Chapter 28

śrīpuruṣottama uvāca |
śṛṇu nārāyaṇīlakṣmi prākaṭyaṃ me tataḥ param |
vedhaso vatsare trayastriṃśe sasyā'bhidhe purā || 1 ||
[Analyze grammar]

kalpe triṃśattame tvekādaśe manvantare tathā |
meroḥ pūrve śvetakhaṇḍe'ruṇācalo'bhavadgiriḥ || 2 ||
[Analyze grammar]

yojanotsedha evāyaṃ daśayojanavistṛtaḥ |
jvālāgarbhaḥ sadā cāste vahnirasāḍhyakandaraḥ || 3 ||
[Analyze grammar]

na pārśve mānavāḥ santi nā'raṇyāni vanānyapi |
nadyastūṣṇapravāhā vai bhūmistvaṃgārasannibhā || 4 ||
[Analyze grammar]

varṣe varṣadvaye varṣā'ṣṭakottare śatābdake |
jvālāruṇācalo jvālāmayo bhavati sarvataḥ || 5 ||
[Analyze grammar]

vahnirasāḥ pravartante deśeṣu ca saritsvapi |
tatpratāpātpradahyanti dūradeśā api priye || 6 ||
[Analyze grammar]

mānavāḥ paśavaścāpi pakṣiṇo vyomacāriṇaḥ |
tāpoṣmaṇā pramūrchā''ptā vyasavaḥ saṃbhavanti vai || 7 ||
[Analyze grammar]

sasyānāṃ ca vanānāṃ ca vahnisekena bharjanam |
dūrasthānāṃ bhavatyeva phalapuṣpādināśakam || 8 ||
[Analyze grammar]

yāṃ diśāṃ prati vāyūnāṃ pravāhā yānti sā'nalāḥ |
śatayojanaparyantā deśā bhavanti bharjitāḥ || 9 ||
[Analyze grammar]

vahnisekamṛtā jīvāḥ pralayasthā bhavanti vai |
ekadā tu mahājhaṃjhāvāto babhūva cā'mbare || 10 ||
[Analyze grammar]

jvālāruṇā'calaścāpi vahnirūpo babhūva ha |
vahnijvāloṣmapūrāṇyāvahan pravāyuṇoditāḥ || 11 ||
[Analyze grammar]

ativegena pūrvasyāṃ śatayojanaveginaḥ |
meroḥ pārśve vasatayo lakṣaśo dehino'bhavan || 12 ||
[Analyze grammar]

uṣmaṇā dagdhadehāste mṛtāścirapravāhiṇā |
koṭiśo gajago'śvādyā nagarāṇi sahasraśaḥ || 13 ||
[Analyze grammar]

tatrā''sīnnagaraṃ svāminagaraṃ yojanāyatam |
prāyaśo mama bhaktaiścādhiṣṭhitaṃ pāvanairjanaiḥ || 14 ||
[Analyze grammar]

maṭhāśca sādhusādhvīnāṃ yatīnāmabhavan śubhāḥ |
brahmacaryavratānāṃ ca satīnāṃ dharmayoṣitām || 15 ||
[Analyze grammar]

āśramā bahavaścāsan japayajñakṛtāṃ tathā |
vaiṣṇavānāṃ yogināṃ ca karmaṭhānāṃ mahālayāḥ || 16 ||
[Analyze grammar]

babhūvuryatra devārthā devālayāḥ prasevinām |
madarthaṃ tapasā bhaktā yatrā''san vai videhinaḥ || 17 ||
[Analyze grammar]

mama lakṣyaparāstyaktamadarthasarvabhogakāḥ |
madālambanamātrāśca madārādhanatatparāḥ || 18 ||
[Analyze grammar]

madbhaktānāṃ maṇḍalānāṃ sevādharmaparāyaṇāḥ |
ātmasarvasvasampatsannivedino madātmakāḥ || 19 ||
[Analyze grammar]

sādhyabhaktiparāḥ sarve sādhanasthāstu cālpakāḥ |
evaṃvidhe'tra nagare jvālānaloṣmaṇā drutam || 20 ||
[Analyze grammar]

yogābhyāsavihīnāstu bhaktāḥ samantato mṛtāḥ |
yogajñāḥ sādhavaḥ satyo brahmabhāvavibhāvitāḥ || 21 ||
[Analyze grammar]

sasmarurmāṃ yatra tatrā'nādikṛṣṇanarāyaṇam |
parabrahmā'kṣarā'tītaṃ śrīkāntaṃ puruṣottamam || 22 ||
[Analyze grammar]

tuṣṭuvuḥ ruddhamarutaścaikatānena yojitāḥ |
rakṣa rakṣa parabrahmā''ntarātman puruṣottama || 23 ||
[Analyze grammar]

sarvasvāmin samāgaccha rakṣa jvālānalādasūn |
ityevaṃ tvekatānaiścābhyarthitastīvrabhaktibhiḥ || 24 ||
[Analyze grammar]

tūrṇaṃ sākaṃ tvayā lakṣmyā jīvoddhāraṇahetave |
gocaro'hamabhavaṃ vai gṛhe gṛhe jane jane || 25 ||
[Analyze grammar]

mama brahmahradasyaivā'mṛtabinduṃ samakṣipam |
ahaṃ jvālā'nalādrau ca vyomamārgeṇa vai drutam || 26 ||
[Analyze grammar]

vahnirlayaṃ gataścāpi jvālā śaityaṃ samāvahan |
auṣṇyaṃ pariṇataṃ śaitye dāhaśāntikaraṃ tadā || 27 ||
[Analyze grammar]

śaityāmṛtaṃ tu vātena yān yān mṛtānhi dehinaḥ |
sthāvarān jaṃgamāṃścāpi samaspṛśattadā ca te || 28 ||
[Analyze grammar]

navajīvanamāsādyā''nanditā jīvino'bhavan |
cvālāruṇā'calaḥ so'pi brahmahradāmṛtā'nvayāt || 29 ||
[Analyze grammar]

śītāmṛtācalo jātaḥ kṣaṇātpariṇato'bhavat |
ākalpāntaṃ tathaivā''sīt parvato'mṛtaśītalaḥ || 30 ||
[Analyze grammar]

bhaktaiśca yogibhiḥ sarvairyatibhirbrahmaśīlibhiḥ |
sādhubhiśca satībhiśca sādhvībhistyāgibhistathā || 31 ||
[Analyze grammar]

vaiṣṇavairmānavaiścāpi dṛgagre'haṃ nibhālitaḥ |
prārthitastatra vai nityaṃ sthātuṃ bhakteṣu rakṣakaḥ || 32 ||
[Analyze grammar]

pūjito vanditaścāpi nyavasaṃ vai tvayā saha |
tasmin vai svāminagare'nādisvāminarāyaṇaḥ || 33 ||
[Analyze grammar]

svāminyā ca tvayā lakṣmyā sahitaḥ puruṣottamaḥ |
ityevaṃ svāminīśriṃ svaṃ prākaṭyaṃ kathitaṃ tava || 34 ||
[Analyze grammar]

smara tvaṃ svāminī lakṣmi svāmipattanarakṣakam |
anādiśrīsvāminārāyaṇaṃ śrīpuruṣottamam || 35 ||
[Analyze grammar]

sārdhaṃ tvayā rakṣayitryā hyanādisvāminīśriyā |
paṭhanācchravaṇāccāpi hyāpadbhyo rakṣaṇaṃ bhavet || 36 ||
[Analyze grammar]

athā'nyasmin pāśavākhye catustriṃśe tu vatsare |
vedhasaḥ saptaṣaṣṭyūrdhvatriśate kalpake purā || 37 ||
[Analyze grammar]

dvādaśe ca manau bhūmau yugalaṃ dvijajātikam |
pāvanaṃ bhaktimallakṣmyā āsīt kauśeyake pure || 38 ||
[Analyze grammar]

anapatyā dvijapatnī nāmnā nirvāṇikā satī |
dvijaṃ kṣmācolakākhyaṃ svaṃ patiṃ prāha sukhārthinī || 39 ||
[Analyze grammar]

dāridryaṃ vartate nityaṃ cullī cāndrāyaṇe sthitā |
dantā vrataṃ niraśanaṃ prakurvanti nirāmayāḥ || 40 ||
[Analyze grammar]

gṛhe dhūmro na cāyāti yātrāyāṃ pragato yathā |
vahnirlajjānvito bhūtvā darśanaṃ na dadātyapi || 41 ||
[Analyze grammar]

gatā tīrthe jantavaśca gṛhāt pipīlikādayaḥ |
kapāṭasya pidhāne'pi prayojanaṃ na vidyate || 42 ||
[Analyze grammar]

dvāraṃ coddhāṭitaṃ nityaṃ svargadvāraṃ yathā śubham |
śālā''ste mālikāyuktā kevalā rāgavarjitā || 43 ||
[Analyze grammar]

apādo'pi samāyāto mokṣo vipra gṛhe tava |
ahaṃ māyāsvarūpā'pīdānīṃ jaṃjālavarjitā || 44 ||
[Analyze grammar]

nirguṇe tvadgṛhe cāsmi nairguṇyaṃ samupāśritā |
jīvato'pi nirālambā sthitiste vartate dvija || 45 ||
[Analyze grammar]

sālambā'haṃ nirālambā jātā'smi niṣparigrahā |
aho bhāgyasya māhātmyaṃ saguṇo nirguṇāyate || 46 ||
[Analyze grammar]

bhūtvā bhūtvā vilīyante cāśā nirvāṇadarśanāḥ |
kākāḥ kapotāścaṭakāḥ śvāno mṛgāśca mūṣikāḥ || 47 ||
[Analyze grammar]

biḍālādyā na cāyānti gṛhaṃ nau vai kvacit pate |
nirastasarvasaubhāgye ko nivaset savāsanaḥ || 48 ||
[Analyze grammar]

kaṇḍanī peṣaṇī nāsti mārjanī nāsti khaṭvikā |
sūryabhāsā divā dīptaṃ niśi candragrahādibhiḥ || 49 ||
[Analyze grammar]

brahmadhāmasamaṃ vipra gṛhaṃ svargaṃ prabhāsate |
jaṭā naisargikī nau ca dyotate yoginījaṭā || 50 ||
[Analyze grammar]

aho daivasya daurātmyaṃ saṃsāre cāpyasāratā |
satyāmapi gṛhalakṣmyāṃ bhāgyalakṣmīrna vidyate || 51 ||
[Analyze grammar]

alakṣmīkagṛhaṃ satyaṃ brahmadhāmāyate sadā |
etādṛśaṃ gṛhaṃ vipra cāvayorvidyate'calam || 52 ||
[Analyze grammar]

bhālaṃ bhāgyaṃ bhogajātaṃ bhakṣyaṃ bhāsā na santi vai |
tato'vaśyaṃ yogisevyaṃ gṛhaṃ te rājate dvija || 53 ||
[Analyze grammar]

gṛhisevyaṃ na caivā''ste lakṣmyā hīnaṃ ca nirguṇam |
tanmayā cintyate nityaṃ lakṣmīryathā gṛhe mama || 54 ||
[Analyze grammar]

samāgacchettathā lakṣmyā ārādhanā pate mayā |
kartavyā vratayoginyā sampadvanme gṛhaṃ bhavet || 55 ||
[Analyze grammar]

ityarthito nijasvāmī tathā'stvevaṃ jagāda tam |
sā'pi lakṣmīvrataṃ cakre vārṣikaṃ dugdhabhojanā || 56 ||
[Analyze grammar]

śete pṛthvyāṃ brahmacaryaparāyaṇā nirāsanā |
karoti jāgaraṃ cārdharātriṃ yāvat tataḥ sukham || 57 ||
[Analyze grammar]

nidrāti bhajate lakṣmi lakṣmi lakṣmīti vai hṛdā |
prātarnadyāṃ sadā snāti sā''rdravastrā gṛhaṃ prati || 58 ||
[Analyze grammar]

samāgatyā'rcanaṃ lakṣmyāḥ karoti padmapuṣpakaiḥ |
aṣṭottaraśatairnityaṃ dhūpadīpādibhistathā || 59 ||
[Analyze grammar]

nīrājanaṃ karotyeva sugandhaṃ cārpayatyapi |
naivedyaṃ dugdhapākādi samarpayati polikāḥ || 60 ||
[Analyze grammar]

aṣṭottaraśatapradakṣiṇāni bhramati śriyam |
mṛnmūrtiṃ śrīṃ namaskṛtyāvartayatyeva mālikāḥ || 61 ||
[Analyze grammar]

lakṣmi śri kamale padme rame nārāyaṇīndire |
hiraṇmayi mahālakṣmi īśvari parameśvari || 62 ||
[Analyze grammar]

kṛṣṇe hariṇi dravyākhye vaiṣṇavi puruṣottami |
sampadrūpe bhagavati haridāsi haripriye || 63 ||
[Analyze grammar]

brāhmi vaikuṇṭhike smṛddhe śālagrāmi trayodaśi |
cakriṇi padmini bindvi cābdhije svarṇarūpiṇi || 64 ||
[Analyze grammar]

gośakṛdvāsini brahmahṛdayasthe dhaneśvari |
ṛtambhare plakṣavāse māye me māta īśvari || 65 ||
[Analyze grammar]

amāye meruputri tvaṃ dhṛte raudri praśātani |
kaumudi bhūyasi devavīthi cā''nantike kale || 66 ||
[Analyze grammar]

ārṣi jyotsne śive śārdūlike saraḥprabhadrike |
sarvabhadre svatantre ca jaye sudarśani mate || 67 ||
[Analyze grammar]

jalanārāyaṇi svadhātmaje ca mākṣiki sati |
puṇḍarīki ratnike ca kṛpāvati ca bhaktije || 68 ||
[Analyze grammar]

ardhaśri pippale cā'rdhordhve vaṭi pīṭhike'cyute |
rājarājñi naiṣṭhikīśri śaivi svāmini kānaki || 69 ||
[Analyze grammar]

nirvāṇike brahmaśakti cātmātmike'ntarātmike |
cañcadrūpe cañcale ca sattvaprakarṣiṇi prabhe || 70 ||
[Analyze grammar]

śrīvatse yantrike caindri jayanti maṇḍalātmike |
sarvatobhadrike padmaśile prajñe tathā'kṣari || 71 ||
[Analyze grammar]

śrāṃgārike bhāgyarūpe siddhe śānte'vatāriṇi |
aṃśe pare ca vibhavi kale'rce bhūmni dhāmini || 72 ||
[Analyze grammar]

janani kāriṇi ramye devīśvarīśvarīśvari |
muktānike parabrahmapatni prapoṣike kriye || 73 ||
[Analyze grammar]

anādiśrīkṛṣṇanārāyaṇapatni hyanādini |
evaṃ tvaṣṭādaśayuktaśatābhidhānike mayi || 74 ||
[Analyze grammar]

kṛpāṃ kṛtvā samāyāhi madgṛhe vaibhaveśvari |
sarvagandhe sarvarase sarvarūpe surūpiṇi || 75 ||
[Analyze grammar]

sarvasparśe sarvaśabde samāgaccha gṛhe mama |
sarvānande sarvasaukhye sarvade smṛddhivardhini || 76 ||
[Analyze grammar]

anantoddhārasaṃśakte samāyāhi gṛhe mama |
dāridryaduḥkhasaṃhantri hyalakṣmīdūrakāriṇi || 77 ||
[Analyze grammar]

kīrtitejovardhayitri sukhayitri svasatrjuṣām |
bhaktāyā me gṛhe lakṣmi śri samāyāhi śobhane || 78 ||
[Analyze grammar]

ityevaṃ sā prārthayattvāṃ nirvāṇikā dvijapriyā |
śrutvā tvaṃ vīkṣya bhaktiṃ ca prasannā'cintayaḥ priye || 79 ||
[Analyze grammar]

tadgṛhe gantumevā'pi dātuṃ ca darśanaṃ hyapi |
madājñāṃ tvaṃ samādāya yātā nirvāṇikālayam || 80 ||
[Analyze grammar]

gocarā purataḥ sthitvā'bhavastatra tato'vadaḥ |
nārāyaṇaṃ vinā naiva sthāsyāmyatra gṛhe tava || 81 ||
[Analyze grammar]

tamārādhaya mātarvai mādhavaścāgamiṣyati |
ityuktvā tvaṃ tirobhāvaṃ gatā tasyāstu varṣmaṇi || 82 ||
[Analyze grammar]

putrīrūpā surūpā tvamajāyathāḥ sukanyakā |
tayā cārādhitaścāhaṃ savanākhyadrumāttataḥ || 83 ||
[Analyze grammar]

prāvirāsaṃ yuvā divyasvarūpaḥ parameśvaraḥ |
anādiśrīkṛṣṇanārāyaṇaḥ śrīpuruṣottamaḥ || 84 ||
[Analyze grammar]

śaṃkhacakragadāpadmadharaścojjvalakāntimān |
anādiśrīsāvanadrunarāyaṇābhidhānakaḥ || 85 ||
[Analyze grammar]

bhikṣāṃ yayāce tasyāśca mātā te me dadau tadā |
vivāhavidhinā tvāṃ vai sarvasaubhāgyasundarīm || 86 ||
[Analyze grammar]

tato nirvāṇikā māṃ ca tvāṃ ca rarakṣa sarvadā |
nije gṛhe sevamānā kṣmācolasyā''jñayā priye || 87 ||
[Analyze grammar]

ahaṃ pṛthvyāṃ tato vāsaṃ cākalpaṃ pracakāra ha |
nairvāṇikīśrīsameto dharmamasthāpayan kṣitau || 88 ||
[Analyze grammar]

nirvāṇikāgṛhaṃ samyagbhṛtaṃ tato hyajāyata |
vivāhe devadeveśairarpitāni bahūnyapi || 89 ||
[Analyze grammar]

ratnāni kalpapātrāṇi dhenavaḥ kalpavallikāḥ |
vimānāni mandirāṇi vibhūṣaṇāni vai tadā || 90 ||
[Analyze grammar]

ambarāṇi vicitrāṇi śayyāḥ sāstaraṇāstathā |
sauvarṇāsanaparyaṃkapreṃkhādolādikāstathā || 91 ||
[Analyze grammar]

dhanāni maṇimāṇikyamauktikāni śubhāni ca |
hārān kṣetrāṇi vāṭīśca mahodyānāni vai tathā || 92 ||
[Analyze grammar]

hastyaśvavṛṣabhāṃścāpi dāsadāsīśatāni ca |
evaṃ smṛddhaṃ gṛhaṃ te cāgamenā'bhūnmahodayam || 93 ||
[Analyze grammar]

sauvarṇakalaśaiḥ rājacchṛṃgaṃ yathendramandiram |
evaṃ tava nimittena prākaṭyaṃ mama vai tadā || 94 ||
[Analyze grammar]

abhūllakṣmi smara sarvaṃ prākaṭyaṃ sukhasampadaḥ |
anye'pyaṃśā'vatārādyā mamā'bhavannasaṃkhyakāḥ || 95 ||
[Analyze grammar]

sarvān jānāmyahaṃ nārāyaṇīśri nā'pare janāḥ |
yadgṛhe'haṃ nivasāmi tadgṛhaṃ dhāmasadṛśam || 96 ||
[Analyze grammar]

mukteśvarādigamyaṃ ca tīrthā''vāsaṃ bhavatyapi |
supāvanaṃ satāṃ kṣetraṃ tadbhavatyeva sarvadā || 97 ||
[Analyze grammar]

yajñānāmavatārāṇāṃ vāsarūpaṃ bhavatyapi |
dhāmānyapi ca sarvāṇi mannivāse vasantyapi || 98 ||
[Analyze grammar]

ityevaṃ mama vāsena bhuktirmuktiḥ kare sthitā |
vartate tatra lokānāṃ paṭhanācchravaṇādapi || 99 ||
[Analyze grammar]

smaraṇāt sarvasiddhiśca jāyate nātra saṃśayaḥ |
vratānāṃ puṇyamutkṛṣṭaṃ yāvatāmapi jāyate || 100 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne vedhasastrayastriṃśadvatsare jvālā'ruṇācalavahnirasairdahyamānānāṃ svāminagarasthānāṃ prajānāṃ rakṣārtham anādiśrīsvāminārāyaṇasya svāminīśrīsahitasya prākaṭyaṃ catustriṃśadvatsare nirvāṇikāviprāṇyā lakṣmyā aṣṭādaśottaraśatanāmabhirārādhitayā lakṣmyā sākam anādiśrīsāvananārāyaṇasya prākaṭyamiti cetinirūpaṇanāmā'ṣṭāviṃśatitamo'dhyāyaḥ || 28 ||
[Analyze grammar]