Chapter 69

śrīnārāyaṇīśrīruvāca |
śreṣṭhamuktaṃ tvayā kānta rahasyaṃ manusaṃbhṛtam |
mahāmantrasya sāmarthyaṃ sarveṣṭapūrakaṃ mahat || 1 ||
[Analyze grammar]

tvaṃ prabhustvaṃ patistvaṃ ca lokānāṃ gurureva ca |
tvaṃ svāmī tvaṃ sakhā nāthastvaṃ gatistvaṃ sahāyakṛt || 2 ||
[Analyze grammar]

tvaṃ bhoktā tvaṃ tārayitā trātā poṣṭā suhṛt sadā |
tvaṃ janako'si lokānāṃ garbhadhrastvaṃ hi dehinām || 3 ||
[Analyze grammar]

ahaṃ śiṣyā vadhūḥ patnī kāntā sakhī tavā'smi ca |
dāsī bhṛtyā kiṃkarī ca bhāryā yoṣittavā'ṅganā || 4 ||
[Analyze grammar]

imā brahmapriyāḥ sarvāstavā'rdhāṃ'gasya śaktayaḥ |
haripriyāśca vai tadvacchaktayaḥ santi te parāḥ || 5 ||
[Analyze grammar]

sarvāsāṃ me'pi ca kṛpākarastvaṃ śāśvato'dhipaḥ |
mantradātā bhavāneva dīkṣādātā bhavānapi || 6 ||
[Analyze grammar]

mantradīkṣāvidhiṃ māṃ tvaṃ brūhi lokahitecchayā |
prāpya dīkṣāṃ mahāmokṣaṃ prāpsyantīti kṛpāṃ kuru || 7 ||
[Analyze grammar]

śrīpuruṣottama uvāca |
śṛṇu kānte pravakṣyāmi mantradīkṣāvidhiṃ hi te |
yadā bhaveddhi saṃkalpaḥ satsaṃgasya balena vai || 8 ||
[Analyze grammar]

pūrvapuṇyabalenāpi cānyasampreritena vā |
tadā snātvā hariṃ smṛtvā śīghraṃ gacched guruṃ prati || 9 ||
[Analyze grammar]

sadgururdharmasampannastyāgavān saṃyatendriyaḥ |
mahābhāgavato bhakto vidvān bhaktiparāyaṇaḥ || 10 ||
[Analyze grammar]

ācāryo vedavinmantratattvārthavid rahasyavit |
mantrajāparataścāpi matsampradāyasaṃyutaḥ || 11 ||
[Analyze grammar]

parabrahmasampradāyadīkṣāvān matpadāśritaḥ |
brahmavidyāsu niṣṇātaścānanyadaivataḥ śuciḥ || 12 ||
[Analyze grammar]

sādhuḥ sādhvī satī vipro gurupādāśrito'pi yaḥ |
gurvarthakṛtasarvasvaḥ śāsitā mokṣado guruḥ || 13 ||
[Analyze grammar]

etādṛśaṃ śreṣṭhaguruṃ yadvā mantravidaṃ gurum |
abhigacchedarcyapāṇirjñānadaṃ divyamūrtikam || 14 ||
[Analyze grammar]

ācāraśāsakaṃ bhaktiśāsakaṃ brahmadāyakam |
ācāryaṃ paramaṃ divyaṃ guruṃ gacchennamettathā || 15 ||
[Analyze grammar]

ācāryaṃ nijasaṃkalpaṃ mantrārthakaṃ nivedayet |
yathoktavacanaṃ matvā mama janmāṣṭamīdine || 16 ||
[Analyze grammar]

ūrjakṛṣṇe'thavā corje dvādaśyāṃ śuklake dale |
yadvāpuṇyadine yadvā yadecchedvai tadā dine || 17 ||
[Analyze grammar]

tīrthajalaṃ kare dhṛtvā hareḥ pādāmṛtaṃ jalam |
ācamanaṃ vidhāyaiva niṣīdedvai guroḥ puraḥ || 18 ||
[Analyze grammar]

gurustasmai harernāma śrāvayitvā punaḥ punaḥ |
śaṃkhacakragadāpadmacihnāni dāpayejjalaiḥ || 19 ||
[Analyze grammar]

yadvā vahniṃ sthāpayecca vahnimantravidhānataḥ |
sthaṇḍilādau juhuyācca gavājyaṃ mantrasaṃyutam || 20 ||
[Analyze grammar]

aṣṭottarasahasraṃ vā śatamaṣṭottaraṃ ca vā |
juhuyādvai mahāmantrasaṃyutaṃ ca phalādibhiḥ || 21 ||
[Analyze grammar]

mantraiḥ puruṣasūktādyairlakṣmīsūktādibhistathā |
pāyasaṃ ca ghṛtādyaṃ ca juhuyānme'bhidhānakaiḥ || 22 ||
[Analyze grammar]

tato vai rājataṃ yadvā sauvarṇaṃ tāmrameva vā |
śaṃkhaṃ cakraṃ gadāṃ padmaṃ pañcāmṛtaiḥ niṣecayet || 23 ||
[Analyze grammar]

pūjayecca tato vahnau tāpayenmudraṇocitam |
daśahomān prakuryācca ṣaṭhomān vā tataḥ punaḥ || 24 ||
[Analyze grammar]

uddhṛtya cakraṃ bāhvorvai cāṃ'kayed gururāśritam |
dakṣe cordhve cakrameva śaṃkhaṃ tūrṇaṃ hi vāmake || 25 ||
[Analyze grammar]

gadāṃ dakṣe hyadhobhāge padmaṃ vāme ca nimnake |
evaṃ bāhvoraṃkayitvā tīrthakalaśavāriṇā || 26 ||
[Analyze grammar]

mantreṇaivā'bhimantryaiva śiṣyamūrdhnyabhiṣecayet |
ācamanaṃ pradadyācca hyūrdhvapuṇḍraṃ prakārayet || 27 ||
[Analyze grammar]

sacandrakaṃ kauṃkumaṃ ca mantramadhyāpayettataḥ |
trivāraṃ dakṣakarṇe vai nāryā vāme vaded guruḥ || 28 ||
[Analyze grammar]

mantrārthān bodhayet sarvān nirbhayatvaṃ dadettataḥ |
japasya niyamān dadyād dadyāt kaṇṭhīṃ ca taulasīm || 29 ||
[Analyze grammar]

japamālāṃ pradadyācca parihāraṃ samāpayet |
śiṣyastato'rcayedbhaktyā guruṃ bhūṣā'mbarādibhiḥ || 30 ||
[Analyze grammar]

evaṃ mantrayutaḥ śiṣyo natvā yāyād gṛhaṃ nijam |
idaṃ rahasyaṃ paramaṃ lakṣmi te samudāhṛtam || 31 ||
[Analyze grammar]

mantracatuṣṭayaṃ śreṣṭhaṃ muktidaṃ divyatāpradam |
tajjapādvai bhavenmokṣo yāvatkṛtyanikṛntanaḥ || 32 ||
[Analyze grammar]

pūrvoktaṃ mantradaśakaṃ tathedaṃ ca catuṣṭayam |
sarvabhuktisarvamuktitādātmyādipradaṃ mama || 33 ||
[Analyze grammar]

trayodaśa tathā mantrāścāpare prāṅnidarśitāḥ |
te ca mokṣakarā lakṣmi bhuktimuktipradāḥ śubhāḥ || 34 ||
[Analyze grammar]

trayastriṃśattathā mantrā gāyatryantā udīritāḥ |
sarve te siddhidā lakṣmi puruṣārthapradāḥ śubhāḥ || 35 ||
[Analyze grammar]

trayastriṃśattathā'nye te mantrā lakṣmi prakīrtitāḥ |
tava gāyatrikāntāste puruṣārthapradāḥ śubhāḥ || 36 ||
[Analyze grammar]

tato ramāyāḥ pārvatyā gāyatrīdvayamuttamam |
tato mantratrayaṃ svāmīkṛṣṇovallabhadaivatam || 37 ||
[Analyze grammar]

sarvārthasādhakaṃ lakṣmi sarvamantrottamottamam |
atha gāyatrikāścāpi śṛṇu mokṣapradāḥ śubhāḥ || 38 ||
[Analyze grammar]

parameśāya vidmahe pumuttamāya dhīmahi |
tanno'vatārī pracodayāt || 39 ||
[Analyze grammar]

gopīśvarāya vidmahe śrīrādheśīya dhīmahi |
tannaḥ kṛṣṇaḥ pracodayāt || 40 ||
[Analyze grammar]

nārāyaṇāya vidmahe vāsudevāya dhīmahi |
tanno viṣṇuḥ pracodayāt || 41 ||
[Analyze grammar]

tatsaviturvareṇyaṃ bhargo devasya dhīmahi |
dhiyo yo naḥ pracodayāt || 42 ||
[Analyze grammar]

tatpuruṣāya vidmahe mahādevāya dhīmahi |
tanno rudraḥ pracodayāt || 43 ||
[Analyze grammar]

padmodbhavāya vidmahe vedavaktrāya dhīmahi |
tannaḥ sraṣṭā pracodayāt || 44 ||
[Analyze grammar]

mahāviṣṇave vidmahe hiraṇyagarbhāya dhīmahi |
tanno bhūmā pracodayāt || 45 ||
[Analyze grammar]

etāḥ sapta matsvarūpāḥ śṛṇu tvadrūpagā api |
gāyatryaḥ śubhadāḥ sarvapuruṣārthapradā rame || 46 ||
[Analyze grammar]

brahmapriyāyai vidmahe haripriyāyai dhīmahi |
tanno brāhmī pracodayāt || 47 ||
[Analyze grammar]

nārāyaṇyai vidmahe vāsudevyai ca dhīmahi |
vaiṣṇavī naḥ pracodayāt || 48 ||
[Analyze grammar]

mahālakṣmyai ca vidmahe viṣṇupatnyai ca dhīmahi |
tanno lakṣmīḥ pracodayāt || 49 ||
[Analyze grammar]

hiraṇyavarṇāyai vidmahe śriyai hariṇyai dhīmahi |
tanno lakṣmīḥ pracodayāt || 50 ||
[Analyze grammar]

mahā'mbikāyai vidmahe pārvatyai satyai dhīmahi |
tanno gaurī pracodayāt || 51 ||
[Analyze grammar]

mahāsāvitryai vidmahe vedagāyatryai dhīmahi |
tanno vāṇī pracodayāt || 52 ||
[Analyze grammar]

sukhadālakṣmyai vidmahe śivarājñīśriyai dhīmahi |
tannaḥ kārṣṇī pracodayāt || 53 ||
[Analyze grammar]

nārāyaṇyai vidmahe māṇikyāyai dhīmahi |
tanno rādhā pracodayāt || 54 ||
[Analyze grammar]

nārāyaṇyai vidmahe ramādevyai dhīmahi |
tanno lakṣmīḥ pracodayāt || 55 ||
[Analyze grammar]

nārāyaṇyai vidmahe padmāvatyai dhīmahi |
tanno vibhvī pracodayāt || 96 ||
[Analyze grammar]

nārāyaṇyai vidmahe ramādevyai dhīmahi |
tannaḥ prabhvī pracodayāt || 97 ||
[Analyze grammar]

dharmadevāya vidmahe bhaktidevyai dhīmahi |
tanno hariḥ pracodayāt || 58 ||
[Analyze grammar]

ityetā dvādaśagāyatryaśca lakṣmi tavābhidhāḥ |
dharmārthakāmamokṣākhyapumarthasampradāḥ śubhāḥ || 59 ||
[Analyze grammar]

ityevaṃ sakalā mantrāḥ śataṃ ca daśa paṃca ca |
pañcadaśordhvaśataśaktidevatā madātmakāḥ || 60 ||
[Analyze grammar]

rahasyaṃ kathitaṃ te'tra parameśaparāyaṇam |
japitvā tānnaro nārī caikaṃ vā manumityapi || 61 ||
[Analyze grammar]

yāyāt svargātparaṃ svargaṃ dhāmno dhāma parātparam |
utsavādutsavā''ḍhyaṃ cānandānandasaṃbhṛtam || 62 ||
[Analyze grammar]

puruṣottamato devaḥ paro nāsti pramuktidaḥ |
mama sevā tataḥ kāryā puruṣottamasaṃjñinaḥ || 63 ||
[Analyze grammar]

mama mantrāḥ sadā japyā yathāśakti divāniśam |
mama dīkṣā grahītavyā dhāryāṇyaṃkāni me sadā || 64 ||
[Analyze grammar]

tattvaṃ nārāyaṇaścā'haṃ vāsudevastathā tvaham |
paramātmā parabrahma parajyotiḥ pareśvaraḥ || 65 ||
[Analyze grammar]

viṣṇuḥ parātparaścā'haṃ kṛṣṇo vai puruṣottamaḥ |
śāśvatātmā'ntarātmā ca sākṣī cā'haṃ janārdanaḥ || 66 ||
[Analyze grammar]

hṛṣīkeśastathā yajñaścā'haṃ līlāpatiḥ prabhuḥ |
sarvamūrdhā sarvacakṣuḥ sarvapād bhagavānaham || 67 ||
[Analyze grammar]

viśvātmā śrīpatiścā'haṃ savitā ramaṇo'pyaham |
sarveśvaraśca sarvajño jagannātho'hameva ca || 68 ||
[Analyze grammar]

sarvavidyāntarastho'haṃ sarvāyudhadharo'pyaham |
sarvaśāstā sarvacetyaścāhaṃ śrīpuruṣottamaḥ || 69 ||
[Analyze grammar]

mama cihnaṃ prasiddhaṃ vai cakraṃ sudarśanaṃ śubham |
ūrdhvapuṇḍraṃ ca tilakaṃ śaṃkhādīni tathāpi ca || 70 ||
[Analyze grammar]

dhāraṇīyāni bhaktena pūjyo'haṃ puruṣottamaḥ |
śaṃkhacakrādicihnāḍhyaḥ kuryānme pūjanaṃ priye || 71 ||
[Analyze grammar]

dhārayitvaiva cihnāni brahmakarma samācaret |
bāhvordhārayitā dhartā yāti matparamaṃ padam || 72 ||
[Analyze grammar]

aṃkayitvā japanmantraṃ bhavapāśātpramucyate |
sudarśanayutaṃ bhaktaṃ śrāddhādau bhojayet satī || 73 ||
[Analyze grammar]

pitaro nityatṛptā vai bhavanti vaiṣṇavāśanāt |
dadyādgobhūhiraṇyādi cakrāṃkitabhujāya vai || 74 ||
[Analyze grammar]

cakrāṃkitāḥ pāpamuktāḥ prayānti matparaṃ padam |
cakrādyairaṃkite dehe pāvane vaiṣṇave priye || 75 ||
[Analyze grammar]

sarvatīrthāni yajñāśca vasanti muktakoṭayaḥ |
mantrasiddhyai ca pūjārthaṃ cakraṃ dhāryaṃ viśeṣataḥ || 76 ||
[Analyze grammar]

vaiṣṇavatvasya siddhyarthaṃ jñānasiddhyai viśeṣataḥ |
mama bhṛtyatvasiddhyarthaṃ cakraṃ dhāryaṃ viśeṣataḥ || 77 ||
[Analyze grammar]

śaṃkhacakragadāpadmarekhā bāhvornyaset sadā |
mīnaśūladhvajadhanurbāṇasvastikadaṇḍakān || 78 ||
[Analyze grammar]

rekhātmakānnyasennityaṃ cāndanān taptakāṃśca vā |
pavitracakrarekhāḍhyāstareyuḥ pātakāmbudhim || 79 ||
[Analyze grammar]

pavitraṃ caraṇaṃ nemirhareścakraṃ sudarśanam |
tena taptaśarīrā vai prayānti mama dhāma ha || 80 ||
[Analyze grammar]

śuddhena vahnitaptena brahma tena punīhi naḥ |
yatte pavitramarcivadagne tena punīhi naḥ || 81 ||
[Analyze grammar]

yena devā pavitreṇa ātmānaṃ punate sadā |
tena sahasradhāreṇa pāvamānyaḥ punantu mām || 82 ||
[Analyze grammar]

prājāpatyaṃ pavitraṃ tacchatodyāmaṃ hiraṇmayam |
vayaṃ brahmavidastena pūtaṃ brahma punīmahe || 83 ||
[Analyze grammar]

sanemicakraṃ satataṃ cā'kṣarasya mahātmanaḥ |
tasmiṃścakravṛte dehe mahonnatipadaṃ yayau || 84 ||
[Analyze grammar]

evaṃ mamaiva vākyāni śrutayo me vadantyapi |
rekhāstā vidhivad dhāryā śaṃkhacakrādihetayaḥ || 85 ||
[Analyze grammar]

kalatrā'patyabhṛtyādyairdhāryāśca paśubhistathā |
vṛkṣavallyādibhiścāpi gṛhārāmādibhistathā || 86 ||
[Analyze grammar]

yānavāhanapeṭādyairdhāryā rekhādihetayaḥ |
āntare mama mūrtiśca bāhye cihnāni me tathā || 87 ||
[Analyze grammar]

ananyabhaktiyogaśca sarvārpaṇādipūrvakaḥ |
kartavyaścāpi dhāryaśca te me dāsā hi vaiṣṇavāḥ || 88 ||
[Analyze grammar]

urdhvapuṇḍraṃ tathā bhāle lakṣmyā bindvyā yutaṃ caret |
lakṣmi sākaṃ tvayā cāhamūrdhvapuṇḍre vasāmi vai || 89 ||
[Analyze grammar]

ūrdhvapuṇḍrayuto deho mama divyaṃ hi mandiram |
ūrdhvapuṇḍrayutaḥ snātaḥ sarvatīrtheṣu vidyate || 90 ||
[Analyze grammar]

dīkṣitaḥ sarvayajñeṣu sarvalokeṣu pūjitaḥ |
vimānavaramāruhya yāti me paramaṃ padam || 91 ||
[Analyze grammar]

ūrdhvapuṇḍradharaṃ bhaktaṃ dṛṣṭvā pāpaiḥ pramucyate |
namaskṛtyā'thavā bhaktyā sarvadānaphalaṃ labhet || 92 ||
[Analyze grammar]

śrāddhe'sya bhojane kalpakoṭitṛptiṃ prayānti vai |
pitaro'sya gayāśrāddhakṛtaṃ phalamavāpnuyuḥ || 93 ||
[Analyze grammar]

yajñadānatapaścaryājapahomādyanantakam |
puṇyavajjāyate cordhvapuṇḍrabhālasya yoginaḥ || 94 ||
[Analyze grammar]

ekāntino mahābhāgāḥ sādhavo brahmacāriṇaḥ |
sāntarālaṃ prakuryurvai puṇḍraṃ mama padākṛti || 95 ||
[Analyze grammar]

mama padākṛti puṇḍraṃ mandiraṃ me sacandrakam |
madhye tiṣṭhāmi bhāle'haṃ śriyā sākaṃ tvayā hariḥ || 96 ||
[Analyze grammar]

puṇḍraṃ kuryurjanā nityaṃ kṛṣṇasālokyasiddhaye |
tīrthamṛdā candanena kuṃkumena draveṇa vā || 97 ||
[Analyze grammar]

jalādyairvā prakuryuśca hyūrdhvapuṇḍraṃ sacandrakam |
dhṛtvā puṇḍrāṇi cāṃgeṣu mama sāyujyamāpnuyuḥ || 98 ||
[Analyze grammar]

lalāṭe māṃ hariṃ dhyāyen nārāyaṇamathodare |
vakṣaḥsthale śriyaṃ dhyāyet kaṇṭhe śrīpuruṣottamam || 99 ||
[Analyze grammar]

bāhvornaraṃ tathā kṛṣṇaṃ kandhare māṇikīpatim |
pārśvayoḥ śrībhūpatiṃ māṃ pṛṣṭhe janārdanaṃ tu mām || 100 ||
[Analyze grammar]

karayośca ramāpadmāvatīnāthaṃ smareddhi mām |
evaṃ dvādaśapuṇḍrāṇi bhakto me dhārayet sadā || 101 ||
[Analyze grammar]

mahābhāgavatī nārī mahābhāgavato naraḥ |
ūrdhvapuṇḍrasucandrāḍhyo matsvarūpo na saṃśayaḥ || 102 ||
[Analyze grammar]

evaṃ lakṣmi mayoktā vai mantrāḥ sahordhvapuṇḍrakāḥ |
sacandrakāśca te sarve tulasīmālikāyutāḥ || 103 ||
[Analyze grammar]

matsmṛtiprasahitāśca bhavanti matpradapradāḥ |
narā nārāyaṇā nāryo nārāyaṇyo bhavanti vai || 104 ||
[Analyze grammar]

kimvadhikaṃ pravaktavyaṃ mama priyā bhavanti vai |
paṭhanācchravaṇādasya mokṣamārgo bhavet dhruvaḥ || 105 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne mahāmantrādigāyatryādisacandrakordhvapuṇḍrādimahimanirūpaṇanāmā navaṣaṣṭitamo'dhyāyaḥ || 69 ||
[Analyze grammar]