Chapter 20

śrīpuruṣottama uvāca |
śṛṇu nārāyaṇīśri tvaṃ prākaṭyaṃ me tataḥ param |
sarveśvareśvareśānāṃ viniyantuḥ parātmanaḥ || 1 ||
[Analyze grammar]

trayoviṃśe vedhasaśca sanātanākhye vatsare |
dvipañcāśattame kalpe prathame ca manau purā || 2 ||
[Analyze grammar]

pṛthivyāṃ suranadyāśca taṭe kālādane vane |
madhumacchṛṃgavatpārśve kṣmāsurāḥ sma vasanti vai || 3 ||
[Analyze grammar]

tāpasā dhyānaparamā yajñayāgaparāyaṇāḥ |
brahmakāryaparāścāpi paramārthaparāyaṇāḥ || 4 ||
[Analyze grammar]

gṛhadharme sthitāḥ karmajñānamukhyāḥ vibhaktikāḥ |
manvate na bahubhaktiṃ sma te mokṣasya sādhanam || 5 ||
[Analyze grammar]

dharmayuktaṃ hi vijñānaṃ vivekaṃ bahu manvate |
jaḍājaḍavivekā ye nijadharmaparāyaṇāḥ || 6 ||
[Analyze grammar]

taranti sarvabhogāḍhyā api jñānena bandhanam |
akartā''tmā cāpyabhoktā nityaśuddho'sti varṣmasu || 7 ||
[Analyze grammar]

ahaṃmamatvarahito rāgadveṣavivarjitaḥ |
sukhaduḥkhavimuktaśca mukta eva na saṃśayaḥ || 8 ||
[Analyze grammar]

vāsanā''śayahīnaśca kriyāyatnavivarjitaḥ |
bahirbuddhivihīnaśca mukta eva na saṃśayaḥ || 9 ||
[Analyze grammar]

rajobhāvavihīnaśca kāmakrodhādivarjitaḥ |
vṛthāceṣṭāvihīnaśca mukta eva na saṃśayaḥ || 10 ||
[Analyze grammar]

strīputragṛhayukto'pi vanavāṭīsamanvitaḥ |
mahiṣīgovṛṣayuk ca nirbandho mukta eva saḥ || 11 ||
[Analyze grammar]

lokācārayuto nityaṃ śāstrācāraparāyaṇaḥ |
maryādāyāṃ vartamāno mukta eva na saṃśayaḥ || 12 ||
[Analyze grammar]

ityevaṃ vṛṣamukhyāste kṣmāsurā makhakarmiṇaḥ |
sustrīputrīputrayuktā vartante sma sarittaṭe || 13 ||
[Analyze grammar]

phalamūladalāhārāḥ sūryapakvāśanāstathā |
ṛtupakvāśanāścāpi vartante sma nirāśayāḥ || 14 ||
[Analyze grammar]

brahmaśīlaparāścāpi cīravalkaladhāriṇaḥ |
jaṭābhasmādiyuktāśca parṇakuṭyādivāsinaḥ || 15 ||
[Analyze grammar]

brahmacaryaṃ yathāyogyaṃ pālayanti vratāni ca |
yajñotsavān prakurvanti smotsavān jñānināmapi || 16 ||
[Analyze grammar]

evaṃ vai vartamānāste janeṣu bhūtalādiṣu |
sthāpayanti sma vai jñānaṃ sakarma mokṣasādhanam || 17 ||
[Analyze grammar]

bhaktiṃ smaranti naivaite dharme samāśrayanti ca |
tato vai caikadā bhaktyā patnyā'tikṛśayā patiḥ || 18 ||
[Analyze grammar]

dharmadevo'rthitaḥ puṣṭyai nijāyāḥ prāṇarakṣakaḥ |
kānta rakṣaka lokānāṃ patnīvrato'sti vai bhavān || 19 ||
[Analyze grammar]

tava puṣṭiṃ prakurvanti kṣmāsurāḥ kalpake'tra ca |
mama sthānaṃ na tatrā'sti mṛtiṃ yāsyāmi vai tataḥ || 20 ||
[Analyze grammar]

māṃ vihāya tvayā nātha na gantavyaṃ kadācana |
tava puṣṭirmama hānirnaitad yuktaṃ kadācana || 21 ||
[Analyze grammar]

yathā puṣṭirmama syācca tathā pālyā tava priyā |
apriyā cet tavā'haṃ vā'strīti tyājyā sadā khalu || 22 ||
[Analyze grammar]

yena me maraṇaṃ śreyaḥkaraṃ syānna tu jīvanam |
ityukto dharmadevo vai śuśoca kṣaṇamāntare || 23 ||
[Analyze grammar]

bhaktipuṣṭiṃ hṛdi kṛtvā nirṇayāmāsa tatkṛtim |
yayau nārāyaṇaṃ viṣṇuṃ parabrahma sanātanam || 24 ||
[Analyze grammar]

anādiśrīkṛṣṇanārāyaṇaṃ māṃ puruṣottamam |
akṣarākhye pare dhāmni cāgatya ca pupūja mām || 25 ||
[Analyze grammar]

prārthayad bhaktidevyāstu sthāpanārthaṃ kṣitau vṛṣaḥ |
parabrahma harekṛṣṇa nārāyaṇa pareśvara || 26 ||
[Analyze grammar]

adya kalpe kṣitau lokā dharmamātraparāyaṇāḥ |
karmakāṇḍaparāścāpi bhaktihīnā vivekinaḥ || 27 ||
[Analyze grammar]

jaḍacetanabhedajñāḥ kaivalyārthā bhavanti vai |
upāsanā na caivāsti nārāyaṇasya te prabho || 28 ||
[Analyze grammar]

arcāgandho'pi naivā'sti kṣmāyāṃ kvāpi harestava |
tataścārcāsvarūpasyā'rhaṇamupāsanādikam || 29 ||
[Analyze grammar]

pravartayituṃ bhagavan bhaktiṃ poṣayituṃ tathā |
jīvayituṃ bhaktibhedān prayāsaṃ vaha mādhava || 30 ||
[Analyze grammar]

śrutvaivaṃ prārthanāṃ dharmadevasya bhaktipoṣiṇīm |
drutaṃ lakṣmi sadāyuktayoginaṃ hi sadāśivam || 31 ||
[Analyze grammar]

prerayāmāsa pṛthvyāṃ vai gantuṃ khaṇḍayituṃ tathā |
kevalaṃ karmavādaṃ ca jñānavādaṃ ca kevalam || 32 ||
[Analyze grammar]

bhaktiṃ vinā niṣphalaṃ vai karma jñānaṃ na mokṣadam |
ityevamupadeśārthaṃ preṣayāmāsa śaṃkaram || 33 ||
[Analyze grammar]

sa ca bhūmau drutaṃ gatvā dṛṣṭvā lokāṃśca karmaṭhān |
bhaktihīnān kṣmāsurādīn racayāmāsa kautukam || 34 ||
[Analyze grammar]

digambaro yuvā bhūtvojjvalo mohakavigrahaḥ |
devyā yukto haraḥ puṣṭo yayau kṣmāsurakharvaṭam || 35 ||
[Analyze grammar]

yatra vasanti sarve te karmaṭhāḥ kṣmāsurādayaḥ |
tatpatnyaścāpi tatkanyāḥ kumārāśca dvijodbhavāḥ || 36 ||
[Analyze grammar]

karmaṭhāḥ sarva evaite bhedajñānaparā api |
bhaktihīnā divyadṛṣṭivihīnā dehamāninaḥ || 37 ||
[Analyze grammar]

kāmakrodhaparāścāpi devamāhātmyavarjitāḥ |
yogisādhupratimādimāhātmyavarjitāstathā || 38 ||
[Analyze grammar]

ātitheyavihīnāśca brāhmadaśāvivarjitāḥ |
saṃsāradṛṣṭiyuktāśca doṣabhaddhṛdayānvitāḥ || 39 ||
[Analyze grammar]

evaṃvidhāḥ kṣmāsurāste yatra vasanti saṃhatāḥ |
narā nāryo grāmavāsāḥ parṇakuṭyādivāsinaḥ || 40 ||
[Analyze grammar]

tatrā'yaṃ śaṃkaro nagno yayau ceṣṭāṃ tu kāminaḥ |
kurvan gṛhaṃ gṛhaṃ yāti kanyāstathā kumārakāḥ || 41 ||
[Analyze grammar]

yuvatyaśca tathā nāryo mattaṃ vilokya dehinam |
pramattaṃ sundaraṃ puṣṭaṃ mohakaṃ tamanudrutāḥ || 42 ||
[Analyze grammar]

narmavākyāni jagadurvīkṣayāmāsurīśvaram |
kāmukaṃ hasamānāśca cikṣipurdhūlikādikam || 43 ||
[Analyze grammar]

kāścittu tāḍayāmāsurnitambe daṇḍayaṣṭibhiḥ |
mohitāḥ śmāsurapatnyo'nujagmurbhānavarjitāḥ || 44 ||
[Analyze grammar]

pasparśuḥ sukhālobhena ninyurnirjanakuṃjake |
viprā vīkṣya tathā śrutvā karmakāṇḍaparāyaṇāḥ || 45 ||
[Analyze grammar]

mṛṣāvivekadhvajino'nupeturhananāya tam |
prāpya daṇḍairyaṣṭibhiśca tāḍayāmāsuratyati || 46 ||
[Analyze grammar]

śaṃkaro yuktayogyeva duḥkhaṃ jānāti naiva ha |
tāḍanaṃ balavat prāpya mamāra patito bhuvi || 47 ||
[Analyze grammar]

śavībhūto'bhavat tatra śvāsaṃ gṛhṇāti naiva ha |
samādhau vartate yadvanmṛto yathā'bhavattadā || 48 ||
[Analyze grammar]

te ca santyajya patitaṃ viprāḥ svasvālayān yayuḥ |
satī devī tataḥ kruddhā śaśāpa tān pratāḍakān || 49 ||
[Analyze grammar]

yato mithyājñānakarā vivekadhvajino dvijāḥ |
ātmasattāvihīnāśca nijā'kartṛtvamāninaḥ || 50 ||
[Analyze grammar]

akartṛtvamabhoktṛtvaṃ nityaśuddhatvamātmani |
aṃśamātraṃ na manvānā vāgāḍambaravedinaḥ || 51 ||
[Analyze grammar]

karmaṭhā deharūpāśca kāmakrodhaparāyaṇāḥ |
yogināṃ ca satāṃ divyamāhātmyasyā'vidastathā || 52 ||
[Analyze grammar]

kāmakriyāparā yūyaṃ svavatpare'bhiśaṃkinaḥ |
nirdayā brahmahatyākā mṛtiṃ yāntu yathā haraḥ || 53 ||
[Analyze grammar]

iti satyā cābhihite kheṭe kharvaṭake vane |
kṣmāsurā naravargāste drutaṃ kramānmṛtiṃ yayuḥ || 54 ||
[Analyze grammar]

śavā gṛhe gṛhe jātā narāṇāṃ vasatiṣvapi |
hāhākāro mahān jāto viprāvāseṣu cābhitaḥ || 55 ||
[Analyze grammar]

viprā mṛtiṃ prayāntyeva nagnanāryāḥ praśāpanāt |
kiṃ kartavyaṃ kva gantavyaṃ rakṣaṇārthamihā'dya vai || 56 ||
[Analyze grammar]

nāryo rudanti parito bālāḥ kanyā rudantyapi |
mānavāścāpi saṃśrutvā rudanti ca sthale sthale || 57 ||
[Analyze grammar]

ātmabhāvavihīnāśca vivekajñānavarjitāḥ |
vāṅmātrajñānakartāro bhedajñānavivarjitāḥ || 58 ||
[Analyze grammar]

karmaṭhāḥ krodhakāmādidoṣayuktāḥ śucānvitāḥ |
sarvatra mānave loke kṣitau deśeṣu vai tadā || 59 ||
[Analyze grammar]

kṣmāsurā gatabhānāśca gatāsavo'bhavaṃstadā |
dinamadhye tu sarvasyāṃ pṛthivyāṃ kamale tadā || 60 ||
[Analyze grammar]

koṭyarbudaśavānāṃ vai śmaśānānyabhavaṃstadā |
gṛhe gṛhe śavastatra kṣaṇe kṣaṇe prajāyate || 61 ||
[Analyze grammar]

kopo'yaṃ kaścidevā'pi mahattama iti striyaḥ |
anye janā aviprādyā menire sarvanāśakaḥ || 62 ||
[Analyze grammar]

yatra yatrā'bhavan viprāḥ karmaṭhā bhinnavādinaḥ |
bhaktihīnāśca te sarve śavatāṃ bhejire tadā || 63 ||
[Analyze grammar]

hāhākāre tathā jāte narā nāryo'vaśeṣitāḥ |
ārādhanāṃ pareśasya cakrurme paramātmanaḥ || 64 ||
[Analyze grammar]

tvaṃ prāṇastvaṃ jīvanaṃ ca tvaṃ rakṣākara mādhava |
tvaṃ strīṇāṃ śaraṇaṃ nātha jīvayā'smatpatīn janān || 65 ||
[Analyze grammar]

ityevaṃ stavanaṃ śrutvā nimittaṃ cāgame mama |
ahaṃ sākaṃ tvayā lakṣmi cāyayau puruṣottamaḥ || 66 ||
[Analyze grammar]

bhuvaṃ śīghraṃ śaṃkhacakragadāpadmādiśobhitaḥ |
svarṇabhūṣāmbaraśālī divyatejo'bhirājitaḥ || 67 ||
[Analyze grammar]

yatra haraśavaścāste yatra dvijaśavāstathā |
tatra pradarśya madrūpaṃ samāśvāsya ca yoṣitaḥ || 68 ||
[Analyze grammar]

tathā narān dvijabhinnānahaṃ dhairyaṃ paraṃ dadau |
karmaṭhā jñānakartāro vivekācāravarjitāḥ || 69 ||
[Analyze grammar]

śuṣkajñānā bhaktihīnāḥ sādhvaparādhakāriṇaḥ |
sadyaḥ phalamime prāptāścā'viditvā'parādhinaḥ || 70 ||
[Analyze grammar]

śuṣkajñāne mahatpāpaṃ jñātuścācāravarjinaḥ |
jñāyate yat procyate'pi nācaryate na dhāryate || 71 ||
[Analyze grammar]

tatpāpasadṛśaṃ pāpaṃ nānyad bhavati dehinām |
karmakāṇḍaratāśceme vivekadhvajinastathā || 72 ||
[Analyze grammar]

rāgadveṣavihīnatvaṃ pālayanti na sarvathā |
māritastvavadhūto'yaṃ yogī vivekavāṃśca taiḥ || 73 ||
[Analyze grammar]

sādhorbhaktivihīnaiśca mṛtiścāmantritā nijā |
atha lokā janā nāryaḥ papracchuḥ parameśvaram || 74 ||
[Analyze grammar]

kathameṣā mahāpattirvilīyeta praśādhi naḥ |
ahaṃ tadā'vadṃ tebhyo lakṣmi tatpūjanāya vai || 75 ||
[Analyze grammar]

śavaṃ taṃ māritaṃ gatvā pūjayantu pratiṣṭhitam |
prāṇapratiṣṭhāṃ kurvantu tanmūrtiṃ pūjayantu ca || 76 ||
[Analyze grammar]

ṣoḍaśādyupacārairvai naivedyārpaṇasevanaiḥ |
nīrājanādibhiścāpi stavanaiḥ pūjayantu tam || 77 ||
[Analyze grammar]

tadā prayāsyati dhvaṃsaṃ mṛtyorupadravastvayam |
śrutvā nāryo narāścāpi mṛṣāvivekavarjitāḥ || 78 ||
[Analyze grammar]

sarve nītvā susāmagrīścandanākṣatamālikāḥ |
dhūpadīpasunaivedyavastrālaṃkārapādukāḥ || 79 ||
[Analyze grammar]

āvāhanādikaṃ kṛtvā prapūjya sarvavastubhiḥ |
prāṇapratiṣṭhāṃ cakruste matpūrvāḥ strīnarādayaḥ || 80 ||
[Analyze grammar]

nīrājanaṃ pracakruśca tāvacchaṃbhuḥ sacetanaḥ |
bhūtvā netre samunmilyotthito'bhavat kṣaṇāntare || 81 ||
[Analyze grammar]

naivedyaṃ ca dadustasmai jalapānaṃ dadustataḥ |
harastadā prasannaścā'bhavad varārthamāha tān || 82 ||
[Analyze grammar]

sarve tadā'rthayāmāsurmṛtānāṃ jīvanaṃ punaḥ |
haraḥ prāha prapūjyaināṃ devīṃ labdhvā śubhāśiṣaḥ || 83 ||
[Analyze grammar]

jīvitāste bhaviṣyanti nānyathā tu kadācana |
atha devīṃ pupūjuste lakṣmi nāryo narāstathā || 84 ||
[Analyze grammar]

arthayāmāsurevā'pi mṛtānāṃ jīvanaṃ punaḥ |
śivā prāha yathā cātra pūjitā śaṃkarānvitā || 85 ||
[Analyze grammar]

tathā lakṣmīmimāṃ śrīmannārāyaṇasamanvitām |
pūjayantu tataḥ sarve mṛtā yāsyanti jīvanam || 86 ||
[Analyze grammar]

ityuktāśca narā nāryaḥ pupūjurmāṃ tvayā'nvitam |
tataḥ sarve cotthitāścā'parādhamṛtivarjitāḥ || 87 ||
[Analyze grammar]

te jīvaṃ prāpya māṃ jīvannārāyaṇeti vai jaguḥ |
khyātiṃ prāptastadā'nādijīvannārāyaṇo'pyaham || 88 ||
[Analyze grammar]

tvayā sākaṃ mama mūrti bhaktinārāyaṇātmikām |
sarvadā tu tato bhaktyā matpradarśitayā janāḥ || 89 ||
[Analyze grammar]

sevayāmāsuratyarthaṃ tyaktvā śuṣkaṃ vivecanam |
karmakāṇḍaṃ ca vai sarvasamarpaṇātmakaṃ vyadhuḥ || 90 ||
[Analyze grammar]

śaṃkarastān samastāṃścopādideśa madarpaṇam |
sarvavidhaṃ karmakāṇḍaṃ mama bhaktyātmakaṃ tataḥ || 91 ||
[Analyze grammar]

dharmayuktaṃ bhaktiyuktaṃ jñānaṃ tu vedanaṃ mama |
tataḥ pravartitaṃ tatra kalpe mokṣapradaṃ śubham || 92 ||
[Analyze grammar]

bhakterujjīvanaṃ jātaṃ bhaktimārgaḥ pravartitaḥ |
mūrtayo mama śaṃbhośca saśaktikāśca bhūtale || 93 ||
[Analyze grammar]

tatastairjīvamāpannaiḥ sthāpitā darśitā yathā |
pūjitāścāpi sarvatra bhaktiḥ puṣṭiṃ jagāma ha || 94 ||
[Analyze grammar]

evaṃ śaṃbhuḥ satīyuktaḥ kṛtvā kautukamuttamam |
sthāpayitvā kṣitau mūrtipūjāṃ bhaktiṃ tathottamām || 95 ||
[Analyze grammar]

yayāvadṛśyatāṃ cā'haṃ jīvanārāyaṇaḥ prabhuḥ |
tvayā sākaṃ kṣitau kalpāntakaṃ kālamuvāsa ha || 96 ||
[Analyze grammar]

ityevaṃ śivarājñīśri prākaṭyaṃ kīrtitaṃ mama |
anādiśrīkṛṣṇanārāyaṇasya paramātmanaḥ || 97 ||
[Analyze grammar]

dharmasya bhaktiyuktasyopāsanāyāśca puṣṭaye |
pūjāyā mama mūrteśca mūrteśca śaṃkarasya ca || 98 ||
[Analyze grammar]

nāsīlliṃgaṃ ca tatkalpe mūrtirāsīddharasya vai |
mama mūrtistadaivāsīnnāsīdviṣṇuśilā tadā || 99 ||
[Analyze grammar]

evaṃ pūrvaṃ tu yajjātaṃ vedmyahaṃ sarvameva tat |
smara tvaṃ mama pūjādi tadā prākaṭyamityapi || 100 ||
[Analyze grammar]

paṭhanācchravaṇāccāsya smaraṇāccintanādapi |
mama pūjāphalaṃ lakṣmi bhavedeva na saṃśayaḥ || 101 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne vedhasastrayoviṃśe vatsare bhakteḥ prārthanayā'nādiśrījīvanārāyaṇasya prākaṭyaṃ śaṃkaradvārā bhaktimārgapravartanaṃ cetyādinirūpaṇanāmā viṃśo'dhyāyaḥ || 20 ||
[Analyze grammar]