Chapter 56

śrīnārāyaṇīśrīruvāca |
bhagavan devadeveśa gurutīrthaṃ parātparam |
kathaṃ vai śreṣṭhatamatāṃ prāptaṃ me vada kāraṇām || 1 ||
[Analyze grammar]

śrīpuruṣottama uvāca |
bhūmiśuddhirvāyunaiva dehaśuddhistu vāriṇā |
manaḥśuddhirvirāgeṇa cātmaśuddhirvivekataḥ || 2 ||
[Analyze grammar]

vivekastattvavijñānaṃ tacca gurorvinā na vai |
tūrṇaṃ prakāśadātṛtvād gurustvaṃ paramo mataḥ || 3 ||
[Analyze grammar]

andhakāre manuṣyāṇāṃ lakṣeṣvapi pradīpakaḥ |
prakāśakṛd bhavatyeva tathā guruḥ pradīpakaḥ || 4 ||
[Analyze grammar]

bahūnāṃ yādasāṃ cābdhau sattve'pi naurhi tārikā |
jagadabdhau dehināṃ sattve'pi gururhi tārakaḥ || 5 ||
[Analyze grammar]

tārāṇāṃ gagane nāntaḥ prakāśakastu candramāḥ |
mānavānāṃ tathā nāntaḥ prakāśadastu sadguruḥ || 6 ||
[Analyze grammar]

anyairgrahairna vai nāśo niśāyā vigamaḥ kvacit |
anyairjanairna cā'jñānavigamaḥ sadguruṃ vinā || 7 ||
[Analyze grammar]

jalaṃ tīrthaṃ bhūmirijyā yajño vrataṃ ca caityakam |
sadguruṇaiva tīrthāni sañjātāni purā kila || 8 ||
[Analyze grammar]

mūrtitīrthaṃ pratimākhyaṃ jñānatīrthaṃ tu pustikā |
tu hyubhe sadguroreva samudbhūte na cānyathā || 9 ||
[Analyze grammar]

devā gurubalāḥ sarve mantrā gurubalāstathā |
yogo gurubalaścāpi gurutīrthaṃ tato'dhikam || 10 ||
[Analyze grammar]

gurutvaṃ mama yogena vardhate ca prakāśate |
camatkāramayaṃ cāpi jāyate mama saṃgataḥ || 11 ||
[Analyze grammar]

mama saṃgo mama sneho mama bhaktiḥ prasevanam |
mamaiva ca kṛtaṃ yena gurutā tasya śāśvatī || 12 ||
[Analyze grammar]

śāśvato'haṃ gururyasmādanādijñānavān prabhuḥ |
mama yogena bhaktasya śāśvatī gurutā tataḥ || 13 ||
[Analyze grammar]

mūlyavadvastuyogena nirmūlyaṃ mūlyavadbhavet |
dugdhavatsāyutā gauśca bahumūlyā sadā bhavet || 14 ||
[Analyze grammar]

vidyākhanirmānavaśca bahumūlyaḥ prajāyate |
nairmalyabhāhīrako'pi bahumūlyaḥ pragaṇyate || 15 ||
[Analyze grammar]

pittalaṃ svarṇasaṃgena bahumūlyaṃ hi jāyate |
kanyā varayutā loke bahumūlyā supūjyate || 16 ||
[Analyze grammar]

bhṛtyā rājayutāḥ sarve rājamūlyā bhavanti vai |
pātraṃ vastubhṛtaṃ cāpi mūlyavajjāyate priye || 17 ||
[Analyze grammar]

evaṃ bhakto bhaktiyukto mayā yukto viśeṣataḥ |
nairmalyabhāvayuktaśca bahumūlyaḥ prajāyate || 18 ||
[Analyze grammar]

bhṛtyaḥ prasannaḥ sahasā prajākāryaṃ karoti vai |
kārayatyeva sahasā nṛpadvārā tvarāyutaḥ || 19 ||
[Analyze grammar]

na tu rājñaḥ puttalikā prajākāryaṃ karoti hi |
na ca puttalikā kāryaṃ tvaritaṃ kārayatyapi || 20 ||
[Analyze grammar]

tathā bhṛtyā mama bhaktāḥ śaraṇāgatarakṣakāḥ |
śaraṇāgatakāryāṇāṃ kartāraḥ sahasā hyapi || 21 ||
[Analyze grammar]

caitanyamūrtayo me vai sādhavo guravo bhuvi |
rājño vai kāryakartāro bhṛtyāścaitanyamūrtayaḥ || 22 ||
[Analyze grammar]

abhidhāya hasitvā ca gṛhitvā sevanādikam |
datvā dānaṃ manuṃ bhānaṃ kurvantīṣṭaṃ hi dehinām || 23 ||
[Analyze grammar]

śaraṇāgatajīvānāmādhārā guravo yataḥ |
mayā dattaṃ gurubhyo vai padaṃ me'dhikṛtistathrā || 24 ||
[Analyze grammar]

madvad bhavanti pūjyāste loke nārāyaṇā hi te |
yathā'haṃ ca tathā te'pi mama bhaktipravartakāḥ || 25 ||
[Analyze grammar]

tasmātte guravaḥ śreṣṭhāstīrthaṃ gurvātmakaṃ param |
pāpānāṃ kṣālanaṃ śīghraṃ kurvanti vāridānataḥ || 26 ||
[Analyze grammar]

ajñānanāśanaṃ śīghraṃ kurvanti mantradānataḥ |
svargādikāṃ mahāsmṛddhimāśīrvādairdahatyapi || 27 ||
[Analyze grammar]

prasādena drutaṃ mokṣapadaṃ sampreṣayantyapi |
līlayā me kvacittūrṇaṃ kārayantīha darśanam || 28 ||
[Analyze grammar]

mama divyasvarūpasya kṛpayā darśanaṃ hṛdi |
tasmānme sādhavaḥ śreṣṭhā guravo lakṣmi sarvadā || 29 ||
[Analyze grammar]

bhaktyā me te bhavantyeva śreṣṭhatamāḥ pareśvarāḥ |
bhaktiṃ te kathayāmyatra yayā śreṣṭhatamā hi te || 30 ||
[Analyze grammar]

gurudevarṣisiddharṣisevanaṃ sādhusaṃgamaḥ |
satkriyāvyasanaṃ cā'trāparā bhaktirmatā mama || 31 ||
[Analyze grammar]

mamāṃśānāṃ guruṇāṃ yā sevā sā cā'parā mama |
bhaktireva mayā nityaṃ manyate mokṣadāyinī || 32 ||
[Analyze grammar]

prāpya brahmarasaṃ divyaṃ pītvā cānandasaṃbhṛtam |
bhaktā brahmaparābhogāstṛptā bhavanti śāśvatāḥ || 33 ||
[Analyze grammar]

brahmarasābhiplutāśca bhavantyakṣararūpiṇaḥ |
yathā'gniragnau samprāptastathā''tmā paramātmani || 34 ||
[Analyze grammar]

brahmarūpakaraṃ nāma hare hare sadā japet |
ahaṃ brahmaparaṃjyotirmāyātattvavivarjitaḥ || 35 ||
[Analyze grammar]

ahaṃ brahma paraṃjyotirjñānavānasmi muktaye |
bhaktyā jñānāḍhyayā labhyo bhagavān puruṣottamaḥ || 36 ||
[Analyze grammar]

dhyānena pūjayā japyaiḥ samyak stotrairyatavrataiḥ |
sevayā premabhaktyā vai prāpyo'haṃ parameśvaraḥ || 37 ||
[Analyze grammar]

mahataḥ śreyaso mūlaṃ prasavaḥ puṇyasantateḥ |
jīvitasya phalaṃ svādu niyatismaraṇaṃ hareḥ || 38 ||
[Analyze grammar]

sevā snehayutā bodhyā bhaktiḥ sādhanabhūyasī |
bhaktāste mama sevāyāṃ lagnā cābhinnabhāvanaiḥ || 39 ||
[Analyze grammar]

muñcantyaśrūṇi saṃharṣāt saṃprahṛṣṭatanūruhāḥ |
kṛṣṇakriyāparā nityaṃ snigdhā me vaiṣṇavāḥ sadā || 40 ||
[Analyze grammar]

brahmā'kṣaraṃ parabrahma śṛṇvan bhāgavatān gṛṇan |
praṇāmapūrvakaṃ bhaktyā kīrtayed vaiṣṇavottamaḥ || 41 ||
[Analyze grammar]

me bhaktajanavātsalyaṃ bhaktapūjā'numodanam |
bhaktagāthāśrave prītaḥ sa vai bhaktottamo mataḥ || 42 ||
[Analyze grammar]

yena sarvātmanā kṛṣṇe bhaktyā bhāvaḥ samarpitaḥ |
sadguroḥ śaraṇaṃ prāpya mahābhāgavato hi saḥ || 43 ||
[Analyze grammar]

svayaṃ tvabhyarcayenmāṃ vai viṣṇuṃ tathopajīvati |
bahudhā bhaktisampanno mleccho'pi vaiṣṇavo hi saḥ || 44 ||
[Analyze grammar]

sa vai śreṣṭho munirbhaktaḥ sa yāti paramāṃ gatim |
tasmai deyaṃ tato grāhyaṃ sa ca pūjyo yathā hariḥ || 45 ||
[Analyze grammar]

punāti bhagavadbhaktaścāṇḍālo'pi yadṛcchayā |
mama bhakto na cāṇḍālo divyo me pārṣado'sti saḥ || 46 ||
[Analyze grammar]

dayāṃ kuru prapannāya tavā'smīti ca yācate |
abhayaṃ sarvabhūtebhyo dadyādetadvrataṃ hareḥ || 47 ||
[Analyze grammar]

mantrayājisahasrebhyo vedavedāntavit paraḥ |
sarvavedāntavijñebhyo viṣṇubhakto viśiṣyate || 48 ||
[Analyze grammar]

ekāntino divyadehairgacchanti paramaṃ padam |
ekāntena samo viṣṇurviṣṇurbhaktaparāyaṇaḥ || 49 ||
[Analyze grammar]

bhaktā ekāntinaḥ santo viprakoṭyuttamā matāḥ |
priyāṇāmapi sarveṣāṃ mama cātipriyā hi te || 50 ||
[Analyze grammar]

mahābhāgavatāḥ santaḥ sādhavo viprakoṭitaḥ |
brāhmaṇānāmarbudebhyaḥ sadā śreṣṭhatamā matāḥ || 51 ||
[Analyze grammar]

lokānāṃ guravo viprā viprāṇāṃ vedayājinām |
brāhmaṇānāṃ ca sarveṣāṃ sādhavo guravo matāḥ || 52 ||
[Analyze grammar]

viprā gṛhanimagnāste śmaśānāni ha bhejire |
sādhavo brahmamagnāste paraṃdhāma prapedire || 53 ||
[Analyze grammar]

āpatsvapi sadā yeṣāṃ bhaktiravyabhicāriṇī |
yā prītiradhikā kṛṣṇe viṣṇau sadā'napāyinī || 54 ||
[Analyze grammar]

viṣṇuṃ smaran mama bhakto hṛdo na dūrameti saḥ |
dṛḍhabhakto rajjupāśairbaddho baghnāti māṃ mithaḥ || 55 ||
[Analyze grammar]

yo bhaktiṃ vahate viṣṇau tena sarvaṃ prasādhitam |
sa eva sādhurevā'sti yenā'haṃ sādhitaḥ priyaḥ || 56 ||
[Analyze grammar]

yajvānaḥ kratumukhyānāṃ vedānāṃ pāragā api |
na tāṃ yānti gatiṃ śreṣṭhāṃ yāṃ yānti munisattamāḥ || 57 ||
[Analyze grammar]

yaḥ kaścid vaiṣṇavo loke mithyācāro'pyanāśramī |
punāti sakalān lokān yathā'haṃ bhagavān svayam || 58 ||
[Analyze grammar]

ye nṛśaṃsā durātmānaḥ pāpācāraratāstathā |
yānti sthānaṃ paraṃ me te nārāyaṇaparāyaṇāḥ || 59 ||
[Analyze grammar]

dṛḍhā nārāyaṇe bhaktiḥ sadā yā'vyabhicāriṇī |
saiva śāśvatsukhadā'sti kiyat svargaṃ tadantike || 60 ||
[Analyze grammar]

bhramitvā'pi mahābdhau vai saṃsārākhye'bhito muhuḥ |
pralambya svakaraṃ kṛṣṇaṃ dharantu yadi cāpyate || 61 ||
[Analyze grammar]

na śṛṇoti guṇān divyān śrīhareḥ paramātmanaḥ |
sa loke badhiro bodhyaḥ sadā pāpaśravo'thavā || 62 ||
[Analyze grammar]

nāmni saṃkīrtite viṣṇoryasya no pulakodgamaḥ |
sa rājā'pi surūpo'pi bodhyo vai kuṇapaḥ śavaḥ || 63 ||
[Analyze grammar]

bhaktimatāṃ narāṇāṃ ca nārīṇāṃ ṣaṇḍhadehinām |
mayi niviṣṭamanasāṃ muktirniścayabhāvinī || 64 ||
[Analyze grammar]

pāśahastān yamānāha yamarājo hyahaṃ prabhuḥ |
avaiṣṇavānāṃ pāpānāṃ vaiṣṇavān mā nayantviha || 65 ||
[Analyze grammar]

api yāvaddurācāro bhajate māṃ mayi sthitaḥ |
sādhureva sa vai muktaḥ koṭiviprā'dhiko guruḥ || 66 ||
[Analyze grammar]

mahābhāgavatā dharmāstasmin sarve vasanti ha |
sarvavidhā tathā śāntistatra vasati padmaje || 67 ||
[Analyze grammar]

dharmārthakāmāścaitasya kiyatīṃ gaṇanāṃ gatāḥ |
muktiścāsya sadā dāsī muktiścāsya kare sthitā || 68 ||
[Analyze grammar]

māyā vā māyikā lokāścaiśvaryāṇi ca siddhayaḥ |
bhujyamānā api naiva bādhante mama yoginaḥ || 69 ||
[Analyze grammar]

kiṃ yajñaiḥ kiṃ vratairdānaiḥ kimanyaiḥ puṇyasādhanaiḥ |
yasya prītirharau jātā tayā cārādhyate prabhuḥ || 70 ||
[Analyze grammar]

anyairlepaiḥ pradīpādyaiścandanairgandhabhūṣaṇaiḥ |
nā'haṃ tuṣyāmi kamale yathā premṇā'rpaṇena vai || 71 ||
[Analyze grammar]

saṃsāraviṣavṛkṣasya dve phale hyamṛtopame |
mayi kṛṣṇe parā bhaktirmadbhaktaiśca samāgamaḥ || 72 ||
[Analyze grammar]

patraiḥ puṣpaiḥ phalaiścādbhirdhanairbhojyairvibhūṣaṇaiḥ |
bhaktyā labhye mayi nāthe vartayenmuktidāyinī || 73 ||
[Analyze grammar]

āsphoṭayanti pitaraḥ pranṛtyanti pitāmahāḥ |
pretāścāsmatkule bhaktaḥ kaścinnastārayiṣyati || 74 ||
[Analyze grammar]

śaraṇaṃ māṃ prapannā ye dhyānajñānavivarjitāḥ |
te'pi mṛtyumatikramya yānti matparamaṃ padam || 75 ||
[Analyze grammar]

muktihetumanādyantaṃ śrīpatiṃ puruṣottamam |
yo namet sarvalokasya namasyo jāyate janaḥ || 76 ||
[Analyze grammar]

viṣṇumānandakośaṃ taṃ cāntarasthaṃ prabhuṃ harim |
praṇamet sarvadā bhaktyā cetasā dehayoginā || 77 ||
[Analyze grammar]

yo'ntastiṣṭhan samagrāṇāṃ paśyatīśaḥ śubhāśubham |
taṃ sarvasākṣiṇaṃ kāntaṃ praṇamet parameśvaram || 78 ||
[Analyze grammar]

helayā'pi namaskāraḥ prayuktaścakrapāṇaye |
saṃsārapāśarajjūnāṃ nāśakaḥ samajāyate || 79 ||
[Analyze grammar]

anādiśrīkṛṣṇanārāyaṇe śrīkṛṣṇarūpiṇi |
bhāvakṛtaḥ praṇāmo'pi śvapākaṃ ca punātyapi || 80 ||
[Analyze grammar]

praṇamya daṇḍavad bhūmau namaskāraṃ carenmudā |
ekapraṇāmamātreṇa yāti matparamaṃ padam || 81 ||
[Analyze grammar]

namaskāreṇa me lakṣmi śāśvatī muktireva ha |
ahaṃ kṛṣṇo namantaṃ vaiṃ tārayāmi bhavārṇavāt || 82 ||
[Analyze grammar]

āsīno vā śayāno vā tiṣṭhan vā yatra tatra vā |
namo nārāyaṇāyeti mantraṃ japet sadā sudhīḥ || 83 ||
[Analyze grammar]

nārāyaṇeti me nāma jihvāyogyaṃ pravidyate |
tathāpi yāmyaṃ paśyanti gṛhaṃ vaitaṇḍikā janāḥ || 84 ||
[Analyze grammar]

vyāsādayaḥ śaṃkarādyāḥ stuvantaḥ parameśvaram |
matiśramānnivartante madguṇānto na vidyate || 85 ||
[Analyze grammar]

avaśo'pi raṭennāma nārāyaṇeti cā'sakṛt |
baddhaḥ parikarastena mokṣāya gamanaṃ prati || 86 ||
[Analyze grammar]

svapne'pi śrīharernāma raṭitaṃ ca śrutaṃ ca vā |
mokṣārthaṃ jāyate tadvai kiṃ punarjāgratastviha || 87 ||
[Analyze grammar]

namaḥ kāntāya kṛṣṇāya namaḥ śrīharaye namaḥ |
svāmine ca namaśceti vadan mokṣagatiṃ labhet || 88 ||
[Analyze grammar]

kalmāṣāṇāṃ kṣayaḥ syādvai nāmasaṃkīrtanāddhareḥ |
gacchatāṃ dūramadhvānaṃ śrīharerdhāmayojitam || 89 ||
[Analyze grammar]

pātheyaṃ śrīharernāmakīrtanaṃ lakṣmi sarvathā |
vadhvaḥ striyo'tilajjāśca gṛhamadhye sthitā api || 90 ||
[Analyze grammar]

kṛṣṇakānta hare japtvā muktā bhavanti dhāmagāḥ |
jihvāgre vartate yasyā harirityakṣaradvayam || 91 ||
[Analyze grammar]

saṃsārasāgaraṃ tīrtvā sā prayāsyati matpadam |
sahasraduṣkṛtivyāptā dharmakarmavivarjitā || 92 ||
[Analyze grammar]

śuddhimabhīpsamānā ca muktiṃ ca matpadāśrayām |
guptā'pi mannāmaparā bhūtvā māṃ sā samarjayet || 93 ||
[Analyze grammar]

aśeṣalokakāntasyā''rādhanaṃ śrīharermama |
sāraścā'sārasaṃsāre yoṣitāṃ sarvathā priye || 94 ||
[Analyze grammar]

dadyād hṛdayabhāvena puṣpāṇyāpastathā phalam |
mahyaṃ tenā'rcitā devāścārcitaṃ muktamaṇḍalam || 95 ||
[Analyze grammar]

na tatkaroti mātā'pi na pitā nāpi bāndhavaḥ |
yat karomi prabhuścāhaṃ santuṣṭaḥ sevayā'rcitaḥ || 96 ||
[Analyze grammar]

varṇāśramācāravatyā yoṣitā paramaḥ pumān |
ahamārādhye vai lakṣmi sa panthāstoṣako mama || 97 ||
[Analyze grammar]

sampadaiśvaryamāhātmyaiḥ santatyā śraddhayā'pi ca |
premabhaktyā'nvitaiḥ sarvairārādhyo'haṃ bhavāmi vai || 98 ||
[Analyze grammar]

bhaktiṃ vinā vinā snehaṃ vinā prema ca bhāvanām |
nā'haṃ prasannatāṃ yāmi bhāvakṣudhāyuto'smyaham || 99 ||
[Analyze grammar]

pūrve pūrvatarāścāpi gatā me'kṣaramuttamam |
pūrvatamā gatā bhaktyā tathā yāntu striyo'pi ca || 100 ||
[Analyze grammar]

evaṃ māṃ sarvadā kṛṣṇarūpiṇaṃ śrīpatiṃ prabhum |
svāminaṃ cāntarātmānaṃ rakṣanti hṛdi sādhavaḥ || 101 ||
[Analyze grammar]

ta eva mama yogena santaḥ satyaśca sādhavaḥ |
sādhvyaśca guruvargīyāḥ sarvaśreṣṭhatamā matāḥ || 102 ||
[Analyze grammar]

madātmakā matsvarūpā madanyūnā narāyaṇāḥ |
avatārā hi me sarve sādhavaḥ satyayoṣitaḥ || 103 ||
[Analyze grammar]

sādhvyaḥ sarvā avatāriṇyaśca me tā bhavanti vai |
tasmād gurvyo mama yogānmantradā mokṣadā api || 104 ||
[Analyze grammar]

evaṃ nārāyaṇāśri vai guroḥ śraiṣṭhyaṃ sadā'sti hi |
ahaṃ gururguruścāhaṃ nātra bhedo manāgapi || 105 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne vadhūgītāyāṃ guroḥ śreṣṭhatamatve śrīharisvarūpatāhetunirūpaṇanāmā ṣaṭpañcāśattamo'dhyāyaḥ || 56 ||
[Analyze grammar]