Chapter 31

śrīpuruṣottama uvāca |
śṛṇu cānyāṃ kathāṃ lakṣmi mama prākaṭyaśobhanām |
saptatriṃśe'ṇḍajākhye vatsare vai vedhasaḥ purā || 1 ||
[Analyze grammar]

ekonanavatikalpe ṣaṣṭhe manau samudbhavām |
ṛṣirnāmnā'jahārito babhūva tāpaso mahān || 2 ||
[Analyze grammar]

vedavijñaḥ sādhudharmaścaikalo'pi vane vasan |
adhyāpayati viprādīn satkaroti samāgatān || 3 ||
[Analyze grammar]

atithīnarcayatyanyān dadātyebhyaḥ samāśrayam |
āśrame parṇaśālāyāṃ vasati vṛkṣamaṇḍale || 4 ||
[Analyze grammar]

phalakandadalapatramūlāḍhyān pādapān sa ca |
vṛttyarthaṃ jalamādattvā poṣayatyapi sarvadā || 5 ||
[Analyze grammar]

devānāṃ ca satāṃ cābhyāgatānāṃ svāgatādikam |
karoti phalamūlādyaiḥ pakvairmiṣṭairniveditaiḥ || 6 ||
[Analyze grammar]

atha rājā sainyayukto vidravādhipatistadā |
yātrārthamabhigacchan vai mārgeṇā''śramamāyayau || 7 ||
[Analyze grammar]

viśrāntiṃ prāpa madhyāhne na ca jānāti tamṛṣim |
samarthaṃ cāśramavāsaṃ matvā kiṃcid vanecaram || 8 ||
[Analyze grammar]

rājā neme na vipraṃ taṃ sādhuṃ sādhusvabhāvakam |
pratyutā'sya drumastambādiṣūṣṭrān kariṇo vṛṣān || 9 ||
[Analyze grammar]

turaṃgamān mumocaite bhakṣayāmāsureva ca |
bhañjayāmāsurāmūlānnāśayāmāsurityapi || 10 ||
[Analyze grammar]

puṣpitān phalitān vṛkṣān ṛṣirdṛṣṭvā'vadan nṛpam |
mā rājan mama vṛkṣāṇāṃ nāśaṃ vidhehi mūlataḥ || 11 ||
[Analyze grammar]

niṣkāsaya paśūn dūre pārśve'raṇye drumānvite |
rājovāca vanaṃ me'sti sarvaṃ rājño bhavatyapi || 12 ||
[Analyze grammar]

paśavo me kṣudhāvyāptā bhakṣayiṣyanti vai drumān |
yāhi tvaṃ dūrataścāsmāt sthānādvanecaro'si yat || 13 ||
[Analyze grammar]

ṛṣirgarviṣṭhanṛpaterdaṇḍaṃ vyacintayad drutam |
jalamādāya haste ca śaśāpa bhava ghoṭakaḥ || 14 ||
[Analyze grammar]

tūrṇaṃ rājā'bhavattatra turaṃgamo'tiśobhanaḥ |
sainyaṃ duḥkhaṃ prāpa sarvaṃ prārthayāmāsa tamṛṣim || 15 ||
[Analyze grammar]

tasya rājño vimokṣārthaṃ rājñī cāpyārthayanmuhuḥ |
ṛṣistasyai tadā prāha patiste'śvo'yamuttare || 16 ||
[Analyze grammar]

kāle'śvamedhayajñe tvatputraniṣpādite punaḥ |
snātvā nārāyaṇayogādavabhṛthe nṛpo naraḥ || 17 ||
[Analyze grammar]

bhaviṣyati na sandehaścedānīṃ yātu vai gṛham |
ityuktā svapatiṃ cā'śvaṃ nītvā sā svagṛhaṃ yayau || 18 ||
[Analyze grammar]

sasainyā sā gṛhaṃ gatvā''rādhayatparameśvaram |
rājñyā yaśovarākhyāyāḥ putro dharmadharābhidhaḥ || 39 ||
[Analyze grammar]

piturvarmadharākhyasya mokṣārthaṃ yajñamārabhat |
dīkṣitaḥ sañcayāmāsa yajñīyaṃ vastujātakam || 20 ||
[Analyze grammar]

śuddhapṛthvyāṃ catuṣprānte vājimedhīyamaṇḍape |
yajñakārye vartamāne guruṇā devasatriṇā || 21 ||
[Analyze grammar]

sarvasyā''ptyai sarvajityai sarvaśāpavichittaye |
sarvapāpopaśāntyai ca hūyamāne'nale ghṛte || 22 ||
[Analyze grammar]

devāḥ sākṣāt samāyaṃśca brahmaviṣṇumaheśvarāḥ |
anye devāścāyayurvai bhāgadheyā'dhikāriṇaḥ || 23 ||
[Analyze grammar]

devasatrī gururvipro'pūjayattaṃ turaṃgamam |
pūrvabhāge kṛṣṇavarṇaṃ paścārdhe śvetarūpiṇam || 24 ||
[Analyze grammar]

lalāṭe śakaṭākārapuṇḍrayutaṃ śubhākṛtim |
prāgasakṛtprapāyitasomarasā'śvayugmajam || 25 ||
[Analyze grammar]

jātamātraṃ prapāyitasomarasaṃ ca vardhitam |
caitryāṃ sāṃgrahaṇīṣṭikṛd vaiśākhyāṃ ca nṛpastataḥ || 26 ||
[Analyze grammar]

prajāpatidevatākayāgakṛcca tataḥ param |
amāvasyeṣṭikṛccāpi kāritavapanastathā || 27 ||
[Analyze grammar]

dhṛtanūtnā'mbaro maunī kṛtā'gnihotrasatkriyaḥ |
pare'hni maṇḍape gatvā kṛtaikādaśakāhutiḥ || 28 ||
[Analyze grammar]

brahmaudanaṃ ca ṛtvigbhyaścāśayitvā sukalpya tān |
yajñīyā'śvaṃ yajamānaḥ śvānaṃ ca caturakṣakam || 29 ||
[Analyze grammar]

taḍāgādijale nītvā sartvik tau samaprokṣayat |
adhvaryuścā'prokṣayacca śvānamutsṛjya vai tataḥ || 30 ||
[Analyze grammar]

aśvaṃ cāvāsṛjat pṛthvyāṃ bhramaṇārtha nṛpaḥ svayam |
rakṣakairdhanvibhiḥ śūraiścatuḥśatairyutaṃ tataḥ || 31 ||
[Analyze grammar]

nṛpaḥ pratyahamevāpi viṣṇukramaṇasaṃjñakān |
homān sāyaṃ ca prātaśca kurvan vīṇāpragāthinau || 32 ||
[Analyze grammar]

brahmakṣatrau samāhūya gāyayatyeva vai yaśaḥ |
pāriplavaṃ śṛṇotyeva pratīkṣate'śvakā''gamam || 33 ||
[Analyze grammar]

āśvapadikamārgeṣu yogyahomānakārayat |
mukhyaṃ dantān hanūṃ coru pādau liṃgaṃ ca vājinaḥ || 34 ||
[Analyze grammar]

saṃsmṛtya havanaṃ cā'pyakārayan nṛpatiḥ svayam |
gamanaṃ dhāvanaṃ cākrandanaṃ heṣaṇamityapi || 35 ||
[Analyze grammar]

śayanaṃ cā'pyavaghrāṇaṃ luṇṭhanaṃ vājino guṇān |
saṃsmṛtya devatīkṛtya tebhyo homān dadau nṛpaḥ || 36 ||
[Analyze grammar]

atha kṛtvā vijayaṃ cāgatamaśvaṃ tu pāvanam |
prapūjyā'sthāpayat sthāne sutyākamakārayannṛpaḥ || 37 ||
[Analyze grammar]

sutyātraye dvitīye'hni codgātuḥ sthānake'śvakam |
udgātāraṃ vyadhād rājā vaḍavābhiḥ samanvitam || 38 ||
[Analyze grammar]

hreṣāṃ cakāra turagaścodgīthaḥ sa vyajāyata |
akhātayattato yūpānekaviṃśatisaṃkhyakām || 39 ||
[Analyze grammar]

madhye cottaradakṣiṇakoṇayoḥ suvyavasthitān |
pūrve'gniṣṭhe turagaṃ taṃ babandha rājjudālaje || 40 ||
[Analyze grammar]

yūpe'sya pārśvayordevadārujau dvau ca yūpakau |
tatpārśvayostrayastrayo bilvavṛkṣavinirmitāḥ || 41 ||
[Analyze grammar]

tatpārśvayostrayastrayaḥ khādirāstatprapārśvayoḥ |
pālāśāśca trayastrayo yūpāstān samapūjayat || 42 ||
[Analyze grammar]

aśvaṃ raśanayā''veṣṭya trayodaśa paśūn parān |
raśanāyāṃ rajjubandhairabandhayacca pārthivaḥ || 43 ||
[Analyze grammar]

aśvalalāṭe cāgneyaṃ paścabhāge tu pauṣṇakam |
uparyaindrāpauṣṇapaśumabandhayacca pārthivaḥ || 44 ||
[Analyze grammar]

bāhvorājñeyakau kṛṣṇagrīvau cābandhayannṛpaḥ |
tvāṣṭrau sakthnoḥ śvetapṛṣṭhau bārhaspatyau tu pārśvayoḥ || 45 ||
[Analyze grammar]

śvetavarṇodaraṃ dhātṛdaivaṃ cā'dho hyabandhayat |
pucche śvetamajaṃ cāpyabandhayat pārthivastataḥ || 46 ||
[Analyze grammar]

kṛṣṇavarṇamajaṃ sauryaṃ dakṣapārśve'pyabandhayat |
yāmyaṃ kṛṣṇaṃ vāmapārśve'bandhayaccaivameva saḥ || 47 ||
[Analyze grammar]

grāmyān śatatrayaṃ navacatvāriṃśad babandha saḥ |
āraṇyakān śatatrayaṃ ṣaṣṭiṃ cāpi babandha saḥ || 48 ||
[Analyze grammar]

ajādayo grāmyavācyā āraṇyāḥ śvāpadādayaḥ |
tadupākaraṇaṃ cakre paryagnikaraṇaṃ tathā || 49 ||
[Analyze grammar]

namaskṛtya paśūn sarvān saṃkalpya devatārthakān |
divyānpūjyānapasāryā'vā'sṛjattānpaśūnnṛpaḥ || 50 ||
[Analyze grammar]

aśvanāmnā sukuṣmāṇḍaṃ dhṛtvā ghṛtāktakambale |
kṛtvā prākśirasaṃ codakpādaṃ saṃjñapanaṃ vyadhāt || 51 ||
[Analyze grammar]

rājñyaḥ patnyo grāmyaśabdairgarhāṃ vyadhustataḥ param |
phalagarbhavapāhomān ṣaṭ prajāpataye dadau || 52 ||
[Analyze grammar]

viṣṇukramānakrāmacca kuṣmāṇḍānyaparāṇi ca |
paśusthānāni saṃjñapya homān sarvānakārayat || 53 ||
[Analyze grammar]

ājyādinā tisra āhutīśca hutvā tataḥ param |
patnīsaṃyājāntakarmā'nuṣṭhāya vyaramannṛpaḥ || 54 ||
[Analyze grammar]

sutyādine tṛtīye ca kṛtvā saumikakarma ca |
prājāpatyān paśūnekādaśa kuṣmāṇḍarūpiṇaḥ || 55 ||
[Analyze grammar]

hutvā karmāṇyanuṣṭhāyā'vabhṛthaṃ pracakāra ha |
piṃgākṣaśvetakuṣṭhasya puruṣasya tu mūrdhani || 56 ||
[Analyze grammar]

homatrayaṃ pradatvā cā'dadat śatasuvarṇakam |
kṛtvā traidhātavīyeṣṭim āsamvatsarameva ha || 57 ||
[Analyze grammar]

tattadṛtuphalaiḥ rājā'yajaccāśvaṃ prapūjayan |
daivā'śvaṃ devavanmene rājā paramadhārmikaḥ || 58 ||
[Analyze grammar]

vatsarā'nte lakṣayatīn sādhūn sanyāsinastathā |
satīḥ sādhvīstathā viprān bālān vidyārthinastathā || 59 ||
[Analyze grammar]

vidyārthinīrbhikṣukīśca bhojayāmāsa vai nṛpaḥ |
āvarṣaṃ nityahomānte dadau dānāni bhāvataḥ || 60 ||
[Analyze grammar]

pratīkṣate kadā cāśvarūpaḥ pitā manuṣyatām |
gacchediti vicārastho nidrāṃ yayau nṛpo niśi || 61 ||
[Analyze grammar]

vatsarānte yajñaparihāre rātrau narāyaṇam |
dadarśa divyarūpaṃ cā'cyutaṃ mukuṭamaṇḍitam || 62 ||
[Analyze grammar]

sarvābharaṇasaṃyuktaṃ sarvaśobhāsamanvitam |
sarvaiśvaryādisampūrṇaṃ nyūnaṣoḍaśavatsaram || 63 ||
[Analyze grammar]

ācaturdaśahāyanyā tvayā lakṣmyā virājitam |
prasannānanayā satyā tadā saubhāgyaśobhayā || 64 ||
[Analyze grammar]

nidrāyāmeva tuṣṭāva śrīkṛṣṇaṃ puruṣottamam |
tvaṃ yajñastvaṃ cāśvarūpaścāśvamedhastvameva ca || 65 ||
[Analyze grammar]

tvaṃ rājā tvaṃ rājyapālastvaṃ rājeśvara eva ca |
tvaṃ lokastvaṃ lokanāthastvaṃ devastvaṃ sureśvaraḥ || 66 ||
[Analyze grammar]

tvaṃ viṣṇustvaṃ svayaṃ brahmā tvaṃ vairājo maheśvaraḥ |
tvaṃ bhūmā tvaṃ pradhāneśo vāsudevo janārdanaḥ || 67 ||
[Analyze grammar]

tvaṃ dhāmeśo mahākālo māyeśastvaṃ pareśvaraḥ |
tvaṃ śrīkṛṣṇaprabhuḥ śrīmatpuruṣottama sarvarāṭ || 68 ||
[Analyze grammar]

kartā dhartā niyantā ca pātā hartā'ntarasthitaḥ |
tvameva sarvaṃ bhagavaṃstvayi sarvaṃ samarpitam || 69 ||
[Analyze grammar]

tvaṃ vai śaraṇya evā'si piturme'śvabhavaṃ prabho |
śāpajanyaṃ drutaṃ nārāyaṇa nāśaya keśava || 70 ||
[Analyze grammar]

evaṃ tuṣṭāva māṃ rājā tadā so'bhihito mayā |
aśvamedhe mahāyajñe māṃ vihāya tvayā nṛpa || 71 ||
[Analyze grammar]

pūjitā devatāścā'nye vinā matsmaraṇaṃ kila |
anarpito'śvamedhaśca mayi cā'rpaṇavarjitaḥ || 72 ||
[Analyze grammar]

tvadicchāpūrako naiva vartate'dya narādhipa |
tasmātpunastvaśvayajñaṃ kuru pūjaya māṃ punaḥ || 73 ||
[Analyze grammar]

sarvatra sarvakāryeṣu tataste janako naraḥ |
mānuṣatāṃ punaścāpi sameṣyati na saṃśayaḥ || 74 ||
[Analyze grammar]

darśanaṃ me punarbhāvi sarvaṃ yogyaṃ bhaviṣyati |
ityuktvā'dṛśyatāṃ prāptastvayā'haṃ śrīnarāyaṇi || 75 ||
[Analyze grammar]

dharmadharo nṛpa nidrāṃ vihāya tūrṇameva ha |
utthitaśca yathārthaṃ vai svapnaṃ mene tataḥ punaḥ || 76 ||
[Analyze grammar]

kṛtvā me kānakīṃ mūrtiṃ yathādṛṣṭāṃ tvayā saha |
punaścakre'śvamedhaṃ sa vidhinā māṃ prapūjayan || 77 ||
[Analyze grammar]

avabhṛthe punaścā'haṃ prāpto divyasvarūpavān |
tvayā sākaṃ tadā lakṣmi snātvā vāri ca pāvanam || 78 ||
[Analyze grammar]

aśve pitari cikṣepa svayaṃ nārāyaṇo hyaham |
sa tu rājā varmadharā'bhidho vidhūya pāpakam || 79 ||
[Analyze grammar]

pūrvarūpaṃ rājarūpaṃ prāptavān drutameva ha |
sāśrurjātismaro māṃ sa tuṣṭāva bahugadgadaḥ || 80 ||
[Analyze grammar]

yaśovarā'bhidhā rājñī śri te satkāramācarat |
devasatrī gurustasyāḥ pupūja māṃ pareśvaram || 81 ||
[Analyze grammar]

ṣoḍaśopasuvastvādyaiḥ prārthayāmāsa vai punaḥ |
ajahāritavacanādbhagavan samupāgataḥ || 82 ||
[Analyze grammar]

śāpamuktyai nṛpasyā'sya vasā'tra bhagavan sadā |
tathā'stvevaṃ mayoktaśca devasatrī tapodhanaḥ || 83 ||
[Analyze grammar]

anādiśrīkṛṣṇanārāyaṇaḥ śrīpuruṣottamaḥ |
anādiśrīmedhanārāyaṇanāmnā sthiro'bhavam || 84 ||
[Analyze grammar]

tvayā medhāvatīlakṣmyā sākaṃ vidravakhaṇḍake |
tataḥ pṛthvyāṃ cāśvamedhā yajñā vai bahavo'bhavan || 85 ||
[Analyze grammar]

uccāvacā makhā yathāśaktyā'kurvan narādhipāḥ |
vinā yuddhaṃ divyamaśvaṃ prapūjya ca punaḥ punaḥ || 86 ||
[Analyze grammar]

vartamānasya me bhūmau pūjitasyā'śvamedhake |
utsṛṣṭaṃ turagaṃ kecinnā'badhnan mama bhītitaḥ || 87 ||
[Analyze grammar]

sarve nṛpā jñātavanto nārāyaṇo'śvamedhinaḥ |
pakṣe gṛhe makhe cā''ste pratyakṣaḥ parameśvaraḥ || 88 ||
[Analyze grammar]

tasya yajñe yuddhavighnaṃ kartavyaṃ nahi sarvathā |
yuddhena vijayaṃ kaścinnaiva yāsyati nirṇayaḥ || 89 ||
[Analyze grammar]

ityevaṃ tatra kalpe vai yajñā hiṃsāvivarjitāḥ |
daivapāśavabhoktāro'bhavan mattoṣakāriṇaḥ || 90 ||
[Analyze grammar]

ajahāritavipraśca sādhudharmaparāyaṇaḥ |
śrutvā māṃ tvāyayau śīghraṃ śrīpatiṃ puruṣottamam || 91 ||
[Analyze grammar]

rājagṛhaṃ ca rājānaṃ militvā māṃ tataḥ param |
sādhurūpo mama bhakto matsevāyāṃ vyarājata || 92 ||
[Analyze grammar]

pradadau sa mayā''jñapto vaiṣṇavān śreyase manūn |
prajābhyo bodhayāmāsa kārayāmāsa macchritān || 93 ||
[Analyze grammar]

varmadharo'pi vairāgyāt prāpya dīkṣāṃ tu sādhavīm |
upādideśa lokebhyaḥ pratyakṣopāsanāṃ hi me || 94 ||
[Analyze grammar]

bheje māṃ satataṃ sādhuḥ sādhudharmaparāyaṇaḥ |
rājñī yaśovarā cāpi sādhvīdīkṣāmavāpya mām || 95 ||
[Analyze grammar]

bheje śriyā yutaṃ nityaṃ sādhvīdharmaparāyaṇā |
nārībhyaḥ pradadau sā tu dīkṣāṃ me vaiṣṇavīṃ satīm || 96 ||
[Analyze grammar]

bhajanaṃ kārayāmāsa kārayāmāsa vaiṣṇavīḥ |
sādhvīrbrahmasvarūpasthā brahmaśīlaprapālikāḥ || 97 ||
[Analyze grammar]

ākalpāntaṃ sthitaścāhaṃ tvayā sākaṃ narāyaṇi |
smara nārāyaṇīśri tvaṃ sarvaṃ medhāvatīṃ nijām || 98 ||
[Analyze grammar]

evamanye'vatārā me jātāstato'pyanekaśaḥ |
jānāmyahaṃ tu tānsarvān dharmakāryaparāyaṇān || 99 ||
[Analyze grammar]

paṭhanācchravaṇādasya smaraṇāddhāraṇādapi |
aśvamedhaphalaṃ prāpyā'ghāni nirdhūya sarvathā || 100 ||
[Analyze grammar]

sakāmaśced bahūn svargān bhuktvā ciraṃ tataḥ param |
yāyād brahmaparaṃ dhāma bhaktyā me satataṃ priyam || 101 ||
[Analyze grammar]

niṣkāmasya tu bhaktasya bhaktirme jāyate drutam |
sarvasaukhyaiḥ susantuṣṭo yāti matparamaṃ padam || 102 ||
[Analyze grammar]

sarvatīrthaphalaṃ sarvavratotthaṃ ca phalaṃ tathā |
sarvasevāphalaṃ cāpi prāpnuyāt śravaṇājjanum || 103 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne vedhasaḥ saptatriṃśe vatsare'jahāritaśāpenā'śvībhūtasya varmadharanṛpasya mokṣārthaṃ tatputrakṛtāśvamedhe'nādi |
śrīmedhanārāyaṇasya medhāvatīśriyā sahitasya prākaṭyamityādinirūpaṇanāmaikatriṃśo'dhyāyaḥ || 31 ||
[Analyze grammar]