Chapter 30

śrīpuruṣottama uvāca |
śṛṇu lakṣmi tato rājñā sevito'haṃ sadā hariḥ |
sādhusevāphalaṃ śvetadvīpaṃ dadau nṛpāya vai || 1 ||
[Analyze grammar]

kuṭumbasahitaḥ saukhyaṃ bhuktvā svargaṃ yayau tataḥ |
tatra saukhyāni bhuktvaiva vairājadevatātmakaḥ || 2 ||
[Analyze grammar]

bhūtvā sukhāni bhuktvaiva satyalokaṃ yayau punaḥ |
tato vaikuṇṭhamāsādya sukhaṃ bhuktvā divaṃ punaḥ || 3 ||
[Analyze grammar]

madicchayaiva samprāpto bhakteḥ pravartanāya ha |
tataḥ koṭyadhilokānāmīśvaraḥ sa bhaviṣyati || 4 ||
[Analyze grammar]

nārāyaṇasvarūpaḥ so'saṃkhyalokān svakāśritān |
nītvā bhaktiyutān dhāmā'kṣaraṃ me samprayāsyati || 5 ||
[Analyze grammar]

aṃśukramatha evā'yaṃ bhakto me yādṛśo'bhavat |
tādṛśā nā'pare loke bhaviṣyanti nivedinaḥ || 6 ||
[Analyze grammar]

putrāḥ putryaśca rājñyaśca rājā prajāstathā'nugāḥ |
sarve sarvāṇi rāṣṭrāṇi madarthasarvasampadām || 7 ||
[Analyze grammar]

kṛtopayogā āsaṃste vaiṣṇavāḥ sarvatomukhāḥ |
athā'nyatte kathayāmi prākaṭyaṃ śṛṇu mādhavi || 8 ||
[Analyze grammar]

vedhaso rākṣasā''khye ṣaṭtriṃśe varṣe tataḥ punaḥ |
kalpe ṣaṇṇavatisaṃkhye saptame ca manau priye || 9 ||
[Analyze grammar]

prākaṭyaṃ me yathā jātaṃ pravadāmi nibodha me |
anādiśrīkṛṣṇanārāyaṇasyaivā'vatāriṇaḥ || 10 ||
[Analyze grammar]

kṛte yuge pañcadaśe yogī nāmnā hariprathaḥ |
kuṃbhakāro'bhavat pṛthvyāṃ viṣṇupadyāstaṭe śubhe || 11 ||
[Analyze grammar]

ābālyātsādhuyogena babhūva bhaktarāṭ mama |
mātā śreṇīmatī tasmai dadātyapi suśikṣaṇam || 12 ||
[Analyze grammar]

aṃke stanyaprapāne ca preṃkhāyāṃ kaṭivāsane |
khaṣṭvikāyāṃ tathā yoge bālānāṃ khalane'pi ca || 13 ||
[Analyze grammar]

vada putra harernāma kṛṣṇa kṛṣṇa narāyaṇa |
vada putra śriyā nāma lakṣmi lakṣmi narāyaṇi || 14 ||
[Analyze grammar]

evaṃ mātā nijaṃ putraṃ śikṣayatyeva muktaye |
śreyase pāpanāśāya janmasārthakyahetave || 15 ||
[Analyze grammar]

anādiśrīkṛṣṇanārāyaṇa śrīpuruṣottama |
parabrahmā'kṣarātīta śrīpate parameśvara || 16 ||
[Analyze grammar]

evaṃ svayaṃ ca tanmātā karoti kīrtanaṃ mama |
sadaiva sarvakāryeṣu bhaktimatī hi sadguṇā || 17 ||
[Analyze grammar]

kuṃbhakāro'pi viraṇo nāmnā me bhaktimān sadā |
sarvakārye smaratyeva māṃ satāṃ sevako'pi san || 18 ||
[Analyze grammar]

bhajatyeva hariṃ nityaṃ smaratyeva janārdanam |
karotyevā'rpaṇaṃ mahyaṃ tato bhuṃkte yathocitam || 19 ||
[Analyze grammar]

sāyaṃ nityaṃ mama mālāmāvartayati manmanāḥ |
karotyapi sadā sevāṃ satāṃ bhaktimatāṃ śubhām || 20 ||
[Analyze grammar]

gṛhakāryaṃ pātrakāryaṃ grāmasevādikaṃ tathā |
yadā karoti tatrāpi gṛṇāti śrīnarāyaṇa || 21 ||
[Analyze grammar]

kare mālāṃ gale mālāṃ sadā rakṣati kuṃbhakṛt |
harernāma japan kālaṃ sārthakayati sarvadā || 22 ||
[Analyze grammar]

śṛṇu lakṣmi prabhaktasya bhaktirnāstyeva durlabhā |
sarvadā sarvakāryeṣu sulabhā''tmanivedinaḥ || 23 ||
[Analyze grammar]

viraṇaḥ prātarutthāya nārāyaṇeti saṃvadan |
ghaṭaṃ nītvā nadīṃ yāti snāti raṭati māṃ harim || 24 ||
[Analyze grammar]

jalaṃ bhṛtvā gṛhaṃ yāti pippalasya tu mūlake |
smṛtvā māṃ salilaṃ tatra siñcatyapi tataḥ sa ca || 25 ||
[Analyze grammar]

sūryaṃ natvā mṛttikāyāḥ kṛtaṃ māṃ ca praṇamya ca |
raṭan khādati mahyaṃ cārpitaṃ prātarhi roṭakam || 26 ||
[Analyze grammar]

tathaiva kuṃbhikṛt patnī bhuṃkte bhuṃkte suto'pi ca |
athā''dātuṃ mṛdo yānti kīrtayanto hariṃ trayaḥ || 27 ||
[Analyze grammar]

kharapṛṣṭhe mṛdo yogyā āharanti yadā tadā |
hareḥ kītanakartārastrayo yānti gṛhaṃ prati || 28 ||
[Analyze grammar]

gardhapyai gardhapāyā'pi tṛṇādi ca jalādi ca |
hariprasādasalilaiḥ saṃprokṣya tad dadatyapi || 29 ||
[Analyze grammar]

jalairmṛdaścārdrayanti kīrtayanti hariṃ tadā |
mardayanti mṛdaścāpi kīrtayanti tadāpi mām || 30 ||
[Analyze grammar]

cakraṃ ca kīlake dhṛtvā bhrāmayanti smaranti mām |
piṃḍaṃ cakre sthāpayanti māṃ smaranti janārdanam || 31 ||
[Analyze grammar]

ghaṭaśarāvapātrāṇi racayanti smaranti mām |
tantunā ca pṛthak kṛtvā'vatārayanti cāpyadhaḥ || 32 ||
[Analyze grammar]

smaranto māṃ ṭīppayanti pātrāṇi ṭīppasādhanaiḥ |
vahnibhrāṣṭryāṃ klṛptayanti pakvayanti smaranti mām || 33 ||
[Analyze grammar]

vikrīṇanti ca pātrāṇi pakvāni ca smaranti mām |
labdhadravyairannaśākādikaṃ krīṇanti cāpaṇāt || 34 ||
[Analyze grammar]

randhayanti bhojanāni smaranti ca raṭanti mām |
sthālyāṃ bhṛtvā'rpayitvā me bhuñjate manniveditam || 35 ||
[Analyze grammar]

evaṃ yātrāṃ kuṭumbasya nirvartayanti matparāḥ |
sāyaṃ kathāṃ praśṛṇvanti satāṃ mukhānmamālaye || 36 ||
[Analyze grammar]

rātrau śrutaṃ smarantyeva vicārayanti muktaye |
na vinā bhojanaṃ mokṣo bhaktirna puṇyamantarā || 37 ||
[Analyze grammar]

puṇyaṃ sevāṃ vinā naiva sevā kṛpāṃ vinā ca na |
kṛpā dāsyaṃ vinā naiva dāsyaṃ śraddhāṃ vinā na vai || 38 ||
[Analyze grammar]

śraddhā jñānaṃ vinā nāpi jñānaṃ na śravaṇaṃ vinā |
śrutirvinā na satsaṃgaṃ satsaṃgo na sato vinā || 39 ||
[Analyze grammar]

santo bhāvaṃ vinā naiva bhāvo vinā na bhāvanām |
bhāvanākhyastu saṃskāro na vinā prāgupārjitam || 40 ||
[Analyze grammar]

prāgupārjitamatraiva bhujyate phalarūpi tat |
adyopārjitamanyatra bhokṣyate śreyasāṃ pade || 41 ||
[Analyze grammar]

śreyaḥ sarvavidhaṃ sādhyaṃ śreyaḥ paraṃ narāyaṇaḥ |
tasya caraṇe mokṣo'sti prāptavyaḥ prematantunā || 42 ||
[Analyze grammar]

premapātraṃ harermūrtiścetanā sādhusaṃjñikā |
santaḥ prasādayitavyāḥ sevābhiḥ śreyaicchubhiḥ || 43 ||
[Analyze grammar]

annaṃ jalaṃ ca vastraṃ ca tredhā nirvāhasādhanam |
gṛhaṃ kāntā ca dhenuśca tredhā tvālambanaṃ matam || 44 ||
[Analyze grammar]

udyamaḥ putra ārogyaṃ tretā dhairyasya sādhanam |
āyaḥ kośo bāndhavāśca tredhā balasya sādhanam || 45 ||
[Analyze grammar]

maitryaṃ mānaṃ yaśaśceti tredhā sthiterhi sādhanam |
vidyā vṛttirvaśitvaṃ ca tredhā vaitṛṣṇyasādhanam || 46 ||
[Analyze grammar]

tṛptirvirāga aiśvaryaṃ tredhā śānteḥ prasādhanam |
dharmaḥ kṣamā titikṣā ca tredhā sukhasya sādhanam || 47 ||
[Analyze grammar]

santo hariśca śīlaṃ ca tredhā mukteḥ prasādhanam |
duḥkhaṃ viveko'vamānaṃ tredhā vairāgyasādhanam || 48 ||
[Analyze grammar]

karma tṛṣṇā vāsanā ca tredhā saṃsārakāraṇam |
droho nindā ca nāstikyaṃ tredhā nirayasādhanam || 49 ||
[Analyze grammar]

pramādo moha īhā ca tredhā mṛtyunimantraṇam |
naiṣkarmyamarpaṇaṃ bhaktistredhā mokṣasya sādhanam || 50 ||
[Analyze grammar]

tasmānmokṣārthameveha yatitavyaṃ nirantaram |
anyāni samparityajya nirvāṇakāraṇeṣviha || 51 ||
[Analyze grammar]

ghaṭā yathā vibhinnā vai prajāyante tathātviha |
prajā lokāśca karmāṇi sukhāni pratyahaṃ hatāḥ || 52 ||
[Analyze grammar]

kālavegena naśyanti dehadaihikasampadaḥ |
kā nārī ko naraḥ putraḥ putrī vā kṛtrimaṃ tviha || 53 ||
[Analyze grammar]

sambandhā nāmasaṃjñāśca yathā mṛdā bhavantyapi |
tathā ṣāṭkauśikādīnāṃ nāmasaṃjñāśca kṛtrimāḥ || 54 ||
[Analyze grammar]

kṛtrimaṃ dehamāsādya jñātvā mokṣasya sādhanam |
yadi sādhyet mokṣo na vṛthā janma hi mānavam || 55 ||
[Analyze grammar]

sarvatra viṣayāḥ santi kṣudhā tṛṣā pramodanam |
aihikaṃ sarvameveti kṣaṇikaṃ jīvabandham || 56 ||
[Analyze grammar]

navaṃ navaṃ bandhanaṃ ca nityaṃ nityaṃ prajāyate |
na cā'nto'sti bandhanānāṃ nave varṣe navā ghaṭāḥ || 57 ||
[Analyze grammar]

ghaṭakartā mṛtiṃ yānti cānyastatra pravartate |
ghaṭānāṃ ghaṭakartṝṇāṃ pravāho na nivartate || 58 ||
[Analyze grammar]

pravāhapatitā jīvā mamā'haṃpāśapāśitāḥ |
ghaṭe naṣṭe'pi khaṇḍeṣu badhyante mohapāśitāḥ || 59 ||
[Analyze grammar]

kālena nāśaḥ sarveṣāmavaśyaṃ jāyate tviha |
paśyantaśceti mokṣārthaṃ yatante na mṛtā hi te || 60 ||
[Analyze grammar]

punaḥ punarmariṣyanti vinā śāśvatasevanam |
tasmānnārāyaṇo viṣṇuḥ śrīmatkṛṣṇanarāyaṇaḥ || 61 ||
[Analyze grammar]

parabrahmāntarātmā śrīhariḥ sevyaḥ sadā bhuvi |
bhajantu paramātmānaṃ raṭantu harināma ca || 62 ||
[Analyze grammar]

dhyāyantu ca harikṛṣṇaṃ prāpnuvantu pareśvaram |
evaṃ nityaṃ niśāyāṃ vai viraṇādyā nijaṃ hitam || 63 ||
[Analyze grammar]

vicārayanti satyārthaṃ bhajante sma ca māṃ sadā |
evaṃ yāte svalpakāle trayaste kuṃbhakarmiṇaḥ || 64 ||
[Analyze grammar]

sādhusevāparāḥ sādhvāśrayāśca sarvathā'bhavan |
tadgṛhaṃ mandiraṃ jātaṃ mama sādhuniṣevaṇāt || 65 ||
[Analyze grammar]

sādhavo nityamevā'tra kurvanti matkathādikam |
viraṇasya kuṃbhakṛtaḥ putro hariprathaḥ svayam || 66 ||
[Analyze grammar]

ānandabrahmaguruto dīkṣāṃ jagrāha sādhavīm |
sādhurbhūtvā prabhuṃ nityaṃ bhajate māṃ divāniśam || 67 ||
[Analyze grammar]

vāksiddhistasya sampannā yathā vakti prajāyate |
athaikadā satāṃ tatra sabhāyāṃ bhajane mama || 68 ||
[Analyze grammar]

jāyamāne tānamiśre'mbarāttatra manuḥ svayam |
saptamo varṇiśālākhyo vimānena hi niryayau || 69 ||
[Analyze grammar]

sādhavaḥ kuṃbhakārādyāḥ sādhvyaśca bhajanottaram |
viṣṇupadyāstaṭe snānādyarthaṃ yayuḥ sakīrtanāḥ || 70 ||
[Analyze grammar]

snānti kecittathānye ca kīrtayanti pareśvaram |
yāvad ghaṭṭe'mbaraṃ dūraṃ bhramitvā manureva saḥ || 71 ||
[Analyze grammar]

yadṛcchayā viṣṇupadyāstaṭaṃ cāvātaraddhi saḥ |
rājarūpo bhṛtyayukto jalāvatāramāyayau || 72 ||
[Analyze grammar]

yatra te bhajane magnāḥ sādhvādyāḥ snānahetave |
tiṣṭhanti māṃ bhajantaśca raṭanto harikīrtanam || 73 ||
[Analyze grammar]

varṇiśālo manustatra bhṛtyānāha sagarvakaḥ |
imān vai mānavānatra sarvānnārīnarādikān || 74 ||
[Analyze grammar]

niṣkāsayantu rundhantu dūrameva nadītaṭāt |
yāvadahaṃ jale nadyāḥ snānaṃ kṛtvā na yāmi ca || 75 ||
[Analyze grammar]

tāvad bhṛtyāḥ karairdhṛtvā niṣkāsayantu dūrataḥ |
ityuktvā bhṛtyavargāste pratyudgamya samantataḥ || 76 ||
[Analyze grammar]

dūrayāmāsurevaitān vārayāmāsureva ca |
sādhavo'pi vinivṛttā ānandabrahmanoditāḥ || 77 ||
[Analyze grammar]

hariprathaḥ sādhubhaktaḥ prāha dūtān kathaṃ tvidam |
rodhanaṃ vāraṇaṃ snāne bhavadbhiḥ saṃvidhīyate || 78 ||
[Analyze grammar]

dūtāḥ prāhuśca te kiṃ vā prayojanaṃ vibhāvane |
gaccha dūraṃ yāntu sarve nā'trā''veśo bhaviṣyati || 79 ||
[Analyze grammar]

evaṃ vadanto dūtāśca jagṛhurbhujameva ca |
dūraṃ niṣkāsayāmāsurhariprathaṃ tathā'parān || 80 ||
[Analyze grammar]

hariprathastadovāca mṛtiṃ yātu nṛpo hi vaḥ |
evamukte manustatra kṣaṇe mamāra jīvataḥ || 81 ||
[Analyze grammar]

vyasuḥ śavo'bhavacchīghraṃ papāta bhuvi padmaje |
prasāritakarapādaḥ prākrośan cogravegataḥ || 82 ||
[Analyze grammar]

hāhākārastadā jātaścākṛtyaṃ samajāyata |
dūtāstūrṇaṃ gatāḥ pārśve'sevayan pavanārpaṇaiḥ || 83 ||
[Analyze grammar]

pādasaṃvāhanairvāripānadānaistathāpi saḥ |
manuryayau vihāyaiva prāṇān dharmālayaṃ tadā || 84 ||
[Analyze grammar]

hāhākāro'bhavat sarvaprajāpāleṣu vai tadā |
dikpāleṣu samasteṣu deveṣu satyavāsiṣu || 85 ||
[Analyze grammar]

maharṣiṣu mahendrādau manurmṛto'bhavaddhi śuk |
atha sarve'jaśaṃbhvādyāścāyayuryatra sa mṛtaḥ || 86 ||
[Analyze grammar]

jīvanārthaṃ tadā sarve cakruścārādhanaṃ hareḥ |
anādiśrīkṛṣṇanārāyaṇasya mama padmaje || 87 ||
[Analyze grammar]

ahaṃ tatra samāyātastvayā sākaṃ narāyaṇi |
śaṃkhacakragadāpadmadharaḥ śrīpuruṣottamaḥ || 88 ||
[Analyze grammar]

prārthitastairjīvanārthaṃ mayā te bodhitāstadā |
madbhaktasya kṛtaṃ nā'haṃ parāvartayituṃ kṣamaḥ || 89 ||
[Analyze grammar]

prasādanīyo bhakto me sa vai śreyo vidhāsyati |
tato bhaktaṃ surā nemuścārthayāmāsureva ca || 90 ||
[Analyze grammar]

jīvanaṃ ca kṣamāṃ cāpyarthayāmāsuḥ punaḥ punaḥ |
pūjayāmāsurevā'pi sādhūn hariprathastadā || 91 ||
[Analyze grammar]

jñātvā māṃ paramātmānaṃ natvā'bhyarcya śavopari |
jalaṃ cikṣepa tāvadvai manuḥ prāṇayuto'bhavat || 92 ||
[Analyze grammar]

uttasthau ca hariṃ māṃ sa tuṣṭāva sampupūja ca |
sādhūnnatvā kṣamāṃ labdhvā yayau naijaṃ padaṃ punaḥ || 93 ||
[Analyze grammar]

sādhubhiścārthitaścā'haṃ hariprathasya mandire |
nyavasaṃ sarvadā lakṣmi sākaṃ tvayā satāṃ gṛhe || 94 ||
[Analyze grammar]

anādiśrībhaktanārāyaṇanāmnā svayaṃ prabhuḥ |
tvaṃ tadā śrīkuṃbhikāśrīritikhyātiṃ gatā'bhavaḥ || 95 ||
[Analyze grammar]

vedmyahaṃ sarvamevaitanmanonāśaṃ ca jīvanam |
smara sarvaṃ viṣṇupadītaṭādikaṃ satījanān || 96 ||
[Analyze grammar]

caturyugaṃ pūrṇameva nyavasaṃ sādhubhiḥ saha |
anye'pi ca tato jātāḥ sampradāyāstadā mama || 97 ||
[Analyze grammar]

anye'vatārāḥ saṃbhūtā lokarakṣaṇahetave |
paṭhanācchravaṇāccāsya bhuktirmuktirbhavedapi || 98 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne vedhasaḥ ṣaṭtriṃśadvatsare hariprathabhaktasya śāpena mṛtasya varṇiśālamanorujjīvanārtham anādiśrībhaktanārāyaṇasya |
kuṃbhikāśrīsahitasya prākaṭyamityādinirūpaṇanāmā triṃśo'dhyāyaḥ || 30 ||
[Analyze grammar]