Chapter 49

śrīnārāyaṇīśrīruvāca |
kṛpānātha ramānātha sarvānātha satāṃ pate |
yā puṇyapuñjarahitā bubhukṣukoṭikā bhavet || 1 ||
[Analyze grammar]

tasyā bījabalārthaṃ vai kiṃ vidheyaṃ bhavediha |
ādyārambhe mumukṣutābhāvasya vada me hare || 2 ||
[Analyze grammar]

śrīpuruṣottama uvāca |
śṛṇu nārāyaṇīśri tvaṃ pāpāyā api śuddhaye |
kramabhāvaṃ kathayāmi yena cāntapadaṃ labhet || 3 ||
[Analyze grammar]

ārtikāle vipatkāle tasyai vācyaṃ balaṃ mama |
smṛto'pi manasā kṛṣṇo vipannāśaṃ karoti vai || 4 ||
[Analyze grammar]

sā smarenmāṃ tataścā'syai sakāmāyai vrataṃ śubham |
lakṣmīnārāyaṇākhyaṃ vai vācyaṃ kuryāt tato hi sā || 5 ||
[Analyze grammar]

dehaśuddhiṃ pañcagavyairvidadhyācca tataḥ param |
mama prāsādikaṃ vāri pibedācamanīyakam || 6 ||
[Analyze grammar]

upavāsaṃ prakuryācca mama pūjanamācaret |
śṛṇuyādvai vadhūgītāṃ mantrān me śṛṇuyāttataḥ || 7 ||
[Analyze grammar]

śaraṇaṃ śrīkṛṣṇanārāyaṇo'stu mama sarvadā |
oṃ namaḥ śrīkṛṣṇanārāyaṇāya pataye svāhā || 8 ||
[Analyze grammar]

kālamāyāpāpakarmaśatruyāmyakuhṛdbhayāt |
śūlamīnadhvajadhanuścakrasvastikavānava || 9 ||
[Analyze grammar]

brāhamyahaṃ śrīkṛṣṇanārāyaṇabhaktā'smi śāśvatī |
anādiśrīkṛṣṇanārāyaṇaḥ svāmī patiśca me || 10 ||
[Analyze grammar]

bālakṛṣṇaḥ parabrahma mama vai śāśvataḥ patiḥ |
pitā bandhuḥ suhṛnmitraṃ rakṣakaḥ poṣako'stu saḥ || 11 ||
[Analyze grammar]

anādiśrīkṛṣṇanārāyaṇaḥ śrībhaktavallabhaḥ |
parabrahmā'kṣarātīto'vatārāṇāṃ svarūpadhṛk || 12 ||
[Analyze grammar]

antaryāmī sadā'smatsu bhagavān sarvakāraṇam |
sarvāntarātmā sarveśo nirlepo mokṣadaḥ sa hi || 13 ||
[Analyze grammar]

pāvanaḥ sevito bhuktimuktidaśca sadā'vatu |
brahmapriyāḥ samastāśca rādhālakṣmyādiyoṣitaḥ || 14 ||
[Analyze grammar]

parabrahmasvarūpiṇyaḥ parabrahmā'rdhamūrtayaḥ |
parabrahmārthasarvasvā divyā bhuktipramuktidā || 15 ||
[Analyze grammar]

tatsambandhikriyāścāpi nirguṇā mokṣadāḥ sadā |
yo yo yā yā bālakṛṣṇaṃ tatpriyāśca bhajatyapi || 16 ||
[Analyze grammar]

sa sa sā sā tatsvarūpā divyā mokṣapradā sadā |
oṃ namaḥ śrīkṛṣṇanārāyaṇāya svāmine svāhā || 17 ||
[Analyze grammar]

śrīkṛṣṇasvāmibhaktā'haṃ śrīhariḥ śaraṇaṃ mama |
śrīkṛṣṇaḥśrīvallabhaśca śrīsvāmī śaraṇaṃ mama || 18 ||
[Analyze grammar]

śrīkṛṣṇovallabhaḥsvāmīśrīhariḥ śaraṇaṃ mama |
ityetān sarvamantrāṃśca sārthān saṃśrāvayet guruḥ |
pūjanaṃ sarvatobhadramaṇḍale kārayenmama || 19 ||
[Analyze grammar]

pūjāvidhiṃ pravakṣyāmi vratāṃgaṃ śṛṇu sarvathā |
upavāsadinaṃ grāhyaṃ mārgaśīrṣasya pūrṇimā |
prātaḥsnānaṃ vidhāyā'pi tīrthādau jalamarpayet || 20 ||
[Analyze grammar]

pitṛbhyaśca gṛhaṃ gatvā nārī nārāyaṇaṃ smaret |
prakṣālya pādāvācamya śuddhāmbaradharā satī |
nityaṃ devārcanaṃ kṛtvā paścāt saṃkalpapūrvakam || 21 ||
[Analyze grammar]

lakṣmīnārāyaṇaṃ devamarcayed bhaktibhāvataḥ |
jalasya kalaśaṃ dhṛtvā sugandhajalasaṃbhṛtam || 22 ||
[Analyze grammar]

pañcāmṛtāni cādāya sauvarṇaṃ śrīnarāyaṇam |
śuddhapātre nidhāyaiva pañcāmṛtādibhirjalaiḥ || 23 ||
[Analyze grammar]

snāpayeddhārayeccāpi vastrāṇi bhūṣaṇāni ca |
arcayed gandhapuṣpādyaiścandanaistailakuṃkumaiḥ || 24 ||
[Analyze grammar]

dhūpadīpasunaivedyamūlaphalajalādibhiḥ |
tāmbūlā''rārtrikastotravandanā'bhyarthanādibhiḥ || 25 ||
[Analyze grammar]

gītairvādyaiśca nṛtyaiśca saṃhitāpāṭhanādibhiḥ |
saṃkīrtanaṃ prakuryādvai vratakartrī samāhitā || 26 ||
[Analyze grammar]

devasya purataḥ kṛtvā sthaṇḍilaṃ caturasrakam |
aratnimātraṃ tatrā'gniṃ sthāpayitvā ghṛtādibhiḥ || 27 ||
[Analyze grammar]

caruṇā ca tilādyaiśca juhuyād bhāvataḥ svayam |
lakṣmīnārāyaṇābhyāṃ svāheti sā juhuyāttadā || 28 ||
[Analyze grammar]

aṣṭottaraśatahomān sarvapāpanivṛttaye |
prāyaścittādikaṃ gurvī kārayet tāṃ tataḥ param || 29 ||
[Analyze grammar]

punaḥ pūjāṃ vidhāyaiva parīhāraṃ vidhāpayet |
upacārādi devāya hyarpayed bhaktisaṃyutā || 30 ||
[Analyze grammar]

paurṇamāsyāṃ kṛtaṃ vrataṃ samarpayāmi te prabho |
arghyaṃ dadyādindave'pi namaskuryāt supuṣpakaiḥ || 31 ||
[Analyze grammar]

akṣatādyaistataḥ kuryājjāgaraṇaṃ niśāntakam |
saṃhitāśravaṇaṃ kuryānnṛtyaṃ ca kīrtanādikam || 32 ||
[Analyze grammar]

prātaḥ snātvā satīḥ sādhūn bhojayecca tataḥ svayam |
pūjayitvā patiṃ lakṣmīnārāyaṇaṃ ca bhojanam || 33 ||
[Analyze grammar]

pāraṇāṃ ca prakurvīta viprāṃśca bhojayedapi |
evaṃ pauṣādimāseṣu saṃvatsaraṃ vrataṃ caret || 34 ||
[Analyze grammar]

kārtikyāṃ ca prakurvītodyāpanaṃ pūrṇimātithau |
maṇḍapaṃ kārayed ramyaṃ caturasraṃ sumaṃgalam || 35 ||
[Analyze grammar]

kadalīstambhaśobhāḍhyaṃ navapallavatoraṇam |
kalaśādyaiḥ śobhitaṃ ca dīpāvalivirājitam || 36 ||
[Analyze grammar]

puṣpamālādisaṃyuktaṃ vitānadhvajamaṇḍitam |
tanmadhye sarvatobhadraṃ maṇḍalaṃ pañcavarṇakam || 37 ||
[Analyze grammar]

tanmadhye ratnavāryāḍhyaṃ nūtnaṃ kumbhaṃ nyaset satī |
pañcapallavavastrādyaiḥ śobhitaṃ ca tadūrdhvake || 38 ||
[Analyze grammar]

tilasthālyāṃ sthāpayenmāṃ lakṣmīnārāyaṇaṃ harim |
pañcāmṛtena saṃsnāpyā'bhyarcya gandhādibhiḥ kramāt || 39 ||
[Analyze grammar]

vastrabhūṣādibhiścāpi bhakṣyabhojyādibhistathā |
siṃhāsane sthāpayenmāmārārtrikottaraṃ tataḥ || 40 ||
[Analyze grammar]

kathākīrtanabhajanairdivasaṃ ca prayāpayet |
madhyāhne niśi pūjāṃ ca kārayejjāgaraṃ kriyāt || 41 ||
[Analyze grammar]

pare'hni prātareveyaṃ śrīpatiṃ māṃ samarcayet |
sādhvībhyo bhojayeccāpi tato bhojanamācaret || 42 ||
[Analyze grammar]

gurvībhyaḥ sampradadyācca mūrtiṃ tilān tathetarat |
tilahomaṃ prakuryāccā'rthayellakṣmīnarāyaṇam || 43 ||
[Analyze grammar]

kṛpayā tava deveśa kṛtaṃ sāmvatsaraṃ vratam |
lakṣmīḥ prasannā bhavatu nārāyaṇaḥ prasādavān || 44 ||
[Analyze grammar]

bhaktāṃ māṃ sarvathā naijīṃ kṛtvā gṛhāṇa mādhava |
bhuktiṃ muktiṃ dehi me tvaṃ kānta śrīpuruṣottama || 45 ||
[Analyze grammar]

phalaṃ samastamevā'haṃ cārpayāmi tvayi prabho |
iti vyāhṛtya dadyācca puṣpāñjaliṃ namettataḥ || 46 ||
[Analyze grammar]

evaṃ kṛtvā parīhāraṃ visarjanaṃ samācaret |
nityaṃ kathāṃ śṛṇuyācca satsaṃgaṃ ca samācaret || 47 ||
[Analyze grammar]

puṇyapuñjāśrayā bhūtvā sā yāyānme'kṣaraṃ padam |
iha bhuktvā mahābhogān putrapautrasamanvitā || 48 ||
[Analyze grammar]

sarvapāpavinirmuktā kulā'yutasamanvitā |
prayāti mama bhavanaṃ yogināmapi durlabham || 49 ||
[Analyze grammar]

muktā divyā bhavedatra mama yogena bhāminī |
brāhmī bhavettato brahmapriyā haripriyā tataḥ || 50 ||
[Analyze grammar]

sarvasiddhisamāyuktā sarvaiśvaryādiśālinī |
yathā lakṣmīryathā rādhā tathā syānme priyā tataḥ || 51 ||
[Analyze grammar]

śrīnārāyaṇīśrīruvāca |
vrataṃ kartumaśaktāyāḥ pāpāyāḥ pāpanāśakam |
vinā prathatnaṃ saralaṃ sulabha sādhanaṃ vad || 52 ||
[Analyze grammar]

śrīpuruṣottama uvāca |
abalāyāstu pāpāyā vratā'samarthayoṣitaḥ |
gurvarpaṇaṃ guruṃ nāvaṃ samāśrityā'ghanāśanam || 53 ||
[Analyze grammar]

gurutīrthe tu yā snātā śuddhyet sā drutameva ha |
svargiṇī jāyate sadyo mokṣaṃ sveṣṭaṃ ca vindati || 54 ||
[Analyze grammar]

gurutīrthe parā siddhistīrthānāṃ paramaṃ hi tat |
dhyānaṃ tīrthaṃ haristīrthaṃ brahmatīrthaṃ sanātanam || 55 ||
[Analyze grammar]

indriyāṇāṃ vṛttayo vai nivartante tu yatsthale |
manobuddhyośca nirvṛttiryatra saṃjāyate parā || 56 ||
[Analyze grammar]

ātmaśāntirbhaveccāpi sadgurostu pratāpataḥ |
evaṃvidhe gurau tīrthe snāyāt sarvārpaṇena vai || 57 ||
[Analyze grammar]

gakārastvandhakāraḥ syād rakārastannirodhakaḥ | |
gurvī sā'sti samarthā vai cāndhakāranirodhikā || 58 ||
[Analyze grammar]

jñānaṃ dadyādātmanastu dhyānaṃ dadyāddharestathā |
vivekaṃ pāpapuṇyānāṃ dadyājjaḍacidorapi || 59 ||
[Analyze grammar]

śubhāśubhānāṃ bhānaṃ ca dadyād doṣanivāraṇam |
mumukṣutāṃ bhāvayecca yā sā gurvī hi tāriṇī || 60 ||
[Analyze grammar]

śāntiṃ dadyād vicāreṇa prasādena pavitratām |
āśīrvādaṃ susnehena bhāgyaṃ dadyād balena ca || 61 ||
[Analyze grammar]

smṛddhiṃ dadyāttapobhiśca bhaktyā dadyāddhariṃ tu yā |
mokṣaṃ dadyāt sahagatyā gurvī sā saṃśrayāt sadā || 62 ||
[Analyze grammar]

mantraṃ dadyāddhareryā ca kaṇṭhīṃ dadyācca taulasīm |
nāmasaṃkīrtanaṃ dadyāt kṛṣṇanārāyaṇeti ca || 63 ||
[Analyze grammar]

snehaṃ dadyāddharau tasya māhātmyajñānamuttamam |
divyatābhānamādadyāt tāṃ gurvīṃ saṃśrayet satī || 64 ||
[Analyze grammar]

yasyāḥ pādajalaṃ pāpaprakṣālakaṃ bhaved dhruvam |
yasyāḥ prasādajaṃ cā'nnaṃ vāsanākṣālakaṃ bhavet || 65 ||
[Analyze grammar]

yasyāḥ puṣpaṃ phalaṃ vastraṃ dehayogagataṃ jaḍam |
divyaṃ pavitraṃ puṇyaṃ ca mokṣadaṃ vartate śubham || 66 ||
[Analyze grammar]

yasyā deho'sti bhagavaddeha eva na saṃśayaḥ |
yā'sti vai nirguṇā nityaṃ nirguṇasya hareḥ priyā || 67 ||
[Analyze grammar]

mahābhāgavatī divyā sarvadā''tmanivedinī |
tasyāḥ pādarajaścāpi pāpinīnāṃ tu pāvanam || 68 ||
[Analyze grammar]

kṣālakaṃ mūlataścāste mokṣadaṃ jāyate tathā |
rādhālakṣmīsamā gurvī ramāpadmāsamā hi sā || 69 ||
[Analyze grammar]

preṣṭhāpadmāvatītulyā padminīmāṇikīsamā |
kamalāśrīsamā pārśvavartinārāyaṇīsamā || 70 ||
[Analyze grammar]

tasyāḥ keśeṣu bhagavatkeśāḥ santi nivāsitāḥ |
brahmarandhre hareḥ randhraṃ mastake mastakaṃ hareḥ || 71 ||
[Analyze grammar]

bhāle bhālaṃ hareścāsti bhrukuṭau bhrūkuṭirhareḥ |
netrayorharinetre ca karṇau hareśca karṇayoḥ || 72 ||
[Analyze grammar]

medhāyāṃ śrīharermedhā harergaṇḍau ca gaṇḍayoḥ |
kapolayoḥ kapolau ca harernāsā nasi prabhoḥ || 73 ||
[Analyze grammar]

tasyā mukhe ca jihvāyāṃ danteṣu coṣṭhayorhareḥ |
mukhaṃ jihvā ca dantāśca hyoṣṭhau hanau hanūrhareḥ || 74 ||
[Analyze grammar]

tasyāḥ kaṇṭhe hareḥ kaṇṭho harervakṣastu vakṣasi |
bhujayorhastayorbāhvoścāṃguliṣu nakheṣu ca || 75 ||
[Analyze grammar]

harerbhujau karau bāhū cāṃ'gulyaśca nakhāstathā |
kukṣau kukṣirharestasyā udare hyudaraṃ hareḥ || 76 ||
[Analyze grammar]

nābhau nābhirharestasyā jaghane jaghanaṃ hareḥ |
kaṭyāṃ kaṭirharestasyāḥ pṛṣṭhe pṛṣṭhaṃ harestathā || 77 ||
[Analyze grammar]

gupte guptaṃ hareścāpi sakthnorharestu sakthinī |
jānvostasyā harerjānū jaṃghe ca jaṃghayorhareḥ || 78 ||
[Analyze grammar]

pādayoḥ phaṇayoścāpi hareḥ pādau phaṇāvapi |
asthiṣu śrīhareḥ santi cāsthīni tvak tvacītyapi || 79 ||
[Analyze grammar]

romasu śrīhareḥ santi romāṇi mānase manaḥ |
indriyāṇīndriyeṣvasyā guṇeṣu ca harerguṇāḥ || 80 ||
[Analyze grammar]

bhūteṣvasyā harestattvaṃ cāntare cāntaraṃ tathā |
jñānecchāyatnadharmeṣu harerjñānādayastathā || 81 ||
[Analyze grammar]

kriyāyāṃ śrīhareścāsyāḥ kriyāśceṣṭā harestathā |
hasanaṃ gamanaṃ yānaṃ kīrtanaṃ svapanaṃ tathā || 82 ||
[Analyze grammar]

gurvyāḥ sarvaṃ hareścāste tasmād gurvī hi tāriṇī |
mokṣadā bhavapārasthā divyā divyagatipradā || 83 ||
[Analyze grammar]

gurvyā padośca tīrthāni pṛthivī vartate sadā |
jaṃghayorvaruṇo devo jānvoḥ kuberako'sti ca || 84 ||
[Analyze grammar]

sakthnorindraśca śeṣaśca kaṭyāṃ dharmo virājate |
hiraṇyagarbhaṃ udare jaghane vahnidevatā || 85 ||
[Analyze grammar]

nitambayostu nāsatyau vakṣasi śrīhariḥ svayam |
stanayoḥ parvatāścaiva kukṣiṣu sāgarāstathā || 86 ||
[Analyze grammar]

romasvoṣadhayaḥ sarvāḥ pārśvayordevatāgaṇāḥ |
kaṇṭhe sarasvatī cāste mukhe lakṣmīrvirājate || 87 ||
[Analyze grammar]

netrayoḥ sūryacandrau ca mastake brahma rājate |
hastayoścāpyannapūrṇā durgā cāpi virājate || 88 ||
[Analyze grammar]

hṛdaye dharmavaṃśaśca mānase'syā haripriyāḥ |
puṇyaṃ sādhvyā vacaneṣu śṛṃgāre smṛddhayastathā || 89 ||
[Analyze grammar]

gurvyā prasannatāyāṃ vai bhuktimuktirvirājate |
āśīrvāde ceṣṭasukhaṃ bhāgyamāste ca darśane || 90 ||
[Analyze grammar]

bhojane yajñabhuk cāste pāne'mṛtaṃ virājate |
rūpe ca śāradā devī lāvaṇye ca sudhā'sti vai || 91 ||
[Analyze grammar]

pitaro'syāḥ samaudārye maharṣayo vrate tathā |
sādhavo'syā bhāvanāyāṃ bhaktiścātmani rājate || 92 ||
[Analyze grammar]

gāvo'syā hastatalayorvasavo'syāḥ praharṣaṇe |
rudrāścāsyā bhrukuṭau ca bhāskarā gaṇḍayostathā || 93 ||
[Analyze grammar]

oṣṭhayorbhagavanmāyā gurvyā divyā virājate |
gurvyāsane'kṣaraṃ brahma gaṃgā pādukayostathā || 14 ||
[Analyze grammar]

gurvyāḥ śāṭyāṃ mahālakṣmīḥ kañcukyāṃ rādhikā'sti ca |
kaṭyambare surāṇyaśca bhūṣāsu śrīramādayaḥ || 95 ||
[Analyze grammar]

yajñopavīte trailokyaṃ yogapaṭṭe'ṣṭasiddhayaḥ |
saubhāgyadravyapuñjeṣu sampado'syā vasanti ca || 96 ||
[Analyze grammar]

gurvyāstvaci ca sarvatra santi sthāvarajaṃgamāḥ |
śarīramadhye sarvatra santi brahmavibhūtayaḥ || 97 ||
[Analyze grammar]

aiśvarye ceśvarāścāsyāścamatkāreṣu mātaraḥ |
brahmavrataṃ ca śīle'syāstādātmye'haṃ pareśvara || 98 ||
[Analyze grammar]

gupte'syāḥ saguṇaṃ brahma sakthnormūle susṛṣṭayaḥ |
rāje'haṃ gururūpāyāṃ gurvī cā'hamahaṃ ca sā || 99 ||
[Analyze grammar]

asyā vai sevayoddhāraḥ pāpāyā api jāyate |
api yā gaṇikā vāpi puṃścalī madyapāyinī || 100 ||
[Analyze grammar]

māṃsādā sarvabhakṣyā vā hatyāḍhyā śvapacī ca vā |
gurvyāḥ satsaṃgaśaraṇāśrayasevādibhirhi sā |
pūyate niṣkalmaṣā syād dīvyati prottaratyapi || 101 ||
[Analyze grammar]

māyākālakriyāpāśānmuktā muktiṃ prayāti me |
paṭhanācchavaṇāccāsya mama muktiṃ prayāti vai || 102 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne vadhūgītāyāṃ pāpoddhārakalakṣmīnārāyaṇavrataśrīharigurugurvītīrthamahimavarṇananāmā navacatvāriṃśo'dhyāyaḥ || 49 ||
[Analyze grammar]