Chapter 27

śrīpuruṣottama uvāca |
śṛṇu nārāyaṇāśri tvaṃ paraṃ tasmāt kathāmṛtam |
prākaṭyaṃ me yathā te ca dvātriṃśe parameṣṭhinaḥ || 1 ||
[Analyze grammar]

kalpadruvatsare ṣaṭpaṃcāśatkalpe'ṣṭame manau |
ekadā vai kuberasya yakṣaḥ suvarṇamālikaḥ || 2 ||
[Analyze grammar]

yayau svarge vihartuṃ ca tato viṣṇupuraṃ yayau |
satyalokaṃ tato vīkṣya dikpālānāṃ tathālayān || 3 ||
[Analyze grammar]

vīkṣya yamālayaṃ draṣṭuṃ yayau saṃyamanīṃ purīm |
tāvattasyā''yuṣaścā'nto jāto mṛtyuṃ gato hi saḥ || 4 ||
[Analyze grammar]

yakṣasya yamarājaḥ prā'kārayaccāntimāṃ kriyām |
jñātvā kubero yakṣasya maraṇaṃ vai yamālaye || 5 ||
[Analyze grammar]

yamadūtairmāritaścetyamanyata tato ruṣā |
jvalan sainyena sahito yamasthalyāṃ svayaṃ yayau || 6 ||
[Analyze grammar]

yodhayāmāsa bahudhā yamena saha vai tadā |
yamaṃ jitvā svarṇamālaṃ nināya svagṛhaṃ prati || 7 ||
[Analyze grammar]

atha rājā yamastūrṇamāhvayāmāsa nirṛtim |
rākṣasaṃ sainyasahitaṃ nirṛto'pi talasthitān || 8 ||
[Analyze grammar]

pātālādinivāsāṃśca rākṣasān yuddhaśālinaḥ |
koṭyarbudā'bjasaṃkhyānāhvayāmāsa svapakṣagān || 9 ||
[Analyze grammar]

kuberaṃ tasya rājyaṃ ca jetuṃ yayuśca te tataḥ |
yuddhavādyānyavādyantā'lakāyāḥ sannidhau hi khe || 10 ||
[Analyze grammar]

jñātvā kuberakastvetanniryayau yakṣakoṭibhiḥ |
yuddhaṃ tvākasmikaṃ tatrā'bhavat sarvavināśakam || 11 ||
[Analyze grammar]

yāmyadūtairhatā yakṣāḥ koṭiśo rākṣasaistathā |
kubero'pi hataḥ kaṇṭhād dvedhā yamena vai tadā || 12 ||
[Analyze grammar]

kuberarājyaṃ sarvaṃ svāyattīkṛtaṃ yamena tu |
nirṛtena tathā rājye rākṣasā niyatīkṛtāḥ || 13 ||
[Analyze grammar]

atha yakṣāḥ pare kecit trastāḥ śrīśānadikpatim |
indraṃ varuṇaṃ vāyuṃ ca gatvā nyavedayaddhi tat || 14 ||
[Analyze grammar]

te sarve tvāyayustūrṇaṃ kuberanagarīṃ prati |
dṛṣṭvā te dharmarājaṃ vai tathā nirṛtamityapi || 15 ||
[Analyze grammar]

īśāno nijaśiṣyasya kuberasya ca pakṣagaḥ |
vairaniryātanārthaṃ vai yuddhaṃ cakre hi dāruṇam || 16 ||
[Analyze grammar]

mahendro'pi tathā vahnirvāyurvaruṇa ityapi |
kuberapakṣamādāya yuddhaṃ cakruryamena te || 17 ||
[Analyze grammar]

atha sūryaḥ svaputrasya yamasya pakṣamāvahan |
svarbhānuśca tathā śaniścaraścānye'pi rākṣasāḥ || 18 ||
[Analyze grammar]

yamapakṣaṃ parigṛhya yuddhaṃ dadurmaholbaṇam |
koṭiśaśca gaṇāstatra surā yakṣā hatāḥ punaḥ || 19 ||
[Analyze grammar]

abhyastayuddhakarmāṇo yāmyā jayaṃ gatāḥ punaḥ |
rākṣasā lebhire yuddhe vijayaṃ yāmyapakṣagāḥ || 20 ||
[Analyze grammar]

krūrāśca krūrakarmāṇo lohaghṛṣṭakarādayaḥ |
loṣṭhā'gniśastrayantrāstrakovidā nirghṛṇā yamāḥ || 21 ||
[Analyze grammar]

mārayāmāsuratyarthaṃ vāyuṃ cendraṃ jalādhipam |
īśānaṃ cānalaṃ cāpi bhagnāste naṣṭasainyakāḥ || 22 ||
[Analyze grammar]

hāhākāro mahānāsījjagatyāṃ sarvaśastadā |
devāstrastā yayuḥ satyaṃ gahvarāṇyapare tathā || 23 ||
[Analyze grammar]

pṛthvyāṃ svarge ca sarvatra balaṃ pātālavāsinām |
dikpālānāṃ pradeśeṣu tvabhavad vardhitaṃ tadā || 24 ||
[Analyze grammar]

lakṣmi tadā'ntarīkṣaṃ vai cakampe sarvato diśaḥ |
dikpālānāṃ vivādeṣu bhṛtyakoṭyo hatā mṛtāḥ || 25 ||
[Analyze grammar]

yamarājo'bhavad rājā cā'lakāyāḥ samantataḥ |
astitvaṃ vai kuberasya niṣkāsitaṃ samantataḥ || 26 ||
[Analyze grammar]

nirṛtāḥ rākṣasāḥ sarve yamāścārkaḥ śanistathā |
rāhuścā'nye pare cāpi babhūvuḥ svabalaidhitāḥ || 27 ||
[Analyze grammar]

svatantrā iva trailokyāṃ ghnanti virodhaśālinaḥ |
niṣkāsayanti cā'namrān devādīn nijavāsataḥ || 28 ||
[Analyze grammar]

evaṃ jātaṃ svargaloke cā'vyavasthaṃ mitho'pi ca |
dikpālānāṃ balaṃ naṣṭaṃ yamadaṇḍasya sannidhau || 29 ||
[Analyze grammar]

indrājñāyāṃ na vartante sūryacandrādayo'pare |
surāstadāśritāścāpi svargaṃ vai paragaṃ hyabhūt || 30 ||
[Analyze grammar]

athaivaṃ vīkṣya kamale īśānendrānalānilāḥ |
varuṇaśca pare devā mahendragṛhamāyayuḥ || 31 ||
[Analyze grammar]

cakruśca mantraṇāṃ tatra kiṃkartavyavihīnakāḥ |
brahmāṇaṃ sasmaruścāpi viṣṇuṃ sasmarurīśvarāḥ || 32 ||
[Analyze grammar]

śeṣaṃ prasasmaruścāpyāyayuste parameśvarāḥ |
śuśruvuste kuberasya nāśaṃ cānyaparājayam || 33 ||
[Analyze grammar]

vijayaṃ dharmarājasya śokaṃ cakruḥ kṣaṇaṃ tadā |
dharmarājagṛhe tatrā'nyāyo naiva bhavediti || 34 ||
[Analyze grammar]

kāraṇaṃ sarvamevā'pi jñātvā yakṣasya vai mṛtim |
nyāyyāmanyāyamālambya kuberasya tu yodhanam || 35 ||
[Analyze grammar]

kampayitvā śirāṃsyete menire na jayaṃ punaḥ |
yatrā'nyāyo na vijayastatra saṃbhavati kvacit || 36 ||
[Analyze grammar]

kuberasyā'nyāyabhāktve mṛtyuścā'yaṃ na saṃśayaḥ |
caturdaśānāṃ lokānāṃ dehināṃ nāyako yamaḥ || 37 ||
[Analyze grammar]

āyuṣyānte nayatyeva tatra kā paridevanā |
indraṃ vāyuṃ jaleśaṃ ceśānaṃ vahniṃ tayeśvarān || 38 ||
[Analyze grammar]

nayatyeva yameśo vai kā kathā'nyasya vai mṛteḥ |
tasmād yamāya devāya devo vai vijayo'tra ha || 39 ||
[Analyze grammar]

asmābhistu pramantavyaḥ parājayo'tra karmaṇi |
kubero dikpatirbhūtvā tvanyāyaṃ kurute yadi || 40 ||
[Analyze grammar]

tatpakṣāṇāṃ hi sarveṣāṃ duḥkhaṃ syād vardhitaṃ punaḥ |
tasmādatra na viṣṇośca śeṣasya vedhaso'pi ca || 41 ||
[Analyze grammar]

anyeṣāmapi cāturyaṃ jayameṣyati vai surāḥ |
atastatra na gantavyaṃ yatrā''ste yamarāṭ svayam || 42 ||
[Analyze grammar]

alakāyāṃ viśeṣeṇa sarvanāśāya bho surāḥ |
kintu devādhidevānāmīśvarāṇāṃ maheśvaraḥ || 43 ||
[Analyze grammar]

anādiśrīkṛṣṇanārāyaṇaḥ śrīpuruṣottamaḥ |
akṣarādhipatiḥ śrīśaḥ śrīhariḥ parameśvaraḥ || 44 ||
[Analyze grammar]

smartavyastvatra vāde vai nirṇayaṃ sa vidhāsyati |
indragṛhe mahāsatraṃ kurvantu prajayātmakam || 45 ||
[Analyze grammar]

parameśasya bho devāḥ svayamāyāsyati prabhuḥ |
ityuktāste harādyāśca devā indrālaye tadā || 46 ||
[Analyze grammar]

japasatraṃ pracakruśca deveśvarāśca sarvaśaḥ |
harekṛṣṇa hareviṣṇo parameśa parātpara || 47 ||
[Analyze grammar]

anādiśrīkṛṣṇanārāyaṇa rakṣa pareśvara |
satataṃ kīrtanaṃ cakrurdevānāṃ pūrṇavatsaram || 48 ||
[Analyze grammar]

indrasya vatsarānte śrīhariścā'haṃ samāyayau |
gocaraḥ sarvadevānāṃ śaṃkhacakrādimān prabhuḥ || 49 ||
[Analyze grammar]

tvayā sākaṃ tadā lakṣmyā sarvabhūṣāḍhyayā priye |
devā māmanusaṃvīkṣyāścarthaparāḥ susatvaram || 50 ||
[Analyze grammar]

utthāya nemurbahudhā cakruśca pūjanaṃ mama |
madhuparkaṃ daduścāpi satkāraṃ ca dadhustataḥ || 51 ||
[Analyze grammar]

mahāsanaṃ dadustatropāviśaṃ ca tvayā saha |
nyavedayaṃśca te sarvamudantaṃ dhanarakṣiṇaḥ || 52 ||
[Analyze grammar]

yakṣāṇāṃ nāśanaṃ cāpi nijānāṃ ca parājayam |
yamasya vijayaṃ cāpi svarge svatantratāṃ tathā || 53 ||
[Analyze grammar]

avyavasthā ca deveṣu śuśrāvā'haṃ ca padmaje |
kṣaṇaṃ dhyānaṃ tadā kṛtvā'vocaṃ dikpālakānidam || 54 ||
[Analyze grammar]

bhavadbhirvai mayā sākaṃ gantavyaṃ yatra vai yamaḥ |
kuberasya nagaryāṃ hi sarvaṃ saukhyaṃ bhaviṣyati || 55 ||
[Analyze grammar]

sāmnā vādasya sarvasya neṣye'ntaṃ prasukhāvaham |
ityuktvā'haṃ tvayā sākaṃ sarvairdevagaṇaiḥ saha || 56 ||
[Analyze grammar]

agacchaṃ tvalakābhūmau yamanaiṛtasannidhau |
śrutvā māṃ sa tu tūrṇaṃ vai trastamanā upāyayau || 57 ||
[Analyze grammar]

padbhyāṃ matsannidhau lakṣmi bhayaṃ prāpā'pyacintayam |
pādaprakṣālanaṃ cakre papau vāryamṛtaṃ mama || 58 ||
[Analyze grammar]

svāgataṃ pradadau cāpyāsanaṃ vādyānyavādayat |
dāsavat sarvadevānāṃ paśyatāṃ prajagāda mām || 59 ||
[Analyze grammar]

aparāddhaṃ mayā kṛṣṇa kubero mārito mayā |
nagarīyaṃ kṛtā vaśyā kṣamasva puruṣottama || 60 ||
[Analyze grammar]

anyāyamārgiṇāṃ daṇḍo'vaśyaṃ bhavati keśava |
yadyahaṃ syāṃ tathā tarhi daṇḍo mayyapi dhīyatām || 61 ||
[Analyze grammar]

ityuktvā śaraṇaṃ prāpya papāta pādayormama |
anyāyena vihīnasya daṇḍo naiva hi yujyate || 62 ||
[Analyze grammar]

kubero'yaṃ mārito yat tanna yogyaṃ bhavediha |
yakṣeśvaro jīvanīyo jīvanīyā gaṇā api || 63 ||
[Analyze grammar]

surādyā jīvayitavyā ye hatā āhave yama |
kuberasya purī tasmai dātavyā punareva ha || 64 ||
[Analyze grammar]

tvayā dharma pragantavyaṃ yamarājapurīṃ prati |
saṃyamanīṃ sadā rakṣa mā'nyagṛdhnāṃ samācara || 65 ||
[Analyze grammar]

ityuktaśca mayā dharmarājo'yācata vai kṣamām |
padaṃ kauberakaṃ tyaktvā prasthānamakarot tataḥ || 66 ||
[Analyze grammar]

mayā lakṣmi kuberasyā''vāhanaṃ tatra vai punaḥ |
kṛtaṃ mānasaputro me jajñe dhanādhipastataḥ || 67 ||
[Analyze grammar]

vaiṣṇavaḥ paramo bhakto yakṣāśca jajñire punaḥ |
anye mṛtāḥ surāḥ sarve jajñire mānasā mama || 68 ||
[Analyze grammar]

sutā devādayaste vai māmānarcurmudānvitāḥ |
mayā'rpitaṃ kuberāya mānasāya padaṃ punaḥ || 69 ||
[Analyze grammar]

tenā'rthitastadā cā'haṃ nityavāsārthameva ha |
svarṇavatyāṃ nagaryāṃ vai nyavasaṃ svarṇavarṇavān || 70 ||
[Analyze grammar]

śaṃkarādyāḥ pūjayitvā yayuste svapadāni hi |
yamo yayau yāmyapadaṃ cā'nye yayurnijālayān || 71 ||
[Analyze grammar]

kuberasya navīne tūdbhave tasya mahotsavaḥ |
mayā kṛtaḥ svarṇapuryāṃ pūjito vardhitastathā || 72 ||
[Analyze grammar]

tvaṃ sadā kānakīlakṣmīrmayā sākaṃ virājitā |
anādiśrīsvarṇanārāyaṇena sārdhamīśvarī || 73 ||
[Analyze grammar]

ākalpāntaṃ nyavasaṃ vai svarṇavatyāṃ pareśvaraḥ |
anādiśrīkṛṣṇanārāyaṇaḥ śrīpuruṣottamaḥ || 74 ||
[Analyze grammar]

sarveṣāṃ lokapālānāṃ dikpālānāṃ niyāmakaḥ |
sarvarakṣākaraḥ sākṣācchrīpatiḥ parameśvaraḥ || 75 ||
[Analyze grammar]

smara lakṣmi suvarṇe tvaṃ prākaṭyaṃ me ca te tadā |
rājarājeśvarīrūpaṃ sarvānandapariplutam || 76 ||
[Analyze grammar]

atha sūryādayaścānye devā yamānugā api |
kṣamāpya māṃ bhajante sma svarṇanārāyaṇaṃ tataḥ || 77 ||
[Analyze grammar]

hiraṇyavarṇaṃ puruṣaṃ svarṇaśmaśruṃ yamārdanam |
dikpālānāṃ niyantāraṃ vinetāraṃ virodhinām || 78 ||
[Analyze grammar]

kleśānāṃ śāntikartāraṃ dātāraṃ sampadāṃ tathā |
dagdhāraṃ pāpapuñjānāṃ hartāraṃ vipadāṃ ca mām || 79 ||
[Analyze grammar]

pūjayanti hi devādyāḥ parameśaṃ sanātanam |
paravrahmā'kṣarātītaṃ satpatiṃ muktasevitam || 80 ||
[Analyze grammar]

paṭhanācchravaṇāccāsya smaraṇādapi muktibhāg |
bhuktibhāgapi jāyeta svarṇaśri nā'tra saṃśayaḥ || 81 ||
[Analyze grammar]

itiśrīlakṣmīnārāyaṇīyasaṃhitāyāṃ tṛtīye dvāparasantāne vedhaso dvātriṃśe vatsare yamena māritasya kuberasyojjīvanārtham anādiśrīsvarṇanārāyaṇasya kānakīśrīsahitasya prākaṭyamityādinirūpaṇanāmā saptaviṃśatitamo'dhyāyaḥ || 27 ||
[Analyze grammar]