Chapter 24

śrīpuruṣottama uvāca |
śṛṇu tvaṃ śivarājñīśri brahmaṇaḥ pitṛvatsare |
navaviṃśe navatyātmakalpe ca saptame manau || 1 ||
[Analyze grammar]

āsīdvai mama loke'tra prākaṭyaṃ śṛṇu padmaje |
brahmaṇo guptaromabhyaścā'suraścitrarūpavān || 2 ||
[Analyze grammar]

mayūranāmako jajñe sapakṣapicchacañcukaḥ |
pādayuktaḥ kāmarūpadharaḥ parvatasannibhaḥ || 3 ||
[Analyze grammar]

ḍayamāno'mbare tvākarṣayati grahamaṇḍalam |
pṛthvyāṃ gacchan grāmakūṭān parvatān samakarṣati || 4 ||
[Analyze grammar]

jale'ntaḥ sampraviṣṭaḥ san saṃkṣobhayati vāridhīn |
kampayatyeva pṛthivīṃ devāṃstrastān karoti ca || 5 ||
[Analyze grammar]

mānuṣānnāgasarpāṃśca sahasraśo haratyapi |
kvacid bhavati devaḥ sa mahendrābhaḥ svarūpavān || 6 ||
[Analyze grammar]

kvacicca mānavaṃ rūpaṃ samrāṇṇibhaṃ bibhartti ca |
kvacinmaharṣitulyaśca tejaḥparidhiśobhanaḥ || 7 ||
[Analyze grammar]

jāyate kāmarūpo vai mohako balavānapi |
tapaścacāra rājasya lobhād varṣasahasrakam || 8 ||
[Analyze grammar]

brahmā tuṣṭo varaṃ prādānmṛtyurhariṃ vinā na te |
sa tvevaṃ prāpya vacanaṃ tuṣṭo niḥśaṃka eva ha || 05 ||
[Analyze grammar]

satye loke jane svarge mānave cātalādiṣu |
tattadrūpadharo bhūtvā yāti bhuṃkte prahṛṣyati || 10 ||
[Analyze grammar]

kvacid devagṛhān gatvā'mṛtaṃ bhuktvā prayāti ca |
devīṃ vā mānavīṃ nārīṃ hṛtvā yāti sthalāntaram || 11 ||
[Analyze grammar]

yakṣiṇīṃ rākṣasīṃ nītvā smṛddhiṃ nītvā prayāti vā |
dānavīṃ vā satīṃ nāgīṃ nītvā yāti vanāntaram || 12 ||
[Analyze grammar]

gā vatsatarīraśvān gajānnītvā prayāti ca |
merordroṇyāṃ vanāḍhyāyāṃ śatayojanavistare || 13 ||
[Analyze grammar]

araṇye svālayaṃ cakre smṛddhaṃ subhogaśobhanam |
hṛtvā hṛtvā narānnārīrdevīrvā rākṣasīśca vā || 14 ||
[Analyze grammar]

sarvaṃ naijaṃ sa kṛtvaiva bhuṃkte bhogamayaṃ ca tat |
yuddhe na maraṇaṃ yāti brahmaṇo varadānataḥ || 15 ||
[Analyze grammar]

sarvatra gatimatvācca vijayaṃ labhate sadā |
evaṃ samrāṭsamo jātaḥ pṛthivyāṃ svabalāddhi saḥ || 16 ||
[Analyze grammar]

nṛpānanyān śanairjitvā nṛpeśvaro'bhavattataḥ |
sāmrājyaṃ mama sarvatra pārthivaṃ ceti vakti ca || 17 ||
[Analyze grammar]

uddhoṣaṇāṃ kṛtavāṃśca cakravartyahameva yat |
balī sarvatra gatvaiva jayatyākṣitimaṇḍalam || 18 ||
[Analyze grammar]

nṛpān rājye'surān pratiṣṭhāpya rājyaṃ karoti ca |
evaṃ śanaiḥ samabhavaccakravartī mayūrakaḥ || 19 ||
[Analyze grammar]

pradharṣitumathendrāṇīṃ svargalokaṃ jagāma saḥ |
uddhṛtya tāṃ cāmbareṇoḍḍīya yāvad bhuvaṃ prati || 20 ||
[Analyze grammar]

prayāti tāvadevendro vajreṇainaṃ jaghāna ha |
vajraṃ cā'nalaprakhyaṃ tajjagrāsa cañcusaṃdhṛtam || 21 ||
[Analyze grammar]

atha trāsaṃ jagāmendraḥ vīkṣya māyūrakaṃ balam |
nivavṛte nijaṃ sthānaṃ dikpālebhyo nyavedayat || 22 ||
[Analyze grammar]

sajjāḥ sarve'pi dikpālā yuddhārthaṃ samupāyayuḥ |
yamaḥ kuberaśceśāno varuṇo nirṛto'nilaḥ || 23 ||
[Analyze grammar]

analo'rkaśca rudraśca pṛthvyāṃ sarve samāyayuḥ |
sabalāḥ sajjaśastrāśca vineduścāmbare ca te || 24 ||
[Analyze grammar]

bhutvā nādān samarārthān garjanā dyusadāṃ tathā |
mayūro niryayau śīghraṃ yuddhārthaṃ balasaṃyutaḥ || 25 ||
[Analyze grammar]

daśasāhasrasenānīsahito'bjabhaṭānvitaḥ |
yuyudhe ghorasaṃgrāmaṃ samvatsaraṃ hi mānavam || 26 ||
[Analyze grammar]

hataṃ sainyaṃ hi bahudhā svasya tadapyajīvayat |
āsuryā vidyayā mitho yuyudhe dyusadīśvaraiḥ || 27 ||
[Analyze grammar]

māyūrakā mahākrūrā āsurā vai samantataḥ |
sākaṃ devagaṇaiḥ sarve yuyudhire'tinirbhayāḥ || 28 ||
[Analyze grammar]

nānto yuddhasya bhavati māyūro nāpi naśyati |
virāmo na surāṇāṃ ca manuṣyā duḥkhino'bhavan || 29 ||
[Analyze grammar]

mānavyaśca surāṇyaśca satyo nāginya ityapi |
daityānyaścāpi vai trastā niryānti sma na vai bahiḥ || 30 ||
[Analyze grammar]

trailokyāṃ sarvalokeṣu prajāsu cāpi rājasu |
udvejanaṃ ca duḥkhaṃ ca vartate'sya sadā tadā || 31 ||
[Analyze grammar]

nirviṇṇāścā'tha vai devāḥ pariśramaṃ gatā bahum |
nistejasko ravirjāto mahendro bhagnamānasaḥ || 32 ||
[Analyze grammar]

varuṇaḥ kṣīṇaśaktiśca yamo vibhramatāṃ gataḥ |
nirṛto'pi kṣīṇasainyo'bhavattatra raṇe tathā || 33 ||
[Analyze grammar]

īśāno'pi hatotsāhaḥ kuberaḥ kṣīṇasattvakaḥ |
agnistaikṣṇyavihīnaśca marudrodanamācaram || 34 ||
[Analyze grammar]

anye devā gatāśāścā'bhavannṛpāstu tadvaśāḥ |
evaṃ kāle samāpanne duḥkhe ca sarvato'dhike || 35 ||
[Analyze grammar]

devā raṇaṃ vihāyaiva yayuste brahmaṇo gṛham |
prārthayāmāsuratyarthaṃ jagaduḥ svāpakṛṣṭatām || 36 ||
[Analyze grammar]

āsurasya balaṃ cāpi rakṣārthaṃ cānvarodhayan |
brahmā śrutvā tu tānāha yatiṣye bhavatāṃ kṛte || 37 ||
[Analyze grammar]

sarve caivā'tra tiṣṭhantvārādhayantu hariṃ param |
hariṃ vinā na vai tasya nāśako'nyo'sti madvarāt || 38 ||
[Analyze grammar]

ityuktā devatādyāścārādhayāmāsurutsukāḥ |
māmanādiśrīśanārāyaṇaṃ śrīpuruṣottamam || 39 ||
[Analyze grammar]

ahaṃ sākaṃ tvayā lakṣmi gajā''rūḍho'kṣarād drutam |
upāyayau satyalokaṃ tadā brahmasabhāsthalam || 40 ||
[Analyze grammar]

brahmādyāḥ svāgataṃ pūjāṃ mama cakrustataḥ param |
jagadurnijaduḥkhaṃ cā'suranāśaṃ pravavrire || 41 ||
[Analyze grammar]

tadā'haṃ cā'suranāśaṃ padmaje samacintayam |
yāntu naijān pradeśānityavadaṃ ca surānaham || 42 ||
[Analyze grammar]

śīghraṃ surā yayurnaijān deśānahaṃ ca mānavam |
rūpaṃ dhṛtvā''jagāma kṣmāṃ yatrā''layo'surasya vai || 43 ||
[Analyze grammar]

kṣātraṃ rūpamahaṃ dhṛtvā saśaraṃ dhanuṣā yutam |
gatvā ca gopure tasya bhikṣāyātrāṃ vyadhāpayam || 44 ||
[Analyze grammar]

mayūraśca tadā dūtairvijñaptaḥ svayameva tu |
ātithyārthaṃ gopuraṃ svaṃ cā''jagāma samutsukaḥ || 45 ||
[Analyze grammar]

natvā māṃ kinnu bhikṣāyāṃ yācase tviti cā''ha saḥ |
yuddhabhikṣāṃ dehi me'tra yāce'haṃ nā'parāmiti || 46 ||
[Analyze grammar]

yācitaḥ sa dadau bhikṣāṃ jalaṃ dhṛtvā kare tadā |
śastreṇa śastraṃ saṃyujya dhanuṣā''ptā mayā'pi sā || 47 ||
[Analyze grammar]

tatraiva yuddhaṃ hyabhavad gopurā'gre vanottame |
ghoraṃ tenaiva sākaṃ vai māsāntaṃ subhayaṃkaram || 48 ||
[Analyze grammar]

surāṇāṃ mānavānāṃ ca pitṝṇāṃ śīlasañjuṣām |
rājñāṃ cāpi pravīrāṇāṃ romaharṣaṇakārakam || 49 ||
[Analyze grammar]

devā ākāśamārgeṇa jñātvā yuddhapravartanam |
paśyantyāgatya tatraiva jayaṃ vadanti me tadā || 50 ||
[Analyze grammar]

eko'haṃ vai mayūreṇa yuddhaṃ karomi nā'paraḥ |
māsānte mama bāṇaiśca śastrairastrairgadādibhiḥ || 51 ||
[Analyze grammar]

bhinnapiccho'bhavattūrṇaṃ nirāśo'pyabhavattadā |
māyūrakānnijayoddhṛn yojayāmāsa saṃyuge || 52 ||
[Analyze grammar]

te sāhāyyakarāstasya māmāvṛttya samantataḥ |
yuyudhire'tivegena cā'rbudāste mayūrakāḥ || 53 ||
[Analyze grammar]

māyārūpadharāścāpi māyāśastradharāstathā |
māyāveṣadharāścāpi māyāyuddhakarāstathā || 54 ||
[Analyze grammar]

mṛṣādehadharāścāpi mṛṣāsainyanirūpiṇaḥ |
sarve mayā hatāstatra sudarśanena vai kramāt || 55 ||
[Analyze grammar]

dagdhā mṛtā mayūrāste sudarśanasya tejasā |
māyūrakī purī dagdhā bhaktā mayā surakṣitāḥ || 56 ||
[Analyze grammar]

śacyādikāḥ priyā yāśca mānavyaścāpi mānavāḥ |
narā nāryo devatāśca mayā tatraiva rakṣitāḥ || 57 ||
[Analyze grammar]

āsurāste hatāḥ sarve māyūravaṃśayoginaḥ |
sarve niravaśeṣāste kṛtāḥ sudarśanena vai || 58 ||
[Analyze grammar]

māyūrakastathā dṛṣṭvā vināśaṃ svasya sarvathā |
andho bhūtvā mahākhaḍgaṃ dhṛtvā kare vihāyasā || 59 ||
[Analyze grammar]

adriprāyaṃ vapuḥ kṛtvā papāta mama mastake |
hantuṃ māṃ khaḍgadhāreṇa tāvanmayā sudarśanam || 60 ||
[Analyze grammar]

adhastātpreritaṃ tasmai dadāha taṃ tadā'mbare |
bhasmībhūtaḥ samasto vai vyomnyeva samapadyata || 61 ||
[Analyze grammar]

devadundubhayo neduḥ puṣpavṛṣṭirmamopari |
candanā'kṣatavṛṣṭiśca jayaghoṣāstathā'bhavan || 62 ||
[Analyze grammar]

māyūravaṃśajā nāryo rurudurvai tadā mudhā |
devānāhūya ca tadā'vātaraṃ tatra pattane || 63 ||
[Analyze grammar]

māyūrake mahāraṇye sarvasmṛddhisuśobhane |
kārāgāraṃ vilokyā'pi tatsthānamocayaṃ janāna || 64 ||
[Analyze grammar]

devānamocayaṃ tūrṇaṃ tathā devīramocayam |
śacīmukhyādevatāścā'mocayaṃ mānavīstathā || 65 ||
[Analyze grammar]

tadrājye devatāḥ sarvā devāśca mānavā api |
māṃ kṣatraṃ paramātmānaṃ śrīhariṃ puruṣottamam || 66 ||
[Analyze grammar]

tīrthajalairabhiṣicya pupūjurhi vidhānataḥ |
pratiṣṭhāpayāmāsuśca śriyā sākaṃ samutsukāḥ || 67 ||
[Analyze grammar]

anekāḥ kanyakā nāryo mayūravaṃśajāstadā |
anāthā māṃ paraṃ nāthaṃ prāpya tā vavrire mudā || 68 ||
[Analyze grammar]

mayā yajñe pāvitāśca gṛhītā vidhinā kare |
brahmādyairarpitāḥ sarvā mama patnyastadā'bhavan || 69 ||
[Analyze grammar]

evaṃ mayā mayūrākhyo mahāsuro hataḥ purā |
māṃ vinā tasya vai nāśo nānyena nirmito yataḥ || 70 ||
[Analyze grammar]

tasya tejo nirgataṃ tu mayyeva śāntimāpa ha |
muktiṃgato'suraḥ so'pi tathā'nye'pi ca ye hatāḥ || 71 ||
[Analyze grammar]

sarve mokṣaṃ gatā me yat sudarśanena vai hatāḥ |
mocitāścāpi rājāno māṃ prapūjya pareśvaram || 72 ||
[Analyze grammar]

yayuste vai nijadeśān surāśca tridivaṃ gatāḥ |
nāgapatnyaśca mānavyastathā devyo'pyanāthikāḥ || 73 ||
[Analyze grammar]

māṃ vivāhya sthitā sarvā mama patnyastadā priye |
tvaṃ sarvāsāṃ rājarājñīnāmnī śrīrabhavastadā || 74 ||
[Analyze grammar]

ayonijā kṣātrarūpadhartrī matpārśvaśālinī |
atha picchānmayūrasya saṃgṛhya mārjanī tvayā || 75 ||
[Analyze grammar]

kṛtā bhūmārjanārthaṃ vai tathā matpārṣadairapi |
mārjanikāḥ kṛtāḥ sarvāḥ surūpāḥ śobhanā api || 76 ||
[Analyze grammar]

athā'haṃ svavimānena bhūtale sarvato diśi |
yatra yatrā'surāścāsan mayūreṇa nṛpīkṛtāḥ |
tatra tatraiva gatvā ca hatvā tān mūlataḥ priye || 77 ||
[Analyze grammar]

dadau rājyāni sarvāṇi kṣatriyebhyo yathāyatham |
evaṃ mayā mama sarvaṃ sāmrājyaṃ bhūtale'bhitaḥ || 78 ||
[Analyze grammar]

sthāpitaṃ ca tadā śreṣṭhaṃ vaiṣṇavaṃ paramātmanā |
anādiśrīkṛṣṇanārāyaṇena cakradhāriṇā || 79 ||
[Analyze grammar]

anādiśrīkṣatranārāyaṇarūpeṇa rakṣatā |
anādiśrīrājarājñīsahitena smara priye || 80 ||
[Analyze grammar]

mayā kṣātravṛṣāḥ sarve pālitāḥ kṣitimaṇḍale |
sarve yajñāḥ kṛtāścāpi rakṣitāśca prajā api || 81 ||
[Analyze grammar]

devatā rakṣitāścā'pi dharmamārgāḥ pravartitāḥ |
satraprathāḥ kṛtāścāpi vedamārgāḥ prapoṣitāḥ || 82 ||
[Analyze grammar]

nītayaḥ sthāpitāścāpi sādhavo rakṣitāstadā |
sanmaṭhāḥ kāritāḥ śreṣṭhā devādayāśca kāritāḥ || 83 ||
[Analyze grammar]

tīrthāni rakṣitānyeva bhikṣukāścāpi rakṣitāḥ |
kathā nārāyaṇasyā'pi sarvā nityaṃ pravācitāḥ || 84 ||
[Analyze grammar]

satyaḥ sādhvyaḥ pālitāśca dharme sadā prarakṣitāḥ |
bhaktiśca mama te cāpi sarvakṣmāyāṃ pravartitā || 85 ||
[Analyze grammar]

vaidikaścāpyātmabodhaḥ kalpe tadā mayoditaḥ |
sabhāyāṃ me tadā lakṣmi daśasāhasrasādhavaḥ || 86 ||
[Analyze grammar]

daśasāhasraviprāśca daśasāhasrasādhvikāḥ |
daśasāhasrabaṭavo daśasāhasravaidikāḥ || 87 ||
[Analyze grammar]

daśasāhasrā'tithayo daśasāhasrabhikṣukāḥ |
daśasāhasrā'nāthāśca daśasāhasrajāpakāḥ || 88 ||
[Analyze grammar]

daśasāhasramakhino daśasāhasrasatriṇaḥ |
daśasāhasrayamino daśasāhasratāpasāḥ || 89 ||
[Analyze grammar]

vratino daśasāhasrā daśasāhasrapaṇḍitāḥ |
daśasāhasradāsāśca daśasāhasradāsikāḥ || 90 ||
[Analyze grammar]

daśasāhasrayogajñā daśasāhasracāraṇāḥ |
nityaṃ tiṣṭhanti sattvasthā jñānayogaparāyaṇāḥ || 91 ||
[Analyze grammar]

mama bhaktiyutāḥ sarve mama satre prabhojinaḥ |
mama mūrteśca dhartāro dhyānamārge kṛtādarāḥ || 92 ||
[Analyze grammar]

babhūvuḥ kṛtavāsāśca sadā svātmanivedinaḥ |
mayā pṛthvyāḥ kṛtaṃ rājyaṃ sāptasāmudrasaṃvṛtam || 93 ||
[Analyze grammar]

mānavānāṃ hi mokṣārthaṃ devānāṃ sukhalabdhaye |
pātālādinivāsāśca svargādikanivāsinaḥ || 94 ||
[Analyze grammar]

anvasaraṃśca māṃ sarve bhejurmāṃ sakaleśvaram |
ākalpaṃ tu tadā cāhaṃ nyavasaṃ bhūtale'niśam || 95 ||
[Analyze grammar]

vaikuṇṭhatulyā pṛthivī nirātaṃkā tadā hyabhūt |
kalpadrumāstathā kāmadhenavaḥ kāmavallikāḥ || 96 ||
[Analyze grammar]

cintāmaṇayaḥ sarvatra tadā''san mama yogataḥ |
sadā kṛtayugaścāpi kālaścaikavidho'bhavat || 97 ||
[Analyze grammar]

mānasyaścāpi ca spārśanyaśca dārśanikāstathā |
tathā ca sahavāsinyaścāsan vai sṛṣṭayastadā || 98 ||
[Analyze grammar]

smara sarvaṃ rājarājñīśri tvaṃ rājādhirājatām |
jānāmyahaṃ tu tatsarvaṃ nānye jānantyabuddhayaḥ || 99 ||
[Analyze grammar]

avatārāḥ pare cāpi tadā''sanme yathocitāḥ |
devamānavarūpāśca tattatkāryanivartakāḥ || 100 ||
[Analyze grammar]

ityevaṃ kathitaṃ te'tra prākaṭyaṃ mama padmaje |
paṭhanācchravaṇādvā'pi bhuktimuktiphalapradam || 101 ||
[Analyze grammar]

itiśrīlakṣmīnārāyaṇīyasaṃhitāyāṃ tṛtīye dvāparasantāne vedhaso navaviṃśe vatsare māyūrakāsuranāśārtham anādiśrīrājanārāyaṇasya rājarājñīśrīsahitasya |
prākaṭyamityādinirūpaṇanāmā caturviṃśatitamo'dhyāyaḥ || 24 ||
[Analyze grammar]