāt || 76 ||
[Analyze grammar]

srotaśca brahmaputrāyāśchanno'bhūd dakṣiṇādibhiḥ |
svarṇadānai ratnadānairnāgāmatra hi tatphalāt || 77 ||
[Analyze grammar]

grāmā'rbudaṃ ca viprebhyaḥ saptadvīpeṣu cā'dadam |
śamyākṣepairayajaṃ ca sādyaskaniyutaiḥ surān || 78 ||
[Analyze grammar]

trayodaśadvādaśāhaiḥ pauṇḍarīke kratau tvaham |
tathāpi tajjapuṣpaiśca nā'hamatra samāgatā || 79 ||
[Analyze grammar]

kakudmyaṣṭasahasrāṇi dvijebhyaścā'dadāṃ kratau |
śvetāṃśca vṛṣabhān śvetā gāśca svarṇavibhūṣitāḥ || 80 ||
[Analyze grammar]

hiraṇyaratnanicayānadadāṃ mauktikadrumān |
sadhānyasasyavāṭīśca khaṇḍadānaṃ tathā'dadām || 81 ||
[Analyze grammar]

ekādaśāhairayajaṃ dvādaśāhaiḥ punaḥ punaḥ |
sadakṣiṇairaśvamedhaiḥ ṣoḍaśārkāyaṇaistathā || 82 ||
[Analyze grammar]

yojanānāṃ śataṃ dīrghamaraṇyaṃ parvatānvitam |
niṣkaikakaṇṭhapratyagraṃ mahodyānāni cā'dadam || 83 ||
[Analyze grammar]

tathāpi tajjapuṇyaiśca nā'hamatra samāgatā |
vratāni cā'karavaṃ ca nittyanaimittikānyapi || 84 ||
[Analyze grammar]

triṃśadagnīnayajaṃ cā'ṣṭābhistathā ca somakaiḥ |
sarvamedhairnaramedhaiḥ saptabhirdaśabhistathā || 85 ||
[Analyze grammar]

aṣṭottaraśataviśvajidbhistathā'jamedhakaiḥ |
na cāpi teṣāṃ puṇyaiśca bhagavanniha cā'gamam || 86 ||
[Analyze grammar]

gaṃgāyāṃ brahmaputrāyāṃ ceravatyāṃ tathā punaḥ |
menakāṃgāmahānadyāṃ bālakṛṣṇasarasyapi || 87 ||
[Analyze grammar]

śvetavārdhau śītavārdhau nārāyaṇyāṃ tathā punaḥ |
tapastaptavatī cā'haṃ sādhusevāparāyaṇā || 88 ||
[Analyze grammar]

tatra tatra sevitā vai sādhavaḥ kṛṣṇabhūṣaṇāḥ |
sādhvyaśca sevitā santoṣitāḥ sarvapradānakaiḥ || 89 ||
[Analyze grammar]

bhojitāḥ pūjitā dṛṣṭāḥ spṛṣṭā deheṣu marditāḥ |
saṃvāhitāḥ pādayośca natāśca paricāritāḥ || 90 ||
[Analyze grammar]

hare kṛṣṇa hare viṣṇo kṛṣṇanārāyaṇa prabho |
anādiśrīkṛṣṇanārāyaṇa śrīpuruṣottama || 91 ||
[Analyze grammar]

evaṃ kīrtanagātāraḥ santaḥ sādhvyo hyanusṛtāḥ |
sādhavo me tatastuṣṭāḥ sādhvyastuṣṭāḥ sadā mama || 92 ||
[Analyze grammar]

viprāśca ṛṣayaścāpyatithayo bhaktiśālinaḥ |
sāttvatā bhagavatyaśca yoginya sampratoṣitāḥ || 93 ||
[Analyze grammar]

pitā pratoṣitaścāpi vaco'nuvartanena vai |
teṣāṃ tāsāṃ mahatībhirāśīrbhiḥ puṇyamāpya ha || 94 ||
[Analyze grammar]

siddhā sādhvī pāvanī ca divyā jātā'smi tatkṣaṇāt |
divyadehā hariyajñairjātā brahmapriyāsakhī || 95 ||
[Analyze grammar]

priyeṇa patinā sārdhaṃ māyāpāraṃ gatā'sti ca |
sādhusādhvībhiruktā'smi yāhi dhāmā'kṣaraṃ hareḥ || 96 ||
[Analyze grammar]

anādiśrīkṛṣṇanārāyaṇasya paramātmanaḥ |
sā'haṃ dhāmā'kṣaraṃ kṛṣṇanārāyaṇa pareśvara || 97 ||
[Analyze grammar]

imaṃ lokamanuprāptā sevayā toṣalābhayā |
gṛhāṇa me karaṃ kṛṣṇa nivāsaya sadā'tra mām || 98 ||
[Analyze grammar]

vidhehi svāṃ kiṃkarīṃ māṇikyāsakhīmanuttamām |
ityuktā ca tato lakṣmi mayā sakhī kṛtā ca vaḥ || 99 ||
[Analyze grammar]

sādhusevāsamaṃ nāsti paraṃ kartavyameva ha |
ṛddhidaṃ mokṣadaṃ cāpi svargadaṃ śāntidaṃ tathā || 100 ||
[Analyze grammar]

ityetat kathitaṃ te'tra dānottaraṃ hi sevanam |
paṭhanācchravaṇāccāpi bhuktirmuktirbhavettathā || 101 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne sādhvyāḥ kartavye pūjādānādiḥ hariprathamanorbrahmaprathāyāḥ patnyāḥ sādhvyāḥ svarge sthityuttaraṃ sādhusādhvīsevā |
phalaṃ cā'kṣaradhāmagamanamityādinirūpaṇanāmā navasaptatitamo'dhyāyaḥ || 79 ||
[Analyze grammar]