Chapter 32

śrīpuruṣottama uvāca |
śṛṇu nārāyaṇīśri tvaṃ prākaṭyaṃ me tataḥ param |
vedhaso'ṣṭātriṃśavarṣe kalpe ṣaṣṭe'ṣṭame manau || 1 ||
[Analyze grammar]

brahmadharmasamutpanno'suro'riṣṭo'nalādanaḥ |
vavṛdhe jātamātraḥ sa bubhukṣito'titaijasaḥ || 2 ||
[Analyze grammar]

anyatejāṃsi yaddehe layaṃ yānti samantataḥ |
agnīn sarvān bhakṣayati nānyaṃ bhuṃkte hi janmataḥ || 3 ||
[Analyze grammar]

jalaṃ pṛthvīṃ na grasate grasate'nalamātrakam |
yatra yatrā'nalāḥ santi vahnayastatra tatra saḥ || 4 ||
[Analyze grammar]

gatvā gatvā prasahyā'gniṃ dhṛtvā dhṛtvā'tti sarvaśaḥ |
brahmaṇo mānasaṃ putraṃ mahāgniṃ sa tvabhakṣayat || 5 ||
[Analyze grammar]

tattrisutān pāvakaṃ ca pavamānaṃ śuciṃ tathā |
abhakṣayattathā pāvakātmajaṃ saharakṣakam || 6 ||
[Analyze grammar]

pavamānātmajaṃ kavyavāhanaṃ cāpyabhakṣayat |
śucyātmajaṃ havyavāhaṃ dhṛtvā'suro'pyabhakṣayat || 7 ||
[Analyze grammar]

agneścaturthaṃ putraṃ brahmaudanāgnimabhakṣayat |
brahmaudanāgniputraṃ ca bharataṃ cāpyabhakṣayat || 8 ||
[Analyze grammar]

tathā bharataputraṃ ca vaiśvānaramabhakṣayat |
athāgneḥ pañcamaṃ putramatharvāṇamabhakṣayat || 9 ||
[Analyze grammar]

atharvaputrānamṛtaṃ dadhyaṅgamaṅgiraṃ tathā |
nirmathya ceti caturo'pyabhakṣayat mahā'suraḥ || 10 ||
[Analyze grammar]

nirmathyasya sutaṃ gārhapatyaṃ tathā hyabhakṣayat |
gārhapatyasutau śaṃsyaṃ śukaṃ tathā hyabhakṣayat || 11 ||
[Analyze grammar]

śaṃsyasutānāvasathyaṃ sabhyaṃ cāhavanīyakam |
abhakṣayanmahāriṣṭānalādo nāma cāsuraḥ || 12 ||
[Analyze grammar]

tathā śaṃsyasutānanyān nadīṣu jātasaṃbhavān |
dhiṣṇisaṃjñānapi putrānabhakṣayanmahāsuraḥ || 13 ||
[Analyze grammar]

ṛtuṃ pravāhaṇaṃ cāgnīdhraṃ samrājaṃ kṛśānukam |
pāriṣadaṃ pratalkaṃ ca nabhasaṃ ca vasuṃ tathā || 14 ||
[Analyze grammar]

ajaikapādṃ cāhirbudhnaṃ ca gṛhapatiṃ tathā |
abhakṣayacca hotrīyaṃ śāntapracetasaṃ tathā || 15 ||
[Analyze grammar]

viśvadevaṃ tathā'vakṣumacchāvākamabhakṣayat |
uśīraṃ ca kaviṃ potamāvārimapyabhakṣayat || 16 ||
[Analyze grammar]

bhāriṃ naiṣṭhīyasaṃ cāpi vyaratnimapyabhakṣayat |
mārjālīyamavatphūrjamabjaṃ ca jāṭharaṃ tathā || 17 ||
[Analyze grammar]

jaṭharasya sutaṃ manyumantaṃ tathā hyabhakṣayat |
savarttakaṃ manyumajjaṃ vāḍavaṃ cāpyabhakṣayat || 18 ||
[Analyze grammar]

vāḍavotthaṃ saharakṣaṃ kṣāmaṃ ca saharakṣajam |
kṣāmātmajaṃ ca kravyādaṃ hyabhakṣayanmahāsuraḥ || 19 ||
[Analyze grammar]

śuceḥ putramāraṇeyaṃ cāparaṃ cāpyabhakṣayat |
āraṇeyasutaṃ cāyuṃ cāyujaṃ mahimānakam || 20 ||
[Analyze grammar]

mahimānasutaṃ cāpi savanaṃ cāpyabhakṣayat |
savanotthaṃ cādbhutaṃ ca vividhiṃ cādbhutātmajam || 21 ||
[Analyze grammar]

vividhijaṃ tathā'rkaṃ cā'pyabhakṣayanmahāsuraḥ |
arkasutān vājasṛgamanīkavantamityapi || 22 ||
[Analyze grammar]

yaṣṭikṛtaṃ rakṣohaṃ ca surabhiṃ ca vasuṃ tathā |
annādaṃ rukmarājaṃ cāpyabhakṣayanmahāsuraḥ || 23 ||
[Analyze grammar]

evamanyān śmaśānasthān mahāsuro'pyabhakṣayat |
evaṃ nārāyaṇīśri vai jagaccāgnivivarjitam || 54 ||
[Analyze grammar]

dāhaśūnyaṃ pākaśūnyaṃ himavat saṃvyajāyata |
mṛtyūnmukhaṃ samastaṃ vai vīkṣya pṛthvī śucānvitā || 25 ||
[Analyze grammar]

yayau satyālayaṃ tatra brahmāṇaṃ śaraṇaṃ gatā |
tuṣṭāva parayā bhaktyā'nalarakṣārthameva sā || 26 ||
[Analyze grammar]

analādavināśārthaṃ cakre vai prārthanāṃ muhuḥ |
brahmā sasmāra manasā māṃ tadā puruṣottamam || 27 ||
[Analyze grammar]

anādiśrīkṛṣṇanārāyaṇaṃ śrīpuruṣottamam |
parabrahmā'kṣarātītaṃ sarvāntaryāmiṇaṃ harim || 28 ||
[Analyze grammar]

śrupvā'haṃ prārthanāṃ lakṣmi pratyakṣo brahmaṇo'bhavam |
tvayā sākaṃ tadā padme brahmā pupūja māṃ tathā || 29 ||
[Analyze grammar]

tvāṃ pupūja pṛthivī sā''rthayad rakṣārthamityatha |
asurasya vināśārthaṃ tadā tvaṃ tu madājñayā || 30 ||
[Analyze grammar]

pṛthvīputrī cābhavaśca pārthivīśrīḥ sukanyakā |
tvāṃ nītvā sā yayau tūrṇaṃ bhūlokaṃ vimalāśayā || 31 ||
[Analyze grammar]

ahaṃ vahneḥ svarūpaṃ ca dhṛtvā jvālātmako'bhavam |
analādo'suro māṃ saṃvīkṣya merau samā''dravat || 32 ||
[Analyze grammar]

bhakṣaṇārthaṃ cāyayau prā'dravaṃ cāhaṃ bhuvaṃ prati |
yatra tvaṃ bhūsahitā ca pratīkṣase mamā''gamam || 33 ||
[Analyze grammar]

bhānumatparvatasyaiva gahvare tatra cā''gamam |
paśyantyāśca tava cāpi pṛthvyāstatra mahāsuraḥ || 34 ||
[Analyze grammar]

agilanmāṃ mahājvālāmayā'gniṃ parameśvaram |
ahamantargato bhūtvā'dahaṃ taṃ vai mahāsuram || 35 ||
[Analyze grammar]

bhasmībhūtaṃ ca taṃ kṛtvā vahnīnajīvayaṃ punaḥ |
sarve'gnayastadā jīvasahitāścetanāḥ śubhāḥ || 36 ||
[Analyze grammar]

yathāpūrvamabhavaṃste'stuvanmāṃ cāpyapūjayan |
anādiśrīvahninārāyaṇaṃ māṃ puruṣottamam || 37 ||
[Analyze grammar]

mayā''jñaptā vahnayaste svasvasthāneṣu vai drutam |
pravṛttāḥ svasvakāryeṣu saśaktāśca samanvitāḥ || 38 ||
[Analyze grammar]

atha jaganti vai lokāḥ prajāśca sā'gnayo'bhavan |
himabhāvo gatasteṣāṃ sajīvā hyabhavan punaḥ || 39 ||
[Analyze grammar]

sarve jñātvā mama tatra prākaṭyaṃ tu surādayaḥ |
āyayuḥ pūjanārthaṃ te vyomavṛṣṭistato'bhavat || 40 ||
[Analyze grammar]

candanānāṃ kusumānāṃ jayaśabdastathā'bhavan |
mahotsavaḥ kṛtastatra sarvadevādibhirmama || 41 ||
[Analyze grammar]

pṛthvyā tvaṃ cārpitā mahyaṃ pārthivīśrīrvivāhitā |
ākalpāntaṃ sthitaścā'haṃ tvayā sākaṃ narāyaṇi || 42 ||
[Analyze grammar]

prākaṭyaṃ me kathitaṃ te lakṣmi smara sukhapradam |
anye'vatārā bahavastadā varṣe'bhavanmama || 43 ||
[Analyze grammar]

jānāmyetān samastān vai nānyo jānāti kaścana |
paṭhanācchravaṇāccāpi bhuktirmuktiḥ prajāyate || 44 ||
[Analyze grammar]

vahnerupadravo na syād rogāḥ syurna kadācana |
ānandaṃ brahmaṇo nityaṃ labhedevā'tra pāṭhakaḥ || 45 ||
[Analyze grammar]

athā'nyaccāpi me lakṣmi prākaṭyaṃ ca tataḥ param |
kathayāmi samāsena mahāpuṇyapradaṃ śubham || 46 ||
[Analyze grammar]

navatriṃśe vedhasaśca nāgavarṣe purā'bhavat |
ṣaṣṭhakalpe ṣaṣṭhamanau ilodaro mahāsuraḥ || 47 ||
[Analyze grammar]

rasādaḥ sarvatattvānāṃ rasabhakṣaka ulbaṇaḥ |
rāhoḥ putro'surakarmā svargabhūrasabhakṣakaḥ || 48 ||
[Analyze grammar]

sa hi pṛthvyāṃ samāgatya tapastepe'tidāruṇam |
sahasravatsarān mero tutoṣa śaṃkaraḥ svayam || 49 ||
[Analyze grammar]

āyayau sannidhau tasyovāca vṛṇu varaṃ tataḥ |
asuraḥ saṃyayāce'pi sarvarasaprabhakṣitām || 50 ||
[Analyze grammar]

tathā'stviti haraḥ proktvā tirobabhūva satvaram |
asuraḥ sa sadā pārthivān rasān salilasthitān || 51 ||
[Analyze grammar]

bhuṃkte yatheṣṭaṃ satataṃ puṣṭimeti samantataḥ |
tatastṛptaḥ punarvarṣasahasrordhvaṃ tapaḥ param || 52 ||
[Analyze grammar]

cakre brahmāṇamuddiśyā'vadhyabhāvārthameva saḥ |
vāyvāhāraṃ śuṣkagātraṃ vīkṣya brahmā hyupāyayau || 53 ||
[Analyze grammar]

uvāca prokṣya salilaiḥ sajīvīkṛtya taṃ tadā |
varaṃ vṛṇu yatheṣṭaṃ me prasanno'smi mahāsura || 54 ||
[Analyze grammar]

so'pi netre samunmilyovācā'jeyatvamuttamam |
caturdaśabhuvāṃ vāsairnā'haṃ jayyo bhavāmi ha || 55 ||
[Analyze grammar]

tathā'stviti brahmavākyaṃ prāptavān sa mahāsuraḥ |
brahmā'pyadṛśyatāṃ prāpya yayau tato mahāsuraḥ || 56 ||
[Analyze grammar]

bubhuje bahuśo bhogānnirbhayo daivamānuṣān |
athāpi cintayāmāsa maraṇaṃ me tu no bhavet || 57 ||
[Analyze grammar]

tatastapaḥ punaḥ kāryaṃ merau varṣasahasrakam |
vicāryetthaṃ cakārā'pi viṣṇumuddiśya vai tapaḥ || 58 ||
[Analyze grammar]

viṣṇurvarṣasahasrānte tvāyayau devanoditaḥ |
prāha taṃ te kimiṣṭaṃ vai vṛṇu viṣṇurahaṃ tviha || 59 ||
[Analyze grammar]

varapradānakāryāya samāyāto'smi mā ciram |
asuraḥ prāha yadyevaṃ maraṇaṃ me na vai bhavet || 60 ||
[Analyze grammar]

tathā vṛṇomi viṣṇoste varadānaṃ mayepsitam |
viṣṇuḥ prāha janiryasya mṛtistasya dhruvā'sura || 61 ||
[Analyze grammar]

pituste rāhusaṃjñasya maraṇaṃ dhruvameva ha |
tatpituḥ kaśyapasyāpi tatpituścāpi vai dhruvam || 62 ||
[Analyze grammar]

amṛtyuḥ kasyacinnāsti vinā śrīpuruṣottamam |
ātmā nityaḥ karmabhoktā vasati dehapañjare || 63 ||
[Analyze grammar]

sa ca dehādviniryāto mṛta ityupacaryate |
dehaḥ ṣāṭkauśikaścāsti kośā bhūtādisaṃbhavāḥ || 64 ||
[Analyze grammar]

bhūtānāṃ pariṇāmāśca jāyante nityameva ha |
pariṇāmā sadā'nityāstato'nityaṃ hi varṣma ca || 65 ||
[Analyze grammar]

anityasya na nityatvaṃ varamanyaṃ vṛṇu dhruvam |
rājyaṃ svargaṃ ca pātālaṃ ciraṃjīvitvamityapi || 66 ||
[Analyze grammar]

dadāmi te'sura dravyaṃ svarṇarūpyādi bhūtalam |
sauryaṃ cāndraṃ ca māhendraṃ padaṃ kauberamityapi || 67 ||
[Analyze grammar]

vṛṇu cānyatpadaṃ śreṣṭhaṃ mā ciraṃ pradadāmi yat |
śrutvaivamāha sarvādo mā mṛtyurme bhavediha || 68 ||
[Analyze grammar]

tridevatatsṛṣṭijebhyaśceti vṛṇomi dehi me |
tathā'stviti hariḥ prāhā'dṛśyatāṃ sa drutaṃ yayau || 69 ||
[Analyze grammar]

athā'surastapastyaktvā mṛtyubhīvarjitastathā |
devadaityamanuṣyāṇāṃ bhogān bhuṃkte prasahya saḥ || 70 ||
[Analyze grammar]

brahmaṇaścāpi viṣṇoḥ saḥ śivasyāpi vibhūtikāḥ |
sarvā āhṛtya ca balād bhuṃkte varabalaidhitaḥ || 71 ||
[Analyze grammar]

hyekadā sa yayau jitvā devān kailāsamityapi |
śaṃkaraṃ prāha yuddhaṃ me kailāsaṃ vā pradehi me || 72 ||
[Analyze grammar]

śaṃbhuḥ prāhārdhamevaitat kailāsaṃ tava sarvathā |
gṛhāṇeti tadā so'pi cārdhaṃ prāpya mumoda ha || 73 ||
[Analyze grammar]

athā''yayau satyalokaṃ brahmāṇaṃ prāha me tava |
padaṃ brahman hi sarvasvaṃ dehi vā yuddhameva vā || 74 ||
[Analyze grammar]

brahmā prāha gṛhāṇedaṃ pārameṣṭhyapadārdhakam |
labdhvā so'pi prasanno'bhūd yayau viṣṇuṃ payodadhim || 75 ||
[Analyze grammar]

prāha me śvetabhūdvīpaṃ dehi viṣṇo saroṣakam |
yadvā yuddhaṃ ca me dehi kuru yatte hi rocate || 76 ||
[Analyze grammar]

viṣṇuḥ prāha tu te dattaṃ kṣīrābdhyardhapadaṃ sadā |
labdhvā'suraḥ prasannaśca yayau meruṃ nijālayam || 77 ||
[Analyze grammar]

atheyeṣa śivāṃ śrīṃ ca brāhmīṃ devīrmahāsuraḥ |
arthayāmāsa tā yāvat tāvaddevā vināśane || 78 ||
[Analyze grammar]

matiṃ cakruścāsurasya kautukaṃ ca vyadhurdrutam |
piśācinītrayaṃ tattadrūpadharaṃ haraḥ svayam || 79 ||
[Analyze grammar]

prāhiṇot taṃ tata ilodaro jaharṣa mūḍhadhīḥ |
piśācinyo vrataṃ cakruḥ sarvarasaprabhakṣaṇam || 80 ||
[Analyze grammar]

māsamātraṃ vrataṃ sarvarasabhakṣaṇanāmakam |
kṛtvā tato vrate pūrṇe bhaviṣyāmaḥ prasevane || 81 ||
[Analyze grammar]

upasthitā iti śrutvā jñātvā ca mumude'suraḥ |
samartho'yaṃ sarvarasasañcaye vartate yataḥ || 82 ||
[Analyze grammar]

pārthivān vai sarvarasān jalīyānapi sarvaśaḥ |
pākāpākakṛtān sarvānānayāmāsa satvaram || 83 ||
[Analyze grammar]

dadau tābhyastrivargābhyaḥ piśācinībhya eva ca |
bhojayāmāsa bahudhā pāyayāmāsa sarvaśaḥ || 84 ||
[Analyze grammar]

pṛthvī rasavihīnā vai jalaṃ rasavihīnakam |
tattvāni yāni rasyāni tānyarasāni cā'bhavan || 85 ||
[Analyze grammar]

rasaśūnyaṃ bhojanaṃ ca ghṛtaṃ cāmṛtamityapi |
havyaṃ kavyaṃ cāmiṣādi sarvaṃ rasavihīnakam || 86 ||
[Analyze grammar]

jātaṃ tena samastaṃ cā'bhojyaṃ cāpeyamityapi |
kleśamāptāḥ prajāḥ sarvā devāsurarṣimānavāḥ || 87 ||
[Analyze grammar]

parameśārpaṇe cāpi naivedye rasavarjitā |
sarvā jātā tataśceśā nādanti bhojanaṃ kharam || 88 ||
[Analyze grammar]

te'tha sarve militvā māmārādhayan suduḥkhitāḥ |
ilodarasya nāśārthaṃ tuṣṭuvurbahudhā tathā || 89 ||
[Analyze grammar]

śrutvā'haṃ ca parabrahma śrīpatiḥ puruṣottamaḥ |
anādiśrīkṛṣṇanārāyaṇaḥ śrīparameśvaraḥ || 90 ||
[Analyze grammar]

tvayā sākaṃ tvakṣarādvai dhāmno lakṣmi svayaṃ hariḥ |
āyayau devakoṭīnāmagre sākṣād babhūva ha || 91 ||
[Analyze grammar]

pūjitaścārthitaścāpi nivedito'surā'rdane |
gato'haṃ merubhūbhāge yatrā'suraḥ pramodate || 92 ||
[Analyze grammar]

rasarūpo'bhavaṃ tatra hrado bhūtvā vyavasthitaḥ |
miṣṭaḥ śītaḥ sugandhaścānandadaḥ sukhadaḥ śubhaḥ || 93 ||
[Analyze grammar]

ujjvalaḥ śvetapīyūṣarūpaśca mādako mṛduḥ |
pravāharūpaścā'pūrṇo hrado'bhavaṃ tadantike || 94 ||
[Analyze grammar]

piśācinyastisra eva vīkṣya rasottamaṃ hradam |
kathayāmāsurevainaṃ so'pi tūrṇaṃ samāyayau || 95 ||
[Analyze grammar]

papau rasaṃ tathā tāśca pāyayāmāsa sotsavaḥ |
pāne tṛptirna codgāro jāyate pāti vai muhuḥ || 96 ||
[Analyze grammar]

bhānaṃ tyaktvā papau cāti papāvākaṇṭhameva tu |
raso'haṃ na bhamau tvasyodare so'pi vyavardhata || 97 ||
[Analyze grammar]

pītvā pītvā'kṣayaṃ sarvaṃ rasaṃ so'bhūnmahodaraḥ |
yāvatī mahimāsiddhistatastāvadabhūnmahān || 98 ||
[Analyze grammar]

mānottaraṃ gataścāpi papau rasaṃ punaḥ punaḥ |
udaraṃ tasya vai tyaktvā śaktiṃ vai dhāraṇātmikām || 99 ||
[Analyze grammar]

madhyanābhipradeśācca pāṭitaṃ hṛdayāvadhim |
jaghanaṃ pāṭitaṃ cāpi nirgato'haṃ rasātmakaḥ || 100 ||
[Analyze grammar]

bahirevodarāttasya papāta sa mamāra ca |
anādiśrīrasanārāyaṇaścāhaṃ tvayā saha || 101 ||
[Analyze grammar]

anādiśrīrasalakṣmyā sākaṃ tatrā'bhavaṃ sthitaḥ |
piśācinyaḥ prasannāśca pūjayitvā hariṃ tu mām || 102 ||
[Analyze grammar]

yayuḥ kailāsamevaitāḥ devādyāstatra cāyayuḥ |
puṣpavṛṣṭiṃ pracakruśca tuṣṭuvurmāṃ rasātmakam || 103 ||
[Analyze grammar]

anādiśrīrasanārāyaṇaṃ śrīpuruṣottamam |
sarvadā ca nivāsārthamarthayāmāsurīśvarāḥ || 104 ||
[Analyze grammar]

ahaṃ sadā'vasaṃ pṛthvyāṃ rasapuṣṭipravṛddhaye |
manvantaraikamātraṃ mūrtimānabhavaṃ tadā || 105 ||
[Analyze grammar]

tato rasātmako bhūtvā''kalpaṃ sthito'bhavaṃ priye |
smara lakṣmi mama tadvai prākaṭyaṃ tadrasātmakam || 106 ||
[Analyze grammar]

atha devā yayuḥ sarve naijān vāsān divādiṣu |
anye tadā'vatārā me'bhavaṃścāpi sahasraśaḥ || 107 ||
[Analyze grammar]

avatārī parabrahma rasanārāyaṇo'bhavam |
paṭhanācchravaṇādasya bhuktirmuktirbhavedapi || 108 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne vedhaso'ṣṭātriṃśe varṣe analādamahāsuravināśārtham anādiśrīvahninārāyaṇasya pārthivīśriyāsahitasya tathā navatriṃśe vatsare ilodarasya rasādasya mahāsurasya vināśārtham anādiśrīrasanārāyaṇasya śrīrasalakṣmyā sahitasya ca prākaṭyamityādinirūpaṇanāmā dvātriṃśo'dhyāyaḥ || 32 ||
[Analyze grammar]