Chapter 48

śrīnārāyaṇīśrīruvāca |
yathā tuṣyati bhagavān parameśaḥ parātparaḥ |
tanmamā''khyāhi sarvajña kānta kāruṇyavāridhe || 1 ||
[Analyze grammar]

śrīpuruṣottama uvāca |
nārāyaṇaṃ paraṃ kāntaṃ saccidānandavigraham |
bhaja sarvātmanā kānte māṃ yadyānandamicchasi || 2 ||
[Analyze grammar]

ripavastāṃ na hiṃsanti na bādhante grahādayaḥ |
rākṣasāścāpi nekṣante nārīṃ viṣṇuparāyaṇām || 3 ||
[Analyze grammar]

bhaktirdṛḍhā bhaved yasyāḥ pareśe paramātmani |
tasyāḥ śreyāṃsi siddhyanti bhaktiyuktā'dhikā tataḥ || 4 ||
[Analyze grammar]

pādau tau saphalau tasyā yau viṣṇugṛhagāminau |
tau karau saphalau tasyā mama pūjāparau tu yau || 5 ||
[Analyze grammar]

te netre saphale tasyāḥ paśyato ye śriyaḥ patim |
sā jihvā maṃgalā tasyā harernāmaparā tu yā || 6 ||
[Analyze grammar]

te śrautre saphale tasyāḥ śrīkathāsāragrāhake |
sā tvag vai pāvanī tasyā yā harisparśavedinī || 7 ||
[Analyze grammar]

rasanā sā rasavatī yayā prāpto hareḥ rasaḥ |
ghrāṇaṃ puṇyaṃ hi tasyāstad yacchrīmadgandhavedi vai || 8 ||
[Analyze grammar]

sā kaṭiryā tu haryarthaṃ guptaṃ haryarthameva ca |
vakṣaścāpyapi haryarthaṃ gaṇḍau haryarthameva yau || 9 ||
[Analyze grammar]

kapolaṃ cāpi haryarthaṃ haryarthaṃ jaghanaṃ tathā |
sakthinī cāpi haryarthaṃ jaṅghe haryarthameva ca || 10 ||
[Analyze grammar]

auṣṭhau cāpi tu haryarthaṃ keśā haryarthameva ca |
śayanaṃ cāpi haryarthaṃ jāgaraṇaṃ hareḥ kṛte || 11 ||
[Analyze grammar]

yasyā ramaṇaṃ haryarthaṃ vilāso'pi hareḥ kṛte |
hāvā bhāvāśca haryarthaṃ nṛtyaṃ haryarthamityapi || 12 ||
[Analyze grammar]

gāyanaṃ hasanaṃ cāpi dṛṣṭirharyarthameva yā |
mānasaṃ cintanaṃ cāpi buddhirharyarthameva yā || 13 ||
[Analyze grammar]

ahaṃbhāvo'pi haryarthaṃ kriyā haryarthameva ca |
śṛṃgāro'syāśca haryarthaṃ rūpaṃ haryarthameva ca || 14 ||
[Analyze grammar]

alaṃkārāśca haryarthaṃ bhūṣā haryarthameva ca |
kajjalaṃ candanaṃ tailaṃ haryarthaṃ kabarī tathā || 15 ||
[Analyze grammar]

dhammilāścāpi haryarthaṃ puṣṭirharyarthameva ca |
vrataṃ śīlaṃ tathā śuddhiḥ snānaṃ haryarthameva ca || 16 ||
[Analyze grammar]

saṃskārāścāpi haryarthaṃ tānaṃ haryarthameva ca |
bhānaṃ lajjā pramodaśca prītirharyarthameva ca || 17 ||
[Analyze grammar]

saukumāryaṃ ca mādhuryaṃ dīptirharyarthameva yā |
prasādhanaṃ ca haryarthaṃ protsāho'pi hareḥ kṛte || 18 ||
[Analyze grammar]

utsavāścāpi haryarthaṃ śobhā haryarthameva ca |
upārjanaṃ vyayaścāpi yatno haryarthameva ca || 19 ||
[Analyze grammar]

sukhaṃ ratirmahānandaḥ sarvaṃ haryarthameva ca |
gṛhaṃ kṣetraṃ sampadaśca sarvaṃ haryarthameva ca || 20 ||
[Analyze grammar]

sutāḥ putryaśca gāvaśca haryarthaṃ vājinastathā |
gajā yānavimānāni yasyā haryarthameva ca || 21 ||
[Analyze grammar]

vāṭikā sasyasampaccopaskarāśca hareḥ kṛte |
nimeṣaṃ śvāsarakṣā ca cetano'pi hareḥ kṛte || 22 ||
[Analyze grammar]

guṇabhāvāśca haryarthaṃ bhāvanā'pi hareḥ kṛte |
utthānamudayaścāpi virāmo'pi hareḥ kṛte || 23 ||
[Analyze grammar]

anāvaraṇabhāvaśca hṛdayaṃ ca hareḥ kṛte |
gopyaṃ mantro rahasyaṃ ca sarvaṃ yasyā hareḥ kṛte || 24 ||
[Analyze grammar]

kalāḥ śikṣā'bhyasanaṃ ca rāgaḥ śāntirhareḥ kṛte |
ārambhāśca prapūrtiśca pācanaṃ ca hareḥ kṛte || 25 ||
[Analyze grammar]

bhramaṇaṃ vyavahāraśca sphurtiścāsyā hareḥ kṛte |
lobhaḥ kāmaśca saṃkalpaścotsavaśca hareḥ kṛte || 26 ||
[Analyze grammar]

yajñā dānaṃ bhajanaṃ ca dharmaścāsyā hareḥ kṛte |
puṣpaśayyā uraḥśayyā cordhvaśayyā hareḥ kṛte || 27 ||
[Analyze grammar]

maṇḍapo maṇḍapī rāso līlā laulyaṃ hareḥ kṛte |
bhramaṇaṃ haraṇaṃ cāpi vartanaṃ ca hareḥ kṛte || 28 ||
[Analyze grammar]

lekhanaṃ khelanaṃ cāpi kauśalyaṃ ca hareḥ kṛte |
cāturyaṃ cāpi cāpalyaṃ divyatā'pi hareḥ kṛte || 29 ||
[Analyze grammar]

apyaṃgānāṃ moḍanaṃ ca svedaścottejanaṃ tathā |
rājaso vega evāpi sarvaṃ haryarthameva ca || 30 ||
[Analyze grammar]

bhojanaṃ pānamudgāro dhātulābho hareḥ kṛte |
samayaścāpi saṃketo vāṭaścāpi hareḥ kṛte || 31 ||
[Analyze grammar]

mārgaṇaṃ cā'nveṣaṇaṃ ca pratīkṣaṇaṃ hareḥ kṛte |
ānandecchā harereva haryarthaṃ cāntaraṃ sthalam || 32 ||
[Analyze grammar]

antarbahirhariryasyāḥ snehamūrtirharerhi sā |
satyasāramidaṃ sarvaṃ na kāntaḥ keśavātparaḥ || 33 ||
[Analyze grammar]

asāre khalu saṃsāre sāraḥ kānto harirmahān |
saṃsārapāśāḥ sudṛḍhā abhaktāyā bhavanti te || 34 ||
[Analyze grammar]

bhaktāyāste guṇadā vai vipāśāśca bhavanti vai |
ānandamatulaṃ me ca vaśīkṛtvā samarjayet || 35 ||
[Analyze grammar]

sthānaṃ rūpaṃ tathā''nandaḥ sukhaṃ vaktuṃ na śakyate |
nirdeṣṭuṃ cāpi ca draṣṭuṃ śakyate nā'kṛtātmabhiḥ || 36 ||
[Analyze grammar]

sarvopādhivinirmuktaścānando'tiśayo hareḥ |
parabrahmamayaṃ bhuktvā''nandaṃ brāhmī bhavet satī || 37 ||
[Analyze grammar]

tatkathāyāṃ ca ramate satkathāṃ ca karoti yā |
satsaṃgo nityamevā'syāḥ prīto bhavāmi padmaje || 38 ||
[Analyze grammar]

nāmasaṃkīrtanaṃ me ca kṣuttṛṭpraskhalanādiṣu |
karoti satataṃ yā tu tasyāḥ prīto bhavāmi vai || 39 ||
[Analyze grammar]

yā tu vadhūḥ patiprāṇā patipūjāparāyaṇā |
tasyāstuṣṭaḥ sadā cāsmi dadāmi svapadaṃ priyam || 40 ||
[Analyze grammar]

asūyārahitā yā tu tathā'haṃkāravarjitā |
dāsībhāvaparā sādhvī tasyāstuṣyāmi sarvathā || 41 ||
[Analyze grammar]

tasmād brahmapriyāḥ sarvā haripriyā madātmikāḥ |
bhajatā'tra hariṃ kāntaṃ māṃ priyaṃ kṛṣṇavallabham || 42 ||
[Analyze grammar]

śarīraṃ mṛtyuvāsaṃ vai hāsavāsaṃ hi karmiṇām |
jīvitaṃ cañcalaṃ vidyullolāśca sampadastathā || 43 ||
[Analyze grammar]

rājādibhirdhanaṃ bādhyaṃ smṛddhayaḥ kṣaṇabhaṃgurāḥ |
nidrāḍhyaṃ cāyuṣārdhaṃ copārjanārthaṃ tathā'rdhakam || 44 ||
[Analyze grammar]

bhogārthaṃ ca tadardhaṃ tu bālyaṃ sauṣuptamityapi |
vicāryeti satī kuryād vayasyeva mamā'rcanam || 45 ||
[Analyze grammar]

vapurvināśanilayaṃ cāpadāṃ paramaṃ padam |
akasmād bhinnamārgaṃ ca tena bhaktiṃ prasādhayet || 46 ||
[Analyze grammar]

asārabhūte saṃsāre sāre mayi samarpaṇam |
sarvātmanā prakuryādvai jñātvā nārī pramokṣaṇam || 47 ||
[Analyze grammar]

dehayoganivṛttyarthaṃ sadya eva narāyaṇam |
anādiśrīkṛṣṇanārāyaṇaṃ bhajeta māṃ satī || 48 ||
[Analyze grammar]

koṭijanmasahasreṣu sthāvarādiṣu yoṣitaḥ |
saṃbhrāntāyāḥ kathaṃcidvai mānuṣyaṃ samupasthitam || 49 ||
[Analyze grammar]

tatra dānaṃ cārcanaṃ ca janmāntaratapaḥphalam |
bhaktiścāśīrvādaphalaṃ sevā saubhāgyamityapi || 50 ||
[Analyze grammar]

mānuṣyaṃ durlabhaṃ prāpya yā hariṃ nārcayet satī |
mūrkhī saiva jaḍabuddhirnārī punarbhaviṣyati || 51 ||
[Analyze grammar]

tasyāścātīva mūrkhāyā vivekaḥ kiṃ kariṣyati |
ārādhito hariḥ kṛṣṇo dadātyabhimataṃ phalam || 52 ||
[Analyze grammar]

caṇḍālo vā nikṛṣṭo vā malinaḥ pāpavānapi |
gaṇikā vā śīlahīnā vyavāyādiparāyaṇā || 53 ||
[Analyze grammar]

aśuddhā vā sūtikā vā viṣṇubhaktā dvijādhikā |
viṣṇubhaktivihīnā tu dvijā'pi śvapacī ca vā || 54 ||
[Analyze grammar]

tasmāddhariṃ prasevyaiva toṣayetparameśvaram |
mayi tuṣṭe'khilaṃ tuṣṭaṃ sarvātmā'haṃ yato'smi ca || 55 ||
[Analyze grammar]

hastipade sarvapadaṃ gagane sārvabhautikam |
anādiśrīharau tadvanmayi sarvaṃ pratiṣṭhitam || 56 ||
[Analyze grammar]

janmamṛtyū prāntabhāgau tannāśo mama sevayā |
dhyātaḥ smṛtaḥ pūjito vā praṇato voddharāmyaham || 57 ||
[Analyze grammar]

saṃsārapāśavicchedaṃ karomi kṛpayā sadā |
mannāmoccāraṇādeva mahāpātakanāśanam || 58 ||
[Analyze grammar]

manmūrteḥ smaraṇādeva brahmabhāvo bhavedapi |
matsatīsevayā mokṣagāmitvaṃ syād drutaṃ priye || 59 ||
[Analyze grammar]

nīyamānā yamabhaṭairaśaktā svavimocane |
apuṇyā'pi smarenmāṃ ca tāmuddharāmi kaṣṭataḥ || 60 ||
[Analyze grammar]

vidrāvya yāmyadūtāṃśca nayāmi matpadaṃ priyām |
smarantī māṃ śaraṇāptāmabalāṃ dīnamānasām || 61 ||
[Analyze grammar]

anāthāṃ paravaśagāṃ puṇyapuñjavivarjitām |
ālambavarjitāṃ nirādhārāmuddhārayāmyaham || 62 ||
[Analyze grammar]

yāvannendriyavaikalyaṃ yāvadvyādhirna bādhate |
tāvat prasevya māṃ sādhvī muktimārgaṃ hi klṛptayet || 63 ||
[Analyze grammar]

kṛṣṇaḥ sarvātmanā pūjyo dhyeyaśca mādhavaḥ sadā |
hariḥ sevyaḥ sadā sādhvyā prasādanīyaḥ keśavaḥ || 64 ||
[Analyze grammar]

anārādhya jagannāthaṃ brahmapriyāntarasthitam |
paramānandalābho na saṃsevya taṃ sukhaṃ vrajet || 65 ||
[Analyze grammar]

acyutā'nantagovindakṛṣṇamādhavakeśava |
anādiśrīkṛṣṇanārāyaṇa dāmodara prabho || 66 ||
[Analyze grammar]

hare kṛṣṇa vibho rāma nārāyaṇa narāyaṇa |
ṛṣīkeśā'kṣarātīta parabrahma pareśvara || 67 ||
[Analyze grammar]

puruṣottama mukteśa brahmeśa ca janārdana |
bhagavan vyāpaka svāminnuccārayet satī sadā || 68 ||
[Analyze grammar]

evaṃ māṃ bhajamānāyā dūre nā'haṃ vasāmi vai |
sā mayyahaṃ ca tasyāṃ ca vartāmi sarvadā priye || 69 ||
[Analyze grammar]

nārāyaṇa jagannātha kambharātmaja kāmada |
gopālakṛṣṇatanaya vāsudeva janārdana || 70 ||
[Analyze grammar]

kānta dānta mahānandaprada śrīparameśvara |
satīnātha satāṃnāthetīrayanti muhurhi yāḥ || 71 ||
[Analyze grammar]

tāsāṃ pūjāṃ prakurvanti brahmādyā api devatāḥ |
vanditāstā bhavantyeva sarvatra kamalā yathā || 72 ||
[Analyze grammar]

yatprabhāvaṃ na jānanti yā māyā''vṛtamānasāḥ |
hṛtpadmasthaṃ naṃ jānanti tāsāṃ hānirmahattamā || 73 ||
[Analyze grammar]

hariḥ śraddhāvatāṃ tuṣyenna dhanairna ca bāndhavaiḥ |
nā''tmaguṇairna tapasā bhaktyā tuṣyejjanārdanaḥ || 74 ||
[Analyze grammar]

sevayā cātituṣyecca pūjayā smaraṇena ca |
ātmā'rpaṇena tuṣyecca toṣayantu tataḥ priyāḥ || 75 ||
[Analyze grammar]

putramitrasmṛddhayaśca bahvyo bhavanti sampadaḥ |
haripūjāratānāṃ vai durlabhāḥ santi tā nahi || 76 ||
[Analyze grammar]

ihā'mutra sukhavāñcchāvatī sampūjayeddharim |
anādiśrīkṛṣṇanārāyaṇaṃ māṃ puruṣottamam || 77 ||
[Analyze grammar]

na namedviṣṇave yasyā mastakaṃ mokṣadāyine |
karmaṇāṃ bhedine tasyā deho bodhyo'ghaśevadhiḥ || 78 ||
[Analyze grammar]

haribhaktiyuto deho divyo bodhyaḥ striyā api |
śreṣṭhā bhaktyā bhavantyeva bhaktihīnā kaniṣṭhikāḥ || 79 ||
[Analyze grammar]

pūjanīyāstato lakṣmi yoṣito bhaktisaṃbhṛtāḥ |
sammārjanādibhiryāstu mama śuśrūṣaṇe ratāḥ || 80 ||
[Analyze grammar]

satāṃ samāgamakartryastā yānti paramaṃ padam |
haridharmaratāḥ śāntā haripādābjasevikāḥ || 81 ||
[Analyze grammar]

harikāryaparāḥ kṛṣṇakṛṣṇaraṭanatatparāḥ |
romaromasu kṛṣṇasya premanisyandarājitāḥ || 82 ||
[Analyze grammar]

ahaṃ kṛṣṇā'pyahaṃ kṛṣṇā ceṣṭā evaṃ samāśritāḥ |
gṛhāṇa vaṃśīṃ kuñje ca samāyāhīti śabditāḥ || 83 ||
[Analyze grammar]

ekāntaṃ tvaṃ gṛhāṇā'tra rahasyaṃ me pradehi ca |
premarasaṃ mahānandaṃ māṃ prapāyaya kuñjagām || 84 ||
[Analyze grammar]

antarbhāvarasaṃ kṛṣṇa saṃgamotthaṃ prapāyaya |
tādātmyasnehamāpannāṃ kuru spaṣṭāṃ ca kiṃkarīm || 85 ||
[Analyze grammar]

aṃkadāsīṃ rāyanasya sakhīṃ vidhehi mādhava |
nirjanasya sarasaśca vidhehi padminīṃ prabho || 86 ||
[Analyze grammar]

payaḥphenanibharātrervidhehi śāradīṃ vibho |
vasantasya ca vallīṣu vidhehi kokilāṃ hare || 87 ||
[Analyze grammar]

śaityartormāṃ kṛpāṃ kṛtvā kambalinīṃ vidhehi ca |
sarvayajñasya kāryasya vedīṃ vidhehi māṃ tviha || 88 ||
[Analyze grammar]

viśrāntyarthaṃ kṛpāsindho tūlikāṃ māṃ vidhatsva nu |
agnitaptasya kāntasya śītāṃ kāntāṃ vibhāvaya || 89 ||
[Analyze grammar]

nirālambasamādheśca brahmānandīṃ priyāṃ kuru |
māyāyuktasya kṛṣṇasya muktānikāṃ pujasva mām || 90 ||
[Analyze grammar]

sarvākṛṣṭasya cittasya magnasthalīṃ vidhāpaya |
premapravāhasaritāṃ sāmudrikīṃ nibhālaya || 91 ||
[Analyze grammar]

amānodgatamodasya bhinnamūrtiṃ svakāṃ kuru |
samarasmarayuktasya vāhinīṃ tava māṃ kuru || 92 ||
[Analyze grammar]

kaustubhasya viyuktasyā''sanībhūtaṃ ca hṛt kuru |
premabimbādharasyātrā''dhāralatāṃ suyojaya || 93 ||
[Analyze grammar]

padmapatrāyatanetre netrayorbimbake kuru |
pūrṇā'māvārdhitulyāyāḥ kaumudīśo bhavā'tra me || 94 ||
[Analyze grammar]

sādhvyā svāmī cakorāyāścandraḥ kṛṣṇo bhavā'tra me |
śalabhāyāścā'nalaśca timyāḥ kaṇṭaraso bhava || 95 ||
[Analyze grammar]

cātakyāstu svātivarṣā mayūryā jalado bhava |
navavadhvā varaśreṣṭha kṛṣṇanārāyaṇo bhava || 96 ||
[Analyze grammar]

virahāgnipradāvāyā yogivāriprado bhava |
bhavābdhigartamagnāyāḥ karagrāho harirbhava || 97 ||
[Analyze grammar]

netre hṛdi ca manasi cetane nihito bhava |
sarvendriyeṣu sukhadaścāntareṣu sthiro bhava || 98 ||
[Analyze grammar]

ānakhaśikhamāsādya yāvān yāvatsu me vasa |
ityevaṃ śivarājñīśri mayi tādātmyayojanam || 99 ||
[Analyze grammar]

yāyād yā sā brahmapriyā haripriyā bhavediha |
paṭhanācchravaṇādasya rādhālakṣmīsamā bhavet || 100 ||
[Analyze grammar]

mama tādātmyayogo'yaṃ kalpabhaktyā bhavennanu |
naro nārī ca sampādya madātmakatvamāvrajet || 101 ||
[Analyze grammar]

apātraṃ bhaktihīnaṃ vai nā'yaṃ pacati tasya vai |
vadhūgītāṃ purā śrutvā sadācāraparā bhavet || 102 ||
[Analyze grammar]

satī bhūtvā nirguṇaṃ ca bhaktiyogaṃ tataścaret |
puruṣottamayogaṃ ca prapātya tanmayī bhavet || 103 ||
[Analyze grammar]

tataḥ sākṣāt parabrahmayogayuktā bhaved dhruvā |
tayā tādātmyayogo'yaṃ prāpyate matkṛpāvaśāt || 104 ||
[Analyze grammar]

sarvā vadhvo bhavantyevaṃ paripūrṇatame mayi |
lokanāryastathā bhūtvā bhaviṣyanti madātmikāḥ || 105 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne akṣarātītatādātmyayoganirūpaṇanāmā'ṣṭacatvāriṃśo'dhyāyaḥ || 48 ||
[Analyze grammar]