Chapter 21

śrīpuruṣottama uvāca |
śṛṇu tvaṃ śivarājñīśri prākaṭyaṃ cāparaṃ mama |
caturviṃśe vatsare ca vedhasastvārṣasaṃjñake || 1 ||
[Analyze grammar]

kalpe śatatame ṣaṣṭhe manau yathā'bhavat purā |
tadānīṃ vedavidvāṃso brāhmaṇā yatayastathā || 2 ||
[Analyze grammar]

devatāḥ ṛṣayaścāpi pitaraścā'janirmite |
sarvamedhātmake yajñe mimilurmokṣadātaṭe || 3 ||
[Analyze grammar]

vicārāstatra sarveṣāmabhavan matparāyaṇāḥ |
kīdṛśo'yaṃ hariḥ sevyaścaikalo vāpi yugmakaḥ || 4 ||
[Analyze grammar]

nirguṇo vā saguṇo vā mūrto hyamūrtaṃ eva vā |
agnirūpo'thavā''dityasvarūpo vā'pyarūpakaḥ || 5 ||
[Analyze grammar]

atha tatra svayaṃ brahmā jagāda yugalātmakaḥ |
anye maharṣayaḥ prāhuścaika eva parātparaḥ || 6 ||
[Analyze grammar]

devāḥ prāhuḥ saguṇo'yaṃ yatayo nirguṇaḥ svayam |
sevanīyo yathāyogyo mūrtimānapare jaguḥ || 7 ||
[Analyze grammar]

karmaṭhāḥ prāhurevā'yaṃ sevanīyo hyamūrtakaḥ |
agnirūpo hariḥ sākṣāt pare prāhurhi bhāskaraḥ || 8 ||
[Analyze grammar]

sevanīyo brahmamūrtiścetyevaṃ vādamācaran |
nirṇayo naikarūpo'bhūt tadā viṣṇurjagāda ha || 9 ||
[Analyze grammar]

śaṃbhuścāyaṃ yathā tvasmān vadennirṇaya eva saḥ |
śaṃbhuḥ śrutvā harervākyaṃ prajagāda sabhājanān || 10 ||
[Analyze grammar]

dhyānaṃ kṣaṇaṃ prakurvantu svayaṃ dāsyati nirṇayam |
ityuktaṃ śaṃkaravākyaṃ sarvamedhā'dhvare tadā || 11 ||
[Analyze grammar]

dhyānamagnā abhavaṃśca devarṣipitṛmānavāḥ |
tāvad vyomno divyatejomayo'driḥ samupāyayau || 12 ||
[Analyze grammar]

avyāpnodambaraṃ sarvaṃ divaṃ bhuvaṃ digantaram |
tanmadhye suvimānaṃ cā'kṣarā'bhidhaṃ mama priyam || 13 ||
[Analyze grammar]

adṛśyata tadā lakṣmi tatrā'haṃ ca tvayā saha |
anādiśrīkṛṣṇanārāyaṇo'rdhakamalātanuḥ || 14 ||
[Analyze grammar]

pratyakṣaḥ puratasteṣāṃ dhyāne tataśca gocaraḥ |
ardhe śikhā śirasyāste'rdhe śrīkeśātmadhammilaḥ || 15 ||
[Analyze grammar]

ardhabhāle sutilakaṃ cārdhabhāle sucandrakaḥ |
dakṣe karṇe kuṇḍalaṃ ca vāme kuṇḍalikairiṇī || 16 ||
[Analyze grammar]

dakṣe tu nirmalaṃ cūrṇaṃ vāme netre tu kajjalam |
dakṣe śmaśrustathā riktā nāsā vāme sanitthakā || 17 ||
[Analyze grammar]

dakṣaṃ vakṣaśconnataṃ ca vāmaṃ stanasamanvitam |
dakṣahastau śaṃkhacakrayutau sukaṭakānvitau || 18 ||
[Analyze grammar]

vāmahastau padmamālāśṛṃkhalāvyajanānvitau |
dakṣe śrīvatsacihnārdhaṃ vāme mūrtyardhakaṃ ca me || 19 ||
[Analyze grammar]

dakṣodare'rdhatrivalī vāme samodarātmatā |
dakṣe'rdhaṃ naraliṃgaṃ ca vāme'rdhāyonirityapi || 20 ||
[Analyze grammar]

dakṣe tveko hi vṛṣaṇo vāme tu guptagranthikā |
dakṣapādaḥ saromā cā'romā vāmaḥ samujjvalaḥ |
naravaddīrghaphaṇakaḥ nārīvaddhrasvasatphaṇaḥ || 21 ||
[Analyze grammar]

dakṣārdhaṃ śyāmasaundaryaṃ vāmārdhaṃ kanakojjvalam |
dakṣārdhaṃ pītadhautrādisvarṇārdhamukuṭānvitam || 22 ||
[Analyze grammar]

vāmārdhaṃ kañcukīśāṭīsvarṇamukuṭikānvitam |
dakṣārdhaṃ narabhūṣāḍhyaṃ vāmaṃ nārīvibhūṣaṇam || 23 ||
[Analyze grammar]

dakṣaṃ puṃbalasaṃyuktaṃ vāmaṃ nārīsumārdavam |
evaṃ bhūtvā caika eva tathāpi dvisvarūpavān || 24 ||
[Analyze grammar]

pratyakṣaḥ puratasteṣāmardhaśrīśanarāyaṇaḥ |
dadhyuste cāntare māṃ ca tādṛśaṃ dvyekarūpiṇam || 25 ||
[Analyze grammar]

pupūjurmānavā devāḥ ṛṣayaḥ pitaro'pi mām |
brahmādyāḥ prārthayāmāsuratra kṣitau sadā vasa || 26 ||
[Analyze grammar]

evamevasvarūpastvaṃ lokakalyāṇahetave |
tato'haṃ mokṣadānadyāstaṭe merostu paścime || 27 ||
[Analyze grammar]

ādhvare bhūtale nityamavasaṃ sarvagocaraḥ |
ākalpāntaṃ parameśaḥ śikṣayan pratimā'rhaṇam || 28 ||
[Analyze grammar]

anādiśrīmadardhaśrīśvaranārāyaṇaḥ prabhuḥ |
tathaiva mandirādau ca gṛhe gṛhe ca sarvathā || 29 ||
[Analyze grammar]

mūrtiścaikavidhā me'bhūdardhaśrīśanarāyaṇī |
tathaivopāsanā dhyānaṃ pūjanaṃ veṣadhāraṇam || 30 ||
[Analyze grammar]

sarvaṃ me tādṛśaṃ hyāsīd bhaktaiḥ saṃsevitaṃ vapuḥ |
madicchayā mayā lakṣmi tatra kalpe tathā kṛtam || 31 ||
[Analyze grammar]

dhṛtaṃ rūpaṃ yatheṣṭaṃ vai yathā'kṣare viśiṣṭakam |
atha devādayo māṃ ca tataḥ paraṃ tathāvidham || 32 ||
[Analyze grammar]

pūjayantyupāsayanti sma ca muktiṃ vrajanti ca |
ityevaṃ me tatra kalpe prākaṭyamuditaṃ tava || 33 ||
[Analyze grammar]

ityevaṃ smara yugmaikyaṃ nijaprākaṭyamīśvari |
sarvaṃ jānāmyahaṃ lakṣmi tathā naikā'vatārakān || 34 ||
[Analyze grammar]

athā'gre cetaranme ca prākaṭyaṃ pravadāmi te |
pañcaviṃśe vedhasaśca dharmākhye vatsare tadā || 35 ||
[Analyze grammar]

kalpe pañcaśate cādye manau pitṛgaṇāḥ purā |
pṛthvyāmāgatya vaṃśebhyo jagaduḥ śrāddhabhojanam || 36 ||
[Analyze grammar]

tattadvaṃśodbhavā lokā vidyāvanto vyadhuśca tat |
śraddhayā pitṛsaṃghānuddiśya piṇḍādikaṃ daduḥ || 37 ||
[Analyze grammar]

te sarve pitaraścāpi vinirgatyā'rdhadehinaḥ |
prasāritakarābhyāṃ vai piṇḍān prajagṛhurmudā || 38 ||
[Analyze grammar]

prasannavadanāścāpi samujjvalakarāstathā |
nābhyūrdhvadṛśyadehāśca piṇḍān prāpyaiva tasthire || 39 ||
[Analyze grammar]

karasthabhojanāḥ sarve evameva sthirāstadā |
abhuñjānā abhavaṃśca maunāḥ śāntā nirutsukāḥ || 40 ||
[Analyze grammar]

tadā vaṃśajaviprādyairabhuñjānā vilokitāḥ |
pṛṣṭāśca pitaraḥ sarve kathaṃ bhuṅdhve na cārpitam || 41 ||
[Analyze grammar]

te prāhuśca hareḥ prāsādikaṃ nāstyetadeva yat |
tadabhakṣyaṃ sadāsmākaṃ yataśca vaiṣṇavā vayam || 42 ||
[Analyze grammar]

atha vaṃśyāḥ pṛṣṭavantaḥ kathaṃ prāsādikaṃ bhavet |
yadatra dṛśyate naiva na cā'ste ca narāyaṇaḥ || 43 ||
[Analyze grammar]

tadā te pitaraḥ prāhurharisūktaṃ japantviha |
haristvāgatya piṇḍādi pāyasānnaṃ grahīṣyati || 44 ||
[Analyze grammar]

atha te harisūktenā''rādhayanmāṃ tadā kṣaṇe |
anādiśrīkṛṣṇanārāyaṇaṃ śrīpuruṣottamam || 45 ||
[Analyze grammar]

ahaṃ sākaṃ tvayā lakṣmi pitṝṇāṃ bhaktirodhataḥ |
pratyakṣastatra vaṃśyānāmagre nābhyūrdhvadehakan || 46 ||
[Analyze grammar]

pitṛbhiḥ saha tatraiva niṣadya bhuktavān payaḥ |
pāyasaṃ cāpi miṣṭānnaṃ phalaṃ dalaṃ ca mūlakam || 47 ||
[Analyze grammar]

tvaṃ ca nārāyaṇīśri svanābhyūrdhvadṛśyavigrahā |
śṛṃgāritā mayā sākaṃ bhuktavatī ca pāyasam || 48 ||
[Analyze grammar]

atha te pitaraḥ sarve jalānnādikameva tu |
prāsādikaṃ mayā dattaṃ bhuktavantaḥ sukhotsukāḥ || 49 ||
[Analyze grammar]

tṛptāḥ sarve yayurbhuktvā pitṛlokān nijālayān |
ahaṃ sañjo'bhavaṃ yāvattāvad viprādibhiḥ kṣitau || 50 ||
[Analyze grammar]

prārthitau nityavāsārthaṃ nānyūrdhvadehadhāriṇau |
ardhadṛśyau divyarūpau sundarau saumyavigrahau || 51 ||
[Analyze grammar]

tathā'stvityucitaṃ matvā sthitavantau sadā kṣitau |
ākalpāntaṃ ca nābhyūrdhvārdhamūrtidhāriṇau sadā || 52 ||
[Analyze grammar]

mūrtayaścāpi tādṛśyo gṛhe vane ca mandire |
dhyāne'rhaṇe cotsave cā'bhavaṃstathā'rdhavigrahāḥ || 53 ||
[Analyze grammar]

anādiśrīkṛṣṇanārāyaṇaḥ śrīpuruṣottamaḥ |
anādyardhapitṛnārāyaṇākhyaḥ prathito'bhavam || 54 ||
[Analyze grammar]

smara lakṣmi tvayā sākaṃ mama mūrtiṃ tadā'rdhinīm |
athā'nye'pyavatārā me'bhavaṃstadā'pi koṭiśaḥ || 55 ||
[Analyze grammar]

jānāmyahaṃ samastāṃstānnānye jānanti vai gatān |
smaraṇādvandanāccāpi bhuktimuktipradān śubhān || 56 ||
[Analyze grammar]

nābhyadho māyiko bhāgo nārako janmasampradaḥ |
nābhyūrdhvaṃ pāvano bhāgo mokṣado darśito mayā || 57 ||
[Analyze grammar]

ardhordhvamūrtirūpeṇa tadā jñānaṃ tathā'bhavat |
evaṃ vijñāya sampūjya yātā dhāmā'kṣaraṃ janāḥ || 58 ||
[Analyze grammar]

atha vakṣye vedhasaśca ṣaḍviṃśe'naṅgavatsare |
kalpe saptaśate manau saptame'haṃ pareśvaraḥ || 59 ||
[Analyze grammar]

prāvirāsaṃ plakṣamadhye'nādiplakṣanarāyaṇaḥ |
tatra kalpe mahātmāno hyātmajñānaparāyaṇāḥ || 60 ||
[Analyze grammar]

āsan vai sādhavo dhīrā nārāyaṇaparāyaṇāḥ |
jaṭāvalkalavastrāścā'yācitānnādikā'śanāḥ || 61 ||
[Analyze grammar]

yadṛcchālābhasantuṣṭā lokakalyāṇakāriṇaḥ |
yajñopavītayuktāśca tilakānvitavigrahāḥ || 62 ||
[Analyze grammar]

kaṇṭhīmālādiśobhāśca dhyānabhajanakāriṇaḥ |
ekadā militāḥ sarve viṣṇunadyāstaṭe śubhe || 63 ||
[Analyze grammar]

bhaktyaraṇye tapo'rthaṃ vai bhaktyarthaṃ paramātmanaḥ |
saṃvādaṃ te pracakruśca parasparaṃ susaṃhatāḥ || 64 ||
[Analyze grammar]

tapaḥ śreyaḥpradaṃ kiṃ vā bhaktiḥ śreyaḥpradā dvijāḥ |
yadvobhayaṃ mataṃ śreyaḥpradaṃ ceduttamaṃ nu kim || 65 ||
[Analyze grammar]

ityevaṃ praśnasāre ca jāte kalyāṇayogiṣu |
eke prāhustapaḥ śreṣṭhaṃ pare prāhurna tattathā || 66 ||
[Analyze grammar]

tapasā kṣīyate pāpaṃ puṇyaṃ prajāyate śubham |
tena bhogopalabdhiśca svargaṃ ca maraṇaṃ kṣaye || 67 ||
[Analyze grammar]

tato vai laukikaṃ śreyastapaścānte na tattathā |
tasmād bhaktiḥ parā śreṣṭhā śreyaḥpradā hi śāśvatī || 68 ||
[Analyze grammar]

anye prāhuḥ sakāmā sā nā'tyantaśreyasaḥ pradā |
niṣkāmā śreyasī śreṣṭhā paraśreyaḥpradā hi sā || 69 ||
[Analyze grammar]

pare tvāhuryadi bhaktirniṣkāmā kāmanāṃ vinā |
phalahīnā vṛthā sā hi prayāsamātrarūpiṇī || 70 ||
[Analyze grammar]

tasmāt sakāmā sā kāryā sveṣṭasatphaladāyinī |
ityevaṃ vadamāneṣu maharṣiṣu tadā vṛṣaḥ || 71 ||
[Analyze grammar]

dharmadevo viprarūpaḥ samājastho'bravīdidam |
sarveṣāmantarātmā yaḥ sarvasākṣī virājate || 72 ||
[Analyze grammar]

sa devo'tra drume plakṣamaye dharmye virājate |
tasya pūjāṃ prakṛtvaiva praśnabhāro'tra pippale || 73 ||
[Analyze grammar]

nyasanīyaścottaraṃ ca tatsthaḥ kṛṣṇaḥ pradāsyati |
ityevaṃ tvekamatyaṃ vai kṛtvā maharṣayastadā || 74 ||
[Analyze grammar]

pippalaṃ tatra sampūjyā'śrāvayan parameśvaram |
kimatyantaṃ paraṃ śreyastapo bhaktiśca vā prabho || 75 ||
[Analyze grammar]

iti saṃśrāvya tasthuśca varṣaśataṃ tapo'nvitāḥ |
tathā'pi labdhavanto nottaraṃ plakṣāttapodhanāḥ || 76 ||
[Analyze grammar]

tāvad vyomagirā devaḥ pareśvaro jagāda tān |
tapasā na bhavecchreya ātyantikaṃ tapodhanāḥ || 77 ||
[Analyze grammar]

ārādhayantu māṃ brahmaparamaṃ sarvasākṣiṇam |
niṣkāmabhaktyā tuṣṭo'haṃ bhavāmi satataṃ dvijāḥ || 78 ||
[Analyze grammar]

bhaktyā cātyantikaṃ śreyaścātyantikamavāpsyatha |
ityuktāste jagaduśca kathaṃ bhaktirvinā harim || 79 ||
[Analyze grammar]

sākṣāddhariṃ vinā bhaktiḥ premasevā kathaṃ bhavet |
vayaṃ cet tapasā pūtāḥ pātrabhūtāḥ sma mādhava || 80 ||
[Analyze grammar]

asmanmadhye samāgatya śaśvattiṣṭha kṛpālaya |
bhaktāḥ priyāśca te nityaṃ yadarthaṃ cāmbare sthitaḥ || 81 ||
[Analyze grammar]

adṛśyo'pi bhaktapakṣī vyomavāṇyā'pi vatsalaḥ |
karoṣi śāsanaṃ śreyaḥpradaṃ matvā nijāñjanān || 82 ||
[Analyze grammar]

yathā śabdena ca tathā svarūpeṇā'pi śādhi naḥ |
pratyakṣeṇa nijānasmān samānandaya mādhava || 83 ||
[Analyze grammar]

ityukto'hamavadaṃstān bhāvayantu samāhitāḥ |
prāpte cārādhanāpāke bhaviṣyāmi hi gocaraḥ || 84 ||
[Analyze grammar]

atha nārāyaṇīśri svabhāgyāni cottamāni vai |
manyamānā dvijāstatra śatavarṣāṇi saṃsthitāḥ || 85 ||
[Analyze grammar]

ārādhayanto deveśeśvareśvareśvareśvaram |
sādhavaste nirāśāśca brahmāśāmātratatparāḥ || 86 ||
[Analyze grammar]

brahmarūpā brahmabhūtāḥ plakṣachāyāmupāśritāḥ |
jepurnārāyaṇaṃ māṃ ca bhejurmāṃ nāmakīrtanaiḥ || 87 ||
[Analyze grammar]

ānarcurmāṃ tulasyādyairdadhyurmāṃ mānase gṛhe |
gateṣu śatavarṣeṣu satāmabhyāsināṃ mama || 88 ||
[Analyze grammar]

sannidhāvabhavaṃ sākṣāt plakṣamūlasamāśritaḥ |
tvayā lakṣmyā sahitaḥ śrīplakṣanārāyaṇaḥ svayam || 89 ||
[Analyze grammar]

plakṣastambe garbhabhāge divye tejo'bhimiśrite |
sāvakāśe cidākāśe plakṣabrahmaṇi saṃsthitaḥ || 90 ||
[Analyze grammar]

vāme sākaṃ tvayā padme caturbhujo narāyaṇaḥ |
anādiśrīkṛṣṇanārāyaṇo'haṃ puruṣottamaḥ || 91 ||
[Analyze grammar]

svecchayaiva samudbhūtaḥ sādhuvāñcchāprapūrtaye |
śaṃkhacakragadāpadmasvastikadhvajaśūlavān || 92 ||
[Analyze grammar]

sarvadivyābharaṇaśca svarṇamukuṭakuṇḍalaḥ |
divyacampakavarṇābho divyāmbaradharastathā || 93 ||
[Analyze grammar]

divyatejobhisaṃvyāpto yugalātmā pareśvaraḥ |
sādhvicchāpūrakastatra pratyakṣaḥ śreyasāṃ pradaḥ || 94 ||
[Analyze grammar]

atha divyanayanāste vyapaśyanmāṃ drumāntare |
divyagṛhāmbare tatra drumā'bhinnaṃ pumuttamam || 95 ||
[Analyze grammar]

nemuścakrurdaṇḍavacca tuṣṭuvuḥ parameśvaram |
pupūjustatra militaiścopacārādibhistadā || 96 ||
[Analyze grammar]

snehabhaktyā sadā bhejurmāṃ prarakṣya ca maṇḍale |
ityevaṃ sarvalokānāṃ śreyaḥprado'bhavaṃ priye || 97 ||
[Analyze grammar]

anādiśrīkṛṣṇanārāyaṇaḥ svayaṃ sanātanaḥ |
puruṣottama evā'haṃ svecchayā sādhumaṇḍale || 98 ||
[Analyze grammar]

anādiśrīplakṣanārāyaṇātmā cā'bhavaṃ sthitaḥ |
vedmyahaṃ sarvameveti smara tvaṃ plakṣavāsinīm || 99 ||
[Analyze grammar]

tava mūrtiṃ śubhāṃ lakṣmīsvarūpiṇīṃ sanātanīm |
anye'pi cāvatārā me'bhavan śatasahasraśaḥ || 100 ||
[Analyze grammar]

īśvarā nāpi jānanti kutaḥ surāśca mānavāḥ |
paṭhanācchravaṇādasya śrāvaṇātsmaraṇādapi || 101 ||
[Analyze grammar]

sevanātplakṣavāsinyāste ca me sevanādapi |
bhuktiścāpi bhavenmuktirmuktiḥ śreṣṭhā ca vai bhavet || 102 ||
[Analyze grammar]

pippalaśrīṃ tvarcayed yaḥ pippale śrīnarāyaṇam |
tasya lakṣmyā anapāyo mokṣā'vāptirdhruvā bhavet || 103 ||
[Analyze grammar]

itiśrīlakṣmīnārāyaṇīyasaṃhitāyāṃ tṛtīye dvāparasantāne vedhasaścaturviṃśe vatsare'nādiśrīmadardhaśrīśanārāyaṇasya pañcaviṃśe vatsare'nādiśrīmadardhapitṛnārāyaṇasya ṣaḍviṃśe vatsare cā'nādiśrīplakṣanārāyaṇasya prākaṭyamityādinirūpaṇanāmaikaviṃśatitamo'dhyāyaḥ || 21 ||
[Analyze grammar]