Chapter 71

śrīpuruṣottama uvāca |
śṛṇu nārāyaṇīśri tvaṃ tripādvibhūtivistaram |
asaṃkhyātāni dhāmāni śuddhasattvamayāni vai || 1 ||
[Analyze grammar]

brahmānandasukhāḍhyāni nityāni tāni santi ha |
nirvikārāṇi sarvāṇi heyādirahitāni ca || 2 ||
[Analyze grammar]

divyahiraṇmayānyeva śuddhāni taijasāni ha |
avatārapadāmbhojabhaktimatsevitāni vai || 3 ||
[Analyze grammar]

nityamuktairdivyarūpaiḥ puruṣaiḥ strībhirityapi |
vāsitāni vanodyānasaronagaravanti ca || 4 ||
[Analyze grammar]

taddhāmānyupabhoktavyānyakṣarabrahmasevinām |
svātmajānandasaukhyāni mandirāṇi bhavanti ca || 5 ||
[Analyze grammar]

niḥśreyasāni nirvāṇakaivalyāni ca yāni vai |
śrīśāṃ'ghribhaktisevaikarasabhogayutāni ha || 6 ||
[Analyze grammar]

nityamuktā mahādivyā mama pādaprasevinaḥ |
sevikāśca vasantyeteṣveva nityasanātanāḥ || 7 ||
[Analyze grammar]

mantrajñāḥ paramāṇyeva yānti dhāmāni tāni vai |
brahmasukhapradānyeva mama yogapradāni vai || 8 ||
[Analyze grammar]

tatra tatra sthitaścā'hamavatārasvarūpavān |
avatārī tvakṣare vai pare dhāmni bhavāmi ca || 9 ||
[Analyze grammar]

mahāmāyā prakṛtiryā sā māṃ stauti punaḥ punaḥ |
namaste'kṣaravāsāya parameśāya te namaḥ || 10 ||
[Analyze grammar]

avatārasvarūpāyā'vatāriṇe ca te namaḥ |
māyā'haṃ bhavataḥ śaktirmāyālokāśca te prabho || 11 ||
[Analyze grammar]

īśvarāṇāmālayāśca tavaiva bhūmikāstvimāḥ |
tattvāni ca samastāni tavaiva kāryakāṇi vai || 12 ||
[Analyze grammar]

purāṇapuruṣastvaṃ vai sarvakāraṇakāraṇam |
śrībhūlīlāramānātha māṇikīmuktikāpate || 13 ||
[Analyze grammar]

prajñāpadmāvatīkānta namaste sukhadāpate |
lakṣmīpadmāpate tubhya namo nārāyaṇāya vai || 14 ||
[Analyze grammar]

sarveśvarasvarūpāya sarvadevātmane namaḥ |
anantamūrtaye kṛṣṇanārāyaṇa hare namaḥ || 15 ||
[Analyze grammar]

te'cyutāya ca kāntāya parameśāya te namaḥ |
sarvajñāya samastāya gopālātmaja te namaḥ || 16 ||
[Analyze grammar]

sarvasṛṣṭyātmane tubhyaṃ namaste paramātmane |
brahmaṇe jyotiṣe tubhyaṃ namaste śucivarcase || 17 ||
[Analyze grammar]

prasavitre namaḥ pitre sargasthityantahetave |
nārāyaṇāya ca namaḥ sarvātmāntaravartine || 18 ||
[Analyze grammar]

anantadivyaguṇavan namaḥ pumarthadāyine |
vyūharūpāya ca namaḥ pañcāvasthasvarūpiṇe || 19 ||
[Analyze grammar]

prasīda bhagavan viṣṇo sarvalokahitāya vai |
ātmāno jñānahīnā vai nirākārā nirindriyāḥ || 20 ||
[Analyze grammar]

sarvānuṣṭhānarahitā vartante ca nirāśrayāḥ |
teṣāṃ lokāṃśca dehāṃśca dātumarhasi vai mayi || 21 ||
[Analyze grammar]

līlāvibhūtiṃ śrīkṛṣṇa yathāpūrvaṃ prakalpaya |
cetanācetanaṃ kṛtsnaṃ jagatsthāvarajaṃgamam || 22 ||
[Analyze grammar]

paśya līnaṃ māyikaṃ vai mayi suptaṃ prabodhaya |
prakṛtyā vai mayā sārdhaṃ sṛjasva parameśvara || 23 ||
[Analyze grammar]

dharmādharmau sukhaṃ duḥkhaṃ bhāvayitvā mayi prabho |
māmadhiṣṭhāya vai līlāṃ śriyā kartuṃ tvamarhasi || 24 ||
[Analyze grammar]

ityevaṃ cārthitaścā'haṃ lakṣmi pūrve hi māyayā |
tasyāmeva hi māyāyāṃ jagat sraṣṭuṃ pracakrame || 25 ||
[Analyze grammar]

svecchayā dhāmamukto vai puruṣo yuyuje tayā |
prakṛtipūruṣaḥ proktastasmāt pradhānapūruṣaḥ || 26 ||
[Analyze grammar]

pradhānaṃ vai mahattattvaṃ buddhirityevamīśvarī |
pradhānapuruṣāttasmādahaṃkāraḥ prajāyate || 27 ||
[Analyze grammar]

so'yaṃ hiraṇyagarbho vai mahāviṣṇurnigadyate |
tasmānmanaḥ prabhavati tanmātrāṇīndriyāṇi ca || 28 ||
[Analyze grammar]

ṣoḍaśako gaṇaḥ so'yaṃ vairājo nāma pūruṣaḥ |
vairājājjāyanta īśā brahmaviṣṇumaheśvarāḥ || 29 ||
[Analyze grammar]

brahmā pṛthvī jalaṃ viṣṇuḥ rudrastejo mahattaram |
prāṇo'nilo'tha hṛdayaṃ gaganaṃ khaṃ vyajāyata || 30 ||
[Analyze grammar]

ebhyaḥ ṛṣayaḥ pitaraḥ surā bhūtāśca mānavāḥ |
asurā dānavā daityā nāgāḥ sarpāśca sṛṣṭayaḥ || 31 ||
[Analyze grammar]

tiryañco jantavaḥ sarve vyajāyanta yathāyatham |
sarve karmānusāreṇa yujyante yogyayoniṣu || 32 ||
[Analyze grammar]

sadā sthitā hi prakṛtau prabhavantocchayā hareḥ |
evaṃ lakṣmi mama līlāṃ māyāmayīṃ vibhāvaya || 33 ||
[Analyze grammar]

tvameva sā mahāmāyā divyā madyogamāśritā |
matsvarūpā mamecchaiva śaktistvaṃ sarvarūpiṇī || 34 ||
[Analyze grammar]

mama cā'rdhāṃganā brāhmī nārāyaṇī maheśvarī |
mahālakṣmīrvāsudevī vaiṣṇavī kamalā ramā || 35 ||
[Analyze grammar]

rādhā lakṣmīḥ priyā kāntā śrīstvaṃ sukhapradā sadā |
sarvasṛṣṭisthajīvānāmudbhavādividhāyinī || 36 ||
[Analyze grammar]

mama śaktiṃ vinā sṛṣṭernonmeṣo vidyate kvacit |
ato yāvajjagatprāṇamayī tvaṃ parameśvarī || 37 ||
[Analyze grammar]

prāṇāyāḥ prāṇarūpo'haṃ patiste parameśvaraḥ |
sarvasadguṇapūrṇo'haṃ parameśaḥ pareśvaraḥ || 38 ||
[Analyze grammar]

śrīkṛṣṇo'haṃ bhavāmyeva rādhākāmaprapūrtaye |
nārāyaṇo bhavāmyeva lakṣmīkāmaprapūrtaye || 39 ||
[Analyze grammar]

vāsudevo bhavāmyeva paripūrṇastrirūpadhṛk |
pradyumnamūrtistasmādvai sarvaiśvaryasamanvitā || 40 ||
[Analyze grammar]

bhūmnaścāpīśvarāṇāṃ ceśvareśānāṃ prabhuḥ khaniḥ |
kālasyā'pi śāsakaśca sṛṣṭiṃ caiśīṃ karoti hi || 41 ||
[Analyze grammar]

antaryāmitvamāpanno mahākālānuveśitaḥ |
harerme prabalaiśvaryaṃ mahākālasvarūpadhṛk || 42 ||
[Analyze grammar]

prabalo mama saṃkalpaścaiśvaryaṃ kālakāraṇam |
mahākālasya putro vai kālasaṃjño bhavatyapi || 43 ||
[Analyze grammar]

tadantarbhāvamāsādyā'niruddho lokasarjakaḥ |
mama jñānaṃ dadau tasmai nityavedātmakaṃ purā || 44 ||
[Analyze grammar]

aniruddhasyāṃ'śabhāgā brahmāṇaḥ saṃbhavanti hi |
vāsudevāttataścā'nyaḥ pradyumnaḥ saṃvyajāyata || 45 ||
[Analyze grammar]

macchaktitejaaiśvaryānvitaḥ pālanakarmakṛt |
aiśīṃ sṛṣṭiṃ pālayati sthitiṃ sañcālayatyayam || 46 ||
[Analyze grammar]

tadaṃśātmā viṣṇurūpaḥ pāti sarvaṃ jaganmuhuḥ |
vāsudevāttato jātaḥ saṃkarṣaṇo vināśakṛt || 47 ||
[Analyze grammar]

vidyābalāstraśastrādiyuto yadaṃśasaṃbhavāḥ |
rudrādyā nāśakarmāṇo bhavanti sṛṣṭilopakāḥ || 48 ||
[Analyze grammar]

evamete madaṃśā vai lakṣmi sadā bhavanti hi |
tadaṃśāścāpi tatpatnyo bhavanti mama vāñcchayā || 49 ||
[Analyze grammar]

matsyaḥ kūrmo varāhaśca narasiṃho'tha vāmanaḥ |
rāmo rāmaśca kṛṣṇaśca buddhaḥ kalkiśca te daśa || 50 ||
[Analyze grammar]

avatārā mama lakṣmi jāyante sarvasṛṣṭiṣu |
mama kāryakarā ete āvaśyakānubhāvinaḥ || 51 ||
[Analyze grammar]

ahaṃ bhavāmyavatārī svecchayā sahitastvayā |
anādiśrīkṛṣṇanārāyaṇaḥ śrīpuruṣottamaḥ || 52 ||
[Analyze grammar]

mama bhaktyā mama ghāmā'kṣaraṃ padaṃ prayānti vai |
avatārarūpabhaktyā golokādi prayānti vai || 53 ||
[Analyze grammar]

gatvā caiṣu na vai muktā nivartante samā mayā |
matsamānasukhāḥ sarve yathā tvaṃ sukhinastathā || 54 ||
[Analyze grammar]

madicchayā prajāyante lokakalyāṇahetave |
na karmabandhanaṃ janma manmuktānāṃ hi bhūtale || 55 ||
[Analyze grammar]

mama cānucaratvaṃ hi mokṣa eva na cetaraḥ |
mama dāsyaṃ bandhanaṃ vai sadāsukhaṃ sadā'kṣaram || 56 ||
[Analyze grammar]

punaste mama dhāmasthā yāsyanti dhāma cecchayā |
brahmapriyā mahāmuktā haridāsā nirāmayāḥ || 57 ||
[Analyze grammar]

anye'pi karmabandhasthā mantraṃ labdhvā mamāpi vai |
viṣamiśrāśanaṃ lokasukhaṃ tyaktvā bhajanti cet || 58 ||
[Analyze grammar]

māmeva te prapadyante nāmakīrtanapūjanaiḥ |
bhaktyā tvananyayā māṃ saṃbhajeyuḥ karuṇālayam || 59 ||
[Analyze grammar]

rakṣāmi tānparamātmā bhaktavātsalyaśevadhiḥ |
nayāmi vaiṣṇavaṃ dhāma sahasrasūryaraśmini || 60 ||
[Analyze grammar]

vimāne tāmavasthāpya bhagavān śrīhariḥ svayam |
mama mantraprajaptṝn vai mama bhaktiparāyaṇān || 61 ||
[Analyze grammar]

śrīpateḥ śrīharerme'tra mantroccāraṇamuttamam |
sarvāmṛtamayaṃ divyamauṣadhaṃ paramauṣadham || 62 ||
[Analyze grammar]

sarvodvegādiśamanaṃ māyāpāśaharaṃ param |
hyetadrasāyanaṃ divyaṃ māyāgadaharaṃ śubham || 63 ||
[Analyze grammar]

vidyamāne kṛṣṇamantre mahauṣadhe'tra bhūtale |
mānavā nopagṛhṇanti hāniḥ sā mahatī matā || 64 ||
[Analyze grammar]

pūrvasañcitaduṣṭāste bhramamāyāntare sthitāḥ |
ye pibanti na vai mūḍhā harināmarasāyanam || 65 ||
[Analyze grammar]

haripūjopacāreṇa dhyānena sevayā ca me |
satyadāsyena dānena kāyātmaśuddhisaṃbhavaḥ || 66 ||
[Analyze grammar]

tato vāso hṛdaye me tathātmani nirantaram |
mandiraṃ bhaktahṛdayaṃ kṛtvā nayāmi dhāma me || 67 ||
[Analyze grammar]

lakṣmi brahmapriyāḥ sarvā haripriyāstathā'parāḥ |
śṛṇvantu mama līlādyā juṣantāṃ māṃ priyaṃ patim || 68 ||
[Analyze grammar]

vrajantu supathaṃ me ca bhāvaiḥ sarvaiḥ samarpitaiḥ |
sevābhirjñānavijñānairdhyānaistapobhirityapi || 69 ||
[Analyze grammar]

vratairyajñaiśca dānaiśca śṛṃgāraiścandanādibhiḥ |
hāvabhāvavilāsaiśca bhajantāṃ māṃ priyaṃ patim || 70 ||
[Analyze grammar]

paśyantu māṃ ca sarvatra śuṣkeṣvārdreṣu sarvadā |
sthāvareṣu jaṃgameṣu bhūmāvabhreṣu mūrtiṣu || 71 ||
[Analyze grammar]

svakāryeṣu paravarṣmasvapi māṃ puruṣottamam |
māmuddiśya dadatvapi dānāni vividhāni ca || 72 ||
[Analyze grammar]

anādiśrīkṛṣṇanārāyaṇaṃ japata māṃ sadā |
yajadhvaṃ māṃ ca manmantraṃ smarantu sārthakaṃ ca mām || 73 ||
[Analyze grammar]

pibantu vaiṣṇavarasaṃ mantrāmṛtaṃ pibantu ca |
anādiśrīkṛṣṇanārāyaṇāmṛtaṃ pibantu ca || 74 ||
[Analyze grammar]

ājñāmṛtaṃ premarasaṃ sevārasaṃ pibantu ca |
muktirasaṃ kāntarasaṃ kāntāḥ sarvāḥ pibantu ca || 75 ||
[Analyze grammar]

bhaktirasaṃ yogarasaṃ cātmarasaṃ pibantu ca |
brahmarasaṃ dāsyarasaṃ priyarasaṃ pibantu ca || 76 ||
[Analyze grammar]

sneharasaṃ tānarasaṃ sarvarasān pibantu ca |
arcayantu sadā kāntaṃ dhyāyantu madhusūdanam || 77 ||
[Analyze grammar]

gāyantu māṃ mahākṛṣṇaṃ japantu śrīhariṃ sadā |
tapyantāṃ mama toṣārthaṃ maddhyānā matparāyaṇāḥ || 78 ||
[Analyze grammar]

evaṃ yā ye kariṣyanti bhaktiṃ madarthikāṃ bhuvi |
tāste vai mānavādyāstu sarve bhāgavatāḥ parāḥ || 79 ||
[Analyze grammar]

mama prabhāvato lakṣmi pūjāstotramanugṛṇāḥ |
ādhihīnā bhavantyeva bhaviṣyanti na saṃśayaḥ || 80 ||
[Analyze grammar]

vītaśokāśca puṇyāśca bhaviṣyanti nirāmayāḥ |
sarvaiśvaryasamāpannāḥ sarvarogādivarjitāḥ || 81 ||
[Analyze grammar]

amarā nirjarāścāpi dhanadhānyasamṛddhayaḥ |
mama cātiprasādena putrapautrādyalaṃkṛtāḥ || 82 ||
[Analyze grammar]

mama bhaktāgārabhāge hṛdaye cāpi mānase |
satyavrataṃ sadā cāste sarvaratnopadāyakam || 83 ||
[Analyze grammar]

bhaktānāṃ mantrayuktānāṃ gṛhadvāreṣu nityadā |
kalpadrumā bhavantyeva sarvakāmaphalapradāḥ || 84 ||
[Analyze grammar]

sarvakāmadughā gāvaḥ sacintāmaṇayastathā |
kalpalatāḥ kalpapātrāṇyāsate bhaktamandire || 85 ||
[Analyze grammar]

mama prasādato lakṣmi amarāste bhavanti ca |
sarvasaubhāgyasampannāḥ puṇyamaṃgalaśobhanāḥ || 86 ||
[Analyze grammar]

dānajñānadhyānaparāyaṇā ānandasaṃbhṛtāḥ |
na durbhikṣaṃ na ca vyādhirnā'kālamaraṇaṃ bhavet || 87 ||
[Analyze grammar]

vaiṣṇavā yatra me bhaktā mama vrataparāyaṇāḥ |
maddhyānā majjapā lakṣmi mama bhāvaparāyaṇāḥ || 88 ||
[Analyze grammar]

eṣāṃ gṛhāṇi divyāni puṇyāni mokṣadānyapi |
tīrthāni samajāyante mamā'kṣaranibhāni vai || 89 ||
[Analyze grammar]

yadgṛheṣu gadācakradhvajadhanūṃṣi santi me |
śūlamīnaśarasvastikāni cihnāni santi me || 90 ||
[Analyze grammar]

bhittibhāgeṣu sarveṣu pratimā me bhavanti ca |
gṛhadvāreṣu sarveṣu puṇyasthāneṣu sarvathā || 91 ||
[Analyze grammar]

mama līlācaritrāṇāṃ divyacitrāṇi santi ca |
tulasīrādhikālakṣmīmāṇikīpratimāyutaḥ || 92 ||
[Analyze grammar]

prajñāpadmāvatīpadmāsukhadāśrīsamanvitaḥ |
ahaṃ yatra citrito vai bhavāmi parito gṛhe || 93 ||
[Analyze grammar]

abhito vaiṣṇavo bhāvo maṃgalaṃ bahu dṛśyate |
viṣṇubhaktāstathā nāryo bhittiṣu citritāḥ śubhāḥ || 94 ||
[Analyze grammar]

vidyante yatra saudheṣu tīrthāni tadgṛhāṇi me |
jalakrīḍāpratimāśca rādhārāsasya maṇḍalam || 95 ||
[Analyze grammar]

brahmapriyāvivāhasya pratimāścitritā gṛhe |
tadgṛhaṃ divyarūpaṃ me bhaktasya muktitīrthakam || 96 ||
[Analyze grammar]

gobhiryutaṃ ca rūpaṃ me vidyā'dhyayanacitrakam |
vimānasthaṃ citrakaṃ me yajñadīkṣādicitrakam || 97 ||
[Analyze grammar]

kuṃkumavāpikācitraṃ cāśvapaṭṭasaro'nvitam |
lomaśāśramasaṃśobhaṃ citraṃ śrīkambharāyutam || 98 ||
[Analyze grammar]

gopālakṛṣṇacitraṃ ca sarvadevādipūjitam |
bhaktarakṣākarāścāpi pratimā me śubhāspadāḥ || 99 ||
[Analyze grammar]

sarvā mokṣapradā lakṣmi tīrthaṃ manmūrtiyuggṛham |
tripañcāśanmūrtayo me'vatāriṇastvayā saha || 100 ||
[Analyze grammar]

sarvāstā mokṣadā yeṣāṃ gṛheṣu santi padmaje |
tadvaṃśavaṃśavaṃśānāṃ mokṣaḥ prajāyate dhruvaḥ || 101 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne tripādvibhūtiḥ māyāprārthanayā kṛtaikapādalīlāvibhūtāvapi divyatādinirūpaṇanāmaikasaptatitamo'dhyāyaḥ || 71 ||
[Analyze grammar]