Chapter 64

śrīnārāyaṇīśrīruvāca |
hare nārāyaṇa kṛṣṇa parameśa sanātana |
kasyāṃ tithau kiṃsvarūpo bhavān pūjyaḥ pravedaya || 1 ||
[Analyze grammar]

śrīpuruṣottama uvāca |
pratipaddhanadasyoktā tatra pūjyo'hameva ha |
kuberamūrtirūpo vai dhanado'haṃ bhavāmi hi || 2 ||
[Analyze grammar]

lakṣmyāste vai dvitīyā'sti tvaṃ pūjyā puruṣottamī |
sarvalakṣmīpradā tvaṃ syā madātmikā narāyaṇī || 3 ||
[Analyze grammar]

tṛtīyā pārvatīdevyāstithiḥ proktā śubhā priye |
tatra pūjyā pārvatī tu saubhāgyadā hi sā matā || 4 ||
[Analyze grammar]

gaṇeśasya caturthī vai pūjyo vighnaharo hi saḥ |
kṛṣṇanārāyaṇarūpo lābhādisamprado'pi saḥ || 5 ||
[Analyze grammar]

candrasya pañcamī proktā pūjanīyaḥ śaśī hyaham |
govṛṣavāṭikādātā bhavāmi cāmṛtānnadaḥ || 6 ||
[Analyze grammar]

kārtikasya tithiḥ ṣaṣṭhī kārtikaṃ pūjayettadā |
jayaprado grahahartā bhavāmi kārtikā''tmakaḥ || 7 ||
[Analyze grammar]

saptamī tu raverbodhyā sūryaḥ pūjyastadā priye |
sūryanārāyaṇaścā'haṃ tejo dadāmi naikadhā || 8 ||
[Analyze grammar]

durgāyāstvaṣṭamī bodhyā durgā pūjyā śubhapradā |
sarvakaṣṭaharā sā ca mama śaktiḥ sanātanī || 9 ||
[Analyze grammar]

navamī caiva mātṝṇāṃ pūjyā vai mātaraḥ śubhāḥ |
rakṣākaryo bhavantyeva kṣemaṃkaryo hi vaṃśinām || 10 ||
[Analyze grammar]

yamasya daśamī bodhyā yamaḥ pūjyastadā śubhaḥ |
pāpanirayaduḥkhaghno yamo'haṃ saṃbhavāmi vai || 11 ||
[Analyze grammar]

ekādaśī kamalāyāḥ śrīḥ pūjyā tatra sarvathā |
śreyasāṃ padamāpnoti dadāmi śrīṃ samarcine || 12 ||
[Analyze grammar]

dvādaśī me mādhavasya pūjito'haṃ tadā priye |
madhu sarvavidhaṃ śreṣṭhaṃ dadāmi rasasaṃbhṛtam || 13 ||
[Analyze grammar]

trayodaśī ca kāmasya pūjyo'haṃ tatra sarvadā |
kāmān dadāmi sampūrṇān sarvakāmaprapūrakaḥ || 14 ||
[Analyze grammar]

caturdaśī harasyā'sti mahādevamayo hyaham |
pūjanīyaḥ smṛddhidaścaiśvaryaprado hi śaṃkaraḥ || 15 ||
[Analyze grammar]

paṃcadaśī vedhaso'sti vedhāḥ pūjyaḥ śubhapradaḥ |
vaṃśavṛddhipradaścāpi pitṛvacchreyasāṃpradaḥ || 16 ||
[Analyze grammar]

adhikā tithirācyutī puruṣottamasaṃjñikā |
anādiśrīkṛṣṇanārāyaṇaḥ pūjyo'hameva ca || 17 ||
[Analyze grammar]

sarveṣṭasampradaścāsmi parameśaḥ purātanaḥ |
amāvāsyā tu devānāṃ tithiḥ pūjyā hi devatāḥ || 18 ||
[Analyze grammar]

āvāhanaṃ samārabhya visarjanāvadhi dhruvam |
sarvopacāraśobhāḍhyaṃ pūjanaṃ sarvadā matam || 19 ||
[Analyze grammar]

snānamambaramābhūṣā mantramālā''rdracandanam |
dhūpadīpasunaivedyavāritāmbūlatoṣaṇam || 20 ||
[Analyze grammar]

namaḥ kṣamā dakṣiṇā cetyāvaśyakaṃ hi pūjane |
aṣṭottaraśatavastukṛtaṃ prapūjanaṃ bhavet || 21 ||
[Analyze grammar]

sarvasampatpradaṃ lakṣmi sarvasiddhipradaṃ tathā |
sarvakāmapradaṃ cāpi bhuktimuktipradaṃ bhavet || 22 ||
[Analyze grammar]

evaṃ me mahatīṃ pūjāṃ kuryād bhaktā prasādinīm |
yayā kṛtayā śrīkṛṣṇaḥ prasīdāmi priyaṃkaraḥ || 23 ||
[Analyze grammar]

dīpamālā pradātavyā mama saudhe ca mandire |
caturvidhaṃ ca naivedyamannaṃ dadyāt sumiṣṭakam || 24 ||
[Analyze grammar]

vastrā'laṃkāravidhinā'bhyarcya māṃ pūjayed gurum |
mantrabhaktividhihīnaṃ pūjitaṃ pūrṇamastu te || 25 ||
[Analyze grammar]

dhanyā'haṃ kṛtakṛtyā'haṃ saubhāgyā dharaṇisthitā |
yāṃ māmaṅgīkṛtya nāthaḥ śrīkṛṣṇo muktido'sti me || 26 ||
[Analyze grammar]

sarvavāsanānirmuktā divyā rāghāsamā'dya vai |
jātā'smi gauravaṃ prāptā guroḥ pratāpato bhuvi || 27 ||
[Analyze grammar]

namaste gurave kṛṣṇātmakāya paramātmane |
pratiṣṭhādivyamūrtistvaṃ guruḥ kṛṣṇo hi tārakaḥ || 28 ||
[Analyze grammar]

sarvānandaprado muktipradastvaṃ me gururhariḥ |
sarvabandhaprahartā ca pāpatāpavināśakaḥ || 29 ||
[Analyze grammar]

brahmakaivalyadātā me paramākṣaradhāmadaḥ |
paramātmasvarūpastvaṃ namaste paramātmane || 30 ||
[Analyze grammar]

dhanyā'smi kṛtakṛtyā'smi saphalaṃ jīvitaṃ ca me |
majjanmani nidāne ca dhanyau tau pitarau mama || 31 ||
[Analyze grammar]

yanmayā'nādibhagavān vallabhaḥ samupārjitaḥ |
tvayā kṛṣṇa viyuktā'haṃ yathā na syāṃ tathā kuru || 32 ||
[Analyze grammar]

dānaṃ tapo vrataṃ bhaktiḥ sevā pūrvaṃ kṛtā mayā |
yayā'haṃ kṛṣṇakāntaṃ vai labdhavatyadya bhūtale || 33 ||
[Analyze grammar]

bahupuṇyapratāpena labdhavatī hariṃ gurum |
gurau sannihito viṣṇuḥ svabhakteṣveva sarvathā || 34 ||
[Analyze grammar]

gurāvāste hariśceti mahimānaṃ vibhāvayet |
gururdṛṣṭaḥ praṇamitaḥ snāpitaḥ pūjitastathā || 35 ||
[Analyze grammar]

yajñakoṭisamaṃ puṇyaṃ dadāti gurusevine |
doṣayuktā'pi yā nityaṃ bhaktibhāvānvitā satī || 36 ||
[Analyze grammar]

gurvīmūrtiṃ pūjayet sā'cyutā bhavati dhāmani |
gurvīmūrtirmahāhatyāpāpātipātanāśinī || 37 ||
[Analyze grammar]

smṛtā saṃkīrtitā dhyātā pūjitā ca namaskṛtā |
gurvīdevīpratimā sā dhāmā'kṣarapradāyinī || 38 ||
[Analyze grammar]

ācāryāṇīṃ satīṃ gurvīṃ sādhvīṃ brāhmīṃ pativratām |
harivratāṃ yoginīṃ ca prāpyā''sevya pramucyate || 39 ||
[Analyze grammar]

siṃhīṃ vīkṣya yathā yānti mṛgyo bhayāttathā tviha |
māyāḥ sarvāḥ pāpamayyo gurvīprāptyā viyanti hi || 40 ||
[Analyze grammar]

namaskaroti yā śiṣyā gurustrīṃ pāvanīṃ satīm |
bhaktyā vā yadi vā'bhaktyā sā puṇyā muktigāminī || 41 ||
[Analyze grammar]

vaivasvatabhayaṃ nāsti tasyā maraṇajanmanoḥ |
yā karoti satī sevāṃ pūjanaṃ guruyoṣitaḥ || 42 ||
[Analyze grammar]

gandhapādyā'rghanaivedyairdīpairdhūpairvilepanaiḥ |
gītairvādyaistathā stotrairguvīṃṃ devīṃ prarañjayet || 43 ||
[Analyze grammar]

arcayate mānavī māṃ satībhaktiparāyaṇā |
kalpakoṭyayutānyeṣā ramate mama sadmani || 44 ||
[Analyze grammar]

gurudevanamaskāro bhāvenā'pi yayā kṛtaḥ |
sā devī mānuṣe loke mamā'nugrahapātrikā || 45 ||
[Analyze grammar]

madbhaktibaladarpasthā mama sādhuparāyaṇā |
gurvīsevāparā sādhvī modate mama dhāmani || 46 ||
[Analyze grammar]

gurudevapratimāyāṃ lakṣmi sadā vasāmyaham |
padmakoṭisahasraistu viṣṇupūjāphalaṃ tu yat || 47 ||
[Analyze grammar]

gurudevasya pūjāyāṃ phalaṃ tallabhate satī |
na kṛtaṃ martyaloke yairgurudevārcanaṃ janaiḥ || 48 ||
[Analyze grammar]

te mṛtā eva ca muhurjāyante karmabhāginaḥ |
gurudevasya nikaṭe sarvaṃ yāti pavitratām || 49 ||
[Analyze grammar]

bhuktvā guroḥ prasādaṃ ca yajñakoṭiphalaṃ bhavet |
guroḥ pādodakaiḥ pītairhatyākoṭirvinaśyati || 50 ||
[Analyze grammar]

kāśīvāso yugānyaṣṭau dinaikagurusevanāt |
tasmād guroḥ pūjanaṃ vai kartavyaṃ mokṣakāmyayā || 51 ||
[Analyze grammar]

gurudevasvarūpaḥ śrīpatiryatra hi tiṣṭhati |
tatra devāḥ surāḥ sādhvyaśceśvarāśca vasanti vai || 52 ||
[Analyze grammar]

surāṇāṃ kīrtanaiḥ sarvaiḥ koṭibhiryat phalaṃ bhavet |
tatphalaṃ śrīhareścāpi gurośca kīrtanād bhavet || 53 ||
[Analyze grammar]

gurudevamukhe hutvā sakṛt piṇḍena tarpitāḥ |
pitarastṛptimāyānti śāśvatīṃ cā'mṛtānvitām || 54 ||
[Analyze grammar]

ye pibanti janā vāri guroścaraṇapāvitam |
pañcagavyasahasraistu prāśitaiḥ kiṃ prayojanam || 55 ||
[Analyze grammar]

prāyaścitte samutpanne kiṃ dānaiḥ kimupoṣaṇaiḥ |
cāndrāyaṇaiśca vā kiṃ vai pītvā pādodakaṃ guroḥ || 56 ||
[Analyze grammar]

yo dadāti gurave'tra ghṛtaṃ dugdhaṃ ca śarkarām |
teneṣṭaṃ sarvamiṣṭānnaisteneṣṭaṃ kratubhiḥ śataiḥ || 17 ||
[Analyze grammar]

gṛhe'pi vasatastasya tīrthasnānaṃ dine dine |
dīkṣā'sya sarvayajñeṣu yena santoṣito guruḥ || 58 ||
[Analyze grammar]

svarge martye ca pātāle guravaḥ santi tārakāḥ |
gurudevasamaṃ nāsti trailokye pāvanaṃ param || 59 ||
[Analyze grammar]

mānuṣe subhage loke saphalaṃ jīvitaṃ yataḥ |
guroḥ prāptiḥ kṛtā yena yayā vā sevanaṃ guroḥ || 60 ||
[Analyze grammar]

patraṃ puṣpaṃ phalaṃ toyaṃ vastraṃ dravyaṃ ca bhojanam |
jāyate meruṇā tulyaṃ gurudevasamarpaṇāt || 61 ||
[Analyze grammar]

vidhihīnā'pi yā nārī kriyāmantrādivarjitā |
gurubhaktā'rcayed bhaktyā tasyāḥ śāstroditaṃ phalam || 62 ||
[Analyze grammar]

nivasāmi sadā tatra dehe gurorgurau sadā |
skandhe yāne guruṃ kṛtvā yo'dhvānaṃ vahate janaḥ || 63 ||
[Analyze grammar]

tasya mārgo hyaniruddho mama dhāmno'sti sarvadā |
gurudevasthitiryatra tatra sannihito hariḥ || 64 ||
[Analyze grammar]

tatra tīrthaṃ mahādānaṃ kurukṣetraṃ ca naimiṣam |
puṣkaraṃ ca prayāgaṃ cāpyaśvapaṭṭasarastathā || 65 ||
[Analyze grammar]

bālakṛṣṇasaraścāpi viṣaturyasarastathā |
tatra nārāyaṇī cāpi tatrerāvatikā nadī || 66 ||
[Analyze grammar]

menakāṃgā ca tatraiva brahmaputrā'pi tatra ca |
yatra gurornivāso'sti sarvatīrthāni tatra vai || 67 ||
[Analyze grammar]

brahmahatyādikaṃ pāpaṃ yatkiṃcijjāyate jane |
tatsarvaṃ nirdahatyāśu gurudevaprasevanam || 68 ||
[Analyze grammar]

gurormūrtirharermūtiryatrobhayorhi saṃgamaḥ |
tatra dvāravatī bodhyā muktidā bhaktirācyutī || 69 ||
[Analyze grammar]

gurvarcane na mantrāśca na japo na ca bhāvanā |
na dravyaṃ na hīrakādi nopadā netarattvapi || 70 ||
[Analyze grammar]

na stutirnāpi dainyaṃ ca premamātramapekṣate |
akṛtyasyā'pyabhakṣyasyā'peyasya grahaṇe kṛte || 71 ||
[Analyze grammar]

yatpāpaṃ tad vinaśyedvai santuṣṭe śrīgurau harau |
pūjanaṃ kurute gurvyā nityaṃ śiṣyā tu yā satī || 72 ||
[Analyze grammar]

sevanaṃ kurute gurvyāḥ pādasaṃvāhanādikam |
anantottarakālaṃ sā vaidhavyaṃ vindate na vai || 73 ||
[Analyze grammar]

kṛṣṇasaubhāgyamāpannā padminī jāyate ramā |
guroḥ chāyāṃ samāśritya dadyād dānāni vai sadā || 74 ||
[Analyze grammar]

na jahyācca guroḥ pārśvaṃ yāmyabhīto janastviha |
guroragre yamadūtā na cā''yānti kadācana || 75 ||
[Analyze grammar]

guroḥ sevā hareḥ sevā patyuḥ sevā yayā kṛtā |
saphalaṃ jīvitaṃ tasyā yasyā gehe trayaṃ sadā || 76 ||
[Analyze grammar]

sanniyamyā'nyato vṛttīrgurudevasya toṣaṇam |
yā kuryānmānavī sādhvī bhaktyā sevāṃ ca pūjanam || 77 ||
[Analyze grammar]

yathāyogyaṃ vastūnāmarpaṇaṃ nivedanaṃ jalam |
śraddhayā gurave datte puṣpe puṣpe'śvamedhajam || 78 ||
[Analyze grammar]

phalaṃ sā vindate śiṣyā sākṣād guruhariśritā |
janmaduḥkhajarārogairmuktā sā mokṣagā matā || 79 ||
[Analyze grammar]

gavāmayutadānena yatphalaṃ prāpyate tviha |
gurave padmamālāṃ vai samarpyeyāddhi tatphalam || 80 ||
[Analyze grammar]

durlabhaṃ cāpi duṣprāpaṃ trailokye sacarācare |
tadapi prārthitaṃ lakṣmi gurusevā dadāti vai || 81 ||
[Analyze grammar]

aiśvaryaṃ santatiṃ jñānaṃ rājyaṃ ca sukhasampadaḥ |
gurukṛpā dadātyeva sevālabhyā hi sā matā || 82 ||
[Analyze grammar]

merumandaratulyāni pāpāni sarvathā layam |
yānti guroḥ sevanāddhi sākṣāddharirgururhi saḥ || 83 ||
[Analyze grammar]

namo nārāyaṇāyeti namaḥ śrīgurave tathā |
uktvā nityaṃ nameddevaṃ guruṃ hariṃ patiṃ prabhum || 84 ||
[Analyze grammar]

vrajet sā paramātmānaṃ dhāmā'kṣaranivāsinam |
śāśvatā''nandadātāraṃ hyanāmayapadasthitam || 85 ||
[Analyze grammar]

gurornāma harernāma paṭhate yā muhurmuhuḥ |
yāti sā paramaṃ dhāma punarjanma na vindati || 86 ||
[Analyze grammar]

kule tasyāśca ye jātāḥ śataśo'tha sahasraśaḥ |
te'pi yānti paraṃ dhāma yayā santoṣito guruḥ || 87 ||
[Analyze grammar]

mahotsaveṣu sarveṣu guruṃ sampūjayet satī |
pūjayitryā gṛhe nityaṃ bhaveyurvai mahotsavāḥ || 88 ||
[Analyze grammar]

āṣāḍhe bhāvanā'bhijñā pūrṇāyāṃ pūjayed gurum |
tatphalaṃ labhate nārī saubhāgyaṃ śāśvataṃ satī || 89 ||
[Analyze grammar]

snāpayeduṣṇasalilairgandhadravyairvilepayet |
mardayed gandhatailaiśca svacchadravyaiḥ pramārjayet || 90 ||
[Analyze grammar]

abhiṣekaṃ kārayecca dhārayedambarāṇi ca |
śṛṃgārayecca śṛṃgārairarcayedakṣatādibhiḥ || 91 ||
[Analyze grammar]

puṣpacandanamālyaiśca samarcayed guruṃ satī |
vibhūṣā dhārayeccāpi dhūpadīpādi kārayet || 92 ||
[Analyze grammar]

phalāmiṣṭānnapānādi dadyācchrīgurave tataḥ |
dakṣiṇāṃ prā'rpayeccāpi yathāvaibhavamuttamam || 93 ||
[Analyze grammar]

pādāmṛtaṃ pibeccāpi pādasaṃvāhanaṃ caret |
gurvyāḥ sadā'ṅgamardādi kuryācchiṣyā satī śubham || 94 ||
[Analyze grammar]

yāne kṛtvā vāṭikāyāṃ mahodyāne gṛhe tathā |
guruṃ gurvīṃ nayedvāpi toṣayed bhaktisaṃbhṛtā || 95 ||
[Analyze grammar]

anādiśrīkṛṣṇanārāyaṇaṃ māṃ paramaṃ gurum |
evaṃ prasādayet sādhvī vadhūryā śrīnarāyaṇi || 96 ||
[Analyze grammar]

anyā vā svapatiṃ kṛṣṇaṃ prasādayeddhi bhāvataḥ |
tathā yā svaguruṃ prasādayedvai sevayā satī || 97 ||
[Analyze grammar]

sarvāstā brahmarūpā vai mokṣagāḥ santi padmaje |
divyā divyasvarūpāśca parāyā divyatāpradāḥ || 98 ||
[Analyze grammar]

svasyāḥ samāgamaṃ prāptā yā yā bhavanti yoṣitaḥ |
tāstā divyāstathā bhūtvā prayāsyanti paraṃ padam || 99 ||
[Analyze grammar]

hariścāhaṃ sadā divyaḥ śaktirdivyā ca me sadā |
sā ca tvaṃ śrīstathā rādhā ramā prajñā ca māṇikī || 100 ||
[Analyze grammar]

lakṣmīrgaṃgā ca virajā padmāvatī ca mādhavī |
evamādyāḥ śaktayo me divyā brahmapriyā hi tāḥ || 101 ||
[Analyze grammar]

haripriyā na me bhinnā abhinnāstāḥ sadā mama |
vasanti śaktayaḥ sarvā gurvyāṃ gurau sadā priyāḥ || 102 ||
[Analyze grammar]

ahaṃ śaktisahito vai nivasāmi vadhūjane |
svāmijane nivasāmi sādhau patyau vasāmi ca || 103 ||
[Analyze grammar]

pūrayāmi manaḥkāmān tattadgurutvamāsthitaḥ |
evaṃ śrīśivarājñīśri māṃ prasevaya mādhavam || 104 ||
[Analyze grammar]

paṭhanāchravaṇādasya smaraṇād vandanādapi |
bhāvagrāhādapi muktirbhavedeva na saṃśayaḥ || 105 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne vadhūgītāyāṃ sarvatithiṣu harerbhinnarūpasya pūjā gururūpasya sadā pūjā cetyādinirūpaṇanāmā catuṣṣaṣṭitamo'dhyāyaḥ || 64 ||
[Analyze grammar]