Chapter 47

śrīpuruṣottama uvāca |
śṛṇu nārāyaṇīśri tvaṃ mama yogaṃ parātparam |
nārāyaṇe jagannāthe sarvakāmaphalaprade || 1 ||
[Analyze grammar]

mayi kṛṣṇe ratiṃ kuryād yā sā labhet paraṃ padam |
mayi dhyānaparā lakṣmi cāṇḍālyapi hi devatā || 2 ||
[Analyze grammar]

gaṇikā mama yogasthā nirguṇā divyavartanā |
adhyātmajñānasampannā haripūjāparāyaṇā || 3 ||
[Analyze grammar]

labhate cākṣaraṃ dhāma punarāvṛttivarjitam |
yato jātamidaṃ viśvaṃ yataścaitanyamaśnute || 4 ||
[Analyze grammar]

yasmiṃśca vilayaṃ yāti yenā''viṣṭaṃ ca jīvati |
nirguṇo'pi paro'nanto guṇavāniva bhāti yaḥ || 5 ||
[Analyze grammar]

sadā''ntarastho yo'haṃ saḥ saṃsārabhayanāśakaḥ |
taṃ māmabhyarcya kānteśaṃ saṃsārāt parimucyate || 6 ||
[Analyze grammar]

karmaṇā dehamāpnoti dehī kāmena badhyate |
sa kāmaṃ mayi saṃyujya prāpnuyānmatparaṃ padam || 7 ||
[Analyze grammar]

māṃ vinā kāmanāyuktā krodhena cābhibhūyate |
lobhastāṃ praviśatyeva dharmanāśaṃ karotyapi || 8 ||
[Analyze grammar]

matibhrāntiṃ janayati pāpaṃ nayati mānavam |
evaṃ pāpasya mūlaṃ syāccharīraṃ māṃ vinā priye || 9 ||
[Analyze grammar]

tasmānmadyogamāsādya doṣānnirguṇakān vrajet |
sarvāṃ dṛṣṭiṃ ca saṃgṛhya śete yo'kṣaradhāmani || 10 ||
[Analyze grammar]

taṃ mā vai mokṣadaṃ jñātvā seveta satyadharmiṇī |
vedārthavidbhiḥ karmajñairijyate vividhairmakhaiḥ || 11 ||
[Analyze grammar]

vratibhistāpasairyogasādhakairjñānayajñakaiḥ |
sa eva karmaphalado mokṣado'kāmakarmaṇām || 12 ||
[Analyze grammar]

havyakavyādidāneṣu devatāpitṛrūpadhṛk |
bhuṃkte yo bhagavān māṃ taṃ mokṣadam ṛṣayo viduḥ || 13 ||
[Analyze grammar]

dhyātaḥ praṇamito vāpi pūjito vāpi bhaktitaḥ |
dadāmi śāśvataṃ dhāma taṃ māṃ hariṃ samarcayet || 14 ||
[Analyze grammar]

ādhāraḥ sarvabhūtānāmeko'haṃ parameśvaraḥ |
jarāmṛtyuvinirmukto mokṣado'smyavyayo hariḥ || 15 ||
[Analyze grammar]

sampūjya mama pādābjaṃ dehino'pi narāyaṇi |
amṛtatvaṃ bhajantyāśu māṃ viddhi puruṣottamam || 16 ||
[Analyze grammar]

ānandamajaraṃ brahma paraṃ jyotiḥ sanātanam |
parātparataraṃ so'haṃ tadviṣṇoḥ paramaṃ padam || 17 ||
[Analyze grammar]

advayaṃ nirguṇaṃ nityamadvitīyamanaupamam |
paripūrṇatamaṃ jñānamayaṃ mokṣasya sādhanam || 18 ||
[Analyze grammar]

evaṃvidhaṃ tu māṃ lakṣmi sevayā sarvabhāvayā |
yā tūpāste yoginī sā yāti matparamaṃ padam || 19 ||
[Analyze grammar]

nirguṇā saṃgarahitā śamādiguṇaśobhanā |
vāsanāvarjitā brāhmī priyā yātyakṣaraṃ padam || 20 ||
[Analyze grammar]

mamā'vatārarūpāṇi bhavanti yugalāni vai |
samarthayanti māṃ sarve śāśvatasthānadaṃ harim || 21 ||
[Analyze grammar]

yasyā'bhinnamidaṃ sarvaṃ yacceṃgad yacca neṃgati |
tamūrdhvamajaraṃ dhyātvā saṃsārānmucyate satī || 22 ||
[Analyze grammar]

jitaprāṇā jitāhārā mama sevāparāyaṇā |
hṛdi paśyati māṃ kāntaṃ sarvānandasukhapradam || 23 ||
[Analyze grammar]

nirguṇo'pi guṇādhāro bhūtvā sevāṃ satīkṛtām |
aṅgīkaromi sarvasvāṃ lokānugraharūpadhṛk || 24 ||
[Analyze grammar]

adhyakṣaḥ sarvakāryāṇāṃ dehināṃ hṛdaye sthitaḥ |
anupamo'khilādhārastaṃ māṃ vai śaraṇaṃ vrajet || 25 ||
[Analyze grammar]

mahadādyā viśeṣāntā jātā yasyecchayā kṛteḥ |
taṃ vidyānmāṃ hariṃ kṛṣṇanārāyaṇamanāmayam || 26 ||
[Analyze grammar]

yasyā''jñayā jagaccāniruddhaḥ sṛjati rūpavat |
pradyumnaḥ pālakaścāste saṃkarṣaṇo vikarṣati || 27 ||
[Analyze grammar]

brahmaviṣṇumaheśāśca tadaṃśāstatkriyāparāḥ |
taṃ māṃ sarvāṃśadhartāraṃ vidyānmuktiṃ vrajet tataḥ || 28 ||
[Analyze grammar]

yajjñānaṃ bhaktimūlaṃ syānmokṣadaṃ jñānamityapi |
bhaktiḥ karmātmikā snehasevātmikā śubhottamā || 29 ||
[Analyze grammar]

dānāni yajñā vividhā vratatīrthārhaṇādikāḥ |
yayā pūrve kṛtāstasyā bhaktirbhaveddharau mayi || 30 ||
[Analyze grammar]

śāśvataḥ paramo dharmo bhaktileśena śobhate |
śraddhayā parayā yukto mayi bhāgavato bhavet || 31 ||
[Analyze grammar]

doṣāṇāṃ vilaye buddhiḥ prasannā jāyate sadā |
doṣā rāgādayaste ca mayi kṣiptā viśāradāḥ || 32 ||
[Analyze grammar]

guṇā eva prajāyante vivartante yato mayi |
tairyuktā ca matiḥ śreṣṭhā prasannā ca viśāradī || 33 ||
[Analyze grammar]

sā jñānātmakadhārā ca tadā prāpyo bhavāmyaham |
sā matirjñānarūpā vai mokṣadā mama dhāmadā || 34 ||
[Analyze grammar]

kriyāyogaṃ mayi kṛtvā matinairmalyamarjayet |
sevāyogena māṃ nityaṃ tato dāsī prasevayet || 35 ||
[Analyze grammar]

sādhubhūrvārvahnisūryaviprahṛccitradhātujāḥ |
sādhvīgoyogibuddhyādyāḥ pratimā mama mūrtayaḥ || 36 ||
[Analyze grammar]

devatācaityatīrthādyāḥ pratimāśca vibhūtayaḥ |
etāsu pūjya evā'haṃ patyāviva janārdanaḥ || 37 ||
[Analyze grammar]

karmaṇā manasā vācā bhaktyā sarvagataṃ ca mām |
pūjayed bhaktisaṃyuktā yā sā brāhmī bhaviṣyati || 38 ||
[Analyze grammar]

vadhvā patyau narabhāvo neśabhāvo bhavatyapi |
kāmakrodhādidoṣāṇāṃ darśanād divyatā na vai || 39 ||
[Analyze grammar]

kintu patyau kṛtā syācced divyatā manasā sadā |
vadhvā nārāyaṇadṛṣṭyā sevā sā muktidā bhavet || 40 ||
[Analyze grammar]

nāryā mūrtau pratimāyāṃ divyadṛṣṭiḥ kṛtā yadi |
sā syāttasyā mokṣadā vai śivaliṃge yathā matiḥ || 41 ||
[Analyze grammar]

sādhavaśca tathā sādhvyo mūrtayaḥ pratimā mama |
tāsu dṛṣṭiṃ śubhāṃ divyāṃ kṛtvā sevāṃ samācaret || 42 ||
[Analyze grammar]

pāñcabhautikapratimāścetanāstā mamaiva ha |
tāsāṃ saṃprīṇanāccā'haṃ prasannaḥ saṃbhavāmi hi || 43 ||
[Analyze grammar]

kriyārpaṇaṃ kṛtaṃ tatra gṛhṇāmi sevanātmakam |
dadāmi sevikāyai tu dhāmā'kṣaraṃ padaṃ param || 44 ||
[Analyze grammar]

ahiṃsāsatyamakrodho brahmacaryā'parigrahau |
anīrṣyā ca dayā śāntiḥ sevā ca sadguṇā ime || 45 ||
[Analyze grammar]

sarvān vinyasya ca mayi mama yogaṃ samācaret |
carācarātmako nāthaḥ śrīkṛṣṇapuruṣottamaḥ || 46 ||
[Analyze grammar]

matvaiva śrīhariṃ naijaṃ patiṃ kṛtvā bhajet priyā |
yogo'yaṃ sādhyarūpo vai śreṣṭhaḥ sākṣānmadātmakaḥ || 47 ||
[Analyze grammar]

mama prāptisvarūpaḥ sa jānantyenaṃ manīṣiṇaḥ |
doṣān vihāya kṛtvaiva guṇarūpān harau mayi || 48 ||
[Analyze grammar]

ānukūlyena sarveśaṃ kāntaṃ māṃ prabhajet satī |
muktyarthamarcayennityaṃ kriyāyogaparā priyā || 49 ||
[Analyze grammar]

ratā lokahite cāpi svahite ca ratā tathā |
samarcayati māṃ sādhvī divyakriyāvatī hi sā || 50 ||
[Analyze grammar]

nārāyaṇaṃ jagadyoniṃ sarvāntaryāmiṇaṃ harim |
stotrādyaiḥ stauti māṃ prātaḥ kīrtanairgāyati prabhum || 51 ||
[Analyze grammar]

upavāsādibhiścāpi kathāśravaṇacintanaiḥ |
puṣpādyaiścā'rcanaṃ cāpi kriyā divyā hi sā matā || 52 ||
[Analyze grammar]

bhaktikriyāvatāmevaṃ doṣā naśyanti mūlataḥ |
divyabhāvaṃ prayāntyeva kāmakrodhādayo'pi ca || 53 ||
[Analyze grammar]

matirdivyā bhaveccāpi mokṣadā jñānasaṃbhṛtā |
ekaṃ nārāyaṇaṃ māṃ ca ṛte sarvamanityakam || 54 ||
[Analyze grammar]

anityāstu padārthā vai nityastveko hariḥ prabhuḥ |
anityaiḥ sādhanairvai ca nityamekaṃ samāśrayet || 55 ||
[Analyze grammar]

ihā'mutra ca bhogeṣu viraktā tu sadā bhavet |
aviraktā hi saṃsārānnivartate na vai kvacit || 56 ||
[Analyze grammar]

śamādiguṇasampannā'bhyasyenmokṣavibodhanam |
haridhyānaparā syācca viśuddhamatikā bhavet || 57 ||
[Analyze grammar]

sarvatra bhāvayenmāṃ ca śrīpatiṃ puruṣottamam |
kṣarā'kṣarātmakaṃ viśvaṃ vyāpya kṛṣṇo'hamāsthitaḥ || 58 ||
[Analyze grammar]

iti jñātvā bhajenmāṃ ca sarvatra bhaktimāśritā |
ātmā dvedhā paraścāpyaparaśceti svabhāvataḥ || 59 ||
[Analyze grammar]

paramātmā paraścā'haṃ śrīkṛṣṇapuruṣottamaḥ |
mamā'vatārā bahavo rādhākṛṣṇādayo matāḥ || 60 ||
[Analyze grammar]

mama mūrteḥ śubhaṃ tejaścātmā'kṣaro nigadyate |
muktāśca bahavaḥ santi sarve'parā bhavanti te || 61 ||
[Analyze grammar]

īśvarāḥ śaktayo devā devyaśca mānavādayaḥ |
sarve cāparajīvāste bhavanti bhavadehinaḥ || 62 ||
[Analyze grammar]

evaṃ cetanavijñānaṃ jīvātmaparamātmanoḥ |
kṛtvā bhajetparaṃ kṛṣṇanārāyaṇaṃ sadā satī || 63 ||
[Analyze grammar]

ekaḥ śuddho'kṣaraparaḥ paramātmā''tmanāṃ patiḥ |
māyākālā'kṣarapatiścāvatārapatiḥ prabhuḥ || 64 ||
[Analyze grammar]

satāṃ patirmuktapatirbrahmapriyāpatirhariḥ |
satīpatirbhaktapatirbhaktāpatiḥ priyāpatiḥ || 65 ||
[Analyze grammar]

brāhmīpatiḥ sarvapatiḥ svapatiḥ parameśvaraḥ |
anādiśrīkṛṣṇanārāyaṇaśceti vibhāvayet || 66 ||
[Analyze grammar]

ekamevā'dvitīyaṃ yatparaṃ brahma sanātanam |
vedāntavedyaṃ tadvai māṃ viditvā'kṣaramāvrajet || 67 ||
[Analyze grammar]

eka eva parānando nirguṇaḥ parataḥ paraḥ |
divyaguṇairbhṛto nārāyaṇo'haṃ parameśvaraḥ || 68 ||
[Analyze grammar]

jñānināṃ paramātmā'haṃ hṛdi bhāmi nirantaram |
aṣṭasopānasaṃsiddhā yāti matparamaṃ padam || 69 ||
[Analyze grammar]

āhāraśuddhiḥ prathamā dehaśuddhirdvitīyakā |
tṛtīyendriyaśuddhiśca caturthyāntaraśuddhikā || 70 ||
[Analyze grammar]

pañcamī tvātmaśuddhirvai ṣaṣṭhī parātmadhāraṇā |
saptamī dhyānavṛttiścāṣṭamī tatraiva lagnatā || 71 ||
[Analyze grammar]

iti kṛtvā'ṣṭakaṃ sādhvī māṃ samāsena saṃśrayet |
matprasādāśanā syāddhi cāhāraśuddhireva sā || 72 ||
[Analyze grammar]

mama dīkṣāyutā syācca dehaśuddhirmatā hi sā |
indriyāṇi madarthaṃ vai tṛtīyā śuddhireva sā || 73 ||
[Analyze grammar]

karaṇāni madarthaṃ cāntarā śuddhirhi sā matā |
ātmā'rpaṇaṃ mayi kṛṣṇe divyasadguṇaśālitā || 74 ||
[Analyze grammar]

sattvaprakarṣa evā'tra tvātmaśuddhirmatā hi sā |
nijātmānaṃ brahmarūpaṃ vibhāvayet sadā satī || 75 ||
[Analyze grammar]

muktāṃ nityāṃ mahāmuktāṃ lakṣmīrūpāṃ sanātanīm |
ātmaśuddhirhi sā proktā māyāmāyikavarjitā || 76 ||
[Analyze grammar]

nijaṃ siṃhāsanaṃ kṛtvā pareśaṃ māṃ ca vāhayet |
dhārayet sthāpayeccāpi mama yogaṃ samācaret || 77 ||
[Analyze grammar]

mama dhāraṇayogyāyā rūpe vasāmi cetane |
mama vāsaḥ sa evā'syāḥ parātmadhāraṇā matā || 78 ||
[Analyze grammar]

mayi pratyayabhāvasya tvekatānatvameva yat |
sarvānandapravāhasya tvekatānatvameva yat || 79 ||
[Analyze grammar]

sarvaprakāśapūrasya caikatānatvameva yat |
sarvacaitanyapūrasya caikatānatvameva yat || 80 ||
[Analyze grammar]

yāvatprajñāpravāhasya caikatānatvameva yat |
avicchinnapravāhasya mayi lagnatvameva yat || 81 ||
[Analyze grammar]

saptamīdhyānavṛttiḥ sā proktā sopānikā varā |
vṛttīnāṃ śrīharau jāte valayātmalaye'dhike || 82 ||
[Analyze grammar]

ākṛṣṭasya cetanasyā'rpaṇaṃ cābhinnayogitā |
samādhiḥ paramaḥ so'tra śāśvatānandadohanaḥ || 83 ||
[Analyze grammar]

parameśasvarūpasya nirbhāso yatra vidyate |
svanirbhāso na vai cāste'ṣṭamī sā paramā sthitiḥ || 84 ||
[Analyze grammar]

brahmānandamayī mūrtirnijā pareśarūpiṇī |
yadā vibhāsate'śnute sarvān kāmān mayā saha || 85 ||
[Analyze grammar]

sukhaṃ tṛptiśca santoṣastuṣṭiścānanda utsavaḥ |
ratiḥ prasannatā modaḥ pramodo rañjanaṃ ca cit || 86 ||
[Analyze grammar]

laharī tānatā bhogaḥ sattvaṃ caiśvaryamuttamam |
praphullatā ca pulakaḥ snehaḥ prītirvirāmitā || 87 ||
[Analyze grammar]

ākarṣaṇaṃ ca viśrāntirmahāsuṣuptirityapi |
turyāvasthā nijānandaścetyevaṃ bahunāmabhiḥ || 88 ||
[Analyze grammar]

phalaṃ pravarṇyate tajjñaistadvattā cāṣṭamī sthitiḥ |
tāṃ prāpya punarāvṛttirvidyate naiva naiva na || 89 ||
[Analyze grammar]

evamaṣṭāṃgayogena mayoktena narāyaṇi |
anādiśrīkṛṣṇanārāyaṇaṃ māṃ vai vivāhayet || 90 ||
[Analyze grammar]

haribhaktirdṛḍhā yasyā haripūjā tathottamā |
tasyā viśuddhiyoginyā mokṣo hastagato'sti vai || 91 ||
[Analyze grammar]

harau mayi sthirā syācca samāsīta mayi prabhau |
śreṣṭhāsanaṃ hi tadbodhyaṃ prāṇaṃ māṃ ca samāśrayet || 92 ||
[Analyze grammar]

pratyāharaṇamevāpi mayyeva ca samācaret |
prayātā syātparabrahma punarāvṛttivarjitam || 93 ||
[Analyze grammar]

nijātmani praveśayet parameśaṃ śriyaḥpatim |
anādiśrīkṛṣṇanārāyaṇaṃ māṃ sthāpayet satī || 94 ||
[Analyze grammar]

sarvātmānaṃ nijātmānaṃ sarvalokaikakāraṇam |
surūpaṃ kāntikāntaṃ ca tejaḥparidhirājitam || 95 ||
[Analyze grammar]

manogamyaṃ yuvānaṃ ca sarvakāmaprapūrakam |
vikasatpadmapatrā'kṣaṃ cārukuṇḍalabhūṣitam || 96 ||
[Analyze grammar]

dīrghabāhumudārāṃgaṃ sarvālaṃkārabhūṣitam |
pītāmbaradharaṃ kāntaṃ patiṃ yogyaṃ susaṃginam || 97 ||
[Analyze grammar]

hemayajñopavītaṃ ca bibhratsattulasīsrajam |
śrīvatsavakṣasaṃ hāramaṇikaustubhaśobhitam || 98 ||
[Analyze grammar]

dhyāyenmāṃ paramātmānaṃ paraṃ mokṣaṃ labhettataḥ |
dhyānātpāpāni naśyanti dhyānānmokṣo bhavedapi || 99 ||
[Analyze grammar]

hariḥ prasīdati dhyānād dhyāne'haṃ samavasthitaḥ |
dhyānaṃ dhyeyaṃ dhyātṛbhāvaṃ trayamekībhaved yadā || 100 ||
[Analyze grammar]

tadā'mṛtatvaṃ bhavati jñānāmṛtaṃ niṣevate |
mahānandaṃ prabhuṃkte ca bhuṃkte brahmāmṛtaṃ sadā || 101 ||
[Analyze grammar]

śabdabrahmā'kṣarabrahmakaraṇabrahma cetyapi |
ātmabrahma parabrahma caikībhavanti tāni vai || 102 ||
[Analyze grammar]

mahānandasamudre vai muktiḥ samādhijā hi sā |
ānando vai parabrahma parabrahma hariḥ prabhuḥ || 103 ||
[Analyze grammar]

omityeva parabrahma saccidānanda eva saḥ |
etadabhyāsasaṃyuktā paraṃ mokṣaṃ vrajatyapi || 104 ||
[Analyze grammar]

yā tvetacchṛṇuyāccāpi paṭhedvāpi samāhitā |
sā madaikyaṃ samāpannā haripriyā bhaved dhruvam || 105 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne vadhūgītāyāṃ sākṣātparabrahmayoganirūpaṇanāmā saptacatvāriṃśo'dhyāyaḥ || 47 ||
[Analyze grammar]