Chapter 33

śrīpuruṣottama uvāca |
śṛṇu lakṣmi tataścāpi prākaṭyaṃ mama vacmi te |
vedhaso vatsare catvāriṃśe kalpe'ṣṭame tathā || 1 ||
[Analyze grammar]

manau ca daśame prāntadvāpare bhūtale'bhitaḥ |
kālabalena dharmasya nairbalye pāpidehiṣu || 2 ||
[Analyze grammar]

adharmasya bale vyāpte'surāṇāṃ balavardhane |
prajāstvāsan pīḍitā vai makhā ruddhāḥ samantataḥ || 3 ||
[Analyze grammar]

dānaṃ dayā damādyāśca sarvathā vilayaṃ gatāḥ |
ahiṃsā satyamasteyaṃ dṛśyante naiva bhūtale || 58 ||
[Analyze grammar]

śaucaṃ tapo vrataṃ ceti naṣṭānyati prajāsu vai |
dṛśyate nopakāritvaṃ śīlaṃ naiva ca naiva ca || 5 ||
[Analyze grammar]

bādhante durbalān sarve baliścopabhuṃjate |
tatsmṛddhīste prasahyaivā'pyapaharanti sarvaśaḥ || 6 ||
[Analyze grammar]

daityānāṃ dānavānāṃ cā'surāṇāṃ koṭayo bhuvi |
sarvatraivā'valokyante tīrthayātrā layaṃ gatā || 7 ||
[Analyze grammar]

maryādā naranārīṇāṃ rākṣasairhi vināśitā |
sarvavarṇāḥ svatantrāśca dharmanyāyavivarjitāḥ || 8 ||
[Analyze grammar]

devānāmarhaṇaṃ sarvaṃ sarvathaiva layaṃ gatam |
bālā'nāthā'tithīnāṃ ca pālanaṃ vilayaṃ gatam || 9 ||
[Analyze grammar]

nāstikyaṃ sarvakāryeṣu sarvadharmeṣu cā'bhavat |
vṛddhānāṃ cāvamānādi dhārmikāṇāṃ prapīḍanam || 10 ||
[Analyze grammar]

āsuraiḥ sarvathā loke kṛtaṃ tvabhakṣyabhakṣakaiḥ |
apeyapānakaiścāpyakāryairjugupsitairapi || 11 ||
[Analyze grammar]

nṛpāḥ sarve daityavaṃśā ācāryā daityavaṃśinaḥ |
guravo'pi daityavaṃśā sambabhūvuryadā kṣitau || 12 ||
[Analyze grammar]

daivaṃ paitryaṃ tathā svargyaṃ sarvaṃ layaṃ gataṃ drutam |
tadā devaiśca ṛṣibhirmānavairdharmamānasaiḥ || 13 ||
[Analyze grammar]

ārādhitaḥ svayaṃ śrīmatparameśvara eva ha |
anādiśrīkṛṣṇanārāyaṇaḥ śrīpuruṣottamaḥ || 14 ||
[Analyze grammar]

jñānaviṣṇugṛhe putrasvarūpo'haṃ tadā'bhavam |
sudarśanena sahitaścakranārāyaṇaḥ prabhuḥ || 15 ||
[Analyze grammar]

mātā me vedinī cā''sīt tatkukṣeḥ prakaṭo'bhavam |
tadā tvaṃ mannideśena rājakanyā'bhavaḥ śubhā || 16 ||
[Analyze grammar]

sārvabhaumasya nṛpaterbrahmacitradharasya vai |
rājñyāḥ śobhālikānāmnyāḥ kukṣau sudhākṣiṇī tadā || 17 ||
[Analyze grammar]

sudhākṣyāste pitā cakre samrāṭ svayaṃvaraṃ tava |
mahotsavaṃ tatastatra rājāno'surapuṅgavāḥ || 18 ||
[Analyze grammar]

tvadāśayā''yayuḥ sarve samrājaḥ khaṇḍagāstathā |
parakhaṇḍagatāścāpi vaimānikā balotkaṭāḥ || 19 ||
[Analyze grammar]

ahaṃ vaiśyo jñānaviṣṇoḥ sutaścakrasamanvitaḥ |
yayau svayaṃvare tatra rūpaiśvaryaguṇānvitaḥ || 20 ||
[Analyze grammar]

tvaṃ māṃ vilokya sarvāstān vihāya parameśvarī |
sabhāmadhye dadau mālāṃ mama kaṇṭhe'tiśobhanām || 21 ||
[Analyze grammar]

atha rājanyavargāste kruddhā yuddhārthamutthitāḥ |
mayā sudarśanenaivā'yutabhūpā nipātitāḥ || 22 ||
[Analyze grammar]

sādhāraṇānāṃ saṃkhyā na daityāḥ sarve hatā mayā |
dānavā nihatāścāpyasurāḥ sarve nipānitāḥ || 23 ||
[Analyze grammar]

pitā te rakṣitastveko bhakto me so'bhavattataḥ |
rājyaṃ nijaṃ sudhākṣiṇyai dattavān putravarjitaḥ || 24 ||
[Analyze grammar]

mayā sarvaṃ kṛtaṃ rājyaṃ sahasravatsaraṃ tataḥ |
dharmāḥ saṃsthāpitā loke prajāsu devapitṛjāḥ || 25 ||
[Analyze grammar]

maryādā dānayajñānāṃ sthāpitā ca punarmayā |
anādiśrīcakranārāyaṇena sarvajiṣṇunā || 26 ||
[Analyze grammar]

smara nārāyaṇīśri tvaṃ sāmrājyaṃ tava vai tadā |
jānāmyahaṃ hi tat sarvaṃ nānye jānanti kecana || 27 ||
[Analyze grammar]

paṭhanācchravaṇāccāpi bhuktirmuktirbhaved dhruvam |
anye'vatārāḥ śataśo dharmarakṣākarā mama || 28 ||
[Analyze grammar]

jātāstadānīṃ bahudhā devamānavasiddhajāḥ |
dharmarakṣākarā muktipradāstān padmaje smara || 29 ||
[Analyze grammar]

athāpi vedhasastvekacatvāriṃśe tu vatsare |
adhvarākhye tripañcāśatkalpe manau tu saptame || 30 ||
[Analyze grammar]

saptaṣaṣṭhitame cāpi kalau prākaṭyameva me |
abhavattacchṛṇu śri tvaṃ parabrahmaṇa eva ha || 31 ||
[Analyze grammar]

kalerbale'tisaṃvyāpte jane mlecchamaye tathā |
ekākāre sarvaloke varṇāśramavivarjite || 32 ||
[Analyze grammar]

vitastimātradehe ca pṛthvīvivaramandire |
tṛṇamūlādane loke daivapaitryavivarjite || 33 ||
[Analyze grammar]

kuṭumbalope sarvatra svārthasambandhamātrake |
yatheṣṭayugale loke mama bhānavivarjite || 34 ||
[Analyze grammar]

upadravādhike cālpasukhe cāśrayavarjite |
jāte ca satyadharmāṇāṃ sthāpanārthaṃ svayaṃ hariḥ || 35 ||
[Analyze grammar]

prādurabhavaṃ bhūmau vai bhaktasya putratāṃ gataḥ |
nāmnā drāvaṇaviprasya caturbhujaḥ svayaṃ prabhuḥ || 36 ||
[Analyze grammar]

tvaṃ tadā brahmavarcasthā mama dehe sthitā sadā |
abhavo'dṛśyarūpā śrīrvijayākhyā mayā saha || 37 ||
[Analyze grammar]

āsurāṇāṃ vināśārthaṃ garuḍaḥ saṃsmṛto mayā |
ratho divyo gajāścāpi caturdantāḥ sitaprabhāḥ || 38 ||
[Analyze grammar]

āyudhāni samastāni gadākhaṅgaśarā'sayaḥ |
dhanuśśaktivajracakraprāśatomarakuntalāḥ || 39 ||
[Analyze grammar]

astraśastradharaścā'haṃ tvayā vijayayā saha |
jaitraṃ rathaṃ samāsthāya gāruḍadhvajamūrdhvagam || 40 ||
[Analyze grammar]

hastivāhyaṃ vyomagaṃ ca yuyudhe'surakoṭibhiḥ |
nāśitāśca nṛpāḥ pūrvaṃ mlecchā daityeśvarā balāḥ || 41 ||
[Analyze grammar]

dānaveśāścāsureśāstato mlecchaprajādikāḥ |
mayā ca rakṣitāstatra saṃgrāme śaraṇāgatāḥ || 42 ||
[Analyze grammar]

kṛtāste pāyayitvā'mbho pādayorbrāhmaṇāḥ punaḥ |
niṣkāsitāśca te sarve matprākaṭyānalāntarāt || 43 ||
[Analyze grammar]

pāvitāśca kṛtāḥ kāyākalpitā dvijakoṭayaḥ |
sthāpitāsteṣu sarveṣu dharmā me satyasaṃbhavāḥ || 44 ||
[Analyze grammar]

mamā'stitvabalenā'pi bhūtāni sāttvikāni vai |
saṃbhūtāni samastāni narā nāryo'tisāttvikāḥ || 45 ||
[Analyze grammar]

satyadharmaparāḥ sarve saṃbhūtā matprabhāvataḥ |
pavanā'nalavārbhūmivyomādyāḥ sattvatāṃ gatāḥ || 46 ||
[Analyze grammar]

vṛkṣavallītṛṇādyāśca rasapūrṇāstadā'bhavan |
viprāḥ kṛtā hi rājāno yaśāścāpi pravartitāḥ || 47 ||
[Analyze grammar]

āstikyaṃ dānadharmāśca vivāhāśca pravartitāḥ |
sādhusādhvījanāścāpi santaḥ siddhāḥ śubhāḥ kṛtāḥ || 48 ||
[Analyze grammar]

tiṣyo vināśitaścāpi satyaḥ saṃsthāpito mayā |
devāśca rakṣitā sarve ṛṣayaḥ sthāpitāḥ punaḥ || 49 ||
[Analyze grammar]

mandirāṇi kāritāni homaśālā vidhāpitāḥ |
satyatretāyugakālamavasaṃ bhūtale tadā || 50 ||
[Analyze grammar]

smara lakṣmi tadā camatkāraṃ mama purātanam |
anādiśrīsatyanārāyaṇaṃ śrīvijayānvitam || 51 ||
[Analyze grammar]

parabrahma svayaṃ satyasthāpakaṃ cāvatāriṇam |
anādiśrīkṛṣṇanārāyaṇaṃ śrīpuruṣottamam || 22 ||
[Analyze grammar]

evamanye'pyavatārāstatra tatra sahasraśaḥ |
mama jātāstu tān sarvān jānāmyahaṃ na cetaraḥ || 53 ||
[Analyze grammar]

paṭhanācchravaṇādasya satyadharmāśrito bhavet |
bhuktirmuktirbhaveccāpi yatheṣṭaphalavān bhavet || 54 ||
[Analyze grammar]

athā'nyanmama divyaṃ ca prākaṭyaṃ kathayāmi te |
brahmaṇo dvācatvāriṃśā'bde hiraṇyābhidhānake || 55 ||
[Analyze grammar]

kalpe navatisaṃkhye cā''rambhe cādyamanostathā |
pṛthvyāṃ dvādaśakhaṇḍānāṃ vibhājakāstu parvatāḥ || 56 ||
[Analyze grammar]

sapakṣāśca svatantrāśca tathā'nye dvīpaparvatāḥ |
cetanāḥ sabalā mūrtāḥ sthānārthaṃ vādamādadhan || 57 ||
[Analyze grammar]

ahaṃ meroḥ sannidhāne nivatsyāmi na dūrataḥ |
ahaṃ cā'ha tathetyevamanyonyeṣāṃ vivādanam || 58 ||
[Analyze grammar]

abhavad balinastatra ye cāseste tu vai balāt |
iṣṭasthaleṣvavasaṃśca pare yātā manuṃ prati || 59 ||
[Analyze grammar]

svasvakaṣṭanivedārthaṃ manunā''hūya bodhitāḥ |
tathāpi menire naiva baliṣṭhāste manorvacaḥ || 60 ||
[Analyze grammar]

athendrāya dadāvājñāṃ vajradharāya śikṣaṇam |
parvatevyaḥ pradātuṃ cānyathā daṇḍayituṃ nagān || 61 ||
[Analyze grammar]

indrastvāgatya bhūbhāge merau meroḥ samīpataḥ |
parvatān mūrtarūpāṃścā''hūya jagāda taddhitam || 62 ||
[Analyze grammar]

brahmaṇā nirmitā yūyaṃ pṛthvīsthairyasya hetave |
khaṇḍavibhāgakāryāya ratnanidhānahetave || 63 ||
[Analyze grammar]

prajārakṣaṇakāryāya khaṇḍaprākārahetave |
ye ye yatra niyuktāste tatra tatraiva sarvathā || 64 ||
[Analyze grammar]

nivasantu nānyathā vai hitaṃ me vacanaṃ yataḥ |
anyathā bhavatāṃ pakṣān śātayitvā balādaham |
vajreṇa sarvathā yuṣmān pātayiṣye yathāsthalam || 65 ||
[Analyze grammar]

ityevaṃ garvayuktaṃ vai śrutvendravākyamulbaṇāḥ |
parvatāstūrṇamevaite samutpeturvihāyasā |
sarve balino garviṣṭhāḥ svecchārūpadharāstadā || 66 ||
[Analyze grammar]

grahatulyā mahendrasyopari nipetureva ha |
indrastu marditastatra mṛtaprāyo babhūva ha || 67 ||
[Analyze grammar]

vajraṃ vajradharasyāpi naṣṭaṃ cūrṇaṃ babhūva ca |
indrabalaṃ hataṃ dīrghabhūbhṛdbhiścūrṇitaṃ tadā || 68 ||
[Analyze grammar]

kaccaritāḥ surādyāśca palāyanaṃ pracakrire |
bhūbhṛto vyomagāścāpi yuddhaṃ cakruḥ suraiḥ saha || 69 ||
[Analyze grammar]

pṛthvī bhāreṇa hīnā ca samataulyaṃ vihāya sā |
mahājalatalaṃ gantuṃ pārśvanimnā babhūva ha || 70 ||
[Analyze grammar]

athotpātā babhūvuśca grahāṇāmapi sarvataḥ |
vāyūnāmapi cā'sthairyaṃ parvataiśca kṛtaṃ hyabhūt || 71 ||
[Analyze grammar]

gaganaṃ kampate sarvaṃ samaṇḍalaṃ laye yathā |
pṛthivyāḥ rakṣaṇaṃ sthairyaṃ parvatasthairyalambitam || 72 ||
[Analyze grammar]

pṛthvīsthairye tato meroḥ sthairyaṃ dhruvasya cāpi vai |
satyevaṃ svargalokānāṃ sthairyaṃ sukhaṃ bhavediti || 73 ||
[Analyze grammar]

vicārya sahasā brahmā rudro viṣṇuśca devatāḥ |
mahānto namrabhāvāśca sāntvanāyuktabodhinaḥ || 74 ||
[Analyze grammar]

bodhayāmāsurevaitān parvatān bahudhā tadā |
niyuktasthānavāsārthaṃ tathāpyete na menire || 75 ||
[Analyze grammar]

hiraṇyakaḥ kānakaśca rājato rātnakastathā |
māṇeyaśca vaiṣṇavaśca haimeyaśca digīśakaḥ || 76 ||
[Analyze grammar]

bhairavaśca mahendraśca tathodayanaparvataḥ |
āruṇaśca mahābhaśca lokālokaśca merukaḥ || 77 ||
[Analyze grammar]

evamanye mahāraudrā menire na tadā surāḥ |
parvatānāṃ mahākleśapraśamāya narāyaṇam || 78 ||
[Analyze grammar]

parameśaṃ hyanādiśrīkṛṣṇanārāyaṇaṃ harim |
sasmarustūrṇamevā'haṃ śaṃkhacakragadādharaḥ || 79 ||
[Analyze grammar]

parabrahma svayaṃ tatrā''jagāma tūrṇameva ha |
sudarśanaṃ dhṛtaṃ cakraṃ gadā pṛthvyāṃ dhṛtā mayā || 80 ||
[Analyze grammar]

yatra cordhvā'bhavat pṛthvī tatrā'pekṣitavattataḥ |
samatolā'bhavat sā ca rakṣitā''yudhabhārataḥ || 81 ||
[Analyze grammar]

parvatāṃśca samāhūya varadānena te tataḥ |
yojitāśca mayā lakṣmi mama vāsakṛtā hi te || 82 ||
[Analyze grammar]

ye mayokteṣu deśeṣu sthāsyanti parvatāḥ kṣitau |
tatra tatrā'hamevāpi sthāsye śrīpuruṣottamaḥ || 83 ||
[Analyze grammar]

tataste parvatāstūrṇaṃ mama vākyaṃ samāśritāḥ |
merumadhye ca parito lokāloko vidhāpitaḥ || 84 ||
[Analyze grammar]

catuṣkoṇeṣu catvāro lambā samudragāḥ kṛtāḥ |
hiraṇyako'gnikoṇe ca kānako nirṛte'kvake || 85 ||
[Analyze grammar]

rājataśca marutkoṇe ratnakaśceśakoṇake |
pūrve cottaradakṣāvāyatau māṇeyavaiṣṇavau || 86 ||
[Analyze grammar]

dakṣiṇe prākpaścalambau haimeyaśca digīśakaḥ |
paścime cottaradakṣau mairavaśca mahendrakaḥ || 87 ||
[Analyze grammar]

uttare cāruṇo mahābhaścāyatau niveśitau |
pūrvā'bdhau nihitaścāpyudayanaḥ sarvabhā'nvitaḥ || 88 ||
[Analyze grammar]

evamanye parvatāśca madhye madhye niveśitāḥ |
atha te prārthanāṃ cakruḥ pakṣanāśo hi no na vai || 89 ||
[Analyze grammar]

bhavediti mayoktaṃ ca sapakṣāḥ santu vai sthirāḥ |
yadyākāśe gatimanto bhaviṣyatha tadā hyayam || 90 ||
[Analyze grammar]

mahendro vajradhāreṇa śātayiṣyati pakṣakān |
tataste sthairyamāpuśca svasvasthāne yathāsukham || 91 ||
[Analyze grammar]

atha devādayaḥ sarve pūjayitvā ca māṃ yayuḥ |
nijalokān parvateṣu nivāsaṃ ca tvayā saha || 92 ||
[Analyze grammar]

vyadhāpayaṃ bahurūpadharo rakṣākaraḥ prabhuḥ |
ākalpāntaṃ nyavasaṃ vai tvayā hiraṇyayā saha || 93 ||
[Analyze grammar]

anādiśrīhiraṇyaśrīnārāyaṇaḥ pumuttamaḥ |
vāgbaddho'haṃ parvateṣu nyavasaṃ bodhayan surān || 94 ||
[Analyze grammar]

mānavānapi pitṝṃśca maharṣīn vyomacāriṇaḥ |
atha sthirā'bhavat pṛthvī parvatāḥ sukhino'bhavat || 95 ||
[Analyze grammar]

nirbhayā mama vāsena prajāśca sukhitāstathā |
anādiśrīhiraṇmayanārāyaṇaṃ paraṃ prabhum || 96 ||
[Analyze grammar]

smara nārāyaṇīśri tvaṃ tvāṃ hiraṇyāṃ tathā smara |
evamanye'pyavatārā devamānavajantuṣu || 97 ||
[Analyze grammar]

kāryāpekṣā abhavaṃśca tān jānāmi samastakān |
paṭhanācchravaṇāccāpi bhuktirmuktirbhavecchubhā || 98 ||
[Analyze grammar]

mama smarturgṛhe vāso nityadā mama jāyate |
yatra me bhāvayuktāśca bhaktā vasanti tatra ca || 99 ||
[Analyze grammar]

vasāmyeva na sandeho parvate ca vane'pi ca |
gṛhe prāsādake cāpi mahālaye jale'pi ca || 100 ||
[Analyze grammar]

mama bhaktasya rakṣārthe puṣṭyā rakṣārthamityapi |
devānāṃ cāpi lokānāṃ sṛṣṭeḥ rakṣārthamityapi || 101 ||
[Analyze grammar]

nivasāmi sthalaṃ kṛtvā tadrūpo'mānavo'pi san |
yatra vasāmi tatraiva dhāmā'kṣaraṃ mamā'sti ca || 102 ||
[Analyze grammar]

muktāścāyānti tatraiva sarve tatra prapadyate |
māyikā naiva paśyanti paśyanti divyacakṣuṣaḥ || 103 ||
[Analyze grammar]

siddhā muktāḥ sādhavaśca santaḥ sanyāsino'malāḥ |
sādhvyaḥ satyaśca bhaktāṃśca paśyanti majjaniṃ priye || 104 ||
[Analyze grammar]

itiśrīlakṣmīnārāyaṇīyasaṃhitāyāṃ tṛtīye dvāparasantāne vedhasaścatvāriṃśe vatsare daityānāṃ nāśārtham anādiśrīcakranārāyaṇasya sudhākṣiṇīśrīsahitasya ekacatvāriṃśe vatsare ca satyayugadharmasthāpanārtham anādiśrīsatyanārāyaṇasya vijayāśrīsahitasya dvācatvāriṃśe vatsare ca parvatānāṃ sthityartham anādiśrīhiraṇyanārāyaṇasya hiraṇyāśrīsahitasya prākaṭyamityādinirūpaṇanāmā trayastriṃśo'dhyāyaḥ || 33 ||
[Analyze grammar]