Chapter 26

śrīpuruṣottama uvāca |
śṛṇu nārāyaṇīśri tvaṃ prākaṭyaṃ me tataḥ param |
vedhaso mānavākhye vai caikatriṃśe tu vatsare || 1 ||
[Analyze grammar]

kalpe tu ṣaṭśate trayodaśe manau tadā purā |
brahmaṇaḥ pṛṣṭhanimnā'dhobhāgānmalimaso'suraḥ || 2 ||
[Analyze grammar]

hallakā''khyo babhūvā'pi śavabhakṣo bhayaṃkaraḥ |
tapastepe mahāghoraṃ cārdhakalpaṃ hi dāruṇam || 3 ||
[Analyze grammar]

brahmā tutoṣa ca tato gocaro'syā'bhavad bhuvi |
asuro mṛttikābhūto vallīvṛkṣādhirohitaḥ || 4 ||
[Analyze grammar]

asthimṛdastitāmātro yatrā''sīt tatra viśvasṛṭ |
gatvā jalenā'bhiṣicya drumānutsārya pārśvataḥ || 5 ||
[Analyze grammar]

mṛttikādrumūlabhāgāt hallakaṃ cā'bhyajīvayat |
vallīpādaśarīraśca haridvarṇo'tidurbalaḥ || 6 ||
[Analyze grammar]

śmaśrulo vedhasaḥ putrastūttasthau mūlajālakāt |
vedhasaṃ jīvayantaṃ svaṃ vīkṣya neme'tibhāvataḥ || 7 ||
[Analyze grammar]

yayāce'pi varaṃ śreṣṭhaṃ kālasaṃhārakārakam |
kālaṃ vā kālarūpaṃ vā saṃhārakaṃ hi dehinām || 8 ||
[Analyze grammar]

saṃhārayāmyahaṃ caivaṃ varaṃ dehi pitāmaha |
brahmā prāha varaścā'yaṃ me balādatiricyate || 9 ||
[Analyze grammar]

nā'haṃ dātuṃ samartho'smi kālādhīno'smyahaṃ yataḥ |
hallakastu tadā prāha dehi cet taṃ na cā'param || 10 ||
[Analyze grammar]

tapaḥ kariṣye satataṃ tadarthaṃ vai pitāmaha |
kālaṃ hantuṃ samartho vai kaścideva hariṃ vinā || 11 ||
[Analyze grammar]

naivā'sti sṛṣṭijo vyaktiviśeṣo'pi kathaṃcana |
ato hallaka yadvacmi śṛṇu te yadi rocate || 12 ||
[Analyze grammar]

kālasya khalu rūpāṇi bahūni santi sṛṣṭiṣu |
teṣvekasyaiva rūpasya sakṛt hantā bhaviṣyasi || 13 ||
[Analyze grammar]

yadi te rocate tvetattadā gṛhāṇa me varam |
ityukto mohavaśago hallako vai tadā varam || 14 ||
[Analyze grammar]

jagrāha tattapastyaktvā yayau meruguhāṃ prati |
brahmaṇo varadānena garviṣṭho vartate sadā || 15 ||
[Analyze grammar]

surān daityān rākṣasāṃśca dānavān kinnarādikān |
tāmasān rājasān devān yakṣān kiṃpuruṣādikān || 16 ||
[Analyze grammar]

gandharvāṃścāraṇāṃścāpi gaṇayatyeva naiva saḥ |
avamānaṃ karotyeva yuddhyatyeva sthale sthale || 17 ||
[Analyze grammar]

brahmaṇo varadānasyā'narthaṃ prakāśayatyapi |
kālanāśaka eveti nijaṃ prakhyāpayatyapi || 18 ||
[Analyze grammar]

svarge jayaṃ samāsādya pātāleṣu yayau tataḥ |
tatrāpi vijayaṃ prāpya lokālokaṃ yayau hi saḥ || 19 ||
[Analyze grammar]

sarvatra vijayaṃ prāpya yamalokaṃ tato yayau |
yamastaṃ pūjayāmāsa jñātvā kālavināśakam || 20 ||
[Analyze grammar]

hallako'yaṃ tato jñātvā nijaṃ vijayinaṃ param |
yayau kailāsalokaṃ sa jetuṃ rudraṃ śivaṃ haram || 21 ||
[Analyze grammar]

gaṇāḥ kailāsavāsā vai jaṅgabhadrādayastu tam |
nyavārayan gopurād vai tato'sau hallako ruṣā || 22 ||
[Analyze grammar]

yuyudhe dvārapālaiśca vijitya tān gaṇān parān |
gaṇeśān bhūtamūrdhanyān bhairavādīṃstataḥ param || 23 ||
[Analyze grammar]

śaṃbhugṛhaṃ yayau krūro duṣṭo malinavāsanaḥ |
kailāsaṃ vai nijaṃ kartuṃ vaśe kartuṃ satīṃ tathā || 24 ||
[Analyze grammar]

gaṇān bhṛtyāṃstathā kartumiyeṣa vīkṣya sampadaḥ |
prāha śaṃbhuṃ bhava bhṛtyo mama śaṃbho'nyathā tava || 25 ||
[Analyze grammar]

vidhāsye'haṃ vināśaṃ vai dehi satīṃ tu me tava |
kailāsarājyaṃ me datvā yāhi tvaṃ meruparvatam || 26 ||
[Analyze grammar]

punaḥ kālāntare dāsye tṛpto'haṃ te yathāyatham |
śaṃbhurvicārayāmāsa balaṃ tvasya bhavet kiyat || 27 ||
[Analyze grammar]

yotsye'nena tu balinā brahmaṇo varayoginā |
nāśayiṣye kṣaṇādenaṃ varadānayutā'suram || 28 ||
[Analyze grammar]

vicāryaivaṃ kālarūpaṃ raudraṃ dadhāra śaṃkaraḥ |
triśūlaṃ tvantimalayakartṛ dadhāra taijasam || 29 ||
[Analyze grammar]

sāṃkarṣaṇaṃ bhīmarūpaṃ kṛtvā śīghraṃ samāyayau |
yuddhārthaṃ tasya sānnidhyaṃ tāvat hallaka ityapi || 30 ||
[Analyze grammar]

jagrāha pārvataṃ rūpaṃ bhayakṛcca vināśakṛt |
saśūlacandrakaśastraṃ kare dadhāra cā''yasam || 31 ||
[Analyze grammar]

kālakālo yathā bhāti tathā bhātyatra hallakaḥ |
yuddhadundubhayo neduḥ kailāse gaṇatāḍitāḥ || 32 ||
[Analyze grammar]

devā deveśvarāstatrā''yayuḥ kautukakarṣitāḥ |
śaṃbhoḥ sāhāyyakāḥ sarve dikpālāśca samāyayuḥ || 33 ||
[Analyze grammar]

yuddhaṃ hallakaharayorjātaṃ pralayakārakam |
meghā naṣṭāḥ phaṭākaiścā'drayo naṣṭāśca hetibhiḥ || 34 ||
[Analyze grammar]

kṣitiḥ śīrṇā patpraghātaiḥ kampaiścukṣubhire'bdhayaḥ |
vegairnipetustārāśca jagarjurnādanairdiśaḥ || 35 ||
[Analyze grammar]

gaṇā gaṇeśvarāstatra trāsamāpurmṛtiṃ prati |
bhagnāḥ kecit kaṭibhāgāt kecit skandhapradeśataḥ || 36 ||
[Analyze grammar]

anye galātpare jānvorbhāgād bhagnā mṛtiṃ yayuḥ |
bhūtapretapiśācādīn kālabhairavabhairavān || 37 ||
[Analyze grammar]

hastenaikena saṃgṛhya mukhe nyasyā'tti hallakaḥ |
śūrabhadraṃ vīrabhadraṃ jaṅgabhadraṃ subhadrakam || 38 ||
[Analyze grammar]

vāmahastena yugapanmukhe nyasya cakhāda tān |
etādṛśo mahānāste kālakālo mahāsuraḥ || 39 ||
[Analyze grammar]

śaṃkaraḥ saṃśayamāpto jaye triśūlasaṃsravāt |
śaṃbhorhastagataṃ śūlaṃ sraṃsate sma punaḥ punaḥ || 40 ||
[Analyze grammar]

vṛṣabhaśca tathā siṃho dvāvetāvapi vai tadā |
hallakasya pracakreṇa nikṛtau mṛtyumāpatuḥ || 41 ||
[Analyze grammar]

satī saṃśayamāpannā jīvane śaṃkarasya tu |
śīghraṃ śaṃbhoḥ śarīre sā tirobhāvamupāgatā || 42 ||
[Analyze grammar]

śaṃbhurvijñāya kailāsaṃ chinnaṃ bhinnaṃ mṛtānugam |
tyaktvā ca jīvanā''śāṃ sa dudrāva hallakā'ntikam || 43 ||
[Analyze grammar]

puraścāgatya śīghraṃ svaṃ triśūlaṃ pralayānalam |
mārayāmāsa mūrdhnyasya hallakasya galopari || 44 ||
[Analyze grammar]

hastād viyujya vegena hallakasya gale gatam |
praviṣṭaṃ cā'nalaprakhyaṃ triśūlaṃ taddharasya yat || 45 ||
[Analyze grammar]

nigalitaṃ gataṃ tatra rasabhāvamupāgatam |
pathyaṃ jātaṃ hallakasyodare'mṛtamivā'bhavat || 46 ||
[Analyze grammar]

atyadbhutamidaṃ jātaṃ kālaśūlaṃ hi jīrṇitam |
evamanyāni śūlāni triśūlāni ca hetayaḥ || 47 ||
[Analyze grammar]

sarve hallakavarṣmā''pya rasabhāvamupāgatāḥ |
ahetiḥ śaṃkaro jātastadā viṣṇuṃ tathā hyajam || 48 ||
[Analyze grammar]

prasasmāra śivastūrṇaṃ viṣṇustatra hyupāyayau |
cakraṃ dadau nijaṃ tasmai harāya ca haro'pi tat || 49 ||
[Analyze grammar]

cakraṃ mumoca kaṇṭhe'sya hallakasya rasaṃ hyabhūt |
athā'nyaccakramādhattaṃ muktaṃ tad rasatā gatam || 50 ||
[Analyze grammar]

evaṃ cakrāṇi sarvāṇi gatāni rasato tadā |
brahmā tvāgatya ca tatra yāvatpaśyati śaṃkaram || 51 ||
[Analyze grammar]

tāvat saśūlacandreṇa muktena vegagāminā |
śaṃkarasya śiraḥ kaṇṭhānnikṛtaṃ hallakena vai || 52 ||
[Analyze grammar]

hāhākāro mahān jāto raudro rudro'pi vai hataḥ |
śokamāpuḥ sarvadevā mānavāśca maharṣayaḥ || 53 ||
[Analyze grammar]

athāpi sarvabhūtāni babhūvuḥ śokabhāñji ca |
hallakasyāpi sāmarthyaṃ śūlacandrāyudhena vai || 54 ||
[Analyze grammar]

sahaiva tu gataṃ sarvaṃ brahmaṇo varadānataḥ |
asāmarthyo babhūvā'pi vijñātaḥ sarvayoddhṛbhiḥ || 55 ||
[Analyze grammar]

brahmaṇoditamevā'tha vijñāya tu surāstataḥ |
gaṇāścābhipradudruvurmāraṇāyā'surasya vai || 56 ||
[Analyze grammar]

tāvattriśūlacakrāṇi sarvāṇyapi ca yāni vai |
galitānyabhavaṃstāni nirgatya cā''yayurdrutam || 57 ||
[Analyze grammar]

viṣṇuṃ prati samastāni śaṃkarasya śavaṃ prati |
viṣṇuścakraṃ mumocā'smai yāvat tāvatsa hallakaḥ || 58 ||
[Analyze grammar]

hare viṣṇo hare kṛṣṇa trāhi māṃ śaraṇāgatam |
uktvā papāta sahasā pādayoḥ śārṅgiṇo'suraḥ || 59 ||
[Analyze grammar]

na hantavyo vrataṃ viṣṇoḥ śaraṇāgatarakṣaṇam |
ataścakraṃ nā'hanattaṃ viṣṇo viṣṇo pravādinam || 60 ||
[Analyze grammar]

brahmaṇo varadānācca tathānimittaśālinam |
brahmaṇaḥ pṛṣṭhaputraṃ ca bhaktaṃ tāpasayoginam || 61 ||
[Analyze grammar]

babandha taṃ hariḥ pāśaiḥ śaṃkarasyā'parādhinam |
vadantaṃ ca hare viṣṇo nārāyaṇa prapāhi mām || 62 ||
[Analyze grammar]

raṭantaṃ manasā māṃ ca smarantaṃ ca hṛdā hi mām |
etādṛśaṃ haraghnaṃ taṃ devahatyā surāsadā || 63 ||
[Analyze grammar]

vavalge krūrarūpā sā śatacakrakarā harā |
prāṇānāṃ grāsasāmarthyā vikṛtā vikṛtānanā || 64 ||
[Analyze grammar]

ghorāṃ ca valgitāṃ tvenāṃ hallako vīkṣya duḥkhadām |
cukrośa bahudhā tatra raṇāṃgaṇe surāntike || 65 ||
[Analyze grammar]

hatyayā tāḍito devaistāḍito gaṇakoṭibhiḥ |
mṛtaprāyo maran vavre hareḥ śaraṇarakṣiṇaḥ || 66 ||
[Analyze grammar]

dehi me bhaktarūpāya śaraṇasthāya mādhava |
agryaṃ padaṃ mahaiśvaryaṃ dveṣiṇe śaṃkarasya vai || 67 ||
[Analyze grammar]

brahmaṇo varadānācca mahākālasya caikakam |
rūpaṃ mayā hataṃ lābhaṃ vinā vai śāṃkaraṃ tvidam || 68 ||
[Analyze grammar]

hatvā hato'smi sañjāto māyayā garvanoditaḥ |
tapaḥ sarvaṃ kṣiptarvośca tāmase karmaṇi prabho || 69 ||
[Analyze grammar]

ataḥ kṛpayā viṣṇo tvaṃ sukhaṃ dehi kṛpāṃ kuru |
devahatyā dahatyeṣā tāṃ nivāraya keśava || 70 ||
[Analyze grammar]

ityuktvā'tirurodā'pi maraṇā'ntikatāṃ yayau |
viṣṇuḥ prāha manoḥ kālaṃ tathā rātriḥ prapūrṇikā || 71 ||
[Analyze grammar]

devahatyākṛtaṃ pāpaṃ bhuṃkṣva hallaka raurave |
pañcadaśamanūnāṃ vai kālānte divasāntare || 72 ||
[Analyze grammar]

yāvad duḥkhāni saṃbhuktvā malino mlecchakarmavān |
mleccheśvaro bhavān bhakto brahmaṇo me bhaviṣyati || 73 ||
[Analyze grammar]

anekasaṃkhyalokānāmāsurāṇāṃ gururmahān |
ityuktvā bhagavān viṣṇuryamadūtaiśca hallakam || 74 ||
[Analyze grammar]

preṣayāmāsa pāpaṃ taṃ sahatyākaṃ yamālayam |
atha devāḥ ṛṣayaśca pitaro mānavā dvijāḥ || 75 ||
[Analyze grammar]

pārṣadāśca gaṇāścāpi bhaktā devyaḥ satīstriyaḥ |
yoginyo mātaraścāpi grahādyā dyusado'pi ca || 76 ||
[Analyze grammar]

bhaktāḥ sarve ca kailāse saṃgatā hariṇā smṛtāḥ |
viṣṇustebhyastathā tābhyaḥ śaṃbhorujīvanāya vai || 77 ||
[Analyze grammar]

provācā''rādhanāṃ kartuṃ mama sarvāvatāriṇaḥ |
anādiśrīkṛṣṇanārāyaṇasya svāminaḥ sataḥ || 78 ||
[Analyze grammar]

sarvā'ntaryāmiṇaste'thā''rādhayāmāsurutsukāḥ |
māṃ sadā'kṣaradhāmasthaṃ śrīpatiṃ puruṣottamam || 79 ||
[Analyze grammar]

drāgevā'haṃ tvayā sākaṃ śrutvā''rādhanamāgataḥ |
kailāse gocaraścakṣuṣmatāṃ divyasumūrtimān || 80 ||
[Analyze grammar]

vīkṣya māmabhavan sarve viśokāścārthayaṃstataḥ |
śaṃbhujīvanadānārtha tato'haṃ prāviśaṃ tanau || 81 ||
[Analyze grammar]

śaṃkarasya kabandhe'pi mastake'pi ca yogataḥ |
prāṇaśaktiṃ pradāyaivā'jīvayaṃ cā'pyasandhayam || 82 ||
[Analyze grammar]

kabandhe mastakaṃ śaṃbhoścārcayaṃ devakoṭibhiḥ |
pitṛbhirmānavaiścā'pi maharṣibhistataḥ param || 83 ||
[Analyze grammar]

śūrabhadrādayo ye ca carvitāśca mṛtāstadā |
ye ca lakṣmi mṛtāḥ sarve hatā ye ca gaṇāśca te || 84 ||
[Analyze grammar]

mayā smṛtā manojanyā abhavan jīvanānvitāḥ |
āgatya purataḥ śaṃbhostasthuste navasṛṣṭayaḥ || 81 ||
[Analyze grammar]

vṛṣabhādyā mṛtāścāpyujīvitāstatra vai mayā |
gaṇānāṃ koṭayaḥ sarvā devānāṃ koṭayastathā || 86 ||
[Analyze grammar]

sarvā mayā prasaṃkalpya svasthāścojjīvitāstadā |
śaṃkarasya punarjīvotsavaḥ kailāsake kṛtaḥ || 87 ||
[Analyze grammar]

satī śaṃbhoḥ svarūpācca tadojjagāma gocarā |
pratyakṣā vai mahādevī prasannā cā'bhavattataḥ || 88 ||
[Analyze grammar]

ārthayanmāṃ nityameva kailāse bhūtalopari |
sthātuṃ sākaṃ tvayā lakṣmyā śaṃbhuścā''rthayadeva tu || 89 ||
[Analyze grammar]

devāśca mānavāścāpyārthayanmāṃ puruṣottamam |
sthātuṃ kailāsake kṣetre dehināṃ śreyase'pi ca || 90 ||
[Analyze grammar]

tato'haṃ śivarājīśri tvayā sākaṃ sadā'vasam |
anādiśrīkṛṣṇanārāyaṇaḥ śrīpuruṣottamaḥ || 91 ||
[Analyze grammar]

anādiśrīśivanārāyaṇanāmnā śiveśvaraḥ |
tvaṃ tadā cā'bhavastatra śivanārāyaṇī priye || 92 ||
[Analyze grammar]

atha devā yayuḥ sarve mānavāḥ pitarastathā |
svasvalokān munayaśca kailāse'haṃ tato'vasam || 93 ||
[Analyze grammar]

ākalpāntaṃ śivarājñi jānāmyahaṃ na cetare |
smara te me'pi divyaṃ tatprākaṭyaṃ kamale priye || 94 ||
[Analyze grammar]

bhadrādrau śītale ramye viśāle'yutayojane |
tatra sthite tu kailāse bhūbhāge tvavasaṃ sadā || 95 ||
[Analyze grammar]

vaiṣṇavī pṛthivī sarvā tadā prā'bhūnmayā kṛtā |
devāśca vaiṣṇavāḥ sarve tvāsan bhaktiparā mama || 96 ||
[Analyze grammar]

mama bhakte phalaṃ lakṣmi rājase tāmase'pi ca |
asure vā sure vā'pi prāpte kāle'ṅkurāyate || 97 ||
[Analyze grammar]

tasmād bhaktiḥ sarvaśreṣṭhā bhuktimuktiphalapradā |
sthāpyate vai mayā dharmayutā kāle yuge dine || 98 ||
[Analyze grammar]

kalpānte vā samārambhe sthāpayāmi sadā hitām |
paṭhanācchravaṇāccā'sya bhuktirmuktirbhavedapi || 99 ||
[Analyze grammar]

smṛddhisampatputravāṃśca bhavedānandaśevadhiḥ |
mahaiśvaryayutaścāpi parameśasarūpavān || 100 ||
[Analyze grammar]

sarvavighnavināśaśca sarvā'mṛtaniṣevaṇaḥ |
bhavecchāśvatavāsaśca brahmasāyujyavān bhavet || 101 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne vedhasa ekatriṃśe vatsare hallakā'surasya brahmaṇo varadānād vijayayātrāyāṃ śaṃbhośśiracchede samujjīvanārtham anādiśrīśivanārāyaṇasya prākaṭyamityādinirūpaṇanāmā ṣaḍviṃśo'dhyāyaḥ || 26 ||
[Analyze grammar]